Aoka ianao ho mailaka ny hanomboka fampianarana baiboly
1 Anisan’ny asa nanirahana antsika amin’ny maha-Vavolombelon’i Jehovah ny manomboka sy mitarika fampianarana Baiboly any an-tokantrano (Matio 28:19, 20) Moa ve ianao ho iray amin’ny mpiara-miasa amin’Andriamanitra amin’ny fanaovana izany (1 Kor. 3:9)? Tena tombontsoa lehibe ny manampy ny hafa hahafantatra ilay Persona lehibe indrindra eo amin’izao rehetra izao!
2 Eo anoloan’ny fitomboan’ny fahasahiranana mifandray amin’ny zava-mitranga eo amin’izao tontolo izao eo am-piovaovana haingana dia olona tso-po maro no mitady hahafantatra ny anton’ireny zava-mitranga ireny. Nanome valiny ny amin’ireo raharaha ireo i Jehovah efa hatramin’ny ela. Rehefa ampianarina ny Tenin’Andriamanitra ireny olona ireny dia mahazo fampiononana. Tokony ho mailaka àry isika hijery ny amin’ny fahafahana miseho amintsika mba hanombohana fampianarana Baiboly.—Ohab. 3:27.
Aoka isika handray ireo fahafahana miseho
3 Efa nieritreritra ny fahafahana hanomboka fampianarana Baiboly amin’ny iray amin’ny havanao akaiky na olom-pantatrao ve ianao? Koa satria fantatrao izy ireny dia afaka mifidy amim-pahaiza-manavaka ny fotoana mety mba hanolorana izany aminy ianao. Aza hadinoina fa ny fanontaniana voafidy tsara sy ny teny atao amin’ny fotoana mety dia mety hanaitra ny fahalianany ho amin’ny fahamarinana. Rehefa taitra ny fahalianana ta-hahafanta-javatra eo amin’ny olona iray dia matetika no manaraka ny fifanakalozan-kevitra mahavokatra ary indraindray dia azo atomboka ny fampianarana Baiboly.
4 Tamin’ny toe-javatra maro, ny fitondrantena tsaran’ny kristiana iray dia nitarika tsy mpino hanaiky ny fahamarinana (1 Petera 3:1, 2). Ny vady na ny mpikambana hafa ao amin’ny fianakaviana tsy mpino dia matetika mankasitraka ny fanajana asehon’ny mpikambana ao amin’ny kongregasiona aminy. Ny fanehoana fahalianana manokana aminy dia mety hahavita zavatra betsaka eo amin’ny fampitomboana fifandraisam-pisakaizana. Amin’ny fiaraha-miasa amin’ilay vady na ny mpikambana amin’ny fianakaviana izay ao anatin’ny fahamarinana, dia mety ho azonao atao ny hanomboka fampianarana Baiboly.
5 Rehefa mitory isan-trano isika dia afaka manandrana manomboka fampianarana Baiboly amin’ny fitsidihana voalohany. Ahoana no azo anaovana izany? Mahita fahombiazana ny mpitory sasany amin’ny famaliana fanontaniana nolazain’ilay tompon-trano ka voavaly mivantana ao amin’ny zavatra vita an-tsoratra iray. Afaka manararaotra ny fahafahana hanohy ny fifanakalozan-kevitra isika sy manoro ny fomba fianatra angamba raha manaiky hamaky ilay lahatsoratra ilay olona na raha mampandroso antsika ao an-tranony izy. Aoka isika haneho fahaiza-manavaka mba hamantarana ny fotoana ijanonantsika amin’izay fitsidihana voalohany izay. Mety ho tsara kokoa ny hiverenana rehefa afaka kelikely na andro hafa mba hanohizana ny dinidinika. Azo antoka fa haniry handray ny foto-kevitra nampidirinao tamin’ny fitsidihanao voalohany ianao rehefa miverina mitsidika. Azonao atao koa ny mandinika fanontaniana iray napoitranao tao amin’ny famaranan-dresaka tamin’ny fitsidihana farany.
NY FANAMBARANA TAMPOTAMPOKA
6 Mety ho fomba hafa mahomby hanombohana fampianarana Baiboly koa ny fanambarana tampotampoka. Amin’ny asa fanaontsika andavanandro dia mety hifandray amin’olona maro izay mety haniry hianatra isika. Afaka mampiasa ny fampidiran-dresaka sasany ao amin’ilay boky Comment raisonner isika mba hahombiazana kokoa rehefa manombo-dresaka. Aza misalasala manolotra fampianarana Baiboly raha vao eo am-panombohana na dia monina any amin’ny toerana hafa aza ilay olona na toa tsy hanana fahafahana hitarika izany aza ny tenantsika.
7 Aoka ianao ho mailaka hijery ny fahafahana hanao fanambarana tampotampoka, ary hiomana ny hitondra taratasy mivalona sy gazety betsaka izay hanaitra ny fahalianan’ny mpihaino ho amin’ny fahamarinana. (Mpit. 11:1). Raha tsy monina ao amin’ny faritanin’ny kongregasionao ny olona maneho fahalianana iray dia angataho ny adiresiny sy ny fanazavana hafa ilaina ary ampitao amin’ny kongregasiona mikarakara io faritra onenany io mba hitsidihan’ny Vavolombelona iray azy.
8 Tsy voafetra ho an’ny olom-bitsy ny asa fanaovana mpianatra. Mahakasika ny mpikambana ao amin’ny kongregasiona rehetra izany. Ny fitadidiana ao an-tsaina fa asa nanirahana ny kristiana ny hanao mpianatra dia mampirisika antsika ho mailaka hijery ny fahafahana hanomboka fampianarana Baiboly.