July

Iesu ena hereva, kara, bona e kara hoa karadia amo Tamana ena lalohadai bona hemami e hahedinarai ḡoevaḡoeva. (Ioa. 14:9) Iesu ena hoa karadia amo dahaka baita dibamu? Iesu bona Tamana ese ita na e lalokau henida badamu. Iesu tanobada ai e nohova neganai, ia ese hisihisi taudia na hoa dalana ai e durudia, unu amo e hahedinaraia idia na e lalokau henidia bada. Nega ta, matakepulu taudia rarua na ia e boi henia baine durudia. (Mat. 20:​30-34) Iesu ese e “bogadia hisi” dainai matadia e hanamo. Ina hereva “bogadia hisi” na Grik gado ai e hahanaia neganai, anina na ta ena hisihisi na laloda ai baita mamia momokani. Una hebogahisi na lalokau amo e varamu karana ta, danu una kara dainai Iesu ese hutuma e ubudia bona lepra tauna ta e hanamoa. (Mat. 15:32; Mar. 1:41) Ta dibamu Iehova na “hebogahisi” Diravana, bona Natuna ese ita na e lalokau henida badamu bona eda hisihisi daidiai e bogada hisimu. (Luka 1:78; 1 Pet. 5:7) Idia raruosi na e ura dikadikamu taunimanima edia hisihisi iboudiai bae haoredia! w23.04 rau 3 par. 4-5

Baita hekwarahi Satana ena tanobada ena lalohadai kereredia baita dadaraidia. Baibul baita duahia bona baita stadilaia amo laloda na ḡau namodia amo baita hahonua. Hebou ilao henina bona haroro ḡaukara ese danu laloda na be gimaiamu. Bona Iehova na e gwauhamata baine duruda, unu amo eda goada e hereaiamu hedibaḡanina ta ese basine butuda tao. (1 Kor. 10:​12, 13) Ini nega aukadia lalodiai Iehova baita badinaia totona, namona na ita ta ta ese ḡuriḡuri karana baita laloa bada. Iehova na e uramu eda ḡuriḡuri ai ‘laloda anidia na ia vairanai baita hahedinarai.’ (Sal. 62:8) Iehova ba imodaia e kara ḡaudia iboudiai daidiai. Ia ba noia baine durumu mai emu goada ida ba haroro. Bona ba noia baine durumu hekwakwanai idauidau ba haheaukalai bona hedibaḡani ba dadarai. Namona na ḡau ta eiava taunimanima ta ese basine koumu hanaihanai Iehova ba ḡuriḡuri henia. w23.05 rau 7 par. 17-18

Kongrigeisin heboudia ta laomu badina be dahaka? Badi badana na, Iehova baita hanamoa. (Sal. 26:12; 111:1) Danu badi ma ta na, ini nega aukadia ai baita hahegoada heheni. (1 Tes. 5:11) Imada ta abi isimu bona haere ta henimu neganai, ita na unu badi ruaosi heḡereḡeredia ta karamu. To, haere ta uramu baita heni neganai, ḡau haida ese e koudamu. Reana haere ihenina ai ta garimu, eiava ta ura dikadikamu baita haere to se abida hidimu. Unu be ede baita hanaidia toma? Aposetolo Paulo ese e hahedinaraia baita “hahealo heheni” na namo. Haere ihenina na basita garimu bema baita helalotaomu eda haere kwadoḡina ese ma haida na be hagoadadiamu. Bona bema nega momo haere ihenina ai se abida hidimu, baita moale badina una ese dala e kehoamu ma haida bae haere.—1 Pet. 3:8. w23.04 rau 20 par. 1-3

Hereva ta e halasia! Babulono ai laḡani 70 bamona e noho Iuda taudia na edia tano Israel bae lou lao diba. (Esera 1:​2-4) Iehova sibona ese una baine havaraia diba. Badina Babulono ese abi mauri taudia na asie kahudia negeva. (Isa. 14:​4, 17) To Babulono na e darere, bona lohia matamatana ta ese Iuda taudia e hamaorodia bae rakatania. Iuda taudia ta ta, heḡereḡere ruma bese kwaradia, na bae abi hidi Babulono bae rakatania eiava lasi. Una na abi hidi aukana. Momo na buruka herea dainai gabu daudau na basiela diba. Bona Iuda taudia momo na Babulono ai e vara dainai, idia e dibaia hanuana tamona be una. Idia ediai, Israel tanona na senedia edia tano. Toana na Babulono ai Iuda taudia haida na taḡa taudia ai ela, una dainai edia ruma namodia bona bisines bae rakatanidia bona asi dibadia tanona ta ai bae noho na auka. w23.05 rau 14 par. 1-2

