ആൻഡ്രു​വിൽ നിന്നു ഞങ്ങൾ പഠിച്ചത്‌

ഞാൻ ജോലി​സ്ഥ​ല​ത്തേക്കു വാഹന​മോ​ടി​ച്ചു​പോ​യ​പ്പോൾ, കഴിഞ്ഞ ഏതാനും ദിവസ​ങ്ങ​ളിൽ ഉണ്ടായ കാര്യ​ങ്ങ​ളെ​ക്കു​റി​ച്ചോർത്തു വളരെ ആഹ്ലാദി​ച്ചു. ഞാൻ ഒരു മകന്റെ പിതാ​വാ​യി​ത്തീർന്ന​തേ​യു​ണ്ടാ​യി​രു​ന്നു​ള്ളൂ. അവൻ എന്റെ രണ്ടാമത്തെ കുട്ടി​യാണ്‌. എന്റെ ഭാര്യ ബെറ്റി ജെയ്‌നും ഞങ്ങളുടെ കുഞ്ഞ്‌ ആൻഡ്രു​വും ആശുപ​ത്രി​യിൽനി​ന്നു വീട്ടി​ലേക്കു പോരുന്ന ദിവസ​മാ​ണിന്ന്‌.

എന്നാൽ, അവർ ആശുപ​ത്രി​യിൽനി​ന്നു പോ​രേ​ണ്ടി​യി​രുന്ന സമയത്തി​നു തൊട്ടു​മുമ്പ്‌ ഭാര്യ എനിക്കു ഫോൺ ചെയ്‌തു. അവളുടെ ശബ്ദത്തിൽ ഉത്‌ക​ണ്‌ഠ​യു​ടെ നിഴലാ​ട്ട​മു​ണ്ടാ​യി​രു​ന്നു. ഞാൻ തിടു​ക്ക​ത്തിൽ ആശുപ​ത്രി​യി​ലേക്കു ചെന്നു. “എന്തോ കുഴപ്പ​മുണ്ട്‌!” എന്നതാ​യി​രു​ന്നു അവളുടെ ആദ്യവാ​ക്കു​തന്നെ. ഡോക്ടർ ശിശു​രോ​ഗ​വി​ദ​ഗ്‌ധ​യോ​ടൊ​പ്പം വരുന്നതു പ്രതീ​ക്ഷിച്ച്‌ ഞങ്ങൾ ഒരുമി​ച്ചി​രു​ന്നു.

ശിശു​രോ​ഗ​വി​ദ​ഗ്‌ധ​യു​ടെ ആദ്യവാ​ക്കു​തന്നെ ഞെട്ടി​ക്കു​ന്ന​താ​യി​രു​ന്നു. അവർ ഇങ്ങനെ പറഞ്ഞു: “നിങ്ങളു​ടെ മകനെ ഡൗൺസ്‌ സിൻ​ഡ്രോം ബാധി​ച്ചി​രി​ക്കു​ന്ന​താ​യി ഞങ്ങൾക്കു വ്യക്തമായ ഉറപ്പുണ്ട്‌.” ഞങ്ങളുടെ കുട്ടിക്കു മാനസി​ക​മാ​യി വളർച്ച മുരടി​ച്ചു​പോ​കാൻ സാധ്യ​ത​യു​ണ്ടെന്ന്‌ അവർ വിശദീ​ക​രി​ച്ചു. അവരുടെ കൂടു​ത​ലായ വിശദീ​ക​ര​ണ​ങ്ങ​ളൊ​ന്നും ഫലത്തിൽ എന്റെ തലയിൽ കയറി​യില്ല. എന്റെ മരവി​ച്ചു​പോയ മസ്‌തി​ഷ്‌കം എല്ലാത്തരം ശബ്ദസം​ജ്ഞ​ക​ളു​മാ​യുള്ള ബന്ധം വിച്ഛേ​ദി​ച്ചു​ക​ഴി​ഞ്ഞി​രു​ന്നു. എന്നാൽ ദൃശ്യ​രൂ​പങ്ങൾ തലച്ചോ​റിൽ രേഖ​പ്പെ​ടു​ത്തി​ക്കൊ​ണ്ടി​രു​ന്നു.

