Tadidinao Ve?

Novakinao tsara ve ireo Tilikambo Fiambenana faramparany? Jereo àry raha hainao ny mamaly an’ireto fanontaniana ireto:

Avy amin’ny volon’i Samsona ve ny hery nananany?

Tsia. Tsy ny volony no nahatonga an’i Samsona hatanjaka be, fa noho izy Nazirita ka nanana fifandraisana manokana tamin’Andriamanitra. Marika fotsiny ilay volo hoe Nazirita izy. Nasain’i Delila notapahina anefa ny volony, ka nisy vokany teo amin’ny fifandraisan’i Samsona tamin’i Jehovah izany.—15/4, pejy 9.

Inona ireo zavatra telo misy vokany tsara eo amin’ny fontsika?

1) Ny sakafo: Ilaina ny sakafo mahasalama mba ho salama tsara ny fontsika. Toy izany koa fa mila mandray sakafo ara-panahy ampy tsara isika, raha tiantsika ho salama tsara ny fontsika an’ohatra. 2) Ny fanatanjahan-tena: Mila mazoto manompo isika, dia ho salama tsara foana ny fontsika an’ohatra. 3) Ny manodidina antsika: Tena miahy antsika ny mpiara-manompo, ka ho maivamaivana ny fontsika raha mifandray amin’izy ireny isika.—15/4, pejy 16.

Inona no azon’ny mpivady atao mba hahatonga azy ireo hifampatoky indray, raha nanitsakitsa-bady ny iray tamin’izy ireo?

1) Tsory daholo ny marina. 2) Aza samy maka ho azy. 3) Ovao ny toetranao, raha ianao ilay diso. 4) Aza mitana lolompo ela loatra, fa miezaha hamitram-pihavanana.—1/5, pejy 12-15.

Nahoana ireo rahalahy manao lahatenim-pandevenana no tsy tokony hampihatra ny Salamo 116:15 amin’ny olona nodimandry?

Milaza io andininy io hoe: “Sarobidy amin’i Jehovah ny fahafatesan’ireo olony tsy mivadika.” Midika izany hoe tena mafy be amin’i Jehovah ny fahafatesan’ny mpanompony amin’ny fitambarany, ka tsy havelany hitranga mihitsy izany. Tsy havelany ho ripaka mihitsy ny mpanompony amin’ny fitambarany.—15/5, pejy 22.

Ahoana no niantsoana ny mpisava lalana fahiny?

Nantsoina hoe “mpivarotra boky ara-pivavahana” ny mpisava lalana fahiny. Tamin’ny 1931 no nanomboka nampiasaina ny hoe “mpisava lalana.”—15/5, pejy 31.

Inona ny porofo sasany mampiseho fa tsy boky tsotra fotsiny ny Baiboly?

Maro amin’ireo zavatra voalaza mialoha ao amin’ny Baiboly no tanteraka. Zavatra tena nisy no resahiny ao, fa tsy angano. Mifanaraka amin’ny siansa koa izy io, ary mirindra tsara. Tsy lany andro koa ny torohevitra omen’izy io.—1/6, pejy 4-8.

Iza no antsoin’ny Daniela 2:44 hoe “ireo fanjakana rehetra ireo”?

Ireo fanjakana ireo dia ny fanjakana rehetra voalaza ao amin’ilay sarivongana ngezabe, tao amin’ilay nofy nohazavain’i Daniela.—15/6, pejy 17.

Oviana no lasa firenena matanjaka fahafito araka ny voalazan’ny faminaniana, ny Firenena Matanjaka Anglisy-Amerikanina?

Nitranga izany rehefa niara-niasa nanao zavatra niavaka i Grande-Bretagne sy Etazonia, tamin’ny Ady Lehibe I.—15/6, pejy 19.

Inona no dikan’ny hoe manadino ny fahotan’ireo olona mibebaka i Jehovah rehefa mamela azy ireny?

Hoy i Jehovah momba ny olona ankasitrahany: “Tsy hotsarovako intsony ny fahotany.” (Jer. 31:34) Afaka mamela heloka i Jehovah, miorina amin’ny vidim-panavotana. Tsy hotsarovany intsony ny heloka avelany, izany hoe tsy hampiasainy intsony mba hanasaziana an’ilay olona.—1/7, pejy 18.

Nahoana isika no mino an’ireo fahagagana resahin’ny Baiboly?

Satria natao teny imason’olona matetika ireny fahagagana ireny, fa tsy tany amin’ny takona. Tsy be filirony koa izy ireny, ary tsy nisy fitaovana manokana nampiasaina. Tsy natao hahazoana laza izy ireny, fa natao hanomezam-boninahitra an’Andriamanitra. Isan-karazany ny fahagagana tantarain’ny Baiboly, ary tsy nisy mpanohitra tamin’izany andro izany nilaza hoe tsy nitranga izy ireny.—1/8, pejy 7-8.