Yua wal bilara Jehova blisinka nani bribia
1. Aidrubanka Kau Tara naha manka ra kabia ba dia blisinka nani brih balbia?
1 Naha tasba aiska saura Setan karnika mununhtara sa, sakuna Jehova ai napakanka nani ra ban help munisa (Ais. 58:11). Aidrubanka Kau Tara mani bani dauki ba Jehova wina blisinka kum sa. Naha Aidrubanka Kau Tara aula ba ra nahki ridi takaia sip sa Jehova blisinka nani briaia bara pana sin wan muihni lakri nani ra kupia bukaia? (S.L 21:5.)
2. Dia ba kaina manas ridi daukaia sa?
2 Asla Aidrubanka Kau Tara ba dukyara kau ridi takras sma kaka, baha yua nani ra bara kaia dukyara taimkam bara warkkam dawanka wal kaina manas aisas. Bara yu bani bara kaia dukyara awar an nit takma ba pat laki kaikram? Pyua bani aidrubanka ta krikras kainara baha ra kaia sip sma. Jehova naha pata yawan sut dukyara ridi daukan ba lus tiwaia want apia sa (Ais. 65:13, 14). Takaskaia pliska kum bara Aidrubanka pliska ra nahki aidrubi wama ba pat ridi daukram sa?
3. Yawan bara wan pamalika ra dia kupia kraukanka nani help wan munbia aidrubanka wina yamnika ailal sakaia?
3 Asla Aidrubanka pyua ra, dia ba help mai munbia aman wali kaia? Tihmia ra pain yapaia trai muns. Aisanka yabi uplika ra kaiki bas. Baibil tikska nani sin pliki bas. Aisanka tanka kum kum wauhtaya ra ulbi bas. Pamali nani ba aikuki iwbia kaka, aisa yapti nani ba sip kabia ai luhpia nani ra help munaia aman walaia (S.L 29:15). Sip kaka tihmia ra aisanka tanka kum pamali baku aisaia sip sma. Aidrubanka lubia taim pamalikam ban naha yamnika bri kabia dukyara sip sma Pamali Mayunra Tihmika ra tanka kum pamali baku saki aisaia.
4. Kangrigisan ra upla wala nani sin Jehova blisinka bribia dukyara dia daukbia ki?
4 Upla wala ra help munaia. Yawan want sa upla wala nani Jehova blisinka nani bribia. Kangrigisankam ra upla almuk nani bara sa? Ban kra kum kum aidrubanka ra waia help nit kabia. Baha nani ra help munaia sip kama ki? (1 Jn. 3:17, 18.) Kangrigisan almukka nani bara kangrigisan bilara dakni bani pura kaiki ba naha uplika ra helpka nit ba yabia dukyara laki kaikaia sa.
5. Aidrubanka ra waia paiwanka ba nahki upla mihta ra swibia ki? (Bakska ba sin laki kaiks.)
5 Pyu nani luan ra baku, wik yumhpa Aidrubanka Kau Tara balras kaina ra upla sut ra paiwanka wauhkataya kum yabi kabia. Kangrigisan nani ba naha paiwanka wauhkataya dia sip ba kat upla mihta ra swiaia trai munbia. Ban kra wamtla bila ra paiwanka wauhkataya taka kau takaskan brisma kaka, asla aidrubanka ra brih balaia sip sma. Ban wina smalkaia tnatka kum baku, aidrubanka dauki taunka ra kabia taim upla nani ra paiwaia sip kabia. Praidi yua ra wibia nahki yus munaia ba. Bara paiwanka taka kum ban brisma kaka, aidrubanka pliska ra wama wal baku asla dadaukra kum ra yas. Paiwanka wahya kum sandi yua ba brih was, kan las aisanka ba baha dukyara aisabia.
6. Nahki tnatka ra wan daukanka pain nani marikaia sip sa?
6 Wan daukanka pain nani. ‘Upla nani ba klauna ai dukyara baman lukisa’, baku sin upla yamnika ra lukras iwisa, baha mita rait pain wan dara walisa kristian wala nani ai daukanka pain mariki tilara kaia! (2 Ti. 3:2.) Yawan sin daukanka pain marikaia sip sa. Aidrubanka pliska ra 8:00 titan ra dimi auya ba ra tankira dimi waia sa. Baku sin wan watla ra iwi uplika nani, apia kaka sim trukka ra aidrubi uplika, bara wan stadi tatakra nani aikuki aidrubi ba dukyara baman sir nani alkbia kaka, wan daukanka pain marikisa. Ta bri uplika ba maisapahkbia miusik kangbia taim mahka wan sirka ra wih iwaia sa, yawan naha ba wilinkira bila walbia. Celular bara masin satka kum kum pliki wan saki nani ba, upla wala ra apia kaka yawan ra swirka wan sinska turbiara. Tnatka wala nani yawan daukanka pain mariki ba sika yawan aidrubanka pyua ra sturi bahki aisaras, upla wala wal Celular bak maisapahkanka sirpi nani bliki pulras, bara minit bani latara taki waras sa.
