WUOK

1 Magi e nyinge yawuot Israel* ma ne odhi kode Misri,+ moro ka moro gi joode: 2 Reuben, Simeon, Lawi, gi Juda;+ 3 Isakar, Zebulun, gi Benjamin; 4 Dan gi Naftali; Gad kod Asher.+ 5 Jood Jakobo duto ne gin ji 70, Josef to ne ni Misri.+ 6 Bang’e, Josef gi owetene kod tieng’no duto ne otho.+ 7 To Jo-Israel nonyuolore kendo ne gibedo mang’eny mi gipong’o pinyno. Kwan-gi ne siko medore kendo ne gibedo oganda man gi teko miwuoro.+

8 Bang’ kinde, ruoth manyien ma ok nong’eyo Josef nochako locho e piny Misri. 9 Ruodhno nonyiso joge niya: “Uwinjo, Jo-Israel ng’eny kendo gin gi teko moloyowa.+ 10 Nyaka watang’ kodgi, nono to gibiro medore ameda. To ka lweny owuok, gibiro dok ne wasikwa mi giked kodwa, kae to giringo gia e pinywa.”

11 Omiyo, Jo-Misri noketo jotelo mondo osandgi gi tich matek,+ kendo ne gigero ne Farao mier mag keno miluongo ni Pithom gi Raamses.+ 12 To kaka ne gimedo sandogi, e kaka Jo-Israel ne medo pong’o pinyno. Mano nomiyo Jo-Misri ojok kodgi, kendo ne giluorogi ahinya.+ 13 Kuom mano, Jo-Misri nomedo sando Jo-Israel gi tich mapek ahinya.+ 14 Ne gimiyo ngimagi obedo malit gi tich matek. Ne ginyono lowo kendo loso matafari kaachiel gi kit tije duto matek mag pur. Ee, ne gisandogi malit ahinya gi kit tije duto matek.+

15 Bang’e, ruodh Misri nowacho ne nyi Jo-Hibrania ariyo ma jocholo* miluongo ni Shifra gi Pua 16 niya: “Sa asaya ma ucholo+ mond Jo-Hibrania, neguru nyathi moro amora ma wuoyi ma ginyuolo. To ka en nyathi ma nyako, kik unege.” 17 Kata kamano, nikech mon-go noluoro Nyasaye madier, ne ok ginego nyithindo ma yawuoyi+ kata obedo ni ruodh Misri nochikogi ni gineggi. 18 Bang’ kinde, ruodh Misri noluongo mon-go mopenjogi niya: “Ang’o momiyo ok usebedo ka unego nyithindo ma yawuoyi?” 19 Mon-go nodwoko Farao kama: “Mond Jo-Hibrania ok chal gi mond Jo-Misri nimar gin mine ma nigi teko kendo ma nyuol kata ka pok jacholo* ochopo irgi.”

20 Omiyo, Nyasaye nokonyo jochologo* kendo mano nomiyo Jo-Israel omedore mi gibedo oganda ma nigi teko ahinya. 21 To nikech jochologo* noluoro Nyasaye madier, bang’e gin bende Nyasaye noguedhogi gi nyithindo. 22 Gikone, Farao nochiko joge duto niya: “Ka Ja-Hibrania onyuolo nyathi ma wuoyi, wituru nyathino e Aora Nael, to ma nyako kik unegi.”+

2 Gie kindeno, Ja-Lawi moro nokendo Nya-Lawi.+ 2 Chiegeno nomako ich monyuolo wuoyi. Ka noneno kaka nyathino jaber, nopande kuom dweche adek.+ 3 Ka ne ok onyal medo pande,+ nokawo gimoro ma chalo okapu mochue gi togo momuone gi lam kod odok,* kendo nopielo nyathino e iye moketo okapuno e i togo e bath Aora Nael. 4 To nyamin+ nyathino nochung’ mabor matin mondo one gima ne dhi timorene.

5 Nyar Farao nobiro lwokore e Aora Nael. Jotichne ma nyiri to ne wuotho e bath aorano. Ka ne nyar Faraono oneno okapu moro e i togo, nooro jatichne moro ma nyako mondo oomnego.+ 6 Noelo okapuno ma oneno nyathi ma wuoyi ka ywak, kendo nyathino ne litne. Kata kamano, nowacho niya: “Mae en achiel kuom nyithind Jo-Hibrania.” 7 Eka nyamin nyathino nokwayo nyar Farao kama: “Adhi aluongni achiel kuom mond Jo-Hibrania mondo oritni nyathini?” 8 Nyar Farao nodwoke niya: “Tim kamano!” Mi nyakono nowuok piyo modhi oluongo min+ nyathino. 9 Nyar Farao nowacho ne miyono niya: “Dhi ipidhna nyathini, abiro chuli.” Omiyo, dhakono nokawo nyathino. 10 Ka nyathino nosedongo matin, miyono notere ir nyar Farao modoko wuode.+ Nyar Farao nochako nyathino ni Musa* nikech nogole e pi.+

11 E ndalogo, ka Musa nosebedo maduong’, nodhi ir Jo-Hibrania wetene mondo one kaka ne isandogi gi tich matek.+ Noneno ka Ja-Misri moro goyo Ja-Hibrania. 12 Nong’iyo koni gi koni, to ka ne ok oneno ng’ato, ne onego Ja-Misrino mi opande e i kuoyo.+

13 Ka kinyne nowuok kendo, noyudo ka Jo-Hibrania ariyo gore. Nopenjo jal ma nokwinyo wadgi niya: “Igoyo nyawadu nang’o?”+ 14 Jalo nodwoke kama: “En ng’a moketi jatendwa kendo jang’adnwa bura? Koso idwaro nega mana kaka nyoro inego Ja-Misricha?”+ Mano nomiyo Musa obedo maluor ma ochako parore ni, “Kare wachni oseng’ere!”

15 Ka Farao nowinjo wachno, notemo nego Musa. Kata kamano, Musa noringo ma odhi dak e piny Midian.+ Ka nochopo kuno, nobet but soko moro. 16 To ne nitie jadolo mar Midian+ ma ne nigi nyiri abiriyo; nyigego nokelo jamb wuon-gi modho pi. Ne gidwaro twomo pi mondo gipong’go gik ma jamni modhoe. 17 To kaka pile, jokwath mamoko nobiro moriembogi. Ka Musa noneno mano, nokonyo nyirigo kendo nomiyo jambgi pi. 18 Ka ne gidok dala, Reuel*+ wuon-gi nopenjogi niya: “Obet nade ni kawuono uduogo piyo kama?” 19 Ne gidwoke niya: “Ja-Misri+ moro ne oresowa e lwet jokwath, kendo ne otwomo pi momiyo jambwa.” 20 Nopenjo nyige niya: “To en kanye? Ang’o momiyo ok ubiro kode? Dhiuru uluonge obi ochiem kodwa.” 21 Bang’ mano, Musa noyie dak gi Reuel,* mi nomiye Zipora+ nyare mondo obed chiege. 22 Bang’e, Zipora nonyuolo wuoyi kendo Musa nochake ni Gershom,*+ nimar Musa nowacho ni, “Asedoko jadak e piny ma wendo.”+

23 Bang’ kinde malach, ruodh Misri notho+ to Jo-Israel ne pod ng’ur kendo ne giywak malit nikech ne gin wasumbni, mi ywakgi nochopo malo e polo ir Nyasaye madier.+ 24 Bang’ kinde, Nyasaye nowinjo ywakgi+ mi noparo singruok ma nosetimo gi Ibrahim, Isaka, gi Jakobo.+ 25 Nyasaye noneno kaka Jo-Israel sandore, kendo wachno ne litne ahinya.

3 Musa ne kwayo jamb Jethro+ ma ne en jaduong’ne* kendo jadolo e piny Midian. Chieng’ moro ka en e thim kochomo yor podho chieng’ gi jamni, nochopo Horeb+ ma en god Nyasaye madier. 2 Malaika mar Jehova nofwenyorene e mach ma liel e yiend kudho+ moro. To kaka nomedo ng’iye, noneno ka yienno liel aliela to ok wang’. 3 Eka Musa nowacho niya: “We adhi anon ane hono ma miyo yadhno liel aliela to ok wang’.” 4 Ka ne Jehova Nyasaye oneno ka Musa sudo mondo ong’i yadhno, noluonge gie yadhno niya: “Musa! Musa!” mi Musa nodwoke kama: “An ka.” 5 Kae to Nyasaye nowachone niya: “Kik isud machiegni. Lony wuoche e tiendi, nikech ka michung’ieno en ka maler.”

6 Mi nomedo nyise kama: “An Nyasach kwereni,* Nyasach Ibrahim,+ Nyasach Isaka,+ kendo Nyasach Jakobo.”+ Mi Musa noumo wang’e nikech noluoro ng’iyo Nyasaye madier. 7 Jehova nomedo wachone niya: “Adier aseneno kaka joga sandore Misri, kendo asewinjo ywakgi nikech isandogi gi tich matek; ang’eyo maber lit ma giwinjo.+ 8 Analor mondo aresgi e lwet Jo-Misri+ kendo anagolgi e pinyno ka aterogi e piny ma jaber kendo malach, piny mopong’ gi chak kod mor kich,+ piny Jo-Kanaan, Jo-Hiti, Jo-Amor, Jo-Perizi, Jo-Hivi, kod Jo-Jebus.+ 9 Koro ne! Ywak mar Jo-Israel osechopona, bende aseneno kaka Jo-Misri sandogi marach.+ 10 Omiyo, koro bi mondo aori ir Farao mondo igol joga ma Jo-Israel oa e piny Misri.”+

11 To Musa nopenjo Nyasaye madier kama: “An ng’a ma dadhi ir Farao ma agol Jo-Israel e piny Misri?” 12 Nyasaye nodwoke niya: “Anabed kodi,+ kendo kisegolo joga Misri, unulama* e godni.+ Mano e ma biro nyisi ni an e ma ne aori.”

13 To Musa nowacho ne Nyasaye madier kama: “Ka adhi ir Jo-Israel ma anyisogi ni, ‘Nyasach kwereu oseora iru,’ to gipenja ni, ‘Nyinge ng’a?’+ Abiro dwokogi nang’o?” 14 Omiyo, kama e kaka Nyasaye nonyiso Musa: “Anabed Gima Adwaro* Bedo.”*+ Kae to nomedo wacho niya: “Ma e gima ininyis Jo-Israel, ‘Anabed oseora iru.’”+ 15 Nyasaye nowacho ne Musa kendo niya:

“Ma e gima ininyis Jo-Israel, ‘Jehova Nyasach kwereu, Nyasach Ibrahim,+ Nyasach Isaka,+ kendo Nyasach Jakobo+ oora iru.’ Ma e nyinga nyaka chieng’,+ kendo ma e kaka tienge duto biro para. 16 Koro dhiyo mondo ichok jodong Israel kendo iwachnegi ni, ‘Jehova Nyasach kwereu, Nyasach Ibrahim, Isaka, gi Jakobo, osefwenyorena kendo owachona kama: “Adier aseneno kaka isandou+ kendo aseneno gik mitimonu e piny Misri. 17 Omiyo, aseng’ado ni abiro golou e sand+ muyudo e lwet Jo-Misri mi ateru e piny Jo-Kanaan, Jo-Hiti, Jo-Amor,+ Jo-Perizi, Jo-Hivi, kod Jo-Jebus,+ ma en piny mopong’ gi chak kod mor kich. ”’+

18 “Jodong Israel biro winji+ kendo ibiro dhi kodgi ir ruodh Misri, to unuwachne niya: ‘Jehova Nyasach Jo-Hibrania+ osewuoyo kodwa. Koro yienwa wadhi wuodh ndalo adek e thim mondo wachiw misango ne Jehova Nyasachwa.’+ 19 Kata kamano, ang’eyo maber ni ruodh Misri ok bi yienu udhi mak mana kochune.+ 20 Omiyo, abiro rieyo lweta kendo goyo Misri gi masiche madongo, eka obiro weyou mondo udhi.+ 21 Abiro miyo Jo-Misri onyis joga ng’wono, kendo chieng’ muwuok, ok unuwuog gi lwetu nono.+ 22 Dhako ka dhako biro kwayo jirande kaachiel gi dhako modakgo e ode gik molos gi fedha kod dhahabu, kaachiel gi lewni, kendo yawuotu gi nyiu norwakgi; omiyo, unuyak Jo-Misri adier.”+

4 To Musa nodwoko niya: “To nade ka ok giyie ni in e ma iora kendo gitamore winja+ ka giwacho ni, ‘Jehova ok ofwenyoreni?’” 2 Jehova nopenje niya: “Mano ang’o miting’o e lweti?” Nodwoke ni, “En luth.” 3 Nonyise niya: “Bole piny.” Omiyo, nobole piny mi ludhno nolokore thuol,+ kendo Musa noringe. 4 Jehova koro nonyiso Musa niya: “Rie lweti imak yiwe.” Norieyo lwete momake, mi thuondno nolokore luth e lwete. 5 Eka Nyasaye nowachone kama: “Kitimo kamano, gibiro yie ni Jehova Nyasach kweregi, Nyasach Ibrahim, Nyasach Isaka, kendo Nyasach Jakobo+ osefwenyoreni.”+

6 Jehova nowachone kendo kama: “So ane lweti e ofuko manie kor lawi.” Musa notimo kamano. To ka nogolo lweteno oko, noyudo ka dhoho omako lwete mobedo ma rachar ka pe!+ 7 Mi nowacho ne Musa kama: “So lweti kendo e ofuko manie kor lawi.” Mi nosoyo lwete. To ka nogole, lweteno nodoko mangima kaka dende duto! 8 Bang’ mano, nonyise niya: “Ka gitamore winji kata yie gi hono mokwongono, to gibiro yie gi hono mar ariyoni.”+ 9 To ka ok giyie gi honni ariyogo kendo ok giwinji, twom pi e Aora Nael kendo iol pigno e lowo motwo, to pigno biro lokore remo.”+

10 Koro Musa nonyiso Jehova niya: “Yie ing’wonna Jehova, nimar ok ang’eyo wuoyo maber chakre chon kata sani miwuoyoe kodani, nikech aradwal kendo lewa pek.”+ 11 Jehova nopenje kama: “En ng’a ma nochueyo dho dhano, kata ma miyo dhano doko momo, ite dino, wang’e neno, kata obedo muofu? Donge en mana an Jehova? 12 E momiyo dhiyo, anakonyi sa miwuoyo, kendo ananyisi gima onego iwachi.”+ 13 To ne okwer niya: “Asayi Jehova, or ng’at machielo.” 14 Mirima nomako Jehova nikech dwokono, mowacho ne Musa kama: “Donge Harun+ owadu ma Ja-Lawi nitie? Ang’eyo ni onyalo wuoyo maber. Kendo en e yo obiro mondo oromni. Obiro mor ahinya koneni.+ 15 Iwuo kode kinyise weche ma achiki,+ kendo nakonyu sa ma uwuoyo,+ mi ananyisu gima onego utim. 16 En e mobiro wuoyo gi jogo e loyi, to in nibedne kaka Nyasaye.+ 17 Kendo dhi gi luth manie lwetino mondo itimgo honni.”+

18 Koro Musa nodhi ir Jethro jaduong’ne*+ mowachone niya: “Yiena adog Misri mondo ane ka owetena pod ngima.” Jethro nodwoke niya: “Dhi gi kuwe.” 19 Bang’ mano, ka Musa pod ne ni Midian, Jehova nonyise niya: “Wuog idog Misri, nimar jogo duto ma ne dwaro negi osetho.”+

20 Eka Musa nokawo chiege gi yawuote moketogi e punda, mi omako wuoth kochomo piny Misri. Bende, Musa noting’o ludh Nyasaye madier e lwete. 21 Mi Jehova nonyiso Musa kama: “Asemiyi teko mar timo honni.+ Omiyo, kisedok Misri, ne ni itimo honnigo duto e nyim Farao. To abiro weyo chuny Farao obed matek+ mi ok noyie ne joga mondo odhi.+ 22 Nyis Farao ni Jehova Nyasaye owacho ni Israel en wuode makayo.+ 23 Ochiki ni, iwe wuode odhi olame. To kitamori, obiro nego wuodi, to mana wuodi makayo.”+

24 Koro ka ne gin e yo, Jehova*+ Nyasaye nobiro ka ma ne gibuoroe kodwaro nege.*+ 25 Gikone, Zipora+ nokawo kidi mabith moterogo wuode nyangu kendo pien nolwar e tiend jalno,* mi Zipora nowacho kama: “En nikech in chwora mar remo.” 26 Omiyo, Nyasaye nowere kode.* Nyangu e ma nomiyo Zipora owacho ni, “In chwora mar remo.”

27 Kae to Jehova nonyiso Harun niya: “Dhi e thim mondo irom gi Musa.”+ Omiyo, nodhi moromo kode e god Nyasaye madier+ mi omose konyodhe. 28 Kendo Musa nonyiso Harun weche duto ma Jehova noorego,+ kod honni duto ma Nyasaye nochike mondo otim.+ 29 Eka Musa gi Harun nodhi mi gichoko jodong Israel duto.+ 30 Harun nonyisogi weche duto ma Jehova nosewacho ne Musa, kendo notimo honnigo+ e wang’ ji duto. 31 Bang’ neno mago, ji noyie.+ Ka ne giwinjo ni Jehova oseparo Jo-Israel+ kendo ni oseneno sandruokgi,+ ne gikulore piny.

5 Bang’e, Musa gi Harun nodhi ir Farao mi ginyise niya: “Jehova Nyasach Israel owacho kama, ‘We joga odhi otimna sawo e thim.’” 2 To Farao nowacho niya: “Jehova to en ng’a,+ ma dawinj wachne mi awe Jo-Israel odhi?+ Akia Jehova, kendo ok abi weyo Jo-Israel mondo odhi.”+ 3 To ne gidwoke kama: “Nyasach Jo-Hibrania osewuoyo kodwa. Kuom mano, yienwa wadhi e thim, ma en wuoth ma biro kawowa ndalo adek, mondo wadhi wachiw misango ne Jehova Nyasachwa,+ nono to obiro negowa gi tuo kata gi ligangla.” 4 Ruodh Misri nodwokogi kama: “In Musa gi Harun, ang’o momiyo ugolo ji e tich? Doguru e tiju!”+ 5 Farao nomedo kama: “Neuru kaka jou ng’eny e piny, to un udwaro ni giwe tich.”

6 Chieng’no, Farao nochiko Jo-Misri ma jorit wasumbni kod Jo-Israel ma ne oket kaka jotendgi* konyisogi kama: 7 “Kik uchak umi Jo-Israel lum ma gilosogo matafari.+ Weuru gidhi giom lum giwegi. 8 To nyaka une ni pod giloso mana kwan mar matafari ma yande gisebedo ka giloso. Kik uduok kwanno chien nikech gin jo samuoyo. Mano e momiyo giywagore ni gidwaro dhi chiwo ne Nyasachgi misango. 9 Mednegiuru tich matek kendo ketgiuru gibed modich mondo kik gichik itgi ne weche manono.”

10 Kuom mano, jorit wasumbni+ kod jotendgi* nodhi monyiso ji niya: “Farao owacho kama, ‘Ok adhi miyou lum kendo. 11 Dhiuru umany lum uwegi ka ma duyudgie, to ok bi duoknu tich piny ngang’.’” 12 Eka Jo-Israel nokere e piny Misri duto mondo gimany lum. 13 Jorit wasumbni nomedo wachonegi kama: “Nyaka utiek tiju modiechieng’ kodiechieng’ mana kaka ne utimoga ndalo ma ne ikelonu lum.” 14 Bende, jorit mag Farao nogoyo+ Jo-Israel ma ne giketo e wi wasumbni ka gipenjogi kama: “Ang’o momiyo ok uloso kwan mar matafari ma ulosoga pile? Nyoro ne utimo kamano, kendo kawuono bende.”

15 Eka Jo-Israel ma ne oket e wi wasumbni nodhi ir Farao ka giywak niya: “Ang’o momiyo isandowa kama? 16 Ok miwa lum, to e ma pod iwachonwa ni, ‘Losuru matafari!’ Goch bende igoyowa, to jogi iwuon e ma nigi ketho.” 17 Farao nodwokogi kama: “Un jo samuoyo, un jo samuoyo!+ Mano e momiyo uwacho ni, ‘Wadwaro dhi, wadwaro dhi chiwo ne Jehova misango.’+ 18 Doguru e tich! Ok bi miu lum, to pod ubiro loso kwan mar matafari ma yande ulosoga.”

19 Jo-Israel ma ne oket e wi wasumbni noneno ni weche obedonegi matek ahinya nikech nochikgi ni kwan mar matafari ma yande giloso kik orem kata matin. 20 Bang’ wuok ir Farao, ne gidhi ir Musa kod Harun ma ne oyudo ritogi. 21 Ne ginyisogi niya: “Jehova mondo one gima usetimo, kendo ong’adnu bura nikech usemiyo Farao kod jotije osin kodwa, kendo useketo ligangla e lwetgi mondo ginegwago.”+ 22 Mi Musa nodok ir Jehova monyise niya: “Jehova, ang’o momiyo isando jogi? Ang’o momiyo niora? 23 Chakre kinde ma ne adhi ir Farao mondo awuo e nyingi,+ osemedo mana sando jogi,+ to in pok itimo gimoro mondo iresgi.”+

6 Jehova nonyiso Musa niya: “Koro ibiro neno gima abiro timo ne Farao.+ Abiro tiyo gi lweta ma nigi teko mondo achune owe joga odhi, kendo mondo oriembgi gia e piny Misri.”+

2 Eka Nyasaye nonyiso Musa kama: “An e Jehova. 3 Ne ajafwenyora ne Ibrahim, Isaka, gi Jakobo kaka Nyasaye Manyalo Duto,+ to nyinga ma Jehova+ ne ok ging’eyago.+ 4 Ne atimo kodgi singruok bende ni abiro miyogi piny Kanaan ka ma ne gidakie kaka welo.+ 5 Asewinjo ywak Jo-Israel ma Jo-Misri oseloko wasumbnigi, mi aseparo singruokna.+

6 “Omiyo, nyis Jo-Israel niya: ‘An e Jehova, kendo abiro golou e tich ma Jo-Misri turougo kendo abiro gonyou uwe bedo wasumbni;+ anaresu gi lwedo ma nigi teko kendo anamigi kum mager.+ 7 Anakawu ubed joga, anabed Nyasachu, kendo unung’e ni an e Jehova Nyasachu+ ma golou e tich ma Jo-Misri turougo. 8 Kendo abiro terou e piny ma ne asingora ni abiro miyo Ibrahim, Isaka, gi Jakobo mondo amiu pinyno obed maru.+ An Jehova.’”+

9 Bang’e, Musa nonyiso Jo-Israel wachno, to ne ok giwinje nikech chunygi ne onyosore kendo nikech ne isandogi malit.+

10 Kae to Jehova nonyiso Musa niya: 11 “Dhi ir Farao ruodh Misri, kendo inyise ni owe Jo-Israel oa e piny Misri.” 12 To Musa nodwoko Jehova niya: “Ka Jo-Israel e ma odagi winja,+ Farao to diwinja nade, an ma aradwalni?”+ 13 Jehova nonyiso Musa gi Harun weche monego gidhi ginyis Jo-Israel kaachiel gi Farao ruodh Misri, mondo Jo-Israel owuog e piny Misri.

14 Jodong dhoudi mag Jo-Israel e magi: Yawuot Reuben wuod Israel makayo+ ne gin Hanok, Palu, Hezron, kod Karmi.+ Mago e dhout joka Reuben.

15 Yawuot Simeon ne gin Jemuel, Jamin, Ohad, Jakin, Zohar, kod Shaul ma ne en wuod Nya-Kanaan.+ Mago e dhout joka Simeon.

16 Yawuot Lawi+ kaluwore gi dhoutgi e magi: Gershon, Kohath, kod Merari.+ Lawi nodak higni 137.

17 Yawuot Gershon kaluwore gi dhoutgi+ ne gin Libni kod Shimei.

18 Yawuot Kohath ne gin Amram, Izhar, Hebron, kod Uziel.+ Kohath nodak higni 133.

19 Yawuot Merari ne gin Mali kod Mushi.

Mago e dhout Jo-Lawi kaluwore gi anyuolagi.+

20 Koro Amram nokendo Jokebed ma nyamin wuon-gi.+ Chiegeno ne onyuolone Harun kod Musa.+ Amram nodak higni 137.

21 Yawuot Izhar ne gin Kora,+ Nefeg, kod Zikri.

22 Yawuot Uziel ne gin Mishael, Elizafan,+ kod Sithri.

23 Harun nokendo Elisheba nyar Aminadab, ma nyamin Nashon.+ Chiegeno ne onyuolone Nadab, Abihu, Eleazar, kod Ithamar.+

24 Yawuot Kora ne gin Assir, Elkana, kod Abiasaf.+ Mago e dhout joka Kora.+

25 Eleazar+ wuod Harun nokendo achiel kuom nyi Putiel, monyuologo Finehas.+

Mago e jodong dhout Jo-Lawi kaluwore gi anyuolagi.+

26 Mano e anyuola mar Harun gi Musa. To kama e kaka Jehova nonyisogi: “Goluru Jo-Israel owuog Misri kochan-gi e dhoutgi.”+ 27 Musa gi Harun+ e ma ne owuoyo gi Farao ruodh Misri mondo Jo-Israel owuog Misri.

