June

Iehova ese Kristen ginigunadia na e hanamodia, ena be edia mauri na e auka, to mai moaledia ida ia e hesiai henia. Idia na nega momo daḡedaḡe e davari, nega haida unu na idia asie laloa negana ai e vara. Banaba bona aposetolo Paulo na Lustera ai e harorova lalonai e vara ḡauna mani aita laloa. Matamanai, kamonai taudia ese idia na e abidia dae. To gabeai, daḡedaḡe taudia ese ‘hutuma lalodia e ani’ bona idia haida ese Paulo na nadi amo e hodoa bona e rakatania baine mase. (Apos. 14:19) To, Banaba bona Paulo na ma gabu haida ai dounu e haroro. Bena dahaka namo e vara? Momo na Iesu ibadinana taudia ai ela bona edia hereva bona haheitalai ese tadikakadia e hagoadadia. (Apos. 14:​21, 22) Ena be Paulo bona Banaba na daḡedaḡe e davari, to haroro ḡaukara na asie hadokoa, una dainai momo e durudia. Bema Iehova ese e henida ḡaukaradia baita karamu, ia ese ita na be hanamodamu. w23.04 rau 16-17 par. 13-14

King David na iena mauri lalonai inaina na momo bona nega momo ia ese Iehova ena heduru e noiava. David na e diba momokani Iehova ese ena ḡuriḡuri e kamonai bona e haerelai. Oi danu unu bavabidadama toma. Baibul ese e hadibadamu, Iehova ese aonega bona goada na be henidamu baita haheauka totona. Ia ese tadikaka taihu bona ia asie tomadiho heniamu taudia danu baine ḡaukaralaidia diba dala haida ai bae duruda. Ena be Iehova na dia hanaihanai ita ta lalomu dalanai eda ḡuriḡuri e haerelaimu, to ta dibamu ia ese na be haerelaimu. Ia ese nega korikori ai heduru maorona be henidamu. Una dainai abidadama ai ba ḡuriḡuri, bona bavabia dae Iehova ese hari oi na be narimumu bona tanobada matamatana ai “mauri ḡaudia iboudiai” edia ura ḡaudia na be henimu.—Sal. 145:16. w23.05 rau 8 par. 4; rau 13 par. 17-18

Emu tahua ḡauna ihaḡuḡuruna ena namo baita lalodia na namo. Oi be ededia hahenamo ba lalodia diba? Bema oiemu tahua ḡauna na Baibul ba duahia eiava ba ḡuriḡuri, unu ese emu hetura karana Iehova ida baine hagoadaia daladia ba lalo. (Sal. 145:​18, 19) Bema oiemu tahua ḡauna na Kristen kara namona ta ba hahedinaraia, una ese emu hetura karana ma haida ida baine hanamoa dalana ba laloa bada. (Kol. 3:14) Namona na emu tahua ḡauna o uramu ba haḡuḡurua badidia idauidau ba toredia diho, bona hanaihanai una list ba sekea. Danu, tahua ḡauna ihaḡuḡuruna ai bae hagoadamu taudia ba bamodia. (Her. 13:20) Vaia, dina haida ai ita na asita uramu ḡau ta baita karaia. Una anina be eda tahua ḡauna vada basita haḡuḡuru diba, a? Lasi. Eda tahua ḡauna baita haḡuḡurua. Ena be una na auka, to eda tahua ḡauna baita haḡuḡuruamu neganai baita moalemu. w23.05 rau 27-28 par. 5-8

Bema baita abia daemu ita na ta kerere, una ese be durudamu eda kerere baita gwaurai hedinaraimu, eda kara baita hamaoromaoromu, bona una kerere na basita karaia loumu. Unu baita kara tomamu neganai, mauri ena heau-helulu lalonai dounu baita heaumu. Bema oi na abi hidi kererena ta o karaia, dahaka ba kara diba? Emu nega bona goada na basio haorea emu maoro ba hahedinaraia totona, eiava gwau na ma haida basio henidia. To, bavabia dae oi na kerere bona harihari ba kara ḡaudia ba lalodia. Bema o karaia kererena dainai o lalohisihisimu, mai manaumu ida Iehova ba ḡuriḡuri henia, emu kerere ba gwauraia hedinarai, bona ba noia emu dika baine gwautao. (Sal. 25:11; 51:​3, 4) O hahisidia taudia ba sori henidia, bona elda edia amo heduru ba tahu. (Iak. 5:​14, 15) O karaia kererena amo diba bavabi bona basio karaia lou. Unu iboudiai bo karamu neganai, Iehova ese be bogamu hisimu bona be durumumu.—Sal. 103:​8-13. w23.08 rau 28-29 par. 8-9

