Влевај им ја на другите надежта за вечен живот
1 Иако човекот истражувал начини за да го успори процесот на стареење и да го продолжи својот животен век, староста и смртта сѐ уште се неминовни. Колку само сме благодарни што Библијата објаснува зошто луѓето стареат и умираат, и како разорното дејство на староста ќе биде поништено а смртта ќе биде елиминирана. Овие вистини се уверливо презентирани во книгата Спознание кое води до вечен живот. Книгата јасно одговара на збунувачките прашања во врска со животот и смртта, насочувајќи го читателот кон времето кога ќе биде обновен Рајот.
2 Во март ќе ја нудиме книгата Спознание со цел да започнеме домашни библиски студии (Мат. 28:19, 20). Потоа, ќе правиме повторни посети кај сите оние кои манифестирале интерес за пораката за Царството. На тој начин можеме на другите да им влееме надеж за вечен живот (Тит 1:2). За да го постигнеш тоа, можеби ќе увидиш дека од помош се следниве предлози.
3 Кога правиш прва посета, би можел да го поставиш ова прашање:
◼ „Дали некогаш сте се прашале зошто луѓето копнеат по подолг живот? [Дозволи одговор.] Будистите, христијаните, хиндусите, муслиманите и други — сите тие имаат надеж за живот после смртта“. Отвори ја книгата Спознание на поглавје 6 — „Зошто старееме и умираме?“ и прочитај го 3. пасус. Резонирај за наведените стихови. Укажувајќи на двете прашања на крајот од пасусот, прашај го станарот дали тој би сакал самиот да ги види одговорите. Доколку е желен за тоа, продолжи да дискутираш за следните неколку пасуси. Започната е студија! Ако не, тогаш остави му ја книгата на читање и направи планови да навратиш, подобро за ден или два, за да дискутирате за одговорите.
4 Кога проследуваш место каде што си ја оставил книгата „Спознание“, би можел да кажеш:
◼ „Навратив за да ги разгледаме двете прашања во врска со смртта, кои ги оставивме неодговорени“. Потсети го станарот на прашањата. Потоа дискутирај за информациите од поглавје 6 под поднасловот „Злокобна завера“. Зависно од околностите, или продолжи ја студијата или употреби го последното прашање на крајот од 7. пасус за да поставиш темел за следната сесија. Направи дефинитивни планови да навратиш. Дај му на станарот леток и кратко опиши како се одржуваат собраниските состаноци. Срдечно покани го да присуствува.
5 Или во делото од куќа до куќа или при неформалното сведочење, би можел да започнеш разговор со тоа што ќе кажеш:
◼ „Дали некогаш сте се прашале што донесува иднината за нас и за Земјата? (Дозволи одговор.) Библијата ја резимира иднината во еден збор — Рај! Таа објаснува дека во почетокот, Бог претворил еден дел од Земјата во прекрасен рај каде што ја ставил човечката двојка која ја создал. Тие требало да ја населат целата Земја, постепено претворајќи ја во рај. Забележете го овој опис за тоа како сигурно изгледал тој“. Отвори ја книгата Спознание на страница 8 и прочитај го 9. пасус, под поднасловот „Живот во Рај“. Потоа дискутирајте за точките во 10. пасус и прочитај го наведениот стих — Исаија 55:10, 11. Понуди да ја продолжите дискусијата за тоа каков ќе биде животот во обновениот Рај и заедно обработете ги пасусите 11—16. Или, пак, охрабри го лицето да прочита само и уреди повторно да се сретнете и да дискутирате за тоа.
6 Доколку во почетокот не била воспоставена студија, би можел да се обидеш да го сториш тоа на повторната посета со тоа што ќе кажеш:
◼ „Како што дискутиравме при нашиот последен разговор, Божја намера е целата Земја да биде преобразена во рај. Тоа го покренува прашањето: ‚Каков ќе биде Рајот?‘“ Отвори ја книгата Спознание на поглавје 1 и проучете ги пасусите 11—16, под поднасловот „Живот во обновениот Рај“. После тоа, покажи ја илустрацијата на страници 4 и 5 и прашај го лицето дали би сакало да живее во една таква прекрасна околина. Потоа, прочитај ја првата реченица од 17. пасус на страница 10. Зависно од околностите, или продолжи ја студијата или кажи дека при твојата следна посета ќе објасниш што се бара за некој да живее во обновениот Рај. Остави леток, објасни го распоредот за состаноци и срдечно покани го лицето да присуствува во Салата на Царството.
7 Книгата Спознание е одлична алатка која се користи за тоа да им го обелоденуваме на другите „вечниот живот“ кој го ветил Бог. Тоа што водиш домашни библиски студии со луѓето, може да им ја влее оваа величествена надеж која ја инспирирал Бог „кој не може да лаже“.