28 Chieng’ ma Jehova ne owuoyo gi Musa e piny Misri, 29 Jehova nowacho ne Musa niya: “An Jehova. Nyis Farao ruodh Misri weche duto ma asewachoni.” 30 Eka Musa nodwoko Jehova kama: “An ma aradwalni, Farao diwinja nade?”+

7 Jehova nowacho ne Musa niya: “Aseketi ibed kaka Nyasaye ne Farao, kendo Harun owadu dhi bedoni janabi.+ 2 Iniwach ne Harun owadu weche duto ma abiro chiki, to en e ma nowuo gi Farao, mi Farao nogol Jo-Israel oa e piny Misri. 3 Kendo anawe chuny Farao obed matek,+ mi anatim ranyisi kod honni mang’eny e piny Misri.+ 4 To Farao ok bi winjou, kendo abiro goyo Misri gi lweta ka akelo kuomgi masiche madongo,+ mi nagol joga ma Jo-Israel oa Misri ka gin oganda mang’ongo. 5 Kendo Jo-Misri nong’e ni an e Jehova+ e kindeno ma anarie lweta ka agoyogi mi agol Jo-Israel oa e pinygi.” 6 Musa gi Harun notimo gima Jehova nochikogi; ne gitimo mana kamano. 7 Ka ne Musa gi Harun odhi wuoyo gi Farao,+ Musa ne jahigni 80 to Harun ne jahigni 83.

8 Koro Jehova nonyiso Musa gi Harun kama: 9 “Ka Farao onyisou ni, ‘Timuru hono moro,’ to in Musa inyis Harun ni, ‘Bol ludhi piny e nyim Farao.’ Ludhno biro lokore thuol mang’ongo.”+ 10 Omiyo, Musa gi Harun nodhi ir Farao ma gitimo mana kaka Jehova nochikogi. Harun nobolo ludhe piny e nyim Farao gi jotichne, mi ludhno nolokore thuol mang’ongo. 11 Kata kamano, Farao noluongo jorieko kod ajuoke mag Misri,+ mi jogo bende notiyo gi juok e timo hono ma kamano.+ 12 Moro ka moro nobolo ludhe piny mi ludhego nolokore thuonde madongo; to thuond* Harun nomuonyo thuondegigo. 13 To e ma pod chuny Farao nobedo matek,+ kendo ne ok owinjogi, mana kaka Jehova nosewacho.

14 Eka Jehova nonyiso Musa niya: “Wi Farao pod tek.+ Osetamore weyo joga mondo odhi. 15 Dhi ir Farao gokinyi. Obiro dhi e Aora Nael. Dhi irite e dho aorano; iting’ luth ma ne olokore thuolcha.+ 16 Kendo ininyise ni, ‘Jehova Nyasach Jo-Hibrania oora iri+ ni awachni kama: “We joga odhi otina e thim.” To pod itamori weyogi nyaka sani. 17 Jehova owacho kama: “Ma e gima nomi ing’e ni an Jehova.+ Abiro goyo pi Aora Nael gi ludhni, mi pi nolokre remo. 18 Rech manie Aora Nael biro tho, kendo aorano biro golo tik mang’we marach, mi Jo-Misri ok nomodh pige.”’”

19 Jehova nowacho ne Musa niya: “Nyis Harun ni okaw ludhe orie e wi pige mag Misri,+ e wi aore madongo gi matindo, kendo e wi yewni,+ gi sokni mondo gilokre remo. Kotimo kamano, remo nobed e piny Misri duto nyaka e dapige mag yien kod kite.” 20 Gikanyono, Musa gi Harun notimo mana kaka Jehova nochikogi. Harun nokawo luth mogoyogo pi Aora Nael e nyim Farao gi jotichne, mi pi aorano duto nolokore remo.+ 21 Kendo rech ma ne nie Aora Nael+ notho,+ mi aorano nochako golo tik marach, kendo Jo-Misri ne ok nyal modho pige. Bende, remo ne nie Misri duto.

22 To ajuoke mag Misri bende notiyo gi tekogi mag juok+ e timo hono ma kamano, mi chuny Farao nomedo bedo matek, kendo ne ok owinjogi mana kaka Jehova nosewacho.+ 23 Bang’ mano, Farao nodok e ode ma ok odewo wachno kata matin. 24 Omiyo, Jo-Misri duto nochako kunyo bath Aora Nael ka gimanyo pi modho, nikech pi aorano ne ok modhre. 25 Mi Aora Nael nobet remo kuom ndalo abiriyo chakre Jehova ne loke kamano.

8 Kendo Jehova nonyiso Musa niya: “Dhi ir Farao inyise kama, ‘Ma e gima Jehova owacho: “We joga odhi olama.+ 2 To ka pod itamori weyogi, abiro kelo ogwende+ e alworani duto mondo asandugo. 3 Kendo ogwende biro pong’o Aora Nael mi ginidonj e i odi, nyaka kor nindo, e otandani, e ute jotichni, kendo ginibi kuom jogi, kendo ginidonj e kendo mutedee, kod bakunde mudwaloe mogo.+ 4 Ogwendego nochikre kuomi, kuom jogi, kendo kuom jotichni duto.”’”

5 Bang’e, Jehova nowacho ne Musa kama: “Nyis Harun ni okaw ludhe orie e wi aoche mag Misri, kod yewni, gi sokni, mondo ogwende owuog opong’ Misri.” 6 Omiyo, Harun norieyo lwete e wi pige mag Misri mi ogwende nochako wuok mopong’o piny Misri. 7 To ajuoke Misri notiyo gi tekogi mag juok e timo hono ma kamano, mi gin bende ne gimiyo ogwende obiro e piny Misri.+ 8 Eka Farao noluongo Musa gi Harun mowachonegi niya: “Kwanauru Jehova mondo ogol ogwendegi kuoma kendo kuom joga,+ nimar koro adwaro weyo Jo-Israel odhi ochiw ne Jehova misango.” 9 Musa nonyiso Farao niya: “In e ma koro inyisa sa monego akwa mondo ogol ogwende kuomi, kuom jotichni, jogi, kendo e i uteu mi gidong’ mana e Aora Nael.” 10 Farao nodwoke niya: “Timna kamano kiny.” Musa nonyise kama: “Biro timore mana kaka ikwayono mondo ing’e ni onge ng’at machielo machal gi Jehova Nyasachwa.+ 11 Ogwende biro weyi kaachiel gi jotichni kod jogi, kendo gibiro a e i uteu. Aora Nael kende e ma ginidong’ie.”+

12 Omiyo, Musa gi Harun noa e nyim Farao, mi Musa nosayo Jehova mondo ogol ne Farao ogwende.+ 13 Eka Jehova notimo kaka Musa ne okwaye, mi ogwende ma ne nie udi, e laru, kendo e puothe nochako tho. 14 Ne gichokogi pidhe pidhe modhuro, kendo piny nochako golo tik marach. 15 Ka Farao noneno ni osegol ogwende, chunye nodoko matek+ mi notamore winjogi, mana kaka Jehova nosewacho.

16 Jehova koro nowacho ne Musa niya: “Nyis Harun orie luth ochwadgo piny mondo buru olokre suna* e piny Misri duto.” 17 Mi ne gitimo kamano. Harun norieyo lwete mochwado piny gi ludhe kendo buru te nolokore suna e piny Misri, mi suna nosando ji kod le.+ 18 Ajuoke Misri bende notemo timo hono ma kamano+ mondo gikel suna, to mano notamogi. Suna ne ni kuonde duto, kuom ji kod le. 19 Eka ajuoke Misri nonyiso Farao niya: “Lwet Nyasaye e motimo mano!”+ To chuny Farao pod ne tek, mi notamore winjogi, mana kaka Jehova nosewacho.

20 Kae to Jehova nowacho ne Musa kama: “Kiny imond gokinyi ir Farao e dho Aora Nael nikech obiro dhi kanyo. Nyise ni Jehova Nyasaye owacho kama: ‘We joga odhi olama. 21 To kitamori weyogi, abiro kelo lwang’ni ma biro kayi, gi jotichni, gi jogi, kendo ginidonj e uteni. Ute Jo-Misri biro pong’ gi lwang’nigo, kendo ginium piny duto. 22 Chieng’no, narit piny Goshen ka ma joga odakie kendo ok nawe lwang’nigo odhi kuno,+ mi ining’e ni, an Jehova, an gi teko e wi pinyni.+ 23 Anaket pogruok e kind joga gi jogi. Hononi biro timore kiny.’”

24 Jehova notimo kamano, mi lwang’ni mang’eny nochako donjo e od Farao, e ute jotichne, kod e piny Misri duto.+ Lwang’ni noketho pinyno ahinya.+ 25 Gikone, Farao noluongo Musa gi Harun mowachonegi kama: “Dhiuru uchiw misango ne Nyasachu, to nyaka utime mana e piny Misri kae.” 26 To Musa nodwoke niya: “Ok owinjore watim kamano nikech misengni ma wabiro chiwo ne Jehova Nyasachwa gin gik makwero ne Jo-Misri.+ Ka po ni wachiwo misengnigo e wang’ Jo-Misri, donge gibiro goyowa gi kite? 27 Wabiro dhi wuodh ndalo adek e thim, to kuno e ma wanachiwie ne Jehova Nyasachwa misango mana kaka osechikowa.”+

28 Mi Farao nowacho kama: “Abiro weyou mondo udhi uchiw ne Jehova Nyasachu misango e thim. To en mana ni kik udhi mabor ahinya. Omiyo, kwanauru Nyasachu.”+ 29 Musa nowacho niya: “Koro ero awuok e nyimi mondo adhi asani Jehova, kendo kiny lwang’ni ma kechogi noweyi, gi jotichni, kod jogi. Kata kamano, kik ichak iwuondwa kitamowa dhi chiwo misango ne Jehova.”+ 30 Eka Musa nowuok e nyim Farao modhi sayo Jehova.+ 31 Mi Jehova notimo kaka Musa nokwaye, kendo lwang’ni noweyo Farao, gi jotichne, kod joge. Onge kata lwang’ni achiel ma ne odong’. 32 Kata kamano, chuny Farao ne obedo matek kendo mi ok noweyo Jo-Israel mondo odhi.

9 Jehova nowacho ne Musa niya: “Dhi ir Farao mondo inyise ni Jehova Nyasach Jo-Hibrania owacho kama: ‘We joga odhi olama.+ 2 To ka pod itamori weyogi, 3 Jehova biro monjo jamni magu.+ Obiro kelo tuo malich+ ma nego farese, punde, ngamia, dhok, kod rombe. 4 Jehova biro pogo jamb Jo-Israel kod jamb Jo-Misri kendo onge jamb Jo-Israel kata achiel ma biro tho.’”+ 5 Kendo ng’e ni Jehova oseng’ado chieng’ motimoe mano kowacho kama: “An e Jehova, kendo kiny natim mano e piny Misri.”

6 Kinyne, Jehova notimo kaka nowacho kendo jamni duto mag Jo-Misri nochako tho,+ to onge jamb Jo-Israel kata achiel ma ne otho. 7 Farao ne onono mofwenyo ni onge jamb Jo-Israel kata achiel ma ne otho. Kata kamano, chunye ne pod tek kendo ok noweyo mondo Jo-Israel odhi.+

8 Eka Jehova nowacho ne Musa kod Harun kama: “Jukuru buch kendo e lwetu koni gi koni mondo Musa okirgi e yamo e nyim Farao. 9 Buch kendono biro lokore buru mayom e piny Misri duto, mi nomi buche ma lokore adhonde omak ji kod jamni e pinyno duto.”

10 Omiyo, ne gikawo buch kendo mi gidhigo ir Farao. Musa nokiro burugo e kor yamo mi buche nochako kuodo dhano gi jamni, kendo buchego ne olokore adhonde. 11 Ajuoke mag Misri ne ok nyal dhi e nyim Musa, nikech gin bende buchego nokuodogi mana kaka nokuodo Jo-Misri duto.+ 12 To Jehova noweyo mondo chuny Farao obed matek, kendo ne ok owinjogi mana kaka Jehova nosewacho ne Musa.+

13 Eka Jehova nowacho ne Musa niya: “Kiny imond gokinyi e nyim Farao mondo inyise ni Jehova Nyasach Jo-Hibrania owacho kama: ‘We joga odhi olama. 14 Nikech wang’ni to adhi kelo masichena duto kuomi, kuom jotichni, kod jogi, mondo ing’e ni onge ng’at machielo ma chal koda e piny duto.+ 15 Nikech chop sani, di koro aserieyo lweta mondo akel tuo malich ma negi kod jogi, kendo di koro asetiekou e pinyni. 16 Ng’e ni gimomiyo aseweyi nyaka sani en ni mondo anyisi tekona, kendo mondo nyinga olandre e piny duto.+ 17 To e ma pod itamori weyo joga mondo odhi nikech wiyi tek! 18 Kiny kar sechegi anakel koth maduong’ ma biro chue gi pe madongo dongo ma pok nochuega e piny Misri nyaka nene. 19 Kuom mano, nyis ji mondo girwak jambgi kod gigegi duto e udi. Kodhno biro nego ng’ato ang’ata kata jamni moro amora ma ok bi bedo e ot.’”

20 Jotij Farao ma ne oluoro wach Jehova norwako jotijegi kod jambgi e udi mapiyo, 21 to ma ne ok odewo wach Jehova noweyo jotijegi kod jambgi oko.

22 Koro Jehova nowacho ne Musa niya: “Rie lweti kochomo polo mondo pe ogo ji, jamni, gi puothe duto man Misri.”+ 23 Kuom mano, Musa norieyo ludhe kochomo polo kendo Jehova nokelo mor polo gi pe, kod mach* e piny. Jehova nomiyo pe ogoyo piny Misri ma ok chogi. 24 Pe nogoyo piny, kendo polo bende ne mil. Ne en pe mang’eny ma pok nogoyoga piny Misri nyaka nene.+ 25 Pe nogoyo gimoro amora ma ne ni oko e piny Misri, kendo nogoyo dhano gi le, kod puothe, moketho yiende duto.+ 26 Piny Goshen kende, ka ma Jo-Israel nodakie, e ma pe ne ok ogoyo.+

27 Farao noluongo Musa gi Harun mowachonegi niya: “Koro ayie ni an e jaricho. Jehova ni kare, to an kaachiel gi joga e ma waketho. 28 Dhi usana Jehova mondo ochungnwa mor polo gi pe. Eka wang’ni to anaweu mondo udhi, kendo ok unumed bedo kae.” 29 Musa nodwoke kama: “Ka asewuok e gweng’uni, anarie lweta mondo asa Jehova. Mor polo kod pe biro rumo mondo ing’e ni piny duto en mar Jehova.+ 30 To gima ang’eyo en ni kata ka atimo kamano, in kaachiel gi jotichni ok ubi luoro Jehova Nyasaye.”

31 Koro pe noketho tworo gi shairi, nimar shairi nosemoyo kendo tworo nosechako thiewo. 32 Kata kamano, ngano kod kusemeth* to ne ok okethore nikech ne opidhgi achien. 33 Eka Musa nowuok e nyim Farao morieyo lwete kosayo Jehova mi mor polo gi pe norumo.+ 34 Ka ne Farao oneno ni koth, gi pe, kod mor polo oserumo, chunye nomedo bedo matek+ kaachiel gi jotichne bende. 35 Chuny Farao nomedo bedo matek mi ok noweyo Jo-Israel odhi mana kaka Jehova nosewacho kokalo kuom Musa.+

10 Eka Jehova nonyiso Musa niya: “Dhi ir Farao nimar aseweyo chunye kod chuny jotichne obed matek+ mondo atim honnigi e nyime,+ 2 kendo unyis nyithindu gi nyikwau kaka ne atimo honni ka agoyo Misri gi masiche malich;+ mi unung’e ni adier an e Jehova.”

3 Omiyo, Musa gi Harun nodhi ir Farao mi ginyise niya: “Jehova Nyasach Jo-Hibrania owacho kama, ‘Ibiro dagi winja nyaka karang’o?+ We joga odhi olama. 4 Ka pod itamori weyo joga, kiny nakel det-bonyo e piny. 5 Kendo gibiro pong’o piny ma kata mana lowo ok bi neno. Ginicham gik moko duto ma ne pe ok oketho kod yien duto bende.+ 6 Ginipong’ uteni, gi ute jotichni duto, kod ute Jo-Misri duto e okang’ ma wuoneu kod kwereu pok nonenoga nyaka nene.’”+ Bang’ mano, Musa noa e nyim Farao.

7 Jotich Farao nonyise niya: “Ng’atni biro thagowa nyaka karang’o? Wegi mondo gidhi gilam Jehova Nyasachgi. Donge iseneno kaka Misri osekethore?” 8 Mi nokel Musa gi Harun kendo e nyim Farao, mowachonegi kama: “Dhiuru ulam Jehova Nyasachu. To daher ng’eyo ni ng’a gini ma biro dhi? 9 Musa nodwoke kama: “Wabiro dhi gi jowa matindo gi madongo, nyiwa gi yawuotwa, kaachiel gi rombewa kod dhowa,+ nimar wadhi timo sawo ne Jehova.”+ 10 Farao nowachonegi niya: “Ka po ni anyalo weyou mondo udhi gi nyithindu, to kara adier Jehova ni kodu!+ Nyaka bed ni uchano timo gimoro marach. 11 Adagi! Jo ma chwo kende e ma nyalo dhi mondo gilam Jehova, nikech mano e ma nudwaro.” Bang’ mano, ne oriembgi gia e nyim Farao.

12 Jehova koro nowacho ne Musa niya: “Rie lweti e wi piny Misri mondo det-bonyo oum pinyno kendo ocham yien gi lum duto, gi gik moko duto ma ne pe ok oketho.” 13 Gikanyono, Musa norieyo ludhe e piny Misri, mi Jehova notugo yamo moa ugwe mokutho e wi pinyno odiechieng’ gi otieno duto. Kinyne gokinyi, yamb ugweno nokelo det-bonyo. 14 Dedego noumo piny Misri duto.+ Ne en masira malich,+ kendo dede mang’eny kamano pok ne obetie nyaka nene, kendo ok nobedie kendo. 15 Ne gipong’o piny duto, mi piny nolokore dede lilo; ne gichamo yien gi lum gi gik moko duto ma ne dongo e piny, kaachiel gi olembe duto ma pe ne oweyo. Onge kata lith oboke ma ne odong’ e piny Misri duto.

16 Koro Farao noluongo Musa gi Harun mapiyo mowachonegi kama: “Aseketho ne Jehova Nyasachu kod un bende. 17 Wenauru kethona, mana dichielni kende, kendo ukwa Jehova Nyasachu mondo ogolna masira malichni.” 18 Mi nowuok e nyim Farao modhi sayo Jehova.+ 19 Jehova noloko yamono mi yamono nokutho matek koa yor yimbo, motero dedego e Nam Makwar. Onge kata achiel ma ne odong’ Misri. 20 Kata kamano, Jehova noweyo chuny Farao obedo matek+ mi ne ok oweyo Jo-Israel mondo odhi.

21 Eka Jehova nowacho ne Musa niya: “Rie lweti kochomo polo mondo mudho mandiwa oim piny Misri.” 22 Gikanyono Musa norieyo lwete kochomo polo, mi mudho mandiwa noimo piny Misri duto kuom ndalo adek.+ 23 Ng’ato ne ok nyal neno nyawadgi, kendo onge ng’at ma ne owuok ka ma ne entie kuom ndalo adek. Kata kamano, kuonde ma Jo-Israel nodakie to ler ne nitie.+ 24 Farao noluongo Musa mowachone kama: “Dhiuru gi nyithindu mondo ulam Jehova.+ Rombe gi dhok kende e ma uwe chien.” 25 Musa nodwoke niya: “Bende, in iwuon e ma nyaka imiwa gik ma wadhi chiwo ne Jehova Nyasachwa kaka misengni miyang’o kod misengni miwang’o.+ 26 Omiyo, wanadhi gi jambwa. Onge kata achiel ma wabiro weyo chien nikech wabiro tiyo gi moko kuomgi e lamo Jehova Nyasachwa, to gie sani pod wakia ni mage ma wabiro chiwo ne Jehova nyaka wachop kuno.” 27 Mi Jehova noweyo chuny Farao obedo matek, kendo ne ok oyie weyogi gidhi.+ 28 Farao nonyiso Musa niya: “A e nyima! Kendo kik ichak iduog ira, nikech kichako iduogo kae to ibiro tho.” 29 Musa nodwoke kama: “Ok abi duogo iri kendo mana kaka isewachono.”

11 Eka Jehova nowacho ne Musa niya: “Pod nitie masira achiel ma abiro kelo ne Farao kod piny Misri. Bang’ masirano, obiro weyou mondo udhi.+ Obiro riembou mondo ua e piny Misri.+ 2 Omiyo, nyis chwo gi mon duto ni ng’ato ka ng’ato okwa jirande gik molos gi fedha kod dhahabu.”+ 3 Mi Jehova nomiyo Jo-Misri onyiso Jo-Israel ng’wono. E wi mano, jotich Farao gi ji duto e piny Misri ne miyo Musa luor ahinya.

4 Koro Musa nowacho niya: “Jehova owacho kama, ‘Kawuono e dier otieno abiro kalo e kind Jo-Misri,+ 5 kendo nyithind Jo-Misri duto makayo biro tho,+ chakre gi kachi in Farao mibet e kom-loch, nyaka kach misumba ma nyako ma rego e pong’. Bende, kach jamni duto biro tho.+ 6 Ywak maduong’ nobedie e piny Misri duto, ywak ma pok none, kendo ma ok nobedie kendo.+ 7 To onge gima rach ma biro timo Jo-Israel kata jambgi, kata mana guok ok bi gueyonegi. Mi ining’e ni an Jehova anyalo pogo kind Jo-Misri gi Jo-Israel.’+ 8 Jotichni duto nobi ira kendo ginikulre ka ginyisa ni, ‘Dhiyo gi jou duto.’+ Bang’ mano, anawuog.” Ka nosetieko wacho wechego, nowuok e nyim Farao ka en gi mirima mager.

9 Jehova koro nowacho ne Musa niya: “Farao ok bi winjou,+ to mano biro miyo atim honni mang’eny e piny Misri.”+ 10 Musa gi Harun notimo honnigi duto e nyim Farao.+ To Jehova noweyo mondo chuny Farao obed matek mi Farao ne ok oweyo Jo-Israel mondo owuog Misri.+

12 Kama e kaka Jehova nowacho ne Musa gi Harun e piny Misri: 2 “Dweni e ma nobednu dwe mokwongo. En e dwe mubiro chako kwanogo dweche mag higa.+ 3 Wach ne oganda Jo-Israel duto niya, ‘E odiechieng’ mar apar mar dweni, ginikaw rombo+ kaluwore gi kwand dhout wuonegi, tiende ni rombo achiel ne ot ka ot. 4 To ka po ni joot moro nok ahinya ma ok ginyal chamo rombo mangima ma gitieki, ginyalo riwore gi joot machielo man butgi. Sa ma giriwore, onego ging’e kar romb ring’o ma ng’ato ka ng’ato nyalo chamo. 5 Rombono onego obed nyayim ma jahiga achiel ma onge mbala,+ kata unyalo kawo nyadiel ma jahiga achiel ma onge mbala. 6 Kendo ginikane nyaka chieng’ mar 14 mar dweni,+ eka oganda mar Jo-Israel duto noyang’e godhiambo.*+ 7 Ginikir remo e frem mag dhoudi bathe koni gi koni kendo e wiye malo e ute ma gichiemoe.+

8 “‘Nyaka gicham ring’ono e otienono+ ka osebule e mach, kendo ginichame gi makate ma ok oketie thowi+ kod alode makech.+ 9 Kik uchame konumu kata kochwake, to onego ubule duto te e mach moriwo nyaka wiye, tiendene, kod nyimbiyene. 10 Kik uwe ring’ono onindi nyaka kiny gokinyi. To ka nitie modong’ nyaka okinyi, onego uwang’e e mach.+ 11 Unuchame ka usetueyo msip e nungou, kuserwako wuoche e tiendeu, kendo kuseting’o ludheu e lwetu, kendo onego uchame mapiyo piyo. En Pasaka mar Jehova. 12 E otienoni, abiro wuotho e piny Misri mondo aneg nyithindo makayo duto mag Misri, gibed nyithind ji kata mag le;+ kendo abiro kumo nyiseche duto mag Misri.+ An e Jehova. 13 Remo e ma biro bedo ranyisi e ute ma untie. Omiyo, ka aneno remono to abiro kalo uteu kendo masirano ok bi yudou sa ma agoyo piny Misri.+

14 “‘Unupar odiechiengni, kendo unutim ne Jehova sawo e odiechiengni e tiengeu duto. En chik mosiko kendo ubiro siko ka utime. 15 Onego ucham makate ma ok oketie thowi kuom ndalo abiriyo.+ E odiechieng’ mokwongo, onego uwit mogo duto mosedwal gi thowi, nikech chakre odiechieng’ mokwongo nyaka mar abiriyo ng’at mochamo gima oketie thowi ibiro neg. 16 Unutim chokruok maler e odiechieng’ mokwongo gi mar abiriyo. Kik utim tich moro amora e odiechiengego.+ Gima ubiro chamo kende e ma unyalo loso.

