ഇന്നത്തെ കളിപ്പാ​ട്ടങ്ങൾ—അവ നമ്മുടെ കുട്ടി​കളെ എന്തു പഠിപ്പി​ക്കു​ന്നു?

കുട്ടികൾ സ്വതവേ കളി​പ്രി​യ​രാണ്‌. കുട്ടി​കൾക്കു വേണ്ടി കളി​ക്കോ​പ്പു​കൾ തിര​ഞ്ഞെ​ടു​ക്കൽ (ഇംഗ്ലീഷ്‌) എന്ന പുസ്‌തകം പറയു​ന്ന​ത​നു​സ​രിച്ച്‌ ആരോ​ഗ്യ​മുള്ള കുട്ടികൾ “പര്യ​വേ​ഷ​ണ​ത്തി​ന്റേ​തും സങ്കൽപ്പ​ത്തി​ന്റേ​തു​മായ സ്വന്തം ലോകങ്ങൾ സ്വതഃ​സി​ദ്ധ​മാ​യി കെട്ടി​പ്പ​ടു​ക്കു​ന്നു.” ഇത്‌ പുരാതന കാലങ്ങ​ളി​ലും സത്യമാ​യി​രു​ന്നു. കുട്ടികൾ ‘നഗരവീ​ഥി​ക​ളിൽ കളി’ക്കുന്നതു സാധാരണ കാഴ്‌ച​യാ​യി​രു​ന്നു. (സെഖര്യാ​വു 8:5) അത്തരം കളിക​ളിൽ പലപ്പോ​ഴും നിർമാ​ണാ​ത്മ​ക​വും ഭാവനാ​പ​ര​വു​മായ ലീലാ​വി​ലാ​സങ്ങൾ ഉൾപ്പെ​ട്ടി​രു​ന്നു.—താരത​മ്യം ചെയ്യുക: മത്തായി 11:16, 17.

അപ്പോൾ കളിയെ കുട്ടി​ക​ളു​ടെ ജോലി​യെന്നു വിളി​ച്ചി​രി​ക്കു​ന്നത്‌ ഉചിത​മാണ്‌. അത്‌ സത്യമാ​ണെ​ങ്കിൽ കളിപ്പാ​ട്ട​ങ്ങളെ അവരുടെ പണിയാ​യു​ധ​ങ്ങ​ളെ​ന്നും വിളി​ക്കാം. മാതാ​പി​താ​ക്കൾ (ഇംഗ്ലീഷ്‌) എന്ന മാഗസിൻ ഇപ്രകാ​രം പറയുന്നു: “കുട്ടികൾ ലോക​ത്തെ​ക്കു​റി​ച്ചു പഠിക്കു​ന്നത്‌ കളിയി​ലൂ​ടെ​യാണ്‌. . . . കളി​ക്കോ​പ്പു​ക​ളു​പ​യോ​ഗി​ച്ചു കളിക്കു​മ്പോൾ ലോകം കുട്ടി​യു​ടെ എത്തുപാ​ടി​ലാ​കു​ന്നു. അതു കുട്ടി​യു​ടെ കൈപ്പി​ടി​യി​ലൊ​തു​ങ്ങു​ന്നു. കളി പേശി​ക​ളു​ടെ​യും ഏകോ​പ​ന​പ്ര​വർത്ത​ന​ത്തി​ന്റെ​യും വികാസം സാധ്യ​മാ​ക്കു​ന്നു, സംസർഗ​പ്രി​യത്തെ ഊട്ടി​യു​റ​പ്പി​ക്കു​ന്നു, യാഥാർഥ്യ​വും സങ്കൽപ്പ​വും തമ്മിലുള്ള അതിർവ​ര​മ്പു​കളെ വിവേ​ചി​ച്ച​റി​യാൻ ഇടയാ​ക്കു​ന്നു. അന്യോ​ന്യം ആശയവി​നി​യമം നടത്താ​നും കാര്യങ്ങൾ മാറി​മാ​റി ചെയ്യാ​നും പങ്കുവ​യ്‌ക്കാ​നും കുട്ടി​കളെ സഹായി​ക്കു​ന്നു. കളി ഭാവനയെ ഉത്തേജി​പ്പി​ക്കു​ക​യും പ്രശ്‌നങ്ങൾ പരിഹ​രി​ക്കു​ന്ന​തിൽ അനുഭ​വ​പ​രി​ചയം പ്രദാനം ചെയ്യു​ക​യും ചെയ്യുന്നു.”

