നിങ്ങൾ അവധി​ക്കാ​ലം ചെലവ​ഴി​ക്കാൻ ഒരുങ്ങി​യി​രി​ക്കു​ന്നു​വോ?

ഉത്തരാർധ​ഗോ​ള​ത്തിൽ വേനൽ അടുക്കാ​റാ​യി. താമസി​യാ​തെ കോടി​ക്ക​ണ​ക്കി​നാ​ളു​കൾ അവധിക്കു പോയി​ത്തു​ട​ങ്ങും. പക്ഷേ, അവധി​ക്കാ​ലം വേനൽക്കാ​ലത്തു മാത്ര​മാ​യി ഒതുക്കി നിർത്ത​പ്പെ​ടു​ന്നില്ല. വിനോ​ദ​സ​ഞ്ചാ​രം, വർഷം​തോ​റും ശതകോ​ടി​ക്ക​ണ​ക്കി​നു ഡോളർ വാരി​ക്കൂ​ട്ടുന്ന ഒരു മുഴു​വർഷ ബിസി​ന​സാ​യി​ത്തീർന്നി​രി​ക്കു​ന്നു. അവധിക്കു പോകുന്ന മിക്കവ​രും തങ്ങളുടെ രാജ്യ​ത്തി​ന​ക​ത്തു​ത​ന്നെ​യാ​ണു യാത്ര ചെയ്യു​ന്ന​തെ​ങ്കി​ലും, ഒരിക്കൽ സമ്പന്നർക്കി​ട​യിൽ മാത്രം ഒതുങ്ങി​നി​ന്നി​രുന്ന വിദേ​ശ​യാ​ത്ര ഇപ്പോൾ സർവസാ​ധാ​ര​ണ​മാ​യി​ത്തീർന്നി​രി​ക്കു​ന്നു.

തൊഴി​ലു​ട​മ​കൾ അനുവ​ദി​ച്ചു​കൊ​ടു​ക്കുന്ന അവധി​ക്കാ​ലം രാജ്യ​ങ്ങൾതോ​റും വ്യത്യ​സ്‌ത​മാണ്‌. 1979-ൽ, 2 ശതമാനം ജർമൻ തൊഴി​ലാ​ളി​കൾക്കു മാത്രമേ ആറാഴ്‌ചത്തെ അവധി കിട്ടി​യി​രു​ന്നു​ള്ളു. എന്നാൽ, ഇപ്പോൾ ബഹുഭൂ​രി​ഭാ​ഗ​ത്തി​നും അത്രയും അവധി ലഭിക്കു​ന്നു. പശ്ചിമ യൂറോ​പ്പിൽ, വ്യാവ​സാ​യിക തൊഴി​ലാ​ളി​കൾക്കുള്ള ശരാശരി അവധി​ക്കാ​ലം അഞ്ചാഴ്‌ച​യി​ല​ധി​കം വരും.

അവധി​ക്കാ​ല​ത്തിന്‌ അതി​ന്റേ​തായ സ്ഥാനമുണ്ട്‌

പ്രാരം​ഭ​ത്തിൽ, അവധി​ക്കാ​ലം എന്നതിന്‌ ഇന്നുള്ള​തിൽനി​ന്നു തികച്ചും വിഭി​ന്ന​മായ ഒരു അർഥമാ​ണു​ണ്ടാ​യി​രു​ന്നത്‌. ദ ന്യൂ എൻ​സൈ​ക്ലോ​പീ​ഡിയ ബ്രിട്ടാ​നിക്ക വിവരി​ക്കു​ന്നു: “അവധി​യെ​ടു​ക്കുന്ന ആധുനിക രീതി . . . പുരാതന റോമി​ലെ മതപര​മായ കലണ്ടറിൽനിന്ന്‌ ഉരുത്തി​രി​ഞ്ഞി​ട്ടു​ള്ള​താണ്‌, എന്നാൽ ഒരു വിപരീത രീതി​യിൽ. വർഷത്തി​ലെ 100-ലേറെ ദിവസങ്ങൾ വിവിധ റോമൻ ദേവീ​ദേ​വ​ന്മാർക്കു സമർപ്പി​ക്ക​പ്പെട്ട വിരു​ന്നു​ദി​ന​ങ്ങ​ളാ​യി​രു​ന്നു. പവി​ത്ര​മായ ഉത്സവങ്ങ​ളുള്ള ദിവസ​ങ്ങ​ളിൽ, അതായത്‌ വിശേ​ഷ​ദി​വ​സ​ങ്ങ​ളിൽ, ആളുകൾ തങ്ങളുടെ പതിവു ദിനച​ര്യ​ക​ളിൽനി​ന്നു വിശ്ര​മി​ച്ചി​രു​ന്നു. പവി​ത്ര​മാ​യി കണക്കാ​ക്കാത്ത ദിവസ​ങ്ങളെ ഡീയിസ്‌ വാക്കാ​ന്റെസ്‌, അതായത്‌ അവധി ദിവസങ്ങൾ എന്നു വിളി​ച്ചി​രു​ന്നു. ഈ ദിവസ​ങ്ങ​ളിൽ ആളുകൾ വേല ചെയ്‌തി​രു​ന്നു.” ജോലി​ദി​വ​സ​ങ്ങ​ളാ​യി​രി​ക്കു​ന്ന​തി​നു പകരം, ആധുനിക നാളിൽ “അവധി ദിവസങ്ങൾ” വിശ്രമ ദിവസ​ങ്ങ​ളാണ്‌.

