March

Ita na asita uramu taunimanima ese bae inai henida, bona eda abidadama dainai e daḡedaḡe henidamu karana na asita moalelaiamu. To dahaka dainai bae inai henida neganai baita moale? Mani badi toi aita herevalai: Ginigunana, ta haheaukamu neganai, Dirava ena lalonamo ta abiamu. (1 Pet. 4:13, 14) Iharuana, eda abidadama e hanamoamu bona e hagoadaiamu. (1 Pet. 1:7) Bona ihatoina, dava bada ahuna​—mauri hanaihanai​—baita abiamu. (Roma 2:6, 7) Iesu e toreisi lou murinai, aposetolo taudia na ia ese e gwauraia moalena e mamia. E dadabadia bona e haḡanidia basie haroro murinai, idia na e moale. Dahaka dainai? “Badina be Iesu ladana bagunai hisi e ani.” (Apos. 5:40-42) Idia ese Biagudia e lalokau henia badava dainai, inaidia garidia na asie gariva. Bona edia lalokau na e hahedinaraia, sivarai namona iharorolaina karana na “asie hadokoa.” Hari tadikakada momo na dounu mai edia abidadama ida Iehova e hesiai heniamu ena be daḡedaḡe e davarimu. Mai dibadia Iehova ese edia ḡaukara bona edia lalokau ia ladana dainai na basine laloboiomu. w21.03 rau 25 par. 18-19

Horoa taudia be guba ai be nohomu. To una helaro na dia sinadia edia amo e abia, lasi, to Dirava ese e henidia. Horoa taudia ese edia helaro na e laloamu, e ḡuriḡurilaiamu, bona guba ai bae abia ahuna na doini e nariamu. Idia ese hari tauanidia guba ai ede baine idau toma na do asi dibadia. (Fili. 3:20, 21; 1 Ioa. 3:2) To, idia na e ura dikadikamu guba Basileiana baela. Hutuma bada herea be tanobada ai be nohomu ela bona hanaihanai. Oibe, taunimanima iboudiai edia ura ḡauna bunai. Idia na e uramu dina ta baine kau, bena bae heduru ina tanobada idoinai na paradaiso ai bae halaoa. Idia na e uramu una dina ai edia ruma bae hagini, edia uma bae kara, o natudia ḡoevadaedia bae havara diba. (Isa. 65:21-23) Idia na e uramu tanobada ena gabu idauidau​—ororo, uda badadia, o davara​—bae ita, bona Dirava ena ima karakara ḡaudia idauidau bae stadilai. To, e moalelaiamu ḡauna hereadaena binai: Idia na dibadia Iehova na idia turadia ela bona hanaihanai. w21.01 rau 18-19 par. 17-18

Babulono taudia ese tano e habuaia tari murinai, taunimanima na e gwa: “Ia na vada e vahu, asi tauna bona asi ubu-ubu ḡauna; Kaldea taudia imadia ai vada e atoa.” (Ier. 32:43) Ioel e peroveta bena laḡani 200 bamona muridiai, Iehova ese Ieremia e ḡaukaralaia una tuari ai baine vara ḡauna ma ta e herevalaia. Ia na e gwa tuari taudia ese gwau-edeede Israel taudia bae tahudia bona iboudiai bae abidia. Iehova na e tomu: “A itaia, haoda taudia hutuma na boiridiamu; idia ese bae aladia. Una murinai, labana taudia hutuma baina boiridia; bena ororo badadia bona maraḡidia iboudiai latadiai bae tahudia, bona kohuakohua lalodiai danu. Edia kara havara bona edia kara dika davadia baina henidia harua.” Davara o uda danu dia heḡereḡere asie helalo-kerehai Israel taudia na Babulono ena tuari taudia amo bae hunidia.​—Ier. 16:16, 18. w20.04 rau 5 par. 12-13

Lot ena mauri lalonai ḡau ta e vara, bona Iehova ena haheḡani na se badina haraḡa. Reana baita gwaumu Lot ese Iehova ena hereva na se laloa bada bona e gwau-edeede. To, Iehova na dounu e urava Lot na baine hamauria. Ia na “Iehova ese e bogaia hisi” dainai, ia bona ena ruma bese na aneru ese imadia ai e abi bena hanua murimurinai e hakaudia lasi. (Gen. 19:15, 16) Iehova ese Lot na badi haida daidiai e bogaia hisi. Reana Lot na hanua murimurina taudia garidia e gariva dainai hanua na se rakatania haraḡa. To dia una mo. Lot na mai dibana pavapava rarua na una hanua badina taorana ta ai e moru bona e mase. (Gen. 14:8-12) Lot na mai ena ruma bese, bona ia na idia daidiai e lalohekwarahiva. Danu, ia na taḡa tauna dainai reana Sodom ai mai ena ruma namo hereana ta. (Gen. 13:5, 6) Vaia, baita gwau dibamu Lot na asi ena hahekora, ia na unu badi daidiai Iehova na se badinaia haraḡa. To, Iehova na dia Lot ena kerere mo e ita, bona iena roharoha dalanai, Lot na “kara maoromaoro tauna.”​—2 Pet. 2:7, 8. w20.04 rau 18 par. 13-14

