It seguurë ko Jyobaa mgupëjkëp

1. ¿Wiˈix näägë Diosmëduumbëty wyinmääytyë?

¡JANTSY jotkujk nnayjyäˈäwëm ko ‘Dios tyukxondakypy yëˈë nyax kyäjpn’! (Sal. 149:​4, TY). Per mbäät näägë nmëguˈukˈäjtëm tëgatsy nyayjyawëdë etsë net wyinmaytyë: “Dios jyantsy tyukxondakypyë nyax kyäjpn, per ¿nan xytyukxondakpëtsëdaa?”. Nimayë Diosmëduumbëty mëdiˈibë tëëyëp jukyˈäjttë nanduˈun wyinmääytyë (1 Sam. 1:​6-10; Job 29:​2, 4; Sal. 51:11).

2. ¿Pënatyë Jyobaa kyupëjkypy?

² Biiblyë xyˈanmäˈäyëm ko oy pokyjyaˈay nyajpatëm mbäädë Jyobaa xykyupëjkëm. ¿Ti tsojkëp nduˈunëm? Nyajnigëxëˈkëm ko nmëbëjkëmë Jesus ets ko nnëbajtëm (Fwank 3:16). Duˈunë nety nyajnigëxëˈkëm mayjyaˈay wyinduuy ko të njodëmbijtëm ets ko të Dios ndukwandakëm ko nmëdunäˈänëm (Apos. 2:38; 3:19). Jyobaa jantsy jotkujk nyayjyawëty ko duˈun nduˈunëm parë niˈigyë nmëwingoˈonëm. Pën nduˈunëmë mëjääw parë nguytyuˈunëm extëmë Jyobaa ojts ndukwandakëm, ta oy mëët nˈijtëm ets xykyupëjkëm (Sal. 25:14).

3. ¿Tijaty yaˈˈatsoowëmbitäämp mä yäˈädë artikulo?

³ ¿Tiko näägë nmëguˈukˈäjtëm wyinmaytyë ko Jyobaa kyaj nyekytsyokëdë? ¿Wiˈixë Jyobaa dyajnigëxëˈëky ko jotkujk nyayjyawëty mët ëtsäjtëm? ¿Ets ti xypyudëkëyäˈänëm parë nˈijtëm seguurë ko Jyobaa xykyupëjkëm?

TIKO NÄÄK WYINMAYTYË KO JYOBAA KYAJ NYEKYTSYOKËDË

4, 5. ¿Ti tsojkëp njamyajtsëm ko nnayjyäˈäwëm ko kyaj pën xytsyojkëm?

⁴ Nimay ëtsäjtëm nwinmäˈäyëm ko kyaj pën xytsyojkëm mët ko duˈun të nyaˈk të nbajtëm (Sal. 88:15). Tuˈugë nmëguˈukˈäjtëm mëdiˈibë xyëwˈäjtypy Adrián, jyënaˈany: “Njamyejtsypyëts kots nmutskˈäjty duˈunëts ijty nˈanëëmë Jyobaa etsëts ja nfamilyë dyajnaxët mä ja jembyë jukyˈäjtën, per ko ëjts kyajts xynyitëkë etsëts jam nyajpäädët”. Tony tnimaytyaˈaky wiˈix ja tyääk teety yajˈyakëdë mä nety kyaˈëxpëktë: “Ninäˈäjëts xykyaˈˈanmääytyë ko tsyojktëbëts ets ko oyëts tijaty nduny. Xëmëts xyajnayjyäˈäwëdë ko nitiits ngajaty ndunët”.

⁵ Pën ja näˈä nnayjyäˈäwëm ko kyaj pën xytsyojkëm, nˈokjamyajtsëm ko Jyobaa yëˈë ojts xymyëjwoˈowëm mä nyax kyäjpn (Fwank 6:44). Jyobaa yëˈë yˈijxypy tijaty oy nduˈunëm, oy ëtsäjtëm duˈun ngawinmäˈäyëm ets yajxon xyˈixyˈäjtëm (1 Sam. 16:7; 2 Crón. 6:30). Pääty, mbäät nmëbëjkëm ko xyˈanmäˈäyëm ko xytsyojkëm ets ko xyajtsobatëm (1 Fwank 3:​19, 20).

