Burukadia E—Umui Na Dala Momo ai Kongrigeisin O Duruamu
“Eregabe negadiai ḡau momo na karava, to hari name buruka, guna na kara ḡaudia na vada basina kara dibamu.”—Connie, laḡanina na 83.
Reana oi danu buruka dainai ḡau momo na vada basio kara dibamu. Ena be laḡani momo Iehova o hesiai henia to hari o davarimu metaudia daidiai o lalo manokamu. Heḡereḡere, reana guna o kara ḡaudia na hari o karamu ḡaudia ida o haheḡereḡerediamu. Bema unu bamona, dahaka ese baine durumu dounu ba moale?
IEHOVA BE E URAMU OI BE DAHAKA BA KARA?
Sibomu ba henanadai, ‘Iehova be e uramu lau be dahaka baina kara?’ Deuteronomi 6:5 ai, tauhalo herevana ta bo davariamu. Una siri na eto: “Iehova, emu Dirava, ba lalokau henia mai lalomu idoinai, [emu mauri idoinai, NWT] bona mai goadamu idoinai.”
Una siri ese e hahedinaraiamu, Iehova na e uramu emu noho dalana heḡereḡerenai Ia ba hesiai henia. Una ese be durumumu o karamu ḡaudia na haida ese e karamu ḡaudia, eiava eregabemu ai o karava ḡaudia ida basio haheḡereḡeremu.
Mani ina a laloa: Eregabemu negadiai Iehova be ede o hesiai henia tomava? Iehova ena taunimanima momo na be gwaumu idia na mai edia goada ibounai ida Iehova e hesiai heniava. Una heḡereḡerena, oi danu eregabemu negadiai unu o kara tomava. To hari oi na vada ome buruka dainai, edena dalai doini Iehova ba hesiai henia? Ena be emu noho dalana na e idau, to emu goada heḡereḡerenai Iehova o hesiai heniamu. Bema una bo lalopararalaiamu, bo abia daemu oi na mai goadamu ibounai ida Iehova o hesiai heniamu, guna heḡereḡerena.
Eregabemu ai mai kudoumu idoinai ida Iehova o hesiai heniava, bona o burukamu lalonai danu, do ini unu o kara tomamu
O DIBA ḠAUDIA AMO HAIDA BO DURUDIAMU
Ena be oi na buruka, oi ese basio kara diba ḡaudia na basio lalometaulai, to ba lalo una na nega namona dala idauidau ai ma haida ba durudia. Oibe, hari ina negai, eregabemu neganai so kara ḡaukaradia haida na bo kara dibamu. Heḡereḡere, ba kara diba ḡaudia na ini:
Emu mauri ai o diba ḡaudia na haida ediai ba herevalai. Baibul ai e tore mauri sivaraidia rua mani a lalodia:
King David: “Lau be gunaguna na eregabe, harihari vada na buruka; a lau ese nega hata kara maoromaoro tauna ta vada e baia na do asina itaia, eiava natuna na aniani e noi hegame ai do asina itaia.”—Sal. 37:25.
Josua: “Lau na tanobada taudia iboudiai e lao bubunimu dalana amo ba laomu. Umui iboumui ai vada o diba, lalomui ai bona laumamui ai Iehova, emui Dirava, ese ena gwau-hamata namodia iboudiai emui ai vada e hamomokanidia, ta se reaia. Iboudiai vada e momokani, ta se moru.”—Jos. 23:14.
Reana oi danu eregabemu ai hereva unu bamodia o gwauraiva. David bona Josua ese e gwaurai herevadia na mai anidia bada badina unu na edia mauri ai e itava ḡaudia. Idia na laḡani daudau Iehova e hesiai henia bona edia mauri ai e vara ḡaudia e herevalai. Una dainai edia hahegoada herevadia ese ma haida na be durudia badamu.
Bema oi na laḡani momo Iehova o hesiai henia, oi danu Iehova ese e hanamomu daladia na haida ediai ba herevalaia. Iehova ese ena taunimanima e hanamodia negana ta o laloa taomu? Bema oibe, haida ediai ba herevalaia diba! Unu bo kara tomamu neganai, emu hemami na be namomu bona bo moalemu. Bona danu, laḡani daudau Iehova o hesiai henia sivaraidia na tadikaka taihu ediai bo herevalaimu neganai idia na be hagoadadiamu.—Rom. 1:11, 12.
