Nimajtskë nmëguˈukˈäjtëm tyuundëkëdë ixtëm mëdiˈibë Wyoowˈyoˈoytyëbë Jyobaa Tyestiigëty

Mä tyuunë reunyonk 5 äämbë oktuubrë 2024, mëdiˈibë tuunëp winjëmëjt, ojts yajnigajpxy ko yëˈë nmëguˈukˈäjtëm Jody Jedele etsë Jacob Rumph të tyuundëkëdë ixtëm mëdiˈibë Wyoowˈyoˈoytyëbë Jyobaa tyestiigëty. Nimajtsk jeky kujkë Jyobaa tmëdundë.

Nmëguˈukˈäjtëm Jedele jap ojts myaxuˈunkˈaty Misuri (Estados Unidos). Ko myutskˈäjty ojts ja tyääk tyeety tyukniˈˈixëty ja tëyˈäjtënë. Jamë nety tsyëënëdë mä tuˈugë lugäär mä kyaj nety nëgoo pënë testiigëty. Pääty tˈixyˈajty nimayë nmëguˈukˈäjtëm mëdiˈibë jam jäjtë parë yˈëwäˈkxäˈän kyäjpxwäˈkxäˈändë. Ko tˈijxy wiˈix ja nmëguˈukˈäjtëm dyajnigëxëˈëktë tsojkën ets tuˈugyë nyayaˈitëdë, yëˈë mëdiˈibë pudëjkë mëjwiin kajaa. Ja nyëbejty 15 äämbë oktuubrë mä jëmëjt 1983 ets jyantsy tsyojkënyëˈajtypyë nety yˈëwäˈkxäˈäny kyäjpxwäˈkxäˈäny. Pääty ko dyajkejxyë yˈëxpëjkënë mä yˈeskuelë, ta tyuundëjkë prekursoor regulaar septiembrë poˈo mä jëmëjt 1989.

Yëˈë ets ja tsyëˈë kanääk ok ojts ja tyääk tyeety wyoownëjkxëdë Betel ko myutskˈäjttë ets yëˈën pudëjkëdë parë tpëjktaktë ja wyinmäˈäny ets tyunäˈändë jam, ets ko ojts yaˈknëdë tuundë jam. Septiembrë poˈo mä jëmëjt 1990, ja nmëguˈukˈäjtëm Jedele ojts yajwoy Betel jap Wallkill. Tim ëgäˈäny jap tyuuny mä jëën tëjk wyaˈatsy, ets ok mä ja nmëguˈukˈäjtëm tsyoybyattë.

Mä taˈadë tiempë, tapˈäjtpë nety kanäägë tuˈukmujkënë mëdiˈibë amxan mä nety tyëgoyˈaty yeˈeytyëjkjäˈäyëty mëdiˈibë tundëp jap. Pääty ojts nyijkxy mä tuˈugë yäˈädë tuˈukmujkën ets ojts tjäjttsoˈondaˈagyë amxan. Ko tiempë nyajxy, ta tˈixyˈajty tuˈugë prekursoora mëdiˈibë xyëëwˈäjtypy Dámaris. Ta mëët pyëjky ets ta nanduˈun yajwooy Betel.

Mä jëmëjt 2005 ojts pyëtsëmdë Betel, parë tkuentëˈatäˈäny ja tyääk ets ja myëˈtëty. Mä taabë tiempë tyuundëjkëdë prekursoor regulaar ets ja nmëguˈukˈäjtëm Jedele kanääk ok ojts tyuny ixtëmë instruktoor mä yˈëxpëktë prekursoorëty. Nanduˈun ojts tyuny Komitee mëdiˈibë pyudëjkëbë nmëguˈukˈäjtëm parë kyaj tkupëktëdë neˈpyny, ets nanduˈun Komitee mëdiˈibë tyukniwijtsëdëp parë yajkojët ja jëën tëjk.

Mä jëmëjt 2013, ta jatëgok yajwoowdë Betel parë tyundët mä yajkojˈyë jëën tëjk jap Warwick, ets ok ta tyuundë mä Betel mëdiˈibë Patterson ets Wallkill. Yëˈë nmëguˈukˈäjtëm Jedele të tyuny mä Departamentë mëdiˈibë nyiˈˈijxëbë jëën tëjk mä yajkojy. Nanduˈun Mä yajpayoˈoy wiˈix mbäät ntsoybyajtëm ets kyaj tyunëdë neˈpyny. Marsë poˈo mä jëmëjt 2023, ta yaˈˈanëmääy ets tyunët ixtëmë pyudëjkëbë Komitee mëdiˈibë yˈijxypy wiˈix ngäjpxwäˈkxëm. Ko tjamyetsy tijaty tuunk të tnikëjxmˈaty, ta jyënaˈany: “Näˈäty tsiptakp nduˈunëm ja tuunk mëdiˈibë të nyajtuknipëjkëm, per ja net mä tsyokyëty ndukˈijxpajtëmë Jyobaa mëët ko yëˈë mbäät xytyuktuˈunëm ti yëˈë xytyuktunäˈänëm”.

