Ivingatwazwa Ukumanya Ukuti Tukazanzya Yeova

1. I vyani vino aomvi yakwe Yeova yamwi yakaelenganya?

TUKAUVWA ningo sana ukumanya ukuti Yeova akazangila umu antu yakwe. Baibo ikati: “Yawe akazangila mu antu.” (Masa. 149:4) Nomba insita zimwi yamwi yakatwisika, nu kuyuzya ukuti ‘uzye Yeova akazangila muli nene?’ Aomvi yakwe Yeova aingi aliko lino ivyalumbulwa muli Baibo vyacitikanga nayo kwene kwali insita ino yelenganyanga wakwe vikwene.—1 Sam. 1:​6-10; Yobo 29:​2, 4; Masa. 51:11..

2. Uzye Yeova akazangila muli yaweni?

² Baibo ikalanda ukuti naswe ya antu swemuno tutamalilika tungaya ivyuza vyakwe Leza. Tunga cita uli vivyo? Tulinzile ukutaila Yesu Klistu alino nu kubatiziwa. (Yoa. 3:16) Nga twabatiziwa alino tukalanga antu yonsi ukuti twalapila uku membu nupya twalaya Yeova ukuti lyonsi tulacita ukulonda kwakwe. (Mili. 2:38; 3:19) Tukazanzya Yeova ndi cakuti twatandika ukulundulula ucuza witu na aliwe. Ndi cakuti twatwalilila ukuombesya ukwikalilila uku mulapo uno twalafile, Yeova alatwalilila ukuzangila mu sweswe nupya tulatwalilila ukuya ivyuza vyakwe. —Masa. 25:14..

3. I vyani vino tumasambilila umu cipande cii?

³ Umulandu cii uno yamwi insita zimwi yakaelenganyizizya ukuti Yeova asizangila muli aliyo? Uzye Yeova akalanga uli ukuti akazangila muli sweswe? Nupya i vyani ivingazwa Umwina Klistu ukusininkizya ukuti Yeova akazangila muli aliwe?

IVINGALENGA YAMWI YALENGANYA UKUTI YEOVA ASIZANGILA MULI ALIYO

4-5. Nanti icakuti insita zimwi tukayuvwa asile sile i vyani vino tulinzile ukusininkizya?

⁴ Aingi yakayuvwa ukuti yatacindama ukufuma sile lino yali ance. (Masa. 88:15) Umwina Adrián watiile: “Lyonsi nailolanga uwa silesile. Cimwi cino nkaiusya cino nacitanga lino nali umwance, ukupepa ukuti ya lupwa yane yakaye umu paladaise nanti icakuti ntasininkizye ukuti nali nu kuya umu paladaise.” Ya Tony, akulile umu lupwa lwa antu aatapepanga Yeova, yatiile: “Avyazi yane yatatazile yanene ukuti yantemwa nanti ukuti yakazangila muli nene. Fwandi ci calenzile na uvwa ukuti vino na citanga vitayazazyanga.”

⁵ Ndi cakuti insita zimwi mukayuvwa asile sile mwaiusya ukuti Yeova lyonsi waya umupipi namwe. (Yoa. 6:44) Akalola ivisuma muli sweswe vino tutanga tulole nupya watumanya ningo sana. (1 Sam. 16:7; 2 Mila. 6:30) Fwandi tulinzile ukutaila ndi watunena ukuti twacindama.—1 Yoa. 3:​19, 20.

6. Uzye Paulo wayuvwanga uli pali vino waluvyanyizye mpiti?

⁶ Yamwi lino yatatala yasambilila icumi, yacitanga ivintu ivyalenga limwi yayuvwa amulandu. (1 Pet. 4:3) Na Aina Klistu aakula muli vyakwe Leza nayo kwene yangakwata intazi yamusango uu. Uzye namwe mukaelenganya ukuti Yeova atanga amwelele? Ndi cakuti avino mukaelenganya ukumanya ukuti aomvi yakwe Yeova aliko mpiti nayo kwene yakwatanga intazi ya musango uu kungamwazwa. Wakwe umutumwa Paulo wayuvwanga uwa ulanda pa mulandu nu kukana malilika. (Loma 7:24) Nanti icakuti Paulo walapile nu kubatiziwa. Watwalilile ukuilola ukuti uwali ali ‘mucepesye pa yatumwa’ nupya “muyembu” ukucilapo.— 1 Kol. 15:9; 1 Tim. 1:15

7. I vyani vino tulinzile ukumanya ndi cakuti twaluvinye vimwi mpiti?

⁷ Tata witu uwa kwi yulu akatwelela ndi cakuti twalapila. (Masa. 86:5) Fwandi ndi cakuti twalapila tulasininkizya ukuti vino Yeova walanda ivya cumi nupya alatwelela nga twaluvyanya.—Kolo. 2:13.

