Mu i Buluke

Kana mu Sweli ku Itusisa Libroshuwa ze?

Nzila Ye Isa kwa Bupilo Bo Bu Sa Feli Kana Mu I Fumani?

I lukiselizwe balumeli

Mwa ku fela broshuwa ye: “Kabakala kuli kacenu ku na ni bulapeli bo buñata, kana mu kile mwa nahana mo lu kona ku zibela bulapeli bo bu lumelelwa ki Mulimu? Muñaa ndu ha sa alabile, mu apule fa likepe 19. Mu buisane paragilafu 4, mi mu buze muñaa ndu haiba wa lumela kuli mwa bulapeli bwa niti ku swanela ku ba ni batu ba ba latana mwahalaa bona ni ku lata ba bañwi. Mu bale Joani 13:35 ni ku fa muñaa ndu broshuwa yeo.”

Mwa kona ku lika muezezo wo: Haiba muñaa ndu a amuhela broshuwa ye, mu bulele kuli, “Kalulo 7 ya broshuwa ye i koñomeka lisupo ze silezi ze zibahaza bulapeli bwa niti. Ni ka tabela ku to mi potela hape kuli lu to nyakisisa lisupo ze hamoho.”

Mioya ya ba ba Shwile—Kana ya Kona ku Mi Tusa Kamba ku Mi Holofaza? Kana I Teñi Luli?

I lukiselizwe batu ba ba huliselizwe mwa libaka mo ku na ni batu ba ba saba hahulu batu ba ba shwile. Hape ya kona ku tusa kwa ku buisana ni batu ba ba lumela mwa pagatori ni lihele

Mwa ku fela broshuwa ye: “Ku na ni makande a mañata a batu ba ba li kuti ba kile ba ambola ni mioya ya batu ba ba shwile. Kana lwa swanela ku lika ku ambola ni batu ba ba shwile? (Mu bale Muekelesia 9:5. Mu litele kalabo) Mu apule fa likepe 4 mi mu buisane ni muñaa ndu maparagilafu a mane a makalelo. Broshuwa ye i na ni litaba ze ñata ze ama taba ya butokwa ye.”

Mwa kona ku lika muezezo wo: Haiba muñaa ndu a amuhela broshuwa ye, mu bulele kuli, “Kono litaba ze ba ipapatanga ku utwa ba bañwi, li zwa kai?” Mu lukise kuli mu to buisana ni muñaa ndu maparagilafu a 8 a makalelo a kauhanyo ye fa likepe 13 ha mu ka mu potela hape.

Muta Mutu Yo Mu Lata H’a Timela

I lukiselizwe batu ba ba mwa maswabi, kamba batu ba ba na ni bahabo ni balikani ba ba tokwa ku omba-ombiwa

Mwa ku fela broshuwa ye: “Ku shwelwa ki yo muñwi mwa lubasi ku tomohisa hahulu pilu. Hañata batu ba bañata ha ba zibangi mwa ku omba-ombela mabasi a mwa maswabi. Mina mu nahana cwañi? Mu litele kalabo. Kihona mu ka apula fa likepe 31, mi mu bonise muñaa ndu maswaniso a zuho a bonisizwe fateñi. Mu ekeze ka ku bulela kuli: Bibele i lu kolwisa kuli Mulimu a tuha a felisa manyando a batu. [Mu bale Likezo 24:15] Kihona mu ka bala maparagilafu 2 ni 3 a fa likepe 30, ni ku fa broshuwa.

Mwa kona ku lika muezezo wo: Haiba muñaa ndu a amuhela broshuwa ye, mu bulele kuli, “Broshuwa ye i nyakisisa litaba ze ñwi ze ñata ze tabisa ka za mulelo wa Mulimu wa za nako ya kwapili. Ni ka tabela ku to mi potela hape kuli lu to nyakisisa ni mina litaba zeo.”

Mwa Kona ku ba Mulikan’a Mulimu!

I lukiselizwe batu ba ba si ka ituta hahulu kamba ba ba sa zibi hande ku bala

Mwa ku fela broshuwa ye: “Kana mu nahana kuli lwa kona ku ba balikani ba Mulimu? [Mu litele kalabo. Kihona mu ka bala Jakobo 2:23.] Broshuwa ye, i lukiselizwe ku lu tusa ku ba balikani ba Mulimu, sina Abrahama.”

Mwa kona ku lika muezezo wo: Ibe fa musipili wa pili kamba wa bubeli, mu bonise muñaa ndu mo i ezezwanga tuto ya Bibele ka ku nyakisisa ni yena Tuto 1 kaufela kamba kalulo ya yona.