Mitantara ireo mpitory ilay Fanjakana
“Arehitry ny fanahy” ry zareo any Meksika
“Toa mirehitra sy feno fihetsiketsehana be noho ny asa ny firenena manontolo.” Izany no nosoratan’ny biraon’ny sampana Watch Tower any Meksika, ary marina tokoa izany fanamarihana izany! Miharihary ny asa mampientana, satria tao amin’io tany io, tamin’ny volana aogositra dia nomarihina ny tampon’isa faha-70 nisesy tamin’ny mpitory 277 436. Fanampin’izany, dia nisy fampianarana Baiboly maherin’ny 400 000 natao, ary nahatratra 1 046 291 ny mpanatrika ny fahatsiarovana tamin’ny taona 1989. Endrey izany fototra tsara ho amin’ny fitomboana ho avy!
Ny zava-niseho lehibe indrindra tamin’ny 1989, dia ny fiovana teo amin’ny lalàna nifehy ny Vavolombelon’i Jehovah any Meksika. Vokatr’izany, vao voalohany izao ny Baiboly no azo ampiasaina amin’ny fitoriana isan-trano, ary ny fivoriana azo atomboka amin’ny vavaka. Nisy vokany avy hatrany izany. Tao anatin’ny roa volana, ny isan’ny mpitory dia nitombo 17 000.
Hita amin’ireo fanambarana ataony ny fifalian’ireo rahalahy noho io zava-nitranga vaovao io. Nanoratra toy izao ny iray taminy: “Rehefa novakina tao amin’ny kongregasiona ilay taratasy dia tapaka indroa noho ny tehaka vokatry ny fo ny famakiana azy. Nampientana ny fo tokoa izany!” Hoy koa ny iray: “Tsy nahatana ny ranomasom-pifaliana izahay. Niharihary ny vokatra teo amin’ny fahamarinam-potoana kokoa. Ny tsirairay avy dia naniry ny ho eo amin’ny vavaka fanokafana.”
Ao amin’ny faritaninay, hoy ny Vavolombelona hafa, ny vehivavy iray, mafana fo amin’ny fandaharam-pampianarana ao amin’ny Eglizy katolika, dia nanao izao fanamarihana izao: ‘Raha namela antsika tsy hahay hamaly izy ireo [ny Vavolombelona] teo aloha tamin’ny alalan’ny fanazavany sy ny zavatra vita an-tsorany fotsiny, izao izy manokatra ny Baiboly eo am-baravarana izao, dia tena very isika!’”
Ny Vavolombelon’i Jehovah any Meksika koa dia manantitrantitra ny tokony hanaovana fitoriana tampotampoka amin’ny alalan’ny Baiboly. Ny anabavy iray dia nanombo-dresaka tamina vehivavy izay nanjary nanontany ny fomba fiheverany ny amin’ny fanalana zaza. Namaly toy izao ilay Vavolombelona: “Tsy izay heveriko no zava-dehibe fa izay lazain’ny Baiboly.” Taorian’ny famakiana andinin-teny maromaro ao amin’ny Soratra Masina, dia nanazava toy izao ilay anabavy: “Zava-dehibe eo imason’ny Mpamorona ny fiainana, na dia ny an’ireo tsy mbola teraka aza.”
Namboraka taminy àry ilay vehivavy fa bevohoka ny zanany voalohany izy saingy tamin’ny fandinihana nataon’ny dokotera, dia notombanana fa mety ho sampona ilay zaza. Tian’ilay mpitsabo azy ny hanalany ny zaza ary nankasitraka izany ny vadiny, saingy nisalasala ilay vehivavy. Niara-nanjohy hevitra taminy bebe kokoa tamin’ny alalan’ny Baiboly ilay mpitory ary nomeny azy ny anarany, ka avy eo dia nisaraka izy ireo.
Dimy taona tatỳ aoriana, tao amin’ny fivoriamben’ny distrika, ny mpivady iray niaraka tamin’ny zanany efa-taona, dia naniry ny hahita ilay anabavy sy ny vadiny. Ilay vehivavy voalaza tetsy ambony ihany io. Inona no nitranga? Taorian’ny resaka nifanaovany tamin’ilay Vavolombelona, dia tapa-kevitra ny tsy hanala zaza ilay vehivavy. Tsy nety nijery azy intsony ilay mpitsabo azy, ary ny vadiny aza nandrahona mihitsy ny handao azy raha toa ka teraka sampona ilay zaza. Rehefa tonga ny fotoana hiterahany, dia nankany amin’izay mpitsabo hitany voalohany izy nitady fanampiana.
Raha vao teraka ilay zaza, dia niteny toy izao ilay mpitsabo: “Arahabaina ry reny vao! Vavikely mahafatifaty ny zanakao!” Tsy nino izay ren’ny sofiny izy, ka nangataka ilay mpitsabo mba hizaha ilay zaza amim-pitandremana. Avy eo dia nilaza taminy ny tantarany izy. “Fahagagana izao!”, izany no hany azon’ilay mpitsabo nolazaina. Faly dia faly ilay vehivavy satria nanana herim-po nanaja ny fomba fijerin’i Jehovah ny fahamasinan’ny aina, ary nampitondrainy ny anaran’ilay anabavy ny zanany mahafatifaty sy salama tsara. Raha vao ampy fahatanjahana izy, dia nitady ireo Vavolombelona ary nanomboka niara-nianatra Baiboly tamin’izy ireo. Tsy ampy herintaona dia natao batisa izy mivady.
Nampirisika toy izao ny apostoly Paoly: “Aoka ianao harehitry ny fanahy. Miasà mafy ho an’i Jehovah.” (Romana 12:11, MN ). Ny Vavolombelon’i Jehovah any Meksika, toy ny kristiana marina na aiza na aiza, dia namaly io fampirisihana io amin’ny fony rehetra. Noho izany ilay tany manontolo dia mirehitra sy feno fihetsiketsehana noho ny asa ara-panahy. Toy inona moa ny fitahiana amim-pahalalahan-tanana omen’i Jehovah an’ireo mpanompony mahatoky!