Ziliet

Zezi imit so Papa dan enn fason parfe. Li ena mem fason panse ek mem santiman ki so Papa. Nou kapav trouv sa dan seki Zezi ti dir, dan seki li ti fer, ek osi dan so bann mirak. (Zan 14:9) Ki nou kapav aprann ar bann mirak ki Zezi ti fer? Zezi ek so Papa bien kontan nou. Kan li ti lor later, Zezi ti montre ki li ti kontan bann dimounn, kan li ti fer bann mirak pou ed bann ki ti pe soufer. Enn fwa, de aveg ti sipliy Zezi pou ed zot. (Mat. 20:30-34) Zezi “ti gagn pitie” pou zot ek sa ti pous li pou geri zot. Verb Grek ki’nn servi pou tradir lexpresion “gagn pitie,” se enn santiman konpasion bien for ki enn kikenn resanti dan fon so leker. Zezi ti kontan bann dimounn. Akoz sa, li ti ena enn gran konpasion pou zot, ek sa konpasion-la ti pous li pou nouri bann dimounn ek pou geri bann ki ti ena lalep. (Mat. 15:32; Mark 1:41) Wi, Zeova, nou Bondie “konpasion ki ranpli ar tandres,” ek so Garson bien kontan nou, ek zot bien soufer kan zot trouv nou soufer. (Lik 1:78; 1 Pier 5:7) Alor, nou kapav sir ki zot ena enn gran dezir pou tir tou bann kitsoz ki fer bann dimounn soufer. w23.04 3 ¶4-5

Nou bizin fer nou maximum pou evit lir ek ekout bann move kitsoz ki bien popiler dan lemond Satan. Nou kapav ranpli nou lespri ar bann bon kitsoz kan nou lir Labib ek nou etidie li. Ek kan nou asiste bann renion ek nou prese, nou protez nou lespri. Lerla, Zeova promet nou ki Li pa pou les nou gagn enn tantasion ki nou pa kapav siporte. (1 Kor. 10:12, 13) Nou pe viv dan bann dernie zour, ek si nou anvi res fidel ar Zeova, li bien inportan ki nou priye pli souvan. Zeova anvi ki nou priye Li ek ki nou ‘dir li seki ena lor nou leker.’ (Ps. 62:8) Loue Li ek remersie Li pou tou seki Li fer. Demann Li kouraz pou to prese. Sipliy Li pou ed twa pou andir ninport ki problem ek pou reziste ninport ki tantasion ki to gagne. Ek pa les nanye ek personn anpes twa priye Zeova regilierman. w23.05 7 ¶17-18

Kifer nou asiste bann renion? Rezon prinsipal se pou donn laglwar Zeova. (Ps. 26:12; 111:1) Nou osi asiste nou bann renion pou ki nou kapav ankouraz nou bann frer ek ser kan ena bann moman difisil. (1 Tes. 5:11) Ek kan nou lev nou lame pou reponn dan renion, nou fer sa de kitsoz-la. Me kan nou reponn, nou kapav gagn bann difikilte. Kitfwa nou strese pou donn enn repons, ouswa kitfwa nou anvi reponn plis, me bann frer pa redonn nou repons kan nou lev lame. Kouma nou kapav sirmont sa bann difikilte-la? Pol ti dir ki nou priorite se “ankouraz sakenn nou kamarad.” Nou pou mwins strese pou donn enn repons, kan nou rapel ki enn sinp ti repons kapav ankouraz lezot. Ek mem si nou’nn lev nou lame plizir fwa, me ki nou pa’nn reponn souvan, nou bizin kontan parski lezot inn gagn lokazion pou reponn.—1 Pier 3:8. w23.04 20 ¶1-3

Lerwa inn fer enn lanons! Bann Zwif, ki ti an exil dan Babilonn depi apepre 70 an, ti kapav retourn dan zot pei dan Izrael. (Esdr. 1:2-4.) Zis Zeova tousel kapav fer enn kitsoz koumsa. Babilonn pa ti abitie larg so bann prizonie. (Iza. 14:4, 17) Me Babilonn ti perdi so pouvwar, ek enn nouvo dirizan ti dir bann Zwif ki zot ti kapav retourn dan zot pei. Sak Zwif, sirtou bann sef fami, ti bizin pran enn desizion: swa zot ti pou kit Babilonn, ouswa zot ti pou reste. Sa desizion-la pa ti enn desizion fasil pou pran. Boukou Zwif kitfwa ti tro vie pou fer sa long vwayaz-la. Laplipar bann Zwif ti ne dan Babilonn. Pou zot, Babilonn ti vinn zot lakaz, ek Izrael ti pei zot bann anset. Anplis, sertin parmi zot kitfwa ti bien ris. Alor, zot ti kapav trouv sa difisil pou kit zot zoli lakaz ek zot bann biznes, pou al res dan enn landrwa ki zot pa kone. w23.05 14 ¶1-2

