Waamini​—Ikhalelo innivaha ikuru

WAAMINI ikhanle ikhalelo yokuru cinene. Wootakihera, Sotwani hataa eekurumicaka uhonona upatthaniihu ni Nluku, waamini unaanikavihera ukhitiri “uttipihera mavaka otheene oopharela a Ntakhali.” (Efesu 6:16) Nakhalanaka waamini, ninaakhitiri utthema masankiho ookhala toko mwaako. Yesu aheera: “Mwakhalana waamini woolikanaca niitthaka yo mwiri uneehaniya mostarda, nnaahala wiirela ula mwaakoola: ‘Uthame va ni urwee nwo,’ ni uyo unaahala uthama.” (Mat. 17:20) Ukhala wiira waamini ikhalelo inlipihaca upatthaniihu ni Yehova, unaareera waakhula ala makohwaala: Waamini isiyani? Manannani waamini wihu cinlipihaciyaaya ni itthu irineehu wanrimani? Manannani cinhaleehu ulipihaca waamini wihu? Tipani nlamuliyeehu umwaamini?—Aroo. 4:3.

WAAMINI ISIYANI?

Waamini khunakhala ukupali paahi itthu inhimyaaya Ibiiblya wiira ikhanle ikhweeli. Kontha hataa “maciini anaakupali [wiira Nluku haavo] ni anaattettemela.” (Tiya. 2:19) Vano, waamini isiyani?

Ibiiblya inaataphulela waamini ni mananna meeli. Yoopacera, “waamini unkhala ukhuluveleeha wiira inaawa imwehereriya.” (Mabere. 11:1a) Wakhalana waamini, weeva unaakupaleeha wiira citthu cotheene cinoolumaawe Yehova cikhanle ikhweeli ni cinaahala wiirannya. Wootakihera, Yehova ahowiirela asarayeli: ‘Waari wiira nnaakhitiri uhonona waataana waka woothana ni waataana waka woohiyu, wiira uhikhale-tho uthana ni uhiyu, commo paahi phaahalaaya uhononiya waataana waka ni Davidi, nantekwaaka.’ (Jer. 33:20, 21) Weeva unawoova wiira wanihukuni ncuwa khaninhala ukhuma awula ukela woohihala-tho ukhala uthana awula uhiyu? Unawoonannya wiira mena. Wakhala wiira unaakupali wiira ncuwa ninaahala ukhuma ni ukela mahuku otheene, niireke weeva pooti uhikupali wiira Mpattusi naahala upanka citthu cikhuluvelihalyaawe?—Isai. 55:10, 11; Mat. 5:18.

Yonayeeli, waamini unkhala “wooniheriya ratta ikhweeli cihinoonnya.” Ibiiblya ineera wiira waamini unkhala “wooniheriya ratta,” awula “itthu inonkupaliha ntthu” citthu cihinooniya ni miitho, masi cikhanle citthu cokhweeli. (Mabere. 11:1b; niwehero) Manannani? Umuupuwele mwanhima nowa wuukoha co: ‘Nnocuwela cani wiira iphyoo ihaavo?’ Weeva khunatoko woona iphyoo, masi unawoonannya wiira waanahala umwaakhula uyo mwanhimooyo unhimyeraka citthu cinthoonyera wiira iphyoo ihaavo—citthu toko umumula, mananna iphyoo cineenyaanyihaaya citthu ni waanaahala unhimyera citthu cikhwaawe. Nnyo citthunnyo cinaahala unkupaliha mwanhimooyo wiira iphyoo khweeli ihaavo, hataa hikhitiriki woona. Waamini phiryaaya ciicammo. Waamini uhaana ulipiheriyaka ni citthu coonikupaliha.—Aroo. 1:20.

