Jesús yëˈë ja Saserdotë Wintsën mëdiˈibë paˈˈayoop

1, 2. 1) ¿Tiko Jyobaa tkejxyë yˈUˈunk yä Naxwiiny? 2) ¿Ti nˈixäˈänëm mä yäˈädë artikulo? (Hebreos 5:​7-9).

TAM kujk nyëjkxnë nä 2,000 jëmëjtën ko Jyobaa tkejxy yä Naxwiiny ja yˈUˈunk mëdiˈibë niˈigyë tsyojkypy. Tuk pëk tiko tkejxy, yëˈë parë dyaˈˈawäˈätspëtsëmët ja naxwinyëdë jäˈäy mä ja poky ets mä ja oˈkën ets parë dyajjëgaktäˈäyët tukëˈëyë ja amay jotmay mëdiˈibë Satanás yajjaˈäjtypy (Juan 3:16; 1 Juan 3:8). Jyobaa nyijäˈäwëbë nety ko ja yˈUˈunk jyukyˈatët yä Naxwiiny, yëˈë pudëkëyanëp parë xypyaˈˈayoˈowëm ko tyëkët tuumbë Saserdotë Wintsën. Jesús ja tyëjkë tuumbë Saserdotë Wintsën ko nyëbajtääy mä jëmëjt 29.a

² Mä yäˈädë artikulo, nˈixäˈänëm wiˈixë Jesús pyudëjkë ko jyukyˈajty ixtëmë naxwinyëdë jäˈäy parë net tyunët Saserdotë Wintsën mëdiˈibë paˈˈayoop nasˈayoˈowëp. Oy ko yäˈädë njaygyujkëm yajxon, pes yëˈë xypyudëkëyäˈänëm parë nmëwingoˈonëmë Jyobaa ets nmënuˈkxtakëm oy näˈäty nnayjyäˈäwëm mon tuk mët ko ndëgoˈoyëm (käjpxë Hebreos 5:​7-9).

KYËDAˈAKY YÄ NAXWIINY JA DIOSË YˈUˈUNK MËDIˈIBË NIˈIGYË TSYOJKYPY

3, 4. ¿Wiˈixë Jesús tyëgäjtsyë jukyˈäjtën ko myiiny yä Naxwiiny?

³ Mbäät näˈäty tyëgatsy ja jukyˈäjtën, ixtëm ko ntsënääytyëgäjtsëm, pes tsoˈonëm mä ja it lugäär mä nety agujk jotkujk nyajpatëm, ta nmäjtstutëm ja familyë ets ja nmëtnaymyaayëbëˈäjtëm. Ets xytsyiptakxëm, per mëdiˈibë Jesús tyuun, nitii mëët kyayaˈijxkijpxyë. Nituˈugë netyë anklës duˈun ja kutujkën tkamëdaty jam tsäjpotm ixtëmë Jesús, mëkë nety tsyokyëtyë Jyobaa ets agujk jotkujkë nety jam tyuny mëdë Tyeety (Sal. 16:11; Prov. 8:30). Biiblyë jyënaˈany ko ‘yˈëxmäjtstääy tukëˈëyë mëdiˈibë jyaaˈäjtypyën’ parë kyëdaky yä Naxwiiny ets jyukyˈajty mä ja pokyjyaˈaytyëjk (Filipenses 2:​7, TY).

⁴ Nˈokwinmäˈäyëm nanduˈun wiˈix jyukyˈäjttsondaky yä Naxwiiny. Jesús ja myiiny jyajty mä tuˈugë familyë mëdiˈibë ayoop, ets pääty nnijäˈäwëm mët ko Biiblyë nyimaytyakypy ti ja tyääk tyeety yäjktë ixtëmë wintsëˈkën ko yëˈë myaxuˈunkˈäjty (Lev. 12:8; Luc. 2:24). Ets ko ja rey Herodes tnijäˈäwë ko të netyë Jesús myaxuˈunkˈaty, ta jyayaˈooganë. Parë kyaj yaˈoˈkë, ta yajmëgeky ets ojts yajmënëjkxy Egipto ets jap tsyënääytyë tuk tiempë (Mat. 2:​13, 15). ¡Tim tëgatsyë netyë Jesús të jyukyˈaty jam tsäjpotm!

5. ¿Ti Jesús yˈijx ko jyukyˈajty yä Naxwiiny ets wiˈix pyudëjkë parë ko nety tyuny Saserdotë Wintsën? (Ix nanduˈunë dibujë).

