“യുദ്ധം യഹോ​വ​യു​ടേ​താണ്‌”

1990-കളുടെ അവസാ​ന​ത്തി​ലാണ്‌ പ്രശ്‌ന​ങ്ങ​ളു​ടെ തുടക്കം. ഫ്രാൻസി​ലെ നമ്മുടെ ബ്രാഞ്ചിന്‌ 1993 മുതൽ 1996 വരെയുള്ള വർഷങ്ങ​ളിൽ ലഭിച്ച സംഭാ​വ​ന​കൾക്കു ഭീമമായ ഒരു തുക നികുതി നൽകണ​മെന്ന്‌ അവിടത്തെ ഗവൺമെന്റ്‌ അന്യാ​യ​മാ​യി ആവശ്യ​പ്പെട്ടു. നീതി ലഭിക്കാൻവേണ്ടി നമ്മൾ ഫ്രാൻസി​ലെ കോട​തി​കളെ സമീപി​ച്ചെ​ങ്കി​ലും യാതൊ​രു പ്രയോ​ജ​ന​വും ഉണ്ടായില്ല. അപ്പീൽ കോട​തി​യി​ലും നമുക്ക്‌ അനുകൂ​ല​മായ ഒരു വിധി കിട്ടി​യില്ല. അതെത്തു​ടർന്ന്‌ ഗവൺമെന്റ്‌ ബ്രാഞ്ചി​ന്റെ ബാങ്ക്‌ അക്കൗണ്ടിൽനിന്ന്‌ 45 ലക്ഷത്തി​ല​ധി​കം യൂറോ (ഏകദേശം 29 കോടി രൂപ) പിടി​ച്ചെ​ടു​ത്തു. യൂറോ​പ്യൻ മനുഷ്യാ​വ​കാശ കോടതി മാത്ര​മാ​യി​രു​ന്നു പിന്നെ നമുക്കുള്ള ഏക പ്രതീക്ഷ. പക്ഷേ വിചാ​ര​ണ​യ്‌ക്കു മുമ്പു​തന്നെ കാര്യം ഒത്തുതീർപ്പാ​ക്കാൻ പറ്റുമോ എന്നു നോക്കാൻ മനുഷ്യാ​വ​കാശ കോടതി ഒരു കാര്യം നിർദേ​ശി​ച്ചു. കോട​തി​യു​ടെ ഒരു പ്രതി​നി​ധി​ക്കു മുമ്പാകെ ഫ്രാൻസ്‌ ഗവൺമെ​ന്റി​ന്റെ അഭിഭാ​ഷ​ക​രും നമ്മളും തമ്മിൽ കൂടി​ക്കാ​ണുക എന്നതാ​യി​രു​ന്നു അത്‌.

ചെറി​യൊ​രു തുക ഗവൺമെ​ന്റി​നു കൊടുത്ത്‌ ഈ കേസ്‌ ഒത്തുതീർപ്പാ​ക്കാ​നേ കോട​തി​യു​ടെ പ്രതി​നി​ധി പറയു​ക​യു​ള്ളൂ എന്ന്‌ ഞങ്ങൾക്ക്‌ ഏകദേശം ഉറപ്പാ​യി​രു​ന്നു. എന്നാൽ ഒരു യൂറോ​പോ​ലും ഗവൺമെ​ന്റി​നു കൊടു​ക്കു​ന്നത്‌ ബൈബിൾത​ത്ത്വ​ങ്ങ​ളു​ടെ ലംഘന​മാ​ണെന്നു ഞങ്ങൾ മനസ്സി​ലാ​ക്കി. കാരണം ദൈവ​രാ​ജ്യ​ത്തെ പിന്തു​ണ​യ്‌ക്കാ​നാണ്‌ സഹോ​ദ​രങ്ങൾ ആ സംഭാ​വ​നകൾ നൽകി​യത്‌; അത്‌ ഗവൺമെ​ന്റിന്‌ അവകാ​ശ​പ്പെ​ട്ടതല്ല. (മത്താ. 22:21) എന്നാൽ കോട​തി​യു​ടെ നിയമ​ങ്ങളെ ബഹുമാ​നി​ക്കു​ന്ന​തു​കൊണ്ട്‌ ഞങ്ങൾ ആ മീറ്റി​ങ്ങി​നു പോയി.

മനുഷ്യാ​വ​കാശ കോട​തി​യു​ടെ മനോ​ഹ​ര​മായ ഒരു കോൺഫ​റൻസ്‌ മുറി​യി​ലാണ്‌ ഞങ്ങൾ ആ മീറ്റി​ങ്ങി​നാ​യി കൂടി​വ​ന്നത്‌. ചർച്ചയു​ടെ തുടക്കം അത്ര നല്ല രീതി​യി​ലാ​യി​രു​ന്നില്ല. ഗവൺമെന്റ്‌ നികു​തി​യാ​യി ആവശ്യ​പ്പെ​ടുന്ന തുകയിൽ കുറ​ച്ചെ​ങ്കി​ലും യഹോ​വ​യു​ടെ സാക്ഷികൾ കൊടു​ക്കാ​നാണ്‌ താൻ പ്രതീ​ക്ഷി​ക്കു​ന്ന​തെന്നു പ്രതി​നി​ധി​യാ​യി വന്ന സ്‌ത്രീ ആദ്യം​തന്നെ പറഞ്ഞു. അപ്പോൾ ഉടനെ ഇങ്ങനെ ചോദി​ക്കാ​നാണ്‌ ഞങ്ങൾക്ക്‌ തോന്നി​യത്‌: “ഞങ്ങളുടെ ബാങ്ക്‌ അക്കൗണ്ടിൽനിന്ന്‌ ഗവൺമെന്റ്‌ ഇപ്പോൾത്തന്നെ 45 ലക്ഷത്തി​ല​ധി​കം യൂറോ പിടി​ച്ചെ​ടു​ത്തി​ട്ടു​ണ്ടെന്ന കാര്യം മാഡത്തിന്‌ അറിയാ​മോ?”