WAAMINI UNKHUMA WANRIMANI

Ukhala wiira waamini unlamuliya ulipiheriya ni citthu coonikupaliha, ntthu haana apaceraka ‘ucuwela ikhweeli’ wiira akhalane waamini. (1 Tim. 2:4) Masi ucuwela ikhweeli paahi khuntosa. Apostolu Paulu hantikha eeraka: “Ni nrima, ntthu nawaamini.” (Aroo. 10:10) Ntthu khanlamuliya paahi ukupali ikhweeli, masi ciicammo haana aweheraka ikhweeli ukhala itthu yofayita ni nrimaawe wotheene. Commo uyo phinhalaawe ukhitiri uthoonyera waamini, awula, weettela ikhweeli. (Tiya. 2:20) Ntthu hinsukhuru wanrimani wawe ikhweeli yiitthucalyaawe, hataa akhalanaka citthu cinci conkupaliha, uyo naakhotta uhiya uttuli citthu cinkupalyaawe ni nopheela upanka inoncivela. (2 Pet. 3:3, 4; Yuda 18) Phimaana hataa khalayi, yahaavo atthu yoonale miiriirya, masi khayaathoonyenre waamini. (Manu. 14:11; Joau 12:37) Nnepa wowaarya wa Nluku unaakavihera ukhalana waaminni paahi atthu khweeliini inaacivela ikhweeli wanrimani waya.—Akalas. 5:22; 2 Atesal. 2:10, 11.

MANANNA DAVIDI CAATHOONYENRYAAWE WAAMINI

Nhina atthu enci yaathonyenre waamini khalayi, haavo mwene Davidi. (Mabere. 11:32, 33) Masi khunakhala wiira amucyaawe Davidi otheene yahaana waamini woolipa toko uyova. Woone ntakihero na Eliyapi, nyeenyaawe Davidi omuulupale. Ukati Koliyasi wancenryaawe waacocolaca apoovu a Nluku, Davidi ahokhala oorusiya cinene. Masi Eliyapi athoonyeraka uhikhalana waamini, ahonvaanyiha Davidi ni ahomwiirela wiira uyo ahaana nrima woohinamaana. (1 Sam. 17:26-28) Khaavo noyaryaana waamini ni khaavo nohiyeriya waamini naasithumwaane. Phimaana, Davidi aakhalanne waamini kontha ahaana upatthani woolipa ni Nluku.

Nhina Isaalimu 27, Davidi naattonka isiyani yankavihenre ukhalana waamini woolipa. (Iveerusu 1) Davidi aanawuupuwela citthu cankhumelenle ni citthu Yehova caapankalyaawe alupatthyaawe. (Iveerusu 2, 3) Davidi aanawoona ukhala itthu yofayita nipuro naaswaleliya Nluku ni waanancivela urwaa unswalela Nluku nno nipuronno. (Iveerusu 4, 6) Khula ukati uyo aanaalompa wiira akaviheriye ni Yehova. (Iveerusu 7, 8) Davidi ciicammo aanaapheela wiitthucihiya munttalani wa Yehova. (Iveerusu 11) Davidi aawehera waamini ukhala itthu yofayita cinene, mpaka uyo ahokoha eeraka co: “Kaahala ukhala nipuroni kahaakhalanne waamini?”—Iveerusu 13.

MANANNA OOKHALANA WAAMINI WOOLIPA CINENE

Weeva ciicammo pooti ukhalana waamini toko Davidi, watakihaka citthu cittonkilyaawe nhina Isaalimu 27. Ukhala wiira waamini unlipiheriya nuucuwela ikhweeli, weeva unlamuliya usoma Ibiiblya ni ilivuru cinooluma myaha co mbiiblyani. Wasomaka, unaahala utepa uhuurikela ukhalana iyo ikhalelo yo nhokorokho wo nnepeeyo. (Isaa. 1:2, 3) Ukati woosoma, ukumihe ukati wiira wuupuwele itthu insomaa. Woopuwelaka insomaa, unaahala utepa unsukhuru Yehova. Ni watepaka unsukhuru Yehova, unaahala utepa upheela uthoonyera waamini waa, ni weeva ciicammo unaaha upheela unswalela umikutthaanoni ni waalalyeera akhwaa itthu inwehereraa uhoolo. (Mabere. 10:23-25) Uhiya iyo, weeva ciicammo pooti uthoonyera waamini waa ‘walompaka woohihiyerera ni woohoocya.’ (Luka 18:1-8) Phimaana, ‘unlompe woohihiyerera’ Yehova, ukhuluvelaka wiira ‘uyova nawuuwacera.’ (1 Atesal. 5:17; 1 Pet. 5:7) Waamini unaaniiriha upanka citthu, ni citthu cimpankeehu cinaalipihaca waamini wihu.—Tiya. 2:22.