King Iehoasa na Iehoiada ese e durua taunimanima namona ai bainela. Una dainai, king na matamatana negana ai e urava Iehova baine hamoalea. To Iehoiada e mase murinai, Iehoasa ese aposteit lohiadia e kamonai henidia. (2 Sis. 24:​4, 17, 18) Iehova na se moale bona “ia ese peroveta taudia na bogaraḡidiai e siaidia lao, . . . bae haloudia totona . . . to asie kamonai.” Idia ese Iehoiada natuna Sekaria danu asie kamonai henia; Sekaria na Iehova ena peroveta tauna, hahelaḡa tauna, bona Iehoasa ena kasen. King Iehoasa ese Sekaria na e hamasea. (2 Sis. 22:11; 24:​19-22) Iehoasa ese Iehova igari henina karana na se hahedinaraia. Iehova na eto: “E dadaraigumu taudia na basina lalodia bada.” (1 Sam. 2:30) Suria tuari orea maraḡina ese Iehoasa ena “tuari oreana bada-hereana” e hadarerea bona ia na “mai bero bada-hereana” ida e rakatania. (2 Sis. 24:​23-25) Iehoasa na ena hesiai taudia ese e hamasea badina ia ese Sekaria e alaia. w23.06 rau 18-19 par. 16-17

Aposetolo Paulo na Efeso ai e noho, haroro bona hahediba ḡaukarana e karaia. (Apos. 19:​1, 8-10; 20:​20, 21) Ia ese tadikaka taihu na e lalokau henidia bada dainai e urava baine durudia Iehova bae badinaia. Efeso taudia na hereva momokani do se dibaia neganai, idia na tomadiho koikoi lalohadaidia bona meamea karadia ese e biagudiava. Efeso ai taunimanima momo na kara bodaḡadia bona hemarai karadia e karava. Una siti ena theater bona tomadiho ariadia lalodiai hereva mirodia momo e gwauraiva. (Efe. 5:3) Idia momo na ‘mami ta asie abiva,’ anina na asie hemaraiva. (Efe. 4:​17-19) Iehova ena kara maoromaoro taravatudia do asie diba neganai, lalodia mamina ese se hahemaoro henidiava. Una dainai Paulo ese idia na ini e gwauraidia toma: “Lalodia na didibura; Dirava ena mauri ai idia na asi ahudia, edia mata-lahui bona edia lalo-duhu daidiai.” To, Efeso taudia haida ese dibura karadia na e rakatani. w24.03 rau 20 par. 2, 4; rau 21 par. 5-6

Gideon na ena hahemaoro ḡaukarana ai baine goada na namo. Midian taudia na hanuaboi ai tuari lalonai e heau neganai, Gideon ese e ḡavadia Iesrele kourana amo ela bona Ioridane Sinavaina. (Hah. 7:22) To Gideon be Ioridane amo de lou, a? Lasi! Ena be ia bona ena tatau 300 na e hesiku, to Ioridane e hanaia bona dounu Midian taudia e ḡavadia ela bona e davaridia, bona e hadareredia. (Hah. 8:​4-12) Gideon na e abidadama Iehova ese goada baine henia, bona unu e vara toma. (Hah. 6:​14, 34) Nega ta, Gideon bona ena tatau na Midian pavapavadia rarua e hahavadia aedia amo, a unu pavapava be kamelo ai e gui. (Hah. 8:​12, 21) To, Dirava ese Gideon bona ena tatau e durudia dainai, idia na e kwalimu. Elda taudia danu Iehova enai bae tabekau, badina ia na “tauna se manorimu, se boeramu” Diravana. Ia ese idia na goada be henidiamu.—Isa. 40:​28, 29. w23.06 rau 6 par. 14, 16

Laloda na baine goada bona Dirava baita badinaia, herevana dahaka hahetoho baita davari. Una dainai Iehova bavabidadama henia. Mani Barak ese Iehova ena hahekau dalana e badinaia dainai e kwalimu dalana aita laloa. Ena be Israel taudia na asi edia kesi bona io, to Iehova ese Barak e hamaoroa Kanaan edia tuari biaguna Sisera mai ena orea ida baine hatuari henidia, unu Kanaan taudia na mai edia tuari kohudia momo. (Hah. 5:8) Peroveta hahinena Debora ese Barak e hamaoroa ororo amo baine diho taora kahana bena Sisera bona ena kariota 900 baine tuari henidia. Ena be Barak na mai dibana Israel taudia ediai na be aukamu taora ai e heau haraḡamu kariotadia bae tuari henidia, to ia ese Iehova ena hereva e badinaia. Tuari taudia na Taboro Ororona amo e diho neganai, Iehova ese medu bada herea e hadihoa. Sisera ena kariota na kopukopu ai e hepuni, bena Iehova ese Barak e durua e kwalimu. (Hah. 4:​1-7, 10, 13-16) Una heḡereḡerena, bema Iehova enai baita tabekaumu bona ena orea amo e henidamu hahekau daladia baita badinamu, ita danu baita kwalimumu. w23.07 rau 19 par. 17-18