അതു കേട്ട​പ്പോൾ ആ സ്‌ത്രീ ശരിക്കും ഞെട്ടി​പ്പോ​യി. ഗവൺമെന്റ്‌ അഭിഭാ​ഷകർ അക്കാര്യം സത്യമാ​ണെന്നു സമ്മതിച്ചു. അതോടെ ആ സ്‌ത്രീക്ക്‌ കേസി​നോ​ടുള്ള മനോ​ഭാ​വം​തന്നെ മാറി. അവർ അഭിഭാ​ഷ​കരെ വഴക്കു പറഞ്ഞിട്ട്‌ മീറ്റിങ്ങ്‌ അപ്പോൾത്തന്നെ അവസാ​നി​പ്പി​ച്ചു. ഞങ്ങൾ ഒട്ടും പ്രതീ​ക്ഷി​ക്കാത്ത രീതി​യിൽ യഹോവ ആ കേസിന്റെ ഗതിതന്നെ മാറ്റി​വി​ട്ടെന്ന്‌ അപ്പോൾ എനിക്കു മനസ്സി​ലാ​യി. ആ മുറി​യിൽനിന്ന്‌ പോരു​മ്പോൾ ഞങ്ങളുടെ ഉള്ളിൽ സന്തോ​ഷ​വും അത്ഭുത​വും അലതല്ലു​ക​യാ​യി​രു​ന്നു.

2011 ജൂൺ 30-ന്‌ മനുഷ്യാ​വ​കാശ കോടതി ഐകക​ണ്‌ഠ്യേന നമുക്ക്‌ അനുകൂ​ല​മായ വിധി പ്രഖ്യാ​പി​ച്ചു. ഗവൺമെന്റ്‌ നമ്മു​ടെ​മേൽ ചുമത്തിയ നികുതി അന്യാ​യ​മാ​ണെ​ന്നും അവർ പിടി​ച്ചെ​ടുത്ത തുക പലിശ സഹിതം തിരി​ച്ചു​കൊ​ടു​ക്ക​ണ​മെ​ന്നും കോടതി പറഞ്ഞു. ചരി​ത്ര​പ്ര​ധാ​ന​മായ ഈ വിധി ഫ്രാൻസി​ലെ നമ്മുടെ സത്യാ​രാ​ധ​നയെ ഇന്നോളം സംരക്ഷി​ച്ചി​രി​ക്കു​ന്നു. അന്ന്‌ കോൺഫ​റൻസ്‌ മുറി​യിൽവെച്ച്‌ പെട്ടെന്നു മനസ്സിൽ തോന്നി ചോദിച്ച ആ ചോദ്യം ഗൊല്യാ​ത്തി​ന്റെ തലയിൽ തറച്ചു​ക​യ​റിയ കല്ലു​പോ​ലെ​യാ​യി​രു​ന്നു. ആ ചോദ്യ​മാണ്‌ നമ്മുടെ നിയമ​പോ​രാ​ട്ട​ത്തിൽ വഴിത്തി​രി​വാ​യത്‌. എന്തു​കൊ​ണ്ടാണ്‌ നമ്മൾ ജയിച്ചത്‌? ദാവീദ്‌ ഗൊല്യാ​ത്തി​നോ​ടു പറഞ്ഞ വാക്കു​ക​ളാണ്‌ അതിന്റെ ഉത്തരം: “യുദ്ധം യഹോ​വ​യു​ടേ​താണ്‌.”—1 ശമു. 17:45-47.

എന്നാൽ നമ്മുടെ വിജയം ഈ ഒരൊറ്റ കേസിൽ ഒതുങ്ങു​ന്നതല്ല. ശക്തമായ ഗവൺമെ​ന്റു​ക​ളും മതങ്ങളും എതിർത്തി​ട്ടും 70 രാജ്യ​ങ്ങ​ളി​ലെ ഹൈ​ക്കോ​ട​തി​ക​ളി​ലും പല അന്താരാ​ഷ്ട്ര കോട​തി​ക​ളി​ലു​മാ​യി നമുക്ക്‌ 1,225 കേസുകൾ ഇതുവരെ വിജയി​ക്കാ​നാ​യി​ട്ടുണ്ട്‌. ഈ വിജയങ്ങൾ യഹോ​വ​യു​ടെ സാക്ഷി​ക​ളു​ടെ അടിസ്ഥാന അവകാ​ശങ്ങൾ സംരക്ഷി​ച്ചി​രി​ക്കു​ന്നു. ഒരു മതമായി പ്രവർത്തി​ക്കാ​നുള്ള നിയമാം​ഗീ​കാ​ര​വും, പ്രസം​ഗ​പ്ര​വർത്തനം ചെയ്യാ​നും ദേശീയ ചടങ്ങു​ക​ളിൽനിന്ന്‌ മാറി​നിൽക്കാ​നും രക്തം നിരസി​ക്കാ​നും ഉള്ള അവകാ​ശ​വും അതിൽ ഉൾപ്പെ​ടു​ന്നു.

