¿Tiquʼn nim toklen tbʼi Jehová toj twitz Jesús?

1, 2. a) ¿Tiʼ bʼant tuʼn Jesús toj qonikʼen tej naʼmxtoq tkyim? b) ¿Tiʼ kʼelel qnikʼ tiʼj toj xnaqʼtzbʼil lu?

TOJ jueves 14 te nisán toj abʼqʼi 33, kubʼ tikʼsaʼn Jesús Wabʼj te Qale junx kyukʼil qe t-apóstol e ten tzʼaqli. Ojtzqiʼntoq tuʼn Jesús qa kxeltoq kʼayin tuʼn Judas, qa kʼokeltoq bʼinchaʼn nya bʼaʼn tiʼj ex qa kbʼeltoq bʼyoʼn kyuʼn aj qʼoj tiʼj. Tuʼntzunju, tej kybʼaj waʼn xi tqʼuqbʼaʼn Jesús kykʼuʼj t-apóstol. Ex tej chʼixtoq tpon ambʼil tuʼn kyikʼ bʼet, kubʼ tbʼinchaʼn Jesús jun naʼj Dios nim toklen junx kyukʼil. Aju naʼj Dios lu, kubʼ ttzʼibʼin apóstol Juan ex in kanet quʼn toj capítulo 17.

² Toj xnaqʼtzbʼil lu, kʼelel qnikʼ tiʼj tiʼ xnaqʼtzbʼil jaku tzʼel qiʼn tiʼj naʼj Dios kubʼ tbʼinchaʼn Jesús. Ik tzeʼn, ¿alkyeqe tiʼchaq tzaj bʼaj tkʼuʼj Jesús tiʼj tej chʼixtoq tpon ambʼil tuʼn tkyim? Ex ¿alkye jun tiʼ mas nim toklen toj twitz tej tten tzalu twitz Txʼotxʼ?

«O TXI NYEKʼUNE AJU TBʼIYA KYE»

3. ¿Tiʼ tqʼama Jesús tiʼj tbʼi Jehová ex tiʼ t-xilen? (Juan 17:​6, 26, TNM).

³ Toj naʼj Dios kubʼ tbʼinchaʼn Jesús, tqʼama jlu te Jehová: «O txi nyekʼune aju tbʼiya kye». Kyuʼn tyol Jesús il nel qnikʼ tiʼj alkyetoq mas nim toklen toj twitz tuʼnju tqʼama kabʼe maj (kjawil uʼjit Juan 17:​6, 26, TNM). ¿Ape t-xilen jlu qa xi tyekʼin Jesús kye tdiscípulo qa Jehová tbʼi Dios? Miʼn, tuʼnju judiy qe tdiscípulo. Ojtzqintoq kyuʼn alkye tbʼi Dios tuʼnju in kanet chʼixme 7 mil maj kyoj uʼj kubʼ tzʼibʼin toj yol hebreo. Tej tqʼama Jesús qa otoq txi tyekʼin tbʼi Dios kye, a t-xilen jlu qa otoq txi t-xnaqʼtzaʼn kye tzeʼnxix Jehová, alkye t-xim, tiʼ o bʼant tuʼn ex tiʼ kbʼantel tuʼn, ex alkyeqe tmod. Mintiʼ juntl ojtzqiʼnxix Jehová tuʼn ik tzeʼn te Jesús, tuʼntzunju, oʼkx Jesús jaku txi xnaqʼtzante kye txqantl qe tiʼchaq tiʼj Jehová.

4, 5. a) ¿Tzeʼn jaku tzʼok tbʼi jun xjal te nimxix toklen? Qʼamantza jun techel. b) ¿Alkye tten el mas kynikʼ tdiscípulo Jesús tiʼj Jehová?

⁴ Qqʼonk jun techel, ximana tiʼj qa at jun ansyan David tbʼi toj teya tcongregación ex doctor. Bʼalo o tzikʼ nim abʼqʼi ojtzqiʼn erman lu tuʼna, pero jun qʼij in tzaj yabʼil tiʼja ex il tiʼj tuʼn t-xiʼya toj spital. In xi qʼiʼna jatumel in naqʼunan erman David ex in najbʼen tojtzqibʼil tuʼn tuʼn tkleta. Tuʼn jlu, mas kʼokel tkʼujlaʼna erman lu. Ex aj tok tbʼiʼna tbʼi, jurat naj tzul tnaʼna aju bʼant tuʼn tiʼja. Atzun jaʼlo, nya oʼkx ansyan David toj congregación, tuʼnju onin tiʼja tuʼn tkleta ex nimxix toklen toj twitza.

