Mamely Indray Ny Raboka!

NANOMBOKA tamin’ireo taona 1950, dia nihena 5 isan-jato ny isan’ny voan’ny raboka tany Etazonia isan-taona. Kanefa, nanomboka tamin’ny 1985, dia nisy fitomboana 18 isan-jato teo amin’ireo voan’ny raboka nanaovana tatitra. Vao mainka mampanahy ny fisian’ny karazany iray vaovao amin’ilay aretina izay tsy andairan’ny fitsaboana amin’ny fanafody. Tombanana ho olona telo tapitrisa isan-taona no matin’ny raboka ankehitriny. Nahoana no mivadika ho faharesena ilay ady amin’ny raboka?

Antony iray ny hoe marary maro no tsy mampiasa tsotra izao ny fanafodiny mandritra ilay faharetam-potoana takina — matetika enina ka hatramin’ny sivy volana. Any New York, ohatra, dia nahariharin’ny vokatry ny fandinihana iray fa 89 isan-jaton’ny antokona marary 200 eo ho eo izay voan’ny raboka mihombo no tsy namita ny fitsaboany. “Mampihoron-koditra izany”, hoy ny Dr. Lee Reichman, prezidàn’ny Fikambanana Amerikana Momba ny Havokavoka, “satria ireo olona ireo dia a) tsy ho sitrana, ary b) angamba izy ireo hampihombo raboka izay mahatohitra ny fanafody fampiasa mahazatra.” Afaka ny hisy fiantraikany mihoatra noho ny eo amin’ny fahasalamany manokana anefa ireny mpitondra raboka ireny. “Amin’ny tsy fampiasany ny fanafodiny”, hoy ny teny nanampin’ny Dr. Reichman, “dia afaka mamindra amin’ny olon-kafa izy ireny.” Izany dia tsy isalasalana fa anton-javatra iray mandray anjara amin’ny fisian’ny olona vao voan’ny raboka tombanana ho valo tapitrisa, hita maneran-tany isan-taona.

Takatry ny mpianatra Baiboly fa ireo “areti-mandringana any amin’ny tany samy hafa” dia tapany amin’ilay famantarana hoe miaina amin’ny “andro farany” ho an’itỳ fandehan-javatra itỳ isika. (Lioka 21:11; 2 Timoty 3:1, NW ). Inona no hanaraka izany? Tany vaovao iray, izay ‘tsy hisian’ny mponina ao hilaza hoe: Marary aho’. (Isaia 33:24). Eny, mampanantena, tsy fanamaivanana mihelina, fa fanafahana maharitra amin’ny aretina sy ny fahafatesana, i Jehovah Andriamanitra. — Apokalypsy 21:1-4.