യു.എസ്‌.എ.-യിലെ ന്യൂ​യോർക്കി​ലുള്ള യഹോ​വ​യു​ടെ സാക്ഷി​ക​ളു​ടെ ലോകാ​സ്ഥാ​നത്ത്‌ പ്രവർത്തി​ച്ചി​രുന്ന ഞാൻ എങ്ങനെ​യാണ്‌ നമ്മുടെ കേസു​മാ​യി യൂറോ​പ്പിൽ എത്തിയത്‌?

തീക്ഷ്‌ണ​ത​യുള്ള മിഷന​റി​മാ​രെ കണ്ട്‌ വളരുന്നു

എന്റെ മാതാ​പി​താ​ക്ക​ളായ ജോർജും ലൂസി​യ​ലും 12-ാമത്തെ ഗിലെ​യാദ്‌ ക്ലാസ്സിൽനിന്ന്‌ ബിരുദം നേടി​യ​വ​രാണ്‌. 1956-ൽ ഞാൻ ജനിക്കു​മ്പോൾ അവർ ഇത്യോ​പ്യ​യിൽ സേവി​ക്കു​ക​യാ​യി​രു​ന്നു. ഒന്നാം നൂറ്റാ​ണ്ടി​ലെ സുവി​ശേ​ഷ​ക​നായ ഫിലി​പ്പോ​സി​നെ മനസ്സിൽക്കണ്ട്‌ അവർ എനിക്ക്‌ ഫിലിപ്പ്‌ എന്നു പേരിട്ടു. (പ്രവൃ. 21:8) അടുത്ത വർഷം ഗവൺമെന്റ്‌ നമ്മുടെ ആരാധന അവിടെ നിരോ​ധി​ച്ചു. അന്ന്‌ ഞാൻ തീരെ ചെറു​താ​യി​രു​ന്നെ​ങ്കി​ലും ഞങ്ങളുടെ കുടും​ബം രഹസ്യ​മാ​യി ആരാധന നടത്തു​ന്ന​തൊ​ക്കെ ഞാൻ ഇപ്പോ​ഴും ഓർക്കു​ന്നുണ്ട്‌. കൊച്ചാ​യി​രു​ന്ന​തു​കൊണ്ട്‌ അതൊക്കെ ഒരു രസമാ​യി​ട്ടാണ്‌ എനിക്കു തോന്നി​യത്‌. പക്ഷേ, 1960-ൽ ആ രാജ്യം വിടാൻ അധികാ​രി​കൾ ഞങ്ങളോട്‌ ആവശ്യ​പ്പെട്ടു.

യു.എസ്‌.എ.-യിലെ കാൻസ​സി​ലുള്ള വിചി​റ്റ​യി​ലേക്ക്‌ ഞങ്ങളുടെ കുടും​ബം മാറി​ത്താ​മ​സി​ച്ചു. എന്റെ പപ്പയും മമ്മിയും ഇത്യോ​പ്യ​യിൽനിന്ന്‌ അങ്ങോട്ട്‌ മാറി​യ​പ്പോൾ ഒരു പ്രത്യേ​ക​സ്വത്ത്‌ കൂടെ എടുത്തി​രു​ന്നു: ഒരു മിഷന​റി​യു​ടെ തീക്ഷ്‌ണത. അവർ സത്യത്തി​നു ചേർച്ച​യിൽ ജീവി​ക്കു​ക​യും മക്കളായ ഞങ്ങളിൽ ആത്മീയ​മൂ​ല്യ​ങ്ങൾ ഉൾനടു​ക​യും ചെയ്‌തു. എനിക്ക്‌ ഒരു ചേച്ചി​യും അനിയ​നും ആണുള്ളത്‌: ജൂഡി​യും ലെസ്‌ലി​യും. അവരും ഇത്യോ​പ്യ​യി​ലാണ്‌ ജനിച്ചത്‌. 13-ാമത്തെ വയസ്സിൽ ഞാൻ സ്‌നാ​ന​മേറ്റു. മൂന്നു വർഷം കഴിഞ്ഞ്‌ ഞങ്ങൾ എല്ലാവ​രും ആവശ്യം അധിക​മുള്ള പെറു​വി​ലെ ആരക്കാ​പ്പ​യി​ലേക്ക്‌ മാറി​ത്താ​മ​സി​ച്ചു.