⁵ Ko Jesús jyukyˈajty yä Naxwiiny, yˈijx wiˈix mayë jäˈäy yˈayowdë. Jyäˈäwë wiˈix ja jäˈäy nyayjyawëty ko yˈooky ja jyëëky myëguˈuk, pes oˈk ja kyudeety. Ko ojts yˈëwaˈkxy kyäjpxwaˈkxy, pyatë jäˈäy mëdiˈibë nety myëdäjtypyë leprë, mëdiˈibë nety kyaj yˈixy, xux o mëdiˈibë nety jyantsy pyaˈˈayoopy ja yˈuˈunk mët ko të yˈooky. Jesús pyaˈˈayoowdääy niˈamukë yäˈädë jäˈäyëty (Mat. 9:​2, 6; 15:30; 20:34; Mar. 1:​40, 41; Luc. 7:13). Ko Jesús jyukyˈajty jam tsäjpotm yˈijx wiˈix ja jäˈäy yˈayoy, per ko kyëdaky yä Naxwiiny jyaygyujkë mas niˈigyë wiˈixë jäˈäy nyayjyawëdë ko yˈayowdë (Is. 53:4). Tijatyë Jesús yajkëjx yajnäjx yä Naxwiiny, yëˈë pudëjkë parë niˈigyë tjaygyujkë wiˈix ja naxwinyëdë jäˈäy yˈayowdë ets dyajkëx dyajnaxtë ja moˈon tujkën. Tyim jäˈäwë wiˈix ëjtsäjtëm nmoˈon ndujkëm, nˈanuˈkxëm ets nmäˈäy ndäjëm.

JESÚS PYAˈˈAYOOW JA JÄˈÄYËTY

6. ¿Ti xytyukniˈˈijxëm ja ijxpajtën mëdiˈibë Isaías pyëjktak? (Isaías 42:3).

⁶ Ko mä Escrituras Hebreas yajnimaytyaˈagyë jäˈäy mëdiˈibë oy mëk, yëˈë mëët tˈijxkijpxyë ääy kepy mëdiˈibë mëjaty ets jantsy oyatyë yˈaay xyeˈentsy (Sal. 92:12; Is. 61:3; Jer. 31:12). Per ja mëdiˈibë jäjt këbajtp oˈktëy, yëˈë mëët tˈijxkijpxyë tsäjpkapyny mëdiˈibë tim tëjjanëp ets ja jëën mëdiˈibë tim piˈitsanëp, mëdiˈibë kyaj nëgoo pën ttimymyëjpëjktaˈaky (käjpxë Isaías 42:3). Isaías ojts tnaskäjpxë ko Jesús mëkë nety ttsokäˈäny ets tpaˈˈayowäˈäny ja jäˈäy mëdiˈibë kyaj pën yajtsobäädëdë. Ets duˈunë duˈun, ko jyukyˈajty yä Naxwiiny, pyaˈˈayoow ja jäˈäy mëdiˈibë amääy amutsk ets mëdiˈibë nety axëëk yajtuundëp. Duˈun dyaˈˈadëëy mëdiˈibë Isaías ojts tnaskäjpxë.

7, 8. ¿Wiˈixë Jesús dyaˈˈadëëy mëdiˈibë nety të tnaskäjpxë Isaías?

⁷ Mateo nyigäjpx ko Jesús yëˈë yaˈˈadëëw mëdiˈibë netyë Isaías të tnaskäjpxë, duˈun jyënany: “Kyaj ttëjäˈäny tuˈugë tsäjpkapyny mëdiˈibë tëjjanëp ets kyaj nanduˈun dyajpiˈitsäˈänyë metsyë mëdiˈibë piˈitsanëp” (Mat. 12:20). Jesús tyuun kanäägë miläägrë parë tpudëjkë ja jäˈäyëty mëdiˈibë nety axëëk yajtuundëp ets mëdiˈibë nety kyaj tˈëwxit tjëjpˈixtë ets yˈoyëdët ja yˈamay jyotmay. Nˈokpawinmäˈäyëm ja jäˈäy mëdiˈibë nety myëdäjtypyë leprë: ¿akjënäämbëdaa nety yˈagëdäˈägët ets jatëgok yajpäädët mëdë fyamilyë etsë myëtnaymyaayëbëty? (Luc. 5:​12, 13). O ja jäˈäy mëdiˈibë nety nat ets nan kyaj mbäät kyajpxy: ¿wiˈixëdaa nyayjyäˈäwë ko tˈijxy jyantsy kyäjpx jyantsy myaytyäˈäktë jäˈäyëty ets yëˈë kyaj tmëdoy ets ni mbäät tkatukˈëw tkatukkäjpxë? (Mar. 7:​32, 33). Min nˈaknimaytyakëm tijaty jotmayë nety yˈakpattëbë yäˈädë jäˈäyëty.

