Mwaiusha Ukupepelako Yauze

1. Uzye twamanya uli ukuti mapepo itu yacindama kuli Yeova?

IPEPO uupe usuma sana. Elenganyini pali cii: Yeova wapeela ya malaika imilimo imwi. (Masa. 91:11) Nupya Yeova wapeela nu mwanakwe imilimo icindame sana. (Mate. 28:18) Nomba uzye kwaya wino wapeela umulimo wa kukutika uku mapepo? Yeova sile umwineco aliwe akakutika uku mapepo. Yeova, ‘aakauvwa mapepo,’ akakutika kuli sweswe.—Masa. 65:2.

2. U mu nzila ci muno tungakolanyizizyamo umutumwa Paulo lino tukupepelako yauze?

² Nanti tukapepa kuli Yeova nu kumunena ivikutusakamika, tulinzile nu kulapepelako yauze. Vikwene ali vino nu mutumwa Paulo wacitanga. Wakwe, walembiile amu cilongano ca mu Efeso ukuti: “Natwalilila ukumulumbula umu mapepo yane.” (Efes. 1:16) Nupya wapepelangako na antu umu kulungatika. Wakwe, wanenyile Timoti ati: “Nkutaizya Leza, . . . ntalata ukukupaapatilako kuli Leza usiku nu musanya.” (2 Tim. 1:3) Paulo wakwatanga intazi pa lwakwe zino wapepelangapo. (2 Kol. 11:23; 12:​7, 8) Lelo wakwatangako insita iya kupepelako yauze.

3. U mulandu ci uungalenga twilile ukupepelako yauze?

³ Insita zimwi tungilila ukupepelako yauze. U mulandu ci? Nkazi Sabrinaa walanzile umulandu onga uukalenga twailila. Watiile: “Ndakai swe yantu twapamviwa sana. Tungika sana mano uku kupepela sile pa ntazi zino tukweti ukucila ukupepelako pa ntazi zino yauze yakweti.” Uzye namwe ivya musango uu vikamucitikila? Ndi cakuti ali vino cili, cipande cii cingamwazwa. Cimalanda (1) umulandu uno cacindamila ukupepelako yauze na (2) vino tungacita pakuti tutailila ukupepelako yauze.

UMULANDU UNO TULINZILE UKUPEPELAKO YAUZE

4-5. Uzye mapepo yano tukapepelako yauze yakwata uli amaka? (Yakobo 5:16)

⁴ Mapepo yano tukapepelako yauze ‘yakwata sana amaka.’ (Belengini Yakobo 5:16.) Uzye ukupepelako yauze kungalenga ivintu ukusenuka? Ee. Lino Yesu wamanyile ukuti umutumwa Petulo wali nu kumukaana, walanzile ati: “Inkupepela pakuti utwalilile ukuya nu utailo.” (Luka 22:32) Na Paulo wamanyile ukuti ipepo lingalenga ivintu ukusenuka. Lino yamulemile nu kumwika umu cifungo mu Loma, walembiile Filimoni ukuti: “Nintaila ukuti ndi cakuti yalamfumya umu cifungo pa mulandu na mapepo inu, indi nu kwiza kuli mwemwe.” (Filim. 22) Nupya patalengile Paulo wafumile umu cifungo nupya watwalilile ukusimikila.

⁵ Ukuya kwene, tutanga tupatikizye Yeova ukucita vino tukupepelapo. Akaika sana mano kuli vino vikasakamika aomvi yakwe lino yakupepa, nupya insita zimwi akacita vino aomvi yakwe yakupepelapo. Ukumanya icisinka cii, kukalenga twapepa kuli aliwe nu mwenzo witu onsi, nu kutaila ukuti alasuka ipepo litu.—Masa. 37:5; lolini 2 Kolinto 1:11.