UMWAAMINI YESU

Uhiyu mmoca Yesu hinaaya ukhwa, uyo ahowiirela attharyaawe: “Moonihere umwaamini Nluku; ciicammo moonihere ukaamini miivano.” (Joau 14:1) Iyo inthoonyera wiira, uhiya umwaamini Yehova paahi, ciicammo nihaana nimwaaminiki Yesu. Manannani weeva cinlamuliyaa uthoonyera wiira unaamwaamini Yesu? Nttwee noone mananna mararu.

Inanna yoopacera: uwehere woopoliya wihu khampa itthuvo Nluku yuuvahalyaawe weeva. Apostolu Paulu heera: “Miiva kinkhala kimwaaminiki mwana a Nluku, kifentale ni eevaherenre wiira akoopole.” (Akalas. 2:20) Toko apostolu Paulu, weeva unthoonyera wiira unaamwaamini Yesu waaminiki wiira woopoliya wihu ni Yesu unawuukavihera weeva, waaminiki wiira phinompankiha Nluku ulevelela matampyaa, unawuuvaha nweherero nookhalana ukumi woohimala uhoolo ni wiira phinthoonyero nuulupale no nifento ninoothoonyeraawe Nluku. (Aroo. 8:32, 38, 39; Efesu 1:7) Weeva waaminiki khweeliini wiira woopoliya wihu ni Yesu pooti wuukavihera, unaahala ukhitiri uhiya ukhala ooriipiya nrima nlattu woottheka waa.—2 Atesal. 2:16, 17.

Yonayeeli, uhihiye unlompa Yehova. Wiivaherera wa Yesu unaanikhitiriha ukhala apatthani a Nluku. Nlattu wo woopoliya wihu ni Yesu, hiiva ninaakhitiri unlompa Yehova ‘nikhuluvelaka, wiira nooneliye ikiriri ni woonelela maana oonironya, wiira nikaviheriye ukati umpheeleehu.’ (Mabere. 4:15, 16; 10:19-22) Ulompa unaalipihaca ulakela wihu uhintthekela Yehova.—Luka 22:40.

Yoneeraru, umwiiwelele Yesu. Apostolu Joau hantikha eeraka: “Ntthu nomwaamini Mwaana haana ukumi woohimala; ntthu himmwiiwelela Mwaana kharina ukumi woohimala, masi urusiya wa Nluku unkhala nuuyo ntthuuyo.” (Joau 3:36) Uwehe wiira Joau hovirikaniha uthoonyera waamini ni uhiiwelela. Phimaana, wapheela uthoonyera wiira unaamwaamini Yesu, uhaana umwiiwelelaka. Inanna imoca yoomwiiwelela Yesu ukhanle utthara “nlamulo na Kristu,” awula, citthu cotheene Yesu ciitthucihalyaawe ni cirumalyaawe. (Akalas. 6:2) Inanna ikhwaawe yoomwiiwelela Yesu ukhanle utthara malakihero annivahaawe avarelaka nteko “ipottha yookhuluvelya ni yankhili.” (Mat. 24:45) Weeva wamwiiwelelaka Kristu, unaahala ukhalana ikuru coohala wuukhitiriha uvilela masankiho moolupale ookhala toko nkhaya.—Luka 6:47, 48.

“MWIILIPIHE NHINA WAAMINI WINYU WOWAARYA CINENE”

Ikwaha imoca, nlopwana ahonkhuwela Yesu eeraka: “Mi kinawaamini! Nkikavihere waamini!” (Mark. 9:24) Uyo ahaana waamini vakaani, masi ahiiyeviha ni ahokupaleela wiira aalamuliya wuncerera waamini wawe. Toko uyo nlopwanooyo, uhaavo ukati unhaleehu upheela waamini cinene. Ni otheene cihu ninlamuliya ulipihaca waamini wihu nenna co. Toko ciitthucaleehu, nihaana usoma Nuulumo na Nluku ni wuupuwela insomeehu. Iyo inaahala unikavihera wiira wanrimani wihu, ninsukhuru cinene Yehova. Ciicammo, waamini wihu unhala wuunuwa neekurumica hiivano—wamoca ni mayamunna—unswalela Yehova, waalalyeera akhwiihu itthu inweherereehu uhoolo ni uhihiya ulompa. Uhiya iyo, nalipihacaka waamini wihu, ninawaakhela iparakha yuulupale cinene. Nuulumo na Nluku ninniirela: “Mwiilipihe nhina waamini winyu wowaarya cinene . . . wiira nhihiye upanka citthu cinhala umwiiriha Nluku wuufentani.”—Yuda 20, 21.