17 “‘Ubiro timo Sawo mar Makate ma Ok Oketie Thowi,+ nikech chieng’no e ma abiro goloue e piny Misri ka un oganda mang’ongo. Tiengeu duto nyaka rit odiechiengno nimar en chik mosiko. 18 E dwe mokwongo, e odiechieng’ mar 14 godhiambo nyaka odiechieng’ mar 21 godhiambo, onego ucham mana makate ma ok oketie thowi.+ 19 Kuom ndalo abiriyogo, kik mogo modwal gi thowi obed e uteu, nikech ng’at mochamo gimoro amora moketie thowi, bed ni en wendo kata Ja-Israel,+ ibiro neg.+ 20 Kik ucham gimoro amora moketie thowi, to ucham mana makate ma ok oketie thowi kamoro amora mudakie.’”

21 Musa noluongo jodongo duto mag Israel+ mapiyo mowachonegi kama: “Dhiuru uyier nyarombo kata nyadiel, ng’ato ka ng’ato ne joode, mondo uchiwe kaka misango mar Pasaka. 22 Eka ulut oboke mag yadh hisobu e remo manie karaya mondo ukire e frem mar dhoot, wiye malo kod bathe koni gi koni; kendo ng’ato kuomu kik wuog oko nyaka okinyi. 23 To sa ma Jehova biro wuotho mondo okel masira ne Jo-Misri kae to oneno remo e frem mag dhouteu, malo gi bathe koni gi koni, Jehova biro kalo dho uteugo kendo ok nokelnu masira mar tho.+

24 “Unupar sawoni kendo nobednu chik mosiko, un kaachiel gi nyithindu.+ 25 Kendo ka udonjo e piny ma Jehova nosingo ni nomiu, nyaka udhi nyime timo sawoni.+ 26 To ka nyithindu openjou ni, ‘Sawoni to tiende ang’o?’+ 27 Unudwokgi kama, ‘En misango mar Pasaka ne Jehova, nimar ka nokelo masira ne Jo-Misri, nokalo utewa mi watony.’”

Bang’ mano, jogo nokulore piny. 28 Omiyo, Jo-Israel notimo kaka Jehova nochiko Musa gi Harun.+ Ne gitimo mana kamano.

29 Ka nochopo dier otieno, Jehova nonego nyithindo makayo duto mag Misri,+ chakre gi kach ruoth Farao nyaka kach jal motue e jela, kaachiel gi kayo duto mag le.+ 30 Farao, gi jotichne duto, kod Jo-Misri mamoko duto nochiewo gotienono, kendo ne giywak malich nimar onge od Ja-Misri moro amora ma ng’ato ne ok othoe.+ 31 Gotienono, noluongo Musa gi Harun+ mowachonegi kama: “Wuoguru ua e kind joga, in kaachiel gi Jo-Israel duto. Dhiuru ulam Jehova mana kaka usebedo kudwaro.+ 32 Dhiuru bende gi jambu duto mana kaka usekwayo.+ Kata kamano, kwanauru Nyasaye mondo oguedha.”

33 Kendo Jo-Misri nokaso Jo-Israel mondo giwuog e pinygi mapiyo+ ka giwachonegi ni, “ka ok udhi, to waduto wabiro tho!”+ 34 Nikech mano, ji noting’o mogo modwal ma pok oketie thowi kaachiel gi bakunde midweloe kendo ne giboyogi e lepgi mi giting’ogi e gokgi. 35 Jo-Israel notimo kaka Musa nochikogi mi gikwayo Jo-Misri gik molos gi fedha kod dhahabu, kaachiel gi lewni.+ 36 Jehova nomiyo Jo-Misri onyiso joge ng’wono, mi ne gimiyogi gimoro amora ma ne gikwayo, kendo ne giyako Jo-Misri.+

37 Eka Jo-Israel nowuotho ka gia Rameses+ ka gichomo Sukoth,+ ne gin chwo ma dirom 600,000 ka ok okwan nyithindo.+ 38 To oganda maduong’ ma ok gin Jo-Israel+ bende nodhi kodgi, nyaka jamni modhuro. 39 Ne gikawo mogo modwal ma ne giago Misri mi gichako tedogo makate ma ok oketie thowi. Mogono ne onge thowi nikech ne oriembgi ma giwuok Misri mapiyo ma ok giyudo thuolo mar loso chiemo.+

40 Jo-Israel nodak Misri+ higni 430.+ 41 To chieng’ ma ne higni 430 orumoe e ma ne oganda Jehova duto owuokie Misri. 42 Ma en otieno ma Jo-Israel biro timoe nyasi nikech Jehova nogologi Misri. Kendo en sawo ma Jo-Israel duto biro timo ne Jehova e tiengegi duto.+

43 Kendo Jehova nonyiso Musa gi Harun niya: “Ma en chik mar Pasaka: Ng’at ma ok Ja-Israel ok onego ochame.+ 44 To ka po ni ng’ato nigi misumba ma ong’iewo gi pesa, onego oter misumbano nyangu.+ Bang’ mano eka misumbano nyalo chamo Pasaka. 45 Jadak kata ng’at mondik tich ok onego ochame. 46 Rombo ka rombo nocham e ot achiel. Ng’ato ok onego owuog oko gi ring’o, kendo ok onego otur chokene.+ 47 Oganda Jo-Israel duto onego otim sawono. 48 Ka wendo dwaro timo Pasakano ne Jehova kodu, chwo duto man e ode nyaka ter nyangu. Bang’e eka onyalo chame, kendo nobed kaka Ja-Israel. To ng’at ma ok oter nyangu kik chame.+ 49 Chik achiel noti kuom Ja-Israel kod wendo.”+

50 Omiyo, Jo-Israel notimo kaka Jehova nochiko Musa gi Harun. Ne gitimo mana kamano. 51 Mano e odiechieng’ ma Jehova nogolo oganda maduong’ mar Jo-Israel e piny Misri.

13 Jehova nowacho ne Musa kendo kama: 2 “Walna nyithindo makayo duto ma chwo mag Jo-Israel. Kayo duto ma chwo bed ni gin mag dhano kata mag le gin maga.”+

3 Eka Musa nowacho ne oganda niya: “Paruru odiechieng’ ma kawuononi,+ nimar en e odiechieng’ ma Jehova oseresoue gi lwete ma nigi teko kogolou e piny Misri ka ma ne unie wasumbni.+ Omiyo, kik ucham gimoro amora moketie thowi. 4 Odiechieng’ ma kawuononi e ma uwuokie Misri. En dwe mar Abib.*+ 5 Ka Jehova oseterou e piny mopong’ gi chak kod mor kich+ ma ne osingo ne kwereu ni obiro miyou,+ ma en piny Jo-Kanaan, Jo-Hiti, Jo-Amor, Jo-Hivi, kod Jo-Jebus,+ neuru ni utimo sawoni e dweni. 6 Kuom ndalo abiriyo, chamuru mana makate ma ok oketie thowi,+ kae to e odiechieng’ mar abiriyo unutim ne Jehova sawo. 7 Chamuru makate ma ok oketie thowi kuom ndalo abiriyogo.+ Gimoro amora moketie thowi ok onego obedie e kindu,+ kata mogo modwal moketie thowi kik bedie e pinyu duto. 8 Kendo nyaka inyis wuodi e odiechiengno ni, ‘Atimo sawoni mondo apargo gima Jehova notimona ka ne awuok Misri.’+ 9 Kendo enobednu kaka ranyisi e lwetu kendo kaka rapar e lela wang’u+ mondo chik Jehova obed e dhou, nimar Jehova nogolou e piny Misri gi lwete man gi teko. 10 Nyaka utim sawoni higa ka higa e kinde moketi.+

11 “Ka Jehova oseterou e piny Jo-Kanaan ma ne osingonu kod kwereu,+ 12 unuchiw ne Jehova nyithindu makayo duto ma chwo kod kayo duto ma chwo mag jamni, nimar dhano kod le duto ma chwo gin mag Jehova.+ 13 Inichiw rombo mondo iwargo nyathi punda makayo, to ka ok iware, to nyaka nege.* Yawuotu duto makayo bende nyaka uwar.+

14 “Ka po ni chieng’ moro nyathini openji ni, ‘Ang’o momiyo itimo kama?’ inidwoke ni, ‘Ka ne wan wasumbni Misri, Jehova nogolowa kuro gi lwete ma nigi teko.+ 15 Ka ne Farao otamore weyowa mondo wawuog Misri,+ Jehova nonego nyithindo duto makayo e pinyno, mag dhano kod mag le.+ Mano e momiyo achiwo kayo duto ne Jehova kaka misango, kendo awaro yawuota duto makayo.’ 16 Mano nobed ka ranyisi e lwetu kod e lela wang’u,+ nikech Jehova nogolowa Misri gi lwete man gi teko.”

17 Ka ne Farao oweyo Jo-Israel mondo odhi, Nyasaye ne ok oweyogi mondo giluw yo ma kalo e piny Jo-Filistia kata obedo ni yorno ne chiegni. Nimar Nyasaye nowacho kama: “Di po ka joga oloko pachgi mi gidok Misri ka po ni lweny ochomogi.” 18 Omiyo, Nyasaye notelo ne ogandane mondo gilwor ka giluwo yor thim mar Nam Makwar.+ Kendo Jo-Israel nowuok e piny Misri ka gichanore maber mana ka jolweny. 19 Musa nokawo choke mag Josef bende, nikech Josef nosemiyo nyithind Israel okuong’ore kowachonegi niya: “Nyasaye biro parou, kendo kik uwe chokena e pinyni sa ma uwuok.”+ 20 Ne giwuok Sukoth mi gigoyo kambi Etham, e bath thim.

21 Jehova ne telonegi godiechieng’ kotiyo gi siro mar bor polo mondo onyisgi yo,+ to gotieno notelonegi gi siro mar mach mondo omigigo ler, omiyo ne ginyalo wuotho odiechieng’ gotieno.+ 22 Siro mar bor polo ne telonegi godiechieng’, to siro mar mach ne telonegi gotieno.+

14 Jehova koro nowacho ne Musa kama: 2 “Nyis Jo-Israel ni gilokre mondo gidhi gigo kambi e nyim Pihahiroth, e kind Migdol kod nam machiegni gi Baal-zefon.+ Unugo kambi ka momanyore gi Baal-zefon but nam. 3 Kae to Farao biro paro ni Jo-Israel rundore arunda e thim nikech yore odinorenegi. 4 Eka abiro weyo chuny Farao obed matek+ kendo obiro lawogi mi anayud duong’ kuom loyo Farao gi ogandane duto mag lweny;+ kendo Jo-Misri nong’e ni an e Jehova.”+ To mano e kaka Jo-Israel notimo.

5 Bang’e, ne onyis ruodh Misri ni Jo-Israel oseringo. Gikanyono, Farao gi jotichne noloko pachgi+ mi giwacho kama: “Ma to koro ang’o mwasetimoni? Marang’o waseweyo wasumbniwa modhi?” 6 Omiyo, noiko gechene mag lweny, mowuok gi joge.+ 7 Nokawo geche 600 moyiedhi, kod geche mamoko duto mag Jo-Misri, kendo gechego duto ne nigi jolweny moidhogi. 8 Omiyo, Jehova noweyo chuny Farao ruodh Misri obedo matek mi nochako lawo Jo-Israel. To Jo-Israel nosewuok Misri ka gin gi chir.+ 9 Jolweny mag Misri duto nolawogi+ gi farese kod geche mag Farao, kendo ne gichiegni juko Jo-Israel ma noyudo ogoyo kambi but nam, machiegni gi Pihahiroth ka momanyore gi Baal-zefon.

10 Ka ne Farao ochopo machiegni, Jo-Israel nofwenyo ni kare ilawogi kendo luoro nomakogi mi gichako ywak ne Jehova.+ 11 Ne ginyiso Musa niya: “Koro ang’o mitimonwani? Ang’o momiyo igolowa Misri? Iparo ni onge kuonde yik e piny Misri ma koro ikelowa e thim kae mondo watho?+ 12 Donge ka ne wan Misri ne wakweri ni iweri kodwa mondo wati atiya ne Jo-Misri? Nimar di nobedo maber ka di ne wasiko wasumbni Misri kar biro tho e thim kae.”+ 13 Eka Musa nowacho ne Jo-Israel kama: “Kik uluor.+ Chung’uru motegno mondo une kaka Jehova biro resou kawuononi.+ Nikech Jo-Misri muneno kawuonogi, ok unuchak unegi kendo ngang’.+ 14 Jehova owuon biro kedonu,+ to un ubiro chung’ kuling’ mos.”

15 Koro Jehova nopenjo Musa kama: “Ang’o momiyo uywakna? Nyis Jo-Israel ni giwuog gidhi. 16 In to kaw ludhi irie e wi nam eka nam nopogre koni gi koni, mondo Jo-Israel ong’ad nam ka giwuotho e lowo motwo. 17 An to abiro weyo chuny Jo-Misri obed matek mi ginilaw Jo-Israel; kendo anayud duong’ kuom ketho Farao gi jolwenyne duto, gi faresene, kod gechene duto.+ 18 Kendo ka aseyudo duong’ kuom ketho Farao gi jolwenyne duto, gi faresene, kod gechene duto, Jo-Misri nong’e ni adier, an e Jehova.”+

19 Eka malaika mar Nyasaye madier+ ma ne telo ne Jo-Israel nowuok modok ka ng’egi, kendo siro mar bor polo ma ne ni nyimgi bende nodok ka ng’egi mochung’ kanyo.+ 20 Kendo sirono nopogo Jo-Misri kod Jo-Israel.+ Kor Jo-Misri ne en mudho to kor Jo-Israel ne nitie ler gotieno.+ Omiyo, Jo-Misri ne ok ochopo ka ma Jo-Israel ne nitie otieno mangima.

21 Musa norieyo lwete e wi nam,+ kendo Jehova notugo yamb ugwe ma nokutho matek gotieno duto, kendo yamono nopogo pi nam,+ mi diere kanyo ne odong’ kotwo.+ 22 Omiyo, Jo-Israel nowuotho ka ma otwono,+ nimar pi nogingore koni gi koni.+ 23 Kendo Farao gi jolweny mag Misri duto ma noidho farese kod geche nolawogi nyaka e chuny nam.+ 24 Ka nochopo kogwen,* Jehova nong’iyo jolweny mag Misri ka en e siro mar mach kod bor polo,+ mi ne ochocho jolweny mag Misri. 25 Ne omiyo tiend gechegi owuok kendo ne ok ginyal riembogi mayot. Omiyo, Jo-Misri ne wacho kama: “Waringuru wawere gi Jo-Israel nikech Jehova kedonegi.”+

26 Eka Jehova nowacho ne Musa niya: “Rie lweti e wi nam mondo pi oduog oim jolweny mag Jo-Misri, gi faresegi kod gechegi.” 27 Gikanyono, Musa norieyo lwete e wi nam, to ka piny ne chiegni ru, nam nochako duogo e wang’e. To ka ne Jo-Misri temo ringo, Jehova nowitogi e chuny nam.+ 28 Pi ma ne duogono noimo geche lweny, gi joidh farese kod jolweny duto mag Farao ma ne olawo Jo-Israel nyaka e chuny nam.+ Onge kata mana ng’ato achiel ma ne otony.+

29 Jo-Israel to ne owuotho ka ma otwo e i nam,+ kendo pi nochung’ koloso ohinga koni gi koni.+ 30 Chieng’no Jehova noreso Jo-Israel e lwet Jo-Misri,+ kendo Jo-Israel noneno Jo-Misri mang’eny kotho e dho nam. 31 Bende, Jo-Israel noneno teko maduong’ ma Jehova notiyogo e nego Jo-Misri, mi ne gichako luoro Jehova ahinya, kendo ne giketo yie kuom Jehova gi Musa ma en jatichne.+

15 Gie kindeno, Musa gi Jo-Israel nowero ne Jehova wendni:+

“Anawer ne Jehova nikech oseyudo duong’ ahinya.+

Osewito faras gi ng’at moidhe e i nam.+

 2 Jah* e tekona, nikech en e ma oresa.+

Ma e Nyasacha, kendo abiro pake;+ en e Nyasach wuonwa,+ kendo abiro miye duong’.+

 3 Jehova en jalweny ma ratego.+ Jehova e nyinge.+

 5 Apaka madongo noumogi; ne ginyumore e bwo nam ka kidi.+

 6 A Jehova, lweti ma korachwich nigi teko mang’eny.+

A Jehova, lweti ma korachwich nyalo ng’injo wasiki matindo tindo.

 9 Jasigu nowacho niya: ‘Analawgi mi anajukgi!

Anayak gikgi duto ma adwaro!

Anawuodh liganglana, mi natiekgi!’+

11 A Jehova, be nitie nyasaye moro amora ma chalo kodi?+

Ere ng’a maler moloyi?+

In e Ng’at monego omi luor kendo opak gi wer, Ng’at ma timo honni miwuoro.+

12 Nirieyo lweti ma korachwich, mi piny omuonyogi pep.+

Jo modak Kanaan duto ok nobed gi chir.+

16 Luoro gi bwok maduong’ biro makogi.+

18 Jehova biro bedo ruoth nyaka chieng’.+

20 Kae to Miriam janabi ma dhako ma nyamin Harun nokawo oyieke, kendo mon duto noluwo bang’e ka gigoyo oyieke kendo ka gimiel. 21 Jo ma chwo ne wer, to Miriam ne olo niya:

“Weruru ne Jehova nikech oseyudo duong’ ahinya.+

Osewito faras gi ng’at moidhe e nam.”+

22 Bang’e, Musa ne ogolo Jo-Israel e dho Nam Makwar. Ne gichopo e thim mar Shur kendo ne giwuotho e thimno kuom ndalo adek, to ne ok giyudo pi. 23 Ne gichopo ka miluongo ni Mara.*+ Kata kamano, ne ok ginyal modho pi ma yudore kuno nikech pigno ne kech. Mano e momiyo noluongo kanyo ni Mara. 24 Mi ji nochako ng’ur ne Musa+ ka giwacho niya: “Koro wabiro modho ang’o?” 25 Eka Musa noywak ne Jehova+ mi Jehova nosiemone yath moro. Ka ne obolo yadhno e pi, pigno nobedo mamit.

Kanyo e ma Nyasaye nomiyogie chikene kod buchene, kendo kanyo e ma notemogie.+ 26 Nyasaye nowachonegi niya: “An e Jehova Nyasachu. Ka uwinjo wachna chutho kendo utimo gik makare e wang’a, kendo kuwinjo chikena duto+ muluwogi, ok nakelnu tuoche ma ne akelo ne Jo-Misri.+ An e Jehova ma changou.”+

27 Bang’ mano, ne gichopo ka miluongo ni Elim ka ma ne nitie sokni 12 mag pi kod yiend othidhe 70. Ne gigoyo kambi but soknigo.

16 Ka ne oganda Jo-Israel duto osewuok Elim, ne gichopo e thim miluongo ni Sin,+ man e kind Elim kod Sinai. Ne gichopo kanyo e odiechieng’ mar 15 e dwe mar ariyo bang’ wuokgi e piny Misri.

2 Eka oganda duto mar Jo-Israel nochako ng’ur ne Musa gi Harun ka gin e thim.+ 3 Jo-Israel ne ywak niya: “Mad Jehova ne negwa anega e piny Misri ka ma ne wanyalo betie piny gi bakunde mag ring’o+ e nyimwa kendo ka ma ne wachamoe makate ma wayieng’. Koro usekelo ogandani duto e thim mondo uneggi gi kech.”+

4 Jehova nowacho ne Musa kama: “Ero akelonu chiemo koa e polo,+ kendo ng’ato ka ng’ato biro dhi choko chiemo morome odiechieng’ kodiechieng’,+ mondo atemgigo eka ang’e ka be gibiro yie luwo chikna koso ooyo.+ 5 To e odiechieng’ mar auchiel,+ onego gichok chiemo ma gichokoga pile nyadiriyo, kae to gitede.”+

6 Musa gi Harun nonyiso Jo-Israel niya: “Kawuono godhiambo ubiro ng’eyo ni, adier, Jehova e ma nogolou Misri.+ 7 Kiny gokinyi ubiro neno duong’ mar Jehova, nimar Jehova osewinjo kaka ung’urne. Wan to wan ng’a ma ung’urnwani?” 8 Musa nomedo wacho niya: “Jehova biro miyou ring’o kawuono godhiambo mondo ucham, kendo kiny gokinyi obiro miyou makate ma unucham mi uyieng’. Mano biro miyo ung’e gadier ni Jehova osewinjo kaka useng’urne. Wan to wan ng’a? Ng’euru ni Jehova e ma ung’urne, to ok wan.”+

9 Kae to Musa nowacho ne Harun: “Nyis oganda Jo-Israel ni, ‘Biuru e nyim Jehova, nimar osewinjo kaka usebedo ka ung’urne.’”+ 10 Bang’ ka Harun nosenyiso oganda Jo-Israel duto wechego, ne gilokore mi ging’iyo yo thim, to ne! duong’ mar Jehova nonenore e bor polo.+

11 Jehova nomedo nyiso Musa niya: 12 “Asewinjo kaka Jo-Israel ng’ur.+ Nyisgi ni, ‘Godhiambo* ubiro chamo ring’o, kendo kiny gokinyi ubiro chamo makate mi uyieng’,+ kendo ubiro ng’eyo gadier ni an e Jehova Nyasachu.’”+

13 To e odhiambono, aluru mang’eny nobiro moimo kambi,+ kendo kinyne gokinyi, piny notimo tho e alwora mar kambino duto. 14 Ka ne tho osetwo, gik matindo tindo mong’inore ma rochere nodong’ e thim.+ 15 Ka ne Jo-Israel oneno gigo, ne gichako penjore niya: “Magi to gin ang’o?” nimar ne ok ging’eyo ni gin ang’o. Musa nowachonegi kama: “En chiemo ma Jehova osemiyou.+ 16 Jehova ochiko kama, ‘Ng’ato ka ng’ato ochok morome chamo. Obiro choko omer*+ achiel ne ng’ato ka ng’ato modak e hemane.’” 17 Jo-Israel notimo kamano; moko nochoko mang’eny to moko nochoko matin. 18 To ka ne gipime ka gitiyo gi omer,* ng’at ma ne ochoko mang’eny ne ok nigi mathoth mohinge. To ng’at ma ne ochoko matin bende ne ok oremo gimoro.+ Ng’ato ka ng’ato nochoko mana morome chamo.

19 Kae to Musa nowachonegi niya: “Ng’ato kik we chiemono onind nyaka okinyi.”+ 20 To ne ok giwinjo Musa. Ka ne jomoko oweyo moko monindo nyaka okinyi, chiemono nobedo gi kudni mochako golo tik marach, kendo i Musa nowang’ kodgi. 21 Okinyi kokinyi, ng’ato ne choko mana chiemo morome chamo, to ka chieng’ nobedo makech, chiemono ne leny nono.