അവർ ആൻഡ്രു​വി​നെ പൊക്കി​പ്പി​ടി​ച്ചിട്ട്‌, എന്തോ കുഴപ്പ​മു​ണ്ടെന്ന വസ്‌തുത സംബന്ധി​ച്ചു തനിക്കു മുന്നറി​യി​പ്പു നൽകിയ കാര്യ​ങ്ങ​ളി​ലൊ​ന്നി​ലേക്ക്‌ അവർ ഞങ്ങളുടെ ശ്രദ്ധ തിരിച്ചു. കുട്ടി​യു​ടെ ശിരസ്സ്‌ ഒരു മാംസ​ക്ക​ഷ​ണം​പോ​ലെ തൂങ്ങി​ക്കി​ട​ന്നി​രു​ന്നു. ഈ പേശീ​ബ​ല​ക്കു​റവ്‌, ഡൗൺസ്‌ സിൻ​ഡ്രോ​മുള്ള നവജാ​ത​രായ കുട്ടി​ക​ളു​ടെ പ്രത്യേ​ക​ത​യാ​യി​രു​ന്നു. തുടർന്ന്‌ ഡോക്ട​റു​മാ​യുള്ള ഒരു കൂടി​ക്കാ​ഴ്‌ച​യിൽ, ഗ്രഹി​ക്കാ​നുള്ള ഞങ്ങളുടെ പ്രാപ്‌തി സാവധാ​നം മടങ്ങി​വ​രവേ, ഞങ്ങളുടെ മനസ്സിൽ വന്നുനി​റഞ്ഞ അനേകം ചോദ്യ​ങ്ങൾ ഞങ്ങൾ ചോദി​ക്കു​ക​യു​ണ്ടാ​യി. അവൻ എത്ര​ത്തോ​ളം വൈക​ല്യം ബാധി​ച്ച​വ​നാ​യി​രി​ക്കും? ഞങ്ങൾക്ക്‌ എന്തു പ്രതീ​ക്ഷി​ക്കാൻ കഴിയും? ഞങ്ങൾക്ക്‌ അവനെ എന്തുമാ​ത്രം പഠിപ്പി​ക്കാൻ കഴിയും. പഠിക്കാൻ അവൻ എത്രമാ​ത്രം പ്രാപ്‌തി​യു​ള്ള​വ​നാ​യി​രി​ക്കും? ഞങ്ങളുടെ ചോദ്യ​ങ്ങ​ളിൽ മിക്കതി​നു​മുള്ള ഉത്തരങ്ങൾ അവൻ ജീവി​ക്കുന്ന ചുറ്റു​പാ​ടി​നെ​യും അവന്റെ ജന്മനാ​ലുള്ള പ്രാപ്‌തി​ക​ളെ​യും ആശ്രയി​ച്ചി​രി​ക്കു​ന്നു​വെന്ന്‌ അവർ വിശദീ​ക​രി​ച്ചു.

ഇന്നി​പ്പോൾ 20-ലധികം വർഷം പിന്നി​ട്ടി​രി​ക്കു​ന്നു, ആൻഡ്രു​വിന്‌ അർഹി​ക്കുന്ന സ്‌നേ​ഹ​വും വാത്സല്യ​വും കൊടു​ക്കാ​നും ഞങ്ങൾക്കു കഴിയുന്ന എല്ലാ കാര്യ​ങ്ങ​ളും പകർന്നു​കൊ​ടു​ക്കാ​നും ഞങ്ങൾ ശ്രമി​ച്ചി​ട്ടുണ്ട്‌. എന്നാൽ പിന്തി​രി​ഞ്ഞു​നോ​ക്കു​മ്പോൾ, അതു തീർത്തും കൊടു​ക്കൽ പ്രക്രിയ മാത്ര​മാ​യി​രു​ന്നില്ല എന്നു ഞങ്ങൾ മനസ്സി​ലാ​ക്കു​ന്നു.

നല്ല ബുദ്ധ്യു​പ​ദേ​ശം

ആൻഡ്രു​വി​ന്റെ സാന്നി​ധ്യ​വു​മാ​യി ഞങ്ങൾക്കു പൊരു​ത്ത​പ്പെ​ടാൻ കഴിയു​ന്ന​തി​നു മുമ്പു​തന്നെ, സ്‌നേ​ഹ​നി​ധി​ക​ളായ സുഹൃ​ത്തു​ക്കൾ സ്വന്തം പരി​ശോ​ധ​നാ​നു​ഭ​വ​ങ്ങ​ളു​ടെ മധ്യേ സഹിച്ചു​നി​ന്ന​തിൽനിന്ന്‌ അവർക്കു ലഭിച്ച ബുദ്ധ്യു​പ​ദേശം ഞങ്ങൾക്കു നൽകു​ക​യു​ണ്ടാ​യി. അവർ പറഞ്ഞ​തൊ​ക്കെ നല്ല ഉദ്ദേശ്യ​ത്തോ​ടെ ആയിരു​ന്നു. എന്നാൽ, എല്ലാ മാർഗ​നിർദേ​ശ​വും ജ്ഞാനപൂർവ​ക​മോ വിജ്ഞാ​ന​പ്ര​ദ​മോ ആയിരു​ന്നില്ല എന്നതു പ്രതീ​ക്ഷി​ക്കാ​വു​ന്ന​തേ​യു​ള്ളൂ. എന്നിരു​ന്നാ​ലും, വർഷങ്ങ​ളോ​ളം പരീക്ഷി​ച്ചു​നോ​ക്കി​യ​ശേഷം, അവരുടെ ബുദ്ധ്യു​പ​ദേശം വില​യേ​റിയ രണ്ടു ജ്ഞാനമു​ത്തു​ക​ളാ​യി പരിണ​മി​ച്ചു.