Ja nmëguˈukˈäjtëm Rumph myaxuˈunkˈäjty California (Estados Unidos). Ko myutskˈäjty, ja tyääk të nety nyaswäˈkënë mä Diosë kyäjpn. Per oy dyuˈunëty, tukniˈˈijxë ja tëyˈäjtënë mëdiˈibë miimp mä Biiblyë. Nan winjëmëjtëty ijty nëjkx tkuˈixë ja nyanwelë mëdiˈibë nety jantsy oy Diosmëduump ets yëˈë pudëjkë parë niˈigyë tnijawëyany ja tëyˈäjtënë. Pääty ko netyë jyëmëjt 13, ta ojts tˈamdoy parë pën yaˈëxpëkëdët. Ets ja nyëbejty 27 äämbë septiembrë mä jëmëjt 1992. Ja tyääk ta jatëgok tyëjkë Diosmëduumbë ets niˈamukë ja fyamilyë tyëjkëdë ëxpëjkpë ets nyëbajttë.

Ko nmëguˈukˈäjtëm Rumph yaˈkpëtsëëmy, yˈijx ko pënaty tuundëp prekursoor jantsy agujk jotkujk yajpäättë. Pääty ko ojts dyajkaˈpxy ja yˈëxpëjkën mä yˈeskuelë, ta tyuuntsondaky prekursoor septiembrë poˈo mä jëmëjt 1995. Ets mä jëmëjt 2000, ta ojts nyijkxy jap Ecuador mä tuˈugë lugäär mä tyëgoyˈatyë ëwäˈkx käjpxwäˈkxpë. Jap tˈixyˈajty tuˈugë prekursoora mëdiˈibë xyëwˈäjtypy Inga. Ko tiempë nyaxy ta pyëjktë. Ko pyëjktääytyë, ta ojts nyëjkxtë Diosmëduumbë mä tuˈugë käjpnuˈunk jap Ecuador, mä nety niwaanë nmëguˈukˈäjtëm yajpäättë. Ets tyam yëˈë tuˈugë kongregasionk mä jyapëty nimayë nmëguˈukˈäjtëm mëdiˈibë jantsy oy Diosmëduundëp.

Ko ja tiempë nyajxy, ta ojts tyuundëkëdë prekursoor espesial ets nanduˈun tyuundë sirkuitë. Mä jëmëjt 2011 ta yajwoowdë mä eskuelë mëdiˈibë Galaad, ets ko jap pyëtsëëmdë ta tyuundë mä kanäägë lugäär. Të tyundë Betel, misioneerë ets sirkuitë. Nanduˈun të tyuny instruktoor mä Eskuelë parë pënaty kyäjpxwäˈkxtëbë Diosë Kyutujkën.

Ko tsyondakyë COVID-19, ta jyëmbijttë Estados Unidos ets yajwoowdë mä Betel mëdiˈibë Wallkill. Ja nmëguˈukˈäjtëm Rumph yaˈˈanëmääy ets tyunët Mä yajtukniwitsë wiˈix tyuˈuyeˈeyë Diosë tyuunk. Ok ta yajkajxtë mä Betel mëdiˈibë Ecuador, jap tyuuny ixtëmë Komitee mëdiˈibë tuump Betel. Mä jëmëjt 2023 ta yajkajxtë mä Betel mëdiˈibë Warwick. Ets eneerë poˈo mä jëmëjt 2024, ta yaˈˈanëmääy ets tyunët ixtëmë pyudëjkëbë Komitee mëdiˈibë yˈijxypy wiˈix ngäjpxwäˈkxëm. Ko tjamyetsy mäjaty të Diosmëduuny ta jyënaˈany: “Kyaj tyim jëjpˈamëty mä nmëduˈunëmë Jyobaa, mëdiˈibë jëjpˈam yëˈë ko nmëduˈunëm mët ja nmëguˈukˈäjtëm”.

Mëjwiin kajaa nwingutsëˈkëmë yäˈädë nmëguˈukˈäjtëmëty ets nyajtsobatëm ja tuunk mëdiˈibë tyuundëp (Filip. 2:29).