Ivyeo Vya Kuomvya Umu Kabuku Kakuti Swe Ina Klistu nu Mulimo Witu
JULAI 7-13
IVYUMA IVYAYA UMWI IZWI LYAKWE LEZA
Visinte Ivingaazwa aa mu Cupo Ukuya ni Nsansa
Vino Mungacita Pakuti Mwazanzya Yeova Lino Mukwizizyanya
I ciputulwa cii ica nsita icilinzile ukupitapo pakuti mupingulepo ukutwalana nanti foo? Ivintu visizipa ndi cakuti twapingulapo zuwa. (Mapi. 21:5) Fwandi cii cikupiliula ukuti pakapita insita pakuti mumanye ningo umuntu wino mukwizizyanya nawe. Nomba cii cisikupiliula ukuti mulinzile ukulengela sana. Baibo ikati: “Icintu cakulolelela ndi cakana ukufikiliziwa cene cikawavya umwenzo.” (Mapi. 13:12) Nupya ndi cakuti mwizizyanya apa nsita itali cikaanguka ukucita uzelele. (1 Kol. 7:9) Ukucila ukulaelenganya pa nsita iyatipita ukufuma pano mwatandikile ukwizizyanya, mungayuzya ukuti, ‘i vyani vino ndinzile ukumanyilapo pakuti mpingulepo ningo?’
g 7/08 ifwa 7 pala. 2
Vino Mungacita pa Kukomya Icupo Cinu
Mwaicefya. “Mutaacita icili consi pa mulandu nu kucimvyanya nanti cilumba, lelo muye aicefye nu kulola ukuti yauze yamucila.” (Filipi 2:3) Ilingi atwalane yakapusana ndi cakuti umwi akulola ukuti wene ali ningo nu kutandika ukupeela umuze umulandu ukucila ukuicefya nu kulonda inzila iya kuzifizyamo ivintu pakuti vizipiile yonsi. Ndi cakuti mwapusana, kuicefya kungamwazwa ukuti mutacita ivintu ivingalenga ciloleke kwati mwemo muli ningo.
w06 9/15 ifwa 28 pala. 13
“Uwasansamuka na Mamako Uwa ku Ulumendo”
13 Nga ndi cakuti aatwalane yali nu ulanda pa mulandu wakuti yano yatwalana nayo yakuyacitila iviipe, yangacita uli? Yalinzile ukuombesha pakuti yamale intazi ino yakweti. Wakwe, ndi cakuti pa miku ingi aatwalane yakulanda amazwi amiponto kuli cila muntu yalinzile ukuombesha pakuti yamale intazi yiyo. (Mapinda 12:18) Wakwe vino twasambilile umu cipande icafumako, vii vingalenga ivintu viipe sana mu cupo. Ipinda lya muli Baibo likati: “Cazipa ukwikala umu lwanga kucila ukwikala nu muci uwatemwa ukulemanila nupya aakasoka zuwa.” (Mapinda 21:19) Ndi cakuti mwemwe yaci aaya umu cupo ca musango uu, muyuzye mweineco muti, ‘uzye vino nkacita vikalenga catalila yawane ukuya umupiipi nani?’ Baibo ikanena ya iya ukuti: “Mwe ya iya twalililini ukutemwa aci inu nupya mutayasokela.” (Kolose 3:19) Ndi cakuti mwemwe ya iya, muyuzye mweineco muti, ‘uzye vino nkacita vikalenga mamane aalonda kuze kuno angakomeleziwa?’ Ukuya kwene, uwatacita ucende atalinzile ukuipokolola. Nomba pa mulandu wakuti vya musango uu vingacitika, cili ningo kulanzyanya pa ntazi ukwaula ukupita umumbali.
Ukuvwikisha Sana Ivyaya Umu Malembo
w05 1/15 ifwa 17 pala. 9
Vimanyililo pa Wene Wakwe Leza Vikufikiliziwa
9 Ndakai Yesu ataakwela pali punda umunono wakwe vino muntu angakwela, lelo Umwene wa maka. Yesu yakamulanga ala watakwele pa mfwalasi ino muli Baibo ikaimililako inkondo. (Mapinda 21:31) Pali Kusokolola 6:2, pakati: “Nupya naweni imfwalasi itiswe nu wakwezilepo wakweti ulapwa; wapeezilwe cisote, nupya waile umu kucimvya nu kumalilila ukucimvya kwakwe.” Lelo Devedi kiimba wa masamu walemvile pali Yesu ati: “Yeova alakupeela amaka ukufuma umu Zioni, alalanda ati: “Yanga uwacimvya pakasi ka yalwani yako.’”—Masamu 110:2
JULAI 14-20
IVYUMA IVYAYA UMWI IZWI LYAKWE LEZA MAPINDA 22
Visinte Ivingaazwa Avyazi Ukukuzya Ningo Ana
Uzye Ana Inu Yalaombela Leza Nga Yakula?