Baita haheauka na mai anina bada bema ta uramu baita mauri. Idaunegai abidadama taudia heḡereḡeredia, namona na mai haheaukada ida Dirava ese ena gwauhamata baine haḡuḡuru negana baita naria. (Heb. 6:​11, 12) Baibul ese ita na biru tauna ta ida e haheḡereḡereda. (Iak. 5:​7, 8) Biru tauna na e ḡaukara goadamu uhe e hadomu bona e dairimu, to asi dibana edena negai be tubumu. Una dainai, ia na mai haheaukana ida e narimu, badina dibana uhe anidia na be hekaramu. Una heḡereḡerena, eda hesiai ḡaukaradia ai baita ḡaukara goada na namo, ena be eda “Lohiabada bainema negana” na asi dibada. (Mat. 24:42) Namona na mai haheaukada ida baita nari, bona baita abia dae Iehova na ena nega korikori ai ena gwauhamata iboudiai be haḡuḡurumu. Bema basita haheaukamu, baita hesikumu bena taina ruana Iehova baita rakataniamu. Bona harihari bae hamoaleda ḡaudia baita ura henimu. To bema baita haheaukamu ela bona dokona, baita maurimu.—Mika 7:7. w23.08 rau 22 par. 7

Una peroveta herevana Daniel 2:​41-43 ai bona Daniel bona Apokalupo bukadia ese e perovetalai herevadia ma haida baita haheḡereḡerediamu neganai, baita lalopararamu unu ae palapaladia ese Anglo-America e laulaulaia, bona hari ina negai ia na tanobada ai e lohiamu gavamani goadana o world power. Daniel ese una world power e herevalaia neganai, eto: “Basileia kahana baine goada bona kahana baine makohi kava.” Dahaka dainai baine makohi kava? Badina raro manokana ese e laulaulaia taudia edia gwau-edeede karadia daidiai, Anglo-America ena lohia siahuna na e hamanokaiamu. Daniel ese kaivakuku anina e herevalaia amo mai anidia bada hereva momokanidia haida ta dibamu. Ginigunana na, Anglo-American World Power na dala haida ai e hahedinaraiamu ia na mai goadana. Heḡereḡere, ia na World War I bona World War II ai e kwalimu. To, una World Power na manoka badina ena taunimanima na sibodia e hetuari hehenimu. Iharuana na, Dirava ena Basileia ese taunimanima edia gavamani iboudiai do se haoredia lalonai, Anglo-America na baine lohia gavamani orena. w23.08 rau 10-11 par. 12-13

Nega haida, David na e davariva hekwakwanaidia daidiai e lalohekwarahiva. (Sal. 18:​4,5) To, Iehova ena lalokau bona henari karana dainai lalona na e goadava. Iehova ese turana David na “rei manoka-manoka gabudia ai” bona “deḡedeḡerahu gabuna ranudia badibadidiai” e hakaua lao. Una dainai, David na e goada lou bona mai moalena ida Iehova e hesiai henia. (Sal. 18:​28-32; 23:2) Hari ina nega ai danu “Iehova ena mia-hanaihanai lalokauna na se oremu,” una dainai hahetoho bona hekwakwanai lalodiai ita na ta goadamu. (Roh. 3:22; Kol. 1:11) David na ena mauri bema haboioa diba bona ia inaina na mai goadadia bona momo herea. To dibana Iehova ese ia na e lalokau heniava bona una ese ia na e gimaia. Nega idauidau ai e mamia Iehova na ia ida bona e lalo goada. Una dainai ena ane ai eto: “Iehova na . . . egu gari idoidiai lalodia amo e hamaurigu.” (Sal. 34:4) Ena be David na nega haida e gariva, to dibana Iehova ese ia na e lalokau heniava dainai dika garina se gari. w24.01 rau 30 par. 15-17

