Faly Foana Aho Manao ny Sitrapon’Andriamanitra

Notantarain’i Bill Yaremchuk

Misionera nahazo diplaoman’ny Sekoly Ara-baibolin’i Gileada, kilasy fahavalo aho. Natao tany South Lansing, Etazonia, izy io. Tany Singapour no nanendrena ahy. Nanainga ho any amin’io tany lavitra be io àry aho, tamin’ny Martsa 1947.

IDAVE FARMER, avy any Kanada no misionera namako. Nahazo diplaoma tamin’ny kilasy fahafiton’i Gileada izy. Sambo mpiady taloha nantsoina hoe Marine Adder no nandehananay, niala tao San Francisco, Kalifornia.

I Hong-Kong no toerana voalohany nijanonanay tany Azia. Tena nampalahelo ny zavatra hitanay tao. Ravan’ny Ady Lehibe II ilay tanàna. Feno olona natory teny an-tsisin-dalana. Mosarena sy toy ny efa ho faty izy ireo. Niverina tao amin’ny sambo izahay avy eo, ary nankany Manille, renivohitr’i Philippines.

Nampivarahontsana koa ny zava-nisy tany vokatry ny ady. Nahantra ny olona. Feno sambo potika ny seranana, noho ny zera baomba nataon’ny tafika mpiray dina. Nihaona tamin’ny Vavolombelon’i Jehovah vitsivitsy izahay, ary nentiny tany amin’ny Efitrano Fanjakana. Faly izy ireo na sarotra aza ny fiainany.

Tao Batavia (Jakarta ankehitriny), any Indonezia, no nijanonanay manaraka. Nisy fifandonana tsy lavitra teo, noho ny ady an-trano, ka tsy navela hidina ny sambo izahay. Niainga ho any Singapour indray izahay avy eo. Natahotra aho hoe inona no niandry anay tany. Dia izao ve sisa no niafaran’ilay Azia mahafinaritra hitanay tamin’ny boky momba ny fizahan-tany!

Nisinda anefa ny tahotro, afaka andro vitsivitsy. Nisy zava-nitranga mantsy nahitako fa asan’Andriamanitra tokoa no nanirahana anay sy Dave.

Saika tsy nahazo niditra

Iray volana teo ho eo taorian’ny nialanay tany San Francisco, dia tonga teo amin’ny Nosy Saint John izahay. Nijanona kely tao ny sambo vao niditra an’i Singapour. Tonga ny tompon’andraikitry ny fifindra-monina, hisava ny taratasin’ny mpandeha. Nasiana fitomboka hoe “Mahazo Miditra” ny pasipaoronay. Nankeny amin’ny seranan’i Singapour ny sambo, ny ampitso maraina. Nidina izahay, rehefa avy nijery ny taratasinay ny tompon’andraikitra iray tao amin’ny sambo.

Niverina izahay ny ampitso, mba hanao veloma an’ireo misionera niaraka sambo taminay. Mbola hankany Inde sy Ceylan (Sri Lanka ankehitriny), toerana nanendrena azy, mantsy izy ireo. Nanatona ilay kapitenin-tsambo rehefa nahita anay. Tezitra be izy ka nivazavaza hoe tsy tokony ho nidina ny sambo izahay. Tamin’ny mbola teny an-dranomasina mantsy, dia nandidy azy mba tsy hamela anay hidina A^toa Haxworth, mpanara-maso ny fifindra-monina. Samy tsy nahalala izany anefa na izahay, na ilay tompon’andraikitra namela anay hidina.

Nentina tany amin’A^toa Haxworth izahay avy eo. Tezitra be koa izy ka nivazavaza hoe: ‘Efa norarako ianareo tsy hiditra eto Singapour!’ Nasehonay azy àry ny pasipaoronay, nisy fitomboka hoe “Mahazo Miditra.” Nosintoniny ilay izy, ary notsipitsipihiny ilay fitomboka. Tsy nisy azo natao intsony anefa, satria efa lasa ny sambo! Notazonin’A^toa Haxworth nandritra ny herintaona ny pasipaoronay. Naveriny ihany ilay izy, ary nasiany fitomboka vaovao hoe “Mahazo Miditra.”

Nahita vokatra tamin’ny fanompoana

I Joshua irery no Vavolombelona tany Singapour, rehefa tonga izahay tamin’ny Aprily 1947. Mpitory manontolo andro, na mpisava lalana izy, mandra-pahafatiny taoriana kelin’ny 1970. Tsy ela dia lasa mpitory ny olona sasany nampianarinay Baiboly. Nivaly tsikelikely àry ny vavakay, ka nisy mpiasa maro kokoa nanao ilay fijinjana ara-panahy.—Matio 9:37, 38.