Labib ankouraz nou pou kontign devlop landirans, konpasion, ek lamour. Lik 21:19 dir: “Gras-a zot landirans zot pou sap zot lavi.” Kolosien 3:12 dir: “Abiy zotmem ar . . . konpasion.” Ek 1 Tesalonisien 4:9, 10 dir: “Zotmem zot finn aprann ar Bondie pou kontan sakenn zot kamarad. . . . Me nou ankouraz zot, bann frer, pou kontign fer sa ankor plis.” Ti ekrir sa bann verse-la pou bann serviter Zeova ki ti deza ena landirans, konpasion, ek lamour. Selman, zot ti bizin kontign devlop sa bann kalite-la. Nou osi nou bizin fer parey! Pou ed twa fer sa, examinn bann sitiasion dan lavi bann Kretien dan premie siek, kot zot ti montre sa bann kalite-la. Apre sa, gete kouma to kapav swiv zot lexanp, pou ki to prepar twa pou gran soufrans. Lerla, kan gran soufrans pou koumanse, to pou bien deside pou kontign andire. w23.07 2 ¶4; 3 ¶8

Ki nou form parti bann “lezot mouton” ouswa nou ena lesperans pou al dan lesiel, nou bizin res lor “Semin ki Sin.” Lerla, nou pou kontign ador Zeova aster-la ek dan lavenir kan Rwayom Bondie pou fer later vinn enn zoli paradi. (Zan 10:16) Depi 1919, bann milyon dimounn inn kit Gran Babilonn, lanpir mondial fos relizion, ek zot inn koumans mars lor “Semin ki Sin.” Kan bann Zwif ti kit Babilonn, Zeova ti fer an-sort ki pena okenn obstak devan zot. (Iza. 57:14) Eski li parey pou “Semin ki Sin” dan nou lepok? Plizir santenn lane avan 1919, Zeova ti servi bann zom ki ti ena enn gran respe pou Li, pou prepar enn semin pou ki lezot kapav sorti dan Gran Babilonn. (Konpar ar Izai 40:3.) Zot ti koumans fer bann travay pou ki laplipar bann dimounn ki kontan Bondie kapav kit fos relizion ek ador Zeova ansam ar so pep. w23.05 15-16 ¶8-9

Zeova anvi ki nou servi Li volonterman ek ki nou zwaye kan nou servi Li. (2 Kor. 9:7) Alor, eski nou bizin fer zefor pou realiz enn lobzektif spiritiel mem si nou pa anvi fer li? Anou get lexanp lapot Pol. Li ti dir: “Mo disiplinn mo lekor dan enn fason sever ek mo amenn li kouma enn esklav.” (1 Kor. 9:25-27, not) Mem kan lapot Pol pa ti anvi fer seki Zeova ti demann li, Pol ti obliz limem pou fer li. Eski sa ti fer Zeova plezir? Wi! Anplis, Zeova ti rekonpans Pol pou so bann zefor. (2 Tim. 4:7, 8) Dan mem fason, Zeova kontan kan Li trouv nou fer zefor pou realiz nou lobzektif mem kan nou mank motivasion. Zeova kontan parski mem si kitfwa nou pa kontan sa lobzektif ki nou’nn fixe la, Li kone ki nou pe fer zefor pou realiz li parski nou kontan Li. Ek parey kouma Zeova ti beni lapot Pol, Li pou beni nou pou bann zefor ki nou pe fer. (Ps. 126:5) Ek kan nou trouv Zeova pe beni nou, kitfwa sa pou plis motiv nou ankor. w23.05 28-29 ¶9-10

Lapot Pol konpar bann dimounn ki pa pou sape pou zour Zeova ar bann dimounn ki pe dormi. Sa bann dimounn-la pa pe pran kont seki pe arive otour zot. Zot pa konpran bann levennman inportan ki pe arive dan lemond, ek akoz sa, zot pa kapav prepar zot pou fer fas ar sa. Azordi, laplipar bann dimounn pe dormi lor plan spiritiel. (Rom. 11:8) Zot pa krwar dan bann prev ki montre ki nou pe viv dan “bann dernie zour” ek ki gran soufrans pe koste. (2 Pier 3:3, 4) Me sak zour ki pase, li pe vinn deplizanpli inportan ki nou res eveye lor plan spiritiel. (1 Tes. 5:6) Alor, kifer nou bizin gard nou lespri kler ek res kalm? Nou bizin fer sa pou ki nou pa inplik nou dan bann zafer politik ek bann problem sosial sa lemond-la. Plis zour Zeova pe koste, plis bann dimounn pou met presion lor nou pou ki nou inplik nou dan sa de domenn-la. Kan sa pou arive, fode pa nou trakase, parski lespri sin Zeova pou ed nou pou nou gard nou lespri kler, pou nou res kalm, ek pou nou pran bann bon desizion.—Lik 12:11, 12. w23.06 9-10 ¶6-7