⁸ Ja tiempë mä Jesús jyukyˈajty, may ja judiyëtëjk duˈunë nety jyënäˈändë ko yäˈädë jäˈäyëty päätyë nety duˈun yˈayowdë mët ko jam ti të ttundë o të tyëgoytyë ja tyääk tyeety (Juan 9:2). Pääty, kyaj nety pën yˈixäˈänëdë, perë Jesús yajtsok yaˈˈagëdak yäˈädë jäˈäyëty ets tyuknijäˈäwë ko Dios pudëkëyanëdëp. Ko duˈunë Jesús ttuuny, ta yˈadëëy mëdiˈibë netyë Isaías të tnaskäjpxë. ¿Ti xytyukniˈˈijxëm?

9. ¿Wiˈix xytyukˈijxëmë Hebreos 4:​15, 16 ko Jesús yëˈë tuˈugë Saserdotë Wintsën mëdiˈibë paˈˈayoop?

⁹ (Käjpxë Hebreos 4:​15, 16). Mbäät nˈijtëm seguurë ko Jesús xypyaˈˈayoˈowëm nanduˈun. Mëdiˈibë të yajkäjpxnaxy “xypyaˈëyoˈowëm”, mä ayuk grieegë yëˈë yˈandijaampy ko tuˈugë jäˈäy tjawë ja jäj jëmuˈumën mëdiˈibë ja myëguˈuk yajnäjxypy. Yäˈädë ayuk yëˈë nanduˈun yajtuunë apostëlë Pablo mä Hebreos 10:34 ko jyënany ets nbaˈˈayoˈowëm ja jäˈäyëty mëdiˈibë yajpattëp pujxndëgoty. Tukëˈëyë ja miläägrë mëdiˈibë Jesús tyuun, yëˈë yajnigëxëˈk ko jyantsy pyaˈˈayoobyë nety nanduˈunë jäˈäy. Yajtsok yaˈˈagëdak mët ko jyantsy myëmääy jyantsy myëdäj ets jyantsy pyudëkëyan. Ixtëm nˈokpëjktakëm, ko dyaˈˈagëdaky ja jäˈäy mëdiˈibë nety myëdäjtypyë leprë, mbäätxyëp jagam dyajtsoky, per yëˈë myëwingoon ets kyëˈënixäj. Waˈanë nety jeky ja tiempë të nyäjxnë mä yäˈädë jäˈäy kyaj pën nyekykyëˈënixäjˈyëty. Nanduˈun ttuuny mëët ja jäˈäy mëdiˈibë nety nat, ojts twoownëjkxy aduˈuktuuy parë dyajmëdoowëˈky. Nimiinë nanduˈun tuˈugë toˈoxytyëjk mëdiˈibë nety axëëk të jyukyˈaty, yajtekypyujë ets ojts yajtëtsxëty ja tyeky mëdë kyuwääy. Niduˈuk ja farisee wiink tˈijxy, perë Jesús nyikäjpxtutë yäˈädë toˈoxytyëjk (Mat. 8:3; Mar. 7:33; Luc. 7:44). Yëˈë kyaj jagam jëxkëˈëm ojts tpëjktaˈaky ja jäˈäy mëdiˈibë pëjk ijxëp o mëdiˈibë nety mëjwiin kajaa të pyokytyuny. Yˈagëˈë yˈaxäjë tsuj yajxon ets pyaˈˈayoow. Pääty, mbäät nˈijtëm seguurë ko Jesús nanduˈun xypyaˈˈayoˈowëm.

NˈOKPANËJKXËMË YˈIJXPAJTËNË JESÚS MËDIˈIBË TUUMP SASERDOTË WINTSËN

10. ¿Tijaty naybyudëkë jaˈäjtp parë tˈixyˈattëdë Jyobaa pënaty kyaj yˈixtë ets myëdowdë? (Ix nanduˈunë dibujë).