ആൻഡ്രു​വി​നു വാസ്‌ത​വ​ത്തിൽ ബുദ്ധി​മാ​ന്ദ്യം സംഭവി​ച്ചി​ട്ടില്ല എന്നു പറഞ്ഞു​കൊണ്ട്‌ ഞങ്ങളെ സമാശ്വ​സി​പ്പി​ക്കാൻ ചിലർ ശ്രമിച്ചു. എന്നാൽ പ്രായം​ചെന്ന ഒരു സ്‌നേ​ഹി​തൻ ഇങ്ങനെ ബുദ്ധ്യു​പ​ദേ​ശി​ച്ചു: “അത്‌ അംഗീ​ക​രി​ക്കാൻ വിസമ്മ​തി​ക്ക​രുത്‌! നിങ്ങൾ എത്ര നേരത്തേ അവന്റെ പരിമി​തി​കളെ അംഗീ​ക​രി​ക്കു​ന്നു​വോ, അത്ര നേരത്തെ നിങ്ങളു​ടെ പ്രതീ​ക്ഷകൾ തിരുത്തി അവൻ ആയിരി​ക്കുന്ന വിധത്തിൽ നിങ്ങൾ അവനോട്‌ ഇടപെ​ടാൻ തുടങ്ങും.”

പ്രതി​കൂ​ല സാഹച​ര്യം കൈകാ​ര്യം ചെയ്‌ത​തിൽനി​ന്നു ഞങ്ങൾ പഠിച്ച ഏറ്റവും പ്രധാ​ന​പ്പെട്ട പാഠങ്ങ​ളി​ലൊ​ന്നാ​യി​രു​ന്നു അത്‌. വസ്‌തുത അംഗീ​ക​രി​ക്കു​ന്ന​തു​വരെ വൈകാ​രിക സങ്കടം മാറു​ക​യില്ല. നിഷേ​ധി​ക്കുക എന്നതു സഹജമാ​ണെ​ങ്കി​ലും, എത്ര കാല​ത്തോ​ളം നിഷേ​ധി​ക്കു​ന്നു​വോ അത്ര കാലം അതുമാ​യി പൊരു​ത്ത​പ്പെ​ടാ​നും ‘എല്ലാ മനുഷ്യർക്കും സംഭവി​ക്കുന്ന മുൻകൂ​ട്ടി​ക്കാ​ണാൻ കഴിയാത്ത സംഭവങ്ങ’ളുടെ പരിമി​തി​കൾക്കു​ള്ളിൽ പ്രവർത്തി​ക്കാ​നും നമുക്കു കഴിയാ​തെ പോകും.—സഭാ​പ്ര​സം​ഗി 9:11.

വർഷങ്ങ​ളി​ലു​ട​നീ​ളം, സാധാരണ സ്‌കൂൾ പാഠ്യ​പ​ദ്ധ​തി​യു​മാ​യി ഇണങ്ങി​പ്പോ​കാൻ കഴിയാ​തെ​വ​രി​ക​യോ ചികി​ത്സാ​പ​ര​മായ വിദ്യാ​ഭ്യാ​സം നേടു​ക​യോ ചെയ്യുന്ന കുട്ടി​ക​ളുള്ള മാതാ​പി​താ​ക്കളെ ഞങ്ങൾ കണ്ടുമു​ട്ടി​യി​ട്ടു​ള്ള​പ്പോൾ, എത്രമാ​ത്രം കുട്ടികൾ വാസ്‌ത​വ​ത്തിൽ വളർച്ച മുരടി​ച്ച​വ​രോ മറ്റു​പ്ര​കാ​ര​ത്തിൽ വൈക​ല്യം ബാധി​ച്ച​വ​രോ ആയിരി​ക്കു​മെന്നു ഞങ്ങൾ അമ്പരന്നി​ട്ടുണ്ട്‌. അവരിൽ ചിലർ അദൃശ്യ​മാ​യി അംഗ​വൈ​ക​ല്യം സംഭവി​ച്ച​വ​രിൽ, അതായത്‌ പ്രത്യ​ക്ഷ​ത്തിൽ ശാരീ​രി​ക​മാ​യി മറ്റു പ്രശ്‌നങ്ങൾ ഇല്ലാതി​രി​ക്കു​ക​യും സാധാരണ കുട്ടി​ക​ളെ​പ്പോ​ലെ കാണു​ക​യും ചെയ്യു​ന്ന​വ​രിൽ പെടു​മോ? ഡൗൺസ്‌ സിൻ​ഡ്രോം ഉള്ള കുട്ടി​കളെ പെട്ടെ​ന്നു​തന്നെ തിരി​ച്ച​റി​യാൻ കഴിയും. എന്നാൽ മറ്റു ചിലതരം വൈക​ല്യ​ങ്ങൾക്കു പ്രത്യ​ക്ഷ​മായ അടയാ​ള​ങ്ങ​ളൊ​ന്നും കാണു​ക​യില്ല. എല്ലാവർക്കും പ്രകോ​പ​ന​ത്തിന്‌ ഇട നൽകി​ക്കൊണ്ട്‌ എത്രയോ മാതാ​പി​താ​ക്കൾ അവാസ്‌ത​വി​ക​മായ പ്രതീ​ക്ഷ​കളെ താലോ​ലി​ക്കു​ക​യും തങ്ങളുടെ കുട്ടി​യു​ടെ പരിമി​തി​കൾ അംഗീ​ക​രി​ക്കാൻ വിസമ്മ​തി​ക്കു​ക​യും ചെയ്യുന്നു?—കൊ​ലൊ​സ്സ്യർ 3:21 താരത​മ്യം ചെയ്യുക.