Dirava ena Hereva ese e hagoadadamu, hanaihanai haheauka, hebogahisi bona lalokau baita hahedinarai. Luka 21:19 na e gwaumu: “Emui haheauka dainai laumamui do bae mauri.” Kolose 3:12 e gwaumu: ‘Ina na ba hahedokilaia: hebogahisi.’ Bona 1 Tesalonika 4:​9, 10 e gwaumu: “Dirava ese vada e hadibamui umui ta ta ba heura heheni. . . . to, varavaramai e, a noimuimu, una kara ba habadaia.” Unu hereva e tore neganai, hahediba taudia ese haheauka, hebogahisi bona lalokau na vada e hahedinaraiva. To, idia ese unu kara na dounu bae hahedinarai na namo, bona ita danu unu baita kara toma. Una ba lalopararalaia totona, Kristen ginigunadia ese unu kara e hahedinarai daladia mani a lalodia. Bona bo itaiamu idia bo tohotohodiamu neganai, bo hahedinaraiamu oi na hisihisi bada hereana totona vada o heḡaeḡae. Bena hisihisi bada hereana be matamamu neganai, oi na vada mai dibamu ede ba haheauka toma, bona lalomu bo hadaiamu dounu ba haheauka totona. w23.07 rau 3 par. 4, 8

Herevana ita na horoa taudia eiava “mamoe idaudia,” to namona na “Dala Helaḡana” ai dounu baita raka. Una ese be durudamu hari bona vaira nega ai Basileia ese tanobada ai hahenamo be havaradiamu neganai dounu Iehova baita tomadiho heniamu. (Ioa. 10:16) Laḡani 1919 C.E. amo tatau, hahine bona natu milioni momo ese Babulono Badana, eiava tanobada idoinai tomadiho oreadia koikoidia iboudiai e rakatania, bona dala helaḡana ai e raka matama. Babulono e rakatania Iuda taudia totodia Iehova na dala e kara, edia raka dalana e helao-ahu ḡaudia e koki. (Isa. 57:14) Hari ina negai “Dala Helaḡana” be ede bamona? Laḡani 1919 do lasi ai, laḡani 100 momo lalodiai, Iehova ese ia garina e gariva tataudia e ḡaukaralaidia dala bae lailaia, unu amo taunimanima na Babulono badana bae rakatania. (Isaia 40:3 ba haheḡereḡerea) Idia ese ḡaukara mai anidia e kara, unu amo kudou maoro taudia bae durudia tomadiho koikoi bae rakatania bona Iehova ena taunimanima ida ia bae tomadiho henia. w23.05 rau 15-16 par. 8-9

Iehova na e uramu ita na mai eda moale bona ura ida ia baita hesiai henia. (2 Kor. 9:7) Una dainai ena be eda ura na dia goada to dounu baita hekwarahi eda tahua ḡauna baita haḡuḡurua, a? Aposetolo Paulo ena haheitalai aita laloa. Ia na eto: “Sibogu tau-anigu na tutuamu, na ḡuiamu.” (1 Kor. 9:​25-27) Paulo na sibona e hedori kara maorona baine karaia, ena be una baine karaia urana na lasi. Iehova ese Paulo ena hesiai ḡaukara be e abia dae, a? Oibe! Bona Iehova ese ena hekwarahi na e hanamoa. (2 Tim. 4:​7, 8) Ena be tahua ḡauna ta ihaḡuḡuruna urana na lasi, to baita ḡaukara goadamu neganai, Iehova na be moalemu. Ia na e moalemu badina ena be una na dia ita ese ta ura heniamu ḡaukarana, to mai dibana ta karaiamu badina na ia ta lalokau heniamu. Iehova ese Paulo e hanamoa heḡereḡerena, ita danu be hanamodamu. (Sal. 126:5) Bona ita e hanamodamu daladia baita itamu neganai, una ese eda ura na be hagoadaiamu. w23.05 rau 29 par. 9-10

Aposetolo Paulo ese Iehova ena dina amo basie roho mauri taudia na e mahutamu taudia ida e haheḡereḡeredia. Idia na badidia ai e varamu ḡaudia o nega e hanaimu na asie dibamu. Una dainai, ḡau mai anidia be varamu eiava ede bae kara toma na asi dibadia. Hari ina negai taunimanima momo na lauma dalanai e mahutamu. (Roma 11:8) Idia na asie dibamu e varamu ḡaudia ese e hahedinaraimu, ita na “dina gabedia ai” ta nohomu, bona hisihisi bada hereana na kahirakahira be varamu. (2 Pet. 3:​3, 4) To, ita na ta lalopararamu dina ta ta ai baita noga na mai anina bada. (1 Tes. 5:​6, NWT) Namona na baita lalo maoromaoro. Dahaka dainai? Badina unu amo politikol o heiriheiri karadia ai basita vareai. Iehova ena dina e kahikahimu lalonai taunimanima ese be doridamu unu kara lalodiai baita vareai bona edia hedori karana na be habadaiamu. To, ede baita kara toma na basita lalohekwarahilaia. Badina Dirava ena lauma helaḡa ese be durudamu, baita lalo maoromaoromu bona abi hidi maorodia baita karamu.—Luka 12:​11, 12. w23.06 rau 10 par. 6-7