22 To e odiechieng’ mar auchiel, ne gichoko chiemo moromo ng’ato chamo diriyo,+ tiende ni omer* ariyo ne ng’ato ka ng’ato. Omiyo, jodong ogandano duto nodhi monyiso Musa wachno. 23 Ka nowinjo wachno, nonyisogi niya: “Mano e gima Jehova owacho. Kiny en odiechieng’ mar yueyo, nimar en sabato maler ne Jehova.+ Omiyo, buluru munyalo bulo kendo bokuru munyalo boko,+ to modong’ ukan nyaka kiny okinyi.” 24 Ne gikano chiemono nyaka kinyne gokinyi mana kaka Musa nosechikogi, to ne ok obedo gi kudni kendo ne ok ogolo tik marach. 25 Musa nowachonegi niya: “Chameuru kawuono, nimar kawuono en chieng’ sabato ne Jehova. Kawuono ok unuyud ka olwar e lowo. 26 Ubiro choko chiemono odiechienge auchiel, to e odiechieng’ mar abiriyo, ma en Sabato,+ chiemono nobed ma onge.” 27 Kata kamano, jomoko nodhi kwanye e odiechieng’ mar abiriyo to ne ok giyudo gimoro.

28 Kuom mano, Jehova nonyiso Musa niya: “Ubiro tamoru timo gima anyisou kendo luwo chikena nyaka karang’o?+ 29 Ng’euru ni an Jehova e ma aseketonu chieng’ Sabato.+ Kuom mano, amiyou chiemb odiechienge ariyo e odiechieng’ mar auchiel. Ng’ato ka ng’ato kik wuog ka ma entie e odiechieng’ mar abiriyo.” 30 Omiyo, ji ne oyueyo chieng’ Sabato e odiechieng’ mar abiriyo.+

31 Oganda Jo-Israel noluongo chiemono ni “manna.”* Nochalo kodhi matindo ma rochere kendo nomit kaka kek moketie mor kich.+ 32 Kae to Musa nowacho kama: “Jehova ochiko niya, ‘Kawuru omer* achiel mar chiemono mondo ukane ne tiengeu duto+ mondo nyikwau one chiemo ma ne apidhougo e thim kinde ma ne agolou e piny Misri.’” 33 Musa nowacho ne Harun niya: “Kaw agulu mondo iolie omer* achiel mar manna kae to ikete e nyim Jehova mondo ukane ne tiengeu duto.”+ 34 Harun noketo aguluno e nyim Sandug Chik*+ mana kaka Jehova nochiko Musa. 35 Jo-Israel nochamo manna kuom higni 40+ nyaka ne gichopo e piny ma ji nodakie.+ Ne gichamo manna nyaka ne gichopo e tong’ piny Kanaan.+ 36 Omer* achiel donjo e i efa* achiel nyadipar.

17 Oganda duto mar Jo-Israel nowuok e thim miluongo ni Sin+ ka giwuotho to gigoyo kambi mana kaka Jehova ne chikogi,+ mi ne gichopo Refidim.+ Kata kamano, ne onge pi ma ji ne nyalo modho.

2 Omiyo, ji nochako dhawo ne Musa+ ka giwacho niya: “Miwa pi modho.” To Musa nodwokogi kama: “Marang’o udhawona? Marang’o usiko utemo Jehova?”+ 3 To nikech riyo noloyogi, ne gichako ng’ur ne Musa+ kama: “Ang’o momiyo ne igolowa Misri mondo riyo onegwa kae gi nyithindwa kod jambwa?” 4 Gikone, Musa noywak ne Jehova niya: “Atim nang’o gi jogi? Gichiegni chiela gi kite!”

5 Jehova nowacho ne Musa niya: “Kaw ludhi ma ne ichwadogo Aora Nael+ kaachiel gi jodong Israel moko mondo uchak wuoth kutelo e nyim ji. 6 Abiro chung’ e nyimi e lwanda man Horeb. Igo lwandano gi ludhi kendo pi biro wuok mondo ji omodhi.”+ Musa notimo kamano e nyim jodong Israel. 7 Kendo Musa nochako kanyo ni Masa,*+ to bende nochake ni Meriba,*+ nimar Jo-Israel nodhawone kanyo, kendo nikech ne gitemo Jehova+ ka gipenjo ni: “Be Jehova ni kodwa koso oonge?”

8 Bang’e, Jo-Amalek+ nobiro kedo gi Jo-Israel ka gin Refidim.+ 9 Musa nowacho ne Joshua+ niya: “Yier ji mondo udhi ukednwa gi Jo-Amalek. Kiny nachung’ e wi got ka ating’o ludh Nyasaye madier e lweta.” 10 Kendo Joshua notimo mana kaka Musa nochike,+ mi ne gidhi kedo gi Jo-Amalek. Musa, Harun, kod Hur+ to nodhi e wi got.

11 Kinde duto ma Musa noting’o bedene malo, Jo-Israel ne loyo lweny, to ka noduoko bedene piny, Jo-Amalek e ma ne locho. 12 Ka Musa nool gi ting’o bedene malo, ne gimiye kidi mondo obedie. Kae to Harun gi Hur nosiro bedene koni gi koni nyaka wang’ chieng’ nopodho. 13 Omiyo, Joshua nogoyo Jo-Amalek gi ligangla moloyogi kaachiel gi jo ma ne gin-go.+

14 Koro Jehova nonyiso Musa niya: “Ndik wachni e buk mondo ji obi opar kendo inyis Joshua ni abiro tieko Jo-Amalek chuth mi onge ng’at ma nopargi kendo.”+ 15 Kae to Musa nogero kendo mar misango mochake ni Jehova-nisi,* 16 kowacho kama: “Nikech Jo-Amalek kedo kod kom-loch mar Jah,+ Jehova biro kedo gi tiengegi duto.”+

18 Eka Jethro jadolo mar Midian kendo jaduong’* Musa,+ nowinjo gik moko duto ma Jehova Nyasaye nosetimo ne Musa kod Jo-Israel ka nogologi Misri.+ 2 Noyudo ka Zipora chi Musa osedok thurgi ir Jethro wuon mare nikech Musa nosenyise mondo otim kamano. 3 Nodok kaachiel gi yawuote ariyo.+ Musa nochako achiel kuom yawuotego ni Gershom,*+ nikech nowacho ni nosedoko jadak e piny mawendo. 4 To machielo nochako ni Eliezer* nikech nowacho ni Nyasach wuon mare nokonye kuom rese ka Farao ne dwaro nege.+

5 Koro Jethro, gi Zipora, kod yawuot Musa nodhi ir Musa e thim ka ma ne gigoyoe kambi e nyim god Nyasaye madier.+ 6 Mi nooro ne Musa wach niya: “An Jethro ma jaduong’ni,*+ abiro iri ka an gi chiegi kod yawuoti.” 7 Gikanyono, Musa nodhi romo ne Jethro, kendo nokulorene monyodhe. Ng’ato ka ng’ato nopenjo nyawadgi kaka odhi, kae to ne gidonjo e hema.

8 Musa nopimo ne Jethro gik moko duto ma Jehova notimo ne Farao kod piny Misri koreso Jo-Israel.+ Nopimone chandruoge duto ma ne giyudo e yo+ kod kaka Jehova noresogi. 9 Jethro ne mor ahinya gi gik mabeyo duto ma Jehova notimo ne Jo-Israel koresogi e lwet Jo-Misri. 10 Mi Jethro nowacho kama: “Opak Jehova ma noresou e lwet Jo-Misri kendo e lwet Farao, mogolou e bwo tuech mar Jo-Misri. 11 Koro to ayie ni Jehova duong’ moloyo nyiseche mamoko duto+ nikech gik ma notimo ne jo ma nochayo joge.” 12 Eka Jethro nokelo ne Nyasaye misango miwang’o kod misengni mamoko, mi Harun gi jodong Israel duto nobiro mondo gichiem gi Jethro e nyim Nyasaye madier.

13 Kinyne, Musa nobet piny mondo oyal ji kaka nojatimo pile, kendo ji ne siko ka biro ire chakre okinyi nyaka odhiambo. 14 Ka ne Jethro jaduong’* Musa oneno gik moko duto ma Musa ne timo ne ji, nopenje kama: “Ang’o momiyo itiyo tijegi duto kendi, ka ji ochung’ kolwori chakre okinyi nyaka odhiambo?” 15 Musa nodwoke niya: “Atimo kamano nikech ji siko ka biro ira mondo ging’e dwach Nyasaye. 16 Ka ng’ato odonjo ne wadgi, gikelo wachno ira mondo ayalgi, to bende anyiso ji weche ma Nyasaye ng’ado kod chikene.”+

17 Jethro nonyiso Musa kama: “Gima itimoni ok ber. 18 Tijni ng’eny, ok dinyale kendi. Ibiro ol kendo jo ma in-go bende biro ol. 19 Koro winja. Adwaro ng’adoni rieko, kendo Nyasaye biro konyi.+ In onego iwuo gi Nyasaye madier e lo ji+ kiterone weche ma chandogi.+ 20 Onego inyisgi weche ma Nyasaye ong’ado kod chikene,+ kendo inyisgi yore monego giluw kod gik monego gitim. 21 To iyier jo ma nigi rieko+ kendo moluoro Nyasaye, jo migeno kendo ma ok ohero mibadhi,+ kendo iketgi gibed jotend ji, mondo jomoko kuomgi orit ji aluf achiel-achiel, to moko orit ji mia-mia, to moko orit ji piero abich-abich, to moko orit ji apar-apar.+ 22 Gin e ma gibiro yalo ji. To ka en bura ma kore tek ahinya, to gikelnigo.+ Gibiro yalo weche matindo tindo duto. Kipogo tich kamano, to ting’ biro bedoni mayot.+ 23 Ka itimo kamano, kendo ka Nyasaye oyie gi rieko ma ang’adonino, ok ibi ol kendo ng’ato ka ng’ato biro dhi e ode komor.”

24 Gikanyono, Musa notimo duto ma Jethro nonyise. 25 Musa noyiero jo ma nigi rieko e oganda Israel moketogi gibed jotend ji, jomoko kuomgi noketo mondo orit ji aluf achiel-achiel, to moko orit ji mia-mia, to moko orit ji piero abich-abich, to moko orit ji apar-apar. 26 Omiyo ka ne wach moro oneno, gin e ma ne giyalo ji. Wach matek ahinya ne gitero ne Musa,+ to weche matindo tindo ne giyalo kendgi. 27 Bang’ mano, Musa nogoyo ne jaduong’ne* oriti+ modok e pinygi.

19 E dwe mar adek bang’ ka Jo-Israel nosewuok e piny Misri ne gichopo e thim mar Sinai.* 2 Ka ne giwuok Refidim,+ ne gigoyo kambi e nyim got e thim mar Sinai. Kanyo e ma Jo-Israel nogoyoe kambi.+

3 Musa noidho got ir Jehova Nyasaye madier ma noluonge gie got+ ka wachone niya: “Dhi inyis jood Jakobo ma gin Jo-Israel ni, 4 ‘Useneno gik ma ne atimo ne Jo-Misri+ mondo akelu ira ka ating’ou kaka otenga ting’oga nyithinde e buombene.+ 5 Ka uwinjo dwonda kendo urito singruokna, adier unubedna oganda makende* kuom ogendni duto,+ nimar piny duto en mara.+ 6 Unubedna oganda maler kendo unubed ruodhi ma bende gin jodolo.’+ Magi e weche monego iwach ne Jo-Israel.”

7 Musa nodhi moluongo jodong Israel kendo nonyisogi weche duto ma Jehova nosechike.+ 8 Eka ji duto nodwoko niya: “Wayie timo gik moko duto ma Jehova osewacho.”+ Gikanyono, Musa nodwoko ne Jehova wach ma jogo nowacho. 9 Eka Jehova nowacho ne Musa niya: “Ne! Analor iri ka an e i bor polo ma rateng’ mondo ji owinj ka awuoyo kodi eka giyie kuomi kinde duto.” Kae to Musa nonyiso Jehova weche ma jogo nowacho.

10 Eka Jehova nowacho ne Musa niya: “Dhi ipwodh ji kawuono gi kiny, kendo gilwok lepgi. 11 Giikre ne odiechieng’ mar adek, nikech an Jehova, anabi e wi Got Sinai e odiechieng’no kendo ji duto biro nena. 12 Kendo iket tong’ molworo got kae to ichik ji ni ng’ato ang’ata ok onego odhi e wi got kata nyono tong’ moseketno, nimar ng’at motimo kamano to ibiro negi. 13 Lwedo moro amora kik mul jakethono, to onego ochiele gi kite kata onego ochwoye* ma otho. Onego utim kamano ne chiaye kata ne dhano.+ To ubi e got mana ka tung’* oywak.”+

14 Eka Musa nolor koa e got moduogo ir ji, mi nochako pwodho ji, kendo ji nolwoko lepgi.+ 15 Nonyiso ji kama: “Ikreuru ne odiechieng’ mar adek. Kik ng’ato nind gi dhako.”

16 Chieng’ mar adekno gokinyi, polo nomor kendo nomil, mi bor polo ma rateng’+ noumo wi got kendo dwol maduong’ mar tung’ nowinjore mi ji duto ma ne ogoyo kambi kar kanyo nochako tetni.+ 17 Koro Musa nogolo ji e kambi mondo gidhi girom gi Nyasaye madier, mi ne gichung’ e tiend got. 18 Yiro nokwako Got Sinai nikech Jehova nobiro e godno ka en e i mach.+ Yiro ne dum ka yiro mar mach ma bebni, mi godno te nochako yiengni matek.+ 19 Sa ma tung’ ne medo ywak matek, Musa nowuoyo gi Nyasaye madier kendo Nyasaye nodwoke.

20 Eka Jehova nolor e wi Got Sinai, kendo Jehova noluongo Musa mondo oidh e wi got, mi Musa nodhi.+ 21 Jehova nochiko Musa kama: “Lor piny kendo isiem oganda ni kik gitem sudo machiegni ni mondo ginena, an Jehova, di po ka ji mang’eny otho. 22 An Jehova, adwaro ni idhi inyis jo ma pile tiyonaga kaka jodolo, ni gipwodhre mondo an Jehova kik aneggi.”+ 23 Eka Musa nodwoko Jehova niya: “Ji ok nyal sudo machiegni gi Got Sinai nikech in iwuon nichikowa ni waket tong’ molworo godni mondo osik koler.”+ 24 Kata kamano, Jehova nochike kama: “Lor idhi, kae to iduog gi Harun. Kik iyie ne jodolo kata oganda mondo gibi ira an Jehova, di po ka anegogi.”+ 25 Musa nodhi ir ji monyisogi wechego.

20 Kae to Nyasaye nowacho kama:+

2 “An Jehova Nyasachu ma ne ogolou e piny Misri ka ma ne unie wasumbni.+ 3 Kik ubed gi nyiseche mamoko mak mana an.+

4 “Kik ilos kido mopa mar gimoro amora manie polo malo, kata manie piny mwalo, kata manie bwo pi.+ 5 Kik ikulrinegi kata kik wuondi milamgi,+ nimar an Jehova Nyasachu, an e Nyasaye kende monego ulam.+ Akumo nyithind ji duto mochaya nikech richo jonyuolgi, kendo atimo kamano nyaka e tieng’ mar adek gi mar ang’wen. 6 To jo ma ohera kendo ma mako chikena,+ anahergi nyaka tieng’ mar aluf achiel.

7 “Kik iti gi nying Jehova Nyasachi e yo marach,+ nikech Jehova biro kumo ng’at ma tiyo gi nyinge e yo marach.+

8 “Par chieng’ Sabato kendo iwale obed maler.+ 9 Ti tijeni duto kuom odiechienge auchiel,+ 10 to odiechieng’ mar abiriyo en sabato mar Jehova Nyasachu. Kik itim tich moro amora chieng’no. Wuodi, kata nyari, kata misumbani ma wuoyi, kata misumbani ma nyako, kata jambi, kata jadak moro amora manie miechu bende kik ti tich moro amora.+ 11 Jehova nochueyo polo gi piny, gi nam, gi gik moko duto manie igi kuom odiechienge auchiel. To e odiechieng’ mar abiriyo noyueyo.+ Mano e momiyo Jehova noguedho odiechieng’ mar Sabato, mowale mondo obed maler.

12 “Luor wuoru gi meru+ mondo idag aming’a e piny ma Jehova Nyasachi biro miyi.+

13 “Kik ineki.+

14 “Kik ichodi.+

15 “Kik ikwel.+

16 “Kik ihang ne nyawadu wach ka oluongi mondo ichiw neno.+

17 “Kik igomb od ng’ato, kata chiege,+ kata misumbane ma dichwo, kata misumbane ma nyako, kata ruadhe, kata pundane, kata gimoro amora ma ng’ato nigo.”+

18 Ji duto noneno ka polo mor kendo mil, kendo ne giwinjo ka tung’ ywak, bende ne gineno ka got dum yiro. Omiyo, ka ne gineno gik ma ne timorego, ne gichako tetni mi gichung’ gi chien.+ 19 Eka ne giwacho ne Musa niya: “Kik iwe Nyasaye owuo kodwa, di po ka watho; in e ma iwuo kodwa, kendo wabiro winjo wachni.”+ 20 Musa nonyiso ji niya: “Kik uluor nikech Nyasaye madier osebiro temou+ mondo uluore kinde duto kendo kik utim richo.”+ 21 Ji nodhi nyime chung’ gi chien, Musa to nosudo machiegni gi bor polo ma rateng’ ka ma Nyasaye madier ne nitiere.+

22 Jehova nonyiso Musa mondo odhi onyis Jo-Israel niya: “Useneno gi wang’u ka awuoyo kodu kowuok e polo.+ 23 Kik ulos nyiseche mag fedha kod mag dhahabu,+ nikech ok onego ulam nyiseche mamoko mak mana an. 24 Unulosna kendo mar misango mar lowo, kendo kanyo e ma unugolie misengni miwang’o, misengni mag kuwe, rombeu, kod dhou. Kamoro amora ma ayiero mondo ulamae,*+ anabi kuno kendo anaguedhu. 25 Sa ma ulosona kendo mar misango mar kite, kik ugere gi kite mopa,+ nikech payo kitego biro miyo kik ayie gi kendono. 26 Kendo kik ulos ngas ma iidhogo kendona mar misango, nimar di po ka dug ng’ato oneno.

21 “Magi e chike monego inyis Jo-Israel:+

2 “Ka ing’iewo misumba ma Ja-Hibrania,+ obiro tiyoni kuom higni auchiel, to e higa mar abiriyo iniweye mondo oa ma ok ochuli gimoro amora.+ 3 Ka nobiro ka pok okendo, kamano e kaka obiro a. To ka nobiro kosekendo, obiro a gi chiege. 4 Ka ruodhe e ma ne omiye dhako mi onyuologo nyithindo ma yawuoyi kata ma nyiri, to obiro a kende. Dhakono kod nyithindego biro dong’ ne ruodhe.+ 5 To ka misumbano owacho ni, ‘Ahero ruodha, gi chiega, kod nyithinda, omiyo ok adwar dhi,’+ 6 ruodheno nokele e nyim Nyasaye madier mi notere e dhoot kata e frem mar dhoot kendo ruodhe notuch ite gi riwi, mi ng’atno nobed misumbane e ngimane duto.

7 “Ka ng’ato ouso nyare mondo obed misumba, ruodh nyakono ok noweye mondo oa kaka iweyoga misumba ma dichwo. 8 Ka po ni ruodheno ok dwar kawe mondo obed chiege, to odwaro weyo ng’at machielo e ma ong’iewe, chik ok bi yie ne ruodheno mondo ouse ne japiny machielo nikech osewuondo nyakono. 9 Kodwaro ni wuode e ma okende, nyaka otim ne nyakono mana kaka dotim ne nyare. 10 To ka wuodeno* omedo dhako machielo, nyaka one ni pod omiyo chiege mokwongoni chiemo, lewni, kendo ni onindo e ode.+ 11 To ka ok otimo ne chiegeno gik moko adekgo, nyakono ni thuolo weye ma onge chudo moro amora.

12 “Ng’at mogoyo nyawadgi monego, en bende nyaka nege.+ 13 To ka obothne, kendo Nyasaye madier oweyo mano otimre, an Nyasaye anaketnu kamoro monyalo ringo mondo odhiye.+ 14 To ka po ni mirima omako ng’ato gi nyawadgi monege goyiem,+ ng’atno nyaka neg kata kochuno ni ogole e kendona mar misango.+ 15 Ng’at mogoyo wuon-gi kata min-gi nyaka negi.+

16 “Ka ng’ato omako wadgi githuon+ mi ouse, kata ojuke ka pok ouse,+ nyaka neg ng’atno.+

17 “Ng’at moyanyo wuon-gi kata min-gi nyaka negi.+

18 “Ka ji ariyo a dhawo mi achiel kuomgi ogoyo nyawadgi gi kidi kata ogoye ngum mi ohinyore marach to ok otho, mak mana ni ok onyal a e otanda, ma e kaka onego utim: 19 Ka ng’atno ochango ma koro onyalo wuotho oko kata mana kosirore gi luth, ng’at ma ne ogoyeno onge gi bura. Obiro mana chulo ng’at mohinyoreno kuom kinde duto ma ok osebedo kotimo tijene nyaka chieng’ ma nochangie chuth.

20 “Ka po ni ng’ato ogoyo misumbane ma dichwo kata ma nyako gi luth mi onege, en bende nyaka kume.+ 21 To ka odiechieng’ achiel kata ariyo okalo to misumbano ok otho, ok bi kum ruodheno nikech ne ong’iewo misumbano gi pesane.

22 “Ka po ni ji ariyo gore mi gihinyo dhako mayach kae to dhakono onyuol ka ndalone podi,+ to dhakono kata nyathine ok otho, ng’at ma ne ohinyeno nyaka chul gima chwor dhakono biro wachone; nochul kaluwore gi kaka jobura ong’ado.+ 23 To ka achiel kuomgi otho, nyaka chul ngima kar ngima,+ 24 wang’ kar wang’, lak kar lak, lwedo kar lwedo, tielo kar tielo,+ 25 weng’o kar weng’o, lero kar lero, kendo chwat kar chwat.

26 “Ka ng’ato ogoyo misumbane ma dichwo kata ma nyako motucho wang’e, onego owe misumbano odhi nono nikech osetucho wang’e.+ 27 To ka omuko lak misumbane ma dichwo kata ma nyako, onego owe misumbano odhi nono nikech osemuko lake.

28 “Ka ruath ochuoyo dichwo kata dhako ma onego, nyaka neg ruadhno gi kite+ kendo ringe ok onego ocham. Wuon ruadhno to ok noyud kum. 29 To ka ruadhno osebedo ka chuoyo ji kendo ne osesiem wuon-go to ne ok otueye mi ruadhno onego dichwo kata dhako moro, onego oneg ruadhno gi kite kendo wuon-go bende ibiro neg. 30 To ka po ni odwaro waro ngimane, nyaka ochul gimoro amora mochike. 31 Ka ruadhno ochuoyo nyathi, obed ma wuoyi kata ma nyako, ibiro tim ne wuon ruadhno kaluwore gi chik achielni. 32 Ka ruadhno ochuoyo misumba ma dichwo kata ma nyako, wuon-go biro chulo ruodh misumbano shekel 30,* kendo ibiro neg ruadhno gi kite.

33 “Ka po ni ng’ato oweyo dho bur nono kata okunyo bur to ok oume mi ruath kata punda olwarie, 34 nyaka ochul chiayeno.+ Obiro chulo nengo chiayeno ne wuon-go, to chiaye mothono biro bedo mare. 35 Ka ruadh ng’ato onego ruadh ng’at machielo, weg ruedhigo biro uso ruath mangimano kae to gipogore pesano, to mothocha bende gibiro pogore. 36 To ka ong’ere ni ruath moro osebedo ka chwopo to wuon-go ne ok otueye, nyaka ochul ruath kar ruath, to ruath mothono biro bedo mare.

22 “Ka ng’ato okwalo ruath kata rombo moyang’e kata ouse, onego ochul ruedhi abich kar ruadhno, kata rombe ang’wen kar rombono.+

2 (“Ka ojuk jakuo+ ka turo ot mogoye monege, ng’at monege ok bi bedo gi buch remo. 3 To ka onege ka chieng’ osewuok, ng’at monege nigi buch remo.)

“Jakuo nyaka chul gima okwalo. Ka en jachan, onego ouse kaka misumba mondo ochulgo gik mokwalogo. 4 Ka chiaye mokwalono pod ngima, bed ni en ruath kata punda kata rombo, obiro chulo gima okwalono nyadiriyo.

5 “Ka ng’ato kwayo jamni e puoth cham kata e puoth mzabibu, to oweyo jambe mochamo puoth ng’at machielo, onego ochul chamgo gi cham mabeyo mag puothe owuon, to ka gin olemo, onego ochulgi gi olembe mabeyo mag puothe owuon.