1974-ൽ എനിക്ക്‌ വെറും 18 വയസ്സു​ള്ള​പ്പോൾ എന്നെയും വേറെ നാലു സഹോ​ദ​ര​ന്മാ​രെ​യും പെറു ബ്രാഞ്ച്‌ പ്രത്യേക മുൻനി​ര​സേ​വ​ക​രാ​യി നിയമി​ച്ചു. മധ്യ ആൻഡീസ്‌ പർവത​പ്ര​ദേ​ശ​ങ്ങ​ളിൽ ആരും പ്രവർത്തി​ച്ചി​ട്ടി​ല്ലാത്ത സ്ഥലങ്ങളി​ലാണ്‌ ഞങ്ങൾക്കു പ്രസം​ഗി​ക്കാ​നു​ണ്ടാ​യി​രു​ന്നത്‌. ക്വെച്ചുവ, അയ്‌മാറ ഭാഷക്കാ​രോ​ടു ഞങ്ങൾ സാക്ഷീ​ക​രി​ക്കേ​ണ്ട​തു​ണ്ടാ​യി​രു​ന്നു. താമസ​സൗ​ക​ര്യ​മുള്ള ഒരു വണ്ടിയി​ലാണ്‌ ഞങ്ങൾ യാത്ര ചെയ്‌തി​രു​ന്നത്‌. ഒരു പെട്ടി​പോ​ലെ ഇരുന്ന​തു​കൊണ്ട്‌ ഞങ്ങൾ അതിനു പെട്ടകം എന്ന്‌ ഓമന​പ്പേ​രി​ട്ടു. യഹോവ പെട്ടെ​ന്നു​തന്നെ പട്ടിണി​യും രോഗ​വും മരണവും ഇല്ലാതാ​ക്കു​മെന്ന്‌ അവിട​ത്തു​കാ​രെ ഞങ്ങൾ ബൈബി​ളിൽനിന്ന്‌ കാണി​ച്ചു​കൊ​ടു​ത്ത​തൊ​ക്കെ ഇപ്പോ​ഴും മനസ്സിൽ തങ്ങിനിൽക്കുന്ന നല്ല ഓർമ​ക​ളാണ്‌. (വെളി. 21:3, 4) അവിടെ പലരും സത്യം സ്വീക​രി​ച്ചു.

ലോകാ​സ്ഥാ​ന​ത്തേക്ക്‌

ഭരണസം​ഘാം​ഗം ആയിരുന്ന ആൽബർട്ട്‌ ഷ്രോഡർ സഹോ​ദരൻ 1977-ൽ പെറു സന്ദർശി​ച്ച​പ്പോൾ ലോകാ​സ്ഥാ​നത്തെ ബഥേൽസേ​വ​ന​ത്തിന്‌ അപേക്ഷ കൊടു​ക്കാൻ എന്നെ പ്രോ​ത്സാ​ഹി​പ്പി​ച്ചു. ഞാൻ അങ്ങനെ ചെയ്‌തു. പെട്ടെ​ന്നു​തന്നെ എനിക്കു ക്ഷണം കിട്ടി. 1977 ജൂൺ 17-ന്‌ ഞാൻ ബ്രൂക്‌ലിൻ ബഥേലിൽ സേവി​ക്കാൻ തുടങ്ങി. പിന്നെ​യുള്ള നാലു വർഷം പ്രവർത്തി​ച്ചത്‌ ക്ലീനി​ങ്ങും അറ്റകു​റ്റ​പ്പ​ണി​ക​ളും ചെയ്‌തി​രുന്ന ഡിപ്പാർട്ടു​മെ​ന്റു​ക​ളി​ലാണ്‌.

1978 ജൂണിൽ ലൂയി​സി​യാ​ന​യി​ലെ ന്യൂ ഓർലി​യൻസിൽവെച്ച്‌ നടന്ന അന്താരാ​ഷ്ട്ര കൺ​വെൻ​ഷ​നിൽ ഞാൻ എലിസ​ബത്ത്‌ അവലോ​നെ കണ്ടുമു​ട്ടി. എന്റെ മാതാ​പി​താ​ക്ക​ളെ​പ്പോ​ലെ അവളുടെ മാതാ​പി​താ​ക്ക​ളും സത്യത്തിൽ തീക്ഷ്‌ണ​ത​യു​ള്ള​വ​രാ​യി​രു​ന്നു. നാലു വർഷമാ​യി മുൻനി​ര​സേ​വനം ചെയ്യു​ക​യാ​യി​രുന്ന അവൾക്കു ജീവി​ത​കാ​ലം മുഴുവൻ മുഴു​സമയ സേവന​ത്തിൽ തുടരണം എന്നായി​രു​ന്നു ആഗ്രഹം. ഞങ്ങൾ പരസ്‌പരം അടുത്ത​റി​ഞ്ഞു. അധികം വൈകാ​തെ ഞങ്ങൾക്കി​ട​യിൽ പ്രണയം പൂവിട്ടു. അങ്ങനെ 1979 ഒക്ടോബർ 20-ന്‌ ഞാനും അവളും വിവാഹം കഴിച്ചു; തുടർന്ന്‌ ഒരുമിച്ച്‌ ബഥേൽ സേവന​വും തുടങ്ങി.

ഞങ്ങളുടെ ആദ്യത്തെ സഭ ബ്രൂക്‌ലിൻ സ്‌പാ​നിഷ്‌ സഭയാ​യി​രു​ന്നു. വളരെ സ്‌നേ​ഹ​മുള്ള സഹോ​ദ​ര​ങ്ങ​ളാണ്‌ അവി​ടെ​യു​ണ്ടാ​യി​രു​ന്നത്‌. പിന്നീ​ടുള്ള വർഷങ്ങ​ളിൽ ഞങ്ങൾ വേറെ മൂന്നു സഭകളിൽ സേവിച്ചു. അവി​ടെ​യുള്ള സഹോ​ദ​ര​ങ്ങ​ളും അതേ സ്‌നേഹം കാണി​ക്കു​ക​യും ഞങ്ങളുടെ ബഥേൽ സേവനത്തെ പിന്തു​ണ​യ്‌ക്കു​ക​യും ചെയ്‌തു. അവരോ​ടും പ്രായ​മായ ഞങ്ങളുടെ മാതാ​പി​താ​ക്കളെ നോക്കാൻ സഹായിച്ച കൂട്ടു​കാ​രോ​ടും കുടും​ബാം​ഗ​ങ്ങ​ളോ​ടും എല്ലാം ഞങ്ങൾക്കു വളരെ നന്ദിയുണ്ട്‌.