Ina lada, Samson, o kamonaiamu neganai dahaka o lalomu? Reana o lalomu ia na tau mai goadana ta. Una na momokani. To Samson na abi hidi kererena ta e karaia dainai dika bada e davari. To, Iehova ese Samson na ia ihesiai henina totona e kara ḡaudia na e lalodia bada, bona iena abidadama sivaraina na Baibul ai e torea, ita ihadibada. Iehova ese Samson e ḡaukaralaia hoa ḡaudia momo baine kara iena taunimanima Israel idurudia totona. Samson e mase bena laḡani hanred momo muridiai, Iehova ese ena lauma helaḡa amo aposetolo Paulo e hasiahua dainai, Samson ladana na abidadama taudia ladadia ida e torea. (Heb. 11:​32-34) Samson sivaraina ese ita na e hagoadadamu. Ia na Iehova enai e tabekau, hekwakwanai negadiai danu. Ita ese Samson ena haheitalai amo ḡau haida baita dibamu. w23.09 rau 2 par. 1-2

Dounu baita haheauka dalana ta na, mai momokanida ida eda lalohekwarahi ḡaudia na hanaihanai Iehova enai baita gwaurai hedinarai. (1 Tes. 5:17) Reana hari oi na dia hekwakwanai badana ta lalonai. To bema o lalohisihisimu, o daradaramu, eiava o lalohekwarahimu negadia ai, Iehova enai heduru o tahumu, a? Bema hari hekwakwanai maraḡidia lalodiai Dirava ena heduru o tahuamu, vaira negai hekwakwanai badadiai danu unu bo kara tomamu. Bona bo dibamu Iehova na mai dibana edena negai bona edena dalai oi be durumumu. (Sal. 27:​1, 3) Bema hari hekwakwanai baita haheaukalaimu, hisihisi bada hereana lalonai baita haheauka dibamu. (Roma 5:3) Dahaka dainai unu ta gwau tomamu? Tadikaka taihu momo na e gwaumu hekwakwanai ta ta e haheaukalaimu neganai, una ese e durudiamu hekwakwanai ma haida bae haheaukalai. Hekwakwanai ta e haheaukalaiamu neganai, edia abidadama na e goadamu bona e dibamu Iehova na noho heḡaeḡae mai ena ura ida idia baine durudia. Danu, una abidadama ese e durudiamu gabeai bae davaria hekwakwanaina bae haheaukalaia.—Iak. 1:​2-4. w23.07 rau 3 par. 7-8

Iehova na manau bona hebogahisi Diravana dainai, lalo maoromaoro karana e hahedinaraiamu. Heḡereḡere, Iehova na e ura Sodom hanuana baine hadikaia neganai, manau karana e hahedinaraia. Ia ese ena aneru amo Lot e hamaoroa ororo baine heau lao. Lot na e gari unu bainela. Una dainai Iehova e noia ena ruma bese ida hanua maraḡina ta, Soara baela; una na Iehova ese baine hadikaia hanuana ta. Iehova bema ura Lot bema hamaoroa ia e gwauraia ḡauna mo bae badinaia. To, ia ese Lot ena noinoi na e abia dae, bona Soara hanuana na se hadikaia. (Gen. 19:​18-22) Laḡani handred haida muridiai, Iehova ese Nineve taudia ediai hebogahisi e hahedinaraia. Ia ese peroveta tauna Iona e siaia Nineve taudia baine hadibadia edia kara dika daidiai idia bona edia hanua na baine hadikadia ore. To Nineve taudia e helalo-kerehai neganai, Iehova ese e bogadia hisi bona se hamasedia.—Iona 3:​1, 10; 4:​10, 11. w23.07 rau 21 par. 5

Iehoasa sivaraina amo dahaka ta dibamu? Iehoasa e durua tauna, Iehoiada e mase bona Iehoasa na aposteit taudia e kamonai henidia matama neganai, Iehova na se badinaia. Una na heḡereḡere au ta ramuna na se dobu dainai, au maoromaorona ta ese e imudaia, una au maoromaorona na lasi neganai lai ese baine odaia oho. Una ese e hahedinaraiamu, dia tadikaka taihu bona eda ruma bese taudia daidiai Dirava garina baita gari. To siboda eda stadi, lalo dobu, bona ḡuriḡuri amo eda lalokau bona hemataurai Dirava enai baita hagoadaia, unu amo eda hetura karana ia ida na baine goada. (Ier. 17:​7, 8; Kol. 2:​6, 7) Iehova ese ita na se noidamu ḡau momo baita kara. To e uramu baita karaia ḡauna na Koh. 12:13 ai e gwauraia, eto: “Dirava garina ba gari, bona ena haheḡani ba badinadia; badina be una na taunimanima ena kara korikori idoinai.” Oibe, Dirava garina baita garimu neganai, vaira negai bae vara hahetohodia lalodiai dounu Ia baita badinaiamu. Bona ḡau ta ese eda hetura karana Iehova ida na basine hadikaiamu. w23.06 rau 19 par. 17-19