Ioasa ena abi hidi kereredia amo diba bavabi. Hahelaḡa Tauna Badana Iehoiada e mase murinai, Ioasa na bamo kereredia e abidia hidi. (2 Sis. 24:​17, 18) Ia ese Iuda lohiadia—Iehova asie lalokau heniava taudia—edia sisiba e kamonai. Reana bo lalomu Ioasa ese idia na basinema bamodia badina edia kara na dia namo. To, ia na idia edia sisiba kereredia e badinadia. Iena kasen Sekaria na e ura ia baine durua neganai, ia ese e hamasea. (2 Sis. 24:​20, 21; Mat. 23:35) Una na kara dika rohorohona! Matamanai Ioasa na king namona ta, to gabeai aposteit bona ala-ala tauna ai ela. Bena se daudau, ia na ena hesiai taudia ese e hamasea. (2 Sis. 24:​22-25) Una na basinema vara bema ia na Iehova bona Iehova e lalokau henia taudia dounu bema kamonai henidia. w23.09 rau 9 par. 6

Iesu na e diba aposetolo Petro ese ia na dounu baine badinaia. Una dainai e hamaoroa, eto: “Basio gari.” Iesu ese Petro na e abidadama henia bona una ese Petro na e durua bada. Gabeai Petro bona tadina Andrea na edia haoda bisnes e rakatani bena Iesu murinai e raka, bona Iehova ese dala momo ai e hanamodia. (Mar. 1:​16-18) Petro na Keriso e badinaia dainai hahenamo momo e abi. Heḡereḡere, Iesu ese gorere taudia e hanamodia, demoni e luludia, bona mase taudia e hatoredia isi lou karadia na e ita. (Mat. 8:​14-17; Mar. 5:​37, 41, 42) Danu, Petro na matahanai ta ai Iesu na vaira negai Dirava ena Basileia ena King ai ela hairaina e itaia, bona una na se laloaboio. (Mar. 9:​1-8; 2 Pet. 1:​16-18) Petro ese unu na basinema itadia diba bema Iesu basinema badinaia. Petro na ena lalohadai kereredia e dadarai bona e abi hahenamo daidiai e moale. w23.09 rau 21 par. 4-5

Aposetolo Petro ena revareva ginigunana ai e hahedinaraia, baita helalokau hehenimu neganai ita ese dia kara dika haida mo, to kara dika momo baita gwautaomu. (1 Pet. 4:8) Petro na Iesu ese laḡani momo gunadia ai dika igwautaona karana ai e hadibaia herevana na e laloa lou. Una nega ai, Petro na e laloava bema tadikakana edia dika na nega 7 baine gwautao, una na kara namona. To, Iesu ese ia bona ita danu e hadibada, tadikakada edia dika na nega 77 baita gwautao, anina na asi hetoana. (Mat. 18:21) Bema oiemu ai na e aukamu una sisiba ba badinaia, basio lalomanoka. Iehova ena hesiai taudia na dia ḡoḡoevadae dainai, nega haida na e aukamu dika bae gwautao. To ḡau badana na baita hekwarahi tadikakada edia dika baita gwautao bona baita herohemaino. w23.09 rau 29 par. 12

Iona na gwarume bogana lalonai neganai, ia na e helalokerehai bona mai manauna ida Iehova e ḡuriḡuri henia, una dainai e diba Iehova ese baine haere henia bona Iehova ese ia na baine durua. Gabeai, Iehova ese e hamauria neganai, Iona na vada heḡaeḡae Iehova ena amo baine abia ḡaukarana ma ta baine haḡuḡurua. (Iona 2:10–3:4) Hekwakwanai ta dainai o lalohekwarahimu neganai, Iehova enai emu hemami igwauraina be auka, a? Eiava o hemamimu asi goadamu sibomu emu stadi ba karaia, a? Ba helalotao Iehova ese oiemu hekwakwanai na e lalopararalaiamu. Ena be ḡuriḡuri kwadoḡina ta bo gwauraiamu, to bavabia dae Iehova ese oi na be durumumu. (Efe. 3:20) Bema gorere dainai ba duahiduahi o ba stadi na auka, reana Baibul bona Baibul pablikeisin edia odio rekodin ba kamonai. Danu reana jw.org ai ane ta ba hakalaia eiava vidio ta ba itaia diba. Iehova bo ḡuriḡuri heniamu bona ia ese e henimu heduru daladia ai iena haere bo tahuamu neganai, ia ese be hagoadamumu. w23.10 rau 13 par. 6; rau 14 par. 9