Eregabe e, reana nega be laomu lalonai, oi maraḡimu ai e dibamu taudia haida na be abia daemu oi na do bada. To, namona na ba diba, Iehova ese oi kudoumu na e itaiamu. Ia na mai dibana herea oi bona mai dibana oi be dahaka ba kara diba. (1 Sam. 16:7) Emu hetura karana Iehova ida ba hagoadaia. David na unu baine kara toma totona Iehova e kara ḡaudia e haerodia. David ese unu ḡau e haerodia namonamo karana amo ita e Havarada Diravana ena kara e dibaia. (Sal. 8:3, 4; 139:14; Roma 1:20) Oi ese ba karaia ḡauna ma ta na, Iehova ba noia goada baine henimu. Heḡereḡere, skuli ai turamu ese e hauramumu badina oi na Iehova ena Witnes, a? Bema oibe, Iehova ena heduru ba noia, una hekwakwanai ba hanaia totona. Ena Hereva bona ena orea ese e halasimu pablikeisen bona vidio amo o abimu heduru herevadia na ba badina. Iehova ese be durumumu daladia bo itamu neganai, emu abidadama ienai danu be goadamu. Bena, haida ese bae itaia oi na Iehova enai o tabekaumu neganai, idia ese oi danu be abidadama henimumu. w21.03 rau 4 par. 7

Tura namodia na e uramu edia lalohadai bona hemami bae herevalai hebou. Eda hetura karana Iehova ida be unu bamona, a? Oibe. Iehova na Baibul amo ita e hereva henidamu bona ena hemami bona lalohadai e hahedinaraimu. Ḡuriḡuri amo ia ta hereva heniamu, bona eda hemami bona lalohadai ta gwauraimu. Iehova na Turada lalokauna dainai, dia eda ḡuriḡuri mo e kamonaimu to e haerelaimu danu. Nega haida eda ḡuriḡuri haeredia na e heni haraḡamu. To, nega haida ḡau ta na ta ḡuriḡurilaia louloumu. Ta diba momokanimu nega korikorina bona dala maorona ai haerena be henimu. Momokani, Dirava ena haere na ita ta laloamu ḡauna amo be idaumu. Heḡereḡere, dia eda hahetoho iboudiai be kokidiamu, to aonega bona goada be henidamu baita “haheaukalaia” totona. (1 Kor. 10:13) Edena dalai baita hahedinaraia Dirava ena harihari ḡauna, ḡuriḡuri karana na ta laloa badamu? Dala ta na, Iehova ena hahekau dalana baita badinaia anina na baita ḡuriḡuri hanaihanai.​—1 Tes. 5:17. w20.05 rau 27-28 par. 7-8

Dala daudauna heau-heluluna ai e heaumu taudia na heau gabuna mo e itaiamu unu amo basie moru. Bema bae moru idia na ma be toreisimu bona ma be heaumu. Idia na e hahekwakwanaidiamu ḡaudia asie lalomu, to idia e laloa badamu ḡauna na dokona ai bae kau bona kwalimu ahuna bae abia. Eda heau-helulu ai, nega momo eda hereva bona kara kereredia daidiai baita morumu. Eiava ita ida ta heau heboumu taudia edia kara kereredia ese be hahisidamu. Unu na vaia bae vara ḡaudia. Ita iboudai na dia ḡoḡoevadadae, bona iboudai na mauri e lao heniamu dala hekahi-hekahina ai ta heaumu. Una dainai, ita na ta baita hahekwakwanaia dibamu, bona nega haida “ta ese bamona baine habadelaia” o baine maumau diba. (Kol. 3:13) To namona na e hahekwakwanaidamu ḡaudia na basita lalo, a vairadai ahuda namona baita laloa, bona dounu baita heau. Bema baita badumu bona Iehova ihesiai henina karana baita rakataniamu, ita na dokona ai na basita kaumu bona ahuda na basita abiamu. Bona una ese mauri e lao heniamu dala hekahi-hekahina ai e uramu bae raka taudia na be hahekwakwanaidiamu. w20.04 rau 26 par. 1; rau 28 par. 8-9

Peroveta tauna Daniel na taunimanima edia gavamani ese Dirava ena taunimanima e daḡedaḡe henidia karana e herevalaia. Idia na e gwauraidia auri kaivakuku badana kahana ta ta. Una kaivakuku aena palapalana na taunimanima edia gavamani ginigabena e herevalaiamu, ia na auri bona raro ida e miksia hebou ḡauna. Bona una ese tanobada gavamani goadana, Anglo-America e laulaulaia. Una peroveta herevana ese e hahedinaraiamu, Anglo-America na e lohiamu lalonai Dirava ena Basileia ese taunimanima edia gavamani iboudiai baine haoredia vaitani. Aposetolo Ioane ese Iehova ena taunimanima e dagedage henidiamu tanobada gavamani goadadia e herevalaidia danu. Ioane ena peroveta herevana ai, unu gavamani na daḡedaḡe animal kwarana hitu ese e laulaulaidia. Kwara ihahituna ese tanobada gavamani goadana Anglo-America e laulaulaia. Una na mai anina bada ḡauna badina una kwara ginigabena murinai ta ma basine lohiamu. Keriso bona ena guba tuari oreana ese daḡedaḡe ḡauna kahana orena ibounai be hadikaia oremu neganai, una daḡedaḡe ḡauna kwarana ihahituna na dounu be lohiamu.​—Apok. 13:1, 2; 17:13, 14. w20.05 rau 14 par. 11-12

