Ampio Ireo Ankizy mba Hanompo an’i Jehovah avy Amin’ny Fony
1 Nanambara i Solomona fa “lova avy amin’i Jehovah ny zanaka”. (Sal. 127:3-5). Tena lova izay tsy hay tombanana ny hasarobidiny tokoa izy ireo. Ny ray aman-dreny dia manana andraikitra avy amin’Andriamanitra hampianatra sy hampiofana ireo zanany ary hampihatra fifehezana aminy. Tafiditra amin’izany ny fampiofanana eo amin’ny fanompoana, dia ny fampirisihana azy ireo hiteny avy amin’ny fony momba an’i Jehovah sy ilay Fanjakana. — Efes. 6:4, NW.
2 Eo amin’ny fahafiry taonan’ny ankizy no tokony hanombohan’ny ray aman-dreny izany fampiofanana izany? Mazava ny valin-tenin’ny Baiboly: Tokony ho hatramin’ny mbola maha-zazakely azy izany. (2 Tim. 3:14, 15, NW). Arakaraka ny anombohan’ilay fampiofanana aloha be no itomboan’ny fahazoana antoka fa hanorina fototra mafy ao amin’ny fahamarinana ireo ankizy ary hanao ny fanompoana ho ny asa hanokanany ny fiainany. Izany fampiofanana aloha be izany koa dia hiaro azy ireo amin’ny fomba fisainan’izao tontolo izao sy ny fihetsiny.
3 Ankizy mbola tsy mandeha mianatra maro no nampiseho fahaizana mahatalanjona hianatra zavatra sarotra aoka izany. Izany fahafahany hianatra aloha be izany dia tokony hotarihina mba hampiofanana azy ireo hamboly fahaizana izay hahazoany sitraka amin’i Jehovah. (wMG 1/11/88 p. 15; wMG 15/3/90 p. 31). Maro amin’ireo ankizy mbola kely no nandroso ka tonga mpitory tsy vita batisa. Ny ankizy sasany dia manao ny fanoloran-tenany ary manaiky hatao batisa alohan’ny faha-13 taonany. Izany dia nanokatra ny lalana nahafahan’ny sasany nanao ny asan’ny mpisava lalana mpanampy ary na dia ny asan’ny mpisava lalana maharitra aza, talohan’ny nahavitany ny fianarana tsy maintsy nataony. Mba hanatratrarany ireo zava-kendrena ireo, dia mila ny hampianarina ny hiresaka amin’ny olona momba ny foto-kevitra ara-baiboly maro isan-karazany izy ireo.
4 Ny olon-dehibe sasany izay mirona ny hihevitra fa amin’ny ankapobeny ny tanora amin’izao andro izao dia tsy mahalala fomba sy tsy mahay manaja, dia mety tsy ho liana firy ny hiresaka amin’ny tanora iray tonga mitsidika azy eo am-baravarany. Inona no ho azon’ny mpitory tanora iray lazaina eo am-baravarana mba handresena vato misakana toy izany ary hihazonana ny sain’ilay tompon-trano olon-dehibe? Nampiasa zavatra mitovy amin’izao manaraka izao ny mpitory tanora iray: “Manahoana, Tompoko, ________ no anarako. Mitsidika ny mpiara-monina aminay aho androany satria maro no manahy ny amin’ny hoavy. Amin’ny maha-olon-dehibe anao, dia azo antoka fa manana fanandraman-javatra betsaka kokoa momba ny fiainana noho izaho ianao. Kanefa, inty misy andinin-teny iray izay mitondra fampiononana ho antsika rehetra.” Aorian’ny famakiana ny Apokalypsy 21:3, 4, dia ho azo ampifantohana amin’ilay taratasy mivalona hoe Fiainam-piadanana ao Amin’Izao Tontolo Izao Vaovao ny resaka.
5 Indro misy fanipazan-kevitra hafa iray: “Manahoana, Tompoko, ________ no anarako. Mitsidika vetivety ny olona eto amin’ny manodidina aho satria mahafantatra olon-dehibe maro izay manahy ny amin’ny lalana toa arahin’ireo tanora amin’izao andro izao. Indraindray ny tanora dia mampiseho fihetsika tsy manaja, mikomy mihitsy aza. Kanefa manana andinin-teny iray tiako hampahafantarina ny olona aho, izay mampiseho fa, indray andro any, dia hianatra ny hiara-miaina ao anatin’ny fiadanana ny olona rehetra.” Avy eo dia vakio ny Salamo 37:11 ary hazavao hifanaraka amin’ilay resaka atao. Rehefa mahare teny feno fahatsorana toy izany ataon’ireo mpitory tanorantsika ireo tompon-trano olon-dehibe, dia azo antoka fa maro aminy no ho voatohina tsara.
6 Mpitory tanora an’arivony maro no manohy mandray anjara amin’ny fomba tsara dia tsara amin’ny asa fitoriana ilay Fanjakana sy fanaovana mpianatra. Tena anaovana teny fiderana amin-kafanam-po izy ireny. Ireo tanora ampiofanin’ny ray aman-dreniny matahotra an’Andriamanitra hatramin’ny mbola maha-zazakely azy, dia vonona ny hanaiky ny fampirisihana amim-pahatsorana omena azy mba hiezaka handray anjara bebe kokoa amin’ny lafiny rehetra amin’ny fanompoana. Ireo izay mbola mianatra dia manana fahafahana tsy manam-paharoa hanao fanambarana, tsy amin’ireo mpiara-mianatra aminy ihany, fa amin’ireo mpampianatra koa. Maro no nahita fanandraman-javatra nahafinaritra tamin’ny fanaovana fanambarana tamin’io faritany manokana io.
7 Koa ampio àry ireo mpitory tanora ao amin’ny kongregasionanareo mba hanararaotra ny fahafahana hanompo an’i Jehovah raha mbola manana ny tanjaky ny fahatanorana izy ireo, ka hidera azy avy amin’ny fony. — Mpit. 12:1.