ഞങ്ങളുടെ അനുഭവം വ്യക്തമാ​ക്കി​ത്തന്ന രണ്ടാമത്തെ ഉപദേശം ഇതാണ്‌: മറ്റുള്ളവർ നമ്മുടെ കുട്ടി​യോട്‌ ഇടപെ​ടു​ന്നത്‌ എങ്ങനെ​യെന്ന്‌ അന്തിമ​മാ​യി തീരു​മാ​നി​ക്കു​ന്നതു നമ്മളാണ്‌. നമ്മൾ എങ്ങനെ​യൊ​ക്കെ കുട്ടി​യോട്‌ ഇടപെ​ടു​ന്നു​വോ അങ്ങനെ​യൊ​ക്കെ​യാ​യി​രി​ക്കും മിക്കവാ​റും മറ്റുള്ള​വ​രും അവനോട്‌ ഇടപെ​ടുക.

ശാരീ​രി​ക​വും മാനസി​ക​വു​മാ​യി വൈക​ല്യം ബാധി​ച്ച​വ​രോ​ടുള്ള ആളുക​ളു​ടെ മനോ​ഭാ​വ​ങ്ങൾക്കു കഴിഞ്ഞ ഏതാനും ദശകങ്ങ​ളിൽ മാറ്റം​വ​ന്നി​ട്ടുണ്ട്‌. ഈ മാറ്റങ്ങ​ളിൽ പലതി​നും പ്രേര​ണ​യേ​കി​യി​ട്ടു​ള്ളതു വൈക​ല്യം ബാധിച്ച വ്യക്തി​കൾത​ന്നെ​യും അവരുടെ ബന്ധുക്ക​ളും സാധാ​ര​ണ​ക്കാ​രും വിദഗ്‌ധ​രു​മാണ്‌. തങ്ങളുടെ കുട്ടി​കളെ ഒരു സ്ഥാപന​ത്തി​ന്റെ ഭാഗമാ​ക്കി​ത്തീർക്കാ​നുള്ള ബുദ്ധ്യു​പ​ദേ​ശത്തെ പല മാതാ​പി​താ​ക്ക​ളും നിരസി​ക്കു​ക​യും, ഫലത്തിൽ, വ്യവസ്ഥാ​പിത അഭി​പ്രാ​യത്തെ തകിടം​മ​റി​ക്കു​ക​യു​മാ​ണു ചെയ്‌തി​ട്ടു​ള്ളത്‌. ഡൗൺസ്‌ സിൻ​ഡ്രോ​മി​നെ​ക്കു​റി​ച്ചുള്ള അമ്പതു വർഷം മുമ്പത്തെ വൈദ്യ​ശാ​സ്‌ത്ര ഗ്രന്ഥങ്ങൾ സ്ഥാപന​ങ്ങ​ളിൽനി​ന്നു ലഭിച്ച വിവര​ങ്ങളെ അടിസ്ഥാ​ന​മാ​ക്കി​യു​ള്ള​താ​യി​രു​ന്നു. ഇന്നു പ്രതീ​ക്ഷ​കൾക്കു സമൂല മാറ്റം സംഭവി​ച്ചി​രി​ക്കു​ക​യാണ്‌. അതിന്റെ കാരണം മാതാ​പി​താ​ക്ക​ളും മറ്റുള്ള​വ​രും പുതിയ മാനങ്ങൾ തേടി​പ്പോ​യി​രി​ക്കു​ന്നു എന്നതാണ്‌.

കൂടുതൽ അനുകമ്പ പഠിക്കൽ

നമ്മൾ യഥാർഥ​ത്തിൽ അനുക​മ്പ​യു​ള്ള​വ​രാണ്‌ എന്നു ചിന്തി​ച്ചു​കൊണ്ട്‌ നമ്മെത്തന്നെ വഞ്ചിക്കാൻ എത്ര​യെ​ളു​പ്പം കഴിയു​മെ​ന്നു​ള്ളതു വിചി​ത്ര​മാണ്‌. എന്നാൽ നാം വ്യക്തി​പ​ര​മാ​യി ഉൾപ്പെ​ടു​ന്ന​തു​വരെ, പല പ്രശ്‌ന​ങ്ങ​ളും സംബന്ധി​ച്ചു നമുക്കുള്ള ഗ്രാഹ്യം ഉപരി​പ്ലവം മാത്ര​മാ​യി​രി​ക്കാം.