Una hereva ese e hadibadamu ḡauna be ina: Dirava, mauri Badina, na lalokau Badina danu. Oibe, Iehova na ita e lalokau henidamu! Iena lalokau dainai ta dibamu ita na e gimadamu, ta moalemu bona ḡau ta ai asita dabumu. Kristen taudia na Baibul ena haheḡani dainai lalokau bae hahedinarai na mai anina bada. (Mat. 22:37-40) Iehova ta dibaia namonamomu neganai, ena haheḡani ginigunana baita badinaiamu na dia auka. Badina Iehova na ḡoevadae bona nega iboudiai ita e lalodamu bona e kara namo henidamu. To, reana haheḡani iharuana baita badinaiamu na auka. Dahaka dainai? Badina tadikakada​—ita dekeda taudia​—na dia ḡoḡoevadadae. Nega haida, reana edia hereva eiava kara ese ita be hahisidamu. Iehova na mai dibana ita na hekwakwanai unu bamodia baita davarimu dainai, Baibul e torea taudia haida e ḡaukaralaidia ita bae hadibada dahaka dainai bona edena dalai lalokau baita hahedinaraia na namo. Una toretore tauna ta na, aposetolo Ioane.​—1 Ioa. 3:11, 12. w21.01 rau 8 par. 1-2

Ena be harihari eiava laḡani daudau lalonai Iehova ta hesiai henia, namona na siboda baita henanadai: ‘Kara maorona ikarana totona Satana ena hedibaḡani na dadaraimu, a?’ Heḡereḡere, bema TV ai eiava intanet ai matabodaḡa laulauna ta be hedinaraimu bona una ese lalohadai dikadia na baine havara diba, oi be dahaka ba kara? Reana oi na haraḡa herea sibomu bo gwaumu, una laulau eiava muvi na dia ponografi laulauna. To, reana Satana na una dala e ḡaukaralaiamu oi baine dibaḡanimu totona, a? Una laulau na ira ida baita haheḡereḡerea, tau ta ese ira e ḡaukaralaiamu au ta baine siria totona. Matamanai, ia ese ira matana na au ai be hatubuamu. Ira na una gabu tamona ai be hatubua louloumu neganai, au na be pararamu. Matabodaḡa laulaudia be ira matana ida baita haheḡereḡereamu, a? Reana ta na be lalomu laulau unu bamodia na dia didika, to be ita louloumu amo gabeai ia na Iehova vairanai baine kara dika diba. Una dainai, kudoumu ai ḡau kereredia na basio lalo. To lalomu idoinai ida Iehova ladana ba matauraia. w20.06 rau 11-12 par. 14-15

Bema manoka taudia ta davaridiamu, namona na baita durudia bona baita hagoadadia loulou. Iesu ena parabole ai e boio merona heḡereḡerena, reana idia ese e mamiamu hisihisina na bada herea. (Luka 15:17-24) Bona Satana ena tanobada ai e davari ḡaudia daidiai, edia hetura karana Iehova ida na dia goada. Baita durudia edia abidadama Iehova enai bae hagoadaia totona. Iesu ese boio mamoena parabolena ai e hahedinaraia, mamoe inarina tauna ese mamoe na paḡanai e atoa bona e loulaia mamoe serina. Mamoe inarina tauna na ena nega bona goada e ḡaukaralai e boio mamoena baine davaria totona. To, e laloparara mamoe na baine loulaia ena seri, badina una mamoe na asi goadana sibona baine lou. (Luka 15:4, 5) Ita danu eda nega bona goada baita ḡaukaralai, manoka taudia baita durudia e hametaudiamu ḡaudia bae hanaidia totona. Iehova ena lauma, iena Hereva, bona pablikeisin idauidau amo baita durudia edia hetura karana Iehova ida bae hagoadaia totona. Una dainai, bema elda taudia ese oi e noimumu manoka tauna ta ba stadi henia, namona na una hahenamo na bavabia dae. w20.06 rau 28 par. 14-15