⁵ Maske ya ojtzqintoq kyuʼn tdiscípulo Jesús alkye tbʼi Dios, ok te mas nim toklen toj kywitz tuʼnju onin Jesús kyiʼj tuʼn tel mas kynikʼ tiʼj Jehová. ¿Alkye tten bʼant jlu tuʼn? Tej tkubʼ tyekʼin Jesús qe tbʼanel tmod Jehová tukʼil tbʼinchbʼen ex tukʼil tyol tej tpakbʼan. Tej tok kyqʼoʼn apóstol kywitz tiʼj tmod Jesús kubʼ tyekʼin kyukʼil xjal ex tzeʼn xi tqʼoʼn xnaqʼtzbʼil kye, onin kyiʼj tuʼn tok kyojtzqiʼnxix Jehová (Juan 14:9; 17:3).

«NOQ TUʼN TBʼIYA, AJU O TZAJ TQʼOʼNA WEYE»

6. ¿Tiʼ t-xilen tej tqʼama Jesús qa otoq txi tqʼoʼn Jehová tbʼi te? (Juan 17:​11, 12, TNM).

⁶ Xi tqʼamaʼn Jesús jlu te Jehová kyiʼj tdiscípulo: «Xqʼuqina kyiʼj noq tuʼn tbʼiya, aju o tzaj tqʼoʼna weye» (kjawil uʼjit Juan 17:​11, 12, TNM). ¿Ape t-xilen jlu qa ax ikx jakutoq tzʼok qʼoʼn tbʼi Jesús te Jehová? Miʼn. Tuʼnju tej tyolin Jesús tiʼj tbʼi Jehová tqʼama jlu: «Noq tuʼn tbʼiya». In tzaj tyekʼin jlu qa mintiʼ el tiʼn Jesús tbʼi Jehová. ¿Tiquʼn tqʼama Jesús qa otoq txi tqʼoʼn Jehová tbʼi te? Tnejel, tuʼnju otoq tzaj tsamaʼn Jehová Jesús tuʼn tyolin te t-xel ex tuʼn kybʼant milagr tuʼn noq tuʼn tipumal Jehová (Juan 5:43; 10:25). Ax ikx a t-xilen tbʼi Jesús «tuʼn Jehová in che klet». Ik tzeʼn in nok qqʼoʼn qwitz tiʼj, in kanet tbʼi Jehová quʼn tiʼj t-xilen tbʼi Jesús.

7. Qʼamantza tukʼil jun techel tiquʼn jakutoq yolin Jesús te t-xel Jehová.

⁷ Tuʼn tel qnikʼ tiʼj, qo ximen tiʼj jun techel. Ik tzeʼn jun presidente in xi tqʼoʼn toklen jun xjal tuʼn tyolin te t-xel toj juntl tnam. Ax toklen tyol xjal lu ik tzeʼn tyol presidente. Ax jlu bʼant tuʼn Jehová tej t-xi tqʼoʼn toklen Jesús tuʼn tyolin te t-xel (Mat. 21:9; Luc. 13:35).

8. ¿Tiquʼn jaku txi qqʼamaʼn qa kubʼ tbʼinchaʼn Jesús qe tiʼchaq toj tbʼi Jehová tej naʼmxtoq tul tzalu twitz Txʼotxʼ? (Éxodo 23:​20, 21, XT).

⁸ In nok tqʼoʼn Biblia tbʼi Jesús te Yol tuʼnju o tzʼajbʼen tuʼn Jehová tuʼn tyolin te t-xel ex tuʼn t-xi tqʼamaʼn junjun tqanil kye anjel ex kye xjal (Juan 1:​1-3). Ex bʼalo a Jesús, aju anjel, xi tsamaʼn Jehová tuʼn t-xqʼuqin kyiʼj israelita akux in che bʼet toj desierto. Pero, ¿tiquʼn iltoq tiʼj tuʼn t-xi kynimen anjel lu? Tuʼnju tqʼama Jehová jlu: «Quʼn tkyaqil intbʼinchaʼn toj nbʼiyeʼ» (Éxodo 23:​20, 21, XT).a Tqʼama Jehová jlu, tuʼnju a Jesús yolin te t-xel ex oʼkx te in kubʼ tyekʼin qa tkyaqilju in bʼant tuʼn Jehová tzʼaqlixix ex xjan.