7 Ndi cakuti mwatwalana nupya mukulonda ukukwata ana, muyuzye muti: ‘Uzye twaicefya nu kutemwa Yeova ni Izwi lyakwe icakuti Yeova angatusoolola ukusakamala umwana umucindame? (Masa. 127:3, 4) Ndi cakuti mwemwe yavyazi mpiti, muyuzye muti: ‘Uzye nkasambilizya ana yane vino ukuombesha kwacindama?’ (Kasa. 3:12, 13) Uzye nkaombesha ukucingilila ana yane uku vintu iviipe ivyaya umu nsi ii yakwe Satana? (Mapi. 22:3) Mutanga mucingilile ana inu uku ntazi zyonsi zino yangakwata. Citange cicitike. Lelo mungayapekanyizizya limwi uku ntazi zino yangakwata lino mukutwalilila ukuyasambilizya vino Baibo ingayazwa nga yakwata intazi. (Belengini Mapinda 2:1-6.) Wakwe ndi cakuti umwi uwa mu lupwa wata ukupepa Yeova, mulinzile ukwazwa ana inu ukuomvya Izwi Lyakwe Leza ukusambilila umulandu uno cacindamila ukutwalilila ukuya acisinka kuli Yeova. (Masa. 31:23) Nanti lino wino mwatemwa wafwa, mwalanga ana inu malembelo aangayazwa ukuzizimizya lino yakulosha nu kutwalilila ukuya nu mutende.—2 Kol. 1:3, 4; 2 Tim. 3:16.
Mwe Yavyazi—Mwasambilizya Ana Inu Kutemwa Yeova
17 Mwatandika zuwa kusambilizya ana inu. Ndi cakuti avyazi yatandika zuwa ukusambilizya ana yao, cilayazwa. (Mapi. 22:6) Elenganyini pali Timoti, uwatandike ukupita nu mutumwa Paulo lino wakuzile. Nyina wakwe Timoti, Eunice na nyinakulu Lois yamusambilizye lino wali “mwana munono.”—2 Tim. 1:5; 3:15.
18 Atwalane na yauze aku Côte d’Ivoire, ya Jean-Claude na ya Peace, yasambilizye ana yao 6 ukutemwa Yeova nu kumuombela. I cani cayazwilizye ukucita vivyo? Yakolanyanga vino Eunice na Lois yacitanga. Yatiile: “Twasambilizyanga ana itu Izwi Lyakwe Leza lino yacili anono, twatandikanga lino yavyalwa sile.”—Malan. 6:6, 7.
19 Uzye cikapiliula cani ‘ukusambilizya’ ana Izwi Lyakwe Yeova? ‘Ukusambilizya’ kukapiliula “ukunena nu kwiusya vimwi lyonsi.” Pakuti avyazi yacite vivyo yalinzile ukusumba insita ikulu na ana yao. Insita zimwi avyazi yangatoovoka pa mulandu wakuti yalinzile ukuswilizya ukunena ana yao ivyeo ivili vimwi. Nomba, avyazi yalinzile ukulola umulimo uu ukuti i syuko lya kwazwa ana yao ukumanya Izwi Lyakwe Leza nu kulikonka.
w06 4/1 ifwa 9 pala. 4
Mwe Yavyazi—Mwaya Icilangililo Cisuma ku Yana Inu
Ukuya kwene vikwene ali vino ana yaya, yamwi yatala nupya yamwi yasiya ni cuvwila. (Utandiko 8:21) Uzye avyazi yangacita uli? Baibo ikati: “Uwelewele waya umu mwenzo wa mwana, lelo intuwa ya kusalapwilako ilautaalusha kufuma kuli aliwe.” (Mapinda 22:15) Yamwi yakalola ukuti ukusalapula umwana mu nzila yii uunkalwe nupya ukwa mpiti. Lelo, Baibo yalesha unkalwe nanti ukucuzya umuntu mu nzila ili yonsi. Nanti icakuti insita zimwi izwi lyakuti “intuwa,” lingapiliula amaka yano avyazi yakwata aakusunda, lelo likalozya na kuli vino avyazi yalinzile ukuya nu kutemwa lino yakusalapula ana yao.—Aebele 12:7-11.