Ita ta ta ese Kristen lalokauna baita hahedinaraia. To danu ita ese “diba maoromaorona bona laloparara korikorina” baita abia na namo. (Fili. 1:9, NWT) Unu amo taunimanima edia ‘hahediba herevadia lai na heto, taunimanima edia kara gageva-gagevadia bona koikoidia’ bona aposteit karana danu ese basie hakauda kerere. (Efe. 4:14) Aposetolo edia negai, hahediba momo ese Iesu e rakatania neganai, aposetolo Petro na e abia dae herevana e gwauraia, eto, “mauri hanaihanai herevadia” na Iesu enai. (Ioa. 6:67, 68) Ena be una negai Petro ese unu hereva iboudiai na se lalopararalai, to Iesu e badinaiava badina Keriso sivaraina momokanina na mai dibana. Oi danu, Baibul ena hahediba herevadia ai emu abidadama ba hagoadaia. Bema unu bo kara tomamu, nega aukadia ai emu abidadama na be goadamu, bona ma haida bo durudiamu edia abidadama bae hagoadaia totona.​—2 Ioa. 1, 2. w20.07 rau 8 par. 2; rau 13 par. 18

Tadikaka taihu na hereva momokani ai bae noho totona, baita durudia dalana ta na, hebogahisi baita hahedinaraia. (1 Ioa. 3:10, 11, 16, 17) Namona na baita helalokau heheni, dia nega namodia ai mo, to hekwakwanai negadia ai danu. Heḡereḡere, oi mai dibamu ta na ena lalokau tauna ta e mase dainai, heduru bona tauhalo baine abia na namo, a? Eiava o kamonai tadikaka taihu haida na disasta ai edia kohu e haboio, bona e uramu edia Kingdom Hall eiava ruma bae haginidia lou, a? Dia eda hereva ai mo, to ḡau badana na eda kara amo baita hahedinaraia tadikaka taihu na ta lalokau henidiamu bona ta bogadia hisimu. Ma haida ediai lalokau ta hahedinaraiamu neganai, ita ese eda lalokau guba Tamana ta tohotohoamu. (1 Ioa. 4:7, 8) Lalokau baita hahedinaraia dalana ta na, dika baita gwautao heheni. Heḡereḡere, ta ese laloda be hahisiamu, to gabeai ma be gwaumu, sori. Lalokau baita hahedinaraia dalana na ena dika baita gwautao bona ena kerere na baita laloboio.​—Kol. 3:13. w20.07 rau 24 par. 14-15

Toreisi lou taudia ta ta be pablisa tamona ese be stadi heniamu, hari ta karaiamu heḡereḡerena, a? Idia be edena kongrigeisin be siaidia laomu, unu amo treinin bae abi bena idia ese tore isi lou taudia matamatadia bae stadi henidia? Una negai dahaka be varamu na do asi dibada namonamo. To, ita dibada ḡauna binai: Keriso ena Lohia Laḡanidia 1,000 bae ore neganai, “tanobada na Iehova idiba-maorona ai baine honu.” (Isa. 11:9) Unu laḡani 1,000 lalodiai, ita ese ḡaukara bada hereana baita moalelaiamu! Keriso ena Lohia Laḡanidia 1,000 lalodiai, ita ese Iehova baita hamoalea totona, sensi momo na dounu baita karamu. Unu amo tore isi lou taudia baita durudiamu neganai baita bogadiahisimu, badina idia ese sensi momo bae kara na namo, unu amo lalohadai kereredia o ura dikadia bae dadaraidia, bena Iehova ena taravatu iboudiai be badinadia namonamomu. (1 Pet. 3:8) Oibe, tore isi lou taudia ese danu be itaia dibamu, ita Iehova ena taunimanima danu ta hekwarahimu Iehova baita hamoalea bona baita tomadiho henia totona.​—Fili. 2:12. w20.08 rau 16 par. 6-7

Bema aposetolo Paulo ena sisiba baita badinaiamu bona siboda eda kara baita tahua namonamomu, reana baita davariamu ita danu mai eda harihari ḡaudia namodia haida. Heḡereḡere, ena be pletfom ai elda ta ese tok na se heni namonamomu, to reana ia ese e stadi henidiamu taudia be hahediba taudia ai e laomu. Eiava reana ia ese ena ḡaukara na se karaia ḡoevaḡoevamu, dia elda ma haida heḡereḡeredia, to ia na tadikaka bona taihu ese e lalokau heniamu, se gari heniamu, bona ia amo Baibul ena heduru e abimu. Eiava reana momo e gwaumu, ia na heabidae tauna. (Heb. 13:2, 16) Momokani, iseda goada bona harihari ḡaudia baita lalopararalaimu neganai, baita moalemu badina ta itaiamu kongrigeisin ai ita na mai eda ḡaukara. To, dia namo baita mama badina iseda tadikaka edia harihari ḡaudia be iseda amo e idau. Herevana kongrigeisin ai dahaka ḡaukara ta karamu, to namona na iboudai ese hesiai ḡaukara ikarana daladia baita hanamo. w20.08 rau 24 par. 16-18