ബൈബിൾകാ​ല​ങ്ങ​ളി​ലും കുട്ടി​കൾക്ക്‌ കളി​ക്കോ​പ്പു​കൾ പ്രധാ​ന​മാ​യി​രു​ന്നു. ഇസ്രാ​യേ​ലിൽ നടത്തിയ പുരാ​വ​സ്‌തു ഗവേഷ​ണങ്ങൾ കളി​ക്കോ​പ്പു​ക​ളു​ടെ മൂല്യ​വ​ത്തായ ഒരു കണ്ടുപി​ടി​ത്ത​ത്തി​ലേക്കു നയിച്ചു. കിലു​ക്കാം​പെ​ട്ടി​കൾ, പീപ്പികൾ, കൊച്ചു മൺപാ​ത്രങ്ങൾ, രഥങ്ങൾ എന്നിങ്ങനെ പലതും കുഴി​ച്ചെ​ടു​ക്ക​പ്പെട്ടു. ദ വേൾഡ്‌ ബുക്ക്‌ എൻ​സൈ​ക്ലോ​പീ​ഡിയ ഇപ്രകാ​രം പ്രസ്‌താ​വി​ക്കു​ന്നു: “പുരാതന ആഫ്രി​ക്ക​യിൽ കുട്ടി​കൾക്ക്‌ പന്ത്‌, മൃഗരൂ​പ​ത്തി​ലുള്ള കളി​ക്കോ​പ്പു​കൾ, വലിച്ചു​കൊ​ണ്ടു നടക്കാ​വുന്ന കളിപ്പാ​ട്ടങ്ങൾ എന്നിവ ഉണ്ടായി​രു​ന്നു. പുരാതന ഗ്രീസ്സി​ലെ​യും റോമി​ലെ​യും കുട്ടികൾ വഞ്ചികൾ, കൊച്ചു വണ്ടികൾ, വളയങ്ങൾ, പമ്പരങ്ങൾ എന്നിവ ഉപയോ​ഗി​ച്ചു കളിച്ചി​രു​ന്നു. യൂറോ​പ്പിൽ മധ്യകാ​ല​യു​ഗ​ങ്ങ​ളിൽ കളിമണ്ണു വട്ടുകൾ, കിലു​ക്കാം​പെ​ട്ടി​കൾ, പാവകൾ എന്നിവ ജനപ്രീ​തി​യാർജിച്ച കളി​ക്കോ​പ്പു​ക​ളാ​യി​രു​ന്നു.”

ഉത്തേജ​നാ​ത്മ​ക​വും രസാവ​ഹ​വും വിദ്യാ​ഭ്യാ​സ​പ​ര​വു​മായ കളി​ക്കോ​പ്പു​കൾ ഇന്നും ഒരു പ്രധാന പങ്കു വഹിക്കു​ന്നു. എന്നാൽ ഗുണക​ര​മോ എന്നു സംശയി​ക്കേ​ണ്ടി​യി​രി​ക്കുന്ന കളി​ക്കോ​പ്പു​ക​ളു​ടെ ഒരു പ്രളയം തന്നെ ഇപ്പോൾ വിപണി​യി​ലുണ്ട്‌. ടൈം മാസി​ക​യു​ടെ 1992-ലെ ഒരു ലേഖനം ഇപ്രകാ​രം പറയുന്നു: “നിങ്ങൾ നല്ലതും ആരോ​ഗ്യാ​വ​ഹ​വു​മായ വിനോ​ദ​മാണ്‌ തിരയു​ന്ന​തെ​ങ്കിൽ ഈ വർഷം പുറത്തി​റ​ങ്ങുന്ന കളിപ്പാ​ട്ട​ങ്ങ​ളി​ലേക്കു നോക്കു​കയേ വേണ്ട. മിക്കവാ​റും എല്ലാ വൻ നിർമാ​താ​ക്ക​ളും അറപ്പു തോന്നി​ക്കുന്ന കാര്യ​ങ്ങൾക്കാണ്‌ ഊന്നൽ കൊടു​ക്കു​ന്നത്‌.” “എത്രയും അറപ്പു തോന്നി​ക്കും​വി​ധം” കുട്ടി​കൾക്ക്‌ രൂപകൽപ്പന ചെയ്യാൻ കഴിയുന്ന സാധാരണ വലിപ്പ​ത്തി​ലുള്ള പ്ലാസ്‌റ​റിക്‌ തലയോ​ട്ടി​യാണ്‌ ഒരു കൂട്ടം കളിപ്പാ​ട്ട​ങ്ങ​ളു​ടെ കൂട്ടത്തിൽ ഉണ്ടായി​രു​ന്നത്‌. ഛർദി പോലുള്ള ശാരീ​രിക പ്രവർത്ത​ന​ങ്ങളെ അനുക​രി​ക്കുന്ന കളിപ്പാ​ട്ട​ങ്ങ​ളും വിൽപ്പ​ന​യ്‌ക്കുണ്ട്‌. ഈ കളിപ്പാ​ട്ടങ്ങൾ വാങ്ങുന്ന കാര്യ​ത്തിൽ മാതാ​പി​താ​ക്ക​ളും കുട്ടി​ക​ളും ഒരു​പോ​ലെ ഉഗ്രമായ സമ്മർദ​ത്തിന്‌ വിധേ​യ​രാണ്‌.