നിയമ​പോ​രാ​ട്ട​ത്തി​ലേ​ക്കുള്ള എന്റെ കാൽവെപ്പ്‌

എന്നെ അത്ഭുത​പ്പെ​ടു​ത്തി​ക്കൊണ്ട്‌ 1982 ജനുവ​രി​യിൽ ബഥേലി​ലെ നിയമ​വി​ഭാ​ഗ​ത്തി​ലേക്ക്‌ എന്നെ നിയമി​ച്ചു. മൂന്നു വർഷം കഴിഞ്ഞ്‌ ഒരു ലോ കോ​ളേ​ജിൽനിന്ന്‌ ബിരുദം നേടി വക്കീലാ​കാൻ എന്നോട്‌ ആവശ്യ​പ്പെട്ടു. പഠിച്ചു​കൊ​ണ്ടി​രു​ന്ന​പ്പോൾ എനിക്ക്‌ അതിശയം തോന്നിയ ഒരു കാര്യ​മുണ്ട്‌: ഐക്യ​നാ​ടു​ക​ളി​ലും മറ്റ്‌ രാജ്യ​ങ്ങ​ളി​ലും ആളുകൾ ആസ്വദി​ക്കുന്ന പല സ്വാത​ന്ത്ര്യ​ങ്ങ​ളും യഹോ​വ​യു​ടെ സാക്ഷികൾ നേടി​യെ​ടുത്ത നിയമ​വി​ജ​യ​ങ്ങ​ളിൽനിന്ന്‌ കിട്ടി​യി​ട്ടു​ള്ള​താണ്‌. ഈ കേസു​ക​ളെ​ക്കു​റി​ച്ചൊ​ക്കെ ഞങ്ങളെ ക്ലാസ്സിൽ വിശദ​മാ​യി പഠിപ്പി​ച്ചി​രു​ന്നു.

1986-ൽ എനിക്ക്‌ 30 വയസ്സു​ള്ള​പ്പോൾ നിയമ​വി​ഭാ​ഗ​ത്തി​ന്റെ ഓവർസി​യർ ആയി എന്നെ നിയമി​ച്ചു. അത്രയും ചെറു​പ്പ​മാ​യി​രുന്ന എന്നെ ഇത്ര വലിയ ഒരു ഉത്തരവാ​ദി​ത്വം ഏൽപ്പി​ച്ച​പ്പോൾ എനിക്കു സന്തോ​ഷ​വും അതേസ​മയം പേടി​യും തോന്നി. എനിക്ക​റി​യാത്ത ഒരുപാ​ടു കാര്യങ്ങൾ ഉണ്ടായി​രു​ന്നു. അതു​കൊ​ണ്ടു​തന്നെ ഈ നിയമനം ഒട്ടും എളുപ്പ​മാ​യി​രി​ക്കില്ല എന്ന്‌ എനിക്ക്‌ ഉറപ്പാ​യി​രു​ന്നു.

1988-ൽ ഞാൻ ഒരു വക്കീലാ​യി. എന്നാൽ ആ പഠനകാ​ലം എന്റെ ആത്മീയ​തയെ എത്ര​ത്തോ​ളം ബാധി​ച്ചെന്ന്‌ ഞാൻ തിരി​ച്ച​റി​ഞ്ഞി​രു​ന്നില്ല. ഉന്നത വിദ്യാ​ഭ്യാ​സം പല ആഗ്രഹങ്ങൾ ഉള്ളിൽ വളർത്തു​ക​യും നമ്മുടെ അത്രയും വിദ്യാ​ഭ്യാ​സ​മി​ല്ലാ​ത്ത​വ​രെ​ക്കാൾ നമ്മൾ വലിയ ആളാ​ണെന്ന്‌ ചിന്തി​ക്കാൻ ഇടയാ​ക്കു​ക​യും ചെയ്‌തേ​ക്കാം. ആ കുഴി​യിൽനിന്ന്‌ എന്നെ കൈപി​ടിച്ച്‌ ഉയർത്തി​യത്‌ എലിസ​ബ​ത്താണ്‌. എന്റെ പഴയ ആത്മീയ​ദി​ന​ചര്യ തിരി​ച്ചു​പി​ടി​ക്കാൻ അവൾ സഹായി​ച്ചു. അതിനു സമയ​മെ​ടു​ത്തു, എന്നാൽ പതി​യെ​പ്പ​തി​യെ യഹോ​വ​യു​മാ​യി ഞാൻ വീണ്ടും അടുത്തു. സ്വന്തം അനുഭ​വ​ത്തിൽനിന്ന്‌ ഞാൻ ഒരു കാര്യം പറയാം: ഒരുപാട്‌ അറിവ്‌ നേടു​ന്നതല്ല ജീവി​ത​ത്തി​ലെ പ്രധാ​ന​പ്പെട്ട സംഗതി. യഹോ​വ​യു​മാ​യി നല്ല ബന്ധം ഉണ്ടായി​രി​ക്കണം; യഹോ​വ​യോ​ടും യഹോ​വ​യു​ടെ ജനത്തോ​ടും ആഴമായ സ്‌നേ​ഹ​വും വേണം. അതാണ്‌ ജീവി​ത​ത്തിന്‌ അർഥം പകരു​ന്നത്‌.