Nanao vakansy ela be tany Angletera A^toa Haxworth, tamin’ny 1949. Nisy misionera enina nanatrika ny Sekolin’i Gileada, kilasy faha-11, tonga tany Singapour tamin’izay. Narary i Dave, ilay misionera namako nandritra ny taona maro, ka tsy maintsy nandeha. Nifindra tany Aostralia izy, ary tsy nivadika mihitsy mandra-pahafatiny tamin’ny 1973. Anisan’ireo misionera enina vao tonga i Aileen Franks. Nivady izahay tamin’ny 1956.

Betsaka ny olona nampianarinay Baiboly, nandritra ny taona maro. Lasa Vavolombelona izy ireny sy ny zanany. Mpanompo manontolo andro any an-tany hafa aza ny sasany ankehitriny. Anisan’ireny i Lester sy Joanie Haynes, mpivady amerikanina nipetraka tany Singapour. Nampianatra Baiboly azy ireo izahay, taorian’ny 1950. Nandroso haingana izy ireo, ary natao batisa rehefa niverina tany Etazonia. Nahita vokatra tsara tamin’ny fanompoana i Lester sy Joanie. Maro no nampian’izy ireo ho lasa Vavolombelona, anisan’izany ny zanany telo.

Nanoratra toy izao i Joanie: “Tena nanova ny fiainanay ireny tany Singapour ireny. Raha tsy nampianareo izahay, dia angamba mbola nandehandeha eran’izao tontolo izao. Faly aho fa ianao no nampianatra an’i Lester ny fahamarinana. Efa hatramin’ny voalohany mantsy ianao no nanampy azy ho tia an’i Jehovah sy ireo rahalahy kristianina. Tsy hadinony mihitsy izany.”

Fiovana tsy nampoizina

Nisy fiovana lehibe teo amin’ny fiainanay, tamin’ny 1962. Nilaza ny dokoteranay fa bevohoka i Aileen. Mbola te hanohy ny asa misionera izahay, nefa aiza moa no hahavitanay izany raha sady hitaiza? Nanoratra ho anay i Nathan Knorr, izay niandraikitra ny asan’ny Vavolombelon’i Jehovah eran-tany, tamin’izany. Nasainy nitady asa aho mba hahafahanay hijanona tany Singapour. Tena sarotra anefa izany.

Mpitantana orinasa vahiny ny ankamaroan’ireo mpiavy tany. Tsy nanana traikefa tamin’izany mihitsy anefa aho. Nanompo manontolo andro foana mantsy aho raha vao vita ny fianarako, 23 taona lasa teo ho eo. Nifandray tamin’ny sampan-draharaha mpanao tolotr’asa iray tany Londres aho. Nohazavaiko fa misionera aho, ary ny fitoriana efa vitako no traikefa itadiavako asa. Nalefany tany amin’ny orinasa iraisam-pirenena maro tany Singapour izany.

Izao foana no valiny voaraiko: “Miala tsiny fa tsy manana asa mifanentana amin’ny fahaizanao izahay.” Noheverin’izy ireo mantsy fa be traikefa loatra aho! Nandeha teny ny volana, ary teraka i Judy zanakay vavikely. Nitsidika an’i Singapour ny Rahalahy Knorr tamin’izay, ary namangy an’i Judy sy Aileen tany amin’ny hopitaly. Nanome toky izy hoe: “Mahazo mijanona ao amin’ny tranon’ny misionera ianareo, mandra-pahitan’i Bill asa.”

Nahita asa aho, volana vitsivitsy tatỳ aoriana. Niara-niasa tamin’ny kompaniam-pitaterana ana habakabaka iraisam-pirenena iray aho. Zara raha ampy nivelomanay ny karamako. Niara-niasa tamina kompaniam-pitaterana ana habakabaka amerikanina indray aho, roa taona tatỳ aoriana. Lasa avo roa heny ny karamako. Nanjary nanana traikefa tamin’ilay asa aho. Afaka nanokana fotoana bebe kokoa ho an’ny fianakaviako sy ny fanompoana àry aho.

Ny fanompoana an’i Jehovah foana no nataonay loha laharana teo amin’ny fiainana. Nahazo tombontsoam-panompoana maro aho noho izany. Lasa mpanompo manontolo andro indray i Aileen. Nandroso be ny fitoriana tany Singapour tamin’izany. Nividy trano nisy rihana tao afovoan-tanàna izahay, tamin’ny 1965 tany ho any. Nataonay Efitrano Fanjakana ilay izy, ary fiangonana efatra no nivory tao.