ജർമൻകാർ, അവധി​ക്കാ​ലത്തെ “വർഷത്തി​ലെ ഏറ്റവും നല്ല ആഴ്‌ചകൾ” എന്നു വിളി​ക്കാൻ ഇഷ്ടപ്പെ​ടു​ന്നു. അതേസ​മയം തൊഴി​ലാ​സക്തർ ഇന്നത്തെ “അവധി ദിവസങ്ങ”ളെ അർഥവ​ത്തായ പ്രവർത്ത​ന​ങ്ങ​ളി​ല്ലാത്ത, തികച്ചും ശൂന്യ​ദി​വ​സ​ങ്ങ​ളാ​യി വീക്ഷി​ച്ചേ​ക്കാം. പക്ഷേ, ഇത്‌ അതിരു​കടന്ന ഒരു വീക്ഷണ​മാ​യി​രി​ക്കും. സമനി​ല​യോ​ടെ​യുള്ള ഒരു വീക്ഷണ​ഗതി, ഇടയ്‌ക്കി​ട​യ്‌ക്ക്‌ പതിവു ദിനച​ര്യ​യിൽ നിന്നൊ​ഴിഞ്ഞ്‌, വ്യത്യ​സ്‌ത​വും വിശ്ര​മ​ദാ​യ​ക​വു​മായ എന്തെങ്കി​ലും ചെയ്യു​ക​യെന്ന ജ്ഞാനത്തെ കൈ​ക്കൊ​ള്ളു​ന്നു.

1991-ൽ നടന്ന യൂറോ​പ്യൻ ബിസി​നസ്‌ എക്‌സി​ക്യു​ട്ടി​വു​ക​ളു​ടെ ഒരു സർവേ​യിൽ അവധി​ക്കാ​ല​ത്തി​ന്റെ നല്ല വശങ്ങൾ സ്ഥിരീ​ക​രി​ക്ക​പ്പെട്ടു. അവരിൽ 78 ശതമാനം പേർ, അവധി​ക്കാ​ലം “എക്‌സി​ക്യു​ട്ടിവ്‌ തളർച്ച ഒഴിവാ​ക്കാൻ തികച്ചും ആവശ്യ​മാണ്‌” എന്നു പറഞ്ഞു. നാലിൽ മൂന്നു ഭാഗത്തിന്‌ അവധി​ക്കാ​ലം തൊഴിൽ നിർവ​ഹണം മെച്ച​പ്പെ​ടു​ത്തു​ന്ന​താ​യും, മൂന്നിൽ രണ്ടു ഭാഗത്തി​ലേറെ പേർക്ക്‌, അവധി​ക്കാ​ലം സർഗാ​ത്മകത മെച്ച​പ്പെ​ടു​ത്തു​ന്ന​താ​യും തോന്നി. കുറേ​ക്കൂ​ടെ വ്യക്തമാ​യി, 64 ശതമാനം സ്‌ത്രീ​ക​ളും 41 ശതമാനം പുരു​ഷ​ന്മാ​രും, “ക്രമമായ അവധി​ക്കാ​ലം ലഭിക്കു​ന്നി​ല്ലെ​ങ്കിൽ എന്റെ സമനില തെറ്റും” എന്ന പ്രസ്‌താ​വ​ന​യോ​ടു യോജി​ച്ചു.