7. Wan muihni lakri nani aikuki sa pyua ra nahki muni pana pana wan kupia bukisa ki?
7 Pana pana wan kupia bukaia. Naha Aidrubanka Kau Tara ba sut ra sanska wankbia wan muihni lakri nani wal lilia bara asla laka ra kaia (Law. 133:1-3). Bara kangrigisan wala wina muihni lakri nani baha ra kabia wal pana pana ‘kau’ kakaira takaia sip sa (2 Kr. 6:13). Baku sin Aidrubanka yua kumi bani ra luki briaia sip sma pamali raya kum apia kaka upla raya kum wal kakaiara takaia. Dinar taim ris pyua yabi bahamuna daukaia sanska pain kum wankisa. Plun atki pliska ra waia watlika ra kau bitar sa plun wiria brih wama, bara baku muihni lakri nani aikuki lilia piaia. Naha ba pâna pain nani briaia blisinka bribia.
8. Nahki tnatka ra yawan nani wilinkira wark takaia sip sa?
8 Rait pali uba wan kupia bukisa muihni lakri nani aikuki Gâd warkka ba daukaia! Help munaia dukyara dia muni wilin takras? Apia kaka kangkrisankam ra klin daukaia warkka kum yaban brisa kaka baha ra ta baikaia sip sma (Law. 110:3). Sakuna aidrubanka ra wark kum daukaia apu sma kaka, Wilinkira Warkka Yabi Apiska ra waia sip sma. Upla ailal warkka ba daukisa kaka, kau lilia kabia bara isti dan takbia.
9. Dia muni wan daukanka nani bara wan wina nahki aiskahkaia ba aman pali laki kaikaia sa?
9 Wan daukanka pain ba upla kupia bukisa. Aidrubanka dauki taunka ra kabia taim wan kaiki uplika nani ai tanka bribia yawan ba sat wala sa Jehova Witniska apia nani ba wal (1 Pi. 2:12). Wan kwalka dimra aiskahkan ba aidrubanka ra bara yapaia pliska ra, plun atki pliska ra nahki tnatka ra daukbia ba Jehova ra mayunanka yabia (1 Ti. 2:9, 10). Wan nina mangkaia wahya brih tauki, upla nani ba kaikbia yawan Jehova Witniska nani sa. Ban kra sanska kum wankbia baha uplika nani ra aidrubanka dukyara witnis aisaia.
10. Plun piakan atki pliska bara yapaia watla ra wark taki uplika nani aidrubanka dahra pain aisabia dukyara, dia daukaia sip sa?
10 Yapaia watla kum ra, apia kaka plun piakan atki pliska uplika nani ra wan daukanka pain ba nahki marikbia? Yapaia pliska yus munaia sma ba baman makas, kan uba makabia kaka upla wala nani baha ra wih yapaia sip apia kabia bara yapaia watla dawanka ba lalah lus tiwbia. Sakuna yapaia watla ra dimbia taim upla nani wark uba brisa kaka, wihka bila kaikanka laka bara praut apu laka ba mariks (Kol. 4:6). Plun piakan atki pliska bara yapaia watla ra, wark taki uplika kum help wan muni ba ra lalah prisantka kum yabaia sa.
11. Dia rayaka ra takan sturka ba wan marikisa kristian daukanka bri ba witnis aisisa?
11 Aidrubanka ra kabia taim wan daukanka pain nani ba upla wala nani nahki kaikbia ki? Aidrubanka daukan taunka ra, piriudiku ra takan pliska dawanka naku win: “Naha uplika nani ai daukanka painkira brisa. Baha mita yawan mani bani liliakira naha pliska yaban yus munisa.” Mani luan ra Jehova Witniska nani yapaia watla kum ra takaskan, baha sim pliska ra upla kum Jehova Witnis apia kan ba ai lalahka mankaika watla tikan. Lalahka watla tiwan kan ba sakan, bara dia bila ra kan ba sut yapaia pliska dawanka ra brisi yaban bara witin lalahka dawanka ra naku win: “Jehova Witniska nani aidrubanka kum ra balan bara naha ra takaski bangwan ba tawan tingki wis. Baku apia kan kata man lalahkam watla sakaia apia kapram”.