Apokalupo karoa 21 siri 5 ena hematama herevana na ini e gwau toma: “Bena terono ai e helaimu Diravana eto.” (Apok. 21:5a) Una hereva na mai anina bada, badina Apokalupo bukana lalonai Iehova na nega toi unu e hereva toma. Una gwauhamata herevana na dia aneru, dia Iesu, to Iehova sibona ese e gwauraia. Una ese e hamomokaniamu, unu hereva muridiai e gwaurai herevadia na baita abidadama heni diba. Dahaka dainai? Badina Iehova na “koikoi asi dibana Diravana.” (Tito 1:2) Una dainai ta abia dae momokanimu Apokalupo 21:​5, 6 ai e gwauraia herevana na be vara momokanimu.Mani Iehova ese e gwauraia herevana, “a itaia,” aita laloa. Apokalupo bukana ai Grik herevana e hahanaia “a itaia,” na nega momo e ḡaukaralaia. Ina hereva “a itaia” e gwauraia murinai Dirava be ma dahaka e gwa? Ia na e gwa: “Lau na ḡau iboudiai na hamatamatamu.” Momokani Iehova na vaira negai baine haidau ḡaudia e herevalaimu, to ia na e diba momokanimu unu gwauhamata na be haḡuḡurudiamu dainai, e herevalaidia neganai, vaitani harihari e haḡuḡurumu.—Isa. 46:10. w23.11 rau 3-4 par. 7-8

Aposetolo Petro na dounu e hekwarahiva ena manoka ḡaudia baine hanamodia. Mani haheitalai haida aita lalodia: Iesu ese peroveta herevana heḡereḡerena bae hahisia bona baine mase dalana e herevalaia neganai, Petro ese e gwau henia. (Mar. 8:​31-33) Petro bona aposetolo ma haida na e hepapahuahu loulouva daika be herea. (Mar. 9:​33, 34) Iesu do se mase hanuaboina ai Petro ese tau ta taiana e utua oho. (Ioa. 18:10) Una hanuaboi ai, Petro na e gari dainai nega toi Iesu e ḡorea. (Mar. 14:​66-72) Bona una dainai e tai dikadika. Iesu ese Petro na se rakatania. Iesu e tore isi lou murinai, Petro na hahenamo haida e henia, unu amo e hamomokania ia na e lalokau henia. Iesu ese e hamaoroa iena mamoe ireḡudia ḡaukarana baine karaia. (Ioa. 21:​15-17) Bona Petro na unu e kara toma. Pentekost dinana ai, ia na Ierusalem ela, bona Dirava ese ena lauma helaḡa amo e horodia taudia ginigunadia ta na ia. w23.09 rau 22 par. 6-7

Aposetolo Petro ese elda taudia e hagoadadia ‘Dirava ena mamoe bae reḡudia.’ (1 Pet. 5:​1-4) Bema oi na elda ta, ai na a dibamu oi ese tadikaka taihu na o lalokau henidiamu bona o uramu ba vadivadia. To, reana nega haida o bisimu eiava tauanimu na e hesikumu dainai, o mamiamu una vadivadi ḡaukarana na basio karaia dibamu. Bema unu bamona dahaka ba kara? Emu lalohekwarahi na Iehova enai ba gwauraia. Petro na e gwa: “Ma ta baine hekaha, ia na Dirava ese e heniamu goadana amo baine hekaha.” (1 Pet. 4:11) Hari ina negai tadikaka taihu ese e davarimu hekwakwanaidia ihamaoromaorodia na auka. To ba helalotao, “mamoe ireḡudia Tauna Badana,” Iesu Keriso ese idia na baine durudia diba, hari ina negai bona tanobada matamatana ai. Iehova na e uramu elda taudia ese tadikakadia bae lalokau henidia, bae vadivadidia, bona haheitalai namona bae hahedinaraia. w23.09 rau 29-30 par. 13-14