«TAT, NIMSAʼNKTZ TBʼIYA»

9. ¿Tiquʼn ojtzqiʼn quʼn qa nimtoq toklen tbʼi Jehová toj twitz Jesús?

⁹ Ik tzeʼn ma qo xnaqʼtzan tiʼj, tej naʼmxtoq tul Jesús tzalu twitz Txʼotxʼ nimxix toklen tbʼi Jehová toj twitz ex ax jlu kubʼ tyekʼin tej tul twitz Txʼotxʼ. Kubʼ tyekʼin tukʼil tkyaqil tbʼinchbʼen qa nimtoq toklen tbʼi Jehová toj twitz. Tej chʼixtoq tkubʼaj ambʼil tuʼn tpakbʼan tzalu twitz Txʼotxʼ, xi tqʼama Jesús jlu te Jehová: «Tat, nimsaʼnktz tbʼiya». Ex jurat naj xi ttzaqʼweʼn Jehová jlu te: «Ma jaw nnimsaʼne, ex kjawil nnimsaʼntle juntl maj» (Juan 12:28).

10, 11. a) ¿Tzeʼn jaw tnimsaʼn Jesús tbʼi Jehová? (Ax ikx qʼonka twitza tiʼj tilbʼilal). b) ¿Tiquʼn il tiʼj tuʼn tok tbʼi Jehová te xjan ex tuʼn qkolin tiʼj?

¹⁰ Ax ikx jaw tnimsaʼn Jesús tbʼi Jehová. ¿Tzeʼn bʼant jlu tuʼn? Bʼant jlu tuʼn tej tyolin kyukʼil txqantl kyiʼj tbʼanel tmod Jehová ex kyiʼj tbʼinchbʼen. Pero nya oʼkx jlu bʼant tuʼn tuʼn tjaw tnimsaʼn tbʼi Jehová. Tuʼnju ojtzqiʼntoq tuʼn qa il tiʼj tuʼn tok tbʼi Jehová te xjan ex tuʼn tel toj qʼanchaʼl qa tkyaqilju otoq tqʼama Satanás tiʼj nya ax tok. Kubʼ tyekʼin Jesús qa nimtoq toklen jlu toj twitz tej t-xi tyekʼin kye tdiscípulo tzeʼn tuʼn kynaʼn Dios te Jehová. Tqʼama jlu: «Qman Dios ata toj kyaʼj, tzʼokwit tbʼiya te xjan» (Mat. 6:​9, TNM).

¹¹ ¿Tiquʼn il tiʼj tuʼn tok tbʼi Jehová te xjan ex tuʼn qkolin tiʼj? Tuʼnju toj jardín te Edén, tqʼama Satanás nya ax tok yol tiʼj Jehová. Ax ikx tqʼama qa jun nikʼal yol te Jehová ex qa otoq tzʼel tiʼn ambʼil te Adán ex Eva tuʼn kytzalaj (Gén. 3:​1-5). Ex tqʼama Satanás qa nya toj tumel in che bʼant tiʼchaq tuʼn Jehová. Kyuʼn nya ax tok yol lu, jakutoq kubʼ kyximen xjal qa nya bʼaʼn te Jehová. Yajxitl, toj tqʼijlalil Job, tqʼama Satanás qa kykyaqil tmajen Jehová in che ajbʼen te noq tuʼnju in xi tqʼoʼn junjun tiʼchaq kye. Ax ikx tqʼama Satanás qa mlayxtoq che ten tmajen Jehová tzʼaqli twitz aj kyok weʼ kywitz junjun prueba, tuʼnju mintiʼ kykʼujlabʼil tiʼj (Job 1:​9-11; 2:4). Iltoq tiʼj tuʼn tikʼ ambʼil tuʼntzun tel nikʼbʼaj tiʼj alkye nikʼan yol, qa a Jehová moqa Satanás.

«IN XI NQʼON WIBʼE TUʼN NKYIME»

12. ¿Tiʼ bʼant tuʼn Jesús noq tuʼnju kʼujlaʼn tbʼi Jehová tuʼn?