¹⁰ Kom nbanëjkxäˈänëmë Jesúsë yˈijxpajtën, pääty ndunäˈänëmë mëjääw parë ntsokäˈänëmë jäˈäy ets nbaˈˈayowäˈänëm (1 Ped. 2:21; 3:8). Tëyˈäjtën ko kyaj mbäät nyaˈijxëˈkëm ets nyajmëdoowëˈkëm ja jäˈäyëty, per mbäät nbudëjkëm parë tmëwingondët ets tˈixyˈattëdë Jyobaa. Ixtëm nˈokpëjktakëm, ja pyëtsëmyë bideo mä 100 naxyë ayuk señas, etsë ëxpëjkpajn mëdiˈibë braille naxy 60 ayuk. Pëtsëëmp nanduˈunë bideo mä yajnigajpxy tijaty jap näjxp, naxy 100 ayuk. Duˈuntsoow pënaty kyaj myëdowdë ets yˈixtë, mbäät tmëwingondë Jyobaa etsë Jesús.

11. ¿Wiˈix tyamë Diosë nyax kyäjpn tpanëjkxëdë yˈixpajtënë Jesús? (Hechos 2:​5-7, 33; ix nanduˈunë dibujë).

¹¹ Ko nety ja jäˈäy të tyuˈukmuktë mä ja Pentekostes xëëw, ta Jesús ttuknigejxyë yˈespiritë santë ja yˈëxpëjkpëty parë tmëtmaytyaktë ja jäˈäyëty mä ja “ayuk” mëdiˈibë kyäjpxtëp (käjpxë Hechos 2:​5-7, 33). Tyam, nanduˈunë Diosë nyax kyäjpn ttuny parë yajpudëkë jäˈäy mëdiˈibë wiink ayuk käjpxtëp ets tˈixyˈattëdë Jyobaa. Pääty dyajpëtsëmdë ëxpëjkpajn naxy 1,100 ayuk, ets ta ayuk mëdiˈibë niwaanë jäˈäy kyäjpxtëp. Ixtëm nˈokpëjktakëm, mä continente americano tapˈäjtpë ayuk mëdiˈibë kyaj nëgoo jäˈäy tkäjpxtë ets ja të pyëtsëmy naxy 160 ayuk parë yäˈädë jäˈäyëty tˈixyˈattëdë Jyobaa. Ets 20 naxyë ayuk yajkäjpxnaxy romaní mët ko tëgatsyatyë jäˈäy tkäjpxtë. Ko duˈun të yajtuny, ta milˈamë jäˈäy të tyëkëdë ëxpëjkpë.

12. ¿Tijaty niˈigyë yˈaktuumpy ja Diosë nyax kyäjpn?

¹² Ja Diosë nyax kyäjpn kyaj jeˈeyë jäˈäy ttuknijawëdë ja oybyë ääw ayuk, nan pyudëjkëdëp ko tpäättë amay jotmay, ixtëm ko tijaty yˈayoˈonbëjktaˈaky. Mayë nmëguˈukˈäjtëm nayˈawäˈänëdëp parë dyakäˈändë ja naybyudëkë. Etsë Diosë nyax kyäjpn yˈëxtääytyëp nanduˈunë lugäär mä mbäädë jäˈäy tyuˈukmuktë parë niˈigyë tnijawëdët wiˈixënë Jyobaa tsyokëdë.

JA SASERDOTË WINTSËN XYPYUDËJKËM NIDUˈUK NIDUˈUK

13. ¿Wixatyë Jesús xypyudëjkëm?

¹³ Jesús yëˈë tuˈugë oybyë borreegë kuentëˈäjtpë ets päätyën xymyoˈoyëm tijaty nyajtëgoyˈäjtëm parë oy nˈijtëm mëdë Jyobaa (Juan 10:14; Efes. 4:7). Ko nbatëmë amay jotmay mbäät duˈun nyajpatëm ixtëm ja tsäjpkapyny mëdiˈibë tëjjanëp o ja jëën mëdiˈibë tim piˈitsanëp. Waˈan duˈun nnayjyäˈäwëm mët ko nmëdäjtëmë yuu päˈäm, të nbokytyuˈunëm o jam pën axëëk të xyajnayjyäˈäwëm. Ets ko duˈun njäjtëm, mbäät jamyë ja jot winmäˈäny nbëjktakëm mä ja amay jotmay ets kyaj nˈijxëm wiˈixë Jesús xypyudëjkëm. Per oy ko njamyajtsëm ko yëˈë jyaygyujkëp wiˈix nnayjyäˈäwëm, xypyaˈˈayoˈowëm ets xypyudëjkëm. Ixtëm nˈokpëjktakëm, mbäät xytyukpudëjkëm ja yˈespiritë santë parë xymyoˈoyëm ja jot mëjääw (Juan 16:7; Tito 3:6). Ets mbäät nanduˈun dyajtuny ja nmëguˈukˈäjtëmëty mëdiˈibë mët nduˈukmujkëm o ja mëjjäˈäytyëjkëty mëdiˈibë nyayajkypy parë xypyudëjkëm ets xyˈagujkmoˈoy xyjyotkujkmoˈoyëm (Efes. 4:8).