Voarara ny asa fitoriana!

Nananontanona anefa ny fanenjehana. Nandeha nivory, toy ny mahazatra, tany amin’ny Efitrano Fanjakana izahay, ny 14 Janoary 1972. Nisy nanidy rojo vy sy kadanà anefa ny vavahady. Nisy soratra teo hoe: ‘Nofoanana tao amin’ny bokim-panjakana ny Fiangonan’ny Vavolombelon’i Jehovah eto Singapour.’ Norarana ny asa fitorianay!a

Tsy nahasakana anay tsy hanompo an’i Jehovah ny fanidiana ny Efitrano Fanjakana. Nieritreritra anefa aho hoe: ‘Inona no tian’Andriamanitra hataonay telo mianaka? Raha sanatria roahin’ny fanjakana mantsy izahay, dia tsy ho afaka hiverina eto Singapour intsony, ka tsy hahita an’ireo namanay.’ Nangataka tamin’ny lehibenay àry aho, mba hiasa any Kuala Lumpur, any Malezia. Ho afaka hankany Singapour matetika izahay amin’izay. Gaga aho fa nomeny asana tale tany Kuala Lumpur, ary ho avo roa heny ny karamako, sady hahazo tombontsoa maro hafa aho.

Nieritreritra indray aho hoe: ‘Sitrapon’Andriamanitra ve ny hialanay eto Singapour sy handaozanay an’ireo rahalahy?’ Nivavaka tamin’i Jehovah momba izany izahay mianakavy. Izy mantsy no nitondra anay tany. Nanapa-kevitra àry aho fa hijanona izahay. Taitra ilay lehibeko rehefa nolaviko ilay asa be karama.

Tena sarotra ny fiainanay nandritra ny fandrarana. Mety ho nosamborina sy nogadraina foana mantsy izahay. Tsapanay mihitsy fa marina ny voalazan’ny Salamo 34:7, hoe: “Ny Anjelin’i Jehovah mitoby manodidina izay matahotra Azy ka mamonjy azy.”

Fanendrena vaovao

Nasaina nankatỳ Nouvelle-Zélande izahay tamin’ny 1993, rehefa avy nanompo 46 taona mahery tany Singapour. Mba tsy voarara mantsy ny fitoriana tatỳ. Nalahelo be izahay nandao ny namanay tany Singapour, satria tena tianay izy ireo. Faly anefa izahay satria naorina tamin’ny fitaovana tsy mety may ny finoan’izy ireo, ka matanjaka tsara. Nanampy azy ireo tsy hivadika sy hiaritra fitsapana foana izany.—1 Korintianina 3:12-14.

Efa 14 taona mahery izao no teto Nouvelle-Zélande izahay sy Aileen. Mpisava lalana manokana izahay, na dia efa be taona aza. Mbola mazoto manompo an’i Jehovah koa ny zokiko roa lahy any Kanada, dia i Mike 94 taona, sy Peter 90 taona.

Niverina tany Azia i Judy zanakay tamin’ny 1998, ary nanompo taona maromaro tany. Hoy izy tao amin’ny taratasiny iray: “Misaotra an’i Jehovah foana aho isan’andro, fa tena mahafinaritra ny fanompoako atỳ! Misaotra anareo koa aho, fa tena nitaiza ahy tamim-pitiavana sy nahafoy tena ho ahy ianareo. Ianareo no naha toy izao ahy!” Niverina tatỳ Nouvelle-Zélande izy tamin’ny 2003, mba hikarakara anay mivady.b

Misaotra an’i Jehovah izahay satria azony nampiasaina tamin’ilay fijinjana ara-panahy. Tsy hay lazaina ny hafalianay. Milaza ny Baiboly fa “mandalo izao tontolo izao.” Ho faly isika rehefa ho rava izy ity, ka ho tanteraka ilay fampanantenana kanto hoe: “Izay manao ny sitrapon’Andriamanitra no maharitra mandrakizay.”—1 Jaona 2:17.

[Fanamarihana ambany pejy]

[Sary, pejy 29]

I Joshua irery no Vavolombelona tany Singapour, rehefa tonga izahay tamin’ny 1947

[Sary, pejy 29]

Tany Hong-Kong niaraka tamin’i Dave Farmer, teny an-dalana ho any Singapour, 1947

[Sary, pejy 29]

Izahay sy Aileen, 1958

[Sary, pejy 31]

Miaraka amin’i Judy zanakay

[Sary nahazoan-dalana]

Kimroy Photography

[Sary nahazoan-dalana, pejy 28]

Kimroy Photography