Ki to mazine kan to tann nom Sanson? Sirman to rapel ki li ti enn zom bien for, pa vre! Selman, Sanson ti pran enn desizion ki ti fer li bien soufer. Kanmem sa, Zeova ti res konsantre lor tou seki Sanson ti fer pou servi Li, ek Li’nn fer ekrir zistwar sa zom fidel la dan Labib pou ki nou kapav tir bann leson. Zeova ti servi Sanson pou fer bann kitsoz extraordiner pou ed So pep. Plizir santenn lane apre lamor Sanson, Zeova ti fer lapot Pol met nom Sanson lor lalis bann zom ki ti ena enn gran lafwa. (Ebre 11:32-34) Lexanp Sanson kapav ankouraz nou, parski li ti kont lor Zeova mem kan li ti gagn bann difikilte. w23.09 2 ¶1-2

Nou pou ena plis landirans si nou priye Zeova souvan ek nou dir Li tou seki pe trakas nou. (1 Tes. 5:17) Pou linstan, kitfwa to pa pe fer fas ar enn gro difikilte. Me eski to ena labitid pou priye Zeova ek pou demann Li so led kan to tris, to trakase, ouswa kan to pa kone seki to bizin fer? Si depi aster-la mem, to ena labitid pou rod led Zeova regilierman kan to gagn bann ti difikilte, to pa pou ezite pou rod so led kan to pou gagn bann pli gro difikilte dan lavenir. Kan to priye Zeova regilierman, to montre ki to ena konfians ki Zeova kone ki meyer moman pou ed twa ek kouma Li bizin ed twa. (Ps. 27:1, 3) Kan nou andir bann difikilte ki nou gagne azordi, sa fer nou ena plis landirans, ek sa pou ed nou pou andir bann difikilte ki nou pou gagne pandan gran soufrans. (Rom. 5:3) Kifer nou dir sa? Boukou frer ek ser dir ki sak fwa ki zot andir enn leprev, sa donn zot lafors pou andir prosin leprev. Kan zot inn reisi andir enn leprev gras-a led Zeova, zot lafwa inn vinn pli for, ek sa lafwa-la inn ed zot pou andir prosin leprev ki zot inn gagne.—Zak 1:2-4. w23.07 3 ¶7-8

Zeova rezonab parski Li ena limilite ek konpasion. Anou get enn lexanp limilite Zeova. Avan ki Li detrir lavil Sodom, Zeova ti avoy bann anz pou donn Lot bann instriksion. Lot ti bizin sove ek al dan bann montagn. Selman, Lot ti gagn per pou al laba. Alor, li ti sipliy Zeova pou ki li ek so fami al dan lavil Zoar, enn ti lavil ki Zeova ti pou detrir. Zeova ti kapav dir Lot ki li oblize obeir So bann instriksion. Me olie sa, Zeova ti les Lot al Zoar, ek Li pa ti detrir sa lavil-la. (Zen. 19:18-22) Plizir santenn lane apre, Zeova ti montre konpasion anver bann abitan Niniv. Li ti avoy so profet Zonas pou anons destriksion lavil Niniv ek so bann abitan. Me kan bann Ninivit ti repanti, Zeova ti pardonn zot ek Li pa ti detrir lavil-la.—Zonas 3:1, 10; 4:10, 11. w23.07 21 ¶5

Ki nou kapav aprann ar lexanp Zoas? Zoas ti koumadir enn pie ki so rasinn pa profon dan later. Li ti bizin enn dibwa pou tini li, ek sa dibwa-la ti Zoad. Me kan ti nepli ena sa dibwa-la, setadir kan Zoad ti mor, Zoas ti koumans ekout bann ki pa servi Zeova. Akoz sa, li pa ti res fidel ar Zeova. Ki nou aprann ar sa lexanp-la? Sa lexanp-la montre nou ki fode pa nou obeir Zeova zis akoz nou fami ouswa akoz bann frer ek ser dan lasanble. Pou nou res pros ar Zeova, nou bizin ogmant nou lamour ek nou respe pou Li. Nou fer sa kan nou etidie regilierman, kan nou reflesi lor seki nou etidie, ek kan nou priye Zeova. (Zer. 17:7, 8; Kol. 2:6, 7) Zeova pa demann nou pou fer bann kitsoz ki nou pa kapav fer. Nou trouv seki Li demann nou dan Ekleziast 12:13, ki dir: “Ena lakrint pou vre Bondie ek gard so bann komannman, parski se tou seki enn dimounn bizin fer.” Kan nou ena enn gran respe pou Bondie, nou pou res fidel anver Li ninport ki arive. Nanye pa pou kapav kas nou lamitie ar Zeova! w23.06 18-19 ¶17-19