14. ¿Ti mbäät nduˈunëm ko nnayjyäˈäwëm mon tuk?

¹⁴ Ko nnayjyäˈäwëm mon tuk o ko kyaj nˈokmëdäjtënë ja jot mëjääw, oy ko nwinmäˈäyëm wiˈixënë Jesús xypyudëjkëm ko tyuny Saserdotë Wintsën. Nˈokjamyajtsëm ko Jyobaa kyaj jeˈeyë tkejxyë Jesús yä Naxwiiny parë ojts xykyuˈoˈk xykyutëgoˈoyëm, yëˈë duˈun parë tjaygyukët ti amay jotmay yajkëjxy yajnäjxypyë naxwinyëdë jäˈäy. Pääty ko nnayjyäˈäwëm mon tuk mët ko të nduundëgoˈoyëm, oy ko njamyajtsëm ko Jesús xypyudëkëyäˈänëm mä meerë ‘nyajmëyajtëm’ (Heb. 4:​15, 16, TY).

15. ¿Ti pudëjkë Stefano parë jatëgok jyëmbijty mä Diosë nyax kyäjpn?

¹⁵ Jesús xypyudëjkëm nanduˈun parë nbatëm ets nbudëjkëm ja mëdiˈibë të tmëjagamgaˈaktë Diosë nyax kyäjpn (Mat. 18:​12, 13). Min nˈokˈijxëm wiˈix yajnimaytyaˈagyë Stefano.b Yëˈë ojts yajjuuty mä Diosë kyäjpn, per kyum 12 jëmëjt, ta jatëgok ojts nyijkxy reunyonk. Yëˈë duˈun tnimaytyaˈaky: “Kyajëts oy nnayjyäˈäwë kojëts ëgäˈäny ndëjkë mä salonk, per nmëdunaambyëtsë nety jatëgokë Jyobaa mëdëtsë nmëguˈuktëjk. Ja mëjjäˈäytyëjkëty xymyëtmaytyaktëts ets oyëts ojts xyajnayjyawëdë. Mëdiˈibëts xyjyayaˈëxtëkëwäˈägan, yëˈë kojëts nwinmääy tikotsë Jyobaa ojts nˈokmäjtstutpë. Per ja mëjjäˈäytyëjkëty xytyukjamyajtstëts ko Jyobaa etsë Jesús kyaj ttsoktë etsëts nmëjagamgaˈaktët. Kojëts jatëgok njëmbijty mä tuˈukmujkën, ja nmëguˈukˈäjtëmëty tsuj yajxonëts ojts xyˈagëˈë xyˈaxäjëdë. Ko tiempë nyajxy, tajëts ja ngudëjk tyëjkë ëxpëjkpë ets tyam tuˈugyëts nDiosmëdundë”. Jesús agujk jotkujk nyayjyawëty ko jyodëmbittë ets yajpudëkëdë pënaty të tmëjagamgaˈaktë ja Diosë nyax kyäjpn.

16. ¿Tiko mëjwiin kajaa nguˈëˈëw ngukäjpxëm ko nmëdäjtëm tuˈugë Saserdotë Wintsën mëdiˈibë paˈˈayoop?

¹⁶ Ko Jesús jyukyˈajty yä Naxwiiny, pyudëjkë nimayë jäˈäy mä nety meerë dyajtëgoyˈattë. Tyam, mbäät nanduˈun nˈijtëm seguurë ko yëˈë xypyudëkëyäˈänëm mä meerë nyajtëgoyˈäjtëm. Ets mä ja jembyë jukyˈäjtën, tyukniwatstäˈäyaambyë naxwinyëdë jäˈäy ja poky kaytyey. Mëjwiin kajaa ngukäjpxëm ko Jyobaa mëdiˈibë mëk xytsyojkëm ets xypyaˈˈayoˈowëm të tpëjktaˈaky ja yˈUˈunk ixtëmë Saserdotë Wintsën mëdiˈibë nanduˈun paˈˈayoop.