Ukuvwikisha Sana Ivyaya Umu Malembo
Mwaya nu Luzango Umu Milimo Ino Mukaombela Yeova
11 Naswe kwene tungaya sana nu luzango nga tukwezya na maka ukuomba papezile maka itu lino tukuomba umulimo uli onsi uno twapeelwa umu mulimo wakwe Yeova. Mwaomvya insita inu umu mulimo wa kusimikila nu kuombesha umu cilongano. (Mili. 18:5; Aeb. 10:24, 25) Mwapekanya ningo ukulongana pakuti mwaasuka ivyasuko ivisuma ivingakomelezya yauze. Mwalola malyasi yonsi ayasambi yano mwapeelwa umu kulongana kwa mukasi ka mulungu ukuti yacindama. Ndi cakuti mwapeelwa umulimo umwi umu cilongano, mwasunga insita nu kuya akutailwa. Mutaelenganya ukuti umulimo uno umupeelwa utacindime nu kuti mutalinzile ukonona insita inu pa mulimo kwene uwo. Mwaezya na maka ukwikako mano lino mukuomba umulimo uno mwapeelwa. (Mapi. 22:29) Ndi cakuti mukuombesha lino mukuombela Yeova, mulaya cuza wakwe musuma nupya mulaya sana nu luzango. (Gala. 6:4) Nupya cilamwangukila ukuya ni nsansa ndi cakuti yauze yapeelwa umulimo umwi uno mwalondanga.—Loma 12:15; Gala. 5:26.
JULAI 21-27
IVYUMA IVYAYA UMWI IZWI LYAKWE LEZA MAPINDA 23
Visinte Ivikalanda pa Kumwa Uwengwa Ivingamwazwa
lff sambililo 43 cisinka 2
Uzye Aina Klistu Yalinzile Ukulalola Uli Ukumwa Uwengwa?
Yeova wapata ukumwesha uwengwa nu kukoleka. (Galatiya 5:21) Izwi lyakwe likalanda ukuti: “utapita pamwi na akolesi.” (Mapinda 23:20) Fwandi ndi cakuti twasoololapo ukumwa uwengwa lino tuli na yauze nanti swenga tutalinzile ukumwa icakuti ituta nu kwelenganya ningo, itwafilwa nu kuilama umu milandile ni vicitwa nanti ukwika umi witu umu uzanzo. Ndi cakuti tutange tucefyeko imimwele ya wengwa, tulinzile ukuitemelwa ukuta ukumwa uwengwa.
w23 12 ifwa 14 pala. 4
Mwalola Uwengwa Wakwe Vino Leza Akaulola
Kaumba uwaya nu kutemwa, wapeela Aina Klistu ukusunda ukusuma apa wengwa. Wakwe, watunena pa ivintu iviipe ivikacitika pa mulandu nu kumwesha uwengwa. Mufwile mwabelenga pali Mapinda 23:29-35 pali vino umuntu aakamwesha uwengwa waya alino ni viipe ivikamucitikila. Umwina Daniel, eluda aakaikala uku Europe akaiusha vino umi wakwe wali lino atatala waya Umwina Klistu wa cumi, watiile, “Ukumwesha kwalenganga ukuti ntapingula ningo pa vintu, alino nu kukwata intazi, nupya nga nelenganya pa vintu vii nkauvwa sana uyi.”
Ukuvwikisha Sana Ivyaya Umu Malembo
w04 11/1 ifwa 31 pala. 2
Mauzyo Yano Aakabelenga Yakauzya
Wakwe, ukwina ukucila umu cipimo limwi kungalangilila ukuti umwi wapunuka, nomba asi lyonsi lino cikaaya vivyo. Limwi umwi angiina ukucila umu cipimo pa mulandu nu kulwala. Nupya limwi umwi angiina ukucila umu cipimo pa mulandu wakuti umu lupwa lwao yina sana. Nupya tulinzile ukwiusha ukuti ukwina ukucila umu cipimo kungalolekela muli vino umwili wa muntu uli, lelo ukupunuka kwene imiyele ino umwi angakwata ino tutange tulole na manso. Kwina ukucila umu cipimo kungalondololwa ukuti ‘u kukwata mafuta aingi umu mwili,’ lelo ukupunuka ‘ukuya na ukaitemwe nanti ukulalondesha ivingi.’ Fwandi ukupunuka kusilolekela muli vino umwili wakwe umwi waya lelo kukalolekela muli vino watemwa ukuliisha. Muntu angakwata umwili uulinge nanti limwi angaya umonde nomba ala wa punuka. Nupya vino antu yakaelenganya pa kwina nanti pali vino umwi akuloleka vikapusana pusana kulingana ni ncende.
JULAI 28–OGASITI 3
IVYUMA IVYAYA UMWI IZWI LYAKWE LEZA MAPINDA 24
Mwacita Ivingalenga Mutwalilile Ukuya Aakome Lino Mwakwata Intazi
it-2 ifwa 610 pala. 8
Kucuziwa
Nupya Aina Klistu yakataizya pa cilambu cino yaalaya yayo aakazizimizya. Kulozya ku cilambu kwene cii, Yesu walanzile ati: “Ansansa aantu yano yakacuzya pa mulandu wa ulungami pano Uwene wa kwi yulu u wao.” (Mate. 5:10) Ukuvwikisha upaalilo wa kutuutuluka alino nu kumanya aalafikilizya upaalilo kwene uu, kukalenga Aina Klistu ukuya akome. Nupya vii vikalenga yatwalilile ukuya aacisinka kuli Leza nanti icakuti aakuyacuzya ankalwe nupya yakuyanena ukuti yamayakoma. Lyene pa mulandu nu utailo uno yakwata muli vino imfwa yakwe Yesu yacita calenga yataopa ukuti limwi yangayakoma. (Aeb. 2:14, 15) Cacindama sana uku Mwina Klistu ukuya uwa cisinka lino yakumucuzya. Baibo ikati: “Muye ni myelenganyizizye ino Klistu Yesu wali nayo, wino . . . wizile aya ni cuvwila ukufika lino wafwile, kuli kuti imfwa ya pa cimuti ca kucuziwilwapo.” (Filipi 2:5-8) “Pa mulandu ni nsansa izyali pa nkoleelo yakwe, wazizimizye pa cimuti ca kucuziwilwapo, ataasakamile pa kuzewana.”—Aeb. 12:2; loliniko na 2 Kol. 12:10; 2 Tesa. 1:4; 1 Pet. 2:21-23.