വൈക​ല്യം ബാധിച്ച വ്യക്തി​കൾക്കു തങ്ങളുടെ സ്ഥിതി​വി​ശേ​ഷ​ത്തി​ന്മേൽ യാതൊ​രു നിയ​ന്ത്ര​ണ​വു​മി​ല്ലെന്നു മനസ്സി​ലാ​ക്കാൻ ആൻഡ്രു​വി​ന്റെ അവസ്ഥ ഞങ്ങളെ നിർബ​ന്ധി​ത​രാ​ക്കി​യി​രി​ക്കു​ക​യാണ്‌. ദുർബ​ല​രോ​ടും കഴിവു കുറഞ്ഞ​വ​രോ​ടും വൃദ്ധ​രോ​ടു​മുള്ള എന്റെ യഥാർഥ മനോ​ഭാ​വം എന്താണ്‌? എന്ന ചോദ്യ​ത്തെ അഭിമു​ഖീ​ക​രി​ക്കാൻ അതു വാസ്‌ത​വ​ത്തിൽ ഞങ്ങളെ പ്രാപ്‌ത​രാ​ക്കി​യി​രി​ക്കു​ന്നു.

പലപ്പോ​ഴും ഞങ്ങൾ ആൻഡ്രു​വി​നെ​യും കൂട്ടി പൊതു​സ്ഥ​ല​ങ്ങ​ളിൽ പോയി​ട്ടുണ്ട്‌. അപ്പോ​ഴൊ​ക്കെ ഞങ്ങളുടെ കുടും​ബ​ത്തി​ലെ ഒരു മുതിർന്ന അംഗ​മെ​ന്ന​നി​ല​യിൽ, യാതൊ​രു ലജ്ജയു​മി​ല്ലാ​തെ, അവനെ ഞങ്ങൾ അംഗീ​ക​രി​ക്കു​ന്ന​തു​കണ്ട്‌ അപരി​ചി​തർ ഞങ്ങളുടെ അടുക്കൽ വന്നു തങ്ങളുടെ സ്വകാര്യ ഭാരങ്ങൾ പങ്കു​വെ​ച്ചി​ട്ടുണ്ട്‌. ഞങ്ങൾക്ക്‌ അവരുടെ പ്രശ്‌ന​ങ്ങ​ളിൽ സമാനു​ഭാ​വം കാണി​ക്കാൻ കഴിയു​മെന്ന്‌ ആൻഡ്രു​വി​ന്റെ സാന്നി​ധ്യം അവർക്ക്‌ ഉറപ്പു കൊടു​ത്ത​തു​പോ​ലുണ്ട്‌.

സ്‌നേ​ഹ​ത്തി​ന്റെ ശക്തി

സ്‌നേഹം കേവലം ബുദ്ധി​യു​ടെ ഒരു ധർമമല്ല എന്നതാണ്‌ ആൻഡ്രു ഞങ്ങളെ പഠിപ്പിച്ച ഏറ്റവും വലിയ സംഗതി. ഞാൻ വിശദീ​ക​രി​ക്കാം. യഹോ​വ​യു​ടെ സാക്ഷി​ക​ളെ​ന്ന​നി​ല​യിൽ നമ്മുടെ ആരാധ​ന​യു​ടെ ഒരു അടിസ്ഥാന ഘടകം യഥാർഥ ക്രിസ്‌ത്യാ​നി​ത്വം വർഗീ​യ​വും സാമൂ​ഹി​ക​വും രാഷ്ട്രീ​യ​വു​മായ ഭിന്നത​കൾക്കും മുൻവി​ധി​കൾക്കും മീതെ പോകു​ന്നു എന്നതാണ്‌. ഈ തത്ത്വത്തിൽ വിശ്വാ​സം പ്രകട​മാ​ക്കി​യ​തി​നാൽ, ഞങ്ങളുടെ ആത്മീയ സഹോ​ദ​രീ​സ​ഹോ​ദ​ര​ന്മാർ ആൻഡ്രു​വി​നെ അംഗീ​ക​രി​ക്കു​മെന്നു ഞങ്ങൾക്ക്‌ അറിയാ​മാ​യി​രു​ന്നു. ആരാധ​നാ​വേ​ള​ക​ളിൽ മുഴു സമയവും അവൻ ആദര​വോ​ടെ ഇരിക്കാൻ പ്രതീ​ക്ഷി​ക്കു​ന്നത്‌ അവാസ്‌ത​വി​ക​മാ​ണെന്നു പറഞ്ഞ വിദഗ്‌ധ​രു​ടെ ഉപദേ​ശത്തെ നിരാ​ക​രി​ച്ചു​കൊണ്ട്‌ ഞങ്ങൾ അവന്റെ ജനനം​മു​തൽ യോഗ​ങ്ങൾക്കും വീടു​തോ​റു​മുള്ള ഞങ്ങളുടെ പ്രസം​ഗ​പ്ര​വർത്ത​ന​ത്തി​ലും അവനെ ഞങ്ങളോ​ടൊ​പ്പം നിർബ​ന്ധ​മാ​യും കൊണ്ടു​പോ​യി. പ്രതീ​ക്ഷി​ച്ച​തു​പോ​ലെ​തന്നെ, ദയയോ​ടും അനുക​മ്പ​യോ​ടും കൂടെ സഭയി​ലു​ള്ളവർ അവനോ​ടു പെരു​മാ​റു​ന്നു.