കുട്ടി​കൾക്കു വിൽക്കൽ

“കുട്ടി​കൾക്ക്‌ എന്തെങ്കി​ലും വിൽക്കു​ന്നത്‌ മരണക​ര​മായ ഒരു കുററ​മാ​യി” പുരാതന “ഹമ്മുറാ​ബി നിയമ​സം​ഹിത കണക്കാക്കി”യിരു​ന്ന​താ​യി പീഡി​യാ​ട്രി​ക്‌സ്‌ ഇൻ റിവ്യൂ എന്ന ജേർണൽ പറയുന്നു. എന്നിരു​ന്നാ​ലും, പെരുത്ത വിലയുള്ള തങ്ങളുടെ സാമാ​നങ്ങൾ കാപട്യം എന്തെന്ന്‌ അറിഞ്ഞു​കൂ​ടാത്ത കുഞ്ഞു​ങ്ങൾക്ക്‌ വിററ​ഴി​ക്കു​ന്ന​തിൽ ഇന്നത്തെ കളിപ്പാ​ട്ട​നിർമാ​താ​ക്കൾക്കും പരസ്യ​ക്കാർക്കും ഒരു കൂസലു​മില്ല. സങ്കീർണ​മായ ഗവേഷ​ണ​വി​ദ്യ​ക​ളു​പ​യോ​ഗിച്ച്‌ കളിപ്പാ​ട്ട​നിർമാ​താ​ക്കൾ കുട്ടി​ക​ളു​ടെ മനസ്സു​ക​ളി​ലേക്ക്‌ ഊളി​യി​ട്ടി​റ​ങ്ങു​ന്നു. ഉൽപ്പന്ന​ങ്ങ​ളിൽ തുടർച്ച​യായ മാററങ്ങൾ വരുത്തി​ക്കൊണ്ട്‌ അവർക്ക്‌ കഴിഞ്ഞ​വർഷത്തെ സാധനങ്ങൾ പഴഞ്ചനാ​ണെ​ന്നും ഈ വർഷത്തെ സാധനങ്ങൾ ഒഴിച്ചു​കൂ​ടാൻ പററാ​ത്ത​വ​യാ​ണെ​ന്നും തോന്നി​പ്പി​ക്കാൻ കഴിയും.

കളിപ്പാട്ട വ്യവസാ​യം ടെലി​വി​ഷന്റെ സ്വാധീ​ന​ത്തെ​യും പൂർണ​മാ​യി പ്രയോ​ജ​ന​പ്പെ​ടു​ത്തു​ന്നു. ഐക്യ​നാ​ടു​ക​ളിൽ, കുട്ടി​കൾക്കു​വേ​ണ്ടി​യുള്ള ടെലി​വി​ഷൻ പരിപാ​ടി​ക​ളിൽ കളിപ്പാട്ട പരസ്യ​ങ്ങ​ളു​ടെ പ്രളയ​മാണ്‌. ക്യാമറാ ടെക്‌നി​ക്കു​ക​ളാ​ലും ദൃശ്യ-ശബ്ദ ഫലങ്ങളാ​ലും ആവേശം കൊള്ളി​ക്കുന്ന സംഗീ​ത​ത്താ​ലും പരസ്യങ്ങൾ തീരെ താണതരം കളിപ്പാ​ട്ടങ്ങൾ മാന്ത്രി​ക​ശ​ക്തി​യു​ള്ള​തും ആവേശ​ക​ര​വു​മാ​ണെന്നു തോന്നി​പ്പി​ക്കു​ന്നു. മുതിർന്ന​വ​രിൽ പലരും അത്തരം ഉപായങ്ങൾ കണ്ടു മനസ്സി​ലാ​ക്കു​മെ​ങ്കി​ലും “പരസ്യങ്ങൾ പറയു​ന്നത്‌ സത്യമാ​ണെന്നു കൊച്ചു​കു​ട്ടി​കൾ വിശ്വ​സി​ക്കു​ന്നു.”—പീഡി​യാ​ട്രി​ക്‌സ്‌ ഇൻ റിവ്യൂ.