12. Aidrubanka Kau Tara ba baila sa bamna yawan dia dauki kaia sa?
12 Naha manka ra Aidrubanka Kau Tara nani ba balaia baila sa. Naha aidrubanka pain takbia bara wan kupia bukbia dukyara karna wark takan sa, baha mita trai muns yua bani ra baha ra kaia. Yua wal ba baha ra kaia lukanka bri kabia, baku sin Jehova bara ai asla takanka dia blisinka wankaia ridi bri ba briaia. Ridi kaia sa upla wala nani ra wan daukanka pain nani bak kupia bukaia, lilia laka marikaia, wala nani wal kakaira takaia, bara wan daukanka painkira marikaia. Mani luan ra upla kum kum naha aidrubanka ra dimi luan ba naku ulban: “Naha kau pranakira kan ba wina diara wala apu sa!” Man bara upla wala nani sim sat damra walma.
[Wahya 4 Lilkika ba]
Pyu nani luan ra baku, wik yumhpa Aidrubanka Kau Tara balras kaina ra upla sut ra paiwanka wauhkataya kum yabi kabia
[Wahya 6 Lilkika ba]
Wan kwalka dimra aiskahkan ba aidrubanka ra bara yapaia pliska ra, plun atki pliska ra nahki tnatka ra daukbia ba Jehova ra mayunanka yabia
[Wahya 7 Lilkika ba]
Ridi kaia sa upla wala nani ra wan daukanka pain nani bak kupia bukaia, lilia laka marikaia, wala nani wal kakaira takaia, bara wan daukanka painkira marikaia
[Wahya 4 Lilkika ba]
2011 Aidrubanka Kau Tara dukyara kupia kraukanka nani
◼ Aidrubanka awarka ba. Yua wal sut ba 9:20 titan ra ta krikan kabia. Aidrubanka watla durka ba 8:00 titan ra kwakan kabia. Ta krikaia miusikka ba mahka kangbi wan maisapahkisa taim, aidrubanka ba pain asla ta krikbia dukyara yawan sut wan sirka ra pain iwan kaia sa. Satadi aidrubanka ba 4:55 tutni ra, bara sandi ba 3:40 tutni ra prakan kabia.
◼ Truk takaskaia pliska. Aidrubanka dauki ba pliska ra truk nani takaskaia pliska yus munaia dukyara wangkan ba mana kulkras kabia, bara ya pas auya ba ai pliska bribia. Bara plis kum kum ba yus munaia sip apia kabia kan baha pliska nani ba ya wil sirka yus munaia adarka wauhkataya bri kaka baman naha pliska nani ra ai trukka swiaia sip kabia. Truk takaskaia pliska nani uya apu ba mita kupiam bukisa sim tukka kum ra upla ailal aidrubia.
◼ Sir nani. Man wal sim trukka, apia kaka sim watla ra iwi nani ba dukyara baman sir nani suni briaia sip sa, bara ya man wal Baibil stadi taki ba dukyara sin (1 Ko. 13:5).
◼ Plun. Pliskam pali diara piaia wisi aidrubanka watla wina taki waia watlika ra, man selp patam brihwas. Surunka sirpi kum sirkam mununhtara mangkaia sip sa kaka pain kabia. Sakuna surunka uba tara, apia kaka glas dukya nani lika brihwaia adar apu.
◼ Prisantka nani. Aidrubanka ba ridi daukan ba tawan wan tingkika laka marikaia wisi, yawan sip sa tasba aiska smalkaia warkka ba ta baikaia dukyara wan prisantka nani wilinkira yabaia. Shek wahya kum yabaia want sa kaka, “Asociación Testigos de Jehová de Nicaragua” nina mangki yabaia sa.
◼ Aksidint nani. Aidrubanka ra sma taim aksidint kum takbia sa kaka, pliskam pali asla dadaukra kau lamamra ba ra wis, bara dia daukaia ba laki kaikbia dukyara witin Sîka Helpka Yabi uplika ra maisapahkbia. Nit takbia kaka naha nani ba aspital ra brih waia sip kabia. Upla sut aspital ra wini kaia watlika ra.
◼ Sîka nani. Daktar nani sîka maikan disma kaka, dia yus munma ba aidrubanka ra brih was kan aidrubanka ra bahamuna apu kabia.
◼ Dia sat suska yus munbia? Mani bani ba upla nani ba aksidint takisa sus kum pain yus munras tawan. Kau pain sa sus kum pain atki dimaia, ban kra tips nani uli wabia, apia kaka unta bri pliska bak luaia sip sa bara wan suska pain sa kaka trabil apu kabia.
◼ Kiama prawan uplika nani. Aidrubanka ba radiu bak walaia sip kabia (FM). Bara naha tnatka yus munaia dukyara batri wal yus muni radiuka kum bara wan kyama kat walaia dukyara brihwaia sip sa.