യാത്ര, അതിൽതന്നെ ഒരു പ്രബോ​ധ​നം

17-ാം നൂറ്റാ​ണ്ടി​ലെ ഇംഗ്ലീഷ്‌ ഡോക്ട​റും എഴുത്തു​കാ​ര​നു​മായ തോമസ്‌ ഫുള്ളർ എഴുതി: “ഏറെ യാത്ര ചെയ്യു​ന്ന​വന്‌ ഏറെ അറിവു​ണ്ടാ​യി​രി​ക്കും.” മറ്റു സ്ഥലങ്ങളി​ലെ ആളുക​ളു​മാ​യി പരിച​യ​ത്തി​ലാ​കാ​നും അവരുടെ ആചാര​ങ്ങ​ളെ​യും ജീവി​ത​രീ​തി​ക​ളെ​യും കുറിച്ചു പഠിക്കാ​നും യാത്ര നമ്മെ സഹായി​ക്കു​ന്നു. നമ്മു​ടേ​തി​നെ​ക്കാൾ താണ ജീവി​ത​നി​ല​വാ​ര​ങ്ങ​ളുള്ള രാജ്യ​ങ്ങ​ളിൽ യാത്ര​ചെ​യ്യു​ന്നത്‌, നമുക്കു​ള്ള​വ​യ്‌ക്കു​വേണ്ടി കൃതാർഥ​രാ​കാൻ നമ്മെ പഠിപ്പി​ക്കു​മെന്നു മാത്രമല്ല, നമുക്കു​ള്ള​ത്ര​യും സൗഭാ​ഗ്യ​ങ്ങ​ളി​ല്ലാത്ത ആളുകളെ കാണു​മ്പോൾ നമ്മിൽ സമാനു​ഭാ​വം ഉണർത്തു​ക​യും ചെയ്യും.

നാം അനുവ​ദി​ക്കു​ന്ന​പക്ഷം, യാത്ര നമുക്കുള്ള തെറ്റി​ദ്ധാ​ര​ണ​കളെ തിരു​ത്തു​ക​യും മുൻവി​ധി​കളെ ദൂരീ​ക​രി​ക്കു​ക​യും ചെയ്യും. നേരിട്ട്‌ ഒരു പുതിയ ഭാഷ കുറ​ച്ചെ​ങ്കി​ലും പഠിക്കാൻ, നമ്മുടെ അണ്ണാക്കി​നു സ്വാദു​പ​ക​രുന്ന തരം വിഭവങ്ങൾ രുചി​ച്ചു​നോ​ക്കാൻ, അല്ലെങ്കിൽ ദൈവ​ത്തി​ന്റെ സൃഷ്ടി​സൗ​ന്ദ​ര്യ​ത്തി​ന്റെ ദൃഷ്ടാ​ന്ത​ങ്ങൾകൊണ്ട്‌ നമ്മുടെ കുടുംബ ആൽബത്തി​ലെ ഫോ​ട്ടോ​കൾ, സ്ലൈഡ്‌ശേ​ഖരം, വീഡി​യോ ലൈ​ബ്രറി എന്നിവ​യു​ടെ എണ്ണം വർധി​പ്പി​ക്കാൻ ഒക്കെയുള്ള അവസരങ്ങൾ അതു നൽകുന്നു.

തീർച്ച​യാ​യും, ഏറ്റവും പ്രയോ​ജനം നേടണ​മെ​ങ്കിൽ വെറുതെ യാത്ര ചെയ്യുക എന്നതി​ലു​പ​രി​യാ​യി നാം പലതും ചെയ്യണം. സഹസഞ്ചാ​രി​കൾക്കൊ​പ്പം—ഒട്ടുമി​ക്ക​വ​രും സ്വന്തരാ​ജ്യ​ക്കാ​രായ—ഒരു ഹോട്ട​ലിൽ ഒതുങ്ങി​ക്കൂ​ടാ​നോ ഹോട്ട​ലി​ലെ സ്വകാര്യ തടാക​ത്തിൽ അല്ലെങ്കിൽ ബീച്ചിൽ നീന്താ​നോ വീട്ടിൽ കഴിക്കാ​റുള്ള അതേ ഭക്ഷണം കഴിക്കാ​നോ മാത്ര​മാ​യി ലോക​ത്തി​ന്റെ പകുതി​യോ​ളം യാത്ര​ചെ​യ്യുന്ന ഒരു സഞ്ചാരി അൽപ്പം എന്തെങ്കി​ലും പഠി​ച്ചെ​ങ്കി​ലാ​യി. എത്ര ശോച​നീ​യം! റിപ്പോർട്ടു​ക​ള​നു​സ​രിച്ച്‌, യാത്ര​ക്കാ​രിൽ ഭൂരി​ഭാ​ഗം പേരും തങ്ങൾ സന്ദർശി​ക്കുന്ന രാജ്യ​ങ്ങ​ളി​ലോ അവി​ടെ​യുള്ള ആളുക​ളി​ലോ ആത്മാർഥ​മായ താത്‌പ​ര്യ​മെ​ടു​ക്കു​ന്ന​തിൽ പരാജ​യ​പ്പെ​ടു​ന്നു.

