Објавителите на Царството известуваат
Една калуѓерка по 25 години конечно ја спознава вистината
Библијата претскажала дека ”големо множество“ од сите народи ќе дојде и ќе врши обожавање во Јеховиниот духовен храм (Откровение 7:9). Ова се случува денес, и ние се радуваме што многумина со помош на Божјата вистина се ослободуваат од оковите на лажната религија. Следните искуства го илустрираат тоа.
◻ Една жена од Рим, Италија, раскажува: ”Уште кога бев мала, најголема желба ми беше да станам калуѓерка, затоа што со сето свое срце сакав да му служам на Бог. Својата амбиција можев да ја исполнам на 32-годишна возраст, на 8. декември 1960, кога ги положив првите заклетви за послушност, одрекнување и невиност. Моја задача беше деноноќно да се грижам за 30 сиромашни и напуштени деца кои беа сирачиња или деца на затвореници. Наоѓав задоволство во мојата задача.
”Мојата вера беше разнишана после десет години служба кога се појави расправија во институтот. Се прашував, ако нѐ води Бог, зошто допушта вакви несогласувања и нереди во сопствената куќа.“
Оваа калуѓерка имала сестра која живеела во Франција и била Јеховин сведок. Таа ѝ посведочила на калуѓерката преку писмо и ѝ го испратила Нов Свет Преводот на Светото писмо (The New World Translation of the Holy Scriptures). Калуѓерката раскажува: ”По 23 години, тоа беше мојот прв контакт со Божјата Реч.“ Потоа прифатила библиска студија со Јеховините сведоци. Таа вели: ”Откако напреднав во библиската студија, го запознав Јехова Бог и неговите барања, како и неговите прекрасни особини. Се чувствував ужасно кога дознав дека ја осудува употребата на слики, затоа што установата беше преполна со слики од секаква големина и вид. Сфатив дека ако сакам да му угодам на Јехова, не ќе можам да останам на тоа место. По 25 години верна служба како калуѓерка, конечно ја најдов вистината. Така, на 1. октомври 1985 дадов отказ, на големо изненадување од моите претпоставени.
”Моите љубезни браќа и сестри ми помагаа и духовно и материјално. Благодарна на Јехова и неговата организација, се крстив на 30. август 1986 и тргнав по патот кон вечниот живот.“
Јехова ја благословува желбата на еден младинец да му служи на Бог
◻ Една наставничка во Бразил која е Јеховин сведок, додека ги прегледувала домашните работи, забележала дека една 14-годишна ученичка пишувала за својата желба да научи повеќе за Бог. Започнала библиска студија со ученичката, но како што девојката напредувала, нејзиното католичко семејство ја забранило студијата и ја уништило нејзината литература. Ученичката почнала да ја проучува Библијата за време на одморите во училиштето, но била откриена. И така студијата продолжила преку писма. Но, набргу нејзините домашни ги откриле писмата и ги изгореле. Таткото почнал да ја присилува да оди на миса. Таа одела, но си носела примерок на Стражарска кула за да чита во текот на службата, криејќи го помеѓу страниците на црковната брошура. Тоа траело шест месеци, додека еден ден се измолкнала од дома и отишла во Царската сала. Во текот на состанокот, татко ѝ се појавил на вратата и им рекол на браќата да ѝ кажат на ќерка му дека ќе ја претепа кога ќе се врати дома. Обидите на браќата да разговараат разумно со него биле залудни.
Следниот ден, среќна и насмеана, отишла да се види со браќата. Им ги покажала многуте модрици по телото каде татко ѝ ја тепал. А зошто била среќна? Откако ја напуштил Царската сала, таткото прашал повеќе луѓе во градот, вклучувајќи го и градоначалникот, за предностите и недостатоците неговата ќерка да стане Јеховин сведок. Градоначалникот рекол дека Сведоците се добри луѓе и достојни за доверба. Додал дека имаат одличен морал и дека би било многу добро да се има дете со такви стандарди, кои се многу повисоки од оние на младината воопшто.
И покрај тоа, девојката добила ќотек. Но татко ѝ и рекол дека ја тепа затоа што ја напуштила куќата без дозвола. И рекол дека пак ќе ја тепа ако некогаш престане да ја проучува Библијата или да ги посетува состаноците на Јеховините сведоци! Ќерката сега е ревносен објавител, а некои од нејзиното семејство покажуваат интерес за вистината.
Навистина, Јехова ги благословува младите кои имаат искрена желба да му служат, како што покажува и ова искуство (Псалми 148:12, 13).