Tanjona Mendrika Hotratrarina Amin’ny Taom-panompoana Vaovao
1. Inona no tanjona azontsika eritreretina amin’ny taom-panompoana vaovao?
1 Tsy maintsy manana tanjona isika raha te hanao fandrosoana. Inona no tanjonao amin’ny taom-panompoana vaovao? Tena tsara ny hanaovana ny asan’ny mpisava lalana mpanampy indray mandeha na mihoatra. Mila miomana mialoha ianao raha te handray anjara amin’io asa mahafinaritra io. Izao àry no fotoana tsara hieritreretana momba izany. Nahoana no tokony hataonao tanjona ny asan’ny mpisava lalana mpanampy?
2. Nahoana no tokony hataontsika tanjona ny asan’ny mpisava lalana mpanampy?
2 Antony hanaovana ny asan’ny mpisava lalana mpanampy: Vao mainka hampifaly an’ilay Raintsika any an-danitra isika raha manao an’io asa io, satria mitombo ny fotoana hanompoantsika. (1 Tes. 4:1) Vonona kokoa hiresaka momba an’i Jehovah amin’ny hafa isika, rehefa mieritreritra izay rehetra nataony ho antsika. (Sal. 34:1, 2) Hitan’i Jehovah sy ankasitrahany ny ezaka ataontsika tsirairay mba hanompoana azy bebe kokoa. (Heb. 6:10) Faly be isika rehefa mahafantatra fa mampifaly an’i Jehovah ny ezaka mafy ataontsika.—1 Tant. 29:9.
3, 4. Inona avy no soa raisintsika, raha manao ny asan’ny mpisava lalana mpanampy isika?
3 Lasa mahafinaritra sy mora kokoa ny zavatra iray rehefa atao foana. Hatoky tena kokoa ianao rehefa mitory isan-trano, raha mitombo ny fotoana hanompoanao. Tsy izay ihany fa ho hainao kokoa ny hanombo-dresaka sy hampiasa Baiboly. Hihamatanjaka ny finoanao raha resahinao amin’ny hafa foana ny zavatra inoanao. Maro amin’ireo tsy nanana mpianatra Baiboly no afaka nanomboka fampianarana, rehefa nanao ny asan’ny mpisava lalana mpanampy.
4 Raha toa ny fanompoantsika an’i Jehovah ka lasa fahazarana fotsiny, dia mety hanampy antsika hiala amin’izany ny asan’ny mpisava lalana mpanampy. Efa mpisava lalana maharitra ny rahalahy iray nefa nijanona. Tsapany fa nandany fotoana be loatra tamin’ny asa fivelomana izy, ka nanapa-kevitra ny hanao ny asan’ny mpisava lalana mpanampy nandritra ny iray volana. Hoy izy: “Tena nampahery ahy iny volana iny ka tapa-kevitra ny hanohy ny asan’ny mpisava lalana mpanampy aho. Izany no nahalasa mpisava lalana maharitra ahy indray tatỳ aoriana.”
5. Inona no azonao atao raha mihevitra ianao fa tsy ho vitanao ny asan’ny mpisava lalana mpanampy?
5 Reseo ireo vato misakana: Misy mihevitra fa tsy mahay mitory, ka tsy sahy mangataka hanao ny asan’ny mpisava lalana mpanampy. Raha izany no tsapanao, dia afaka manampy anao i Jehovah, toy ny nanampiany an’i Jeremia. (Jer. 1:6-10) “Votsa vava sy miadam-piteny” i Mosesy, kanefa nampiasain’i Jehovah hanatanteraka ny sitrapony. (Eks. 4:10-12) Mangataha herim-po amin’i Jehovah, raha mihevitra ianao fa tsy ho vitanao ny asan’ny mpisava lalana mpanampy.
6. Ahoana no hahafahanao hanao ny asan’ny mpisava lalana mpanampy, raha tsy dia salama ianao na be atao?
6 Misalasala ve ianao satria tsy dia salama na be atao? Mety ho vitanao ny asan’ny mpisava lalana mpanampy, na dia tsy salama aza ianao. Azonao atao ny manompo matetitetika nefa tsy maharitra. Raha be atao kosa ianao, dia azonao atao amin’ny volana hafa izay zavatra tsy dia tena lehibe. Afaka nanao an’io asa io ny mpitory sasany miasa tontolo andro, rehefa naka andro iray na roa tsy niasana.—Kol. 4:5.