Kalaga helaḡana bona gabeai Ierusalem ai e haginia dubu helaḡa lalona kahadia na heḡereḡere. Daiutudia na rua—“helaḡa gabuna” bona “helaḡa herea gabuna”—bona ketin ta ese e hapararadia. (Heb. 9:​2-5; Eso. 26:​31-33) Helaḡa Gabuna lalonai na golo amo e karaia lamepa patana, muramura mai bonadia bae gabu patana, bona parao helaḡana bae atoa teibolona. Bona “e horodia . . . hahelaḡa taudia” mo una helaḡa gabuna ai bae vareai diba bena edia ḡaukara bae kara. (Num. 3:​3, 7, 10) Helaḡa Herea Gabuna lalonai na golo amo e karaia taravatu mauana; una maua ese Iehova ena noho e laulaulaia. (Eso. 25:​21, 22) Hahelaḡa tauna badana na Dika Igwautaona (Atonement) Dinana ai mo una Helaḡa Herea Gabuna ai baine vareai diba. (Lev. 16:​2, 17) Ia na una helaḡa herea gabuna ai animal raradia e vareailaiava, ia sibona bona Israel besena ibounai edia dika igwautaodia totona. Gabeai, Iehova ese una kalaga helaḡana lalona kohudia ese e laulaulai ḡaudia e hahedinarai.—Heb. 9:​6, 7. w23.10 rau 27 par. 12

Nega momo Dirava ena Hereva ese e haḡanidamu baita “helalokau heheni.” (Ioa. 15:12; Roma 13:8; 1 Tes. 4:9; 1 Pet. 1:22; 1 Ioa. 4:11) To lalokau na kudou amo e varamu karana, bona taunimanima ese ita kudouda na se itaiamu. Una dainai, edena dala ai haida na bae diba ita na idia ta lalokau henidiamu? Eda hereva bona kara amo be dibamu. Ita ese dala idauidau ai baita hahedinaraia tadikaka taihu na ta lalokau henidiamu. Dala haida na ini: “Ba hereva heheni mai momokanimui ida.” (Sek. 8:16) “Ba noho hebou mai mainomui ida.” (Mar. 9:50) “Ba hemataurai heheni.” (Roma 12:10) “Ba heabi-dae heheni.” (Roma 15:7) Nega iboudiai “emui dika ba hegwau tao heheni.” (Kol. 3:13) “Umui ta ta emui maduna ba hehua heheni.” (Gal. 6:2) “Ba hahegoada heheni.” (1 Tes. 4:18) “Ba hahealo heheni.” (1 Tes. 5:11) Bona “ta ta bamomui daidiai ba ḡuriḡuri.”—Iak. 5:16. w23.11 rau 9 par. 7-8

Dina ta ta ai, baita kara abi hididia daidiai eda abidadama baita hagoadaia na namo. Heḡereḡere, ta karamu abi hidi haida na hebamo, moale karadia, edukeisin, headava, natu bona moni ḡaukara. Reana siboda baita henanadai: ‘Egu abi hidi ese e hahedinaraiamu na abia daemu ina nega oromana na be oremu bona Dirava ena tanobada matamatana na kahirakahira be varamu, a? Eiava egu abi hidi na asi edia helaro taudia edia heḡereḡerena, a?’ (Mat. 6:​19, 20; Luka 12:​16-21) Bema ta abia daemu tanobada matamatana na kahirakahira be varamu, una ese be durudamu abi hidi namodia baita karamu. Hekwakwanai negadiai danu eda abidadama baita hagoadaia na namo. Reana daḡedaḡe, gorere badana, eiava ḡau ma haida ese laloda bae hamanoka diba. Reana matamanai baita lalomu unu na baita haheaukalai dibamu. To bema unu hekwakwanai na se oremu, namona na eda abidadama baita hagoadaia, unu amo baita haheauka bona mai moaleda ida Iehova baita hesiai henia hanaihanai.—1 Pet. 1:​6, 7. w23.04 rau 27 par. 4-5

Iehova na e uramu ita na eda ḡuriḡuri heḡereḡerena baita kara. Haheitalai na ina, tadikaka ta na Iehova e noia baine durua ena moni ḡaukara amo baine holidei, unu amo rijinol hebouna ta bainela diba. Iehova ese ena ḡuriḡuri be ede be haerelaia tomamu? Ia ese reana tadikaka na goada be heniamu ena bosi baine hereva henia. To namona na tadikaka danu bainela bosi dekena bona baine hereva henia. Ia ese ena bosi baine noia loulou na namo. Eiava reana ena ḡaukara hebou tauna ta baine noia ia gabunai baine ḡaukara, eiava bosi baine noia holidei baine abia to basie peia. Iehova na e uramu ita ese eda lalohekwarahi ḡaudia na baita ḡuriḡurilaidia loulou. Iesu ese e hahedinaraia eda noinoi ḡaudia haida na basita abi haraḡamu. (Luka 11:9) Una dainai basio hesiku, to mai lalomu idoinai ida ba ḡuriḡuri loulou. (Luka 18:​1-7) Unu baita kara tomamu neganai, Iehova enai ta hahedinaraiamu ita edai una na mai anina bada. Danu ta hahedinaraiamu ita na ta abidadamamu Ia ese be duruda dibamu. w23.11 rau 22 par. 10-11