Namona na taunimanima edia lalohadai baita dadarai. Bema taunimanima edia lalohadai ai ḡau baita haeromu, Iehova bona ena taravatu na basita lalodiamu. (1 Kor. 3:19) Nega momo “ina tanobada aonegana” ese taunimanima lalodia e verimu Dirava bae dadaraia. Kristen taudia haida na Peregamo bona Tuatira taudia edia matabodaḡa bona kaivakuku itomadiho henidia lalohadaidia e abi dae. Iesu ese unu kongrigeisin ruaosi na e sisiba henidia auka badina matabodaḡa karadia na se koudia. (Apok. 2:​14, 20) Hari ina negai, taunimanima ese laloda e verimu, lalohadai kereredia baita abi dae. Eda ruma bese taudia bona turada ese be hamaorodamu eda taravatu na auka bona be doridamu Dirava ena taravatu baita utudia. Heḡereḡere, reana be gwaumu siboda eda ura baita haḡuḡuru na dia kerere, bona Baibul ena taravatu na gugunana. Nega haida, reana baita lalomu Iehova ena hahekau dalana ilalopararalaina na auka. Bona reana basita uramu “Buka Helaḡa ai e tore herevadia” baita badina.—1 Kor. 4:6. w23.07 rau 16 par. 10-11

Iesu sinana, Maria, na heduru baine abi na namo. E hamaoroa baine rogorogo neganai, ia na e lalohekwarahi badina do se headava. Danu e hamaoroa ia baine havaraia merona na mesia ai bainela, to ia be sibona natuna ta do se naria. Bona ia na Iosef ida do asie headava dainai, ede baine hamaoroa toma ia na rogorogo? (Luka 1:​26-33) Maria ese heduru be ede amo e abi? Ia na haida edia amo heduru e tahu. Heḡereḡere, aneru Gabriel e nanadaia ienai bae vara ḡaudia baine herevalai. (Luka 1:34) Una murinai, ia na “Iuda ororodia hanuana ta” ela varavarana Elisabet baine vadivadia. Elisabet ese hereva namodia amo Maria e hanamoa, bona lauma helaḡa ena heduru amo Elisabet ese Maria baine havaraia merona dainai peroveta hereva namona ta e gwauraia. (Luka 1:​39-45) Maria na e gwa Iehova “imana ese ena goada vada e hahedinaraia.” (Luka 1:​46-51) Iehova ese Gabriel bona Elisabet edia amo Maria e hagoadaia. w23.10 rau 14-15 par. 10-12

Keriso ena hahediba taudia haida na Dirava ese ena lauma helaḡa amo e horodia, bona idia na Iehova turana namona ai ela bona e moalemu. Idia iboudiai na 144,000, bona guba ai Iesu ida hahelaḡa ḡaukarana be karaiamu. (Apok. 14:1) Kalaga helaḡana ena Helaḡa Gabuna na horoa taudia tanobada ai Dirava ese ena lauma amo e abidia hidi bona natuna ai vada e halaodia karana e laulaulaia. (Roma 8:​15-17) Kalaga helaḡana ena Helaḡa Herea Gabuna na Iehova e nohomu gabuna guba ai e laulaulaia. Helaḡa Gabuna bona Helaḡa Herea Gabuna e hapararaia “seseahuna” o ketin ese Iesu tauanina e laulaulaia. Iesu tanobada ai e nohova neganai ia tauanina na hidio bona rara dainai, guba ai basine vareai diba bona lauma dubuna ena Hahelaḡa Tauna Badana hereadaena ai basinela. To taunimanima daidiai e mase neganai, dala e kehoa horoa Kristen taudia iboudiai ese guba maurina bae abia. Unu horoa Kristen taudia danu bae mase guna, unu amo guba ai ahudia bae abi diba.—Heb. 10:​19, 20; 1 Kor. 15:50. w23.10 rau 28 par. 13

Efraim taudia ese Gideon e gwauraia dika neganai, mai manauna ida e hereva. (Hah. 8:​1-3) Ia na se badu. To edia lalo hekwarahi herevadia e kamonai, bona mai aonegana ida e hereva dainai, edia badu e hakerua. Elda taudia ese Gideon e tohotohoamu dalana na, haida ese e gwauraidia dikamu neganai, e hakala namonamomu bona mai manaudia ida e herevamu. (Iak. 3:13) Unu amo kongrigeisin lalonai maino e havaraiamu. Gideon na Midian taudia e hadareredia dainai taunimanima ese e hanamoa neganai, ia na Iehova e imodaia. (Hah. 8:​22, 23) Elda taudia ese Gideon be ede bae tohotohoa toma? Namona na e haḡuḡurumu ḡaudia daidiai Iehova bae imodaia. (1 Kor. 4:​6, 7) Heḡereḡere, bema elda ta na ena hahediba dalana dainai haida ese bae hanamoa, baine gwa diba Dirava ena Hereva bona iena orea ese e hadibadamu ḡaudia ta herevalaimu. Nega haida reana elda taudia na bae lalo bema edia hahediba dalana amo idia be sibodia e heimodaimu eiava Iehova e imodaiamu. w23.06 rau 4 par. 7-8