6 “Ka mach omuoch kendo olandore momako lum* mi majno owang’o cham moseka kata ma pok oka kata puodho mangima, ng’at momoko majno nyaka chul gik mowang’go.

7 “Ka ng’ato omiyo wadgi pesa kata gik moko mondo okanne, mi okwal gigo e od wadgino, jakuo moyud gi gigo nyaka chul nyadiriyo.+ 8 To ka ok oyud jakuogno, ibiro ter wuon odno e nyim Nyasaye madier+ mondo okuong’re ni ok nokawo gigo. 9 Ka ng’ato odonjo ne wadgi kowacho ni, ‘Gini mara!’ obed ruath, punda, rombo, law, kata gimoro amora ma ne olal, ji ariyogo onego okuong’re e nyim Nyasaye madier.+ To jal ma Nyasaye noyang ni en jaketho biro chulo wadgi nyadiriyo.+

10 “Ka ng’ato omiyo wadgi punda kata ruath kata rombo kata chiaye moro amora mondo opidhne, to chiayeno otho, kata ohinyore, kata ng’ato olal kode ka ji ok ne, 11 onego gidhi e nyim Jehova mondo wadgino okuong’re ni ne ok okawo chiayeno; kendo wuon-go nyaka we wachno kamano. Wadgino ok onego ochule.+ 12 To ka ng’ato okwalo chiayeno kuome,* nyaka ochul wuon-go. 13 Ka ondiek e monego chiayeno, onego okel ring’o modong’ mondo ji one. Nimar ok onego ochul gima le me bungu e ma onego.

14 “Ka ng’ato oholo chiach nyawadgi mit chiayeno ohinyore kata otho e lwete, nyaka ochul wuon-go. 15 Ka ohinyore kata otho e lwet wuon-go, jaholo ok onego ochul gimoro. Ka en chiaye ma ne ohol gi pesa, pesa ma ne ochiwno e chudone.

16 “Ka ng’ato osero nyako ma silili ma pok osingore gi dichwo moro ne kend, mi onindo kode, onego onyuome mobed chiege.+ 17 Ka wuon nyakono otamore miye nyareno, jalo nyaka chul pesa ma romre gi nengo mar nyombo.

18 “Nyaka uneg dhako moro amora ma jajuok.+

19 “Nyaka uneg ng’at moterore gi chiaye.+

20 “Ng’at mochiwo misango ne nyasaye moro amora mak mana Jehova kende, nyaka neg.+

21 “Kik usand jadak+ nimar un bende ne un jodak e piny Misri.+

22 “Kik usand chi liel kata nyathi kich.+ 23 Ka usandogi e yo moro amora mi giywakna, adier anawinj ywakgi;+ 24 kendo mirima nomaka kodu mi ananegu gi ligangla, kendo mondeu nobed mond liete to nyithindu nobed nyithi kiye.

25 “Ka nitie jachan e kind joga to ihole pesa, kik ikwaye ohala moro e wiye kaka joholo timoga.+

26 “Ka ng’ato osingoni lawe nikech en gi gopi,+ onego iduokne lawno ka pok chieng’ opodho. 27 Nimar mano kende e gima oumorego. Ka ok iduokonego, ang’o mobiro umorego sa monindo?+ Koywakna, adier abiro winje, nimar ang’won.+

28 “Kik iyany Nyasaye+ kata jatelo moro amora e ogandau.+

29 “Kik udek ma ok ugolona chiwo kuom chambu, kata divai, kata mo ma un-go mogundho.+ Onego uchiwna yawuotu duto makayo.+ 30 Ruedhi kod rombe bende uchiwna.+ Gibiro bet gi minegi kuom ndalo abiriyo, to chieng’ mar aboro unuchiwnagi.+

31 “Nyaka ubed oganda maler.+ Omiyo, kik ucham ring gimoro amora ma le onego e bungu.+ Witeuru ne guogi.

23 “Kik iland wach ma ok adier.+ Kik ikony jaketho kuom bedo janeno ma jamiriambo.+ 2 Kik itim gima rach mana nikech ji mang’eny timo, kendo kik iketh bura nikech idok kor ji mang’eny. 3 Bed ja ratiro kata mana e buch jachan.+

4 “Kineno ka dher jasiki kata pundane orwenyo, ne ni iduoke ne wuon-go.+ 5 Ka punda mar ng’at ma mon kodi ogore piny gi osigo, kik ikale akala. Nyaka ikony wuon-go chunge.+

6 “Kik uketh buch jachan sa ma iyale.+

7 “Kik udonj ne ng’ato gi miriambo, kendo kik umi ong’ad buch tho ne ng’at ma onge ketho, nimar ok nakwan jaketho ka ng’at makare.+

8 “Kik ikaw asoya nikech asoya umo wang’ ji, kendo onyalo miyo jo makare olok wechegi.+

9 “Kik usand jodak nimar un uwegi ung’eyo kaka ngima jodak chalo, nikech ne un jodak e piny Misri.+

10 “Unupur puotheu kendo unuka cham kuom higni auchiel.+ 11 To e higa mar abiriyo, puotheu onego onind ma ok opurgi. Jochan manie kindu biro chamo gik molothie, to modong’ le me bungu biro chamo. Kamano e kaka ubiro timo ne puotheu mag mzabibu kod mag zeituni.

12 “Ti tijeni kuom ndalo auchiel; to e odiechieng’ mar abiriyo kik iti, mondo ruadhi gi pundani gi misumbani kod jadak oyudie thuolo mar yueyo.+

13 “Neuru ni utimo duto ma asenyisou+ kendo kik uluong nyinge nyiseche mamoko; kik winj nyingego e dhou.+

14 “Nutimna sawo didek e higa.+ 15 Unutim Sap Makate ma Ok Oketie Thowi.+ Unucham makate ma ok oketie thowi kuom ndalo abiriyo e kinde moketi e dwe mar Abib* mana kaka asechikou,+ nimar mano e kinde ma ne uwuokie Misri. To ng’ato kik bi e nyima gi lwete nono.+ 16 Bende, nutim Sap Keyo* mag cham mokwongo mukayo,+ kendo sa ma uchoko gik musekayo e giko higa, unutim Sawo mar Choko.*+ 17 Didek e higa, chwo duto onego obi e nyim Jehova, Ruoth madier.+

18 “Kik uchiw remb chiaye gi gima oketie thowi. Kendo bor mar chiaye motimnago misango e sawo moro amora kik dong’ nyaka piny ru.

19 “Nyaka uter cham mukwongo kayo kendo mabeyo moloyo e od Jehova Nyasachu.+

“Kik uted ring nyadiel e chag min-gi.+

20 “Aoro malaika mondo oritu kotelonu+ nyaka ka ma aseikonu.+ 21 Winjuru dwonde kendo utim kaka ochikou. Kutamoru winje, ok obi weyonu kethou+ nikech oting’o nyinga. 22 To kuwinje mutimo duto ma achikou, anaked gi jowasiku kendo anakwed jo ma kwedou. 23 Nikech malaikana notelnu koterou e piny Jo-Amor, Jo-Hiti, Jo-Perizi, Jo-Kanaan, Jo-Hivi, kod Jo-Jebus, kendo natiekgi chuth.+ 24 Kik ukulru ne nyisechegi kata kik ulamgi, kendo kik uluw timbegi.+ To onego uketh nyisechegi kendo umuk sirnigi mag kite.+ 25 Tiuru mana ne Jehova Nyasachu+ kendo obiro guedhou gi chiemo kod pi.+ Bende, obiro golonu tuoche.+ 26 Ok unubed gi dhako ma iye wuok kata ma migumba,+ kendo anami udag ndalo mang’eny.

27 “Anami ji obed maluor kata ka pok uchopo,+ kendo anachoch ji duto ma dwaro kedo kodu, mi anami jowasiku oring oweu.+ 28 Anami chuny ji onyosre nikech un,+ kendo mano nomi Jo-Hivi, Jo-Kanaan, kod Jo-Hiti oring mi giwenu piny.+ 29 Ok abi gologi giduto e higa achiel di po ka piny odong’ nono mi le mag bungu omedore ma gihinyu.+ 30 To abiro gologi mos mos nyaka chop ubed mang’eny mukaw pinygi.+

31 “Anaket tong’ mar pinyu chakre Nam Makwar nyaka nam mar Jo-Filistia kendo chakre e thim nyaka Aora;*+ nimar anachiw jo modak e pinyno e lwetu, kendo unuriembgi.+ 32 Kik utim singruok moro amora kodgi kata gi nyisechegi.+ 33 Kik gidag e pinyu, di po ka gimiyo ukethona. Ka po ni utiyo ne nyisechegi, mano biro bedonu obadho.”+

24 Eka Jehova nowacho ne Musa niya: “Bi ira e got gi Harun, gi Nadab, gi Abihu,+ kod jodong Israel 70, kendo ukulru ka pod un gi chien matin. 2 In kendi e ma nisud machiegni gi Jehova, to jomokogo kik sud machiegni, kendo Jo-Israel bende kik idh kodi.”+

3 Eka Musa noduogo monyiso ji weche kod chike duto ma Jehova nonyise,+ kendo ji duto nodwoko niya: “Wayie timo gik moko duto ma Jehova osewacho.”+ 4 Omiyo, Musa nondiko piny weche duto ma Jehova nonyise.+ Ne omondo gokinyi mogero kendo mar misango e tiend got. Bende, nogero sirni 12 mochung’ ne dhoudi 12 mag Israel. 5 Bang’ mano, nooro yawuoyi ma Jo-Israel mi ne gigolo ne Jehova misengni miwang’o kendo ne gichiwo ruedhi kaka misengni mag kuwe.+ 6 Eka Musa nokawo nus mar remo moolo e bakunde, to remo modong’ nokiro e kendo mar misango. 7 Nokawo bug singruok ma osome ne ji gi dwol maduong’.+ Mi ne gidwoko kama: “Wayie winjo kendo timo gik moko duto ma Jehova osewacho.”+ 8 Mi Musa nokawo remo mokiro kuom ji+ kowacho niya: “Ma e remo mar singruok ma Jehova osetimo kodu nikech useyie gi weche duto ma osewachonu.”+

9 Musa, gi Harun, gi Nadab, gi Abihu, kod jodong Israel 70 nodhi nyaka e got, 10 mi ne gineno Nyasach Israel.+ Ne ochung’ e wi gima chalo gi laru molos gi kite mag safir ma rieny ka polo.+ 11 Ne ok ohinyo jodong Israel ma ne oseyiergo.+ To ne gineno Nyasaye madier e fweny sa ma ne gichiemo kendo gimetho.

12 Eka Jehova nonyiso Musa niya: “Bi ira e wi got kendo ibed kanyo. Abiro miyi kite mopamore ma abiro ndikoe chike monego opuonj Jo-Israel.”+ 13 Eka Musa gi Joshua jakonyne nowuok,+ kae to Musa noidho got ma odhi ir Nyasaye madier.+ 14 To Musa nowacho ne jodongo ma ne ni kode kama: “Ritwauru kae nyaka waduogi.+ Harun gi Hur+ biro dong’ kodu kendo ng’at ma nigi wach moro, oternegi.”+ 15 Eka Musa noidho got sa ma bor polo ne imo godno.+

16 Duong’ mar Jehova Nyasaye+ nosiko e Got Sinai,+ kendo bor polo noimo got kuom ndalo auchiel. E odiechieng’ mar abiriyo, Nyasaye noluongo Musa gi e bor polono. 17 E wang’ Jo-Israel, duong’ mar Jehova ne chalonegi ka mach maduong’ ma liel e wi got. 18 Eka Musa nodonjo e bor polono modhi nyaka e wi got,+ kendo nobet kuno ndalo 40 odiechieng’ gotieno.+

25 Bang’e, Jehova nowacho ne Musa niya: 2 “Nyis Jo-Israel ni gikelna chiwo. Inichokna chiwogo kuom ng’ato ka ng’ato ma chunye ohero.+ 3 Chiwo mibiro chokona kuom ji gin: dhahabu,+ fedha,+ mula,+ 4 usi ma rambulu, usi ma rajamna, usi makwar, usi motegno mar kitani, yie diek, 5 piende yimbe molok makwar, piende mayom,* bepe mag yiend shita,+ 6 mo miolo e teyini,+ balsam milosogo mor wir,+ kod ubani mang’we mamit,+ 7 kite miluongo ni oniks, gi kite mamoko monego oket e efod*+ kod e ofuko mar akor.+ 8 Kendo ginigerna ka maler* mi anadag kodgi.+ 9 Unuger ka malerno, tiende ni hema mar lamo Nyasaye, kaachiel gi gigene duto kuluwo kaka ananyisu.+

10 “Unulos sanduk ma borne romo bede* ariyo gi nus, lachne bat achiel gi nus, to tutne bat achiel gi nus. Unulose kutiyo gi bepe mag yiend shita.+ 11 Unumwon iye gi oko gi dhahabu lilo,+ kendo unulos maridadi mar dhahabu molworo dho sandugno.+ 12 Unulos ring’ ang’wen mag dhahabu kendo uketgi e wi tielo ang’wen mag sandugno, ring’ ariyo e bathe konchiel to ring’ ariyo e bathe komachielo. 13 To unulos ludhe mag yiend shita kendo unumwon-gi gi dhahabu.+ 14 Unuso ludhego e ring’ manie bethe Sanduk koni gi koni mondo uting’ego. 15 Ok onego ogol ludhego e ring’ mag Sandugno; gisik mana kanyo.+ 16 E i Sandugno, unuketie kite mopamore moting’o chikena* ma abiro miyou.+

17 “Unulos raum ma borne bede* ariyo gi nus, to lachne bat achiel gi nus. Unulose gi dhahabu lilo.+ 18 Unuthedh dhahabu mondo ulosgo kido ariyo mag jokerubi e raum koni gi koni.+ 19 Kerubi achiel nobed e dho raum konchiel, to machielo nobed komachielo. 20 Unulos jokerubigo ka giyaro buombegi malo e wi raum,+ kendo ka ging’iyore. Onego gichom wengegi e raum. 21 Raumno+ en mar Sanduk. To e i Sandugno, unuketie kite mopamore moting’o chikena* ma abiro miyou. 22 Abiro fwenyorani e wi raum kanyo mi anawuo kodi.+ Kendo ka an e kind jokerubi ariyo manie wi sandug Chik* kanyo, ananyisi weche duto ma achiko Jo-Israel mondo oluw.

23 “Bende, unulos mesa+ ma borne bede* ariyo, lachne bat achiel, to borne kadhi malo bat achiel gi nus. Unulose kutiyo gi bepe mag yiend shita.+ 24 Unumwone gi dhahabu lilo kendo unulosne maridadi mar dhahabu molworo dhoge. 25 Unulos rageng’ molworo dho mesa, ma lachne en lith lwedo ang’wen* kama, kendo riak rageng’no duto nobed gi maridadi mar dhahabu. 26 Unulos ring’ ang’wen mag dhahabu kendo uketgi e konde ang’wen ka ma ochomie tiende mesano. 27 Ring’ ang’wen ma ibiro soyie ludhe miting’ogo mesa onego obed machiegni gi rageng’. 28 Unulos ludhe mag yiend shita kendo unumwon-gi gi dhahabu. Uti kodgi e ting’o mesano.

29 “Bende unulosne sende, okombe, njagi, gi bakunde ma ibiro tigo e golo chiwo miolo. Unulosgi gi dhahabu lilo.+ 30 To makate miketo e nyima nyaka bed e mesano ndalo duto.+

31 “Unulos gir chungo taya+ mar dhahabu. Unuthedhe gi dhahabu lilo. Tiende, kore, bedene, maupene, thiepene, kod obokene, ok onego olos yorgi.+ 32 Nobed gi bede auchiel, adek e bathe konchiel to adek e bathe komachielo. 33 Bede adek man konchiel nobed gi maupe adek adek ma chal gi maupe mag lozi, to komachielo bende kamano. Bat ka bat nobed gi maupene, thiepene, kod obokene. Unuket maua, kae to uluwe gi thiepene, eka uket obokene. Mano e kaka bede auchiel mag gir chungo tayano nobedi. 34 Kor gir chungo tayano onego obed gi maupe ang’wen ma chal gi maupe mag lozi, gi thiepe ang’wen, kod oboke ang’wen. Unuket maua, kae to uluwe gi thiepene, eka unuket obokene. 35 Thiewo achiel manie kor gir chungo tayano onego obed e bwo bede ariyo mokwongo mong’iyore. Utim kamano gi bede ariyo ariyo mamokogo bende. 36 Thiepe gi bedego kod gir chungo tayano duto ne gin gimoro achiel mothedh gi dhahabu lilo.+ 37 Bende, unulosne teyini abiriyo ma biro liel ka menyo nyim ka ma ichungee.+ 38 Gige simo taya kod gik miting’ogo mach onego olos gi dhahabu lilo.+ 39 Onego olos gir chungo tayano kaachiel gi gik mamokogo duto kitiyo gi talanta* achiel mar dhahabu lilo. 40 Ne ni ilosogi mana kaka asenyisi e got kae.+

26 “Unuger hema+ kutiyo gi lewni apar molos gi usi mar kitani momin motegno, gi usi ma rambulu, gi usi ma rajamna, kod usi makwar. Unutwang’ kit+ jokerubi+ e lewnigo. 2 Bor law ka law onego obed bede* 28, to lachgi bede 4. Lewnigo duto onego obed ma romre.+ 3 Abich kuomgi noriw mondo gilos law achiel maduong’, to abich mamokogo bende noriw yorgi mondo gilos law machielo maduong’. 4 Unutwang’ luks kutiyo gi usi ma rambulu e dir lewni ariyo madongogo ka ma ibiro riwgigo. 5 Law ka law nobed gi luks 50 miriwogigo, kendo luksgo onego ong’ire. 6 Unulos ramekni 50 mag dhahabu miriwogo lewni ariyo madongogo mondo hema obed law achiel.+

7 “Bende, unulos lewni 11+ mag yie diek+ miumogo hemano. 8 Bor mar law ka law onego obed bede* 30 to lachgi bede 4. Onego gibed ma romre kargi 11 duto. 9 Unuriw lewni abich mondo gilos law achiel maduong’, to auchiel mamokogo bende uriw yorgi. Uban law mar auchiel mogikno mondo nusne odong’ koliero e nyim hema. 10 Unutwang’ luks 50 e dir lewni ariyo madongogo ka ma ibiro riwgigo. 11 Unulos ramekni 50 mag mula kendo urwakgi e luks moselosnegi mondo giriw lewni ariyo madongogo obed law achiel. 12 Law molos gi yie diek biro liero koyombo law kitani mayom. Nus mare biro liero koumo tok hema. 13 To bathe modong’ biro liero koumo bath hema koni gi koni koyombo law kitani gi bat achiel.

14 “Bende, unuti gi piende yimbe molok gi rangi makwar mondo ulosgo law umo hemano, kae to uluow piende mayom kuome.*+

15 “Unulos frembe+ mag hema kutiyo gi bepe moriere mag yiend shita.+ 16 Bor mar frem ka frem nobed bede* apar ka dhi malo, to lach mar moro ka moro nobed bat achiel gi nus. 17 Unuchom tielo ariyo e frem ka frem ka gin e lain achiel. Mano e kaka nulos frembe duto mag hemano. 18 Unulos frembe 20 mibiro ket e bath hema mochomo yo milambo.

19 “Unulos rachungi* 40 mag fedha+ ma frembe 20 biro chung’ie. Ibiro chung frem ka frem e rachungi ariyo nikech frem ka frem nigi tielo ariyo, kendo utim kamano gi frembe mamoko duto bende.+ 20 Unulos frembe 20 mibiro ket e bath hema mochomo yo nyandwat, 21 kendo ulos rachungi* 40 mag fedha michungoe frembego. Ibiro chung frem ka frem e rachungi ariyo nikech frem ka frem nigi tielo ariyo, kendo utim kamano gi frembe mamoko duto bende. 22 Unulos frembe auchiel mibiro tigo e gero tok hema mochomo yo podho chieng’.+ 23 Unulos frembe ariyo ma ibiro ket e konde ariyo mag tok hema. 24 Onego oriw frembe ariyogo koa piny nyaka malo e ring’ mokwongo. Frembe ariyo mamoko bende onego otimnegi kamano, mi giduto ginilos konde ariyo mag hema. 25 Kamano ginibed frembe aboro kod rachungi* 16 mag fedha michungoe frembego. Ibiro chung frem ka frem e rachungi* ariyo nikech frem ka frem nigi tielo ariyo, kendo utim kamano gi frembe mamoko duto bende.

26 “Unulos ludhe mag yiend shita mibiro ket ariwa. Ludhe abich nobed mag frembe manie bath hema konchiel,+ 27 ludhe abich ne frembe man e bath hema komachielo, kendo ludhe abich ne frembe man e tok hema mochomo yo podho chieng’. 28 Luth miriwo e dier frembego onego oa tung’ konchiel nyaka tung’ komachielo.

29 “Unumwon frembego gi dhahabu,+ kendo ulosnegi ring’ mag dhahabu misoyoe ludhego, to ludhego bende unumwonie dhahabu. 30 Unuger hemano kuluwo kaka asenyisi e got kae.+

31 “Unulos pasia+ gi usi ma rambulu, gi usi ma rajamna, gi usi makwar, kod usi mar kitani momin motegno. Unutwang’ kit jokerubi e pasiano. 32 Unung’aw pasiano e sirni ang’wen mag yiend shita momwon gi dhahabu. Ralier manie sirnigo bende nobed mag dhahabu. Sirnigo biro chung’ e rachungi* ang’wen mag fedha. 33 Unung’aw pasiano e ramekni moriwo law hema, kae to urwak sandug Chik*+ e iye. Pasiano e ma biro pogo Ka Maler+ gi Ka Maler Moloyo.+ 34 Ubiro umo sandug Chik* gi raumne ka en Ka Maler Moloyo.

35 “Unuket mesa yo nyandwat oko mar pasia, to gir chungo taya+ unuket yo milambo kochomore gi mesa. 36 Unutwang’ pasia ma geng’o dho hema kutiyo gi usi ma rambulu, usi ma rajamna, usi makwar, kod usi mar kitani momin motegno.+ 37 Ubiro loso sirni abich mag yiend shita momwon gi dhahabu mibiro ng’awie pasiano. Ralier manie sirnigo nobed mag dhahabu, kendo unulos rachungi* abich mag mula ma sirnigo chung’ie.

27 “Unulos kendo mar misango kutiyo gi bepe mag yiend shita.+ Borne nobed bede* abich to lachne bende bede abich. To borne ka dhi malo onego obed bede adek.+ 2 Unulos tunge+ e konde ang’wen mag kendo mar misangono, kae to umwon kendono gi mula.+ 3 Unulos ndope miting’ogo buch kendo, kaachiel gi opewni, bakunde, uma michuoyogo ring’o, kod gige ting’o mach. Unulos gigo duto gi mula.+ 4 Unulos ne kendono sing’enge mar mula, kendo unuket ring’ molos gi mula e kondene ang’wen. 5 Unuket sing’engeno e bwo rageng’ molworo dho kendo mondo obed mana e kor kendono. 6 Unulos ludhe mag yiend shita ne kendono, kendo unumwon-gi gi mula. 7 Ibiro so ludhego e ring’ manie bath kendo koni gi koni mondo oting’ego.+ 8 Unulos i kendono obed thuolo mana kaka i sanduk, kendo ulose mana kaka Nyasaye nosenyisi e got.+

9 “Unulos laru+ ne hema mar lamo Nyasaye. Laru mochomo yo milambo nobed gi pasia ma borne en bede* 100 molos gi usi mar kitani momin motegno.+ 10 Enobed gi sirni 20 kod rachungi* 20 mag mula michungoe sirnigo. Ralier miguro e sirnigo kod gik miriwogigo gin mag fedha. 11 To bor mar pasia mochomo yo nyandwat nobed bede 100, kendo nobed gi sirni 20, gi rachungi* 20 mag mula, kendo nobed gi ralier mag fedha kod gik miriwogo sirni. 12 Laru mochomo yo podho chieng’ nobed gi pasia ma borne bede* 50. Unulos ne pasiano sirni apar gi rachungi* apar ma sirnigo chung’ie. 13 Lach mar laru mochomo yo wuok chieng’ nobed bede 50. 14 Unulier pasia ma borne en bede 15 e bath laru konchiel, kendo unulosne sirni adek kod rachungi* adek ma sirnigo chung’ie.+ 15 To komachielo, unulier pasia ma borne en bede 15 kendo unulos sirni adek kod rachungi* adek ma sirnigo chung’ie.