Laḡani 1935 ai, Washington, D.C., U.S.A. ai, J. F. Rutherford ese hebou badana ta ai tok ladana, “Hutuma Bada Herea” e heni. Tadikaka Rutherford ese tok lalonai, Apokalupo 7:9 ai ina hereva, “hutuma bada herea” anina e gwauraia hedinarai. Unu negadiai, Bible Student na e laloava “hutuma bada herea” na guba baela oreana iharuana, to idia na Keriso ida basie lohia hebou dainai, una orea na basie gwauraia, hesiai tauna mai ena kamonai. To, Tadikaka Rutherford ese Baibul amo e hahedinaraia hutuma bada herea na guba basiela to idia na Keriso ena mamoe idaudia haida, bona “hisihisi badana” amo bae roho mauri, bona tanobada ai bae mauri hanaihanai. (Apok. 7:14) Iesu e gwauhamata, eto: “Lau na mai egu mamoe idaudia haida danu; idia na do dia ina maḡu lalonai. Idia danu do baina hakaudia mai, bena gadogu bae kamonai; bena seri baine tamona, ireḡudia tauna danu baine tamona.” (Ioa. 10:16) Unu mamoe idaudia na Iehova ena Witnes bona idia na tanobada Paradaisona bae noholaia ela bona hanaihanai.​—Mat. 25:31-33, 46. w21.01 rau 14 par. 1-2

Ita na baita boga auka bema ta uramu baita haheauka bona iseda ḡaukara baita haḡuḡurua. (Mat. 28:19, 20) Nega momo ita na ta uramu ḡau momo na dala haraḡadia ai baita kara. To nega haida, ḡau badadia ikaradia na mai hekwarahina. Una dainai, boga auka karana baita dibaia na namo. To, namona na tau ta ese ita baine duruda o baine hadibada, unu amo ita siboda ese ḡau ta baita karaia diba, ena be mai hekwarahina. Bona Iehova na lauma helaḡa amo una heduru be henimu. (Gal. 5:22, 23) Aposetolo Paulo na mai boga auka dibana. To, kara maorona baine karaia totona, ia na eto: “Sibogu tau-anigu na tutuamu.” (1 Kor. 9:25-27) Ia ese ma haida e hagoadadia boga auka karana bae dibaia, unu amo ḡau iboudiai bae ‘kara namonamo, bae kara ḡoevaḡoeva.’ (1 Kor. 14:40) Namona na ita ese boga auka karana baita dibaia, unu amo Iehova itomadiho henina karadia na basita hadoko, heḡereḡere hanaihanai sivarai namona baita harorolaia bona baita hahedibalaia.​—Apos. 2:46. w20.09 rau 6-7 par. 15-17

Hari tano momo ai, haroro ḡaukara na baita karaia dibamu. Emu tano be unuheto danu, a? Bema oibe, sibomu ba henanadai, ‘Lau ese ina freedom o maino negana be ede na ḡaukaralaia tomamu?’ Ina nega dokonai, tanobada ibounai, Iehova ena taunimanima edia haroro ḡaukara o hahediba ḡaukara na e bada e laomu, ḡuna na dia unu heto. Ina ḡaukara lalonai, ḡau momo baita kara diba. Oi ese maino negana be ede o ḡaukaralaia toma? (2 Tim. 4:2) Oi ese o laloamu oi eiava emu ruma tauna ta ese ina haroro ḡaukara, reana painia ḡaukara bo karaia dibamu, a? Hari, namona na moni bona kohu momo basita tahu​—hisihisi bada hereana ai, moni o kohu ese ita na basie hamauridamu. (Her. 11:4; Mat. 6:31-33; 1 Ioa. 2:15-17) Pablisa momo na gado matamatana ta e dibaiamu, unu amo haroro ḡaukara bona hahediba ḡaukara ai bae ḡaukaralaia diba. Dirava ena orea ese iseda buka na gado idauidau 1,000 mai kahana ai e halasimu. w20.09 rau 16 par. 9-11

Soldia namona ese biaguna e badinaiamu. Ia na be tuari goadamu e lalokau heniamu tauna o e laloa bada ḡauna baine gimaia totona. Paulo ese Timoteo e hagoadaia Dirava ibadinana karana mo baine goadalaia. (1 Tim. 4:7) Dirava e lalokau henia badamu bona e badinaiamu tauna ese hereva momokani na be dogoatao aukamu. (1 Tim. 4:8-10; 6:6) Namona na soldia namona ta ese treinin namona baine abia, unu amo be goadamu bona ena maduna be huaia namonamomu. Timoteo na lauma dalanai e goadava badina Paulo ena sisiba e badinaia, heḡereḡere ura dikadia iboudiai e heautanidia, kara namodia e ḡava, bona tadikaka taihu e bamodia. (2 Tim. 2:22) Momokani, treinin na mai anina bada. Ura dikadia ena tuari ai baita kwalimu totona, namona na treinin namona baita abia. (Roma 7:21-25) Danu, kara gunadia baita dadarai bona kara matamatadia baita kara totona, treinin namona baita abia. (Efe. 4:22, 24) Nega haida baita hesikumu danu, to baita hekwarahi hebou gabudia baitala, unu amo tadikaka taihu baita bamodia.​—Heb. 10:24, 25. w20.09 rau 28 par. 9-11