¹² Kʼujlaʼnxix Jehová tuʼn Jesús, tuʼntzunju, ok tilil tuʼn tuʼn tok tbʼi Jehová te xjanxix ex tuʼn tel toj qʼanchaʼl qa tkyaqilju tqʼama Satanás tiʼj nya ax tok. Axpe ikx kyim Jesús tuʼn tkolin tiʼj tbʼi Jehová.b Tuʼntzunju tqʼama jlu: «In xi nqʼon wibʼe tuʼn nkyime» (Juan 10:​17, 18). Atzunte Adán ex Eva, aqeju tnejel xjal tzʼaqlixix, mintiʼ xi kynimen tyol Jehová sino e nimen te Satanás. Atzunte Jesús kubʼ tyekʼin tkʼujlabʼil tiʼj Jehová tej tul tzalu twitz Txʼotxʼ ex tej tnimen te (Heb. 4:15; 5:​7-10). Ex ten tzʼaqli tejxi tkyim (Heb. 12:2). Iktzun tten kubʼ tyekʼin Jesús qa kʼujlaʼn Jehová tuʼn ex aju tbʼi.

13. ¿Tiquʼn mintiʼ juntl xjal ik tzeʼn te Jesús tuʼn ttzaj tqʼamaʼn qa jun nikʼal yol te Satanás? (Ax ikx qʼonka twitza tiʼj tilbʼilal).

¹³ Tuʼn tkyaqilju bʼant tuʼn Jesús toj tanqʼibʼil, kubʼ tyekʼin qa a Satanás nikʼal yol ex nya Jehová (Juan 8:44). Oʼkx Jesús ojtzqiʼnxix Jehová tuʼn. Noqwit el tnikʼ Jesús tiʼj qa ax tok aju tqʼama Satanás tiʼj Jehová, mintiʼwtlo kolin tiʼj tbʼi. Pero kukx ok tilil tuʼn Jesús tuʼn tkolin tiʼj tbʼi Jehová, axpe ikx tej tkubʼ tnaʼn qa otoq kyaj tqʼoʼn tjunalx, kubʼ t-ximen tuʼn tkyim ex tuʼn tten tzʼaqli (Mat. 27:46).c

«MA JAPUN BʼAJ WUʼNE AJU AQʼUNTL TZAJ TQʼOʼNA WEYE TUʼN NBʼINCHANTEYE»

14. ¿Tzeʼn tzaj tkʼiwlaʼn Jehová Jesús tuʼnju kukx ten tzʼaqli?

¹⁴ Toj naʼj Dios kubʼ tbʼinchaʼn Jesús toj qonikʼan tej naʼmxtoq tkyim, tqʼama jlu te Jehová: «Ma japun bʼaj wuʼne aju aqʼuntl tzaj tqʼoʼna weye tuʼn nbʼinchanteye». Qʼuqlitoq tkʼuʼj Jesús tiʼj qa ktzajeltoq kʼiwlaʼn tuʼn Jehová tuʼnju kukx ten tzʼaqli twitz (Juan 17:​4, 5). Ex atzun jlu bʼaj, tuʼnju mintiʼ xi tqʼoʼn Jehová ambʼil tuʼn tkyim Jesús te jumajx (Hech. 2:​23, 24). Sino jaw anqʼin ex xi tqʼoʼn Jehová toklen tuʼn tkawin toj kyaʼj (Filip. 2:​8, 9). Tej tikʼ ambʼil, xi tzyet tuʼn tkawin Jesús toj kyaʼj ik tzeʼn jun aj kawil toj Tkawbʼil Dios. ¿Tiʼ kbʼantel tuʼn Kawbʼil lu? Tqʼama Jesús jlu toj tnaʼj Dios: «E ttzaj ju tkawbʼila. Bʼant-xwit ju tajbʼila [aju tajbʼil Ttat] twitz txʼotxʼ ik tzaʼn in bʼant tuj kyaʼj» (Mat. 6:10).

15. ¿Tiʼ mas kbʼantel tuʼn Jesús?

