Jutak Ilo Wãnik Im Kin Juõn Tõmak Ebin
“Juõn Menin Kabel in Juõn Jerbal”
JEN ran ko moktata in bwebwenato eo air in ran kein, Dri Kennan ro an Jehovah elap air itoklimo ilo juõn ian kanan ko an Jesus Christ: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” (Matu 24:14) Ke 1914—Jino in “ran ko eliktata”—ear ebaktok, Ri school in Bible ro ettã burueir rar bõk liki eo ebin in juõn kareelel eo ejañin kar wõr roñ kake ibelakin lal kin jelãlokjen eo ej bedbed ion Jeje ko Rekwojarjar.—2 Timote 3:1.
Ñan tõbar kõtõbar eo air in keañ kin news eo emõn ibelakin lal, ri karejar rein an Jehovah rar kajerbal juõn kilen eo ear kãl, beran, im bin. Ñan kalaplok katak kake, jen rol liklok ilo ien.
Juõn Wãwen eo Ekãl ñan Keañ kin News eo Emõn
Ej January in yiõ eo 1914. Kalmenlokjen bwe kwoj jijet ibwiljin 5,000 ro jet ilo juõn auditorium eo emarok ilo Bukwon in New York. Imanim ej juõn pija makitkit eo elap ilo screen eo. Juõn emaan eo euwõn bõran ej kõnak juõn kobe ej jãdetok ilo screen eo. Emwij am lo movie ko ejelok ainikien ie, ak lein ej konono, im kwo maroñ roñjake nan ko an. Kwoj bed ilo jinointata in juõn men eo ekãl, im ennan eo ie ejejuan. Ri konono eo ej Charles Taze Russell, president eo jinointata an Watch Tower Society, im men eo rej kwaloke ej “Pija in-Drama in Kõmanman.”
C. T. Russell ear kile aorõk in pija makitkit ko ñan tõbar elõñ jarlepju in armij ro. Kin menin, ilo 1912, ear jino keboj “Pija in-Drama in Kõmanman” eo.” Tokelik, pija eo ear etal im ralitõk awa aetokin pija ko ilo slide im ilo pija makitkit, ededelok an wõr color im ainikien
Kar eiki ñan an walok ilo emen mõttan ko, “Pija-Drama” eo ear bõk ri aluij ro jen ien kõmanman eo laltak ilo bwebwenato in armij ñan eliktata in karõk eo an Jehovah Anij kin lal in im armij ilo jemlokin Iroij eo an Christ ilo thousand yiõ ko. Yiõ ko renaj ellãlok mokta jen an jerbal ejja kabel eo wõt ilo jerbal in business eo ewõr tõbrak ie. Ak, million armij rar lo “Pija-Drama in Kõmanman” eo ilo ejelok wõnãn!
Kãlet ilo al in kajañjañ ko im 96 katak ko emwij likiti ilo phonograph-ko rar keboji ñan “Pija-Drama” eo. Stereopticon slide ko kar kõmmani jen jerbal in kabel ko remõn rej kwalok kin bwebwenato in lal in. Ear bareinwõt menin aikwij ñan kõmmane buki pija ko rej unoiki rekãl im annañ in pija ko rej jei. Jet ian slide ko re color im jeljel ko rar pijaiki im unoiki kin pã. Im rar eliji air kõmmane menin, bwe ilo ien ko tokelik, 20 men ko emen ilo juõn mõttan rar keboji. Menin ear kõmman an maroñ kwalok juõn mõttan “Pija-Drama” eo ilo 80 kajjojo bukwon ko ilo jabdewõt ran eo emwij karõke!
Ilikin Jikin ko
Ta eo ear walok ilikin jikin ko ilo menin aluij ko ilo “Pija-Drama” eo? “Drama eo ear ijjino kin juõn movie in Brother Russell,” Ri school in Bible eo Alice Hoffman ear ba. “Ke ear waloktok ion screen eo im tien rar jino makitkit, juõn phonograph ear ijjino . . . im kimij mõnõnõ in roñjake ainikien.”
Ilo an kareellok ñan joñan ien eo ear ellãlok ilo pija eo, Zola Hoffman ear kememej: “I ar jijet ijo ilo an meja bellok im bwilõñ ke kimij lale pija in ran in kõmanmõn ko. Ear wõr ut ko rej ba lily ijo rar kabellok benjeir iman mejem.”