Bema eda ḡuriḡuri haerena na asita abia, reana siboda baita henanadai, ‘Lau be ḡau maorodia na ḡuriḡurilaimu eiava?’ Nega momo baita laloamu ita na mai dibada dahaka ese be durudamu. To ta noilaimu ḡaudia ese reana ita na basie durudamu. Bema ita na hekwakwanai ta dainai ta ḡuriḡurimu, una hekwakwanai ihamaoromaorona dala namona ta na mia, dia ta ḡuriḡurilaia ḡauna heḡereḡerena. Bona ta noilaimu ḡaudia haida na reana dia Iehova ena ura heḡereḡerena. (1 Ioa. 5:14) Heḡereḡere, tama sina na Iehova e noia natudia baine durua hereva momokani lalonai baine noho. Noinoi unu bamona na dia kerere. To, Iehova ese ita na basine doridamu ia baita hesiai henia. Ia na e uramu ita iboudai, natuda danu, ese abi hidi baita kara ia baita hesiai henia. (Deu. 10:​12, 13; 30:​19, 20) Una dainai tama sina ese Iehova bae noia diba idia baine durudia unu amo idia ese natudia bae hadibaia namonamo, una ese natudia be duruamu Iehova baine lalokau henia bona ia turana ai bainela.—Her. 22:6; Efe. 6:4. w23.11 rau 21 par. 5; rau 23 par. 12

Dahaka dainai haida ihagoadadia na lalokau karana? Baibul refrens ta ese Paulo e ḡaukaralaia herevana “hahegoada” anina na ini e herevalaia toma, “hekwakwanai badana ta e davaria tauna ta badinai ba gini bona ba hagoadaia.” Una dainai tadikaka ta o taihu ta na ena metau lalonai ta hagoadaiamu neganai, ta duruamu dounu Dirava baine hesiai henia. Ia ida ta tai heboumu neganai ta hahedinaraiamu ia na ta lalokau heniamu. (2 Kor. 7:​6, 7, 13) Edena dala ai hebogahisi bona tauhalo ihenina karana na e ḡaukara heboumu? Hebogahisi tauna na hekwakwanai e davari tauna ena hisihisi e itaiamu bena ḡau haida e karamu baine durua helaoreana. Una dainai ta ta bogaia hisimu neganai, una hemami ese ita na e doridamu ia ta hagoadaiamu. Paulo ese Iehova na e gwauraia “Tama hebogahisina, tauhalo Diravana.”—2 Kor. 1:3. w23.11 rau 9-10 par. 8-10

Keriso murinai e rakamu taudia iboudiai na hisihisi be davarimu. Mani aposetolo Paulo ena haheitalai aita laloa. Ia ese Tesalonika ai e nohova tadikakadia e hamaorodia, eto: “Ta noho hebouva negana ai a hamaoromui heḡaeḡaeva hisi bae vara; benaini, vada e vara, ani!” (1 Tes. 3:4) Bona Korinto tadikakadia e hamaorodia, eto: “Varavaramai e, a uramu . . . a aniva hisidia ba diba . . . banava baia mase ato.” (2 Kor. 1:8; 11:​23-27) Hari ina negai, Kristen taudia danu dala idauidau ai hisihisi e davarimu. (2 Tim. 3:12) Iesu o abidadama heniamu bona o badinaiamu dainai, reana turamu bona varavaramu ese e kirikirilaimumu eiava e kara auka henimumu, a? Ḡaukara gabunai ḡau iboudiai na mai momokanimu ida o karamu dainai emu bosi o turamu ese e daḡedaḡe henimumu, a? (Heb. 13:18) Eiava ma haida ediai emu helaro o harorolaiamu dainai gavamani ese e daḡedaḡe henimumu, a? Ena be daḡedaḡe o hisihisi idauidau ta davarimu, to Paulo na e gwa baita moale na namo. w23.12 rau 10-11 par. 9-10

Iakob na hekwakwanai momo e haheaukalai. Iakob natuna rarua, Simeon bona Levi, ese ruma bese na e hahemaraia bona Iehova ladana e hadikaia. Danu, Iakob adavana lalokauna Rahela na natudia iharuana e havaraia neganai e mase. Bona hitolo bada e vara dainai Iakob na buruka lalonai, ena tano e rakatania Aigupto ela. (Gen. 35:​16-19; 37:28; 45:​9-11, 28) Ena be Iakob na unu hekwakwanai e davaridia to Iehova bona ena gwauhamata na dounu e abidadama henidia. Bona Iehova ese e hahedinaraia Iakob na e lalonamo henia. Heḡereḡere, Iehova ese Iakob na kohu momo e henia. Iakob na Iehova e tenkiu henia bada, badina natuna Iosef ida e hedavari lou, ena be e laloava Iosef na vada e mase. Iakob ena hetura karana Iehova ida na goada dainai, e davari hekwakwanaidia iboudiai na e haheaukalai. (Gen. 30:43; 32:​9, 10; 46:​28-30) Bema eda hetura karana Iehova ida baita hagoadaiamu, asita lalomu hekwakwanaidia baita davarimu neganai baita haheaukamu. w23.04 rau 15 par. 6-7