◼ Tuktan sirka nani bara sir satka wala. Bahmuna sirka aidrubanka ra brih waia apia sa. Tuktan sirka nani aisa yapti lamara mangkaia sip sa kaka baman brih waia sip kabia.
◼ Isint kia nani. Aidrubanka dauki pliska nani aihkika ba pasa dimras sa. Bara upla wala yamnika ra luki ba mita pain kabia isint kia karna ba yus munaia apia, kan upla kum kum ra siahka trabilka apia kaka siknis wala nani isint kia karna wina bali ba yabisa (1 Ko. 10:24).
◼ Sírvase visitar wahya ba. Kau Baibil tanka nu takan daukisa uplika kum ba dukyara Sírvase visitar (S-43-S) wahya kum ulbi bangkaia sip sa. Nahamuna wahya kumi, apia kaka wal twilki kaia aitani kabia. Ulbi bangkan wahya nani ba sika, buk yayabra nani ra, apia kaka kangrigisankam aîulbra ra yabaia sip sa (Yahbra kati 2009 Gâd Warkka Dauki, wah. 4 ba sin kaiks).
◼ Plun piakan atki pliska. Naha sat pliska nani ra wan daukanka pain ba, Jehova nina ba kau prana daukisa. Bara wark tatakra nani ra prisantka kum yabisa kaka, yawan sim baku daukaia sa.
◼ Takaskaia pliska.
1) Yapaia pliska yus munaia sma ba baman makas bara rumkam ra upla ailal dingkpara.
2) Yapaia pliska kum ridi brisma kaka trabil tara kum mai takbia kaka baman swis, bara takaskaia watla dawanka ra nu muns (Mt. 5:37).
3) Wan surunka brih waia dukyara truk lupia kum bara sa, yus munbia ningkara brisi swiaia sa, baku upla wala yus munaia sip kabia.
4) Plun piaki pliska nani ra baman patam piaks.
5) Takaskaia pliska ra wark tatakra nani wan surunka twilkaia help wan muni ba ra lalah prisantka kum yas, bara wan rumka klin dauki mairka ra yu bani lalah prisantka kum yas.
6) Titan pata, kapi apia kaka ais nani yabi ba pitka kat yus muns.
7) Spirit hulikira ma ba pyu bani ra wark tatakra nani ra mariks. Nu bas witin nani upla ailal warkka daukisa bara baha tanka pain brih, wan kupia pihni laka bara wihka bila kaikanka laka marikbia ba witin nani mapara pain kabia.
8) Takaskaia pliska upla nani kau yus muni ba, praiska ulbi swin ba, yua kum luaia praiska sa, sakuna lal mana ba kulkras sa. Sakuna diara nani man makabras kapram mana mai kulkbia kaka, Aidrubanka Kau Tara ra Takaskaia Pliska Apiska ra isti pali nu muns.
9) Rumka makabram ba wal trabil kum takbia kaka aidrubanka ra sma bara Takaskaia Pliska Apiska ra isti pali nu muns.
10) Takaskaia pliska kum ra dimi auma taim diara aibapaia targetika nani yus munisma kaka nu bas pliska dawanka nani ba praiska mana ba wina kau pura mai kulkbia, naha ba baha ra takaskisma bara dia trabilka takbia kra mai kulkbia. Bara yua kum mahka waia lamara diara sut aibapi takma taim lalahkam yus munaia sip kama.
◼ Wilinkira warkka. Aidrubanka liliaka ba kau tara takisa yawan wark nani bara kabia ba daukaia help munbia kaka (Ap.St 20:35). Ya ya help munaia want sa kaka Wilinkira Warkka Yabi Apiska ra waia sa. Tuktan nani 16 mani wina mayara bri ba help munaia sip sa ai aisa yapti, apia kaka upla almuk kum kaikisa kaka daukaia.
[Wahya 5 Lilkika ba]
Paiwanka wauhkataya nani ba nahki upla mihta ra swibia ki?
Upla sut ra paiwanka wauhkataya swiaia want ba mita bila prahni ra aisaia sa. Bara naku wiaia sip sa: “Naksa. Tasba aiska ra naha paiwanka upla ra yabi ba yawan sin yabi taukisa. Naha ba man dukyam sa. Paiwanka wauhkataya ra tanka nani kau pliki sakma.” Paiwanka wauhkataya pas ba upla ra kupia bukisa dia sapa nu takaia, bara watla dawanka mihta ra mangbia taim witin pas wahya ba laki kaikbia. Liliakira bas. Wik tnata ra paiwanka nani yabi kabia taim, sanska bara sa kaka Wauhkataya wala nani sin yabaia sip sa.