കുട്ടി​കൾക്കു​വേ​ണ്ടി​യുള്ള ടെലി​വി​ഷൻ പരിപാ​ടി​ക​ളിൽ പലതും വാസ്‌ത​വ​ത്തിൽ പരസ്യ​ങ്ങ​ളാണ്‌. ശിശു​ശാ​സ്‌ത്ര​ത്തി​ലെ കാലി​ക​പ്ര​ശ്‌നങ്ങൾ (ഇംഗ്ലീഷ്‌) എന്ന പ്രസി​ദ്ധീ​ക​രണം പറയു​ന്ന​ത​നു​സ​രിച്ച്‌ അത്തരം പരിപാ​ടി​കൾ “കുട്ടി​ക​ളു​ടെ ജീവി​ത​ത്തി​നു വിദ്യ പകർന്നു​കൊ​ടു​ക്കു​ന്ന​തി​നോ അതു ധന്യമാ​ക്കു​ന്ന​തി​നോ പകരം കളിപ്പാ​ട്ട​വിൽപ്പ​ന​യ്‌ക്കു വേണ്ടി സംവി​ധാ​നം ചെയ്‌തി”ട്ടുള്ളവ​യാണ്‌. ഉദാഹ​ര​ണ​ത്തിന്‌, ടീനേജ്‌ മ്യൂട്ടൻറ്‌ നീൻജ ററർട്ടിൽസ്‌ എന്ന പരിപാ​ടി “70-ലധികം ഉത്‌പ​ന്ന​ങ്ങ​ളെ​യും ഒരു പ്രഭാ​ത​ഭക്ഷണ ധാന്യ​ത്തെ​യും ഒരു ചലച്ചി​ത്ര​ത്തെ​യും” പരസ്യ​പ്പെ​ടു​ത്തി​യി​രി​ക്കു​ന്നു.

“പരസ്യങ്ങൾ കാണുന്ന കുട്ടികൾ അവയിൽ കാണുന്ന സാധനങ്ങൾ വാങ്ങാ​നാ​യി മാതാ​പി​താ​ക്ക​ളോ​ടു നിർബന്ധം പിടി​ക്കു​ന്ന​താ​യി പല പഠനങ്ങ​ളും പ്രകട​മാ​ക്കു​ന്നു” എന്ന്‌ പീഡി​യാ​ട്രി​ക്‌സ്‌ ഇൻ റിവ്യൂ പറയുന്നു. ഒരു അന്താരാ​ഷ്‌ട്ര കളിപ്പാ​ട്ട​ക്ക​മ്പ​നി​യു​ടെ സ്ഥാപകൻ ഇപ്രകാ​രം പറയുന്നു: “മാതാ​പി​താ​ക്ക​ളു​ടെ വസ്‌ത്രം പിടി​ച്ചു​വ​ലി​ക്കുന്ന കുട്ടി​കളെ നിരീ​ക്ഷി​ക്കുക. അവർ എന്താണ്‌ പറയു​ന്ന​തെന്നു നിങ്ങൾക്ക​റി​യാം: ‘ആ കളിപ്പാ​ട്ടം തന്നി​ല്ലെ​ങ്കിൽ ഞാൻ മരിക്കും.’” അപ്പോൾ കാനഡ​യിൽ മാത്ര​മാ​യി ആളുകൾ ഓരോ വർഷവും കുട്ടി​കൾക്കും പേരക്കു​ട്ടി​കൾക്കും സുഹൃ​ത്തു​ക്കൾക്കു​മാ​യി കളിപ്പാ​ട്ടങ്ങൾ വാങ്ങാൻ 120 കോടി ഡോള​റി​ല​ധി​കം ചെലവ​ഴി​ക്കു​ന്നത്‌ അതിശ​യമല്ല.