Salamo 23 na ane ta, bona una ese Iehova ena lalokau bona henari karana e herevalaiamu. Una ane e torea tauna, David, ese ia bona Iehova edia hetura karana goadana e herevalaia, bona ia ese Iehova na e gwauraia Mamoe Ireḡuna Tauna. David na Iehova enai e tabekau momokani bona iena hahekau tauna ai e halaoa dainai ḡau ta garina se gari. David na e diba Iehova ena lalokau ia enai na dina iboudiai e hahedinaraia. Dahaka dainai David ese una na e abia dae? David na e abia dae, Iehova ese ia na e laloa badava, badina ena dabu ḡaudia iboudiai na e heniava. Danu David na e diba, Iehova na ia turana bona e lalonamo heniava. Una dainai herevana vaira nega ai dahaka baine vara, Iehova ese ia na dounu be duruamu. David na e abia dae Iehova ese ia na e lalokau heniava bona baine naria diba dainai, ḡau ta se lalohekwarahilaia, to dekenai miadia ḡaudia na e moalelai.—Sal. 16:11. w24.01 rau 29 par. 12-13

Tanobada Tuarina Iharuana amo ema bona hari, Iehova ena taunimanima gabu momo ai na ḡau ta ese se koudiamu dainai, edia haroro ḡaukara na e moalelaiamu. Una dainai momo ese Iehova e dibaiamu. Hari, Gavanin Bodi ese Keriso ena hahekau dalana e badinaiamu. Idia na e uramu e halasimu hahekau herevadia na Iehova bona Iesu edia ura heḡereḡerena. Idia ese unu hahekau herevadia na seket bona elda taudia amo kongrigeisen ai e halasimu. Elda taudia iboudiai na Keriso “imana idibana ai.” (Apok. 2:1) Momokani, idia na dia ḡoevadae bona mistake na be karamu. Mose, Iosua bona aposetolo taudia danu nega haida mistake e karava. (Num. 20:12; Ios. 9:​14, 15; Roma 3:23) Danu, Keriso ese hesiai tauna mai ena abidadama bona e abidia hidi elda taudia na be ḡaukaralaidiamu. Una dainai ia ese e abidia hidi taudia amo e henimu hahekau dalana na baita badinaia. w24.02 rau 23-24 par. 13-14

Hari ina negai, haida ediai Iehova ta herevalaiamu neganai, namona na bae itaia, ita ese Iehova na ta lalokau heniamu bona ena kara namodia na ta lalodia badamu. Iseda hesiai ḡaukara lalonai, ita na ta uramu taunimanima baita durudia Iehova turana ai baela. Bona bae abia dae Iehova na Tama lalokauna. (Iak. 4:8) Namona na mai moaleda ida Baibul amo Iehova ena lalokau, hahemaoro maoromaoro, aonega, siahu bona ena kara ma haida na taunimanima baita hadibalaidia. Iehova baita imodaia bona baita hamoalea dalana ma ta na ia baita tohotohoa. Unu amo taunimanima na be dibamu, ina tanobada dikana amo ita na idau, bona be uramu badina bae diba. (Mat. 5:​14-16) Dina ta ta ai taunimanima ida ta herevaherevamu bona ta ḡaukara heboumu neganai, unu badi baita herevalai. Bena kudou maoro taudia na be uramu Dirava bae dibaia. Unu amo Iehova baita imodaiamu bona ia baita hamoaleamu.—1 Tim. 2:​3, 4. w24.02 rau 10 par. 7

Lo Kristen tauna ai baola totona namona na emu mauri ai bae durumu ḡaudia ba diba. Unu amo kongrigeisin madunadia bo huamu, ḡaukara ta bo davariamu sibomu eiava emu ruma bese iduruna, bona ma haida ida emu hetura karana be hanamoamu. Heḡereḡere, duahiduahi bona toretore ba diba namonamo. Baibul na e gwaumu dina ta ta ai Dirava ena hereva e duahiamu bona e laloa dobumu tauna na e moalemu. (Sal. 1:​1-3) Dina ta ta ai Baibul bo duahiamu neganai, Iehova ese ḡau e haeromu daladia bo lalopararalaimu bona bo badinadiamu. (Her. 1:​3, 4) Badina tadikaka taihu na tadikaka unu bamodia amo Baibul ena hahekau herevadia bona sisiba bae abi diba. Duahiduahi bona toretore bo dibamu neganai, oiemu tok bona haere amo ma haida edia abidadama na bo hagoadaiamu. Danu, bae durumu point bo torediamu ese be durumumu emu abidadama bo hagoadaiamu bona ma haida bo durudiamu. w23.12 rau 26-27 par. 9-11