എന്നാൽ അതിലും കവിഞ്ഞു പ്രവർത്തി​ക്കു​ന്ന​വ​രുണ്ട്‌. അവർക്ക്‌ അവനോട്‌ ഒരു പ്രത്യേക പ്രിയ​മുണ്ട്‌. ആൻഡ്രു തന്റെ മന്ദീഭ​വി​ച്ചു​പോയ ബുദ്ധി​യാൽ തീർത്തും അവിക​ല​മായ പ്രാപ്‌തി​യോ​ടെ ഇതു മനസ്സി​ലാ​ക്കു​ന്ന​തു​പോ​ലെ തോന്നു​ന്നു. അത്തരം ആളുക​ളോ​ടൊ​ത്താ​യി​രി​ക്കു​മ്പോൾ അവൻ തന്റെ ലജ്ജ എളുപ്പം തരണം ചെയ്യുന്നു. യോഗങ്ങൾ അവസാ​നി​ക്കു​ന്നതേ അവൻ അവരുടെ അടു​ത്തേക്ക്‌ ഓടി​ച്ചെ​ല്ലു​ന്നു. അവനോട്‌ പ്രത്യേക പ്രിയ​മു​ള്ള​വരെ തിരി​ച്ച​റി​യാ​നുള്ള അവന്റെ ഒരു ജന്മസി​ദ്ധ​മായ പ്രാപ്‌തി ഞങ്ങൾ കൂടെ​ക്കൂ​ടെ നിരീ​ക്ഷി​ച്ചി​ട്ടുണ്ട്‌.

സ്‌നേ​ഹ​പ്ര​ക​ട​ന​ത്തി​ന്റെ കാര്യ​ത്തി​ലും അതു ശരിയാണ്‌. ശിശു​ക്ക​ളോ​ടും പ്രായ​മു​ള്ള​വ​രോ​ടും ഓമന​മൃ​ഗ​ങ്ങ​ളോ​ടും ആൻഡ്രു വളരെ ശാന്തമായ രീതി​യി​ലാ​ണു പെരു​മാ​റു​ന്നത്‌. ചില​പ്പോൾ, അവൻ യാതൊ​രു മടിയും കൂടാതെ ഞങ്ങൾക്ക​റി​യി​ല്ലാത്ത ആരു​ടെ​യെ​ങ്കി​ലും കുട്ടിയെ സമീപി​ക്കു​മ്പോൾ, അവൻ ആ കുട്ടി​യോ​ടു പരുക്ക​നാ​യി പെരു​മാ​റു​ന്ന​പക്ഷം കുട്ടിയെ രക്ഷിക്ക​ണ​മെന്നു കരുതി ഞങ്ങൾ അടുത്തു​തന്നെ ഉണ്ടാകും. എന്നാൽ മുലയൂ​ട്ടുന്ന ഒരമ്മ തന്റെ കുട്ടിയെ തൊടു​ന്ന​തു​പോ​ലെ വളരെ മാർദ​വ​മാ​യി അവൻ അതിനെ തൊടു​ന്നതു കണ്ടപ്പോൾ ഞങ്ങളുടെ ഭയം സംബന്ധി​ച്ചു ഞങ്ങൾക്ക്‌ എത്രമാ​ത്രം നാണം തോന്നി​യി​ട്ടു​ണ്ടെ​ന്നോ!

ഞങ്ങൾ പഠിച്ച പാഠങ്ങൾ

ഡൗൺസ്‌ സിൻ​ഡ്രോ​മുള്ള കുട്ടി​ക​ളെ​ല്ലാം കാഴ്‌ച​യ്‌ക്ക്‌ ഒരു​പോ​ലി​രി​ക്കു​ന്ന​തി​നാൽ, അവർക്കെ​ല്ലാ​വർക്കും ഒരു​പോ​ലുള്ള വ്യക്തി​ത്വ​മാ​യി​രി​ക്കും ഉണ്ടായി​രി​ക്കു​ന്നത്‌ എന്നാണു ഞങ്ങൾ പ്രതീ​ക്ഷി​ച്ചത്‌. എന്നാൽ, അവർക്കു പരസ്‌പ​ര​മു​ള്ള​തി​നെ​ക്കാൾ സാമ്യം അവരുടെ കുടും​ബ​ത്തോ​ടാ​ണെന്നു ഞങ്ങൾ പെട്ടെ​ന്നു​തന്നെ മനസ്സി​ലാ​ക്കി. ഓരോ​രു​ത്തർക്കും തനതായ ഒരു വ്യക്തി​ത്വ​മാ​ണു​ള്ളത്‌.