8-9. Uzye tungacita uli pakuti tutaelenganya ukuti tutanga tuzanzye Yeova?

⁸ Swensi kwene tukalonda kuombela Yeova ukulingana na pano tungapezya. Nomba yamwi yakalola ukuti yatanga yakwanisye ukuzanzya Yeova . Nkazi Amanda watiile: “Natandike ukwelenganya ukuti ukuombela Yeova kukalondekwa ukuombesya sana. Fwandi natandike ukuombesya ukucila na pano ningapezya. Nupya ndi cakuti nafilwa ukuombesya nalolanga ukuti Yeova watata ukungavwa nupya indi nenga.”

⁹ Tungacita uli pakuti tute ukwelenganya ukuti tutanga tukwanisye ukuzanzya Leza? Mwaiusya ukuti Yeova akatuvwikisya. Nupya asilonda twacita vino tutanga tukwanisye. Akatutaizya ndi cakuti tukuomba ukulingana na papezile maka itu. Nupya mwaelenganya pa malyasi amu Baibo akalanda pa yantu aombelanga Yeova nu mwenzo wao onsi. Elenganyini pali Paulo. Waombelanga Yeova nu mwenzo onsi nupya wayanga umu ncende zyakutali nupya wapanzile icilongano ivingi. Nomba lino ivintu vyasenwike umu umi wakwe watile ukuomba wakwe vino waombanga pa kutandika, uzye Yeova watile ukuzangila muli aliwe? Awe. Watwalilile ukuomba ukulingana na pano angapezya nupya Yeova wamupaazile. (Mili. 28:​30, 31) Wakwe Paulo naswe kwene insita zimwi tungafilwa ukuombela Yeova ukulingana na vino tukulonda. Nomba icacindama umulandu uno tukuombela. Lekini lyene tulande pali vimwi ivikalanga ukuti Yeova akazangila muli sweswe.

UZYE YEOVA AKALANGA ULI UKUTI AKAZANGILA MULI SWESWE?

10. Uzye tungasininkizya uli ukuli Yeova akazangila muli sweswe? (Yoani 16:27)

¹⁰ Akaomvya Baibo. Yeova akalonda ukulanga antu akamuombela ukuti wayatemwa nupya akazangila muli aliyo. Amalembo yakalanda pa miku ili ino Yeova wanenyile Yesu ukuti akazangila muli aliwe. (Mate. 3:17; 17:5) Ukwaula nu kutwisika munguvwa ningo nga Yeova wamunena kuti akazangila muli mwemwe? Yeova asilanda naswe ukuomvya izwi lelo akalanda naswe ukuomvya Baibo. Lino tukubelenga amazwi asuma yano Yesu walanzile uku yasambi yakwe tukauvwa kwati Yeova akulanda naswe. (Belengini Yoani 16:27.) Yesu wakolanyanga imiyele yakwe isi. Fwandi nga twabelenga pali vino Yesu wacitilanga asambi yakwe acisinka atali amalilike, tukalola ukuti Yeova akulanda naswe.—Yoa. 15:​9, 15.

11. U mulandu cii uno tutalinzile ukwelenganyizizya ukuti Yeova atata ukuzangila muli sweswe nga twakwata intazi? (Yakobo 1:12)

¹¹ Akatupeela vino tukalondekwa. Yeova akalondesya ukutwazwa akatupeela vino tukalondekwa. Lelo insita zimwi Yeova akaleka iviipe ukutucitikila wakwe vino cali kuli Yobo. (Yobo 1:​8-11) Ndi cakuti twakwata intazi cisipiliula ukuti Yeova ataleka ukuzangila muli sweswe. Fwandi ii ikaya insita yakulanga vino twatemwa Yeova na vino twamutaila. (Belengini Yakobo 1:12.) Tukailolela vino akatwazwa nu kutusakamala lino akutwazwa ukuzizimizya intazi.