O garimu neganai, Iehova ese vairai baine kara ḡaudia ba lalodia dobu. Una nega ai Satana na lasi. Laḡani 2014 rijinol hebouna ai, haheitalai ta ai, tama ta na ena famili ida paradaiso ai bae vara ḡaudia e herevalai neganai, ia ese 2 Tim. 3:​1-5 na ini e duahia toma: “Tanobada matamatana ai nega namodia do bae vara. Badina taunimanima na bae helalokau-heheni, hereva momokani bae ura henia, bae lalomanada, bae manau, Dirava bae imodaia, tamadia sinadia bae kamonai henidia, tenkiu karana bae hahedinaraia, Iehova bae badinaia, ruma bese taudia bae lalokau henidia, bae lalo tamona, nega iboudiai taunimanima edia kara namodia bae herevalai, sibodia bae hebiagu, basie badu, kara namo bae ura henia, bae heabidadama heheni, ma haida edia namo bae lalo guna, basie hekokoroku, Dirava bae lalokau henia to lebulebu karadia basie ura heni, Dirava bae badinaia momokani. Taunimanima unu bamodia ba bamodia.” Emu famili eiava tadikaka taihu ida o herevaherevamu neganai, tanobada matamata maurina o herevalaiamu, a? w24.01 rau 6 par. 13-14

Iehova ese ena orea taudia na e lalo namo henidia, una ta dibamu dainai ta moalemu, ani? Baibul na e gwaumu: “Iehova ese ena orea taudia na e moalelaidiamu.” (Sal. 149:4) Nega haida, haida na e lalo manokamu dainai e gwaumu, ‘Lau be momokani Iehova ese e lalo namo henigumu?’ Baibul negadiai abidadama taudia momo danu lalohadai unu bamodia e abiva. (1 Sam. 1:​6-10; Iak. 29:​2, 4; Sal. 51:11) Baibul ese e hahedinaraia ḡoevaḡoevamu dia ḡoevadae taudia danu, Iehova ena lalo namo bae abia diba. To edena dala ai? Iehova ese baine lalo namo henida totona, namona na Iesu Keriso baita abidadama henia bona baita bapatiso. (Ioa. 3:16) Unu amo ta hahedinaraiamu ita na eda kara dika amo vada ta helalo-kerehai bona Dirava ta gwauhamata henia ena ura baita karaia. (Apos. 2:38; 3:19) Unu ta kara tomamu neganai Iehova na e moalemu. Eda gwauhamata ta badinamu neganai, Iehova ese e lalo namo henidamu bona e gwauraidamu ita na ia turana namona.—Sal. 25:14. w24.03 rau 26 par. 1-2

Bema gavamani ese e taravatudamu basita haroro, namona na hahediba taudia baita tohotohodia, dounu baita haroro. Iehova ena heduru baita noia, hekwakwanai baita haheaukalai totona. Ita momo ese gorere, eda hemami e hadikamu ḡaudia, lalokau tauna ta e masemu, ruma bese lalonai e varamu hekwakwanai, eiava hekwakwanai ma haida daidiai ta hisihisimu. Danu pandemic bona tuari daidiai unu hekwakwanai baita haheaukalaidia na auka. Emu hemami na Iehova enai ba gwauraia hedinarai. Bona e varamu ḡauna na ia ba hamaorolaia, turamu namona ta enai boma gwauraia heḡereḡerena. Namona na ba diba Iehova na oi daimu ai kara ta be karaiamu. (Sal. 37:​3, 5) Hanaihanai baita ḡuriḡurimu karana ese be durudamu ‘dika negadia ai baita haheaukamu.’ (Roma 12:12) Iehova na mai dibana ia e tomadiho heniamu taudia be dahaka hekwakwanai e davarimu; ia ese “edia taitai danu e kamonaimu.”—Sal. 145:​18, 19. w23.05 rau 5-6 par. 12-15

Abi hidi badana ta do asita karaia ai, namona na baita hetahu “[Iehova] ena ura” be dahaka bona iena ura heḡereḡerena ai abi hidi baita kara. (Efe. 5:17) Baibul ena hahekau herevadia baita lalopararalaimu neganai, ita na Iehova ena lalohadai ese be hakaudamu. Bena Iehova ena lalohadai baita badinaiamu neganai, abi hidi maorodia baita karamu. Satana, inaida eiava “dika tauna,” na e uramu ita na tanobada ḡaudia ai baita bisi, unu amo ita na asi eda nega Dirava ena hesiai ḡaukara baita karaia. (1 Ioa. 5:19) Kristen tauna basine henari namonamomu neganai, moni, edukeisen, eiava ena ḡaukara be atodia gunamu bena Iehova ena hesiai ḡaukara idauidau be readiamu. Bema ia na unu be kara tomamu, ia na e hahedinaraiamu ina tanobada ena lalohadai ese ia na e biaguamu. Momokani, moni edukeisen bona ḡaukara na dia ḡau dikadia. To dia namo eda mauri ai unu na ḡau badadia ai baita halaodia. w24.03 rau 24 par. 16-17