Nou gagn enn garanti ki Zeova pou tini so promes parski verse 5 koumans koumsa: “Sa Kikenn ki ti pe asize lor tronn la ti dir.” (Rev. 21:5a) Sa bann parol-la zot spesial parski dan liv Revelasion, Zeova koz zis trwa fwa, ek sa se enn parmi sa trwa fwa-la. Alor, se pa enn anz, ni Zezi ki donn nou sa garanti-la; se Zeova Limem! Sa montre ki nou kapav ena foul konfians dan seki Zeova pou dir apre. Kifer nou dir sa? Parski Zeova “pa kapav koz manti.” (Tit 1:2) Alor, bann parol ki ena dan Revelasion 21:5, 6, zot pou vremem realize. Apre sa, Zeova dir: “Gete!” Dan liv Revelasion, souvan ena mo “gete!” Ki sa verse-la dir apre? Bondie dir: “Mo pe fer tou kitsoz nouvo.” Li vre ki Zeova pe koz lor bann sanzman ki pou ena dan lavenir. Me Li telman sir ki Li pou realiz so promes, ki Li dir ki Li pe deza fer sa bann sanzman-la.—Iza. 46:10. w23.11 3-4 ¶7-8

Lapot Pier ti bizin kontign lit kont so bann febles. Anou get de-trwa erer ki Pier ti fer. Kan Zezi ti dir ki li ti pou bizin soufer ek mor pou akonpli enn profesi, Pier ti dir Zezi ki sa pa ti pou arive. (Mark 8:31-33) Pier ek bann lezot zapot plizir fwa ti diskite ant zot pou kone kisann-la ki pli gran. (Mark 9:33, 34) Ek lanwit avan lamor Zezi, Pier ti koup zorey enn zom. (Zan 18:10) Sa lanwit-la, Pier ti telman per ki trwa fwa li ti dir ki li pa konn Zezi. (Mark 14:66-72) Pier ti bien plore akoz sa. Mem si Pier ti bien dekouraze, Zezi pa ti abandonn li. Apre so rezireksion, Zezi ti donn Pier lokazion pou dir li ki kantite li kontan li. Lerla, Zezi ti demann Pier pou okip so bann mouton. (Zan 21:15-17) Pier ti fer seki Zezi ti demann li. Zour Lapantkot, li ti dan Zerizalem ek li ti parmi bann premie pou gagn lespri sin. w23.09 22 ¶6-7

Lapot Pier ti ankouraz bann ansien pou “pran swin troupo Bondie.” (1 Pier 5:1-4) Si to enn ansien, nou kone ki to kontan to bann frer ek ser, ek ki to anvi pran zot swin. Selman, kitfwa parfwa to tro okipe, ouswa to telman fatige ki to pa reisi pran zot swin kouma bizin. Ki kitsoz to kapav fer? Devid to leker ar Zeova. Pier ti dir: “Si enn kikenn servi lezot, ki li kont lor lafors ki Bondie done pou li fer sa.” (1 Pier 4:11) To bann frer ek ser kitfwa pe fer fas ar bann difikilte ki zis lemond nouvo pou kapav regle. Ek pa bliye ki Zezi Kris, “sef bann berze,” kapav ed zot pli bien ki ninport kisann-la. Li kapav fer sa depi azordi, ek li pou fer li dan lemond nouvo. Seki Zeova demann bann ansien azordi, se pou kontan zot bann frer ek ser, pou pran zot swin, ek pou vinn “bann lexanp pou troupo-la.” w23.09 29-30 ¶13-14