16 “E dho rangach, unuket nanga ma borne bede* 20. Unutwang’e gi usi ma rambulu, usi ma rajamna, usi makwar, kod usi mar kitani momin motegno,+ kendo ulosne sirni ang’wen kod rachungi* ang’wen ma gichung’ie.+ 17 Sirni duto molworo laru biro bedo gi gik miriwogigo molos gi fedha kod ralier mag fedha, to rachungi* ma sirnigo chung’ie nolos gi mula.+ 18 Bor mar laru nobed bede* 100,+ lachne bede 50, to bor mar pasia ka dhi malo nobed bede 5. Nolwor laruno gi pasia molos gi usi mar kitani momin motegno, kendo rachungi* michungoe sirni nobed mag mula. 19 Gik moko duto mitiyogo e hema kod loye migurogo hema gi loye mitiyogo e laru onego obed mag mula.+

20 “Inichik Jo-Israel mondo gikel mo maliw mar zeituni mibiro ol e teyini mondo giliel pile.+ 21 Teyinigo nobed e hema mar romo gi yo ka oko mar pasia machiegni gi sandug Chik.*+ Harun gi yawuote onego one ni teyinigo liel chakre odhiambo nyaka okinyi e nyim Jehova.+ Chikni omako Jo-Israel gi nyikwagi duto nyaka chieng’.+

28 “Kuom oganda Jo-Israel, kaw Harun+ owadu gi yawuote+ ma gin Nadab, Abihu,+ Eleazar, kod Ithamar+ mondo iketgi gibedna jodolo.+ 2 Los ne Harun owadu lep dolo,* mondo lewnigo omiye duong’ gi ber.+ 3 Nyis jotich duto molony ma asemiyo rieko+ ni gilos ne Harun lewni mibiro pwodhego mondo obedna jadolo.

4 “Magi e lewni ma gibiro loso: ofuko mar akor,+ efod,*+ kandho ma onge bade,+ kandho ma chek chek, kilemba,+ kod msip.+ Ginilos lep dologo ne Harun owadu gi yawuote mondo gitinago kaka jodolo. 5 Jotich molonygo biro tiyo gi dhahabu, usi ma rambulu, usi ma rajamna, gi usi makwar, kod usi motegno mar kitani.

6 “Ginilos efod* mar dhahabu ka gitwang’e gi usi ma rambulu, usi ma rajamna, usi makwar, kod usi mar kitani momin motegno.+ 7 Efod nolos gi lewni ariyo moriw e gok koni gi koni. 8 Msip motwang’+ e efod mondo otueyego bende onego olos gi gik molosgo efod ma gin: dhahabu, usi ma rambulu, usi ma rajamna, usi makwar, kod usi mar kitani momin motegno.

9 “Inikaw kite ariyo mag oniks+ mondo indikie nying yawuot Israel.+ 10 Inindik nyinge auchiel e kidi achiel, to auchiel modong’ indik e kidi machielo, chakre gi wuoyi maduong’ nyaka matin. 11 Ng’at molony e loso muhuri e ma biro ndiko nyinge yawuot Israel e kite ariyogo.+ Kae to uket kitego e pado mag dhahabu. 12 Iniket kite ariyogo ka miriwogo lewni ariyo mag efod* mondo gibed kite mag rapar ne Jo-Israel,+ kendo Harun nyaka ting’ nyingego e goke kaka rapar sa ma obiro e nyim Jehova. 13 Inilos pado mag dhahabu misoyoe kitego, 14 kendo inilos tonde ariyo momin kitiyo gi dhahabu lilo,+ mi initudgi e padogo.+

15 “Jatweng’o molony onego olos ofuko mar akor ma iting’ogo gik ma nyiso buche ma Nyasaye ong’ado.+ Onego olose kitiyo gi gik milosogo efod,* ma gin dhahabu, usi ma rambulu, usi ma rajamna, usi makwar, kod usi mar kitani momin motegno.+ 16 Onego obed law ma borne gi lachne romre, kendo ma koban diriyo to borne bedo sentimita 22* to lachne bende kamano. 17 Inichan kuome lainde ang’wen mag kite. E lain mokwongo, iniket kite miluongo ni rubi, topaz, gi emerald. 18 E lain mar ariyo, iniket kite mag tarkois, safir, kod jaspa. 19 E lain mar adek, iniket kite mag leshem, agat, kod amethust. 20 To e lain mar ang’wen, iniket kite mag krisolait, oniks, gi jade. Onego osogi e pado mag dhahabu. 21 Kitego biro chung’ ne dhoudi 12 mag Israel. Kitego nondikie nying dhoudi apar gariyogo. Ibiro ndikgi mana kaka indiko muhuri ka kidi ka kidi indikoe nying dhoot achiel.

22 “Unulos tonde momin kitiyo gi dhahabu lilo mibiro ket e ofuko mar akor.+ 23 Unulos ring’ ariyo mag dhahabu kendo unuketgi e konde ariyo ma malo mag ofuko mar akor. 24 Unutue tonde ariyo e ring’ ariyo man e konde ariyo ma malo mag ofuko mar akor, tol achiel konchiel to tol machielo komachielo. 25 To dho tonde ka modong’ uso e pado ariyo mag dhahabu manie gok efod. Onego gimakre gi lewni ariyo mag efod* gi ka nyime. 26 Unulos ring’ ariyo mag dhahabu kendo unuketgi e konde ariyo ma piny mag ofuko mar akor gi ka iye mochomore gi efod.+ 27 Unulos ring’ ariyo mamoko mag dhahabu e nyim efod gi yo ka mwalo, machiegni gi ka ma lewni ariyo mag efod riworego. Ginibed malo mar msip motwang’ e efod.+ 28 Unutue ofukono gi tol ma rambulu mondo omok motegno. Unuso tol e ring’ mag ofukono kae to utude e ring’ mag efod. Ofuko mar akorno onego obed e wi msip.

29 “Sa ma Harun donjo Ka Maler, nyinge yawuot Israel man e ofuko ming’eyogo weche ma Nyasaye ong’ado onego obed e kore. Nyingego nobed kaka rapar kinde duto e nyim Jehova. 30 Unuket Urim gi Thumim*+ e ofuko mar akorno, kendo nyaka gibed e kor Harun sa ma obiro e nyim Jehova. Omiyo, samoro amora ma Harun odhi e nyim Jehova, gik ming’eyogo weche ma Nyasaye ong’ado kuom Jo-Israel nobed e kore.

31 “Unulos kandho ma onge bade mirwako e bwo efod.* Unulos kandhono kutiyo gi usi ma rambulu lilo.+ 32 Onego otwang’ ng’ute motegno ma ok nyal yiech. Onego otwang’e kaka iloso ng’ut law akor mar lweny. 33 Unulos olembe ma chalo gi komamanga kutiyo gi usi ma rambulu, gi usi ma rajamna, kod usi makwar. Unutwang’gi ka gilworo riak kandhono, kendo unuket olang’ matindo tindo mag dhahabu e kindgi. 34 Ka uketo olang’ achiel, uluwe gi komamanga, kamano kamano nyaka ulwor riak kandhono duto. 35 Harun nyaka rwak kandhono sa ma otiyo tij dolo, kendo dwond olang’go nowinjre sa ma odonjo ka maler e nyim Jehova kod sa ma owuok, nono to obiro tho.+

36 “Unulos osimbo maler ma nyilni kutiyo gi dhahabu lilo, kendo undike kaka indikoga muhuri. Undik kama: ‘Ler en mar Jehova.’+ 37 Ka uselose, unutueye e kilemba+ kutiyo gi tol ma rambulu, kendo enosik e nyim kilemba makendeno. 38 Enobed e lela wang’ Harun. Kendo ka ng’ato otimo richo gi chiwo mowal+ ma Jo-Israel osegolo kaka mich maler ne Nyasaye, richono nokwan e wi Harun. Gima opamoreno onego osik e lela wang’ Harun kinde duto, mondo Jehova oyie gi Jo-Israel.

39 “Unutwang’ kandho mar usi motegno mar kitani ma chek chek, kendo unulos kilemba makende kutiyo gi usi motegno mar kitani, kendo unutwang’ msip.+

40 “Bende, unulos ne yawuot Harun kandho, msibe, kod kilemba+ ma gibiro rwako mondo omigi duong’ gi ber.+ 41 Inirwak ne Harun owadu kandho, to yawuote bende inirwaknegi kendhe, kendo iniwirgi gi mo+ mondo iketgi+ e tich maler, mi ipwodhgi mondo gitina kaka jodolo. 42 Inilosnegi onyasa mar law kitani mondo giumgo duggi,+ kendo gibed onyese ma chopo e bembegi. 43 Harun gi yawuote onego orwak gigi sa asaya ma gibiro e hema mar romo kata sa ma gidhi ka maler mondo giti e kendo mar misango. Ka ok gitimo kamano to en richo kendo gibiro tho. Chikni omako Harun gi nyikwaye nyaka chieng’.

29 “Sa ma iwalo Harun gi yawuote mondo gibedna jodolo, tim kama: Kaw nyaruath gi yimbe ariyo ma onge mbala.+ 2 Bende, ikaw makate ma ok oketie thowi, gi makate molworore ma nigi bur e diergi modwal gi mo kendo ok oketie thowi, kod makate mopamore mowirie mo to ok oketie thowi.+ Unulos makatego duto kutiyo gi mok ngano mayom, 3 mi unuketgi e okapu,+ kendo ukelnagi gi nyaruath kod yimbe ariyoka.

4 “Inikel Harun gi yawuote e dho hema mar romo,+ kendo inichikgi mondo gilwokre* gi pi.+ 5 Eka inikaw lewnika+ mondo irwak ne Harun. Inirwakne kandho ma bade bor, gi kandho ma onge bade, gi efod,* gi ofuko mar akor, kendo inituene msip mar efod e nungone.+ 6 Inituene kilemba e wiye, kendo iniketne osimbo maler molos gi dhahabucha e kilembano;+ 7 kendo ikaw mor wir+ iol e wiye mondo iwalego.+

8 “Bang’ mano, inikel yawuote kendo irwaknegi kandhoka,+ 9 mi initue ne Harun gi yawuotego msibe, kendo inirwaknegi kilemba; gin e ma ginibedna jodolo kinde duto.+ Mano e kaka iniket Harun gi yawuote e tij dolo.+

10 “Koro inikel nyaruath e nyim hema mar romo, kendo Harun gi yawuote noket lwetegi e wi ruadhno.+ 11 Iniyang’e e nyim Jehova, mana e dho hema mar romo kanyo.+ 12 Inilut lith lweti e remb ruadhno kendo imien remono e tunge kendo mar misango,+ kae to iniol remo modong’ duto e tiend kendono.+ 13 Eka inikaw boche duto+ moumo nyimbich, gi boche manie chuny, kendo inikaw nyiroke ariyo kod bochegi, kae to iniwang’gi e kendo mar misango mondo gigol yiro.+ 14 To ring ruadhno, gi piene, kod owuoche, iniwang’ oko mar kambi. Nikech en misango migolo nikech richo.

15 “Eka inikaw yim achiel, kendo Harun gi yawuote noket lwetegi e wiye.+ 16 Iniyang’e, mi inikir rembe e bethe kendo mar misango.+ 17 Inipoge lemo lemo, kendo ilwok nyimbiyene+ kod tiendene, kae to ichok lemogo kaachiel gi wiye. 18 Iniwang’ yimno duto e kendo mondo ogol yiro. Mano en misango miwang’o ne Jehova, ma golone suya mamit.+ En misango miwang’o ne Jehova e mach.

19 “Bang’ mano, inikaw yim machielo, kendo Harun gi yawuote noket lwetegi e wiye.+ 20 Iniyang’e, kendo inimien rembe e it Harun ma korachwich gi it yawuote ma korachwich. Kendo inimien remo e lith lwetegi mathuon ma korachwich, gi lith tiendegi mathuon ma korachwich, kendo inikir remo e bethe kendo mar misango. 21 Kae to ikaw remo moko manie kendo mar misango kod mor wir+ mondo ikirgi kuom Harun gi yawuote, kendo ikirgi e lepgi bende mondo Harun gi yawuote kaachiel gi lepgi obed maler.+

22 “Eka ikaw boche mag yimno, gi sembene, gi boche moumo nyimbiyene, gi boche mag chunye, gi nyirokene ariyo gi bochegi,+ kod tiende ma korachwich, nikech en yim michiwo sa ma iwalo ng’ato ne tich maler.+ 23 Bende, ikaw makate ma ok oketie thowi e okapu manie nyim Jehova; achiel molworore, achiel mowirie mo ma nigi bur e diere, kod achiel mopamore. 24 lniketgi giduto e lwet Harun gi yawuote, kendo ifwagi koni gi koni kaka chiwo mifwayo e nyim Jehova. 25 Eka inikaw makatego e lwetgi, mi iniwang’gi e kendo mar misango kaachiel gi misango miwang’o mondo gigol ne Jehova suya mamit. Gin misengni miwang’o ne Jehova e mach.

26 “Kendo inikaw agoko mar yim miwalogo+ Harun ne tich maler kae to ifwaye koni gi koni e nyim Jehova, mi nobed lemo mari. 27 Inipwodh chiwo mifwayo mar yim ma en agoko gi tielo man kuome. Nikawe koa e yim mar misango ma ne ochiw kiwalo+ Harun gi yawuote. 28 Lemono nobed mar Harun gi yawuote kinde duto nimar en lemo mowal ma Jo-Israel miyo jodolo.+ En lemo mowal ma gichiwo ne Jehova koa kuom misengnigi mag kuwe.+

29 “Lep Harun mag dolo+ biro dong’ ne yawuote+ ma biro kawo kare. Ginirwakgi sa ma iwirogi gi mo mondo gibed jodolo. 30 Wuode ma biro kawo kare norwakgi kuom ndalo abiriyo sa ma odonjo mondo oti ka maler e hema mar romo.+

31 “Inikaw yim miwalogo ng’ato ne tich maler, kendo inichwak ringe ka maler.+ 32 Harun gi yawuote biro chamo+ ring’ono gi makate me okapu e dho hema mar romo. 33 Ginicham gik ma nochiw kaka misengni mag richogi ka ne iketogi jodolo kendo ka ne ipwodhogi. Ng’at ma ok ja dhood Harun ok onego ochamgi nikech gin gik mowal.+ 34 Ka po ni ring’o kata makate ma nomigi kiwalogi odong’ nyaka okinyi, onego owang’gi gi mach.+ Kik chamgi nimar gin gik mowal.

35 “Mano e kaka initim ne Harun gi yawuote kiluwo duto ma asechiki. Ibiro pwodhogi kuom ndalo abiriyo mondo gibed jodolo.+ 36 Odiechieng’ kodiechieng’ inichiw ruath kaka misango mar richo. Kuom timo kamano, inipwodh kendo mar misango bende. Kendo inikir mo e kendono mondo iwale ne tij Nyasaye.+ 37 Unuchiw misengni mag pwodho kendono kuom ndalo abiriyo mondo kendono obed maler moloyo.+ Ng’at ma mulo kendono onego obed maler.

38 “Magi e gik mubiro chiwo e kendono pile ka pile. Ginibed yimbe ariyo ma hikgi achiel-achiel.+ 39 Unuchiw yim achiel gokinyi, to machielo unuchiw godhiambo.*+ 40 Sa ma uchiwo yim mokwongo, unuchiwe kaachiel gi efa* achiel kuom apar mar mogo mayom moruw gi mo maliw moromo hin* akwota; gi hin akwota mar divai mag chiwo miolo. 41 Ubiro chiwo yim machielono godhiambo.* Unuchiwe gi mogo gi divai mag chiwo miolo kaka notim gokinyi. Ubiro chiwe kaka misango miwang’o ne Jehova mondo ogolne suya mamit. 42 Kinde duto ibiro gol misango miwang’ono e dho hema mar romo e nyim Jehova kuom tiengeu duto. Kanyo e ma abiro fwenyoranue kendo wuoyoe kodi.+

43 “Abiro fwenyora ne Jo-Israel kanyo, kendo duong’na nomi kanyo obed maler.+ 44 Abiro pwodho hema mar romo kod kendo mar misango, kendo anapwodh Harun gi yawuote+ mondo gitina kaka jodolo. 45 Anadag gi Jo-Israel, kendo anabed Nyasachgi.+ 46 Eka gining’e ni an e Jehova Nyasachgi, ma nogologi e piny Misri mondo adag kodgi.+ An e Jehova Nyasachgi.

30 “Inilos kendo mar wang’o ubani+ kitiyo gi bepe mag yiend shita.+ 2 Borne gi lachne onego obed bat* achiel-achiel, to tutne onego obed bede ariyo. Ok unulos tungene yore.+ 3 Inimwon wiye, bethene duto, kod tungene kitiyo gi dhahabu lilo; kendo inilosne maridadi mar dhahabu kolworo dhoge. 4 Inilosne bende ring’ ang’wen mag dhahabu, ariyo konchiel to ariyo komachielo. Ring’ ang’wen-go nobed e bwo maridadino, kendo ibiro so ludhe miting’ogo kendono e ring’go. 5 Inilos ludhego kitiyo gi yiend shita, kendo inimwon-gi gi dhahabu. 6 Unuket kendono e nyim pasia man machiegni gi sandug Singruok.*+ Unukete e nyim raum manie sandugno ka ma abiro fwenyoranue.+

7 “Harun+ biro wang’o ubani mang’we mamit+ e kendono+ sa ma oiko teyini+ okinyi kokinyi. 8 Bende, ka Harun moko teyinigo godhiambo,* obiroga wang’o ubani. Ubanino ibiro chiw pile ka pile e nyim Jehova kuom tiengeu duto. 9 Kik uwang’ ubani ma ok owinjore e kendono,+ kata misango miwang’o, kata chiwo mar cham, kata chiwo miolo. 10 Harun onego omien remb misango mar richo e tunge kendono mondo opwodhego.+ Onego otim kamano dichiel e higa+ kuom tiengeu duto. Kendono en gima ler ahinya e wang’ Jehova.”

11 Eka Jehova nowacho ne Musa niya: 12 “Kinde moro amora mukwanoe Jo-Israel mondo ung’e kwan-gi,+ moro ka moro kuomgi nyaka chiw ne Jehova gima owarogo ngimane. Onego gitim kamano mondo masira kik yudgi sa ma ikwanogi. 13 Jogo duto mokwan biro golo chiwo ma romo nus shekel* mopim gi rapim mar ka maler.+ Shekel achiel romre gi gera* 20. Gibiro chiwo nus shekel ne Jehova.+ 14 Ng’ato ka ng’ato mosekwan ma hike oromo 20 kata mokadho kanyo onego ogol chiwono ne Jehova.+ 15 Sa ma ji golo ne Jehova chiwo ma giwarogo ngimagi, jomwandu ok onego ochiw mokalo nus shekel,* to jodhier bende ok onego ochiw matin ne mano. 16 Inikaw pes fedha ma Jo-Israel ogolo kaka chiwo miwarogo ngimagi kendo inichiwgi ne tij Nyasaye mitimo e hema mar romo, mondo pesago obed gima Jehova parogo Jo-Israel.”

17 Jehova nomedo wacho ne Musa niya: 18 “Kaw mula ilosgo besen mar lwok, kendo ilos ne besendno gima ibiro chungee;+ inikete e kind hema mar romo kod kendo mar misango, kae to iol pi e besendno.+ 19 Harun gi yawuote biro lwoko lwetegi kod tiendegi kanyo.+ 20 Sa ma gidhi tiyo e hema mar romo kata gidhi golo ne Jehova chiwo miwang’o e kendo mar misango, onego gilwokre gi pi, nono to gibiro tho. 21 Onego gilwok lwetegi gi tiendegi mondo kik githo. Mano nobed chik momako Harun gi nyikwaye kuom tiengegi duto.”+

22 Jehova nomedo wacho ne Musa kama: 23 “Bang’ mano, inikaw gik mang’we mamit moloyo ma gin: manemane mopoto kilo auchiel, dalasini kilo adek, ondago* kilo adek, 24 kod kasia kilo auchiel mopim gi gir pimo shekel mitiyogo ka maler,+ kaachiel gi hin* achiel mar mor zeituni. 25 Gigo e ma mondo ilosgo mor wir maler; onego oruwgi maber.+ Mano en mor wir maler mipwodhogo ng’ato ne tich mowal.

26 “Morno e ma ibiro pwodhgo hema mar romo+ gi sandug Chik,* 27 mesa gi gigene, gir chungo taya gi gigene, kendo mar wang’o ubani, 28 kendo mar wang’o misengni gi gigene te, kod besen gi gima ichungee. 29 Onego ipwodh gigo mondo gibed gik maler moloyo.+ Ng’at ma mulo gigo onego obed maler.+ 30 Ibiro tiyo gi mo e walo Harun+ gi yawuote+ mondo gitina kaka jodolo.+

31 “Iniwach ne Jo-Israel niya, ‘Morni nobedna mor wir maler e tiengeu duto.+ 32 Ok onego oti kode e wiro ng’at machielo, kendo kik ulos mo moro amora machal kode. En mor wir maler, kendo nobednu kamano kinde duto. 33 Ng’at moloso mo machal kode kata ng’at motiyo kode e wiro jal ma ok owinjore, ng’atno nyaka negi.’”+

34 Eka Jehova nonyiso Musa kama: “Kaw gik mang’we mamit ma luwogi kendo ipimgi ma romre.+ Inikaw sitakiti, onuka, galibena, kod ubani. 35 Initi kodgi e loso ubani.+ Onego oruwgi maber mi medie chumbi+ mondo gibed gik maler kendo mopwodhi. 36 Iniswag moko kuomgi mondo obed poda mayom. Kae to ikaw poda moko iket e nyim Sandug Chik* manie hema mar romo ka ma abiro fwenyoranue. Ubanino nobednu gima ler moloyo. 37 Kik ulos ubani ma kamano mondo utigo e yoreu uwegi.+ Onego ukawe kaka gima ler e nyim Jehova. 38 Ng’at moloso ubani ma kama ni mondo owinj mit suche nyaka negi.”

31 Jehova nomedo nyiso Musa kama: 2 “Aseyiero Bezalel+ wuod Uri ma wuod Hur ma ja dhood Juda,+ 3 abiro pong’e gi roho mara mondo obed gi rieko, gi lony, kod nyalo mar ng’eyo timo tije duto mag lwedo. 4 Abiro miye nyalo mar loso gik mothedh maber, olos gik dhahabu, gi fedha, kod mula, 5 ong’ado kite mi ochomgi maber,+ kendo olos gimoro amora mar bao.+ 6 Bende, aseketo Oholiab+ wuod Ahisamak ma ja dhood Dan mondo okonye. Abiro miyo jotich duto molony rieko mar loso gik moko duto ma asechiki. Gik monego olosgo gin:+ 7 hema mar romo,+ sandug Chik*+ kod raumne,+ gik moko duto mitiyogo e hema, 8 mesa+ gi gigene, gir chungo taya molos gi dhahabu lilo kod gigene duto,+ kendo mar wang’o ubani,+ 9 kendo mar wang’o misengni+ gi gigene duto, besen kod gima ichungee,+ 10 lewni motwang’ maber, lep dolo mag Harun gi lep dolo mag yawuote,+ 11 mor wir maler, kod ubani ma suyane mit mitiyogo ka maler.+ Ginitim gik moko duto ma asechiki.”