Iehova na turana Abraham e gwauhamata henia ia natuna amo tanobada besedia iboudiai baine hanamodia. (Gen. 15:5; 22:18) Abraham ena abidadama Dirava enai na goada, una dainai e abia dae una gwauhamata na be ḡuḡurumu. Ena be Abraham laḡanina na 100 bona ia adavana laḡanina na 90, to idia na do asi natudia. (Gen. 21:​1-7) To, Baibul na e gwaumu: “[Abraham na] abidadama dainai e helarova; taunabunai ia na bese loḡora tamadia ai ela, gwauhamata herevana heḡereḡerena.” (Roma 4:18) Ta dibamu Abraham ese e laroa ḡauna na e vara momokani. Ia ese Isaak e havaraia, una na nega daudau lalonai e nariava ḡauna. Dahaka dainai Abraham na e abia dae momokani Iehova ese ena gwauhamata na baine haḡuḡurua? Abraham ena hetura karana Iehova ida na namo herea dainai, ia na “dibana [Dirava ese] ena gwauhamata baine hamomokania.” (Roma 4:21) Abraham na ena abidadama dainai Iehova ese e lalonamo henia bona e gwauraia kara maoromaoro tauna.—Iak. 2:23. w23.12 rau 8 par. 1-2

E ḡaukara goadamu matamata tadikakana ese ena ḡaukara na e kara namonamomu. Mani Iesu ena haheitalai aita laloa. Ia na ena ḡaukara iboudiai e karadia namonamo, bona Iehova ese e henia ḡaukaradia iboudiai na e haḡuḡurudia, ena be nega haida unu baine kara toma na auka. Ia ese taunimanima na e lalokau henidiava, ena hahediba taudia danu. Bona mai ena ura ida ena mauri e heni idia daidiai. (Ioa. 13:1) Iesu heḡereḡerena, ba ḡaukara goada e henimumu ḡaukaradia ba haḡuḡurudia. To, bema unu ḡaukara ikaradia na asi dibamu, namona na ba manau bona lo tadikakadia edia heduru ba tahu, danu basio lahedo. (Roma 12:11) Emu ḡaukara na “Iehova dainai” ba kara to “dia taunimanima daidiai.” (Kol. 3:​23, NWT) Oi na dia ḡoevadae dainai emu ḡaukara lalodiai na bo kerere dibamu, namona na ba manau bona emu kerere na ba gwaurai hedinarai.—Her. 11:2. w23.12 rau 26 par. 8

Ta e bapatisomu bona na Iehova ena ruma bese lalonai e vareaimu na moale bada ḡauna. Bapatiso taudia ese Salamo e torea tauna ena hereva e hamomokaniamu, ia na e gwa: “[Iehova e,] emu maḡu ai baine noho totona o abia hidimu bona o hakaua kahimu tauna be namo.” (Sal. 65:4) Iehova ese ena ruma bese lalonai ta na se hakaua vareai kavamu. Ia ese e abidia daemu taudia na Ia e uramu bae hetura henia taudia. (Iak. 4:8) Iehova enai emu mauri o gwauhamatalaiamu bena o bapatisomu neganai, ena “hahenamo na latamui ai baina seia dobi ela bona baine hepurai dobi.” (Mal. 3:10; Ier. 17:8) O bapatisomu neganai, emu hesiai ḡaukara, Iehova enai na de matamamu. Emu gwauhamata na ba badinaia, ena be hedibaḡani eiava hahetoho ba davari. (Koh. 5:​4, 5) Oi na Iesu ena hahediba ta dainai, iena haheitalai bona haheḡani na ba badinadia namonamo.—Mat. 28:​19, 20; 1 Pet. 2:21. w24.03 rau 8 par. 1-3