6. Uzye ukupepelako yauze kukalanga uli vino tukayuvwa pali aliyo? (1 Petulo 3:8)

⁶ Ukupepelako yauze kukalenga ukuti twaya sana nu “luse.” (Belengini 1 Petulo 3:8.) Umuntu uwaya nu luse akamanya vino umuntu muze akucula nupya akalondesha ukumwazwa. (Mako 1:​40, 41) Ya Michael ya eluda, yatiile: “Ndi cakuti nkupepela pali vino yauze yakulondekwa, nkaika sana mano uku ntazi zino yakweti nupya cikalenga nayatemelwako. Nkapalama sana kuli aliyo nanti cakuti yene yatamanyile nu kumanya.” Ya Richard ya eluda yauze nayo yalanzilepo ivisuma na vyuze ivikacitika. Yatiile: “Ndi cakuti twapepelako umwi, tukalondesha nu kwazwako umuntu wiyo.” Nupya yatiile: “Ndi cakuti twazwilizya umuntu wino tukupepelako, cikaya kwati tukwazwilizyako pakuti ipepo lino tukumupepelako lyasukwe.”

7. Uzye ukupepelako yauze kungatwazwa uli ukukanaelenganya sana pa ntazi zino tukakwata? (Filipi 2:​3, 4) (Loliniko ni vikope.)

⁷ Ukupepelako yauze kungatwazwa ukukanaika sana mano uku ntazi zino tukweti. (Belengini Filipi 2:​3, 4.) Swensi kwene tukakwata intazi pa mulandu wakuti tukaikala umu nsi yii ikatungululwa nu mwipe. (1 Yoa. 5:19; Kuso. 12:12) Ndi cakuti lyonsi tukupepelako yauze, tulaiusha ukuti intazi zino tukakwata “azino na ina [itu] umu nsi yonsi yakaculako.” (1 Pet. 5:9) Nkazi Katherine, painiya walanzile ati: “Ukupepelako yauze kukalenga naiusha ukuti na yauze kwene yakakwata intazi. Ukwiusha icisinka cii, kukalenga ntaelenganya sana pa ntazi zino nkakwata.”

YAKALONDEKWA UKUYAPEPELAKO

8. Landiniko pali yano tungapepelako.

⁸ Aaweni yano tungapepelako? Tungapepelako maumba ya yantu, wakwe alwale, acance yano yakacuzya nanti ukuyatunka ukucita iviipe kuli yano yakasambilila nayo, nanti aakacula pa mulandu nu ukote. Aina itu na ya nkazi aingi yakacuziwa kuli ya lupwa nanti amu uteeko. (Mate. 10:​18, 36; Mili. 12:5) Aina na ya nkazi yamwi yasha mang’anda yao pa mulandu ni vimvulunganya ivikayako pa mulandu ni vikanza vya miteekele. Yauze yakacula pa mulandu na mazanzo aakuiponela. Limwi tutanga tumanye aina na ya nkazi yaa. Nomba ndi cakuti twayapepelako, tukalangilila ukuti tukalondela isunde lino Yesu watupeezile ilyakuti “mwatemwana.”—Yoa. 13:34.

9. U mulandu ci uno tulinzile ukupepelako yayo aakatungulula umwi iuvi lyakwe Yeova alino na aci yao?

⁹ Tungapepelako na yayo aakatungulula umwi iuvi lyakwe Yeova. Pali yano yakatungulula paya, amwi Iumba Ilikatungulula na ya kaazwa yao, amuli Komiti ya Musambo, angalizi ya pa musambo, angalizi aakatandalila ivilongano, ya eluda amu cilongano, alino na aomvi aakatumikila. Aina yaa nayo kwene yakakwata intazi, lelo yakaombesha ukutwazwa. (2 Kol. 12:15) Wakwe, umwina Mark umwangalizi wa ciputulwa watiile: “Intazi yonga ikulu ino nakwata u kuya ukutali na kuno avyazi yane akote yakaikala. Yonsi kwene yakalwalilila. Nanti nkazi wane na ya iya yakayasakamala, nkauvwa uyi ukuti nsiyazwa sana ukulingana na vino ndinzile ukucita.” Tutanga tumanye intazi zyonsi zino aina yaa yakakwata, lelo tulinzile ukwiusha ukulayapepelako. (1 Tesa. 5:​12, 13) Tungapepelako na aci ya aina yaa aakaombesha pali vino yakatungilila ya iya pakuti yatwalilila ukuomba imilimo yao umu cilongano.