12 Jehova nomedo nyiso Musa kama: 13 “Nyis Jo-Israel niya, ‘Gima nyaka urit moloyo en sabato maga,+ nimar sabato en ranyisi me kinda kodu e tiengeu duto, mondo ung’e ni an Jehova, an e ma apwodhou. 14 Nyaka urit Sabato nikech en odiechieng’ maler.+ Ka ng’ato oketho chik sabato, nyaka nege. Ng’at motiyo tich moro amora chieng’no nyaka negi.+ 15 Oyienu tiyo kuom ndalo auchiel, to chieng’ mar abiriyo en sabato mar yueyo.+ En odiechieng’ maler e wang’ Jehova. Ng’at motiyo chieng’ Sabato, nyaka negi. 16 Jo-Israel nyaka rit Sabato; nyaka gimak chik Sabato kuom tiengegi duto. Mano en singruok mochwere e kinda kodgi. 17 En ranyisi mochwere e kinda kod Jo-Israel,+ nimar an Jehova, nachueyo polo gi piny kuom ndalo auchiel, to e odiechieng’ mar abiriyo, nayueyo.’”+

18 Ka nosetieko wuoyo gi Musa e Got Sinai, nomiyo Musa kite ariyo mopamore moting’o chike*+ ma Nyasaye e ma nondiko gi lith lwete.+

32 Ka ji noneno ni Musa obudho ahinya e got,+ ne gichokore ir Harun mi ginyise kama: “Losnwa nyasaye ma nyalo telonwa+ nimar wakia gima otimore ne Musa, jal ma notelonwa ka wawuok e piny Misri.” 2 Harun nodwokogi niya: “Kelnauru stadi mag dhahabu+ manie it mondeu, gi yawuotu, kod e it nyiu.” 3 Omiyo, ji duto nogolo stadi mag dhahabu ma ne nie itgi mi giterogi ne Harun. 4 Nokawo dhahabugo molosogo sanamu mar nyaroya.+ Eka Jo-Israel nowacho niya: “Ma e Nyasachwa ma ne ogolowa e piny Misri.”+

5 Ka ne Harun oneno kamano, nogero kendo mar misango e nyim nyaroyano mi nogoyo milome kowacho niya: “Kiny wanatim ne Jehova sawo.” 6 Omiyo, kinyne ne gimondo gokinyi mang’ich mi gichako golo misengni miwang’o kod misengni mag kuwe. Bang’ mano, ne gichiemo ma gimetho kendo ne gimor ahinya.+

7 Jehova nowacho ne Musa niya: “Lor idhi piny, nikech jo ma ne igolo e piny Misri osedwanyore.+ 8 Giseweyo mapiyo yo ma ne achikogi ni giluw.+ Giseloso sanamu mar nyaroya kendo gikulorene. Gigolone misengni ka giwacho ni, ‘Ma e Nyasachwa ma ne ogolowa e piny Misri.’” 9 Jehova nomedo wacho ne Musa niya: “Aseneno ni tok Jo-Israelgi tek.+ 10 We aneggi nikech gisewang’o iya, mondo in e ma aketi ibed oganda maduong’ kargi.”+

11 Eka Musa nosayo Jehova Nyasache+ kama: “Yaye, Jehova, ang’o momiyo mirima omaki gi jogi bang’ gologi e piny Misri kitiyo gi tekoni maduong’ kod lweti ma nigi teko?+ 12 Ka po ni itimo kamano, Jo-Misri biro wacho ni, ‘Nyasachgi nogologi Misri mondo otimnegi marach. Nodwaro negogi e gode mondo otiek kargi chuth e piny.’+ Omiyo, kik mirima maki kodgi kendo yie ilok pachi kik ikelnegi masirano. 13 Par kaka ne ikuong’ori ne jotichni Ibrahim, Isaka, kod Israel ka ne iwacho ne moro ka moro kuomgi ni: ‘Anami kothi obed mang’eny kaka sulwe manie polo,+ kendo anamigi pinyni duto, mi pinyni nobed margi nyaka chieng’.’”+

14 Kuom mano, Jehova noloko pache mi koro ne ok okelo ne joge masira ma nosewacho.+

15 Musa nolor koa e got koting’o kite ariyo mopamore ma nigi chike*+ e lwete.+ Kitego nondik koni gi koni, ka nyimgi gi ka ng’egi. 16 Nyasaye e ma noloso kite mopamorego, kendo en e ma nondikogi.+ 17 Ka ne Joshua owinjo ka ji goyo koko, nowacho ne Musa niya: “Awinjo koko mar lweny e kambi.” 18 To Musa nodwoke niya:

“Kokono ok en mar jo ma wer nikech gilocho e lweny,

To bende ok en mar jo ma ywak nikech ologi e lweny;

En koko ma opogore.”

19 Ka ne Musa ochopo machiegni gi kambi ma oneno nyaroya+ kendo neno ka ji miel, iye nowang’ matek mowito kitego piny e tiend got kendo kitego notore matindo tindo.+ 20 Nokawo nyaroya ma ne gilosono, mowang’e gi mach kendo ne orege modoko buru.+ Nokiro burugo e pi, mochiko Jo-Israel mondo omodh pigno.+ 21 Kae to Musa nopenjo Harun niya: “Ang’o ma jogi notimoni momiyo irwakogi e richo maduong’ kama?” 22 Harun nodwoke kama: “Ruodha, kik ibed gi mirima, nimar iwuon ing’eyo kaka chuny Jo-Israelgi ohero richo.+ 23 Ne ginyisa niya, ‘Losnwa nyasaye ma nyalo telonwa nimar wakia gima otimore ne Musa, jal ma notelonwa ka wawuok e piny Misri.’+ 24 Omiyo, nanyisogi ni, ‘Ng’at morwako gir dhahabu mondo ogol okelna.’ Kae to nabolo dhahabugo e mach mi nyaroyani owuok.

25 Musa noneno ni ji nosedwanyore nikech Harun noweyogi gibedo kamano, nimar timgino nokelonegi wich-kuot e nyim wasikgi. 26 Eka Musa nochung’ e ranga kambi mowacho kama: “Ng’ano man kor Jehova? Ng’atno mondo obi ira!”+ Mi Jo-Lawi duto nodhi ire. 27 Musa nonyisogi niya: “Jehova Nyasach Israel ochiko kama, ‘Ng’ato ka ng’ato kuomu mondo otue liganglane e nungone, kendo ong’ad e dier kambi koa e dho rangach ma koni nyaka e dho rangach ma kocha konego owadgi, jirande, kod osiepne.’”+ 28 Jo-Lawigo notimo kaka Musa nochikogi. Omiyo, chieng’no ne ginego ji 3,000 kama. 29 Musa nowachonegi niya: “Walreuru ne Jehova kawuono, nikech ng’ato ka ng’ato kuomu osenego wuode kod owadgi,+ kendo Nyasaye biro guedhou kawuono.”+

30 Kinyne, Musa nonyiso ji niya: “Usetimo richo maduong’, omiyo abiro dok e got ir Jehova mondo ane ka anyalo kwaye owenu richou.”+ 31 Musa nodok ir Jehova monyise kama: “Jo-Israel osetimo richo maduong’ ahinya! Giseloso nyasaye mar dhahabu!+ 32 Asayi ni kiyie to wenegi richogi.+ Ka ok kamano, to an e ma iruch nyinga e bugi.”+ 33 Jehova to nodwoko Musa niya: “Ng’at motimo richo e ma abiro rucho nyinge e buga. 34 Koro dog mondo itelnegi nyaka ka ma ne asenyisi. Malaikana biro telonu,+ kendo chieng’ ma anabi mondo anon timbe joga, anakumgi nikech richogi.” 35 Bang’ mano, Jehova nokelonegi masira, nikech ne giloso sanamu mar nyaroya ma ne ginyiso Harun mondo olosnegi.

33 Jehova nomedo wacho ne Musa kama: “Koro wuog kae gi jo ma ne igolo Misri mondo udhi e piny ma ne asingo ne Ibrahim, Isaka, kod Jakobo ni anami nyikwagi.+ 2 Abiro oro malaika nyimu+ mondo ariembnu Jo-Kanaan, Jo-Amor, Jo-Hiti, Jo-Perizi, Jo-Hivi, kod Jo-Jebus oa e nyimu.+ 3 Unudhi e piny mopong’ gi chak kod mor kich.+ An to ok nawuoth e dieru, di po ka atiekou chuth e yo+ nimar toku tek.”+

4 Ka ne ji owinjo wach magerno, ne gichako ywagore, kendo onge kata ng’ato kuomgi ma norwako gik dusruok. 5 Jehova nonyiso Musa mondo owach ne Jo-Israel kama: “Un jo ma tokgi tekgi.+ Anyalo biro iru ma atieku ka diemo wang’.+ Kuom mano, ka pod aparo gima adwaro timonu, kik ng’ato orwak gik dusruok.” 6 Omiyo, Jo-Israel noweyo rwako gige dusruokgo ka gin e Got Horeb, kendo ne ok gichako girwakogi kendo.

7 Eka Musa nogolo hemane oko mar kambi mogure ka mabor matin, kendo noluongo hemano ni hema mar romo. Ng’at ma ne dwaro ng’eyo dwach Jehova+ ne dhi e hemano. 8 Kinde duto ma Musa ne wuok e kambi mondo odhi e hemano, ji duto ne a malo kendo chung’ e dho hembegi ka ging’iyo Musa nyaka odonj e i hemano. 9 Sa asaya ma Musa ne donjo e hemano, siro mar bor polo+ ne lor piny mi chung’ e dho hemano, kae to Nyasaye ne wuoyo gi Musa.+ 10 Ka ji ne oneno siro mar bor polo kochung’ e dho hema, ng’ato ka ng’ato ne kulore piny e dho hembe. 11 Jehova ne wuoyo gi Musa wang’ gi wang’+ mana kaka dhano diwuo gi wadgi. Ka ne Musa dok e kambi, jatichne+ ma en Joshua+ wuod Nun ne dong’ e hemano.

12 Eka Musa nonyiso Jehova niya: “Isechika mondo atel ne jogi to pok inyisa ng’at ma biro konya. Bende, isewachona ni ing’eya gi nyinga kendo ni iyie koda. 13 Koro ka adier iyie koda, akwayi ni ipuonja yoreni+ mondo ang’eyi, eka amed bedo ng’at miyiego. To bende, ng’e ni ogandani gin jogi.”+ 14 Nyasaye nodwoke kama: “An awuon abiro dhi kodi,+ kendo anamiyi yueyo.”+ 15 Musa nowachone kama: “Ka in iwuon ok idhi kodwa, kik igolwa kae. 16 Nikech ka ok idhi kodwa, ere kaka ji biro ng’eyo ni iyie koda kaachiel gi ogandani bende? Donge kidhi kodwa+ eka biro ng’ere ni wapogore gi ogendni mamoko duto manie wang’ piny?”+

17 Jehova nodwoko Musa niya: “Abiro timo kaka isekwayono nikech in ng’at ma ayiego kendo ang’eyi gi nyingi.” 18 Kae to Musa nokwaye kama: “Yie inyisae duong’ni.” 19 To Nyasaye nodwoke niya: “Abiro miyo ine berna, kendo anahulni nyinga ma Jehova;+ mi anayie gi ng’at ma ayiego, kendo ananyis ng’wono ne ng’at ma adwaro nyiso ng’wono.”+ 20 Nomedo kama: “Ok inyal neno wang’a, nimar onge dhano ma nyalo neno wang’a ma dong’ ka pod ngima.”

21 Jehova nomedo wachone niya: “Nitie lwanda moro buta kae, bi ichung’ie. 22 Sa ma duong’na kadho, abiro keti e rogo man e lwanda, kendo anaumi gi lweta nyaka akal. 23 Bang’ mano, abiro golo bada mi inine ng’eya. Kata kamano, wang’a to ok ibi neno.”+

34 Eka Jehova nowacho ne Musa niya: “Pa kite ariyo mopamore ma chal gi mokwongo+ ma ne igoyo piny motoreka,+ mondo andikie weche ma ne andiko e kite mokwongoka.+ 2 Ikri mondo kiny gokinyi ibi e wi Got Sinai mondo ichung’ e nyima.+ 3 Kik ng’ato obi kodi e wi got, bende kik ne ng’ato ang’ata e godno. Kata mana jamni ok onego okwa e nyim godno.”+

4 Omiyo, Musa nopayo kite ariyo mopamore ma chal gi mokwongoka, kendo nomondo gokinyi e wi Got Sinai koting’o kite ariyogo e lwete, mana kaka Jehova nosechike. 5 Eka Jehova nolor+ e bor polo ma obiro ka ma ne entie mohulone nyinge ma Jehova.*+ 6 Jehova ne kalo e nyime ka wacho ni: “An Jehova, an Jehova, an Nyasaye mang’won+ kendo ma kecho ji,+ ma iye ok wang’ piyo,+ kendo mogundho gi hera mosiko+ kod adiera,+ 7 ma nyiso ji gana gi gana hera mosiko,+ ma weyo ne ji kethogi, gi richogi.+ To ok awe mak akumo jaketho,+ kendo akumo nyithindo gi nyikwayo nyaka chop tieng’ mar adek gi mar ang’wen nikech ketho mag wuonegi.”+

8 Musa nogoyo chonge piny mapiyo mokulore e nyim Nyasaye. 9 Kae to nowacho kama: “A Jehova, ka an ng’at miyiego adier, to asayi ni iwuoth e dierwa.+ A Jehova, kata obedo ni wan jo ma tokgi tek,+ yie iwenwa kethowa kod richowa+ kendo ikawwa kaka mwanduni.” 10 To Nyasaye nodwoke kama: “Eri atimo singruok kodu: Abiro timo honni madongo ka jogu neno, honni ma pok notimga e piny duto kata e ogendni duto,+ kendo jo ma udak e kindgi duto none gima Jehova timo, nimar gima atimonu en gima lich miwuoro.+

11 “Luwuru weche ma achikou kawuono.+ Abiro riembo Jo-Amor, Jo-Kanaan, Jo-Hiti, Jo-Perizi, Jo-Hivi, gi Jo-Jebus mondo gia e nyimu.+ 12 Tang’uru kik utim singruok gi jo ma odak e piny mudhiyeno,+ di po ka udonjo e obadho.+ 13 To nyaka umuk kendogi mag misengni, kendo uketh sirnigi* mag kite kod mag yien.+ 14 Kik ulam nyasaye machielo,+ nimar Jehova en Nyasaye ma dwaro ni en kende e ma olame.* Ee, odwaro ni en kende e ma olame.+ 15 Tang’uru kik utim singruok moro amora gi jopinyno, nikech sa ma gilamo* nyisechegi ka gichiwonegi misengni,+ gibiro luongou ma ucham kodgi misengni ma gigologo.+ 16 Di po ka yawuotu okendo nyigi+ ma lamo nyiseche manono, mi gimi yawuotu bende ochak lamo nyisechego.+

17 “Kik ulos nyiseche mag chuma.+

18 “Unutim Sap Makate ma Ok Oketie Thowi.+ Unucham makate ma ok oketie thowi mana kaka asechikou. Unutime kuom ndalo abiriyo e kinde moketi e dwe mar Abib,*+ nimar e dwe mar Abib e ma ne uwuokie Misri.

19 “Nyithindo makayo ma chwo duto gin maga,+ moriwo nyaka mag jambu duto, bed ni gin mag dhok kata rombe.+ 20 Inichiw rombo mondo iwargo nyathi punda makayo. To ka ok iware, to nyaka nege.* Yawuotu duto makayo bende nyaka uwar.+ To ng’ato kik bi e nyima gi lwete nono.

21 “Unuti kuom ndalo auchiel, to e odiechieng’ mar abiriyo unuyue.*+ Ubiro yueyo kata mana e kinde pur gi keyo.

22 “Unutim Sap Jumbe. Unutime gi nyak mokwongo mag ngano ma ukayo, kendo unutim Sawo mar Choko* e giko higa.+

23 “Didek e higa, chwo duto onego obi e nyim Ruoth madier, ma en Jehova Nyasach Israel.+ 24 Abiro riembo ogendni oa e nyimu,+ mi anayar tong’ mar pinyu, kendo kinde ma ubiroga dhi neno wang’ Jehova Nyasachu didek e higa, onge ng’at ma biro temo kawo pinyu.

25 “Kik uchiw remb chiaye gi gima oketie thowi.+ Kendo ring chiaye motimgo sap Pasaka kik we nyaka piny ru.+

26 “Cham mukwongo kayo kendo mabeyo moloyo nyaka ukel e od Jehova Nyasachu.+

“Kik ited ring nyadiel e chag min-gi.”+

27 Jehova nomedo wacho ne Musa niya: “Ndik wechegi piny,+ nikech wechegi e ma atimogo singruok kodi kaachiel gi Jo-Israel.”+ 28 To Musa nobet kanyo gi Jehova kuom ndalo 40 odiechieng’ gotieno. Ne ok ochamo makate kendo ne ok omodho pi.+ Kendo Nyasaye nondiko weche mag singruogno e kite ariyo mopamore, ma gin Chike Aparka.+

29 Eka Musa nolor koa e Got Sinai koting’o kite ariyo mopamore moting’o chike.*+ Lela wang’e ne rieny nikech noa wuoyo gi Nyasaye, to en owuon ne ok ong’eyo mano. 30 Ka ne Harun gi Jo-Israel duto ong’iyo Musa, ne gineno ka lela wang’e rieny mi ne giluor sudo bute.+

31 To Musa noluongogi, mi Harun gi jodong oganda nodhi ire, kendo Musa nowuoyo kodgi. 32 Eka Jo-Israel duto nodhi ire ma onyisogi chike duto ma Jehova nomiye e Got Sinai.+ 33 Musa ne umo wang’e gi law sa asaya ma notieko wuoyo kodgi.+ 34 To sa ma Musa ne dhi wuoyo gi Jehova, ne ogolo law moumogo wang’eno nyaka oa e nyime.+ Kae to nodok ir Jo-Israel mondo onyisgi chike mosemiye.+ 35 Kendo Jo-Israel ne oneno ka lela wang’ Musa rieny, Musa ne oumo wang’e gi lawno nyaka sa ma ne odhi wuoyo gi Nyasaye.+

35 Bang’e, Musa nochoko oganda Jo-Israel duto mowachonegi niya: “Jehova ochikowa ni watim kama:+ 2 Oyienwa tiyo kuom ndalo auchiel, to chieng’ mar abiriyo en odiechieng’ maler. En sabato mar yueyo e wang’ Jehova.+ Omiyo, nyaka neg ng’at motiyo chieng’ Sabato.+ 3 Kik umok kata mana mach e uteu chieng’ Sabato.”

4 Eka Musa nowacho ne oganda Jo-Israel duto niya: “Jehova ochiko kama, 5 ‘Goluru ne Jehova chiwo.+ Ng’at ma chunye ohero+ mondo okel ne Jehova chiwo. Keluru dhahabu, fedha, mula, 6 usi ma rambulu, usi ma rajamna, usi makwar, usi motegno mar kitani, yie diek,+ 7 piende yimbe molok makwar, piende mayom,* bepe mag yiend shita, 8 mo miolo e teyini, balsam milosogo mor wir kod ubani mang’we mamit,+ 9 gi kite miluongo ni oniks, gi kite mamoko monego oket e efod*+ kod e ofuko mar akor.+

10 “‘Jou duto molony+ mondo obi olos ne Jehova gik ma osechikowa ni walosi, 11 ma gin hema kod gik miumego, ramekni kod frembe mag hema, ludhene, sirnine, gi rachungi* michungoe sirnigo; 12 Sanduk+ kod ludhene,+ raumne,+ kod pasia;+ 13 mesa+ gi ludhene kod gigene duto kaachiel gi makate miketo e nyim Nyasaye;+ 14 gir chungo taya+ gi gigene, gi teyini kod mo;+ 15 kendo mar wang’o ubani+ kod ludhene, mor wir kod ubani mang’we mamit;+ nanga ma geng’o dho hema; 16 kendo mar wang’o misengni+ kod sing’engene mar mula, ludhe miting’ego kod gigene duto; besen kod gi michungee;+ 17 pasia miliero e laru,+ sirni kod rachungi* michungogie; nanga ma geng’o dho rangach; 18 loye migurogo hema gi loye mag laru kod tonde mitueyo e loyego;+ 19 lewni motwang’ maber+ mitiyogo ka maler, lep dolo mag Harun,+ gi lep dolo mag yawuote.’”

20 Bang’ mano, oganda Jo-Israel duto noa e nyim Musa. 21 Kendo ng’at ma chunye nohero+ nokelo ne Jehova chiwo mondo otigo e hema mar romo, e tije duto maler, kendo mondo otigo e loso lep tich maler. 22 Mon gi chwo ne biro kendo ng’ato ka ng’ato ma chunye nohero ne kelo stadi, tere, kod gik dusruok mamoko, kaachiel gi gik mopogore opogore mag dhahabu. Ji duto nokelo ne Jehova chiwo* mag dhahabu.+ 23 Jo ma ne nigi usi ma rambulu, usi ma rajamna, usi makwar, usi motegno mar kitani, yie diek, piende yimbe molok makwar, piende mayom,* nokelogi. 24 Ji duto ma ne nyalo kelo mich mag fedha gi mula nokelogi ne Jehova kaka chiwo, to jo ma ne nigi bepe mag yiend shita ma ne inyalo tigo e loso gimoro bende nokelogi.

25 Mon duto molony+ e loso usi nolosogi ma gikelogi. Ne gikelo usi ma rambulu, usi ma rajamna, usi makwar, kod usi motegno mar kitani. 26 Kendo mon duto molony e mino yie diek notimo kamano gi chuny achiel.

27 Jodong oganda nokelo kite mag oniks gi kite mamoko miketo e efod kod e ofuko mar akor,+ 28 gi balsam, gi mo miolo e teyini, gi mor wir+ kod ubani mang’we mamit.+ 29 Chwo gi mon duto ma chunygi ohero nokelo gik moko mondo otimgo tich ma Jehova nosechiko Musa. Jo-Israel nokelo gigo kaka chiwo ne Jehova.+

30 Eka Musa nowacho ne Jo-Israel niya: “Ng’euru ni Jehova oseyiero Bezalel wuod Uri ma wuod Hur ma ja dhood Juda.+ 31 Nyasaye osepong’e gi roho mare mondo obed gi rieko, gi lony, kod nyalo mar ng’eyo timo tije duto mag lwedo, 32 mondo olos gik mothedh maber, olos gik dhahabu, gi fedha, kod mula, 33 ong’ad kite mi ochomgi maber, kendo olos gimoro amora mar bao. 34 Bende, osemiye chuny mar puonjo ji, en kaachiel gi Oholiab+ wuod Ahisamak ma ja dhood Dan. 35 Osemiyogi rieko kod nyalo+ mar timo tije duto mag lwedo kaka loso maridadi e law, tweng’o gi usi ma rambulu, usi ma rajamna, usi makwar, kod usi motegno mar kitani. Ji ariyogi biro timo tich moro amora, kendo gibiro loso gik moko duto e yo mong’ith.

36 “Bezalel biro tiyo gi Oholiab kaachiel gi jo molony duto ma Jehova osemiyo rieko kod ng’eyo mar loso gik moko duto mag ka maler mana kaka Jehova osechikogi.”+

2 Eka Musa noluongo Bezalel gi Oholiab gi jo molony duto ma Jehova nosemiyo rieko+ kendo ma nochiwore ne tich gi chunygi duto.+ 3 Musa nomiyogi gik moko duto+ ma Jo-Israel nosechiwo ne tij Nyasaye. Kata kamano, ji pod ne kelo ne Musa chiwo pile pile gokinyi.

4 Ka ne jo molony duto osechako tich mowal ma nomigi, moro ka moro kuomgi ne kelo 5 ne Musa wach niya: “Ji kelo chiwo mang’eny mohingo tich ma Jehova osechiko ni otim.” 6 Omiyo, Musa nochiko mondo ogo milome e kambi duto mar Jo-Israel niya: “Koro kik ukel chiwo ne tich mowalni.” Kamano ne otam ji tero gik moko. 7 Gik ma ne gichiwo ne ng’eny mohewo tich ma ne onego otim.

8 Jotich molony duto+ noloso hema mar lamo Nyasaye.+ Ne gitiyo gi lewni apar molos gi usi mar kitani momin motegno, gi usi ma rambulu, gi usi ma rajamna, kod usi makwar. Notwang’o* kit jokerubi e lewnigo.+ 9 Bor law ka law ne en bede* 28, to lachne ne en bede 4. Lewnigo duto ne romre. 10 Nokawo abich kuomgi moriwo mondo gilos law achiel maduong’, to abich mamokogo bende noriwo yorgi mondo gilos law machielo maduong’. 11 Bang’ mano, notwang’o luks kotiyo gi usi ma rambulu e dir lewni ariyo madongogo ka ma ibiro riwgigo. 12 Noloso ne law ka law luks 50 miriwogigo, kendo luksgo ne ng’iyore. 13 Gikone, noloso ramekni 50 mag dhahabu moriwogo lewni ariyo madongogo mondo hema obed law achiel.

14 Bende, noloso lewni 11 mag yie diek miumogo hemano.+ 15 Bor mar law ka law ne en bede 30 to lachgi ne en bede 4. Ne giromre kargi 11 duto. 16 Noriwo lewni abich mondo gilos law achiel maduong’, to auchiel mamokogo bende noriwo yorgi. 17 Kae to notwang’o luks 50 e dir lewni ariyo madongogo ka miriwogigo. 18 Kendo noloso ramekni 50 mag mula miriwogo lewni ariyo madongogo obed law achiel.