w21.02 mafwa 30-31 mapa. 17-19
Vino Tungatwalilila Ukuya nu Luzango Lino Tukuzizimizya Intazi
17 Intazi: Kutoovoka. Izwi Lyakwe Leza likati: “Nga watovoka ala amaka yako yalacepelwa pa wanda uno wizilwa ni ntazi.” (Mapi. 24:10) Izwi lya Ciyebulai ilyasenulwa ukuti ukutoovoka, lingapiliula nu kuti ukuta ukuya umusipe. Nga mwata ukuya asipe, cilalenga mute ukuya nu luzango.
18 Vino tulinzile ukucita: Tulinzile ukutaila Yeova ukuti alatupeela amaka aakuzizimizya. Tulinzile ukuya asipe pakuti tuzizimizye intazi. (Yako. 5:11) Izwi lino Yakobo waomvizye ilyasenulwa ukuti “kuzizimizya” likalenga twelenganye pa muntu uwatatwalilila sile ukwimilila. Tungelenganya pa musilika musipe sana uwataimilila ukwaula ukuutuka na lino umulwani wamuzanza.
19 Tungakolanya vino Paulo wali umusipe na vino wazizimizyanga. Insita zimwi uvwanga ukutonta. Nomba wazizimizyanga pa mulandu wakuti wataile ukuti Yeova wali nu kumupeela amaka yano walondekwanga. (2 Kol. 12:8-10; Filipi 4:13) Naswe kwene tungakomeleka nu kuya asipe ndi cakuti twiluka ukuti tukalondekwa uwazwilizyo ukufuma kuli Yeova.—Yako. 4:10.
Mauzyo Yano Aakabelenga Yakauzya
Pa Mapinda 24:16, [NWT] pakalanda ukuti: “Umuntu mololoke nanti angapona amaila 7, wene alakatuka nupya.” Uzye amazwi yaa yakalozya uku muntu aakacita uluyembu lyonsi nu kweleelwa na Leza?
Awe foo, asi vino icikomo cii cikapiliula. Lelo, cikalanda pa muntu aakakwata intazi zingi nupya akazizimizya.
Fwandi ilembelo lya Mapinda 24:16, lisilanda pa kucita uluyembu lelo likalozya ku ntazi zino tungakwata, izingatwalilila ukuyako. Umu nsi ino twikalamo ndakai, umuntu umololoke angakwata intazi izili wa kulwala ni ntazi zyuze. Limwi angazunyiwa nu uteeko pa mulandu nu utailo wakwe. Nomba angatwalilila ukutaila ukuti Leza angamutungilila nu kumwazwa ukuzizimizya nu kucimvya. Elenganyini pa nsita izingi zino mwalolako kuno ivintu vikuzipila aomvi yakwe Leza. I cani icalenga? Twasininkizya ukuti Yeova “akaazwilizya yayo yonsi ali umu ntazi nga nu kukatusha yonsi yao apona.”—Masa. 41:1-3; 145:14-19.
Ukuvwikisha Sana Ivyaya Umu Malembo
Icupo—U Wila Ukufuma Kuli Leza
13 Ndi cakuti mukwelenganya pa kutwala nanti ukutwalwa, mulinzile ukusininkizya ukuti imuipekanya. Limwi mungelenganya ukuti ee imuipekanya, nomba lekini tulande pali vino cikapiliula ukuipekanya ndi mukulonda ukutwala nanti ukutwalwa. Limwi mumazunguka ndi muvwa icasuko.