Stiuden ta duruamu baine goada ela bona baine bapatiso totona, namona na baita haheauka. To nega haida ita ta uramu baita tahua ḡauna ta bina: Ia e uramu Iehova Dirava baine hesiai henia o lasi. Oi ese o itaiamu stiuden be e uramu Iesu ena haheḡani iboudiai baine badinadia, a? Eiava ia be e uramu Baibul amo ḡau haida mo baine diba, a? Hanaihanai stiuden ena goada ba sekea. Heḡereḡere, ena hereva amo o dibamu ia na Iehova e lalokau heniamu, a? Ia ese Iehova e ḡuriḡuri heniamu, a? (Sal. 116:1, 2) Ia be mai moalena ida Baibul e duahiamu, a? Ia be hanaihanai hebou e laomu, a? (Sal. 22:22) Ia ese ena mauri dalana e haidaua, a? Ia e dibamu ḡaudia be ena ruma taudia bona turana ediai e herevalaimu, a? (Sal. 9:1) Ḡau badana binai, ia be e uramu Iehova ena Witnes ta ai bainela, a? (Sal. 40:8) Bema stiuden na ḡau ta se karaiamu, namona na hemataurai dalanai badina ba tahua, bena ba sisiba henia bona ba durua. w20.10 rau 18 par. 14-15

Dirava, Iosef, o Maria na hanaihanai Iesu ena abi hidi namodia e karava. To idia natudia, Iesu, e bada neganai, ia danu sibona abi hidi namodia e kara. (Gal. 6:5) Ita heḡereḡereda, ia danu mai ena maoro sibona abi hidi baine kara diba. Reana ia ese sibona ena ura ḡauna bema abia hidi guna. To lasi, ia ese Iehova itura henina karana e abia hidi. Iesu ese Iehova ena ura e dibaia, e abia hidi bona e badinaia. (Ioa. 6:38) Iesu dibana ia na momo ese bae inai henia, bona reana una na e lalohekwarahilaia bada herea. To, ia ese Iehova ibadinana karana e abia hidi. Laḡani 29 C.E. ai, Iesu e bapatiso neganai, iena ura badana na Iehova ena ura baine karaia. (Heb. 10:5-7) Bona satauro ai, Iesu na dounu Tamana ena ura e badinaia ela bona e mase.​—Ioa. 19:30. w20.10 rau 29 par. 12; rau 30 par. 15

Emu kongrigeisin ai, gorere, mase, eiava hekwakwanai haida daidiai e lalometaumu tadikaka eiava taihu haida mai dibamu, a? Bema oibe, namona na Iehova baita noia ita baine duruda eda hereva bona kara amo hebogahisi baita hahedinaraia. Momokani, eda hereva bona kara amo eda tadikaka taihu baita hagoadadia diba. (1 Pet. 4:10) To nega unu bamodiai baita lalogoada, badina mai dibada Iehova na ita ida. Ia ese Iesu bona aneru e ḡaukaralaidiamu ita baine duruda totona. Danu, Iehova ese siahu taudia baine ḡaukaralaidia diba ita bae duruda. Bona ita momo ese ta mamiamu heḡereḡerena, Iehova ese ena lauma helaḡa e ḡaukaralaiamu iena hesiai taudia kudoudia baine hamareredia, unu amo edia Kristen tadikaka bona taihu bae durudia. Una dainai, aposetolo Paulo heḡereḡerena baita gwa diba: “[Iehova] be egu hekaha, Lau na basina gari; Taunimanima ese ede bae hadikagu toma?”​—Heb. 13:6. w20.11 rau 17 par. 19-20

Aposetolo taudia dibadia Iehova na idia e durudiava. Ia ese siahu e henidia hoa karadia bae kara totona. (Apos. 5:12-16; 6:8) Hari, ita na hoa karadia basita kara dibamu. Baibul amo, Iehova etomu, bema kara maoromaoro dainai hisi baita ani, ia na ita edai be moalemu bona ena lauma helaḡa amo be durudamu. (1 Pet. 3:14; 4:14) Una dainai, gabeai daḡedaḡe lalonai dahaka baita kara na basita warilaia momo. To ḡau badana na, hari ina negai Iehova baita abidadama henia bona ia ese baine duruda bona baine hamaurida dalana baita lalohadailaia. Namona na Iesu ena gwauhamata baita abidadama henia, eto: “Lau ese hereva bona aonega baina henimui, bena inaimui iboudiai ese igwau-tubumui bona ilao-ahumui basie goada.” Ia ma eto: “Emui haheauka dainai laumamui do bae mauri.” (Luka 21:12-19) Ba laloatao, ena be ta na hesiai ḡaukara baine goadalaia ela bona baine mase, to iena ḡaukara maraḡidia bona badadia na Iehova ese basine lalo boiomu. Una dainai, Dirava ese una hesiai tauna na mase amo be hatorea isi loumu. w21.01 rau 4 par. 12