യുദ്ധമാ​തൃ​ക​യി​ലുള്ള കളികൾ

യുദ്ധമാ​തൃ​ക​യി​ലുള്ള വീഡി​യോ കളികൾ കളിപ്പാട്ട വ്യവസാ​യ​ത്തിൽ മുൻനി​ര​യിൽ വരുന്നു. അത്തരം കളികൾ പ്രശ്‌ന​പ​രി​ഹാര പ്രാപ്‌തി​യും കണ്ണി​ന്റെ​യും കയ്യു​ടെ​യും ഏകോ​പ​ന​പ്രാ​പ്‌തി​യും പേശീ വൈദ​ഗ്‌ധ്യ​ങ്ങ​ളും വികസി​പ്പി​ക്കു​ക​യും അതേസ​മയം ജിജ്ഞാ​സയെ ഉണർത്തു​ക​യും ചെയ്യു​ന്നു​വെന്ന്‌ അവയുടെ വക്താക്കൾ അവകാ​ശ​പ്പെ​ടു​ന്നു. “ശരിയാം​വണ്ണം ഉപയോ​ഗി​ച്ചാൽ ഒരു ഇലക്‌​ട്രോ​ണിക്‌ കളിപ്പാ​ട്ടം നിരു​പ​ദ്ര​വ​ക​ര​വും വിദ്യാ​ഭ്യാ​സ​പരം പോലും ആയിരി​ക്കാൻ കഴിയും” എന്ന്‌ ദ ടൊ​റൊ​ന്റോ സ്‌ററാ​റി​ലെ ഒരു ലേഖനം പറയുന്നു. ‘എന്നാൽ മിക്ക​പ്പോ​ഴും അത്‌ കുട്ടിയെ മററു​ള്ള​വ​രിൽനിന്ന്‌ ഒററ​പ്പെ​ടു​ത്തുന്ന ഒരു പ്രവർത്തനം, ഒരു ഭ്രമം പോലും, ആണ്‌’ എന്ന്‌ ആ പത്രം സമ്മതി​ക്കു​ന്നു.

യുദ്ധമാ​തൃ​ക​യി​ലുള്ള വീഡി​യോ കളികൾ കാണു​ന്നത്‌ ഒരു ഭ്രമമാ​യി​ത്തീർന്ന ഒരു കുട്ടി​യു​ടെ കാര്യം പരിചി​ന്തി​ക്കുക. അവന്റെ അമ്മ പറയുന്നു: “അവന്റെ കാര്യം വിശ്വ​സി​ക്കാൻ ബുദ്ധി​മു​ട്ടാണ്‌—കളിയിൽ എല്ലാവ​രെ​യും കൊന്നു​തീർക്കു​ന്ന​തു​വരെ അവൻ സ്‌ക്രീ​നി​ന്റെ മുന്നിൽനിന്ന്‌ മാറില്ല.” ഈ കുട്ടിക്ക്‌ എത്ര വയസ്സുണ്ട്‌? വെറും രണ്ടു വയസ്സ്‌! ദിവസ​വും നാലു​മു​തൽ അഞ്ചുവരെ മണിക്കൂർ ബട്ടൺ അമർത്തി​യ​മർത്തി അവന്റെ പിഞ്ചു തള്ളവിരൽ കുമി​ള​ച്ചി​രി​ക്കു​ന്നു. എന്നിട്ടും, അമ്മയ്‌ക്ക്‌ ഒരു ഉത്‌ക​ണ്‌ഠ​യും ഇല്ലെന്നു തോന്നു​ന്നു. കൈ​കൊണ്ട്‌ വേഗത്തിൽ ആംഗ്യം കാട്ടി​ക്കൊണ്ട്‌ അവൾ പറയുന്നു: “കളിയി​ലെ​പ്പോ​ലെ എല്ലാം പെട്ടെന്നു ചെയ്‌തു​തീർക്കാൻ അവൻ ആഗ്രഹി​ക്കു​ന്നു എന്ന ഒററ വിഷമമേ എനിക്കു​ള്ളൂ.” കളിക്കു “നല്ല വേഗത​യാണ്‌ . . . , യഥാർഥ ജീവി​ത​ത്തിൽ കാര്യങ്ങൾ അത്ര വേഗത്തിൽ നടക്കില്ല.”