Si nou pans parey kouma bann dimounn ki pena respe pou bann lalwa Zeova, nou pou koumans inior Zeova ek so bann prinsip. (1 Kor. 3:19) Souvan, “sazes sa lemond-la” inflians bann dimounn pou dezobeir Bondie. Dan Pergam ek Tiatir, sertin Kretien ti les zot inflianse par bann dimounn ki ti imoral ek ki ti ador bann zidol. Zezi ti donn sa lasanble-la bann konsey bien for parski zot ti pe toler limoralite sexiel. (Rev. 2:14, 20) Azordi osi, bann dimounn kapav esey inflians nou pou aksepte bann fos rezonnman. Nou bann fami ek nou bann kamarad kapav esey konvink nou ki nou tro strik ek nou pa oblize swiv bann lalwa Zeova. Par exanp, zot kapav dir nou ki nou kapav fer seki nou anvi ek ki bann prinsip moral Zeova nepli lamod. Parfwa, nou kapav panse ki instriksion ki Zeova donn nou, zot pa ase kler. Ek akoz sa, nou kapav “al pli lwin ki seki finn ekrir.”—1 Kor. 4:6. w23.07 16 ¶10-11

Mari, Zezi so mama, ti bizin lafors pou fer volonte Zeova. Alor ki li pa ti ankor marye, li ti tom ansint. Se premie fwa ki li ti pou elve enn zanfan, ek sa zanfan-la ti pou vinn Lemesi. Anplis, li ti ankor vierz, alor kouma li ti pou explik tousala Zozef, so fianse? (Lik 1:26-33) Kouma Mari ti gagn lafors? Li ti rod led ar lezot. Par exanp, li ti demann anz Gabriel plis linformasion lor responsabilite ki li ti pou gagne. (Lik 1:34) Apre sa, li ti fer enn long vwayaz pou al “dan bann montagn” Zida, pou vizit enn so fami ki ti apel Elizabet. Laba, Mari ti gagn lankourazman ki li ti bizin, ek Elizabet ti felisit li. Anplis, lespri sin Zeova ti vinn lor Elizabet ek li ti partaz ar Mari enn profesi konsernan so garson ki ti pou vinn Lemesi. (Lik 1:39-45) Lerla, Mari ti dir ki Zeova ti “fer bann kitsoz bien pwisan avek so lebra.” (Lik 1:46-51) Zeova ti donn Mari lafors gras-a anz Gabriel ek Elizabet. w23.10 14-15 ¶10-12

Gras-a so lespri sin, Zeova inn swazir enn ti group Kretien pou ki zot ena enn relasion spesial avek Li. Sa 144,000 Kretien la pou servi kouma pret dan lesiel ansam ar Zezi. (Rev 14:1) Plas ki Sin dan tabernak reprezant zot kondision kouma bann garson spiritiel Bondie; Zeova inn adopte zot alor ki zot ankor lor later. (Rom. 8:15-17) Plas ki Pli Sin dan tabernak reprezant lesiel, plas kot Zeova ete. “Rido” ki ti ena ant Plas ki Sin ek Plas ki Pli Sin reprezant lekor imin Zezi. So lekor ti anpes li rant dan lesiel pou li vinn Gran Pret dan tanp spiritiel Bondie. Kan li’nn sakrifie so lekor imin pou bann dimounn, Zezi inn ouver enn sime pou ki bann Kretien ki ena lesperans pou al dan lesiel kapav gagn zot rekonpans. Selman, zot osi zot bizin abandonn zot lekor imin pou ki zot kapav al dan lesiel.—Ebre 10:19, 20; 1 Kor. 15:50. w23.10 28 ¶13

Zedeon ti res kalm kan bann Efraimit ti kritik li. (Ziz 8:1-3) Li pa ti sap lor kal. Li ti montre ki li ena limilite kan li ti ekout zot ek reponn zot avek zantiyes. Lerla, bann Efraimit ti kalme. Bann ansien ki ena sazes swiv lexanp Zedeon, kan zot ekout bien ek zot reponn ar zantiyes kan lezot kritik zot. (Zak 3:13.) Kan zot fer sa, zot ede pou ki ena lape dan lasanble. Kan lezot ti donn Zedeon laglwar parski li ti gagn laviktwar lor bann Madianit, li pa ti pran sa laglwar-la pou li. Li ti donn tou laglwar Zeova. (Ziz 8:22, 23) Kouma bann ansien kapav swiv lexanp Zedeon? Zot kapav donn Zeova laglwar pou tou seki zot reisi fer. (1 Kor. 4:6, 7) Par exanp, si lezot felisit enn ansien parski li’nn fer enn zoli diskour, li kapav dir ki li’nn reisi fer sa gras-a bann instriksion ki ena dan Labib ek bann formasion ki lorganizasion Zeova done. Detanzantan, bann ansien bizin reflesi si zot pe atir latansion lor zotmem. w23.06 4 ¶7-8