Haida ba hagoadadia dalana ma ta na, kongrigeisin heboudia baola. Unu bo kara tomamu neganai tadikaka taihu bo hagoadadiamu bona oi sibomu danu bo lalo goadamu. Connie, matamanai tame herevalaia taihuna na e gwa: “Hebou na laomu karana ese lau na e hagoadagumu bona asina lalo hisihisimu. Badina Kingdom Hall ai tadikaka taihu edia lalokau na mamiamu. Una dainai baina tenkiu henidia totona, harihari ḡaudia maraḡidia na henimu. Unu amo tadikaka bona taihu na bae diba lau ese idia na lalokau henidiamu.”
IEHOVA ESE IA DAINAI O KARAMU ḠAUDIA NA E LALO BADAMU
Baibul ai, abidadama taudia burukadia sivaraidia na momo. Ena be edia hesiai ḡaukara na dia guna heḡereḡerena, to Iehova ese idia na e lalokau henidiava. Mani Israel tau burukana ta ladana Simeon aita laloa. Ia na e mauri ela bona Iesu beibinai e itaia. Nega ta Simeon na dubu helaḡana ela, unuseni ai, ia ese eregabe memerodia e itadiava dubu helaḡana ai mai anina bada ḡaukaradia e karava. Simeon na buruka bona unu ḡaukara ai se heduruva dainai bema lalo Iehova ese ia na se laloa badamu. To Iehova ese Simeon be ede e laloa toma? Iehova matanai, ia na “kara maoromaoro tauna bona Dirava garina e gariva tauna” dainai, Iehova ese e hanamoa. Danu Simeon na lauma helaḡa ese e hasiahua bena Iesu Mesia ai bainela peroveta herevana e gwauraia. (Luk 2:25-35) Una ese e hahedinaraiamu, Iehova ese Simeon ena goada na se laloa, to ena abidadama karana e laloa bada.
Iehova ese Simeon e hanamoa dalana ta na, Iesu beibina ai e itaia bona Iesu Mesia ai bainela danu e perovetalaia
Ena be emu goada na mai hetoana, to namona na oi ese danu bavabia dae momokani, Iehova o hesiai heniamu karana na Ia ese e laloa badamu. Iehova matana ai emu goada heḡereḡerena ai o henimu ḡauna na ia ese e laloa badamu.—2 Ko. 8:12.
Una dainai, ba kara diba ḡaudia mo ba lalo. Heḡereḡere, haroro daladia idauidau ba ḡaukaralai ena be una na nega kwadoḡi lalonai bo karaiamu. Danu tadikaka taihu na bo hagoadadiamu bema bo rini henidiamu eiava revareva kwadoḡidia bo tore henidiamu. Oi ese Iehova na o hesiai henia daudau dainai, dala maraḡidia amo tadikaka taihu ediai lalokau karana o hahedinaraiamu neganai, una ese idia na be hagoadadiamu.
Ena be emu goada na dia heḡereḡere to dounu Iehova na bo hesiai heniamu bona emu hesiai ḡaukara na bo moalelaiamu. East Africa ai taihu ta ena ekspiriens na ina maua ladana “Burukana Enai mai Anina Bada Ḡauna” ai ba itaia.
Ba helalotao, laḡani daudau Iehova o hesiai henia bona doini Iehova o badinaiamu karana ese haida na e hagoadadiamu. Haheauka karana ai, oi na haheitalai namona, bona bavabia dae momokani, “Dirava na asi ena kara gageva-gageva; emui ḡaukara bona emui lalokau ia ladana dainai vada o hahedinarai, helaḡa taudia o durudiava bona o durudiamu, ia ese basine lalo boio.”—Heb. 6:10.
HAIDA IDURUDIA KARANA BA GOADALAIA
Hetahu ḡaukarana ta ese e hahedinaraia, burukadia na ma haida idurudia karana ese edia mauri bona lalohadai e hanamomu, bona e mauri daudaumu.
Momokani, haida ikaranamo henidia ese buruka daidiai e varamu metaudia na basine haorediamu. To Dirava ena Gavamani sibona ese Adam ena amo ta abia kara dikana dainai e varamu metaudia, heḡereḡere, mase bona buruka na be haorediamu—Rom. 5:12.
Umui burukamui na Iehova ese e ḡaukaralaimuimu momo o durudiamu Ia turana ai baela. Una ese emui abidadama na e hagoadaiamu bona emui mauri na o moalelaiamu. Burukadia e, namona na ba diba Iehova ese emui hesiai ḡaukara na e laloa badamu, bona emui abidadama karana ese tadikaka taihu na e durudiamu.