Saumuk kum pâwbia dukiara lî laikaia sa
1. ¿Spirit lâka ra dîa daukaia nit sa saumuk nani mangkan ba pâwbia dukiara?
1 Saumuk nani ba mangkisa piua ra lî laiki kaia sa. Sim natka ra tânka kasak ba upla nani ra smalkisa piua ra baku daukaia sa (1 Ko. 3:6). Naha maprika lilka saumuk dukiara aisi ba baku, yawan upla ra kli wih kaiki kaia sa, baku sin Baibil ba yus munaia sa witin nani spirit lainka ra pâwbia dukiara.
2. ¿Upla kum ra kli wih kaikaia dukiara dîa daukaia sa?
2 Makabi walanka nani yus muns. Smalkaia warkka dukiara ridi takisma piua ra, makabi walanka kum sinskira ridi daukaia sip sma bara upla ra kli wih kaikma taim yus munaia. Uplika wal aisi danh takma taim makabi walanka ba swiaia sip sma bara ahkia kli balaia lukisma ba wiaia. Smalki tataukra manis ba Smalkisa bukka ba yus munisa Baibil stadika kum nahki tâ krikaia marikaia dukiara.
3. Upla kum wal aisi danh takram taim, ¿dîa ulbaia sip sma?
3 Dîa aisaram ba uls. Upla kum wal aisi danh takram ningkara, witin wal dîa aisaram ba uls, baku sin witin nina bara ai dairiksanka ba sin. Bara ani yua bara dîa ulbanka lalka dukiara aisaram ba, ani ulbi sakanka nani ai mihta ra swiram ba sin. ¿Witin mai win dîa rilidianka brisa? ¿Pamali brisa? ¿Dîa luki ba mai win? Baku sin, ulbaia sip sma kli balaia wiram ba yua bara ani makabi walanka ansika yabaia lukisma.
4. Upla kau lan takaia want ba ra, ¿dîa muni ban kli wih kaikaia sa?
4 Ban trai kaiki bas. Sitan want sa ‘sturi yamni upla kupia ra mangkan ba sakaia’ (Mk. 4:14, 15). Upla kum ra kli wih kaikisma taim sip witin ra sakras sma kaka, ban trai kaiki bas. Ban kra wauhtaya kum ulbi blikan ba yabaia sip sma, apia kaka witin watla durka un bâk wauhtaya dingki swiaia sip sma. Tâura smasmalkra mairin kum watla durka kat Baibil stadika kum tâ krikan, sakuna kli uplika ra sakras kan, baha mita wauhtaya kum ulbi blikan. Baha wina tâura smasmalkra mairin ba ai stadika ra sakan taim, stadika ba uba lilia ai dara walan, kan witin kaikan kristianka mairin ba rait pali witin dukiara luki kan. Saumuk nani ba lî laikisa piua ra, uba lilia wan dara walisa, kan baku kau pain pâwisa spirit lainka ra, ‘mâ kum wina 30 sakisa, wala nani 60 sakisa, bara 100 sin sakisa’ (Mk. 4:20).