Si nou panse ki Zeova pa’nn reponn nou lapriyer, nou bizin poz noumem sa kestion-la, ‘Eski se pou samem ki mo bizin priye?’ Bien souvan, nou panse nou kone ki kitsoz pli bon pou nou. Me pou Zeova, kitfwa se pa sa kitsoz-la ki pli bon pou nou. Par exanp, kitfwa nou ena enn problem ek nou panse ki nou konn solision sa problem-la. Kitfwa nou pe priye Zeova pou sa. Selman, Zeova kapav ena enn pli bon solision pou sa problem-la. Anplis, li kapav arive osi ki nou demann Zeova bann kitsoz ki pa an-akor avek so volonte. (1 Zan 5:14) Anou get lexanp bann paran ki ti demann Zeova pou fer zot zanfan res dan laverite. Se enn bon kitsoz ki zot inn demann Zeova. Selman, Zeova pa fors personn pou servi Li. Li anvi ki nou tou, mem nou bann zanfan, swazir pou servi Li. (Det. 10:12, 13; 30:19, 20) Alor, ki kitsoz sa bann paran-la ti kapav demann Zeova? Zot ti kapav demann Li pou ed zot pou tous leker zot zanfan pou ki li aprann kontan Zeova ek li vinn So kamarad.—Prov. 22:6; Efe. 6:4. w23.11 21 ¶5; 23 ¶12

Kifer kan nou rekonfort lezot, sa montre ki nou kontan zot? Dapre enn referans Biblik, mo ki Pol servi pou “rekonfort” vedir “debout akote ar enn dimounn pou ankouraz li kan li pe pas dan bann sitiasion difisil.” Alor, kan nou rekonfort enn kikenn ki dan difikilte, nou ed li pou releve ek pou kontign servi Zeova avek fidelite. Sak fwa ki nou rekonfort enn frer ouswa enn ser, nou montre ki nou kontan li. (2 Kor. 7:6, 7, 13) Ki lien ena ant konpasion ek rekonfor? Konpasion li pous enn kikenn pou rekonfort lezot ek pou esey soulaz zot. Alor, kan nou ena konpasion, sa ed nou pou rekonfort lezot. Pol explike ki konpasion ki Zeova ena pou bann dimounn ti pous Li pou rekonfort zot. Akoz sa, li dir ki Zeova Li “Papa ki ena boukou mizerikord ek Bondie ki konsol bann dimounn dan tou kalite sitiasion.”—2 Kor. 1:3. w23.11 9-10 ¶8-10

Tou bann disip Zezi kone ki zot pou gagn bann leprev. Anou get lexanp lapot Pol. Li ti dir bann Kretien Tesalonik: “Kan nou ti avek zot, nou ti abitie dir zot alavans ki nou pou pas dan bann leprev, ek se samem ki’nn arive.” (1 Tes. 3:4) Ek li ti dir bann Korintien: “Mo bann frer, nou pa anvi kasiet zot bann difikilte ki nou’nn gagne . . . nou ti mem per pou nou lavi.” (2 Kor. 1:8; 11:23-27) Azordi osi, bann Kretien kone ki zot pou gagn tou kalite leprev. (2 Tim. 3:12) Kan to’nn vinn dan laverite, eski to bann fami ek to bann kamarad inn boufonn twa, ouswa maltret twa? Eski to’nn gagn bann problem dan travay parski to “onet dan tou kitsoz”? (Ebre 13:18) Eski gouvernman inn persekit twa parski to pe koz lor to lesperans ar lezot? Pol dir ki nou bizin zwaye kan nou gagn bann leprev. w23.12 10-11 ¶9-10

Zakob ti gagn boukou difikilte. De garson Zakob, Simeon ek Levi, ti zet dezoner lor zot fami ek lor nom Zeova. Anplis, madam ki Zakob ti bien kontan, Rasel, ti mor kan li ti akous so deziem zanfan. Ti ena osi enn gran lafaminn, ek akoz sa, Zakob ti oblize al res Lezip, mem si li ti bien vie. (Zen. 35:16-19; 37:28; 45:9-11, 28) Malgre tou so bann difikilte, Zakob ti kontign ena lafwa dan Zeova ek So bann promes. Ek Zeova ti montre Zakob ki li ti ena So faver. Par exanp, Zeova ti fer Zakob gagn boukou dibien. Ek Zakob sirman ti bien rekonesan anver Zeova kan li ti retrouv so garson Zozef, ki li ti panse ti mor depi bien lontan. Zakob ti reisi andir so bann difikilte parski li ti ena enn bon lamitie ar Zeova. (Zen. 30:43; 32:9, 10; 46:28-30) Si nou osi nou ena enn bon lamitie avek Zeova, nou pou kapav andir ninport ki difikilte nou gagne. w23.04 15 ¶6-7

