Ampio ny Jamba mba Hahalala An’i Jehovah
1. Ahoana no ahitantsika hoe nangoraka ny jamba i Jesosy?
1 Nahita jamba roa lahy i Jesosy, andro vitsivitsy talohan’ny nahafatesany, tamin’izy avy any Jeriko. Niantsoantso izy ireo hoe: ‘Mba iantrao izahay, Tompo ô!’ Mbola niady saina tamin’ny fitsapana mafy niandry azy i Jesosy tamin’izay, nefa nijanona izy ary nanasitrana azy ireo. (Mat. 20:29-34) Tena hita hoe nangoraka ny jamba i Jesosy. Ahoana no anahafantsika azy?
2. Inona no azontsika atao rehefa mahita jamba eny an-dalana?
2 Ampio aloha izy: Mety ho sendra olona jamba ianao eny an-dalana. Lazao aminy ny anaranao sy ny momba anao, ary anontanio izy hoe inona no azonao anampiana. Matetika izy ireny no misy manararaotra, ka mety hiahiahy anao izy amin’ny voalohany. Tsy hihafahafa anefa izy raha tena tsara fanahy sy miahy azy ianao. Tadidio koa fa misy olona jamba tanteraka fa misy mahita kely ihany. Arakaraka izay no anampianao azy. Rehefa avy manampy azy ianao, dia lazao fa mampianatra Baiboly no tena ataonao. Amakio andinin-teny izy raha mety, ohatra hoe ny Salamo 146:8 na Isaia 35:5, 6. Anontanio izy raha te hahazo boky sy gazety ara-baiboly amin’ny soratra Braille, raha mahay mamaky azy ireny. Ataovy koa izay hahazoany an’ireo zavatra noraisim-peo ao amin’ny jw.org. Anontanio izy raha manana ordinatera misy programa afaka mamadika ny soratra ho feo. Raha manana izy, dia omeo lahatsoratra natao pirinty, na ampio mba hahazo boky sy gazety amin’ny endrika RTF (Rich Text Format) avy ao amin’ny jw.org.—Jereo ilay efajoro hoe “Tadidio Izao Rehefa Manampy Olona Jamba Ianao.”
3. Ahoana no hahitantsika an’ireo jamba ao amin’ny faritanintsika?
3 Tadiavo ireo olona jamba: Indraindray ihany isika vao mba mahita olona jamba rehefa mitory isan-trano, satria tsy tia miresaka amin’ny olona tsy fantany izy ireny. Mila ‘tadiavina’ mihitsy àry izy ireny vao hita, raha te hitory aminy isika. (Mat. 10:11) Misy jamba ve, ohatra, any am-piasanareo na any am-pianaranareo? Ataovy izay hiresahana aminy. Ary misy sekolin’ny jamba ve ao amin’ny faritaninareo? Omeo boky sy gazety amin’ny soratra Braille ny tompon’andraikitra ao, mba hatao ao amin’ny efitra famakiam-boky. Mahafantatra olona manana havana jamba ve ianao, sa misy fikambanana manampy ny jamba ao amin’ny faritaninareo? Hazavao amin’izay olona hitanao fa tia manampy ny jamba ny Vavolombelon’i Jehovah, ka afaka manome boky sy gazety amin’ny soratra Braille na zavatra noraisim-peo. Asehoy azy ny andinin-teny miresaka hoe tsy ho ela Andriamanitra dia hampahiratra ny jamba rehetra. Azonao aseho azy koa ilay video misy tantarana lehilahy jamba ao amin’ny jw.org, mitondra ny lohateny hoe “Very Aho Raha Tsy Nisy An’io.” Raha mazava aminy ny anton-dianao, dia mety havelany hiresaka amin’izay havany jamba na izay jamba iandraiketany ianao.
4. Inona no ianarantsika avy amin’ny nataon’i Janet?
4 Jamba ny anabavy atao hoe Janet, ary nitsidika jamba maromaro tao amin’ny tranobe iray. Hoy izy tamin’ny tovovavy iray: “Nanasitrana olona jamba i Jesosy taloha, ary mbola hositraniny daholo ny jamba rehetra amin’ny hoavy.” Namaky ny Apokalypsy 21:3, 4 i Janet, ary nanazava fa ny Fanjakan’Andriamanitra no hanatanteraka an’izany. Gaga be ilay tovovavy, ka hoy izy: “Sambany aho vao naheno jamba niteny hoatr’izany. Matetika mantsy ny olona tsy jamba no milaza fa matoa ny olona iray lasa jamba dia nanao ratsy izy na ny razambeny.” Nandefasan’i Janet e-mail misy rohy ahazoana boky Ampianarina izy tatỳ aoriana, ary mianatra Baiboly indroa isan-kerinandro izy izao.
5. Inona no azontsika atao, na dia tsy afaka manasitrana ny jamba aza isika?
5 Marina fa tsy afaka manasitrana ny jamba hoatran’ny nataon’i Jesosy isika. Azontsika ampiana anefa ny olona rehetra nohajambain’ny andriamanitr’ity tontolo ity, anisan’izany ny jamba ara-bakiteny, mba hahalala ny fahamarinana ao amin’ny Tenin’Andriamanitra. (2 Kor. 4:4) “Nangoraka” an’ireo jamba roa lahy tany akaikin’i Jeriko i Jesosy ka nanasitrana azy. (Mat. 20:34) Raha miahy an’ireny jamba ireny koa isika, dia ho afaka hanampy azy hahalala an’i Jehovah. Izy irery ihany mantsy no mahay manasitrana tanteraka ny jamba.