Jo-Rumi
12 Kuom mano, owetena, asayou kokalo kuom ng’wono mar Nyasaye ni uchiw ringreu kaka misango mangima, maler kendo ma Nyasaye oyiego, ka utiyone gi nyalou mar paro. 2 Kendo weuru luwo kit ngima mar joma odak e ndaloni, to lokreuru kuom miyo pachu obed manyien, mondo ung’e gadier dwaro maber mar Nyasaye, dwaro mowinjore, kendo malong’o chuth e wang’e.
3 Nimar kokalo kuom ng’wono mogundho mosemiya, awacho ne ji duto manie kindu kanyo ni, kik ng’ato opar ni olong’o moloyo kaka ochal, to mondo opar e yo ma miyo obedo gi paro malong’o, ka ng’ato ka ng’ato timo kamano ka luwore gi okang’ ma Nyasaye osepogonego yie. 4 Mana kaka ringruok achiel nigi fuonni mang’eny, to fuonnigo duto ok ti tich achiel, 5 e kaka wan bende, kata obedo ni wang’eny, wan ringruok achiel e winjruok gi Kristo, kendo ng’ato ka ng’ato kuomwa, wan fuonni moriw kanyachiel. 6 Omiyo, nikech wan gi mich mopogore opogore ka luwore gi ng’wono mogundho mosemiwa, ka en mar koro wach, wakor wach ka luwore gi yie mosepognwa; 7 kata ka en migawo moro mar tich, wasik ka watime; kata ng’at ma puonjo, osik ka opuonjo; 8 bende, ng’at ma jiwo ji, osik kotimo kamano; ng’at ma chiwo kony, osik kotime gi chuny moikore; ng’at ma tayo, osik kotime gi kinda; ng’at ma kecho jomamoko, osik kotimo kamano gi ilo.
9 Herau mondo obed ma onge wuondruok. Sinuru gi gik maricho; makreuru gi gik mabeyo. 10 Beduru mamor gi ng’ato ka ng’ato, kunyisoru hera kaka hera manie kind owete. Kuom wach miyo jomamoko duong’, beduru motelo. 11 Beduru jokinda, to ok josamuoyo. Kindau mondo oliel ka mach nikech roho maler. Tiuru kaka wasumbni mag Jehova. 12 Moruru kuom geno. Nanuru e bwo masira. Lamuru ma ok uwe. 13 Chiwuru ne joma ler ka luwore gi chan margi. Beduru gi tim mar rwako welo. 14 Dhiuru nyime guedho joma sandou; kwauru ne jomoko gueth, to kik ukuong’gi. 15 Moruru kanyachiel gi joma mor; ywaguru kanyachiel gi joma ywak. 16 Paro ma un-go kuom jomamoko obed ma chal gi ma un-go kuomu uwegi; kik ubed gi paro mong’awore malo, to luwuru gik ma nenore ni ni piny. Kik ubed mariek e wang’u uwegi.
17 Kik uchul richo kar richo ne ng’ato ang’ata. Temuru timo gik ma ji duto neno ni beyo. 18 Ka nyalore, to temuru matek mondo udag gi kuwe gi ji duto. 19 Owetena ma ahero, kik uchul kuor e lou uwegi, to weuru thuolo ne mirimb Nyasaye; nimar ne ondik niya: “Jehova owacho, ‘Chulo kuor en mara; abiro chulo.’” 20 To “ka kech kayo jasiki, miye chiemo; ka en gi riyo, miye gima domodhi; nimar kuom timo kamano ibiro biwo chuk mach ma kakni e wiye.” 21 Kik iyie mondo gima rach oloyi, to sik kiloyo gima rach kuom timo gima ber.