6. ¿Wiˈixë apostëlë Pablo nyayjyäˈäwë ko twinmääy ko pyokyjyaˈayëty?

⁶ Waˈan näägë nmëguˈukˈäjtëm mëk tpokyjyawëdë tijaty tyuundë mä nety tkanijawëdë ja tëyˈäjtën (1 Peed. 4:3). Ets nääk waˈan jeky kujk jyaDiosmëduunëdë, per duˈunyëm ttundë mëjääw parë tjëjpkudijëdë tijaty yajtëgoyanëdëp. Ets mijts, ¿jap ti mëdiˈibë mëkjäˈäwëp? Pën duˈun, këdii wiˈix mdimynyayjyawëty, pes näägë Diosmëduumbë mëdiˈibë tëëyëp jukyˈäjttë nanduˈun ojts nyayjyawëdë. Extëm ja apostëlë Pablo, ko twinmääy ko pyokyjyaˈayëty, ta jyënany: “¡Përoobë ëj!” (Rom. 7:24). Oyë nety të jyajodëmbity ets të jyanëbety, duˈunyëm nyayjyäˈäwë extëm ja “tim ëxˈokpë mä yëˈë” apostëlëty ets ko niˈigyë pyokyjyaˈayëty (1 Kor. 15:9; 1 Tim. 1:15).

7. ¿Ti Jyobaa xytyukwandakëm pën të njodëmbijtëm?

⁷ Yëˈë nDeetyˈäjtëmë Jyobaa wyandakypy ko xypyokymyaˈkxäˈänëm pën jodëmbijtëm (Sal. 86:5). Pääty, mbäät nˈijtëm seguurë ko xypyokymyaˈkxäˈänëm, per net pën nmëkjäˈäwëm ti të nduˈunëm (Kol. 2:13).

8, 9. ¿Ti xypyudëkëyäˈänëm parë kyaj nekywyinmäˈäyëm ko Jyobaa kyaj dyajtsobääty tijaty njatukmëduˈunëm?

⁸ Niˈamukë njamëdunäˈänëmë Jyobaa extëm njatsojkënyëˈäjtëm, per waˈan näägë nmëguˈukˈäjtëm wyinmaytyë ko oy nuˈun jyatundë, kyaj tkupëkyë Dios. Tuˈugë nmëguˈukˈäjtëm mëdiˈibë xyëwˈäjtypy Amanda, jyënaˈany: “Duˈunëts nwinmay ko tsojkëbëts njot nmëjääw nˈaktimypyëjktäˈägët parëts niˈigyë Jyobaa nmëdunët. Päätyëtsë net nëgooyë nnayajtuunënë. Kots nganekymyëdaˈaky, taajëtsë net wiink njantsy nyayjyawëty etsëts nwinmay ko Jyobaa nanduˈun nyayjyawëty”.

⁹ ¿Ti xypyudëkëyäˈänëm parë kyaj nekywyinmäˈäyëm ko Jyobaa kyaj dyajtsobääty tijaty njatukmëduˈunëm? Ko njamyajtsëm ko Jyobaa kyaj mëjwiin kajaa tijaty xyˈamdoˈowëm, pes jyaygyujkëp wiˈix nyaˈijx nyajpatëm. Ets ninäˈä xykyatukˈanaˈamëm mëdiˈibë kyaj nmëmadakëm. Yajtsobatypy ko nmëduˈunëm nuˈun nmadakëm oy yiˈinëm wyaanëty o myëjwiin kyajaajëty. Oy ko nanduˈun njamyajtsëm wiˈix yajnimaytyäˈäktë mä Biiblyë pënaty myëduundë Jyobaa amumduˈukjot. Extëmë apostëlë Pablo, mëk jyantsy tyuuny ko jagambäät ojts yˈëwaˈkxy kyäjpxwaˈkxy ets yajnaxkëdak kanäägë kongregasionk. Per ok, ta tyëgäjtsyë jyukyˈäjtën ets kyaj ojts duˈun nyekyˈëwaˈkxy nyekykyäjpxwaˈkxy. ¿Duˈunyëmëdaa Jyobaa tsyojkë ets kyupëjkë? Duˈunyëm. Pablo tuunˈadëts nuˈun myadaky ets duˈunyëmë Jyobaa ojts kyunuˈkxyëty (Apos. 28:​30, 31). Nanduˈun ëtsäjtëm, waˈan tyamë Jyobaa kyaj nekymyëduˈunëm extëm ijty, per yëˈë yajtsobatypy ko nmëduˈunëm amumduˈukjot. Min net nˈokˈijxëm wixatyë Jyobaa dyajnigëxëˈëky ko xytsyojkëm ets ko kyupëjkypy tijaty ndukmëduˈunëm.