Ri yokwe kajañjañ eo Karl F. Klein in Governing Body eo an Ri Kennan ro an Jehovah ej kobaiktok: “Ilo ejja ien eo wõt rar kwaloki pija kein, ear wõr juõn kajañjañ eo ekanuij emõn ibbeir, einwõt dekã aorõk ko einwõt Narcissus im Humoreske.”
Ear bareinwõt wõr ien kememej ko. “Jet ien kejak im jerata rej walok,” Clayton J. Woodworth, Jr. ej kememej. “Ilo juõn ien rar kajañ al eo ‘Koo einwõt juõn Bao ñan Tol eo Am,’ im ion screen eo ear waloktok pija in juõn menin mour gigantosaurus, juõn menin mour kileplep mokta jen ibwijleplep eo”!
Ijellokin “Pija-Drama in Kõmanman” eo, ejjabto ear wõr lajrak in “Eureka Drama” ko. (Lale box.) Juõn kar kõmmane jen kamelele in ennan ko emwij kar jei, im bar record in kajañjañ ko. Eo juõn kar ejaak in record im slide ko jimor. Meñe “Eureka Drama” eo ear jabwe pija makitkit ko ie, ear lap tõbrak ie ke rar kwalok ilo jikin ko ejjab kanuij obrak armij ie
Juõn Kein Jerbal in Kennan Ekajur
Tok ñan 1914 eo, “Pija-Drama” eo rar kwalok lok ñan ri aluij ro orair elõñlok jen 9,000,000 ilo North America, Europe, im Australia. Meñe eiet orair, Ri school in Bible ro ear jab jabwe liki eo ebin air eo ear menin aikwij ñan keañ kin news eo emõn ibben joñan oran in ekãl ebed iolap. Rar mõnõnõ in jabawõt kin money ko rar menin aikwij ñan rent i jikin ko rekkar ñan kaluijuj kein. Inem kar “Pija-Drama in Kõmanman eo eo ear kõmmane juõn jerbal elap ilo kõmman bwe ri aluij ro en wõr air jelã kin Nan in Anij im karõk ko an.
Ilo juõn letter ñan C. T. Russell, juõn armij 17 yiõ dettan ear je: “Lolok eo jinoin ñan Drama eo ami kar point in oktak eo ilo mour eo aõ; ak, Ij aikwij ba, point in oktak eo ilo jelãlokjen eo aõ kin Bible.” Bar juõn armij kõrã ri belele ear ba: “Tõmak eo aõ mõttan wõt jidik en kar einwõt rup in eotõk in tima im Ij eñjake bwe emwij lomoren iõ ikijen ‘Pija-Drama in Kõmanman’ eo rar kwaloke ijin ilo summer eo lok. . . . Kiõ ewõr ibba ainemõn eo lal in ejjab maroñ letok im eo I jamin mõttan ibben aolep mweie ko an.”
Demetrius Papageorge, juõn eo etto an uan staff in headquarter ko an Society, ear kennan: “Pija-Drama” eo kar juõn menin kabel in juõn jerbal, ñe jej lemnak kin oran eo edik in Ri school in Bible ro im juõn joñan eo edik in money ko ear wõr. Jitõb eo an Jehovah ear lukkun bed ilikin!”
[Box/Pijas]
“Eureka Drama” eo
Ralitõk alliñ ko elikin ijjino eo jino in “Pija-Drama” eo, Society ear lo aikwij eo ñan letok bar juõn vision eo kar naetan “Eureka Drama.” Ke “Pija-Drama” eo ededelok ear wõnmanlok wõt im walok ilo jikin ko relap, lajrak ko ilo “Eureka” ear kwalok ejja bedbed in ennan eo wõt ilo bukwon ko im jikin ko ilikin bukwon ko. Juõn ukok in Bible “Eureka Drama” eo rar kwalok kake einwõt lelok ñan “sister ro” Ri Kennan juõn ien emõn” ñan kwalok nan. Etke eindein? Kinke wãwen eo ilo Eureka Drama kin phonograph record ko 30 pound wõt eddon. Bwebõta, ñan juõn menin kaluijuj, enaj kar bareinwõt menin aikwij ñan bõk juõn phonograph.