Dia Paulo mo, to idaunegai e nohova abidadama tauna Iobu danu toreisi lou helarona e herevalaia. Iobu na e abia dae vaitani Dirava ese ia na be laloataomu bona mase amo be hatorea isi loumu. (Iobu 14:7-10, 12-15) Kristen taudia ese e abi daemu hahediba herevadia amo “mase ihatore-isidia” herevana na hahediba hereva badana ta. (Heb. 6:1, 2) Paulo ese toreisi lou helarona na 1 Korinto karoa 15 ai e herevalaia. Ia e tore herevadia ese Kristen ginigunadia na e hagoadadia. Ena be laḡani momo toreisi lou helarona o abia dae, to una karoa ese be hagoadamumu bona bo abia daemu una helaro na be vara momokanimu. Iesu Keriso e toreisi lou dainai ta abia daemu, eda lalokau mase taudia na bae toreisi lou. Una na Paulo ese Korinto taudia ediai e gwauraia ‘sivarai namona’ ta. (1 Kor. 15:1, 2) E hamaorodia, bema Kristen tauna ta na toreisi lou helarona basine abia dae, ena abidadama na asi anina.​—1 Kor. 15:17. w20.12 rau 2 par. 2-4

Dahaka ese aposetolo Petro e durua baine goada lou? Petro na e lalo lou, Iesu na ia dainai e ḡuriḡuri ena abidadama basine manoka totona. Iehova ese Iesu ena ḡuriḡuri na e haerelaia. Gabeai, Iesu na Petro enai e hedinarai bona e hagoadaia. (Luka 22:32; 24:33, 34; 1 Kor. 15:5) Aposetolo haida na e haoda daba rere to gwarume ta asie abi dainai e lalohisihisi, una negai Iesu na idia ediai e hedinarai. Bena Iesu ese Petro e nanadaia bema ia ese Iesu e lalokau heniamu. Iesu ese turana namona Petro ena dika e gwaua tao bena ḡaukara ma haida e henia. (Ioa. 21:15-17) Iesu ese Petro e kara henia dalana amo hebogahisi e hahedinaraia, bona Iesu na Tamana e tohotohoa ḡoevaḡoeva. Una dainai kerere ta karamu neganai, basita laloa Iehova ese eda dika na basine gwautao dibamu. Baita helalotao Satana na e uramu unu baita lalo toma. Iehova ese ita ta ta e lalokau henidamu bona eda goada hetoana na mai dibana, bona ia na e uramu eda dika baine gwautao. Bona haida ese e hahisidamu neganai namona na Dirava baita tohotohoa.​—Sal. 103:13, 14. w20.12 rau 20-21 par. 17-19

Haida be e gari bona Iehova asie abidadama henia, bona edia sivarai ese ita e hadibadamu danu. Idia edia sivarai baita stadilaimu neganai be durudamu, edia kara basita tohotoho totona. Heḡereḡere, King Asa na matamanai hekwakwanai lalodiai Iehova e tahuava. To gabeai, Asa na e ura ia sibona ena ura dalana ai hekwakwanai baine hamaoromaoro. (2 Sis. 16:1-3, 12) Reana taunimanima na be gwaumu, ‘Asa ena plan na namo herea badina ia na Suria taudia e noidia, bae durua Israel taudia baine halusidia.’ To, Iuda ena maino na se mia daudau. Peroveta tauna amo Iehova ese Asa e hamaoroa: “Suria pavapavana enai o hetao kaumu a Iehova, emu Dirava, enai so hetao kaumu dainai, Suria pavapavana ena tuari oreana na oi imamu amo vada e roho mauri.” (2 Sis. 16:7) Ita danu nahuada baita toho, hari be baita laloamu siboda na heḡereḡere hekwakwanai baita hamaoromaoro dainai, Iehova ena Hereva amo heduru basita tahumu. Bona ena be disisen ta baita karaia haraḡamu, to basita gari bona Iehova baita abidadama henia na namo, badina ia ese be durudamu baita kwalimu totona. w21.01 rau 6 par. 13-15

Harihari, Iehova ena taunimanima haida na e hitolomu badina moni amo aniani bae hoi na dia heḡereḡere, o tuari daidiai hekwakwanai momo e varamu. Haida be edia tomadiho karadia daidiai dibura ai e atodiamu. To, hutuma bada herea na e moalemu badina dibadia ina nega dikana baine ore neganai, Iehova ese hahekau herevadia bona aniani momo herea na idia be henidiamu ela bona hanaihanai. Hutuma bada herea na “siahu ta ese basine raradia” anina na, Iehova ese idia baine gimadia to Satana ena bese be baine haoredia vaitani. Hisihisi bada hereana amo roho mauri taudia na Iesu ese “e lohilohimu ranudia mauridia badidiai baine hakaudia” lao, anina na mauri hanaihanai baine henidia. (Apok. 7:17) Mani a laloa, hutuma bada herea na basie masemu. Momokani, tanobada ai taunimanima bilion momo herea na be maurimu ela bona hanaihanai! (Ioa. 11:26) Hutuma bada herea na una helaro namona dainai Iehova bona Iesu bae tenkiu henidia na namo! w21.01 rau 16-17 par. 11-12

