Како да го подобриме нашето проповедање за Царството
1 Нашето проповедничко дело е итно како никогаш порано. Дали луѓето ќе живеат или ќе умрат зависи од нивната реакција на добрата вест (1. Петр. 4:5, 6, 17; Откр. 14:6, 7). Од таа причина, треба секогаш да бараме начини да го подобриме нашето проповедање за Царството. Кои се некои од нив?
2 Добро подготви се: Користејќи ја Наша служба за Царството за месецот што е во тек, избери презентација за која сметаш дека ќе им се допаѓа на повеќето луѓе од твоето подрачје. Важно е твоите коментари да бидат приспособени на локалните прилики. Или, можеби повеќе сакаш самиот да подготвиш презентација, користејќи ги идеите и библиските стихови за кои лично си утврдил дека се делотворни. Тогаш ќе ти треба увод што подбудува интерес. (Види Расудување, стр. 9-15.) Можеби планираш да му поставиш на станарот прашање што наведува на размислување или да го замолиш да коментира за некои новости од локален интерес. Кога си се одлучил за некоја презентација, извежбај ја со некој член на семејството или со некој објавител кој може да ти даде предлози каде да се поправиш.
3 Разговарај со луѓето: Наша цел е да пренесеме една важна порака. Ова може да го постигнеме ако го вовлечеме нашиот слушател во содржаен разговор. Ако станарот има приговор или го кажува своето мислење, слушај го внимателно она што сака да го каже. Неговите коментари ќе ти помогнат да му дадеш библиски одговор за надежта што ја имаш (1. Петр. 3:15). Ако неговото гледиште не се совпаѓа со библиското, можеш тактично да речеш: „Многу луѓе го мислат истото. Сепак, на тоа прашање може да се гледа и од друг аспект“. Потоа, прочитај му еден соодветен текст и замоли го за коментар.
4 Имај приспособлив план: Ништо нема да ти вреди што си се подготвил ако не можеш да разговараш со луѓето. Денес е вообичаено кога правиме посети да најдеме само неколку станари дома. Ако е таква состојбата и на твоето подрачје, обиди се да го измениш планот за да можеш да работиш од куќа до куќа кога повеќето луѓе се дома. Можеби ќе утврдиш дека најпогодно време за посети се викендите; други луѓе можеби повеќе ќе се најдат во текот на седмицата, но во раните вечерни часови. Во некои места, објавителите сметаат дека е поволно да се сведочи за време на световни празници бидејќи тогаш наоѓаат повеќе луѓе дома. Во такви прилики тие се најчесто опуштени и можеби поспремни да разговараат. Добро ќе е уводот да го прилагодиш на приликата, а потоа, со твоите коментари, да го поврзеш во една библиска тема.
5 Анализирај ја делотворноста на твојата презентација: Откако ќе заминеш од некоја врата, прашај се: ‚Дали го достигнав срцето на станарот? Дали го наведов да се искаже и дали внимавав на она што го рече? Дали му одговорив тактично? Со оглед на околностите, дали го употребив најдобриот пристап?‘ Можеби ќе биде од корист одвреме навреме да работиш со некој искусен објавител или со пионер, слушајќи ги внимателно неговите презентации за да ја подобриш твојата делотворност во службата.
6 Ако си вешт во твојата работа, ќе можеш да ги поделиш вистините за Царството со што „ќе се спасиш и сам и оние што те слушаат“ (1. Тим. 4:16; Изр. 22:29).