¿WIXATYË JYOBAA DYAJNIGËXËˈËKY KO XYTSYOJKËM ETS XYKYUPËJKËM?

10. ¿Wiˈixë Jyobaa xytyuknijäˈäwëm ko xytsyojkëm ets xykyupëjkëm? (Fwank 16:27).

¹⁰ Mët yëˈëgyëjxmë Biiblyë. Jyobaa tyuknijawëyaampy pënaty mëduunëp ko tsyojkypy ets kyupëjkypy. Mä Biiblyë majtsk ok jap yajnigajpxy ko Jyobaa tˈanmääyë yˈUˈunk ko tsyojkypy ets ko kyupëjkypy (Mat. 3:17; 17:5). ¿Mjamëdowaampy ko Jyobaa mˈanëˈëmxëty ko mtsojkëp ets ko jotkujk xyajnayjyawëty? Jyobaa kyaj mbäät mmëgajpxyëty jam tsäjpotm, per mmëgäjpxëp mët yëˈëgyëjxmë Biiblyë, mä myiny ja yˈääw yˈayuk. Extëm ko ngäjpxëm mä Biiblyë wiˈixë Jesus tsuj yajxon ojts tmëgajpxy ja yˈëxpëjkpëty, mbäät nnayjyäˈäwëm ko nanduˈunënë Jyobaa xymyëgäjpxëm (käjpxë Fwank 16:27). Jesus duˈun meerë ojts jyaˈayˈaty extëmë Tyeety, pääty ko ngäjpxëm mä Biiblyë mä tˈanmääy ja yˈëxpëjkpëty ko tsyojkypy, mbäät nbawinmäˈäyëm ko nanduˈunënë Jyobaa xyˈanmäˈäyëm (Fwank 15:​9, 15).

11. ¿Tiko kyaj yˈoyëty nwinmäˈäyëm ko pääty nbatëmë amay jotmay mët ko Jyobaa kyaj xyˈokkupëjkënë? (Santya̱ˈa̱gʉ 1:12).

¹¹ Ko xymyoˈoyëm tijaty nyajtëgoyˈäjtëm. Jyobaa xypyudëkëyäˈänëm, extëm nˈokpëjktakëm xymyoˈoyëm tijaty nijukyˈäjtëm. Per näˈäty nyasˈijxëp ets nwinguwäˈkëmë amay jotmay, duˈun extëm jyajtyë Job (Job 1:​8-11). Ko nbatëmë jotmay, kyaj mbäät nwinmäˈäyëm ko Jyobaa kyaj xyˈokkupëjkënë, jaajën mä mbäät nyajnigëxëˈkëm ko mëk ntsojkëm ets ko ndukˈijxpajtëm (käjpxë Santya̱ˈa̱gʉ 1:12). Ets ko nety duˈun nyajnäjxëm ja amay jotmay, nˈixäˈänëm wiˈixë Jyobaa xypyudëjkëm parë nmëmadakëm ja amay jotmay ets ko xytsyojkëm.

12. ¿Ti xytyukniˈˈijxëm extëm yajnimaytyaˈagyë Dimitri?