14 Baibo ikatunena ukuti ya iya na aci yakwata imilimo ipusane umu lupwa. Fwandi ndi cakuti imuipekanya ukutwala nanti ukutwalwa mulinzile ukumanya ukuti mulakwata umulimo uiyele. Ndi cakuti umonsi akwelenganya ukuti watalinga ukutwala, alinzile ukuyuzya umweneco ndi cakuti wataipekanya ukuya umutwe wa lupwa. Yeova akaenekela ukuti iya alaasakamala umuci na ana muli vino yakalondekwa ivya ku mwili na muli vino yakwelenganya. Icacindama sana icakuti umonsi alinzile ukusumba sana amano uku kusakamala ulupwa muli vyakwe Leza. Baibo ikalondolola umonsi asisakamala amu lupwa lwakwe ukuti: “Umwipishe kuluta wiyo atataila.” (1 Timoti 5:8) Fwandi aonsi akwelenganya pa kutwala yalinzile ukwelenganya pa cisinte cii icaya muli Baibo: “Tala kuula ing’anda yako, alino ulime ni calo cako, nga nu kutwala alino utwale umwanaci.” Umu mazwi yauze, lino mutali mutwale, mulinzile ukusininkizya ukuti mulaya iya wino Yeova akalonda muye.—Mapinda 24:27.
15 Umwanaci aakulonda ukutwalwa alinzile ukuyuzya umwineco ndi cakuti wataipekanya ukuomba imilimo ino umuci nupya nyina wa yana alinzile ukuomba. Baibo yalumbula inzila zimwi izisuma zino umuci akasakamalilamo iya na ana. (Mapinda 31:10-31) Ndakai aonsi aingi na anaci yakaelenganya sile pali vino wino yatwalana nawe alinzile ukuyacitila. Nomba Yeova akalonda twaelenganya pali vino tungacitila wino twatwalana nawe.
OGASITI 4-10
IVYUMA IVYAYA UMWI IZWI LYAKWE LEZA MAPINDA 25
Visinte Ivingatwazwa Ukuya ni Milandile Isuma
Mwaomvya Ningo Amaka ya Lulimi
6 U mulandu ci uno cacindamila ukusoolola insita isuma iyakuvwanga? Ilembelo lyakwe Mapinda 25:11 likaati: “Amazwi alondoloke yakolana ni viseekwa viyengese vyakwe zaabu, ivili pa mbale yakwe siluva.” Viseekwa iviyengese vyakwe zaabu vikaloleka ningo, nupya vingacilapo ukuloleka ningo ndi cakuti vili pa mbale yakwe siluva. Munzila ili imwi kwene, tungakwata amazwi asuma akunena umwi. Lelo nga twasoolola insita isuma iyakulanda amazwi yaayo, tungazwa ningo sana umuntu wiyo. Tungacita uli vii?
7 Ngi cakuti twalanda pa nsita isi ningo, antu yatanga yuvwe nanti ukuzumila vino twayanena. (Belengini Mapinda 15:23.) Umu Maaci 2011 cilundumusi alino nu muza ukome sana vyononyile misumba ingi sana uku ufumondaka wa mpanga ya Japan. Antu ukucila pali 15,000 yafwile. Nanti cakuti ya Nte yakwe Yeova aingi yaponzizye ya lupwa ni vyuza, yalondanga kuomvya Baibo ukwazwa yauze aali umu ntazi ili imwi. Lelo yamanyile ukuti aingi pa yantu yaayo yali aBuddha aatamanyile ivingi pali Baibo. Fwandi ukucila kuyanena pa nsita iya vino Baibo ikalanda pa kutuutuluka, aina yayakomelizye nu kuyalondolwela umulandu uno iviipe vikacitikila uku yantu asuma.
Mwaomvya Ningo Amaka ya Lulimi
15 Milandile itu yacindama uku yantu yauze wakwe vivi kwene vino amazwi yano tukalanda uku yantu yacindama. Antu yatemilwe sana ukukutika kuli Yesu pano walandanga “mazwi asuma,” nupya walandanga ni cikuuku. (Luka 4:22) Nga tukulanda ni cikuuku, antu yangatemwa ukukutika kuli sweswe nu kuzumila vino tukuyanena. (Mapinda 25:15) Tungalanda na antu umu nzila ya mutembo ngi cakuti twayacindika nupya twayasakamala. Vikwene ali vino Yesu wacisile. Lino waweni iumba lya yantu aalondeshanga ukuvwa kuli aliwe, watemilwe sana ukuya nayo nu kuyasambilizya. (Mako 6:34) Nanti sile lino antu yamutukanga, Yesu wene atayatusile.—1 Petulo 2:23.
16 Nanti cakuti twatemwa yalupwa ni vyuza viitu, limwi tungalanda amazwi aipe kuli aliyo pa mulandu wakuti twayamanya sana. Limwi tungaelenganya ukuti usi mulandu nanti tutisileko mano kuli vino tukuyanena. Nomba Yesu lyonsi wali ni cikuuku nanti sile lino walandanga na ya cuza yakwe. Lino yamwi pali ya cuza yakwe yapaazyanyanga pali wino wali umukalamba pali aliyo, Yesu wayalungike cikuuku cikuuku nu kuyapeela cilangililo ca mwana umunono pakuti ayazwe ukuta vino yelenganyanga. (Mako 9:33-37) Ya Eluda yangakolanya Yesu lino yakusunda yauze umu cikuuku.—Galatiya 6:1.