Bema adavamu ida emui hebamo so moalelaiamu be ede bamona? Dahaka ba kara diba? Mani lahi aita laloa. Lahi e ara matamamu neganai, ia na dia maoromaoro e hururumu, to au badadia taidia ruadia baita rakumu neganai, be hururumu. Una heḡereḡerena, dina ta ta ai nega bavato ba hebamo heheni. Namona na bae hamoalemui ḡauna ta ba karaia hebou. (Iak. 3:18) Unu bo kara tomamu neganai, emui lalokau na be badamu. Headava lalonai hemataurai na mai anina bada. Una na hodahoda (oxygen) ese lahi e ha hururuamu karana ida baita haheḡereḡerea. Bema hodahoda na lasi, lahi na be bodo haraḡamu. Una heḡereḡerena, hemataurai na lasi neganai, headava taudia edia lalokau na be keru haraḡamu. To tau bona hahine na e ḡaukara goadamu hemataurai karana e hahedinaraiamu neganai, edia lalokau na e goadamu. Namona na adavamu na baine mamia ia na o matauraiamu. w23.05 rau 22 par 9; rau 24 par. 14-15

Baibul ai, Dirava ena hesiai taudia na inaidia bona hekwakwanai daidiai e lalo-metauva bona e gariva. (Sal. 18:4; 55:​1, 5) Ita danu, skuli bona ḡaukara taudia, eiava ruma bese bona gavamani ese be inai henidamu neganai baita garimu. Eiava reana gorere ta dainai baita mase garina baita garimu. Nega unu bamodiai ita na natu maraḡidia na heto baita garimu, badina baita hemamimu ita na asi iduruda. To, Iehova ese ita be ede e duruda tomamu? Ia ese e hagoadadamu. Una dainai, namona na hanaihanai nega bavato Iehova ida ba herevahereva—anina na Iehova ba ḡuriḡuri henia bona ena Hereva ba duahia. (Sal. 77:​1, 12-14) Bena lalohekwarahi negadiai, oi ese bo karaiamu ḡauna ginigunana na Tamamu guba ai ena heduru bo tahuamu. O garilaimu bona o lalo hekwakwarahilaimu ḡaudia na Iehova ba hamaorolaia. Bona ena Hereva amo baine hagoadamu. —Sal. 119:28. w24.01 rau 24-25 par. 14-16

Ita ese lauma dalanai ta ato tahua ḡaudia ihaḡuḡurudia urana baita hagoadaia na mai anina bada. Badina una ura be goadamu neganai, baita ḡaukara goadamu eda tahua ḡauna baita haḡuḡuruamu Bona eda ura be goadamu neganai, eda tahua ḡaudia na baita haḡuḡurudiamu. Una dainai, dahaka ba kara diba emu ura ba hagoadaia totona? Eda ura baita hagoadaia totona baita ḡuriḡuri. Iehova ese ena lauma amo emu ura baine hagoadaia diba, emu tahua ḡauna ba haḡuḡurua totona. Nega haida ita na tahua ḡauna ta ta atoamu badina dibada unu baita kara toma na maoro. To reana ihaḡuḡuruna urana na dia goada. Iehova ese oi daimu ai e kara ḡaudia ba haerodia. (Sal. 143:5) Aposetolo Paulo na Iehova ena hebogahisi karana ia enai e haeroa, bona una ese e hagoadaia dainai Iehova ena ḡaukara e goadalaia. (1 Kor. 15:​9, 10; 1 Tim. 1:​12-14) Una heḡereḡerena, Iehova ese oi daimu ai e kara ḡaudia bo haerodiamu neganai, emu tahua ḡauna ba haḡuḡurua urana na be goadamu.—Sal. 116:12. w23.05 rau 27 par. 3-5

Ita ese Tamada guba ai ladana ta imodaiamu neganai ia na e moalemu. (Sal. 119:108) Dia ḡoevadae tauda na baita moale totona ta uramu haida ese bae hanamoda. To Iehova na dia unu bamona. Ita ta ta ese Tamada guba ai ta hanamoamu neganai, Satana ese ita latadai e gwaurai herevadia ta hakoikoimu. Satana na e gwaumu ta ese Dirava gwauna na basine hadae diba. Danu, e gwaumu ta ese Dirava na basine badinaia diba. Ia na e gwaumu, ita iboudai na Dirava baita muriamu, badina ia ibadinana kara amo namo ta asita davariamu. (Iobu 1:​9-11; 2:4) To abidadama tauna Iobu na dounu Dirava e badinaia, unu amo e hahedinaraia Satana ena hereva na koikoi. Oi danu Dirava bo badinaiamu, a? Namona na ita ta ta ese Tamada ladana baita imodaia bona hanaihanai ia baita badinaia, unu amo ia baita hamoalea. (Her. 27:11) Una na iseda hahenamo badana. w24.02 rau 8-9 par. 3-5

