Miverena mba Hanampy ny Olona Hahafantatra ny Fomba Hahafahan’izy Ireo Hiaina Mandrakizay
1 Hatramin’ny namoahana ny boky Hiaina Mandrakizay, dia boky maherin’ny 65 tapitrisa no navoaka tamin’ny fiteny 115. Maro amin’ireo izay manompo an’i Jehovah ankehitriny no nianatra ireo fahamarinana fototra ao amin’ny Baiboly tamin’ny alalan’io fitaovana tsara dia tsara io. Amin’itỳ volana itỳ sy ny volana manaraka, dia angamba isika hanana fahafahana hametraka an’io boky manampy amin’ny fianarana ny Baiboly io, na angamba ho sendra olona efa manana azy io ao amin’ny faritanintsika.
2 Fiverenana mitsidika ireo efa manana ilay boky: Nahazo vokatra tsara ny mpitory sasany amin’ny fitarihana ny saina ho amin’ny fanondroam-pejy ary tamin’ny fanontaniana ilay olona liana hoe foto-kevitra inona no hitany ho mahaliana manokana. Rehefa nifidy foto-kevitra iray ilay tompon-trano, dia toroy hevitra izy mba hamaky ilay toko ao amin’ny bokiny alohan’ny fitsidihana manaraka.
3 Rehefa azo atao izany, dia tokony hifanao fotoana hentitra ho amin’ilay fiverenana mitsidika isika. Alohan’ny hiverenana, dia haniry hiomana isika mba hiara-mandinika fehintsoratra vitsivitsy ao amin’ilay toko nofidin’ilay tompon-trano. Raha tsy manana safidy manokana izy, dia afaka manomboka mandinika ny toko voalohany isika. Aorian’ny fandinihana fehintsoratra vitsivitsy, dia tokony hanao fanontaniana izay hodinihina ao amin’ireo fehintsoratra vitsivitsy manaraka isika. Dingana iray ho amin’ny fiverenana mitsidika hafa izany, rehefa ho afaka hanohy ny fianarana ilay boky Hiaina Mandrakizay isika.
4 Raha manana fanontaniana ilay tompon-trano, dia mazava ho azy fa tsara indrindra ny handinihana azy ireny aloha. Azo inoana fa ho voavaly ao anatin’ilay boky ny fanontaniany. Amin’ny fifankazarantsika tsara amin’ireo hevitra raketin’ilay boky dia ho azontsika atao ny hijery ireo fehintsoratra mifanentana ka hampiasa ny fanazavana ao anatiny mba hamaliana ireo fanontaniana nipoitra.
5 Fiverenana mitsidika ireo izay nametrahantsika taratasy mivalona: Angamba isika namela tamin’ilay tompon-trano ilay taratasy mivalona hoe Fiainam-piadanana ao Amin’izao Tontolo Izao Vaovao. Afaka mandinika ireo fehintsoratra voalohandohany ao amin’ilay taratasy mivalona isika rehefa miverina mitsidika azy.
Raha mampiseho tena fahalianana ilay tompon-trano rehefa tonga eo amin’ny faran’ny fehintsoratra voalohany eo amin’ny pejy faha-3 izay anononana ny Salamo 37:29 voasoratra isika, dia azontsika atao ny milaza toy izao:
◼ “Manamafy izay dinihina ato anatin’itỳ boky Azonao atao ny Hiaina Mandrakizay ao Amin’ny Paradisa eto An-tany itỳ ireo teny ireo. Mariho ny hevitra eto amin’ny fehintsoratra faha-3 amin’ny toko voalohany eo ambanin’ny lohateny hoe ‘Nahoana no afaka mino izany isika’.” Afaka mamaky ny fehintsoratra faha-3 isika avy eo sy manontany araka ny voasoratra erỳ ambany, ary manohy amin’ny fehintsoratra faha-4 sy faha-5 amin’ny fomba mitovy amin’izany. Azontsika atao avy eo ny hilaza toy izao: “Nahoana ny toe-piainana ankehitriny no mifanohitra aoka izany amin’ny fikasan’Andriamanitra? Manazava izany ireo fehintsoratra vitsivitsy manaraka, ary ho tiako indray ny hiverina amin’ny herinandro manaraka amin’ny fotoana toy izao, mba hamaly an’io fanontaniana io aminao.” Raha nampiseho tena fahalianana ilay tompon-trano, dia ho azontsika atao eto ny hametraka ilay boky. Na angamba isika hanapa-kevitra ny hanao izany amin’ny faran’ny dinidinika hataontsika manaraka.
6 Mba hanolorana ny boky “Hiaina Mandrakizay”, dia azontsika atao ny hilaza toy izao:
◼ “Inoako fa ho faly ianao hanana it̀y boky itỳ ho anao manokana. Amin’izay ianao dia ho afaka hamaky mialoha ary handray soa bebe kokoa amin’ny dinidinika hataontsika manaraka.” Raha manaiky ilay tompon-trano, dia ho azontsika atao ny hilaza toy izao: “Hapetraka aminao amin’ny fandraisana anjara an-tsitrapo 1 500 FMG itỳ boky itỳ.”
7 Asa tena lehibe ny miverina mba hanampy ny olona hahafantatra ny fomba hahafahan’izy ireo hiaina mandrakizay. Nampianatra ny mpanara-dia azy mba hampianatra ny hafa izay nampianarina azy ireny i Jesosy. Mivavaka amin’i Jehovah isika mba handefasany mpiasa maro kokoa. Koa, aoka àry isika hanao ny anjarantsika amin’ny fitadiavana ireo olona liana sy amin’ny fampianarana azy ireny mba ho tonga mpiara-miasa amintsika amin’ny famoriana ny vokatra. — Matio 9:37; 28:19, 20.