Dan Psom 23, David montre ki li sir ki Zeova kontan li ek ki Li pou pran li swin. Li dekrir lamitie ki ena ant li ek Zeova, ek li dir ki Zeova se so Berze. David ti kont lor Zeova, ek li ti santi li an sekirite parski li ti les Zeova diriz li. David ti kone ki Zeova ti pou montre li So lamour toulezour. Kifer David ti sir ki Zeova kontan li? David ti sir ki Zeova ti pou pran li swin parski Zeova inn touletan donn li seki li bizin. Li ti kone osi ki Zeova ti so kamarad, ek ki li ti ena So faver. Se akoz sa ki li ti sir ki, ninport ki arive dan lavenir, Zeova ti pou kontign pran li swin ek donn li seki li bizin. David ti telman sir ki Zeova kontan li, ki sa ti ed li pou li pa trakase. Okontrer, li ti kontant li ar seki li ti ena, ek li ti ere.—Ps. 16:11. w24.01 29 ¶12-13

Depi Deziem Lager Mondial, bann Temwin Zeova inn kapav pres dan pli boukou pei. Gras-a sa, boukou dimounn inn aprann konn Zeova, ek bann serviter Zeova pe kontign prese partou lor later. Azordi, bann frer Komite Santral kontign kont lor Zezi pou gid zot. Zot anvi donn bann frer ek ser bann instriksion kot ena fason panse Zeova. Ek zot servi bann responsab sirkonskripsion ek bann ansien pou donn sa bann instriksion-la dan bann lasanble. Bann ansien, zot dan Zezi “so lame drwat.” (Rev. 2:1) Li vre ki bann ansien zot inparfe ek ki zot fer bann erer. Moiz, Zozwe, ek bann zapot osi ti fer bann erer. (Nonb 20:12; Zozwe 9:14, 15; Rom. 3:23) Selman, Zezi pe servi esklav fidel ek saz ek bann ansien pou gid bann serviter Zeova, ek li pou kontign fer sa. Alor, nou bizin fer li konfians ek swiv bann instriksion ki li donn nou atraver sa bann zom-la. w24.02 23 ¶13-14

Kouma nou kapav fer Zeova plezir azordi? Nou fer sa kan nou koz lor Zeova ar lezot, ek kan nou montre ki kantite nou kontan Li ek nou rekonesan anver Li. Kan nou prese, nou lobzektif prinsipal se pou ed lezot pou vinn pros ar Li ek pou ed zot trouve ki kalite Bondie Li ete. (Zak 4:8) Kan nou koz ar bann dimounn, nou kontan montre zot dan Labib kouma Zeova Li enn Bondie ki ena lamour, lazistis, sazes, pwisans, ek lezot kalite ankor. Nou loue Zeova ek nou fer Li plezir osi, kan nou fer tou seki nou kapav pou imit Li. Kan nou fer tousala, lezot pou remarke ki nou diferan ar bann dimounn ki form parti sa move lemond-la. (Mat. 5:14-16) Lerla, nou gagn lokazion pou explik zot kifer nou diferan, ek nou ede pou ki bann dimounn ki sinser vinn pros ar Zeova. Kan nou loue Zeova dan tou sa bann fason-la, nou fer so leker kontan.—1 Tim. 2:3, 4. w24.02 10 ¶7

Pou to vinn enn Kretien ki ena matirite, to bizin devlop bann kapasite ki itil. Sa pou ed twa pou asim bann responsabilite ki to pou gagne dan lasanble. Sa pou osi ed twa pou to gagn enn travay pou to kapav pran twa ek to fami swin. Ek sa pou osi ed twa pou ena enn bon relasion avek lezot. Par exanp, aprann lir ek ekrir bien. Labib dir ki, pou ki enn kikenn li ere ek li reisi so lavi, li bizin lir Parol Bondie toulezour ek reflesi lor la. (Ps. 1:1-3) Kan to lir Labib toulezour, to pou aprann konn Zeova so fason panse, ek sa pou ed twa pou pans parey kouma Li. (Prov. 1:3, 4) Dan lasanble, nou bann frer ek ser bizin bann zom ki kapav ansegne ek donn bann konsey ki sorti dan Labib. Si to lir ek ekrir bien, to pou kapav prepar bann diskour ek bann repons ki pou ankouraz lezot ek ogmant zot lafwa. To pou kapav osi pran bann not ki itil pou fer to lafwa vinn pli for ek pou ankouraz lezot. w23.12 26-27 ¶9-11