Mwakomelezyanya “nu Kuluta”
8 Ukukomelezya yauze asi umulimo wakwe ya eluda yatupu. Paulo wakomelizye Aina Klistu yonsi ukuvwanga ‘mazwi akakuula nu kupeela vikulondekwa, pakuti vino yakulanda viye ivyakwazwa’ yauze. (Efes. 4:29) Swensi kwene wenga na wenga tulinzile ukumanya vino yauze ‘yakulondekwa.’ Paulo wasunzile Aina Klistu Ayebulai ati: “Mukomye makasa inu atonte nupya mutaleka makokola inu yazakaza! Twalililini kupita umu nzila zyololoke, pakuti ingazo izikasinta zitalemala lelo zipoziwe.” (Ayeb. 12:12, 13) Swensi kwene, ukwikako na acance, tukakomelezyanya lilyo lino tukulanda amazwi aakukomelezya.
Ukuvwikisha Sana Ivyaya Umu Malembo
it-2 ifwa 399
Ukufuuka
Muntu mufuuke akatwalilila ukuya umufuuke pa mulandu wakuti waya nu utailo nupya akaya umukome. Asitoovoka zuwa nupya akatwalilila ukwelenganya ningo. Kukaanaya umufuuke kukalenga umwi ukuisuula, kulasoka zuwa, kukanaya nu utailo nupya akaya umusakamikwe sana. Ibuku lya mapinda lyalanda pa muntu aatafuuka. Lyalanda ukuti: “Umuntu aasikaanya icipyu cakwe, Waya wa musumba uno ilinga lyononeka.” (Mapi. 25:28) Akapingulapo zuwa vino amacita nga kwacitika iviipe nupya akaata ukwelenganya ningo, na cii cikalenga ukuti acite iviipe.
OGASITI 11-17
IVYUMA IVYAYA UMWI IZWI LYAKWE LEZA MAPINDA 26
Mutaazanwa na Antu “Aawelewele”
it-2 ifwa 729 pala. 6
Imvula
Viputulwa vya mwaka. Viputulwa viili ivya mwaka ivyamanyikwe mu Mpanga ya Ulayo, insita ino kwakayanga alino ni nsita ino kwazukanga sana, insita zino ndakai zyamanyikwa ningo ukuti i cisanya ni cisiku. (Loliniko na Masa. 32:4; Lwimbo 2:11) Kutandika pakasi kakwe Epuleo na Okotoba kwayanga sile imvula inono. Nupya pa nsita kwene yii asi lyonsi lino imvula iyo inono yatoonyanga pa nsita yii iya kuzombola. Pa mapinda 26:1 pakalangilila ukuti mu nsita ya kuzombola kutayanga imvula. (Loliniko na 1 Sam. 12:17-19.) Asi lyonsi lino imvula ikatoonya mu nsita ya cisiku lelo amanda yamwi kasanya kakawala. Nomba pa mulandu wakuti insita yii kukazuka, ndi cakuti umwi wanyeka angauvwa sana impepo. (Ezila 10:9, 13) Fwandi ncende isuma muno angacingililwa, ingacindama pa nsita iyo.—Eza. 4:6; 25:4; 32:2; Yobo 24:8.
w87 10/1 ifwa 19 pala. 12
Mukusalapula Mukafuma Ivisuma
12 Antu yamwi yakalondekwa ukusalapulwa, wakwe vino na pa Mapinda 26:3 pakalanda ukuti: “Mukota u wa kumilako mfwalasi, icela ni ntambo i vya kutungulwila punda ni ntuwa i ya kumila iviwelewele pa nsizi.” Insita zimwi Yeova walekanga ukuti aa muluko ulwa Ina Izlaeli yaacula pa mulandu ni ntazi zino yailetelanga aineco, “pano yapondokiile izwi lwakwe Leza; yatacindike ukusunda kwa wa Papelapela. Walenzile ukuti yaicefye lino walesile ukuti yacule; yapumikanga nupya kutaali uwakuyazwa. Yalenzile uwazwilizyo kuli Yeova lino yaculanga; wayapuswishe umu ntazi zyao.” (Masamu 107:11-13) Antu aawelewele yakaya ni cilumba icakuti yakalola ukuti kusi ukusunda kuli konsi ukungayaazwa. “Umuntu aakakomya nsingo pa cisila ca kusundwa ilakontoka ukwaula ukwenekela icakuti italatala ipole.”—Mapinda 29:1.
it-2 ifwa 191 pala. 4
Kulemala
Ipinda ilyamanyikwa sana. Mwene wa mano Solomoni walanzile ati: “Aakapeela umuwelewele imilimo, waya wa muntu uwataicisa nu kuilemalika makulu.” Mu cumi umuntu aakapeela umuwelewele imilimo imwi ukuti aamuombela angakwata intazi ziingi. Akailolela kuno imilimo yakwe ikuilako sile pansi nupya akatandika ukucuula pa mulandu ni vikucitika.—Mapi. 26:6.
