Ry Tanora — Hararaoty ny Fianaranareo any An-tsekoly
1 Ahoana ny hevitrao momba ny fiverenana any am-pianarana aorian’ny fotoam-pialan-tsasatra lehibe? Dodona ny handray soa avy amin’ny taom-pianarana iray hafa ve ianao? Hanararaotra ny fahafahana atolotry ny sekoly ho anao mba hizarana ny fahamarinana amin’ny mpiara-mianatra aminao sy ny mpampianatra anao ve ianao? Matoky izahay fa maniry hanao araka izay fara herinao ianao, any an-tsekoly.
2 Aoka ianao ho mpianatra mahafatra-po: Handray soa maharitra ianao raha miomana tsara sy mihaino tsara rehefa any am-pianarana. Mazotoa amin’ny fanaovana ny anjara entimodinao, nefa aza avela hanakantsakana ireo asa teôkratika ny fianaranao any an-tsekoly. — Fil. 1:10.
3 Atombohy amin’ny famakiana ilay bokikely hoe Ny Vavolombelon’i Jehovah sy ny Fampianarana, ny taom-pianarana vaovao. Avy eo, ianao na ny ray aman-dreninao dia tokony hanome iray amin’izy io ho an’ny tsirairay amin’ny mpampianatra anao. Ampahafantaro azy ireo fa ho voavaly izay mety ho fanontanian’izy ireo. Izany dia hanampy azy ireo hahatakatra tsara kokoa ny foto-pitsipika arahinao sy ny zavatra inoanao ka hiara-miasa aminao izy ireo rehefa hampihatra izay nampianarina anao ianao. Izany koa dia hanome toky ny mpampianatra anao fa maniry ny hiara-miasa aminy ianao sy ny ray aman-dreninao, raha mbola manampy anao handray fampianarana sarobidy koa izy ireo.
4 Aoka ianao hanao fanambarana tsara: Nahoana raha mihevitra ny sekoly ho faritaninao manokana mba hanaovana fanambarana tsy ara-potoana? Mandritra ny taom-pianarana ho avy, dia hanana fahafahana tsy manam-paharoa hanao fanambarana ianao. Manana fahalalana ara-panahy mahatalanjona ianao ka rehefa zaraina izy io dia ho afaka “hamonjy ny tenanao sy izay mihaino anao”. (1 Tim. 4:16). Rehefa mihazona fitondran-tena kristianina fakan-tahaka ianao, ary manao fanambarana isaky ny misy fahafahana hanao izany, dia hitondra soa ho an’ny tenanao sy ny hafa.
5 Nisy rahalahy tanora iray nanao fanambarana tsy ara-potoana tamin’ny mpiara-mianatra taminy tany an-tsekoly. Anisan’ireo izay nandray tsara ny Katolika iray, ny ankizy iray tsy mino an’Andriamanitra izay zatra naneso an’ireo mino an’Andriamanitra, ary tanora iray izay mpifoka sigara be sy mpisotro be. Tamin’ny fitambarany, dia nanampy tanora toa azy 15 ho amin’ny fanoloran-tena sy batisa io rahalahy io!
6 Koa milofosa àry, ry tanora, amin’ny fianarana sy ny fiasana ilay faritany tsy manam-paharoa itorianareo. Amin’izay ianareo dia handray ny soa lehibe indrindra avy amin’ny fandehanana any an-tsekoly.