10-11. Uzye Yeova akakutika mapepo yano tukapepelako yauze ukwaula ukuyalumbula mazina? Londololini.

¹⁰ Wakwe vino itusambilila, insita izingi tukapepelako aina na ya nkazi. Wakwe, nanti cakuti tusikwelenganya pa muntu umwi, tungalenga Yeova ukuti aazwe yayo aali umu cifungo nanti ukuteekezya yayo atiyafwilwa atemwika yao. Eluda uwizina lyakuti Donald watiile, “Twakwata aina na ya nkazi aingi aakazizimizya intazi icakuti insita zimwi tukapepa ukwaula ukuyalumbula mazina pakuti tupepeleko yonsi akweti intazi.”

¹¹ Uzye Yeova akakutika mapepo ya musango uu? Ee. Tusimanya vino ya kapepa yanji wenga na wenga yakulondekwa. Fwandi caya sile ningo ukupepelako ina na ya nkazi yonsi nanti cakuti tutayalumbwile mazina. (Yoa. 17:20; Efes. 6:18) Mapepo ya musango uu yakalangilila ukuti ‘twatemwa aina yonsi.’—1 Pet. 2:17.

LINO TUKUPEPELAKO UMWI

12. Uzye ukwika mano kuli vino vikucitikila yauze, kungatwazwa uli ukulapepa mapepo amu kulungatika?

¹² Mwaika mano kuli vino vikucitikila yauze. Ukulunda pa kupepelako aina na ya nkazi, cingazipa nga tukupepelako umuntu wenga na wenga. Uzye umu cilongano cinu muli umwi aakalwalilila? Uzye kuli uwacance uwatatoovoka pa mulandu wakuti limwi yakamucuzya uku sukulu? Uzye kuli umuvyazi uwaya wenga aakwezya na maka ukusalapula nu kusambilizya umwana “ukulingana na vino Yeova akalanda”? (Efes. 6:4) Ndi cakuti mukwika mano kuli vino vikucitikila yauze, mulayatemelwako nupya cilalenga mwalondesha ukuyapepelako.b—Loma 12:15.

13. Tungapepelako uli yano tutalolanapo?

¹³ Lino mukupepelako yauze, mwayalumbula mazina. Tungacita vivyo na kuli yano tutaalolanapo. Wakwe, elenganyini pa ina na ya nkazi yano yika umu vifungo umu mpanga wakwe Crimea, Eritrea, Russia, nu ku Singapore. Mungazana mazina yakwe yano yika umu vifungo apa jw.org.c Umwangalizi wa ciputulwa uwi zina lyakuti Brian watiile: “Nazana ukuti ukulemba izina lyakwe kapepa munji wino yanyepa alino nu kulilumbula ni izwi ilyuvwike kukangazwa ukwiusha umuntu wiyo alino nu kumulumbula umu mapepo yane.”

14-15. Tungacita uli pakuti twapepelako yauze umu kulungatika?

¹⁴ Mwapepa umu kulungatika. Ya Michael yano itulandapo mpiti, yatiile: “Lino nkubelenga malyasi pa jw.org pa ina aya umu vifungo, nkaelenganya pali vino ningayuvwa ndi cakuti ivya musango uu vyacitikile nene. Namanya ukuti ningasakamala pali mamane nupya ningalonda ukuti akwata vino akulondekwa. Ukucita vii kukangazwa ukumanya vino ningapepelapo umu kulungatika lino nkupepelako aina yano yatwala umu vifungo aakwata.”—Aeb. 13:3.