7. Nahoana no tsara atao antom-bavaka ny fanaovana ny asan’ny mpisava lalana mpanampy?
7 Fomba hanaovana azy: Ataovy antom-bavaka ilay tanjonao. Angataho i Jehovah mba hitahy ny fiezahanao hanompo azy bebe kokoa. (Rom. 12:11, 12) Afaka manampy anao hahita fomba tsara hanitsiana ny fandaharam-potoananao izy. (Jak. 1:5) Raha tsy maniry hanao ny asan’ny mpisava lalana mpanampy ianao, dia mangataha amin’i Jehovah mba hanampy anao hahita fifaliana amin’ny fitoriana.—Lioka 10:1, 17.
8. Nahoana ny fampiharana ny Ohabolana 15:22 no manampy anao hahavita ny asan’ny mpisava lalana mpanampy?
8 Tokony hiara-midinika momba an’ilay tanjona koa ny mpianakavy. (Ohab. 15:22) Mety ho afaka hanao an’io asa io ny iray amin’ny mpianakavy, raha mifanampy. Resaho amin’ny hafa ny fanirianao, indrindra fa amin’ireo olona mety ho afaka hanao an’ilay asa. Mety ho maro kokoa ny olona hazoto hanao ny asan’ny mpisava lalana mpanampy amin’izay.
9. Inona no volana mety hahafahanao hanao ny asan’ny mpisava lalana mpanampy?
9 Inona àry no volana hahafahanao hanao ny asan’ny mpisava lalana mpanampy, amin’ny taom-panompoana vaovao? Raha miasa tontolo andro ianao na mbola mianatra, dia saintsaino ireo volana misy andro tsy iasana na tsy ianarana, na misy asabotsy na alahady dimy. Misy faran’ny herinandro dimy, ohatra, ny Septambra, Desambra, Martsa, ary Aogositra. Misy asabotsy dimy ny Mey, ary misy alahady dimy ny Jona. Raha tsy dia salama ianao, dia ireo volana tsy manorana sady tsy mafana na mangatsiaka loatra fidina. Mety ho tianao koa ny hanao ny asan’ny mpisava lalana mpanampy, rehefa mitsidika ny fiangonanareo ny mpiandraikitra ny faritra. Hahazo tombontsoa fanampiny ianao amin’izay, satria ho afaka hanatrika ny tapany voalohany amin’ilay fivoriana ataon’ny mpiandraikitra ny faritra miaraka amin’ny mpisava lalana. Tena tsara hanaovana ny asan’ny mpisava lalana mpanampy koa ny Martsa sy Aprily ary Mey, satria hatao ny 22 Martsa 2008 ny Fahatsiarovana. Raha vao fantatrao ny volana tianao hanaovana ny asan’ny mpisava lalana mpanampy, dia soraty ny fandaharam-potoananao mba hahafahanao hanatratra ny ora takina aminao.
10. Inona no azonao atao, raha tsy afaka manao ny asan’ny mpisava lalana mpanampy ianao?
10 Mbola afaka ny ho be zotom-po amin’ny fanompoana ihany anefa ianao amin’ny taom-panompoana ho avy, na dia tsy afaka hanao ny asan’ny mpisava lalana mpanampy aza. Miezaha hatrany manompo araka izay vitanao. Matokia fa faly i Jehovah rehefa miezaka manao ny tsara indrindra ianao. (Gal. 6:4) Ampio sy ampaherezo ireo afaka manao ny asan’ny mpisava lalana mpanampy. Mety ho azonao amboarina, ohatra, ny fandaharam-potoananao mba hahafahanao hanompo bebe kokoa sy hiaraka amin’izy ireo.
11. Nahoana ny vahoakan’i Jehovah no mafana fo amin’ny fitoriana?
11 Tena mafana fo amin’ny fitoriana ny vahoakan’i Jehovah. Tsy maintsy vitaina mantsy io asa io. Ain’olona maro no tandindomin-doza, ary efa kely sisa ny fotoana. (1 Kor. 7:29-31) Handrisika antsika hanompo araka izay fara herintsika, ny fitiavana an’Andriamanitra sy ny olona. Mety ho afaka hanao ny asan’ny mpisava lalana mpanampy indray mandeha isika, fara fahakeliny, raha miezaka sy manao fandaharam-potoana tsara. Tanjona mendrika hotratrarina tokoa izany!