¹² Min nˈokˈijxëm wiˈix jyajtyë Dimitri. Yajtëgooy ja tyuunk ets kanäk poˈo ojts kyaj nyekytyuny. Per ta ja wyinmäˈäny tpëjktaky parë niˈigyë tmëdunäˈänyë Jyobaa ets duˈun ttukˈixäˈäny ko yëˈë tyukˈijxpejtypy. Kanäk poˈo tjaˈëxtääy ja tyuunk ets kyaj tnekypyaty. Ok, ta ojts pyaatyëty ja päˈäm mëdiˈibë myëgoˈknääy. Ta net ojts myaay tyäjnë ko kyaj ja fyamilyë tsuj yajxon nˈokˈijxˈijt tˈokkuentëˈäjnë ets ko Jyobaa kyaj yˈoktsojkënë. Tëgok, ta nyëëxuˈunk myooyë tuˈugë neky mä myinyë Isaías 30:​15, mëdiˈibë jënäämp: “Ja mjot mmëjääw xypyëkäˈändë pën kyaj ti xymyëmay xymyëdäjtë ets kots xymyëbëktët”. Ta ja nyëëxuˈunk yˈanmääyë: “Papaa ko mon tuk mnayjyawëdët, yëˈë yäˈädë tekstë mjamyatsëp”. Dimitri pyëjkë kuentë ko Jyobaa tamë nety pyudëkëty mët ko ja fyamilyë kyaj nety ti dyajtëgoyˈaty, tamˈäjtpë ja jyëën tyëjkëty, ja kyaˈay yˈukën ets ja wyit xyoxëty. Yëˈë jyënaˈany: “Mëdiˈibë nety jeˈeyë tsojkëp, yëˈëts ndukˈijxpatëdë Jyobaa ets kyajëts ti nmëmay nmëdäjët”. Pën mijts jam duˈumbë amay jotmay xyajnaxy, mbäät mˈity seguurë ko Jyobaa yëˈë mmoˈoyanëp ja jot mëjääw ets xymyëmadäˈägët.

13. ¿Wiˈix ja tuk pëky xytyukˈijxëmë Jyobaa ko xytsyojkëm?

¹³ Ko dyajtunyë nmëguˈukˈäjtëm. Jyobaa mbäät dyajtunyë nmëguˈukˈäjtëm parë xymyëjääwmoˈoyëm mä meerë nyajtëgoyˈäjtëm. Duˈunën tˈijxy tuˈugë nmëguˈukˈäjtëm mëdiˈibë tsënaapy Asia. Ojts dyajtëgoy ja tyuunk ets päˈämbajt. Ok, ta ja myëmëjjäˈäy tmëdëgooyë Jyobaa ets kyaj ojts yˈoktuunë ansianë. Mëk ojts tmëmay tmëdäjy ko duˈun jyajty ja myëmëjjäˈäy, ta jyënany: “Kyajtsë nety nnijawë tikotsë duˈun njaty ngëbety. Duˈunëtsë nety nmay ndäjy ko kyajëts tijaty oy nduny ets ko kyajëtsë Jyobaa xyˈokkupëjknë”. Yäˈädë nmëguˈukˈäjtëm, ta ojts tˈanëëmë Jyobaa parë tyukˈixëdët ko jeˈeyëm tsyokyëty ets ojts yˈatsoowëmbijtxëty ja nyuˈkxtakën. ¿Wiˈix? Duˈun tnimaytyaˈaky: “Ja nmëguˈukˈäjtëm mëdiˈibë tuundëp mëjjäˈäy ojtsëts xypyudëkëdë etsëts xytyukˈijxtë ko Jyobaa jeˈeyëmëts xytsyoky”. Ko tiempë nyajxy, ta jatëgok tˈanmääyë Jyobaa ko waˈan pyudëkëty. ¿Ojtsëdaa pyudëkëty? Yëˈë tnimaytyaˈaky: “Mä taabë xëëw, tats ja nmëguˈukˈäjtëm mëdiˈibëts mëët tuˈugyë nˈyeˈeytyë reunyonk xytyuknijäˈäyëdëts tuˈugë neky. Kots ojts ngajpxy, tats nnayjyäˈäwë ko Jyobaa të nety tmëdoowˈity ja nnuˈkxtakënëts”. Extëm nˈijxëm, Jyobaa yëˈë yajtuumbyë nmëguˈukˈäjtëm parë xymyëjääwmoˈoyëm ets xytyukˈijxëm ko xytsyojkëm (Sal. 10:17).

14. ¿Wiˈixë Jyobaa dyajtunyë nmëguˈukˈäjtëm parë xytyukˈijxëm ko xykyupëjkëm?