“ഭാവനാ​സൃ​ഷ്ടി​യോ വായന​യോ പരമ്പരാ​ഗ​ത​മായ മററു നേര​മ്പോ​ക്കു​ക​ളോ കൊണ്ട്‌ സ്വയം വിനോ​ദി​ക്കാൻ പഠിക്കു​ന്ന​തിൽനിന്ന്‌” വീഡി​യോ കളികൾ “കുട്ടി​കളെ നിരു​ത്സാ​ഹ​പ്പെ​ടു​ത്തു​ക​യും ഗൃഹപാ​ഠം ചെയ്യു​ന്ന​തിൽനിന്ന്‌ പിന്തി​രി​പ്പി​ക്കു​ക​യും ചെയ്യുന്ന”തായി വീഡി​യോ കളികളെ പ്രതി​കൂ​ലി​ക്കുന്ന ചിലർക്കു തോന്നു​ന്നു എന്ന്‌ ദ ടൊ​റൊ​ന്റോ സ്‌ററാർ പറയുന്നു. ‘വീഡി​യോ കളികൾ വഴിപി​ഴ​പ്പി​ക്കുന്ന ഒരു ഭീഷണി​യാ​ണെ​ന്നും അതിന്‌ കുട്ടി​ക​ളിൽ അക്രമാ​സ​ക്ത​വും മററു​ള്ള​വ​രിൽനിന്ന്‌ ഒററ​പ്പെ​ട്ട​ത​ര​ത്തി​ലു​ള്ള​തു​മായ പെരു​മാ​ററം വളർത്തി​യെ​ടു​ക്കാൻ കഴിയു​മെ​ന്നും’ ചില ശിശു പ്രബോ​ധകർ പറയുന്നു.

1991-ലെ പേർഷ്യൻ ഗൾഫ്‌ യുദ്ധസ​മ​യത്തെ ബോം​ബി​ട​ലു​ക​ളെ​ക്കു​റി​ച്ചുള്ള ടെലി​വി​ഷൻ വാർത്തകൾ അന്ന്‌ സാധാ​ര​ണ​മാ​യി​രുന്ന യുദ്ധക​ളി​ക്കോ​പ്പു​ക​ളു​ടെ ആവശ്യം വർധി​പ്പി​ച്ചു. അബ്രാംസ്‌ ടാങ്കുകൾ, സ്‌കഡ്‌ മി​സൈ​ലു​കൾ, ഹിൻഡ്‌ ഹെലി​കോ​പ്‌റ​റ​റു​കൾ എന്നിവ​യാ​യി​രു​ന്നു ഏററവും പ്രസി​ദ്ധ​മായ ഇനങ്ങൾ. അത്തരം കളി​ക്കോ​പ്പു​കൾ ഉപയോ​ഗി​ച്ചു കളിക്കു​ന്നത്‌ ആക്രമ​ണത്തെ പ്രോ​ത്‌സാ​ഹി​പ്പി​ക്കു​ക​യോ ഒരുപക്ഷേ അക്രമ​ത്തോട്‌ കുട്ടി​കളെ നിർവി​കാ​ര​രാ​ക്കി​ത്തീർക്കു​ക​യോ ചെയ്‌തേ​ക്കാം എന്ന്‌ വിദഗ്‌ധർ ഭയപ്പെ​ടു​ന്നു. എന്തായാ​ലും, അതു ചെയ്യു​ന്നത്‌ യെശയ്യാ 2:4-ലെ ബൈബിൾ വാക്യ​ത്തി​ന്റെ ഉദ്ദേശ്യ​ത്തിന്‌ എതിരാണ്‌. ദൈവ​ജനം “വീണ്ടു​മൊ​രി​ക്ക​ലും യുദ്ധത്തി​നു പരിശീ​ലി​പ്പി​ക്ക​പ്പെ​ട്ടവർ” ആയിരി​ക്കില്ല എന്ന്‌ അത്‌ മുൻകൂ​ട്ടി​പ്പ​റഞ്ഞു.—ദ ന്യൂ ഇംഗ്ലീഷ്‌ ബൈബിൾ.

ഉയർന്ന ശക്തിയുള്ള ജലത്തോ​ക്കു​കൾപോ​ലെ യഥാർഥ​മെന്നു തോന്നി​ക്കുന്ന കളിപ്പാ​ട്ടങ്ങൾ യഥാർഥ​ത്തിൽ അക്രമ​ത്തി​നു തുടക്ക​മി​ട്ടി​ട്ടുള്ള സംഭവ​ങ്ങ​ളുണ്ട്‌. ഒരു വടക്കേ അമേരി​ക്കൻ പട്ടണത്തിൽ ഉയർന്ന ശക്തിയുള്ള പ്ലാസ്‌റ​റിക്‌ ജലത്തോ​ക്കു​പ​യോ​ഗി​ച്ചുള്ള ഏററു​മു​ട്ടൽ യഥാർഥ വെടി​വെ​യ്‌പി​ലേക്കു തന്നെ നയിച്ചു. അത്‌ ഒരു 15 വയസ്സു​കാ​രന്റെ മരണത്തിൽ കലാശി​ച്ചു. മറെറാ​രു സംഭവ​ത്തിൽ, ജലത്തോ​ക്കു​ക​ളാൽ നനഞ്ഞു കുതിർന്ന കുപി​ത​നായ ഒരു തോക്കു​ധാ​രി രണ്ടു യുവാ​ക്കളെ മുറി​വേൽപ്പി​ച്ചു. കാഴ്‌ച​യിൽ നിരു​പ​ദ്ര​വ​ക​ര​മെന്നു തോന്നി​യേ​ക്കാ​വുന്ന ജലത്തോ​ക്കു​പ​യോ​ഗി​ച്ചുള്ള പോരാ​ട്ടങ്ങൾ എണ്ണമററ മററ്‌ അക്രമ സംഭവ​ങ്ങൾക്കു വഴി​തെ​ളി​ച്ചി​ട്ടുണ്ട്‌.

