Miezaha Mafy mba Hahatonga ny Olona Hihaino Amim-pitandremana
1 Olona maro be mifanena amintsika amin’ny fitoriana isan-trano no tsy mihevitra ireo raharaha ara-panahy. Mety ho be fanahiana momba ny mpianakaviny izy ireny na ny amin’ny zava-tsarotra ara-bola na ny amin’ny zava-manahirana manokana. Mba hanombohana ny resadresaka matetika dia tsara indrindra ny miresaka momba izay raharaha mahaliana iombonan’ny olona maro eo amin’ny manodidina. Azo ampiasaina mba hanairana ny fahalianana ny fanontaniana, satria izany dia mampiditra ilay tompon-trano ao anatin’ilay resadresaka. Mahomby indrindra ireo fanontaniana hahalalana ny fomba fihevitra izay tsy mahasanganehana.
2 Mety hanao izay hahatonga ilay olona hihaino amim-pitandremana ianao amin’ny fampiasana fampidiran-dresaka tahaka izao:
◼ “Manao ahoana tompoko. ______ no anarako. Monina etỳ amin’ny manodidina aho. Olona maro niresahako tamin’izao maraina izao no manahy momba ny [lazao ny fisehoan-javatra nitranga vao haingana teny amin’ny manodidina na zava-manahirana eo an-toerana]. Araka ny hevitrao, tahaka izao ve ny fikasan’Andriamanitra ho an’izao tontolo izao?” Avelao izy hamaly. Eto dia azonao aseho ilay taratasy mivalona hoe Fiainam-piadanana ao Amin’izao Tontolo Izao Vaovao. Diniho fohifohy ny sary eo amin’ny pejy voalohany ary ny fanazavana eo amin’ny fehintsoratra 1-3, araka izay amelan’ny fotoana izany. Raha nisy fahalianana, dia azo aseho ny boky Hiaina Mandrakizay. Ho azonao atao ny hanintona ny saina ho amin’ny Salamo 37:9, 10, araka izay hita eo amin’ny pejy faha-157, ary hamaky azy io ao amin’ilay boky. Amin’ny fampiasana ny sary eo amin’ny pejy faha-156–157, dia hazavao ireo toe-piainana marina hisy haneran-tany rehefa ho foana ny faharatsiana.
3 Aoka ianao ho vita fiomanana foana mba hanolotra Ny Tilikambo Fiambenana sy Réveillez-vous! Hatraiza hatraiza ny olona dia raiki-tahotra noho ny fikororosian’ny toe-pitondran-tena. Rehefa mamaky ny Mifohaza! na Réveillez-vous! farany ianao, dia mifidiana hevitra vitsivitsy izay heverinao fa hanaitra ny fahalianan’ny olona ao amin’ny faritaninao. Aza miresaka ela momba ny toe-piainana ratsy misy amin’izao fotoana izao, fa tariho ho amin’izay lahatsoratra mifanentana kosa ny sain’ilay tompon-trano, ary resaho amin’ny fomba manorina ireo soa entin’ny fanarahana akaiky ny torohevitra ao amin’ny Tenin’Andriamanitra. Azo aseho amin’ny fotoana rehetra ny nomerao farany na tranainy kokoa amin’ny Ny Tilikambo Fiambenana sy Mifohaza! na Réveillez-vous! ankoatra ireo andro natokana mba hanolorana ireo gazety.
4 Tadidio fa ny zava-kendrentsika dia ny hanaitra ny fahalianana ho amin’ny hafatra momba ilay Fanjakana. Mba hahatonga ny olona hihaino amim-pitandremana, dia tsy maintsy manintona ny sainy aloha isika ary mamohafoha ny eritreriny. Hanosika ireo olona tahaka ny ondry haniry “hihaino izay holazain’i Jehovah Andriamanitra” momba ny fikasany ho an’ny taranak’olombelona izany. — Sal. 85:8.