12. I vyani vino tungasambilila kuli vino vyacitikile ya Dmitrii?

¹² Elenganyini pali vino vyacitikile umwina Dmitrii akaikala uku Asia. Incito yasizile nupya papisile imyezi iingi kwaula ukuti yazane incito. Pakuti alange vino wataile Yeova wasoolwilepo ukulundulula imiombele yakwe mu mulimo wa kusimikila. Nupya kwene lino papisile insita ya Dmitrii yatazanyile incito. Izile yalwala icakuti yatakatukanga na pano yalalanga. Umwina Dmitrii watandike ukwelenganya ukuti atali a iya nupya isi umusuma nupya watandike ukulola ukuti Yeova watile ukuzangila muli aliwe. Lyene uwanda umwi amanguzi umwanakwe umukazyana walemvile amazwi akazanwa pali Ezaya 30:15: akuti “Amaka inu yalaya mu kuteekela nu kulanga utailo.” Watwalile ya isi nupya walanzile ati, “Tata ndi cakuti muvwa uyi mwaiusya amazwi yaa.”Ya Dmitrii Izile yamanya ukuti yalondekwanga ukutaizya Yeova pali vino ulupwa lwao lwakweti ivyakuzwala, ivyakulya, alino nu mwakwikala. Yalanzile yati “nalondekwanga ukuteekela nu kutwalilila ukutaila Yeova.” Ndi cakuti mukweti intazi ikolineko na ii mwataila ukuti Yeova alamwazwa ukuzizimizya.

13. Uzye Yeova angaomvya yaweni pa kulanga ukuti akazangila muli sweswe nupya akacita uli vivyo?

¹³ Akaomvya aina na ya nkazi. Yeova akaomvya aina na ya nkazi pa kutulanga ukuti akazangila muli sweswe. Wakwe angalenga yamwi ukutunena amazwi aakutukomelezya pa nsita ilinge. Vikwene ivyacitikile nkazi uwa ku Asia lino wakweti intazi. Incito ino waombanga yasizile nupya wizile alwala sana. Ya iya izile yacita uluyembu nupya yayaposile u eluda. Nkazi wii watiile “Ntamanyile umulandu uno ivintu vii vyacitikilanga. Nelenganyanga ukuti limwi kwali vimwi vino naluvyanyizye ivyalenzile ukuti Yeova ate ukuzangila muli nene.” Nkazi wii wapapasile Yeova ukuti amulange ukuti akazangila muli aliwe. Uzye Yeova wazwile uli nkazi wii? Nkazi watile, “ya eluda yalanzile nani nu kungazwa ukusininkizya ukuti Yeova wantemwa.” Nupya kwene walenzile uwazwilizyo ukufuma kuli Yeova. Watiile “Uwanda kwene uwa napokeliile kalata ukufuma uku ina na ya nkazi. Lino nabelenganga amazwi akuteekezya ali muli kalata wiya, nilwike ukuti Yeova waswike ipepo lyane.” Mu cumi Yeova akalanga ukuti akazangila muli sweswe ukuomvya aina na ya nkazi.—Masa. 10:17.

14. Inzila ci yuze ino Yeova akaomvya pa kulanga ukuti akazangila muli sweswe?

¹⁴ Yeova akalanga ukuti akazangila muli sweswe lino akuomvya aina na ya nkazi ukutupeela ukusunda kuno tukulondekwa. Wakwe, umu manda ya atumwa, Yeova wazwile Paulo ukulemba amakalata 14 kuli yakapepa yauze. Umu makalata yaa Paulo wapeezile aina na ya nkazi ukusunda ukwa mukulungatika nomba umwali amazwi alanganga ukutemwa. Umulandu cii uno Yeova walekiile ukuti Paulo alembe amazwi yaa? Yeova a Tata uwaya nu kutemwa nupya akasalapula ana yakwe yano “watemwa.” (Mapi. 3:​11, 12) Fwandi ndi cakuti twapokelela ukusunda ukwa muli Baibo tulinzile ukulola ukuti Yeova akazangila muli sweswe. (Aeb. 12:6) I vyani vyuze ivikalangilila ukuti Yeova akazangila mu sweswe?