¹⁴ Jyobaa ja nanduˈun dyajnigëxëˈëky ko xykyupëjkëm ets xytsyojkëm ko dyajtunyë nmëguˈukˈäjtëm parë xymyoˈoyëm tuˈugë käjpxwijën ko nyajtëgoyˈäjtëm. Extëm nˈokpëjktakëm, mä primer siiglë Jyobaa yëˈë yajtuunë apostëlë Pablo parë ojts tˈëwijy tkäjpxwijy ja myëguˈuktëjk, jaa tjääyë mäjmäjktsë neky. Mä näägë yäˈädë neky mëkë Pablo ojts tmëgajpxy ja myëguˈuktëjk, per pääty duˈun ttuuny mët ko nety ttsoky. ¿Tiko Jyobaa duˈun ttukujäˈäyë Pablo? Yëˈko yˈoyjyaˈayëty, xytsyojkëm ets xyjyëjpwijtsëmbijtëm “duˈun extëm tuˈugë uˈunkteety ttuny mëdë yˈuˈunk mëdiˈibë tsyojkypy” (Prov. 3:​11, 12). Pääty ko tuˈugë nmëguˈukˈäjtëm xymyoˈoyëm käjpxwijën mëdiˈibë yajpatp mä Biiblyë, kyaj yˈoyëty nwinmäˈäyëm ko Jyobaa kyaj xynyekytsyojkëm, niˈigyën mbäät nwinmäˈäyëm ko pääty duˈun ttuny mët ko xytsyojkëm (Eb. 12:6). Per ¿wiˈixë Jyobaa tˈakˈyajnigëxëˈëky ko xytsyojkëm?

TIJATY XYˈAKTUKˈIJXËM KO JYOBAA XYTSYOJKËM ETS XYKYUPËJKËM

15. ¿Pënatyë Jyobaa tyuknigejxypyë yˈespiritë santë, ets ti mbäät nmëbëjkëm?

¹⁵ Jyobaa yëˈë tyuknigejxypyë myëjääw o yˈespiritë santë pënaty kyupëjkypy (Mat. 12:18). Oy ko nwinmäˈäyëm: “¿Nyajnigëxëˈkypyëts ja oybyë jäˈäyˈäjtën mëdiˈibë yajkypy ja Diosë myëjääw?”. Extëm nˈokpëjktakëm, ¿niˈigyë tyam mmaˈkxtuky ets kyaj dyuˈunëty määnëm nety mgatëkë ëxpëjkpë? Ko xypyëkëdë kuentë ko myajnigëxëˈkypy ja oybyë jäˈäyˈäjtën mëdiˈibë yajkypyë Diosë myëjääw, ta niˈigyë xymyëbëkët ko Jyobaa mgupëjkëp ets mtsojkëp. (Ixë rekuäädrë “Ja oybyë jäˈäyˈäjtën mëdiˈibë yajkypyë Diosë myëjääw yëˈë…”).

16. Extëm jyënaˈanyë 1 Tesalónikʉ 2:​4, ¿pënatyë Jyobaa yajtuumpy parë tnimaytyäˈägët ja oybyë ayuk? Ets ko mijts duˈun xynyijawë, ¿wiˈix myajnayjyawëty?

¹⁶ Jyobaa yëˈë nanduˈun tyukkäjpxwaˈkxypy ja oybyë ayuk pënaty kyupëjkypy (käjpxë 1 Tesalónikʉ 2:4). Ets duˈunën tˈijxy tuˈugë nmëguˈukˈäjtëm mëdiˈibë xyëwˈäjtypy Jocelyn. Ko tëgok ojts myaˈaybyëdëˈëky nitii nety tkatsojkënyëˈaty ttunäˈäny. Yëˈë tnimaytyaˈaky: “Duˈunëts nnayjyäˈäwë ko kyajts ti njot nmëjääw ets ko nitiits ngatunäˈäny. Per prekursoorëtsë nety nduny ets ja xëëwëtsë nety nëjkxäˈäny tëjkˈayeˈebyë. Tats nmënuˈkxtakyë Jyobaa etsëts ntsoˈony”. Mä taabë jopy, Jocelyn yëˈë myëtmaytyakë Mary, tuˈugë toxytyëjk mëdiˈibë jantsy oyjyaˈay ets kyupëjk yˈëxpëkäˈäny. Ko nyajxy kanäk poˈo, ta Mary tyukmëtmaytyakë ko të nety tmënuˈkxtaˈagyë Jyobaa parë pyudëkëdët ja xëëw mä yëˈë jam nyajxy tëjkˈayeˈebyë. Jocelyn tnimaytyaˈaky ti tukniˈˈijxë ko duˈun jyajty: “Duˈunëts njäˈäwë ko Jyobaats xyˈanmaapy, ntsojkypy ets ngupëjkypy”. Tëyˈäjtën ko kyaj niˈamukë jäˈäy tmëdoowˈitäˈändë ja Diosë yˈayuk, per mbäät nˈijtëm seguurë ko Jyobaa yˈijxypy nuˈunën nyajnimëjääwdakëm parë jäˈäy ndukmëtmaytyakëm ja tëyˈäjtën.

