യേശു​ക്രി​സ്‌തു യഥാർഥ​ത്തിൽ ആരാണ്‌?

അന്ന്‌ എ.ഡി. 33-ലെ ആ വസന്തകാല ദിനത്തിൽ യേശുക്രിസ്‌തുa യെരു​ശ​ലേ​മിൽ പ്രവേ​ശി​ച്ച​പ്പോൾ നഗരവാ​സി​കൾ മുഴുവൻ ഇളകി​യത്‌ എന്തു​കൊ​ണ്ടാണ്‌? യേശു​വി​നെ​ക്കു​റി​ച്ചും അവൻ ചെയ്‌ത അത്ഭുത​ങ്ങ​ളെ​ക്കു​റി​ച്ചും അവർ ധാരാളം കേട്ടി​രു​ന്നു. കേട്ടവ​രെ​ല്ലാം അതേക്കു​റിച്ച്‌ മറ്റുള്ള​വ​രോ​ടു പറയു​ക​യും ചെയ്‌തി​രു​ന്നു. (യോഹ​ന്നാൻ 12:17-19) എന്നാൽ തങ്ങളുടെ മുമ്പിൽ നിൽക്കുന്ന ആ മനുഷ്യ​ന്റെ കീർത്തി ലോക​മെ​ങ്ങും പരക്കു​മെ​ന്നോ നൂറ്റാ​ണ്ടു​കൾക്കി​പ്പു​റം ഇന്നും അവൻ ജനഹൃ​ദ​യ​ങ്ങളെ സ്വാധീ​നി​ക്കു​മെ​ന്നോ അന്ന്‌ അവർ അറിഞ്ഞില്ല.

മാനവ​ച​രി​ത്ര​ത്തിൽ യേശു​വി​നുള്ള സ്വാധീ​നം വ്യക്തമാ​ക്കുന്ന ചില ഉദാഹ​ര​ണങ്ങൾ നോക്കുക.

• ലോക​ത്തി​ന്റെ പല ഭാഗങ്ങ​ളി​ലും ഉപയോ​ഗ​ത്തി​ലി​രി​ക്കുന്ന കലണ്ടർ, യേശു ജനിച്ച​താ​യി പറയ​പ്പെ​ടുന്ന വർഷത്തെ അധിക​രി​ച്ചു​ള്ള​താണ്‌.

• ക്രിസ്‌ത്യാ​നി​ക​ളെന്ന്‌ സ്വയം വിശേ​ഷി​പ്പി​ക്കുന്ന ഏതാണ്ട്‌ 200 കോടി (ലോക​ജ​ന​സം​ഖ്യ​യു​ടെ ഏതാണ്ട്‌ മൂന്നി​ലൊന്ന്‌) ആളുക​ളുണ്ട്‌ ഇന്നു ലോക​ത്തിൽ.

• നൂറു കോടി​യി​ല​ധി​കം വരുന്ന ഇസ്ലാം മതവി​ശ്വാ​സി​കൾ യേശു​വി​നെ ഒരു വലിയ പ്രവാ​ച​ക​നാ​യി കണക്കാ​ക്കു​ന്നു.

• യേശു​വി​ന്റെ ജ്ഞാന​മൊ​ഴി​ക​ളിൽ പലതും ആളുക​ളു​ടെ നിത്യ​സം​ഭാ​ഷ​ണ​ത്തി​ന്റെ ഭാഗമാ​യി മാറി​യി​ട്ടുണ്ട്‌. ചില ഉദാഹ​ര​ണങ്ങൾ:

  ‘വലത്തെ ചെകി​ട്ടത്ത്‌ അടിക്കു​ന്ന​വന്‌ മറ്റേ ചെകി​ടും കാണി​ച്ചു​കൊ​ടു​ക്കുക.’—മത്തായി 5:39.

  ‘വാളെ​ടു​ക്കു​ന്നവൻ വാളാൽ.’—മത്തായി 26:52.

  ‘മുട്ടു​വിൻ തുറക്ക​പ്പെ​ടും.’—മത്തായി 7:7.

  ‘നിന്നെ​പ്പോ​ലെ​തന്നെ നിന്റെ അയൽക്കാ​ര​നെ​യും സ്‌നേ​ഹി​ക്കുക.’—മത്തായി 22:39.

  ‘ശത്രു​ക്കളെ സ്‌നേ​ഹി​ക്കുക.’—ലൂക്കോസ്‌ 6:27.

  ‘വലങ്കൈ ചെയ്യു​ന്നത്‌ ഇടങ്കൈ അറിയ​രുത്‌.’ —മത്തായി 6:3.

അതെ, ജനജീ​വി​ത​ത്തിൽ യേശു ചെലു​ത്തി​യി​ട്ടുള്ള സ്വാധീ​നം ആർക്കും നിഷേ​ധി​ക്കാ​നാ​വില്ല. ഇങ്ങനെ​യൊ​ക്കെ​യാ​ണെ​ങ്കി​ലും വളരെ വ്യത്യ​സ്‌ത​മായ വീക്ഷണ​ങ്ങ​ളും വിശ്വാ​സ​ങ്ങ​ളു​മാണ്‌ ആളുകൾക്ക്‌ അവനെ​ക്കു​റി​ച്ചു​ള്ളത്‌. അതു​കൊ​ണ്ടു​തന്നെ ‘യേശു​ക്രി​സ്‌തു യഥാർഥ​ത്തിൽ ആരാണ്‌?’ എന്ന ചോദ്യം നിങ്ങളു​ടെ മനസ്സി​ലും ഉയർന്നു​വ​ന്നി​ട്ടു​ണ്ടാ​കും. യേശു എവി​ടെ​നി​ന്നു വന്നു? അവന്റെ ജീവിതം എങ്ങനെ​യു​ള്ള​താ​യി​രു​ന്നു? അവൻ എന്തിനു മരിച്ചു? ഈ ചോദ്യ​ങ്ങൾക്കുള്ള ഉത്തരങ്ങൾ ബൈബി​ളി​നു മാത്രമേ നൽകാൻ കഴിയൂ. യേശു​വി​നെ​ക്കു​റി​ച്ചുള്ള ആ വസ്‌തു​തകൾ മനസ്സി​ലാ​ക്കു​ന്നത്‌ വളരെ പ്രധാ​ന​മാണ്‌. കാരണം, അതിന്‌ നിങ്ങളു​ടെ ജീവി​തത്തെ നിർണാ​യ​ക​മായ ഒരു വിധത്തിൽ സ്വാധീ​നി​ക്കാ​നാ​കും.