Mose bona Iosua edia nega murinai, Iehova ese hahemaoro taudia e abidia hidi iena taunimanima bae hakaudia. Bena, king edia nega ai, Iehova ese peroveta taudia e abidia hidi iena taunimanima bae hakaudia. Una nega ai, Iehova e abidadama heniava pavapavadia ese peroveta taudia edia sisiba na e badina. Heḡereḡere, King David na mai manauna ida peroveta tauna Natan ena sisiba e abia dae. (2 Sam. 12:​7, 13; 1 Sis. 17:​3, 4) King Iehosafat na peroveta tauna Iahasiel ese e henia herevana na e badinaia bona Iuda taudia e hagoadadia ‘peroveta taudia bae kamonai henidia.’ (2 Sis. 20:​14, 15, 20) King Hesekia na e lalohisihisi neganai, peroveta tauna Isaia enai heduru e tahu. (Isa. 37:​1-6) Unu nega ai, pavapava ese Iehova ena hahekau dalana e badinaiava neganai, e hanamodiava bona Israel besena danu e gimadiava. (2 Sis. 20:​29, 30; 32:22) Una ese e hahedinaraiamu, Iehova na peroveta taudia e ḡaukaralaidia ena taunimanima bae hakaudia. w24.02 rau 21 par. 8

Satana na e uramu ita ese Iehova ena taravatu asie lalo badamu taudia baita bamodia. Namona na baita helalotao, taunimanima unu bamodia na social media amo danu baita bamodia dibamu. Tanobada taudia na e laloamu kara mirodia na nanamo, to una lalohadai na baita dadaraia. Badina ta dibamu una lalohadai na kerere. (Efe. 4:​19, 20) Una dainai siboda baita henanadai: ‘Lau ese Iehova ena kara maoromaoro taravatudia asie badinamu taudia na bamodia momomu, a? Lau be mai egu lalo goada ida Iehova ena taravatu na badinamu, ena be haida ese una na se moalelaiamu?’ Danu 2 Timoteo 2:​20-22 ena hereva heḡereḡerena, Kristen kongrigeisen lalonai bamo ta abi hidimu neganai, baita henahua toho. Badina haida ese ita na basie durudamu dounu Iehova baita hesiai henia totona. w24.03 rau 22-23 par. 11-12

Nega ta o lalo Iehova be Dirava ede bamona, a? Ena be Iehova na asita itaiamu, to Baibul ese ia na ḡau idauidau ida e haheḡereḡerea. Iehova na e gwauraia “dina bona kesi” bona “lahi ḡaraka-ḡaraka.” (Sal. 84:11; Heb. 12:29) Bona ia toana na sapairo nadina, auri labora-labora hururu-hururuna, bona kevau diarina na heto. (Esek. 1:​26-28) Iehova na asita itaiamu dainai, reana edai na be aukamu baita abia dae ia ese ita na e lalokau henidamu. Haida na edia mauri lalonai ḡau dikadia ediai e vara dainai e laloamu Iehova ese idia na basine lalokau henidia dibamu. Iehova ese eda hemami na e lalopararalaimu bona ia na mai dibana dahaka dainai e aukamu ia baita hakahikahia. To ita baine duruda totona, Baibul amo e hadibadamu ia na lalokau bada Diravana. Iehova na lalokau. Baibul na e gwaumu: “Dirava na lalokau.” (1 Ioa. 4:8) Ia e karamu ḡaudia iboudiai badidia na lalokau. Dirava ena lalokau na asi hetoana bona mai siahuna dainai, ia asie lalokau heniamu taudia danu e lalokau henidiamu.—Mat. 5:​44, 45. w24.01 rau 26 par. 1-3

Iehova ese Mose e abia hidi Aigupto amo Israel taudia baine hakaudia lasi, bona hahemomokani ḡaudia Heḡereḡere, dina ai ia ese ori amo e hakaudiava, hanuaboi ai be lahi amo e hakaudiava. (Eso. 13:21) Mose ese ori e badinaia, bona una ese idia e hakaudia ela bona Davara Kakakakana. Una nega ai, idia na e gari badina Aigupto tuari oreana ese bae dogodiatao na garina. To ia na se kerere badina una na Iehova ena ura Mose ese unu baine hakaudia lao. (Eso. 14:2) Bena Iehova ese hoa dalana ai e hamauridia. (Eso. 14:​26-28) Laḡani 40 lalodiai, Mose na Israel taudia e hakaudia neganai, ia na una ori e badinaia. (Eso. 33:​7, 9, 10) Una ori amo Iehova na Mose e hereva heniava, unu amo Iena hereva na taunimanima baine hadibadia. Una ese e hahedinaraiamu, Iehova na Mose e ḡaukaralaia iena taunimanima baine hakaudia. w24.02 rau 21 par. 4-5