¹⁵ Chʼix tpon ambʼil tuʼn tqʼojin Jesús kyukʼil aj qʼoj tiʼj Jehová ex che kbʼel tnajsaʼn toj Armagedón (Apoc. 16:​14, 16; 19:​11-16). Yajxitl, kbʼelex t-xoʼn Jesús Satanás toj jun «jul». Toj juntl yol, kbʼel jupuʼn ex mlayx bʼant jun tiʼ tuʼn (Apoc. 20:​1-3). Tbʼajlenxi jlu, kxel tzyet tuʼn Tkawin Jesús toj Mil Abʼqʼi ex tzul tiʼn mujbʼabʼil tzalu twitz Txʼotxʼ ex kʼonil kyiʼj xjal tuʼn kyok te tzʼaqli. Ax ikx, che jawil anqʼin kyimni tuʼn ex kʼokel Txʼotxʼ tuʼn te jun tbʼanel najbʼil. Iktzun tten, kjapunel twiʼ t-ximbʼetz Jehová (Apoc. 21:​1-4).

16. ¿Tzeʼn kʼokel qanqʼibʼil aj tbʼaj ambʼil tuʼn Tkawin Jesús toj Mil Abʼqʼi?

¹⁶ ¿Tzeʼn qanqʼibʼil ktel aj tbʼaj ambʼil tuʼn Tkawin Jesús toj Mil Abʼqʼi? Ya otoq che ok xjal te tzʼaqli ex otoq kubʼ naj il. Ya mlay che ok qeju 144,000 te pal, nix kʼokel Jesús te Nejenel kye Pal tuʼn tten qamiwbʼil tukʼil Jehová. Ax ikx otoq kubʼ naj «aju mankbʼil aj qʼoj», aju kamik. Ex otoq che jaw anqʼin juntl maj qe kyimni. Kykyaqil xjal che anqʼil tzalu twitz Txʼotxʼ che okel te tzʼaqli (1 Cor. 15:​25, 26).

17, 18. a) ¿Tiʼ kbʼajel aj tkubʼaj ambʼil tuʼn tkawin Jesús? b) ¿Tiʼ kbʼantel tuʼn Jesús aj tkubʼaj ambʼil tuʼn tkawin? (1 Corintios 15:​24, 28; ax ikx qʼonka twitza tiʼj tilbʼilal).

¹⁷ ¿Tiʼ mastl kbʼajel aj tbʼaj ambʼil tuʼn Tkawin Jesús toj Mil Abʼqʼi? Toj ambʼil aju kbʼajel jun tiʼ nim toklen: Ya mlay jawje kykʼuʼj xjal tiʼj qa xjan te Jehová ex qa tzʼaqlixix te. Toj jardín te Edén tqʼama Satanás qa jun nikʼal yol te Jehová ex qa nya bʼaʼn aj kawil tuʼnju mintiʼ tkʼujlabʼil kyiʼj xjal. Tuʼntzunju, kukx o tzʼok tilil kyuʼn tmajen Jehová tuʼn tok tbʼi te xjan. Aj tbʼaj ambʼil tuʼn Tkawin Jesús toj Mil Abʼqʼi, otoq tzʼok tbʼi Jehová te saq. Ex toj ambʼil aju, otoq kubʼ tyekʼin Jehová qa kʼujlaʼnxix qo tuʼn.

¹⁸ Kykyaqil xjal kʼelel kynikʼ tiʼj qa nya ax tok qe yol tqʼama Satanás tiʼj Jehová. ¿Tiʼ kbʼantel tuʼn Jesús aj tbʼaj ambʼil tuʼn tkawin? ¿Kʼelelpe tkanoʼn tiʼj Satanás? ¡Miʼn! (Kjawil uʼjit 1 Corintios 15:​24, 28). Junxitl te Jesús tmod, tuʼnju kxel tqʼoʼn Kawbʼil juntl maj te Tman ex kukx knimel te tuʼnju kʼujlaʼn Jehová tuʼn.

19. ¿Tiquʼn nimxix toklen tbʼi Jehová toj twitz Jesús?

¹⁹ Tuʼntzunju, xi tqʼoʼn Jehová toklen Tkʼwal tuʼn tyolin te t-xel ex o bʼant jlu tuʼn toj tumel. Noqtzun tuʼnj, ¿nimpe toklen tbʼi Jehová toj twitz Jesús? Nimxix toklen tbʼi Jehová toj twitz. Ax ikx kyim noq tuʼn tbʼi Jehová ex kxel tqʼoʼn tkyaqil juntl maj te Jehová aj tbʼaj ambʼil tuʼn Tkawin toj Mil Abʼqʼi. ¿Tzeʼn jaku tzʼel qkanoʼn tiʼj Jesús? Kxel qqʼoʼn tzaqʼwebʼil tiʼj xjel lu toj juntl xnaqʼtzbʼil.