സന്തോ​ഷ​വാർത്ത​യ്‌ക്കു​വേണ്ടി വാദിച്ച്‌ അതു നിയമ​പ​ര​മാ​യി സ്ഥാപി​ച്ചെ​ടു​ക്കു​ന്നു

എന്റെ നിയമ​പ​ഠനം കഴിഞ്ഞ്‌ ഞാൻ ബഥേലി​ലെ നിയമ​വി​ഭാ​ഗത്തെ കൂടുതൽ സഹായി​ക്കാ​നും രാജ്യ​പ്ര​വർത്ത​ന​ങ്ങൾക്കു​വേണ്ടി കോട​തി​ക​ളിൽ വാദി​ക്കാ​നും തുടങ്ങി. നമ്മുടെ സംഘടന വളരെ വേഗത്തിൽ മുന്നോ​ട്ടു​പോ​കു​ക​യും വളരു​ക​യും ചെയ്യുന്ന ഒന്നാണ്‌. അതു​കൊ​ണ്ടു​തന്നെ വളരെ പെട്ടെ​ന്നാണ്‌ പല മാറ്റങ്ങ​ളു​മു​ണ്ടാ​കു​ന്നത്‌. അത്തര​മൊ​രു സംഘട​ന​യിൽ പ്രവർത്തി​ക്കു​മ്പോൾ വെല്ലു​വി​ളി​ക​ളു​ണ്ടെ​ങ്കി​ലും അത്‌ ഒത്തിരി ആവേശം നിറഞ്ഞ​താണ്‌. ഒരു ഉദാഹ​രണം പറയാം. 1990-വരെ പ്രസി​ദ്ധീ​ക​ര​ണ​ങ്ങൾക്ക്‌ ഒരു നിശ്ചി​ത​തുക സംഭാവന മേടി​ക്കുന്ന രീതി​യാണ്‌ നമുക്കു​ണ്ടാ​യി​രു​ന്നത്‌. എന്നാൽ അന്നു മുതൽ സംഘടന അതിനു മാറ്റം വരുത്താൻ തീരു​മാ​നി​ച്ചു. ഇക്കാര്യ​ത്തിൽ സഹായി​ക്കാൻ നിയമ​വി​ഭാ​ഗ​ത്തോ​ടാണ്‌ ആവശ്യ​പ്പെ​ട്ടത്‌. പിന്നെ​യ​ങ്ങോട്ട്‌ പണം ഈടാ​ക്കാ​തെ യഹോ​വ​യു​ടെ സാക്ഷികൾ പ്രസി​ദ്ധീ​ക​ര​ണങ്ങൾ കൊടു​ക്കാൻ തുടങ്ങി. ഈ ക്രമീ​ക​രണം ബഥേലി​ലെ​യും വയലി​ലെ​യും നമ്മുടെ പല പ്രവർത്ത​ന​ങ്ങ​ളും കൂടുതൽ എളുപ്പ​മാ​ക്കി. അതിലൂ​ടെ നികു​തി​യു​മാ​യി ബന്ധപ്പെട്ട പല പ്രശ്‌നങ്ങൾ ഒഴിവാ​ക്കാ​നും കഴിഞ്ഞു. ചിലർ ചിന്തി​ച്ചത്‌ ഈ മാറ്റം കാരണം നമുക്ക്‌ ആവശ്യ​ത്തിന്‌ പണമി​ല്ലാ​തെ വരുക​യും അതു പ്രസം​ഗ​പ്ര​വർത്ത​നത്തെ മോശ​മാ​യി ബാധി​ക്കു​ക​യും ചെയ്യും എന്നാണ്‌. എന്നാൽ നേരെ തിരി​ച്ചാണ്‌ സംഭവി​ച്ചത്‌. 1990 മുതൽ ഇന്നു വരെയുള്ള കണക്കു നോക്കി​യാൽ യഹോ​വ​യു​ടെ സാക്ഷി​ക​ളു​ടെ എണ്ണം ഇരട്ടി​യിൽ അധിക​മാ​യി​രി​ക്കു​ന്നു. ജീവൻ രക്ഷിക്കുന്ന ആത്മീയ ഭക്ഷണം ഇപ്പോൾ സൗജന്യ​മാ​യി എല്ലാവർക്കും ലഭ്യമാണ്‌. യഹോ​വ​യു​ടെ സഹായം​കൊ​ണ്ടും തന്റെ വിശ്വസ്‌ത അടിമ​യി​ലൂ​ടെ യഹോവ നിർദേ​ശങ്ങൾ തരുന്ന​തു​കൊ​ണ്ടും ആണ്‌ സംഘട​ന​യ്‌ക്ക്‌ ഇത്ര വലിയ മാറ്റങ്ങൾ വളരെ വിജയ​ക​ര​മാ​യി കൊണ്ടു​വ​രാൻ പറ്റുന്ന​തെന്ന്‌ എനിക്ക്‌ ഉറപ്പിച്ചു പറയാ​നാ​കും.—പുറ. 15:2; മത്താ. 24:45.