17. Extëm yajnimaytyaˈagyë Vicky, ¿ti xytyukniˈˈijxëm ko ojts nyajjuuybyëtsëˈëmëm? (Salmo 5:12).

¹⁷ Pënatyë Jyobaa kyupëjkypy yëˈë nanduˈun tyukˈoyˈäjttëp ko Jesus ojts xyjyuuybyëtsëˈëmëm (1 Tim. 2:​5, 6). Per ¿ti mbäät nduˈunëm pën nwinmäˈäyëm ko Jyobaa kyaj xykyupëjkëm oy njamëbëjkëm ko Jesus ojts xykyuˈoˈkëm ets oy të njanëbajtënë? Oy ko njamyajtsëm ko kyaj mbäät nmëbëjkëm wiˈix ja jot winmäˈäny xyˈanmäˈäyëm, yëˈë duˈun wiˈixë Jyobaa jyënaˈany. Pes yëˈë kyupëjkypy pënaty myëbëjktëp ko Jesus ojts xykyuˈoˈkëm ets wyandakypy ko kyunuˈkxaampy (käjpxë Salmo 5:12; Rom. 3:26). Tuˈugë nmëguˈukˈäjtëm mëdiˈibë xyëwˈäjtypy Vicky, kajaa pyudëjkë ko tpawinmääy wiˈix ndukˈoyˈäjtëm ko Jesus ojts xykyuˈoˈkëm. Yëˈë tsiptakxëbë nety tmëbëkët ko Jyobaa tsojkëp, per ko duˈun tpawinmääy, ta jyënany: “Jekytyëmtsë netyë Jyobaa të xymyëmaˈkxtuky parëts xytyukˈixy ko xytsyojkpëts, pes duˈundëmtsë netyë Jyobaa nˈanëëmë: Tsipë duˈumbë jäˈäy xytsyokët extëm ëjts, kyaj mbäät xymyeˈkxy ja nboky ngaytyeyëts oyë mˈUˈunk xyjyakejxy yä Naxwiiny parëts xykyuˈoogët”. Pën ëtsäjtëm nbawinmäˈäyëm nanduˈun extëmë Vicky wiˈix ndukˈoyˈäjtëm ko Jesus ojts xykyuˈoˈkëm, ta nˈixäˈänëm ko Jyobaa xytsyojkëm ets nmëbëkäˈänëm ko xykyupëjkëm.

18. ¿Wiˈix nnayjyawëyäˈänëm pën xëmë ntsojkëmë nDeetyˈäjtëmë Jyobaa?

¹⁸ Oy njatuˈunëm extëm të yajnigajpxy mä yäˈädë artikulo, mbäät näˈäty tëgatsy nnayjyäˈäwëm ets nwinmäˈäyëm ko kyaj Jyobaa xytsyojkëm ets ni xykyakupëjkëm. Pën ja näˈä duˈun mnayjyawëty, oy ko xyjyamyatsët ko Jyobaa duˈunyëm ttsokäˈäny pënaty yëˈë “tsojkëdëp” (Sant. 1:12). Pääty, duˈunyëm mmëwingoonˈadëˈëtsë Jyobaa, ix wixaty dyajnigëxëˈëky ko mtsojkëp ets ko mgupëjkëp. Ninäˈä xykyajäˈäytyëgoyët ko “kyaj jagam yˈity” (Apos. 17:27).