NA VYUZE IVIKALANGILILA UKUTI YEOVA AKAZANGILA MULI SWESWE

15. Aweni yano Yeova akapeela umu pasi wa muzilo nupya cii cikatukomelezya uli?

¹⁵ Yeova akapeela umupasi wa muzilo kuli yayo akamuzanzya. (Mate. 12:18) Elenganyini pa mauzyo yaa, ‘Uzye nkalanga imiyele iikafuma uku mupasi wa muzilo?’ Uzye nkalanga ukuti nateeka umwenzo ukucila vino cali mpiti? Ndi cakuti mukulola imiyele isuma ino umupasi wa muzilo ukalenga tukwate mulasininkizya ukuti Yeova akazangila mu sweswe !—Lolini kambokosi kakuti “Imiyele Iikafuma uku Mupasi wa Muzilo . . . ”

16. Aweni yano Yeova akaomvya pa kusimikila ilyasi ilisuma, nupya uzye ukumanya vii kukamwazwa uli? (1 Tesalonika 2:4)

¹⁶ Yeova akapeela umulimo wa kusimikila ilyasi ilisuma kuli yayo akamuzanzya. (Belengini 1 Tesalonika 2:4.) Uvwini vino vyacitikile nkazi Jocelyn pa mulandu nu kusimikila ilyasi lisuma. Wanda umwi ya Jocelyn yazyusile ale yatakweti amaka nupya ala atonte. Yatiile “ntakweti amaka nupya na yuvwanga uwa silesile. Nomba pa nsita ii naombanga upainiya, nupya wali uwanda wa kuomba. Fwandi napefile kuli Yeova nupya naile umulimo wa kusimikila.” Uwanda kwene uwa akatondo ya Jocelyn yazanyile ya Mary, azumile ukutandika ukusambilila Baibo. Lino papisile insita ya Mary yalondolwelile ya Jocelyn ukuti yapepanga ukuti Leza angayazwa, nupya lino yatatala yamala ukupepa yuvwile ya Jocelyn yakonkonsya. I vyani vino ya Jocelyn yasambilile kuli vii ivyacitike? Yatiile “nuvwile kwati Yeova akunena ukuti, ‘nkazangila muli wewe.’” Kwene asi yonsi anguvwa ukwi lyasi ilisuma. Nomba tulinzile ukusininkizya ukuti Yeova akazangila muli sweswe ndi cakuti tukwezya na maka ukusimikila ilyasi ilisuma.

17. I vyani vino tukusambilila kuli vino ya Vicky yalanzile api lambo? (Masamu 5:12)

¹⁷ Ilambo likaomba ku yantu yano Yeova akazangila muli aliyo. (1 Tim. 2:​5, 6) Nga ndi cakuti tucili tukutwisika ukuti Yeova akazangila muli sweswe pa cisila ca kutaila nu kubatiziwa? Mwaiusya ukuti mutalinzile kuitaila mweineco lelo mwataila Yeova. Akalola yonsi ataila umwi lambo ukuti alungami nupya alayapaala. (Belengini Masamu 5:12; Loma 3:26) Ukwelenganya pi lambo kwazwile nkazi Vicky. Uwanda umwi pa cisila ca kwelenganya pi lambo wizile alanda ukuti “Yeova watwalilila ukuntekelela apa manda aingi. . . . Nomba cali kwati namunenanga ukuti: ‘Utanga ukwanisye ukutemwa umuntu wakwe nene. Ilambo lya mwanako litanga liombe uku membu zyane.’” Ukwelenganya pi lambo kwalenzile atandike ukwelenganya ukuti Yeova wamutemwa. Naswe kwene ndi cakuti tukwelenganya api lambo tulalola ukuti Yeova watutemwa nupya akazangila muli sweswe.

18. I vyani vino tungasininkizya nga twatwalilila ukutemwa tata witu uwa kwi yulu?

¹⁸ Nanti icakuti insita zimwi tungezya ukuomvya vino twasambilila, insita zimwi tungatoovoka nu kutandika ukutwisika ndi cakuti Yeova akazangila muli sweswe. Ndi cakuti vii vyamucitikila mwaiusya ukuti Yeova akazangila muli yayo “aakatwalilila ukumutemwa.” (Yako. 1:12) Fwandi twalililini ukupalama kuli Yeova nupya mwaiusya ukuti akazangila muli mwemwe. Lyonsi mwaiusya ukuti Yeova “ataaya ukutali kuli swensi wenga na wenga.”—Mili. 17:27.