നമുക്കു ലഭിച്ച നിയമ​വി​ജ​യ​ങ്ങ​ളു​ടെ കാരണം അഭിഭാ​ഷ​ക​രു​ടെ കഴിവു മാത്രമല്ല. മിക്ക​പ്പോ​ഴും യഹോ​വ​യു​ടെ സാക്ഷി​ക​ളു​ടെ നല്ല പെരു​മാ​റ്റ​മാണ്‌ ജഡ്‌ജി​മാ​രെ​യും മറ്റു ഗവൺമെന്റ്‌ അധികാ​രി​ക​ളെ​യും സ്വാധീ​നി​ക്കു​ന്നത്‌. അതിന്‌ ഒരു ഉദാഹ​രണം എനിക്ക്‌ 1998-ൽ നേരിൽ കാണാ​നാ​യി. അന്ന്‌ ക്യൂബ​യിൽ നടന്ന ചില പ്രധാ​ന​പ്പെട്ട കൺ​വെൻ​ഷ​നു​ക​ളിൽ പങ്കെടു​ക്കാൻ മൂന്ന്‌ ഭരണസം​ഘാം​ഗ​ങ്ങ​ളും അവരുടെ ഭാര്യ​മാ​രും വന്നു. നമ്മൾ രാഷ്ട്രീ​യ​മാ​യി നിഷ്‌പ​ക്ഷ​രാ​ണെന്ന്‌ അവിടത്തെ അധികാ​രി​കളെ ബോധ്യ​പ്പെ​ടു​ത്തി​യത്‌ അവരു​മാ​യി ഞങ്ങൾ നടത്തിയ ചർച്ചകൾ ആയിരു​ന്നില്ല, പകരം ആ വന്ന സഹോ​ദ​ര​ങ്ങ​ളു​ടെ ദയയോ​ടെ​യും ആദര​വോ​ടെ​യും ഉള്ള പെരു​മാ​റ്റ​മാ​യി​രു​ന്നു.

എങ്കിലും ചില​പ്പോൾ നമുക്കു നീതി ലഭിക്കാൻ കോട​തി​യിൽപോ​യി ‘സന്തോ​ഷ​വാർത്ത​യ്‌ക്കു​വേണ്ടി വാദി​ക്കു​ക​യും അതു നിയമ​പ​ര​മാ​യി സ്ഥാപി​ച്ചെ​ടു​ക്കു​ക​യും’ ചെയ്യേ​ണ്ടി​വ​ന്നേ​ക്കാം. (ഫിലി. 1:7) ഉദാഹ​ര​ണ​ത്തിന്‌, വർഷങ്ങ​ളോ​ളം യൂറോ​പ്പി​ലെ​യും ദക്ഷിണ കൊറി​യ​യി​ലെ​യും അധികാ​രി​കൾ സൈനി​ക​സേ​വനം നിര​സിക്കാനുള്ള നമ്മുടെ അവകാശം അംഗീ​ക​രി​ച്ചി​രു​ന്നില്ല. അതു​കൊണ്ട്‌ മനസ്സാ​ക്ഷി​പ​ര​മായ കാരണ​ങ്ങ​ളാൽ സൈനി​ക​സേ​വനം ചെയ്യാ​ത്ത​തി​ന്റെ പേരിൽ യൂറോ​പ്പി​ലെ 18,000-ത്തോളം സഹോ​ദ​ര​ങ്ങൾക്കും ദക്ഷിണ കൊറി​യ​യി​ലെ 19,000-ത്തിലധി​കം സഹോ​ദ​ര​ങ്ങൾക്കും ജയിലിൽ കഴി​യേ​ണ്ടി​വന്നു.

പക്ഷേ, അവസാനം 2011 ജൂലൈ 7-ന്‌ ബയാറ്റ്യാൻ Vs അർമേ​നിയ കേസിൽ യൂറോ​പ്യൻ മനുഷ്യാ​വ​കാശ കോട​തി​യു​ടെ ചരി​ത്ര​പ്ര​ധാ​ന​മായ ഒരു വിധി വന്നു. എല്ലാ യൂറോ​പ്യൻ രാജ്യ​ങ്ങ​ളി​ലും സൈനി​ക​സേ​വ​ന​ത്തി​നു പകരമുള്ള ജോലി​കൾ ചെയ്യാൻ ആളുകൾക്ക്‌ അവകാ​ശ​മു​ണ്ടെന്ന്‌ കോടതി വിധിച്ചു. അതിനു ശേഷം 2018 ജൂൺ 28-ന്‌ ദക്ഷിണ കൊറി​യ​യി​ലെ പ്രധാ​ന​പ്പെട്ട ഒരു കോട​തി​യും സമാന​മായ ഒരു വിധി പ്രഖ്യാ​പി​ച്ചു. നമ്മുടെ ചെറു​പ്പ​ക്കാ​രായ സഹോ​ദ​ര​ന്മാ​രിൽ കുറച്ച്‌ പേരെ​ങ്കി​ലും അവരുടെ നിലപാ​ടിൽ വിട്ടു​വീഴ്‌ച വരുത്തി​യി​രു​ന്നെ​ങ്കിൽ ഈ വിജയ​ങ്ങ​ളൊ​ന്നും നമുക്കു ലഭിക്കി​ല്ലാ​യി​രു​ന്നു.