നിങ്ങള​റി​യി​ക്കുന്ന സന്ദേശം

ഉത്തരവാ​ദി​ത്വ​ബോ​ധ​മുള്ള മാതാ​പി​താ​ക്ക​ളാ​രും തന്നെ യഥാർഥ​ത്തിൽ അക്രമത്തെ അംഗീ​ക​രി​ക്കു​ന്നില്ല. എന്നിട്ടും, യുദ്ധക​ളി​ക്കോ​പ്പു വ്യവസാ​യം തഴച്ചു​വ​ള​രു​ക​യാണ്‌. കുട്ടി​യു​ടെ അമർഷം നേരി​ടു​ന്ന​തി​നു പകരം ചില​പ്പോൾ മാതാ​പി​താ​ക്കൾ അവരുടെ സ്വന്തം വിശ്വാ​സ​ങ്ങളെ അനുര​ഞ്‌ജ​ന​പ്പെ​ടു​ത്താൻ തയ്യാറാ​വു​ന്നു. എന്നാൽ അതു ചെയ്യു​ക​വഴി അവർ കുട്ടി​യോട്‌ ഒരു വലിയ ദ്രോഹം ചെയ്യു​ക​യാ​യി​രി​ക്കാം. മാനസി​കാ​രോ​ഗ്യ ഗവേഷ​ക​യായ കാനഡ​ക്കാ​രി സൂസൻ ഗോൾഡ്‌ബെർഗ്‌ ഇപ്രകാ​രം വാദി​ക്കു​ന്നു: “നാം കുട്ടി​കൾക്ക്‌ കളിപ്പാ​ട്ടങ്ങൾ കൊടു​ക്കു​മ്പോൾ അവ എന്തിനെ പ്രതി​നി​ധീ​ക​രി​ക്കു​ന്നു​വോ അതിനെ നാം അംഗീ​ക​രി​ക്കു​ന്നു​വെന്നു സൂചന കൊടു​ക്കു​ക​യാണ്‌.” ചില​പ്പോ​ഴൊ​ക്കെ അക്രമ സ്വഭാവം പ്രകടി​പ്പി​ക്കു​ന്നത്‌ ചില കുട്ടി​കളെ സംബന്ധി​ച്ചി​ട​ത്തോ​ളം സ്വാഭാ​വി​കം മാത്ര​മാ​ണെ​ന്നു​ള്ളത്‌ സത്യമാണ്‌. ഒരു മനഃശാ​സ്‌ത്രജ്ഞ ഇപ്രകാ​രം വാദി​ക്കു​ന്നു: “കളി​ത്തോ​ക്കു​കൾ ഇല്ലെങ്കിൽ കുട്ടികൾ സ്വന്തം തോക്കു​കൾ ഉണ്ടാക്കു​ന്നു, കൈവി​ര​ലു​കൾ ഉപയോ​ഗി​ച്ചു​പോ​ലും.” അതു ശരിയാ​യി​രി​ക്കാം. എന്നാൽ അക്രമാ​യു​ധ​ങ്ങ​ളു​ടെ പകർപ്പു​കൾ കുട്ടി​കൾക്കു പ്രദാനം ചെയ്‌തു​കൊണ്ട്‌ ഒരു മാതാ​വോ പിതാ​വോ അക്രമത്തെ പ്രോ​ത്സാ​ഹി​പ്പി​ക്ക​ണ​മോ?

