Efa Nanandrana ny Fitoriana Takariva ve Ianao?
1 Isika rehetra dia mahita fahafinaretana rehefa mahavokatra eo amin’ny asantsika. Etsy an-danin’izany, rehefa tsy afaka mahita vokatra manorina isika, dia manjary manasatra sy tsy mahafa-po ilay asa. Ny asa misy heviny dia ahitan’ny tena valisoa, ary fitahiana izy io. (Ampitahao amin’ny Mpitoriteny 3:10-13.) Afaka mampihatra an’io fitsipika io amin’ny asa fitoriantsika isika. Fantatsika avy amin’ny fanandraman-javatra hitantsika fa rehefa mandeha isam-baravarana isika ka afaka miara-miresaka amin’ny olona momba ny Baiboly, dia velombelona ara-panahy isika rehefa mody any an-trano. Mahatsapa isika fa tena nahavita zavatra.
2 Any amin’ny faritra sasany, dia nanjary tena sarotra ny mahita olona ao an-trano mandritra ny ora sasany amin’ny andro. Manondro ireo tatitra fa any amin’ny toerana maro, dia mihoatra ny 50 isan-jaton’ny olona no tsy ao an-trano rehefa mitsidika amin’ny maraina isika. Kongregasiona maro no efa nandamina io zava-manahirana io tamin’ny fanaovana fandaharana ho amin’ny fitoriana takariva, ary dia nahita fahombiazana tsara izy ireo. Manao tatitra ireo mpitory fa rehefa mitsidika aoriana kokoa amin’ny andro izy ireo, dia olona maro kokoa no ao an-trano, ary amin’ny ankapobeny, ny olona dia toa tony kokoa sy mirona hihaino ny hafatra momba ilay Fanjakana. Efa nanandrana ny fitoriana takariva tao amin’ny faritaninao ve ianao? — Ampitahao amin’ny Marka 1:32-34.
3 Mandamina fitoriana takariva ireo loholona: Any amin’ny faritra sasany, ny fivoriana ho amin’ny fanompoana eny amin’ny saha amin’ny faran’ny tolakandro na fiandohan’ny takariva dia nisy mpanohana tsara. Azo anehoana fiheverana ireo mpitory tanora izay mirava avy any an-tsekoly ny tolakandro sy ireo olon-dehibe izay mamita ny asany ara-nofo aoriana kokoa amin’ny andro. Ny mpitory sasany izay tsy afaka mivoaka hanao fanompoana eny amin’ny saha amin’ny faran’ny herinandro, dia mahita ny fitoriana takariva mandritra ny herinandro ho fomba azo ampiharina iray ahafahany mandray anjara tsy tapaka amin’ny asa fitoriana.
4 Misy asa maro samihafa azonao irotsahana mandritra ny fitoriana takariva. Afaka mitory isan-trano amin’ny alalan’ny gazety na mampiasa ny zavatra vita an-tsoratra atolotra amin’ny volana ianao. Ny takariva dia fotoana tsara dia tsara hitsidihana olona izay tsy tao an-tranony rehefa nitsidika aloha kokoa tamin’ny andro na tamin’ny faran’ny herinandro ireo mpitory. Mety hisy koa faritany tsara hanaovana fitoriana eny amin’ny arabe, izay mamela anao hiresaka amin’ny olona mody avy miasa. Maro no mahita fa ny takariva no fotoana tsara indrindra hiverenana hitsidika an’ireo izay nampiseho fahalianana.
5 Aoka ianao hitandrina sy ho malina: Ny fivoahana any ivelany amin’ny maty masoandro na raha efa maizina dia mety hampidi-doza any amin’ny faritra sasany. Ho fahendrena ny handehanana tsiroaroa na miaraka amin’ny antokon’olona eny amin’ny arabe mazava tsara, sy ny hitsidihana trano na trano avo rehefa azo antoka ihany fa tsy haninona ianao. Rehefa mandondòna eo am-baravarana ianao, dia mijoroa eo amin’izay hahitana anao, ary ampahafantaro mazava hoe iza ianao. Aoka ianao hanana fahaiza-manavaka. Rehefa nahamarika ianao fa mitsidika amin’ny fotoana tsy mety, toy ny rehefa misakafo ilay fianakaviana, dia manolora ny hitsidika amin’ny fotoana hafa. Mazàna dia tsara indrindra ny hamerana ny fitorianao ho eo am-piandohan’ny takariva, fa tsy hitsidika olona hariva be, rehefa mety hiomana hatory ho amin’ny alina ireo tompon-trano.
6 Na dia mihafohy aza ireo takariva, dia afaka mitory foana isika. Rehefa manao ‘fanompoana masina andro aman’alina’ ho an’Andriamanitra isika, dia azo antoka fa hitahy ny ezaka ataontsika i Jehovah. — Apok. 7:15, NW.