ലോകാ​സ്ഥാ​ന​ത്തേ​യും ഓരോ ബ്രാഞ്ചി​ലെ​യും നിയമ​വി​ഭാ​ഗങ്ങൾ ദൈവ​രാ​ജ്യ​പ്ര​വർത്ത​ന​ങ്ങൾക്കു​വേണ്ടി രാവും പകലും അധ്വാ​നി​ക്കു​ന്നു. ഗവൺമെ​ന്റു​ക​ളിൽനിന്ന്‌ എതിർപ്പ്‌ നേരി​ടുന്ന സഹോ​ദ​ര​ങ്ങൾക്കു​വേണ്ടി വാദി​ക്കാ​നാ​കു​ന്നത്‌ ഒരു വലിയ പദവി​യാ​യാണ്‌ ഞങ്ങൾ കാണു​ന്നത്‌. നമ്മൾ വിജയി​ച്ചാ​ലും ഇല്ലെങ്കി​ലും ഇത്തരം കേസുകൾ ഗവർണർമാർക്കും രാജാ​ക്ക​ന്മാർക്കും ജനതകൾക്കും ഒരു വലിയ സാക്ഷ്യം കൊടു​ക്കു​ന്നു. (മത്താ. 10:18) കേസു​മാ​യി ബന്ധപ്പെട്ട്‌ നമ്മൾ സമർപ്പി​ക്കുന്ന രേഖക​ളി​ലും കോട​തി​യിൽ നടത്തുന്ന വാദങ്ങ​ളി​ലും തിരു​വെ​ഴു​ത്തു​കൾ ഉപയോ​ഗി​ക്കു​ന്ന​തു​കൊണ്ട്‌ ജഡ്‌ജി​മാർക്കും ഗവൺമെന്റ്‌ അധികാ​രി​കൾക്കും വാർത്താ​മാ​ധ്യ​മ​ങ്ങൾക്കും പൊതു​ജ​ന​ത്തി​നും ഈ വാക്യങ്ങൾ പരി​ശോ​ധി​ക്കേ​ണ്ടി​വ​രും. ആത്മാർഥ​ഹൃ​ദ​യ​രായ ആളുകൾ യഹോ​വ​യു​ടെ സാക്ഷികൾ ആരാ​ണെ​ന്നും അവരുടെ വിശ്വാ​സ​ത്തി​ന്റെ അടിസ്ഥാ​നം എന്താ​ണെ​ന്നും അതിലൂ​ടെ മനസ്സി​ലാ​ക്കും. അങ്ങനെ​യു​ള്ള​വ​രിൽ ചിലർ നമ്മുടെ സഹോ​ദ​ര​ങ്ങൾപോ​ലും ആയിട്ടുണ്ട്‌.

യഹോവേ നന്ദി!

കഴിഞ്ഞ 40-ലധികം വർഷമാ​യി ഞാൻ നിയമ​വി​ഭാ​ഗ​ത്തോ​ടൊ​പ്പം സേവി​ക്കു​ക​യാണ്‌. ലോക​മെ​ങ്ങു​മുള്ള ബ്രാ​ഞ്ചോ​ഫീ​സു​ക​ളോ​ടൊ​പ്പം ചേർന്ന്‌ പ്രവർത്തി​ക്കാ​നും ഒരുപാട്‌ ഹൈ​ക്കോ​ട​തി​ക​ളു​ടെ​യും ഉന്നത അധികാ​രി​ക​ളു​ടെ​യും മുമ്പാകെ വാദി​ക്കാ​നും കഴിഞ്ഞത്‌ ഒരു വലിയ പദവി​യാ​യി ഞാൻ കാണുന്നു. ലോകാ​സ്ഥാ​ന​ത്തെ​യും മറ്റു ബ്രാഞ്ചു​ക​ളി​ലെ​യും നിയമ​വി​ഭാ​ഗ​ങ്ങ​ളിൽ സേവി​ക്കുന്ന എന്റെ പ്രിയ സഹോ​ദ​ര​ങ്ങളെ ഞാൻ ഒരുപാട്‌ സ്‌നേ​ഹി​ക്കു​ന്നു. അവരുടെ കഠിനാ​ധ്വാ​നം ഞാൻ എപ്പോ​ഴും ഓർക്കും. തിരി​ഞ്ഞു​നോ​ക്കു​മ്പോൾ അനു​ഗ്ര​ഹങ്ങൾ നിറഞ്ഞ, സംതൃ​പ്‌തി​യുള്ള ഒരു ജീവി​ത​മാ​യി​രു​ന്നു എന്റേത്‌ എന്ന്‌ എനിക്കു പറയാ​നാ​കും.

കഴിഞ്ഞ 45 വർഷമാ​യി നല്ല സമയത്തും മോശം സമയത്തു​മെ​ല്ലാം എലിസ​ബത്ത്‌ സ്‌നേ​ഹ​ത്തോ​ടെ വിശ്വ​സ്‌ത​മാ​യി എന്നെ പിന്തു​ണ​യ്‌ക്കു​ന്നു. പ്രതി​രോ​ധ​ശ​ക്തി​യെ ബാധി​ക്കുന്ന ഒരു രോഗം ഉള്ളതു​കൊണ്ട്‌ അവൾക്ക്‌ ആരോ​ഗ്യം കുറവാണ്‌. എന്നിട്ടും അവൾ എപ്പോ​ഴും എനി​ക്കൊ​രു താങ്ങായി നിന്നി​ട്ടുണ്ട്‌.

നമുക്കു ശക്തി തരുന്ന​തും വിജയം നേടി​ത്ത​രു​ന്ന​തും നമ്മു​ടെ​തന്നെ കഴിവു​ക​ള​ല്ലെന്ന്‌ ഞങ്ങൾ സ്വന്തം ജീവി​ത​ത്തിൽനിന്ന്‌ മനസ്സി​ലാ​ക്കി. ദാവീദ്‌ പറഞ്ഞതു​പോ​ലെ ‘യഹോ​വ​യാണ്‌ തന്റെ ജനത്തിന്റെ ബലം.’ (സങ്കീ. 28:8) അതെ, “യുദ്ധം യഹോ​വ​യു​ടേ​താണ്‌.”