Vita Ara-potoana sy Voatsinjara Tsara

NA DIA ny hatsaran’ny fampianarana aza no tena tokony hoantitranterina, dia ilaina hotandremana koa ny faharetan’ny anjaranao na ny lahateninao. Nalamina mba hanomboka sy hifarana amin’ny fotoana voafaritra tsara ny fivoriantsika. Mitaky ny fiaraha-miasan’ireo rehetra manana anjara amin’ny fandaharana izany.

Tsy mitovy ny fiheveran’ny olona ny fiainana tamin’ny andron’ny Baiboly, sy ny hita any amin’ny tany maro ankehitriny. Nolazaina ara-keviny ny fotoana tamin’izany, toy ny hoe “tamin’ny ora fahatelo” na hoe “tokony ho ora fahafolo.” (Matio 20:3-6; Jaona 1:39) Nahalana ny olona vao nanaraka fandaharam-potoana hentitra, teo amin’ny fiainana andavanandro. Mbola hita any amin’ny tany sasany ihany izany ankehitriny.

Na dia mety tsy ho hentitra loatra momba ny fotoana aza anefa ny olona, noho ny fahazarana eo an-toerana na noho ny fitiavany manokana, dia hahasoa antsika ny mianatra hitandrina tsara ny fotoana. Ilaina ny manaja ny fotoana voatondro ho an’ny anjara tsirairay, rehefa maromaro no manana anjara amin’ny fandaharana. Azo ampiharina tsara amin’ny faharetan’ny anjarantsika amin’ny fivoriana ilay toro lalana hoe “aoka ny zavatra rehetra hatao amin’ny fahamendrehana sy ny filaminana.”—1 Kor. 14:40.

Ny fomba hamitana anjara na lahateny ara-potoana. Fanomanana no fanalahidiny. Mazàna no tsy ampy fanomanana ireo mpandahateny mihoatra ny fotoana. Mety hatoky tena loatra izy ireo, na mety hangataka andro fotsiny ka tsy manomana raha tsy efa eo am-poto-moty. Ilaina voalohany indrindra àry ny fankasitrahana ilay anjara nomena anao sy ny fahavononana hanomana azy tsara.

Famakian-teny ve no anjaranao? Ianaro aloha ny Lesona faha-4 ka hatramin’ny faha-7, momba ny fitenenana misosa tsara, ny fiatoana, ny fanamafisan-kevitra ary ny fanamafisana ireo hevitra fototra. Ampiharo avy eo ilay torohevitra omena ao, rehefa mamaky amin’ny feo avo ilay anjaranao ianao. Jereo ny faharetany. Mila mamaky haingana kokoa ve ianao, mba tsy hihoatra ny fotoana? Vakio haingana kokoa ireo tapany tsy dia lehibe loatra, nefa asio fiatoana hatrany ary mitenena miadana kokoa rehefa manamafy hevi-dehibe. Manaova famerenana imbetsaka. Rehefa mamaky misosa tsara ianao, dia ho mora kokoa ny manitsy ny fotoana.

Taratasy kely misy soratra fohy ve no hampiasainao? Tsy ilaina hatao be tsipiriany toy ny lahateny vakina izy io, mba hamitana ilay anjara ara-potoana. Nisy fomba tsara kokoa efa nianaranao tao amin’ny Lesona faha-25. Tadidio ireto toromarika dimy ireto: 1) Manomàna hevitra tsara, nefa tsy betsaka loatra. 2) Ataovy mazava tsara ao an-tsaina ireo hevi-dehibe, nefa aza ianarana tsianjery ireo fehezanteny. 3) Mariho eo amin’ny drafitrao hoe firy minitra no tianao holanina amin’ny fizarana tsirairay, na hoe toy inona ny fotoana tokony ho efa lasa rehefa eo amin’ny faritra sasany ianao. 4) Rehefa manomana ianao, dia jereo ireo tsipiriany azo esorina, raha hitanao fa mihoatra ny fotoana. 5) Manaova famerenana imbetsaka.

Tena ilaina ny fanaovana famerenana. Mandritra izany, dia jereo tsara ny faharetan’ny fizarana tsirairay. Averimbereno imbetsaka ny anjaranao na lahateninao, mandra-pahavitanao azy ao anatin’ilay fotoana voatondro. Aza mitady hampiditra hevitra be loatra. Aza lanina tanteraka ny fotoana nomena anao fa asio ambiny ihany, satria mety ho lava kokoa noho ny tamin’ny famerenana, ny famelabelarana eo anatrehan’ny mpanatrika.

Tsinjarao ny fotoana ho an’ny fizarana tsirairay. Ho vita ara-potoana ny anjaranao raha hainao tsinjaraina ny fotoana haharetan’ny fizarana tsirairay ao aminy. Tokony holanina hamelabelarana ny votoatin’ny lahateny ny ankabeazan’ilay fotoana. Ao ianao no manazava ireo hevi-dehibe. Ny halavan’ny teny fampidirana dia tokony hamela anao hahatratra ireo tanjona telo resahin’ny Lesona faha-38. Tsy tokony ho lava loatra koa anefa ny votoatin’ny lahateninao, ka tsy ho ampy ny fotoana hanaovana teny famaranana mandaitra, araka ny hazavain’ny Lesona faha-39.

Ho tsara kokoa ny anjaranao na ny lahateninao rehefa ezahinao vitaina ara-potoana, ary ho hitan’ny olona amin’izany fa manaja ny mpandray anjara hafa sy ilay fiangonana manontolo ianao.