¹⁵ Ndi cakuti tukwelenganya pali vino ivintu vikaya uku ina na ya nkazi aaya umu vifungo, cingatwazwa ukwelenganya pa vintu na vyuze vino tungapepelapo. Wakwe, tungapepa ukuti ya kalinda ya mu vifungo yaaya ni cikuuku kuli aliyo nu kuti yayo akwata ivifulo vya papela yazumilizya aina na ya nkazi ukukwata untungwa wa kupepa. (1 Tim. 2:​1, 2) Tungapepelako aina amu vilongano ukuti yakomeleziwa kuli vino aina ali umu vifungo yakuzizimizya, nanti ukuti aasi ya kapepa yalondesha ukusambilila icumi ndi cakuti yalola vino aina yakutwalilila ukuya ni miyeele isuma. (1 Pet. 2:12) Nupya tungacita vikwene lino tukupepelako aina na ya nkazi aakuzizimizya intazi zyuze. Ndi cakuti tukwika mano kuli vino vikucitikila yauze, tukulumbula mazina lino tukupepelako yauze, alino nu kupepa umu kulungatika, tungalanga ukuti tukuleka ukutemwa kuno ‘twatemwa antu yonsi kwakulilako.’—1 Tesa. 3:12.

TULINZILE UKUYA AICEFYE LINO TUKUPEPA

16. Uzye tungaya uli aicefye lino tukupepa? (Mateo 6:8)

¹⁶ Wakwe vino itulola, mapepo yano tungapepelako umuntu yangalenga ukuti ivintu visenuke kuli aliwe. Nomba tulinzile ukuya aicefye lino tukupepa. Lino tukupepa, tusinena Yeova vino atamanyile; nanti ukumunena vino alinzile ukucita pa ntazi zino tukweti. Yeova wamanya vino aomvi yakwe yakalondekwa na lino yatatala yamulenga. (Belengini Mateo 6:8.) Uzye lyene, u mulandu ci uno tulinzile ukulapepelako yauze? Ukulunda pali vino itulandapo umu cipande cii, ukupepelako yauze kukalanga ukuti twaikako mano. Ukutemwa u kukalenga twapepelako yauze. Nupya Yeova akaya ni nsansa ndi cakuti aomvi yakwe yakukolanya vino waya nu kutemwa.

17-18. Uzye mapepo yano tukapepelako yauze tungayakolanya kuli vyani?

¹⁷ Nanti cakuti mapepo itu yano twapepa yakuloleka ukuti yataswikwe, yakalangilila vino twatemwa aina na ya nkazi nupya Yeova akaika mano uku mapepo ya musango uu. Katulangilile: Elenganyini pa lupwa ulwakwata umwana umulumendo nu mukazyana. Umulumendo watalwala. Umukazyana wanena ya isi ukuti: “Tata citinipo cimwi. Atalwalisha!” Ya isi iyatandika mpiti ukucitapo vimwi pano yatemwa umwanao nupya yakumusakamala. Lelo ya isi yanguvwa ningo sana ukulola vino umwana umukazyana wataika mano kuli ndume yakwe nupya akupaapata ya isi ukuti yamwazwe.

¹⁸ Vikwene ali vino Yeova akatukomelezya ukuti twasakamalana nu kupepelako yauze. Nga tukucita vivyo, tukalanga ukuti tutika sile mano kuli sweineco nu kuti twatemwa aina na ya nkazi nupya Yeova akaikako mano kuli vino tukucita. (2 Tesa. 1:3; Aeb. 6:10) Nupya wakwe vino itusambilila, mapepo yano tukapepelako yauze yangalenga ivintu ukusenuka. Fwandi lekini lyonsi twaiusha ukupepelako yauze.