Ukuvwikisha Sana Ivyaya Umu Malembo
it-1 ifwa 846
Uwelewele
Ukwasuka umuwelewele “ukulingana nu uwelewele wakwe” nu kutandika ukupazyanya nawe pali vino akucita kungalenga aakupaazyanya nawe ukuya wa muwelewele. Fwandi pakuti tutakolana nu muwelewele tulinzile ukulondela ukusunda ukwaya pa Mapinda 26:4, 5 apakati: “Utaasuka umuwelewele ukulingana nu uwelewele wakwe.” Lelo pa Mapinda 26:4, 5 pakalangilila ukuti ukwasuka umuwelewele “ukulingana nu uwelewele wakwe” nu kwelenganyapo sana pali vino akupaazya, kungalenga uwelewele wakwe umanyikwe, nu kuti vino akwelenganya visi ningo.
OGASITI 18-24
IVYUMA IVYAYA UMWI IZWI LYAKWE LEZA MAPINDA 27
Vino ya Cuza ya Cumi Yangatwazwa
Yeova Watemwa Aomvi Yakwe Aicefya
12 Umuntu uwaicefya akauvwa ningo ndi yamulungika. Katulangilile: Elenganyini ukuti muli umu kulongana. Pa cisila ca kulanzyanya na ina na ya nkazi, umwi wamwama pa mbali nu kumunena ukuti ivya kulya ivifyantama pa kasi ka mino. Kwene munguvwa insonyi. Nomba uzye mungataizya ukuti wacita ningo pa kumunena? Limwi mungelenganya ukuti canga cizipe umwi amunena zuwa! Umu nzila iliyonga kwene, tulinzile ukuicefya nu kutaizya umwina nanti nkazi uwasipa nu kutulungika lino calondekwa. Tukalola umuntu wa musango uwo ukuti a cuza witu, asi umulwani foo.—Belengini Mapinda 27:5, 6; Gala. 4:16.
it-2 ifwa 491 pala. 3
Ya Cuza
Ibuku lya mapinda likatukomelezya ukuti tulinzile ukutaila ya cuza nu kulenga uwazwilizyo kuli aliyo pa nsita ino tukulondekwa uwazwilizyo. Likati: “Utaalekelezya cuzako nanti cuza wakwe tata wako, nupya utaingila umu ng’anda ya mwinako pa wanda uno uli ni ntazi; umwinamupalamano wako wazipa ukucila umwinako ali ukutali.” (Mapi. 27:10) Cikaloleka kwati kalemba walandanga ukuti cuza wakwe lupwa umupalamishe wacindama, nupya ali wino umwi angalengako uwazwilizyo ukucila kuli lupwa. Wakwe ndi cakuti limwi umwinakwe aali ukutali atange aipekanye ukwazwa umwi nanti limwi ala asikuliinga wakwe vino cingaya kuli cuza wakwe lupwa.
Mwe Yacance, Umi wa Musango ci Uno Mukalonda?
7 Icintu conga cino tukasambilila kuli vino Yoashi atapingwilepo ningo icakuti, tulinzile ukulasoolola yacuza aangatwazwa ukulacita ivisuma, aatemwa Yeova nupya aakalonda ukumuzanzya. Tutalinzile sile ukuya yacuza na antu amusinku witu. Mwaiusha ukuti Yoashi wali umwance sana pali cuza wakwe Yeoyada. Lino mukusoolola ivyuza, mungayuzya ukuti: ‘Uzye yakangazwa ukukomya utailo muli Yeova? Uzye yakankomelezya ukulondela amasunde yakwe Leza? Uzye yakalanda pali Yeova na pa cumi cakwe icicindame? Uzye yakalanga ukuti yacindika masunde yakwe Leza? Uzye yakanena sile vino ningatemwa ukuvwa, nanti uzye yakasipa pakuti yandungike nga naluvyanya?’ (Mapi. 27:5, 6, 17) Ukwaula nu kupita umu mbali, ndi cakuti yacuza inu yatatemwa Yeova, ala yatalinga ukuya yacuza inu. Lelo ndi cakuti yatemwa Yeova, twalililini ukuya ivyuza pano yangamwazwa.—Mapi. 13:20.
Ukuvwikisha Sana Ivyaya Umu Malembo
w06 9/15 ifwa 19 pala. 12
Visinka Ivyaya Mwi Buku Lya Mapinda
27:21. Ndi cakuti yamwi yatutaizya alino cingamanyikwa vino twaya. Cingaloleka ukuti twaicefya ndi cakuti lino yamwi yatutaizya tukwiusha ukutaizya Yeova nu kutwalilila ukumuombela. Nupya cingaloleka ukuti tutaaicefya ndi cakuti tukuitutumula nu kulola ukuti twacila yauze lino yamwi yatutaizya.
