Лекција 6

Рајот е близу!

Лошите работи што се случуваат сега на Земјата покажуваат дека Рајот е близу. Библијата вели дека ќе доживееме ужасни времиња токму пред да дојде Рајот. Сега живееме во такви времиња! Еве неколку од работите за кои Библијата вели дека ќе се случат:

Големи војни. „Ќе се дигне народ против народ, и царство против царство“ (Матеј 24:7). Ова пророштво се остварило. Од 1914 година наваму, имало две светски војни и голем број помали војни. Во нив умреле милиони луѓе.

Нашироко распространети болести. „Од едно место во друго ќе има чуми“ (Лука 21:11, NW). Дали се остварило ова? Да. Ракот, срцевите заболувања, туберкулозата, маларијата, СИДА-та и други болести убиле милиони луѓе.

Недостиг на храна. По целата Земја има луѓе кои немаат доволно да јадат. Секоја година милиони луѓе умираат од глад. Ова е уште едно обележје дека Рајот наскоро ќе дојде. Библијата вели: „Ќе има . . . глад“ (Марко 13:8).

Земјотреси. „На места ќе има . . . потреси“ (Матеј 24:7). Ова, исто така, се остварило во наше време. Над милион луѓе умреле во земјотреси од 1914 наваму.

Злобни луѓе. Луѓето ќе бидат „среброљупци“ и „саможиви“. Ќе бидат „повеќе сластољупци отколку богољупци“. Децата ќе бидат „непокорни спрема родителите“ (2. Тимотеј 3:1—5). Зарем не се согласуваш дека денес има многу такви луѓе? Тие немаат почит кон Бог и им создаваат тешкотии на оние кои се обидуваат да учат за Бог.

Криминал. Исто така „беззаконијата ќе се умножат“ (Матеј 24:12). Веројатно ќе се согласиш дека криминалот е поголем отколку што бил пред неколку години. Луѓето насекаде се во опасност да бидат опљачкани, измамени или повредени.

Сите овие работи покажуваат дека Божјето Царство е близу. Библијата вели: „Кога ќе видите дека станува ова, знајте оти се приближи царството Божјо“ (Лука 21:31). Што е Божјето Царство? Тоа е Божја небесна влада која ќе донесе Рај на оваа Земја. Божјето Царство ќе ги замени човечките влади (Даниил 2:44).