മറ്റു പല കുട്ടി​ക​ളെ​യും പോലെ, ആൻഡ്രു​വി​നും കഠിനാ​ധ്വാ​നം ഇഷ്ടമല്ല. എന്നാൽ ശീലമാ​യി​ത്തീ​രു​ന്ന​തു​വരെ ഒരു ജോലി വീണ്ടും വീണ്ടും ചെയ്യിച്ചു പരിച​യി​പ്പി​ക്കാ​നുള്ള ക്ഷമയും സഹിഷ്‌ണു​ത​യും നമുക്കു​ണ്ടെ​ങ്കിൽ, അവനെ സംബന്ധി​ച്ചി​ട​ത്തോ​ളം അതൊരു ജോലി​യാ​യി തോന്നി​യി​രു​ന്നില്ല. വീട്ടി​ലുള്ള അവന്റെ ദിനച​ര്യ​കൾ ഒരു ശീലമാ​യി മാറി​യി​രി​ക്കു​ക​യാണ്‌, കൂടു​ത​ലു​ള്ളതു മാത്രമേ ജോലി​യാ​യി കണക്കാ​ക്കു​ന്നു​ള്ളൂ.

ആൻഡ്രു​വി​ന്റെ ജീവി​ത​കാ​ലത്തു ഞങ്ങൾ പഠിച്ച പാഠങ്ങ​ളി​ലേക്ക്‌ എത്തി​നോ​ക്കു​മ്പോൾ, രസകര​മായ ഒരു വിരോ​ധാ​ഭാ​സം ഉയർന്നു​വ​രു​ന്ന​താ​യി കാണാം. ആൻഡ്രു​വി​നെ വളർത്തി​ക്കൊ​ണ്ടു​വ​രു​ന്ന​തിൽ ഞങ്ങൾ പഠിച്ച പാഠങ്ങ​ളെ​ല്ലാം തന്നെ ഫലത്തിൽ മറ്റു കുട്ടി​ക​ളോ​ടുള്ള ബന്ധങ്ങളി​ലും പൊതു​വേ ആളുക​ളു​മാ​യുള്ള ബന്ധങ്ങളി​ലും ഒരു​പോ​ലെ ബാധക​മാ​കു​ന്നു.

ഉദാഹ​ര​ണ​ത്തിന്‌, നമ്മിൽ ആരാണു യഥാർഥ​മായ സ്‌നേ​ഹ​ത്തോട്‌ അനുകൂ​ല​മാ​യി പ്രതി​ക​രി​ക്കാ​ത്തത്‌? നിങ്ങളു​ടേ​തിൽനി​ന്നു വളരെ വിഭി​ന്ന​മായ പ്രാപ്‌തി​ക​ളും അനുഭ​വ​ങ്ങ​ളു​മുള്ള ആരെങ്കി​ലു​മാ​യി നിങ്ങളെ അനുചി​ത​മാ​യി താരത​മ്യം ചെയ്യു​ക​യാ​ണെ​ങ്കിൽ, അത്‌ അനീതി​പ​ര​വും നിരാ​ശാ​ജ​ന​ക​വു​മാ​ണെന്നു നിങ്ങൾക്കു തോന്നു​ക​യി​ല്ലേ? ആദ്യ​മൊ​ക്കെ അസുഖ​ക​ര​മാ​യി​രുന്ന പല ജോലി​ക​ളും നമുക്ക്‌ അവയോ​ടു പറ്റിനിൽക്കാ​നുള്ള ശിക്ഷണം ലഭിച്ച​പ്പോൾ പിന്നീട്‌ സഹിക്കാ​വു​ന്ന​തും സംതൃ​പ്‌തി​കരം പോലു​മാ​യി​ത്തീർന്നി​ട്ടു​ണ്ടെ​ന്നു​ള്ളതു സത്യമല്ലേ?

ഞങ്ങളുടെ മാനു​ഷി​ക​മായ ഹ്രസ്വ​വീ​ക്ഷണം ഹേതു​വാ​യി ആൻഡ്രു​വി​നെ​ച്ചൊ​ല്ലി ഞങ്ങൾ വളരെ​യ​ധി​കം കണ്ണീ​രൊ​ഴു​ക്കി​യി​ട്ടു​ണ്ടെ​ങ്കി​ലും, ഞങ്ങൾ വലുതും ചെറു​തു​മായ അനേകം സന്തോ​ഷങ്ങൾ പങ്കു​വെ​ച്ചി​ട്ടുണ്ട്‌. തീർത്തും ആൻഡ്രു​വി​നോ​ടു ബന്ധപ്പെ​ടാത്ത മണ്ഡലങ്ങ​ളിൽ, ഞങ്ങൾ അവൻ നിമിത്തം വളർന്നു​വ​ന്നി​ട്ടുണ്ട്‌. എത്രമാ​ത്രം പരി​ശോ​ധ​നാ​ക​ര​മാ​യി​രു​ന്നാ​ലും ജീവി​ത​ത്തി​ലെ ഏത്‌ അനുഭ​വ​ത്തി​നും മോശ​മായ വ്യക്തി​ക​ളാ​യി​രി​ക്കു​ന്ന​തി​നു പകരം മെച്ചപ്പെട്ട വ്യക്തി​ക​ളാ​യി നമ്മെ രൂപ​പ്പെ​ടു​ത്താ​നുള്ള സാധ്യ​ത​യുണ്ട്‌.

