Ampio ny Hafa Hianatra Momba Ilay Lehilahy Niavaka Indrindra
1 Maro tamin’ireo namaky ny boky Ilay Lehilahy Niavaka Indrindra Teto An-tany no naneho fankasitrahana tamim-pahatsorana noho ny vokatra nentin’izy io teo amin’ny fiainany. Hoy ny nosoratan’ny iray tamin’izy ireo: “Rehefa tonga teo amin’ny faran’ilay boky aho, dia toy ny nahatsapa fa nasain’i Jesosy hiaraka taminy, hiaina teo anilany, hiara-mahatsapa ireo fijaliany, ireo fihetseham-pony, ny lafiny rehetra tamin’ny fanompoany. (...) Toy ny nijery sarimihetsika momba ny fiainan’i Jesosy aho namaky ilay boky.”
2 Ny boky Lehilahy Niavaka dia manampy antsika hahafantatra tsaratsara kokoa, tsy an’i Jesosy ihany, fa an’i Jehovah koa. (Jaona 14:9). Hoy ny ankizy iray 12 taona momba io boky io: “Nanome ahy fampiononana aoka izany ilay izy, hany ka nivavaka tamin’i Jehovah tamin’ny ranomasom-pifaliana aho raha vantany vao nahavaky azy. Tao anatiko tao aho dia nahazo toky indray noho ny fahalalana fa miambina antsika i Jehovah sy i Jesosy.” Nilaza i Jesosy, araka ny voarakitra ao amin’ny Jaona 17:3, fa midika ho fiainana mandrakizay ny fahafantarantsika momba an’i Jehovah sy ny Zanany. Ny fianarana io boky momba ny fiainan’i Jesosy io dia manome antsika fahatakarana manokana momba ny toetran’i Jehovah satria i Jesosy no “endriky ny tenany indrindra”. — Heb. 1:3.
3 Maherin’ny 19 tapitrisa amin’ny boky Lehilahy Niavaka no efa natonta tamin’ny fiteny maherin’ny 70. Izany dia mampiseho fa tena raisin’ny olona tsara io boky io. Maro no mamaky azy manontolo raha vantany vao maharay azy. Namaky azy tao anatin’ny tapa-bolana taorian’ny nandraisany azy ny lehilahy liana iray. Hoy ny nambaran’ny mpitondra fivavahana iray izay nandray ilay boky: “Tsy mahavita mamela ilay boky aho. Mamaky tapany aminy isan’alina izahay mivady alohan’ny hatorianay.”
4 Fanaovana fanambarana tsy ara-potoana: Nampiseho ny boky Lehilahy Niavaka tamin’olona tany am-piasany ny rahalahy iray. Niely ny teny fa nanana io boky io izy, ary niparitaka ny resaka momba izay noraketiny. Nanao lisitr’ireo izay naniry hahazo iray taminy ireo mpiara-miasa taminy. Nahapetraka boky 461 izy! Dimy tamin’ireo izay nandray azy io no mianatra izao. Ny anabavy iray, teny ambony fiaramanidina, dia nahapetraka ny boky Lehilahy Niavaka tamin’ny mompera iray izay handeha hanatrika ny fanendrena kardinaly vaovao iray. Tao Vatican efa hatramin’ny 40 taona io mompera io. Isika rehetra dia tokony hanararaotra amin’ny fomba feno ireo fahafahana hanolotra io boky io amin’ny hafa.
5 Mankasitraka azy io ireo tanora: Maneho fahalianana lehibe an’io boky io ny ankizy. Hoy ny nosoratan’ny ankizy iray sivy taona: “Ilay Lehilahy Niavaka Indrindra Teto An-tany no boky tiako indrindra satria mianatra zavatra be dia be avy aminy aho.” Rehefa mahita tanora eo amin’ny asa fitoriana isika, dia tokony haka fotoana, raha tsy manohitra izany ny ray aman-dreniny, mba hampisehoana ilay boky amin’ireny tanora ireny sy hijerena miaraka aminy ny sasany amin’ireo zavatra mampiavaka azy sy ny sary ao anatiny. Mety ho afaka hametraka boky amin’ireny ankizy ireny isika. Rehefa omena ny fahafahana hahafantatra momba an’i Jesosy ny tanora amin’izao andro izao, dia afaka mahatsapa tsara koa izay tsapany. Olona mora nohatonina i Jesosy. — Matio 19:14, 15.
6 Ny famakiana ny boky Lehilahy Niavaka dia afaka manova ny fiainan’ny olona. Iezaho hampahafantarina amin’ny olona betsaka araka izay azo atao ny loha hevitra ao anatiny. Ampiasao ilay fanazavana eo amin’ny pejy farany amin’ny teny fampidirana amin’ilay boky, eo ambanin’ilay lohatenikely hoe “Soa azo avy amin’ny fianarana momba azy”. Io fanazavana io dia hanampy ny olona hifantoka amin’izay mety ho azony amin’ny famakiana ilay boky. Maro eo amin’ny faritaninareo no mety hihiaka toy ny olona iray rehefa avy namaky azy hoe: “Io no boky tsara indrindra novakiko hatramin’izay! Tena nanova ny fiainako izy io.”