ഒരു കളി​ത്തോ​ക്കു​പ​യോ​ഗി​ച്ചു കളിച്ച​തു​കൊ​ണ്ടു​മാ​ത്രം യഥാർഥ​ത്തിൽ കുട്ടികൾ ഒരു അക്രമ ജീവിതം നയിക്ക​ണ​മെ​ന്നില്ല എന്നതു ശരിതന്നെ. എന്നാൽ, അത്തരം കളിപ്പാ​ട്ടങ്ങൾ നിങ്ങൾ കുട്ടി​കൾക്കു കൊടു​ത്താൽ എന്തു സന്ദേശ​മാണ്‌ നിങ്ങൾ അവരെ അറിയി​ക്കു​ന്നത്‌? അക്രമം തമാശ​യാ​ണെ​ന്നും കൊല​യും യുദ്ധവും ഒക്കെ ആവേശ​ക​ര​മാ​ണെ​ന്നും അവർ വിശ്വ​സി​ക്കാൻ നിങ്ങളാ​ഗ്ര​ഹി​ക്കു​ന്നു​വോ? ദൈവിക നിലവാ​ര​ങ്ങ​ളോ​ടുള്ള ആദരവ്‌ നിങ്ങൾ അവരെ പഠിപ്പി​ക്കു​ന്നു​ണ്ടോ? “അക്രമം ഇഷ്‌ട​പ്പെ​ടു​ന്ന​വനെ അവിടുന്ന്‌ [ദൈവം] വെറു​ക്കു​ന്നു” എന്ന്‌ അവന്റെ വചനം പറയുന്നു.—സങ്കീർത്തനം 11:5, പി.ഒ.സി. ബൈബിൾ.

‘മാതാ​പി​താ​ക്ക​ളു​ടെ മൗനാ​നു​വാ​ദ​ത്തോ​ടു​കൂ​ടി കുട്ടികൾ എത്രയ​ധി​കം സമയം അക്രമാ​സ​ക്ത​മായ കളിക​ളിൽ ഏർപ്പെ​ടു​ന്നു​വോ പ്രശ്‌നങ്ങൾ പരിഹ​രി​ക്കാൻ അവർ അക്രമത്തെ ഉപയോ​ഗി​ക്കാ​നുള്ള സാധ്യത അത്രയ​ധി​കം ഏറിയി​രി​ക്കും,’ സൂസൻ ഗോൾഡ്‌ബർഗ്‌ തുടർന്നു പറയുന്നു. ഗലാത്യർ 6:7-ൽ ബൈബിൾ ഇപ്രകാ​രം പറയുന്നു: “മനുഷ്യൻ വിതെ​ക്കു​ന്നതു തന്നേ കൊയ്യും.” അക്രമാ​സ​ക്ത​മായ കളിയിൽനിന്ന്‌ ഒരു കുട്ടി നല്ല വ്യക്തി​ത്വ​ഗു​ണങ്ങൾ കൊയ്യാൻ സാധ്യ​ത​യു​ണ്ടോ?

കാര്യം വസ്‌തു​നി​ഷ്‌ഠ​മാ​യി വിലയി​രു​ത്ത​ണ​മെ​ങ്കിൽ ഓരോ കുട്ടി​യും വ്യത്യ​സ്‌ത​നാ​ണെന്ന്‌ സമ്മതി​ക്കേ​ണ്ടി​യി​രി​ക്കു​ന്നു. ഒരു കുട്ടി വീഡി​യോ കളി​യോട്‌ ആസക്തി​യു​ള്ള​വ​നാ​യി​രി​ക്കാം, എന്നാൽ മറെറാ​രു കുട്ടി അങ്ങനെ​യാ​യി​രി​ക്ക​ണ​മെ​ന്നില്ല. വീഡി​യോ സ്‌ക്രീ​നി​ലെ ഘാതക​രം​ഗ​ങ്ങളെ കുട്ടികൾ യഥാർഥ ജീവി​ത​ത്തോ​ടു ബന്ധപ്പെ​ടു​ത്തു​മോ എന്ന കാര്യം തർക്കവി​ഷ​യ​മാണ്‌. അതു​കൊണ്ട്‌ തങ്ങളുടെ കുട്ടി​കൾക്ക്‌ ഏററവും നല്ലത്‌ എന്താ​ണെന്ന്‌ മാതാ​പി​താ​ക്കൾ തീരു​മാ​നി​ക്കു​ക​യും കുട്ടി​ക​ളു​ടെ കളിപ്പാ​ട്ടങ്ങൾ തിര​ഞ്ഞെ​ടു​ക്കു​ന്ന​തിൽ വലിയ ശ്രദ്ധ പ്രകട​മാ​ക്കു​ക​യും വേണം.

[6-ാം പേജിലെ ചിത്രം]

അന്യോന്യം ഇടപെ​ടേ​ണ്ട​തെ​ങ്ങ​നെ​യെന്നു പഠിക്കാൻ കളി കുട്ടി​കളെ സഹായി​ക്കു​ന്നു