ഞങ്ങൾക്കു വളരെ പ്രാധാ​ന്യ​മുള്ള മറ്റൊരു സംഗതി​യുണ്ട്‌. ഞങ്ങൾ ആൻഡ്രു​വി​ന്റെ വൈക​ല്യം പരിഹ​രി​ക്ക​പ്പെ​ടു​ന്ന​തി​നു സാക്ഷ്യം വഹിക്കു​മെന്ന പ്രതീ​ക്ഷ​യിൽനി​ന്നു വളരെ സന്തോഷം നേടുന്നു. ദൈവ​ത്തി​ന്റെ നീതി​യുള്ള പുതിയ ലോക​ത്തിൽ ഉടൻതന്നെ അന്ധർക്കും ബധിരർക്കും മുടന്തർക്കും ഊമർക്കും തങ്ങളുടെ ഊർജ്വ​സ്വ​ല​മായ ആരോ​ഗ്യം പുനഃ​സ്ഥാ​പി​ക്ക​പ്പെ​ടു​മെന്നു ബൈബിൾ വാഗ്‌ദാ​നം ചെയ്യുന്നു. (യെശയ്യാ​വു 35:5, 6; മത്തായി 15:30, 31) മനുഷ്യ​വർഗം തങ്ങളുടെ സമ്പൂർണ പ്രാപ്‌തി​യി​ലേക്കു എത്തി​ച്ചേ​രവേ മനസ്സി​നും ശരീര​ത്തി​നും സംഭവി​ക്കുന്ന സൗഖ്യ​മാ​ക്കൽ നേരിട്ടു കാണു​ന്ന​തിൽ ഉണ്ടായി​രി​ക്കാൻ പോകുന്ന സന്തോ​ഷ​ത്തെ​ക്കു​റി​ച്ചു സങ്കൽപ്പി​ച്ചു​നോ​ക്കൂ! (സങ്കീർത്തനം 37:11, 29)—സംഭാവന ചെയ്യ​പ്പെ​ട്ടത്‌.

[12-ാം പേജിലെ ചതുരം]

വൈകല്യത്തിന്റെ അളവുകൾ

ഡൗൺസ്‌ സിൻ​ഡ്രോം ഉള്ള വ്യക്തി​കളെ വിദഗ്‌ധർ മൂന്നു വിഭാ​ഗ​ത്തിൽ പെടു​ത്തു​ന്നു. (1) അഭ്യസി​ക്ക​പ്പെ​ടാ​വു​ന്നവർ (വളരെ കുറഞ്ഞ വൈക​ല്യ​മു​ള്ളവർ): ഗണ്യമായ കലാലയ കഴിവു​കൾ ആർജി​ക്കാൻ കഴിയു​ന്നവർ. ഈ വിഭാ​ഗ​ത്തിൽ പെടുന്ന ചിലർ നടന്മാ​രോ പ്രഭാ​ഷ​ക​രോ ആയിത്തീർന്നി​ട്ടുണ്ട്‌. വളരെ കുറഞ്ഞ മേൽനോ​ട്ട​ത്തിൻ കീഴിൽ സ്വത​ന്ത്ര​മാ​യി ജീവി​ക്കു​ന്ന​തിൽ ചിലർ വിജയി​ച്ചി​ട്ടുണ്ട്‌. (2) പരിശീ​ലി​പ്പി​ക്ക​പ്പെ​ടാ​വു​ന്നവർ (കുറേ​ക്കൂ​ടെ വൈക​ല്യ​മു​ള്ളവർ): പ്രാ​യോ​ഗി​ക​മായ ചില വൈദ​ഗ്‌ധ്യ​ങ്ങൾ പഠിക്കാൻ പ്രാപ്‌തി​യു​ള്ളവർ. കുറ​ച്ചൊ​ക്കെ കാര്യങ്ങൾ തന്നെത്താൻ നിർവ​ഹി​ക്കാൻ അവരെ പഠിപ്പി​ക്കാ​മെ​ങ്കി​ലും, കൂടു​ത​ലായ മേൽനോ​ട്ടം ആവശ്യ​മാണ്‌. (3) ആഴത്തി​ലു​ള്ളവർ (കടുത്ത വൈക​ല്യ​മു​ള്ളവർ): കാര്യ​ക്ഷമത വളരെ കുറഞ്ഞ വിഭാ​ഗ​ക്കാർ, അത്തരക്കാർക്കു വളരെ​യ​ധി​കം മേൽനോ​ട്ടം ആവശ്യ​മാണ്‌.

ആൻഡ്രു​വി​ന്റെ കാര്യ​മോ? അവൻ “പരിശീ​ലി​പ്പി​ക്ക​പ്പെ​ടാ​വു​ന്നവ”രുടെ കൂട്ടത്തിൽ പെടു​ന്നു​വെന്ന്‌ ഇപ്പോൾ അറിയാ​റാ​യി.