OGASITI 25-31
IVYUMA IVYAYA UMWI IZWI LYAKWE LEZA MAPINDA 28
Upusano Uwaya pa Muntu Mwipe nu Muntu Mulungami
w93 5/15 ifwa 26 pala. 2
Uzye umu cumi mukauvwila Yeova?
“Umulungami wasipa wakwe cisama.” (Mapinda 28:1) Aalungami yakalanga utailo, yataaila izwi lyakwe Leza, nupya yakaya asipe nu kutwalilila ukuombesha umu mulimo wakwe Yeova asi mulandu ni ntazi zino yangakwata.
it-2 ifwa 1139 pala. 3
Kuvwikisha
Yayo aakafutatila Leza. Ndi cakuti umuntu watandika ukucita iviipe akatandika ukusuula masunde yakwe Leza lino akupingula ukucita vimwi. (Yobo 34:27) Muntu wa musango uwo akatandika ukuzumilizya umwenzo wakwe ukucita iviipe nu kulola ukuti vino akucita vili sile ningo. (Masa. 36:1-4) Nanti icakuti angaailola ukuti akaapepa Leza, akaacindika mano ya antu ukucila masunde yakwe Leza. (Eza. 29:13, 14) Akatandika ukulola iviipe vino akucita “wa cangalo” (Mapi. 10:23) akaata ukulondela masunde, akaaya umunkalwe, akaata ukupingula ningo pa vintu, nupya akaatandika ukwelenganya ukuti Leza atange alole vino akucita. (Masa. 94:4-10; Eza. 29:15, 16; Yele. 10:21) Mu nzila yuze tungati vino akacita nu kulanda, cikaya kwati akuti: “Kutaya Yeova” (Masa. 14:1-3) nupya akaelenganya ukuti atange amwazwe. Muntu aasitungululwa ni visinte vya mu malembo, atange apingule ningo pa vintu, asilola ivintu wakwe vino alinzile ukuvilola, asielenganya pali vino vimacitika ndi cakuti wacita vimwi, nupya asipingula ningo pa vintu.—Mapi. 28:5.
it-1 ifwa 1211 pala. 4
Ukaele
Umuntu asitwalilila sile ukuya uwakaele ukumaka yakwe, lelo suka aali nu utailo ukome muli Yeova alino nu kutaila maka yano wakwata aakupususha. (Masa. 25:21) Leza walaya ukuti alaya aali “cishangu” nupya “umwakufisama,” yayo aakapita muli ukaele. (Mapi. 2:6-8; 10:29; Masa. 41:12) Lyonsi yakaleka ukuti vino yakucita vyazanzya Yeova, nupya cikalenga ukuti vino yakucita vyaya ivitunguluke. (Masa. 26:1-3; Mapi. 11:5; 28:18) Nanti icakuti Yobo waweni ukuti insita zimwi antu aasuma yakacula pa mulandu ni viipe vino antu aipe yakacita alino limwi nu kufwila pamwi nayo, Yeova wamanya ivintu vino antu yakaele yakapitamo, ica upyanyi cao cilatwalilila amanda pe, nupya yalaelenganya pa visuma ivilacitika uku nkoleelo, alino yalakwata ica upyanyi icisuma. (Yobo 9:20-22; Masa. 37:18, 19, 37; 84:11; Mapi. 28:10) Wakwe vino cali kuli Yobo, ukuya umulungami u kungalenga umwi acindikwe asi pa mulandu ni vintu vino wakwata. (Mapi. 19:1; 28:6) Ana aakwata avyazi aaya na ukaele nupya aalungami, yakaya sana ni nsansa (Mapi. 20:7), yakatandika ukucita vino avyazi yakacita, nupya yakapanga izina ilisuma wakwe vino caya ku yavyazi yao.
Ukuvwikisha Sana Ivyaya Umu Malembo
w01 12/1 ifwa 11 pala. 3
Mungaicingilila ku Kukanalwala Muli Vyakwe Leza
Kuitaila sana. Aingi aakalwala umwenzo yakataila sana ukuti umi wao uli sile ningo lino yatatala yalwala. Ilingi yakakana ukuyapima nu kulola ukuti ukuyapima kutacindime. Kukolanako na vii, yamwi yangaelenganya ukuti pa mulandu wakuti ipalengela pano yaela Aina Klistu pasi icingayacitikila. Yangakana ukuyazwa muli vyakwe Leza nanti ukuiceceta aineco mpaka ivintu ivisuka iviipa. Fwandi icicimdama ukulaiusha ukusunda ukukalanda pa kukanaitaila sana kuno umutumwa Paulo walanzilepo lino watiile: “Fwandi aakwelenganya ukuti wataimilila, acenjele pakuti atapona.” Cili ningo kuzumila ukuti tutamalilika nu kulaiceceta cila nsita pakuti tumanye vino tuli muli vyakwe Leza.—1 Kolinto 10:12; Mapinda 28:14