19 Noloso piende yimbe molok gi rangi makwar mondo oumgo hemano, kae to nochako oloso piende mayom* miluowo e wiye.+

20 Bang’ mano, noloso frembe mag hema kotiyo gi bepe moriere+ mag yiend shita.+ 21 Bor mar frem ka frem ne en bede apar* ka dhi malo, to lach moro ka moro ne en bat achiel gi nus. 22 Ne ochomo tielo ariyo e frem ka frem ka gin e lain achiel. Mano e kaka noloso frembe duto mag hemano. 23 Noloso frembe 20 miketo e bath hema mochomo yo milambo. 24 Kae to noloso rachungi* 40 mag fedha ma frembe 20 chung’ie. Nochungo frem ka frem e rachungi ariyo nikech frem ka frem nigi tielo ariyo, kendo ne otimo kamano gi frembe mamoko duto.+ 25 Noloso frembe 20 miketo e bath hema mochomo yo nyandwat, 26 gi rachungi* 40 mag fedha michungoe frembego. Ne ochungo frem ka frem e rachungi ariyo nikech frem ka frem nigi tielo ariyo, kendo ne otimo kamano gi frembe mamoko duto.

27 Noloso frembe auchiel mag tok hema mochomo yo podho chieng’.+ 28 Noloso frembe ariyo moketo e konde ariyo mag tok hema. 29 Konde ariyogo ne nigi frembe ariyo ariyo koa piny nyaka malo ma riwore e ring’ mokwongo. 30 Frembego duto ne gin aboro kaachiel gi rachungi* 16 mag fedha michungogie. Nochungo frem ka frem e rachungi ariyo.

31 Noloso ludhe mag yiend shita miketo ariwa. Ludhe abich ne frembe man e bath hema konchiel,+ 32 to ludhe abich ne frembe man e bath hema komachielo, kendo ludhe abich ne frembe man e tok hema mochomo yo podho chieng’. 33 Noloso luth miketo ariwa e dier frembego koa tung’ konchiel nyaka tung’ komachielo. 34 Nomwono frembego gi dhahabu, kendo nolosonegi ring’ mag dhahabu misoyoe ludhe, to ludhego bende nomwono gi dhahabu.+

35 Noloso pasia+ gi usi ma rambulu, gi usi ma rajamna, gi usi makwar, kod usi mar kitani momin motegno. Notwang’o kit jokerubi+ e pasiano.+ 36 Noloso ne pasiano sirni ang’wen mag yiend shita momwonogi gi dhahabu. Noloso ralier mag dhahabu ming’awoe pasiano kod rachungi* ang’wen mag fedha ma sirnigo chung’ie. 37 Notwang’o nanga ma geng’o dho hema kotiyo gi usi ma rambulu, usi ma rajamna, usi makwar, gi usi mar kitani momin motegno,+ 38 gi sirni abich kod ralier miguro e sirnigo. Nomwono wi sirnigo gi dhahabu kaachiel gi gik miriwogigo, to rachungi* abich ma sirnigo chung’ie ne gin mag mula.

37 Bezalel+ noloso Sandug Singruok+ kotiyo gi bepe yiend shita. Borne ne en bede* ariyo gi nus, lachne ne en bat achiel gi nus, to tutne ne en bat achiel gi nus.+ 2 Nomwono iye gi oko gi dhahabu lilo, kendo noloso maridadi mar dhahabu molworogo dho sandugno.+ 3 Bang’ mano, noloso ring’ ang’wen mag dhahabu kendo noketogi e wi tielo ang’wen mag sandugno, noketo ring’ ariyo e bathe konchiel to ring’ ariyo e bathe komachielo. 4 Kae to noloso ludhe mag yiend shita momwonogi gi dhahabu.+ 5 Nosoyo ludhe miting’ogo Sandugno e ring’ manie bethene koni gi koni.+

6 Noloso raum mar dhahabu lilo.+ Borne ne en bede* ariyo gi nus, to lachne ne en bat achiel gi nus.+ 7 Nothedho dhahabu molosogo kido ariyo mag jokerubi+ e wi raumno koni gi koni.+ 8 Kerubi achiel ne ni e dho raum konchiel, to machielo ne ni e dho raum komachielo. 9 Noloso jokerubigo koyaro buombegi malo e wi raum,+ ka ging’iyore, kendo ka gichomo wengegi e raumno.+

10 Bang’ mano, noloso mesa gi bepe mag yiend shita.+ Borne ne en bede* ariyo, to lachne bat achiel, kendo borne kadhi malo bat achiel gi nus.+ 11 Nomwono mesano gi dhahabu lilo kendo nolosone maridadi mar dhahabu molworo dhoge. 12 Noloso rageng’ molworo bethene ma lachne en lith lwedo ang’wen* kama, kendo nolworo riak rageng’no duto gi maridadi mar dhahabu. 13 Noloso ne mesano ring’ ang’wen mag dhahabu moketogi e konde ang’wen ma tiende mesano chomoree. 14 Ring’ misoyoe ludhe miting’ogo mesa ne chiegni gi rageng’. 15 Noloso ludhe mag yiend shita kendo nomwonogi gi dhahabu. Ludhego ne gin mag ting’o mesano. 16 Bang’ mano, noloso gik miketo e mesa kotiyo gi dhahabu lilo. Gigo ne gin sende, okombe, bakunde, kod njagi mitiyogo e chiwo miolo.+

17 Noloso gir chungo taya+ mar dhahabu. Nothedhe gi dhahabu lilo. Kendo tiende, kore, bedene, maupene, thiepene, kod obokene, ne ok olos yorgi.+ 18 Ne en gi bede auchiel, adek e bathe konchiel to adek e bathe komachielo. 19 Bede adek man konchiel ne nigi maupe adek adek ma chal gi maupe mag lozi, to komachielo bende kamano. Bat ka bat ne nigi maupene, thiepene, kod obokene. Ka noketo maua, ne oluwe gi thiepe, eka oketone oboke. Mano e kaka noloso bede auchiel mag gir chungo tayano. 20 E kor gir chungo tayano, noloso maupe ang’wen ma chal gi maupe mag lozi, gi thiepe ang’wen, gi oboke ang’wen. Ka noketo maua, ne oluwe gi thiepe, eka oboke. 21 Thiewo achiel manie kor gir chungo tayano ne ni e bwo bede ariyo mokwongo mong’iyore. Noketo bede ariyo ariyo mamokogo kamano bende. 22 Thiepe gi bedego kod gir chungo tayano duto ne gin gimoro achiel mothedh gi dhahabu lilo. 23 Kae to noloso teyini abiriyo+ kod gige simo taya kod gik miting’ogo mach kotiyo gi dhahabu lilo. 24 Noloso gir chungo tayano kaachiel gi gik mamokogo duto kotiyo gi talanta* achiel mar dhahabu lilo.

25 Koro noloso kendo mar wang’o ubani+ kotiyo gi bepe mag yiend shita. Borne gi lachne ne en bat* achiel-achiel, to tutne ne en bede ariyo. Ne ok olos tungene yore.+ 26 Nomwono wiye, bethene duto, kod tungene kotiyo gi dhahabu lilo, kendo nolosone maridadi mar dhahabu molworo dhoge. 27 Nolosone ring’ ang’wen mag dhahabu, ariyo konchiel to ariyo komachielo. Ring’go ne ni e bwo maridadino kendo gin e ma ne gimako ludhe miting’ogo kendono. 28 Noloso ludhego kotiyo gi yiend shita, kendo nomwonogi gi dhahabu. 29 Bende, noloso mor wir maler+ kod ubani mang’we suya mamit+ kendo moruw maber.

38 Noloso kendo mar wang’o misengni kotiyo gi bepe mag yiend shita. Borne ne en bede* abich to lachne bende bede abich. To borne ka dhi malo ne en bede adek.+ 2 Noloso tunge e kondene ang’wen, kae to nomwono kendono gi mula.+ 3 Bang’ mano, noloso gik moko duto mag kendono kaka ndope, opewni, bakunde, uma mag chuoyo ring’o, kod gige ting’o mach. Noloso gigo duto gi mula. 4 Bende, noloso ne kendono sing’enge mar mula mokete e kor kendono, e bwo rageng’ molworo dho kendo. 5 Noloso ring’ ang’wen moketogi e konde ang’wen mag kendono mondo osoye ludhe miting’ego. Noketo ring’ ang’wen-go machiegni gi sing’enge mar mula. 6 Bang’ mano, noloso ludhe mag yiend shita momwonogi gi mula. 7 Nosoyo ludhe miting’ego e ring’ manie bethe kendono koni gi koni. Noloso i kendono ma obedo thuolo mana kaka i sanduk.

8 Nokawo kio mag mula mag mon ma ne tiyo e dho hema mar romo, ma olosogo besen+ kaachiel gi gima ichungee.

9 Bang’ mano, noloso laru.+ Ne oloso pasia ma romo bede* 100 migeng’ogo laru mochomo yo milambo. Noloso pasiano gi usi mar kitani momin motegno.+ 10 Ne nitie sirni 20 kod rachungi* 20 mag mula michungoe sirnigo, to ralier miguro e sirnigo kod gik miriwogigo ne gin mag fedha. 11 Bende, pasia man yo nyandwat borne ne en bede* 100, kendo ne en gi sirni 20 kaachiel gi rachungi* 20 mag mula. To ralier kod gik miriwogigo ne gin mag fedha. 12 Ne oliero pasia ma borne bede* 50 e laru mochomo yo podho chieng’. Ne nitie sirni apar gi rachungi* apar ma sirnigo chung’ie. Ralier miguro e sirnigo kod gik miriwogigo ne gin mag fedha. 13 Lach mar laru kodok yo wuok chieng’ ne en bede 50. 14 Ne oliero pasia ma borne en bede 15 e bath laru konchiel, kendo ne olosone sirni adek kod rachungi* adek ma sirnigo chung’ie. 15 To komachielo, noliero pasia ma borne bede 15 kendo nolosone sirni adek kod rachungi* adek ma sirnigo chung’ie. 16 Pasiago duto ne olos gi usi mar kitani momin motegno. 17 Sirni duto molworo laru ne nigi gik miriwogigo molos gi fedha kod ralier mag fedha, to rachungi* ma sirnigo chung’ie ne gin mag mula. Nomwono wi sirnigo gi fedha.+

18 Notwang’o nanga mar geng’o dho rangach kotiyo gi usi ma rambulu, usi ma rajamna, usi makwar, kod usi mar kitani mowi motegno. Borne ne en bede* 20, to borne kodhi malo ne en bede 5. Borne kodhi malo ne romre gi pasia molier e laru.+ 19 Sirnige ang’wen kod rachungige* ang’wen ne gin mag mula. Ralier miguro e sirnigo gi miriwogigo ne gin mag fedha, kendo nomwono wi sirnigo gi fedha. 20 Loye duto ma ne ogurgo hema kod loye duto mag laru ne gin mag mula.+

21 Musa nochiko mondo ondik kwan mag gik moko duto ma ne otigo e loso hema mar lamo Nyasaye, ma en hema ma iketoe sandug Chik.*+ Jo-Lawi e ma ne dhi timo tijno+ kotelnegi gi Ithamar+ wuod Harun jadolo. 22 Bezalel+ wuod Uri ma wuod Hur ma ja dhood Juda notimo duto ma Jehova nochiko Musa mondo otim. 23 Ne otiyo gi Oholiab+ wuod Ahisamak ma ja dhood Dan, ma ne en fundi molony e tije mag lwedo kendo fundi mong’eyo tweng’o gi usi ma rambulu, usi ma rajamna, usi makwar, kod usi motegno mar kitani.

24 Dhahabu ma ne ji ogolo kaka chiwo mifwayo e nyim Nyasaye e ma ne otigo e gero ka maler.+ Dhahabugo duto ne romo talanta* 29, kod shekel* 730 mopim gi rapim mar ka maler. 25 To fedha ma ne ji okelo e kinde ma ne ikwanogie ne romo talanta 100 kod shekel 1,775 mopim gi rapim mar ka maler. 26 Ng’ato ka ng’ato ma ne okwan ma ne jahigni 20 kata mokalo kanyo,+ ne ogolo fedha ma romo nus shekel mopim gi rapim mar ka maler. Jo ma ne okwan-go duto ne gin ji 603,550.+

27 Talanta 100 mag fedhago ne otigo e loso rachungi* mag ka maler kod rachungi mag pasia. Talanta 100 e ma ne olosgo rachungi 100 ka talanta achiel loso rachungi achiel.+ 28 Shekel 1,775 mag fedha ne olosgo ralier miguro e sirni, kendo ne omwon wi sirnigo gi fedha mi oriwgi kanyachiel.

29 Chiwo* mag mula ma ne ji ochiwo ne Nyasaye ne romo talanta 70 kod shekel 2,400. 30 Mulago e ma ne otiyogo e loso rachungi* mag dho hema mar romo, gi kendo mar misango gi sing’engene, kod gik mamoko duto mitiyogo e kendono. 31 Bende, notiyo gi mulago e loso rachungi* mag laru duto, gi mag dho rangach, gi loye migurogo hema, kod loye mamoko duto+ motigo e laru.

39 Ne giloso lewni mabeyo mitiyogo ka maler ka gitiyo gi usi ma rambulu, usi ma rajamna, kod usi makwar.+ Ne giloso ne Harun lep dolo+ mana kaka Jehova nosechiko Musa.

2 Ne oloso efod*+ mar dhahabu kotiyo gi usi ma rambulu, usi ma rajamna, usi makwar, kod usi mar kitani momin motegno. 3 Ne gigoyo dhahabu ma obedo mareprep, mi ne gilire matindo tindo mondo okadgi gi usi ma rambulu, usi ma rajamna, usi makwar, kod usi motegno mar kitani. 4 Ne giloso lewni ariyo miriwo e gok koni gi koni. 5 Gik ma ne olosgo efod e gik ma bende nolosgo msip motwang’ e efod, kendo msibno ne mako efod.+ Gigo ne gin: dhahabu, usi ma rambulu, usi ma rajamna, usi makwar, kod usi mar kitani momin motegno mana kaka Jehova nochiko Musa.

6 Kae to ne giketo kite mag oniks e pado mag dhahabu, kendo ne gindiko nyinge yawuot Israel e kitego mana kaka inyalo los muhuri.+ 7 Noketo kitego ka miriwogo lewni ariyo mag efod mondo gibed kite mag rapar ne Jo-Israel,+ mana kaka Jehova nosechiko Musa. 8 Notwang’o ofuko mar akor+ e yo molony kotiyo gi gik milosogo efod, ma gin dhahabu, usi ma rambulu, usi ma rajamna, usi makwar, kod usi mar kitani momin motegno.+ 9 Bor kod lach mar law ma ne olosego ne romre. Ne giloso ofuko mar akorno e yo ma kobane diriyo to borne bedo sentimita 22 to lachne bende kamano. 10 Ne gichano kuome lainde ang’wen mag kite. E lain mokwongo, ne giketo kite miluongo ni rubi, topaz, gi emerald. 11 E lain mar ariyo, ne giketo kite mag tarkois, safir, kod jaspa. 12 E lain mar adek, ne giketo kite mag leshem, agat, kod amethust. 13 To e lain mar ang’wen, ne giketo kite mag krisolait, oniks, gi jade. Ne osogi e pado mag dhahabu. 14 Kitego ne ochung’ ne dhoudi 12 mag Israel. Kitego ne ondikie nying dhoudi apar gariyogo. Ne ondikgi mana kaka indiko muhuri, ka kidi ka kidi ondikie nying dhoot achiel.

15 Eka ne giloso tonde momin ka gitiyo gi dhahabu lilo mi giketo e ofuko mar akor.+ 16 Kendo ne giloso pado ariyo mag dhahabu kod ring’ ariyo mag dhahabu, mi giketo ring’ ariyogo e konde ariyo ma malo mag ofuko mar akor. 17 Bang’ mano, ne gitueyo tonde ariyo e ring’ ariyo man e konde ariyo ma malo mag ofuko mar akor, tol achiel konchiel to tol machielo komachielo. 18 To dho tonde ka modong’ ne gisoyo e pado ariyo mag dhahabu manie gok, kendo tondego nomakore gi lewni ariyo mag efod gi ka nyime. 19 Ne giloso ring’ ariyo mag dhahabu kendo ne giketogi e konde ariyo ma piny mag ofuko mar akor gi ka iye mochomore gi efod.*+ 20 Kae to ne giloso ring’ ariyo mamoko mag dhahabu mi ne giketogi e nyim efod gi yo ka mwalo, machiegni gi ka ma lewni ariyo mag efod riworego mondo gibed malo mar msip motwang’ e efod. 21 Gikone, ne gitweyo tol ma rambulu e ring’ mag ofuko mar akor gi ring’ mag efod* mondo ofukono omok motegno e wi msip, mana kaka Jehova nochiko Musa.

22 Noloso kandho ma onge bade mirwako e bwo efod, kotiyo gi usi ma rambulu lilo.+ 23 Ne otwang’ ng’ute motegno ma ok nyal yiech, kendo nolose mana kaka iloso ng’ut law akor mar lweny. 24 Ne gimino usi ma rambulu, usi ma rajamna, kod usi makwar mi gilosogo olembe ma chalo gi komamanga, kendo ne gilworogi e riak kandhono. 25 Bende, ne giloso olang’ matindo tindo mag dhahabu mi giketogi e kind komamangago e riak kandhono duto. 26 Ne giketo olang’ achiel kae to giluwe gi komamanga, kamano kamano nyaka ne gilworo riak kandho ma ne itiyogo e hemano, mana kaka Jehova nosechiko Musa.

27 Kendo ne gitwang’o ne Harun kod yawuote kendhe mag usi motegno mar kitani,+ 28 gi kilemba+ makende, gi kilemba mag yawuot Harun,+ gi onyesegi+ ma duto nolos gi usi mar kitani momin motegno, 29 kod msip molos gi usi mar kitani momin motegno, gi usi ma rambulu, gi usi ma rajamna, kod usi makwar, mana kaka Jehova nosechiko Musa.

30 Ne giloso osimbo maler ma nyilni ka gitiyo gi dhahabu lilo, kendo ne gindike kaka indikoga muhuri. Ne gindike kama: “Ler en mar Jehova.”+ 31 Ne gitueyo gima opamoreno e kilemba makende ka gitiyo gi tol ma rambulu, mana kaka Jehova nosechiko Musa.

32 Kuom mano, tije duto mag gero hema mar lamo Nyasaye norumo, kendo Jo-Israel notimo gik moko duto ma Jehova nosechiko Musa.+ Ne gitimo mana kamano.

33 Eka ne gitero hemano+ ne Musa kod gigene duto.+ Gigo ne gin: ramekni,+ frembe,+ ludhe,+ sirni, kod rachungi;*+ 34 law umo hema molos gi piende yimbe molok makwar,+ piende mayom,* gi pasia ma geng’o sanduk;+ 35 sandug Chik* gi ludhene+ kod raumne;+ 36 mesa gi gigene duto+ kod makate michiwo e nyim Nyasaye; 37 gir chungo taya mar dhahabu lilo, teyini,+ mo,+ kod gik mamoko mitiyogo;+ 38 kendo+ mar dhahabu, mor wir,+ ubani mang’we suya mamit,+ kod nanga+ ma geng’o dho hema; 39 kendo mar mula,+ sing’engene mar mula, ludhene,+ gi gigene duto,+ kod besen gi gima ichungee;+ 40 pasia miliero e laru, sirni kod rachungige,*+ nanga+ ma geng’o dho rangach, loye migurogo hema, loye mag laru, tonde mitueyo e loyego,+ kod gik mamoko duto mitiyogo e hema mar lamo Nyasaye; 41 lewni motwang’ maber mitiyogo ka maler, lep dolo mag Harun,+ gi lep dolo mag yawuote.

42 Jo-Israel notimo tije duto mana kaka Jehova nosechiko Musa.+ 43 Ka ne Musa onono tije duto ma ne gisetimo, ne oneno ni gisetimo mana kaka Jehova nosechikogi. Kendo Musa noguedhogi.

40 Eka Jehova nowacho ne Musa niya: 2 “E odiechieng’ mokwongo mar dwe mokwongo, inichung hema mar lamo Nyasaye, ma en hemb romo.+ 3 Iniket sandug Chik* e iye,+ kendo inigeng’ Sandugno gi pasia.+ 4 Iniso mesa+ e iye mondo ichanie gik moko duto monego oketie. Bende, inikel rachung taya+ kae to imok teyini mage.+ 5 Iniket kendo miwang’oe ubani+ e nyim sandug Chik* kendo iket nanga ma geng’o dho hema mar lamo Nyasaye.+

6 “Iniket kendo mar wang’o misengni+ e nyim dho hema mar lamo Nyasaye, ma en hemb romo, 7 kendo iket besen e kind hema mar romo kod kendo mar misango kae to iolie pi.+ 8 Bang’e, ichiel hema mondo obed gi laru+ molwore kae to ilierne nanga+ ma geng’o dho rangach. 9 Eka inikaw mo+ mondo iwalgo hema mar lamo Nyasaye kod gik moko duto manie iye.+ Inipwodhe kaachiel gi gigene duto mondo obed gima ler. 10 Inikaw mo mondo ipwodhgo kendo mar wang’o misengni kod gigene duto mondo obed gima ler moloyo.+ 11 Bende, inikaw mo mondo ipwodhgo besen kod gima ichungee.

12 “Eka inikel Harun gi yawuote e dho hema mar romo kendo ilwokgi* gi pi.+ 13 Mi inirwak ne Harun lep dolo,+ iniwire mo mondo iwalego,+ kendo enotina kaka jadolo. 14 Bang’ mano, inikel yawuote mondo irwaknegi kendhe.+ 15 Iniwirgi gi mo mana kaka isewiro wuon-gi bende,+ mondo gibedna jodolo, kendo kisewirogi ginibedna jodolo e tiengegi duto.”+

16 Musa notimo duto ma Jehova nochike.+ Notimo mana kamano.

17 E odiechieng’ mokwongo mar dwe mokwongo e higa mar ariyo bang’ ka ne gisea Misri, ne gichungo hema mar lamo Nyasaye.+ 18 Kama e kaka Musa nochungo hema mar lamo Nyasaye: nochano rachungi,*+ nochungo frembe+ mosoyo ludhe+ miriwogigo, kendo nochungo sirni mag hema. 19 Noyaro law+ umo hema+ moumego, mana kaka Jehova nosechiko Musa.

20 Bang’ mano, nokawo kite ariyo mopamore moting’o chike*+ moketogi e Sandug Singruok,+ nosoyo ludhe+ e ring’ kae to oumo Sandugno+ gi raumne.+ 21 Norwako Sandugno e hema mar lamo Nyasaye mogeng’e gi pasia.+ Kamano nogeng’o sandug Chik*+ mana kaka Jehova nosechiko Musa.

22 Bang’e, ne orwako mesa+ e hema, ma okete yo nyandwat oko mar pasia. 23 Kendo nochano makate+ e wiye e nyim Jehova, mana kaka Jehova nosechiko Musa.

24 Norwako gir chungo taya+ e hema mokete yo milambo ka ma omanyore gi mesa. 25 Nomoko teyini+ e nyim Jehova, mana kaka Jehova nosechiko Musa.

26 Bang’e, noketo kendo mar dhahabu+ e hema e nyim pasia 27 mondo owang’ie+ ubani mang’we suya mamit,+ mana kaka Jehova nosechiko Musa.

28 Eka noliero nanga+ ma geng’o dho hema.

29 Noketo kendo mar wang’o misengni+ e dho hema, ma en hemb romo, mondo kanyo e ma owang’ie misengni+ kod chiwo mag cham, mana kaka Jehova nosechiko Musa.

30 Bang’e, noketo besen e kind hema mar romo kod kendo mar misango moolo pi lwok e iye.+ 31 Musa gi Harun gi yawuot Harun nolwoko lwetegi gi tiendegi e pigno. 32 Kinde moro amora ma ne gidonjo e hema kata dhi e dho kendo mar misango, ne gilwokoga lwetegi gi tiendegi,+ mana kaka Jehova nosechiko Musa.

33 Gikone, nochielo laru+ molworo hema mar lamo Nyasaye kod kendo mar misango, kae to noliero nanga ma geng’o dho rangach.+

Kamano e kaka Musa notieko tijno. 34 Bor polo nochako imo hema mar romo, mi duong’ mar Jehova nopong’o hemano.+ 35 Musa ne ok nyal donjo e hema mar romo nikech bor polono ne pod ni kanyo, kendo duong’ mar Jehova nopong’o hemano.+

36 Jo-Israel ne nyalo wuok mondo gidhi gigo kambi ka machielo mana ka bor polo oa e hema. Kamano e kaka ne gitimo e wuodhgi duto.+ 37 Ne ok ginyal chako wuoth mak mana ka bor polono ochako sudo.+ 38 E wuodh Jo-Israel duto, bor polo mar Jehova ne betga e wi hema godiechieng’, to gotieno, mach e ma ne bedoga e wi hemano ka ma ji duto ne nyalo nene.+