Iesu ena hanuaboi ginigabena ai, ia na ena hahediba ese bae davari hekwakwanaidia e lalodiava. Ia ese turana e lalokau henidiava dainai, Tamana e noia “dika tauna ena amo baine hamauridia.” (Ioa. 17:14, 15) Iesu na mai dibana guba bainela murinai, Satana Diabolo na be uramu Iehova e hesiai heniamu taudia baine tuari henidia. Una dainai, Iehova ena taunimanima ese heduru bae abi na namo. Hari Iehova ena hegima baita abia na namo, dia guna heḡereḡerena. Satana na guba amo e tahoa dobi dainai “e badu dikadikamu.” (Apok. 12:12) Ia ese haida lalodia e animu, unu amo bae laloa e daḡedaḡe henidamu karana na ‘Dirava isiaina e lao henimu’ karana ta. (Ioa. 16:2) Ma haida, Dirava asie abia daemu taudia, ese e daḡedaḡe henidamu badina tanobada amo ita na ta idaumu. Herevana dahaka badi dainai ta hisihisimu, to baita lalogoada diba. Dahaka dainai? Badina haerena na hari dina ena siri ai. w21.03 rau 26 par. 1, 3

Iehova na lalokau ai ḡau iboudiai e kara. Ia ese e lalokau henidamu dainai eda dabu ḡaudia iboudiai e henimu. Iehova na lalokau dainai mauri davana e karaia. Bona Iesu ese e lalokau henida bada dainai ena mauri e heni. (Ioa. 3:16; 15:13) Iehova bona Iesu ese idia e badinadiamu taudia ediai e hahedinaraia lalokauna na ḡau ta ese basine hadikaia diba. (Ioa. 13:1; Roma 8:35) Una heḡereḡerena, namona na ruma bese kwarana ese lalokau ai ḡau iboudiai baine kara. Dahaka dainai una na mai anina bada? Aposetolo Ioane eto: “Tadikakana, e itaiamu tauna, na basinema ura henia, se itaiamu Diravana ede bema ura henia toma?” (1 Ioa. 4:11, 20) Ena ruma bese e lalokau heniamu bona e uramu Iehova bona Iesu baine tohotohodia tauna ese ena ruma bese be duruamu Iehova bae hetura henia, edia hemami be lalomu, bona edia dabu ḡaudia be henimu. (1 Tim. 5:8) Natuna be hadibadiamu bona be sisiba henidiamu. Danu be hekwarahimu Iehova ihanamona bona ena ruma bese baine durudia diba abi hididia be karamu. w21.02 rau 5 par. 12-13

Eda lalokau guba Tamana na mai dibana guna edai e vara ḡau dikadia daidiai, lalohadai kereredia baita abimu. To Dirava ese eda kara namodia na e itamu, ena be ita siboda ese unu na asita itamu. (1 Ioa. 3:19, 20) Ta na e uramu e manadalaia karana ta baine hadokoa. To una kara ma e karaia loumu neganai e lalohisihisimu. Oibe, ta kara dikamu neganai, eda hemami na e dikamu. (2 Kor. 7:10) To, dia namo una kerere mo baita laloa bena baitato: ‘Lau na dia heḡereḡere kara maorona ta baina karaia. Iehova ese egu dika na basine gwau taomu.’ Una na dia momokani, bona una lalohadai kererena dainai eda hesiai ḡaukara baine hadikaia diba. To, ḡuriḡuri amo Iehova ida ba “hereva hebou,” bona ba noia emu dika baine gwautao. (Isa. 1:18) Iehova na be itaiamu oi na mai kudoumu ibounai ida o helalo-kerehai neganai emu dika be gwautaomu. Danu, elda ba hereva henidia. Idia na mai lalokaudia ida oi be durumumu ba goada lou totona.​—Iak. 5:14, 15. w20.12 rau 23 par. 5-6

Iesu ese ha’hine na e matauraidiamu. Ia ese Farisea taudia na se tohotohodiava​—Farisea taudia ese ha’hine na ḡau ta ai asie halaodiava, o pablik ai ha’hine na asie hereva henidiava, o ha’hine ida Dirava ena Hereva na asie herevalaia hebouva. To, Iesu ese hereva momokani badadia na ha’hine bona tatau ida e herevalai hebouva. (Luka 10:38, 39, 42) Ia ese haroro ḡaukara e karaiava negadiai, ha’hine ese danu ia na e bamoava. (Luka 8:1-3) Bona Iesu ese ha’hine amo aposetolo e hadibadia ia na mase amo e tore isi. (Ioa. 20:16-18) Aposetolo Paulo ese Timoteo e hadibaia ha’hine baine matauraidia. Paulo na mai dibana Timoteo na sinana bona tubuna hahinena ese “revareva helaḡadia” amo e hadibaia guna. (2 Tim. 1:5; 3:14, 15) Paulo ese Roma taudia e tore henidia neganai, ia ese taihu ladadia e tore hedinarai bona e hanamodia. Bona ia ese taihu edia ḡaukara namodia dainai e tenkiu henidia.​—Roma 16:1-4, 6, 12; Fili. 4:3. w21.02 rau 15 par. 5-6