Kan to per, reflesi lor seki Zeova pou fer dan lavenir. Reflesi seki to pou resanti kan Satan pou nepli existe. Dan Lasanble Rezional 2014, ti ena enn demonstrasion ki ti montre enn papa ki pe explik so fami kouma 2 Timote 3:1-5 ti pou bien diferan si sa bann verse-la ti pe koz lor lavi dan Paradi. Li ti dir zot: “Dan lemond nouvo, nou pou ena enn zoli lavi, parski bann dimounn pou kontan sakenn zot kamarad, zot pou kontan bann kitsoz spiritiel, zot pou ena modesti ek limilite, zot pou loue Bondie ek obeir zot paran, zot pou rekonesan ek fidel, zot pou kontan zot fami, zot pou dakor ant zotmem, zot pou koz an bien lor lezot, zot pou kontrol zotmem, zot pou ena douser ek pou kontan seki bon, zot pou bann dimounn ki kapav fer konfians, zot pa pou teti ek orgeye, zot pou kontan Bondie plito ki bann plezir, zot pou vremem atase ar Bondie; res pros ar sa kalite dimounn-la.” Kan to koz ar to fami ouswa ar to bann frer ek ser, eski souvan to koz lor kouma nou lavi pou ete dan lemond nouvo? w24.01 6 ¶13-14

Sa bien rasir nou kan nou kone ki pep Zeova ena so faver, pa vre! Labib dir: “Zeova kontan so pep.” (Ps. 149:4) Selman, parfwa sertin telman dekouraze ki zot demann zotmem, ‘Eski mwa osi mo ena faver Zeova?’ Dan Labib, ena lexanp boukou fidel serviter Zeova ki ti ena sa santiman-la. (1 Sam. 1:6-10; Zob 29:2, 4; Ps. 51:11) Labib montre ki bann dimounn inparfe kapav gagn faver Zeova. Pou nou gagn faver Zeova, nou bizin ena lafwa dan Zezi ek pran batem. (Zan 3:16) Kan nou fer sa, nou montre ki nou’nn repanti ek ki nou’nn promet Zeova ki nou pou fer so volonte. (Zist. 2:38; 3:19) Zeova bien kontan kan nou fer sa bann kitsoz-la, parski sa montre ki nou anvi vinn pros ar Li. Tanki nou fer tou seki nou kapav pou tini promes ki nou’nn fer Li, nou pou gagn so faver ek Li pou konsider nou kouma so kamarad.—Ps. 25:14. w24.03 26 ¶1-2

Nou kapav swiv lexanp bann disip kan nou kontign prese mem si bann gouvernman demann nou pou arete. Nou kapav sir ki Zeova pou ed nou pou nou kontign prese. Alor, priye pou gagn kouraz ek sazes, ek osi demann Zeova so led pou andire malgre bann difikilte. Boukou parmi nou pe soufer akoz enn maladi ouswa akoz bann problem emosionel. Kitfwa enn kikenn ki zot kontan inn mor, zot ena bann problem familial, zot pe gagn persekision, ouswa zot ena lezot problem ankor. Ek bann kitsoz kouma pandemi ouswa bann lager, inn rann nou lavi pli difisil ankor. Alor, ouver to leker ar Zeova. Explik Li to sitiasion, parey kouma to ti pou fer ar enn bon kamarad. To kapav sir ki Zeova “pou ed twa.” (Ps. 37:3, 5) Kan nou kontign priye, sa pou ed nou pou “andire dan leprev.” (Rom. 12:12) Zeova konn bann difikilte ki so bann serviter gagne ek “li tann zot soufrans.”—Ps. 145:18, 19. w23.05 5-6 ¶12-15

Kan nou ena bann desizion inportan pou pran, nou bizin “konpran ki volonte Zeova ete,” ek apre sa, nou bizin azir an-akor ar so volonte. (Efe. 5:17) Par exanp, kan nou pe fer fas ar enn sitiasion difisil, nou bizin konn fason panse Zeova lor la. Pou nou konn fason panse Zeova, nou bizin rod bann prinsip Labib ki pou itil dan sa sitiasion-la. Ek kan nou’nn trouv sa bann prinsip-la, nou bizin met zot an pratik. Lerla, sa pou ed nou pou pran bann bon desizion. Satan, “sa kikenn ki move la,” anvi ki nou telman okipe ar bann kitsoz sa lemond-la, ki nou nepli ena letan pou servi Zeova. (1 Zan 5:19) Par exanp, si enn Kretien fer bann kitsoz materyel, so letid, ouswa so karyer pas avan so servis pou Zeova, sa montre ki li’nn les li inflianse par fason panse sa lemond-la. Mem si pena nanye demal ar sa bann kitsoz-la, fode zame ki zot pas an premie dan nou lavi. w24.03 24 ¶16-17