ഉചിത​മായ തയ്യാ​റെ​ടുപ്പ്‌

യാത്ര​ചെ​യ്യുന്ന ഒരാൾ “തിരികെ വരു​മ്പോൾ അറിവു കൊണ്ടു​വ​ര​ണ​മെ​ങ്കിൽ പോകു​മ്പോൾ കൂടെ അറിവു കൊണ്ടു​പോ​കണ”മെന്ന്‌ 18-ാം നൂറ്റാ​ണ്ടി​ലെ ആംഗലേയ ഉപന്യാ​സ​കർത്താ​വും കവിയു​മായ സാമു​വേൽ ജോൺസൺ പറഞ്ഞു. അതു​കൊണ്ട്‌ നിങ്ങൾക്കു യാത്ര​യ്‌ക്കാ​യി അവസരം ലഭിക്കു​ന്ന​പക്ഷം, അതിനു​വേണ്ടി തയ്യാ​റെ​ടു​ക്കുക. പോകു​ന്ന​തി​നു​മു​മ്പു നിങ്ങളു​ടെ ലക്ഷ്യസ്ഥാ​ന​ത്തെ​ക്കു​റി​ച്ചു വായി​ച്ച​റി​യുക. നിങ്ങൾക്കു കാണാ​നും ചെയ്യാ​നു​ള്ള​തു​മായ കാര്യ​ങ്ങ​ളെ​ക്കു​റിച്ച്‌ ആസൂ​ത്രണം ചെയ്യുക. എന്നിട്ട്‌ അതിൻപ്ര​കാ​രം തയ്യാറാ​വുക. ഉദാഹ​ര​ണ​ത്തിന്‌, നിങ്ങൾക്കു ബീച്ചി​ലൂ​ടെ നടക്കണം അല്ലെങ്കിൽ പർവതം കയറണം എന്നിരി​ക്കട്ടെ. എങ്കിൽ, അതിനു​പ​റ്റിയ ഷൂസോ വസ്‌ത്ര​ങ്ങ​ളോ കരുതണം.

നിങ്ങളു​ടെ പട്ടിക​യി​ലേക്ക്‌ ആകാവു​ന്ന​തി​ല​ധി​കം തിരു​കി​ക്ക​യറ്റി അങ്ങനെ ദൈനം​ദിന ജീവി​ത​ത്തി​ന്റെ പിരി​മു​റു​ക്കം അവധി​ക്കാ​ല​ത്തും കൊണ്ടു​ന​ട​ക്കാൻ ശ്രമി​ക്ക​രുത്‌. അവിചാ​രി​ത​മായ കാര്യങ്ങൾ ചെയ്യു​ന്ന​തി​നു​വേണ്ടി ആസൂ​ത്രണം ചെയ്യാത്ത ധാരാളം സമയം നീക്കി​വെ​ക്കുക. തിരക്കുള്ള പട്ടിക​യു​ടെ സമ്മർദ​മി​ല്ലാ​തെ, ചിന്തി​ക്കാ​നും ധ്യാനി​ക്കാ​നു​മുള്ള സമയം ലഭിക്കു​ന്നു എന്നതാണ്‌ അവധി​ക്കാ​ലം കൊണ്ടുള്ള ഒരു പ്രയോ​ജനം. സമയബ​ന്ധിത ജീവി​ത​ത്തി​ലെ സമ്മർദ​ത്തിൽനി​ന്നും നിയ​ന്ത്ര​ണ​ങ്ങ​ളിൽനി​ന്നും വിടുതൽ ലഭിച്ച​താ​യും തോന്നും.

ഏറെ പ്രതി​ഫ​ല​ദാ​യ​ക​മായ ഒരു അവധി​ക്കാ​ല​ത്തിൽ കഠിനാ​ധ്വാ​നം​പോ​ലും ഉൾപ്പെ​ട്ടേ​ക്കാം. പൊതു​വേ, വ്യത്യ​സ്‌ത​മായ ഒരു കാര്യം ചെയ്യു​ന്ന​താ​ണു നല്ല അവധി​ക്കാ​ല​ത്തി​നുള്ള താക്കോൽ. ഉദാഹ​ര​ണ​ത്തിന്‌, ഐക്യ​നാ​ടു​ക​ളിൽ വോള​ണ്ടി​യർ വെക്കേ​ഷൻസ്‌ എന്നു വിളി​ക്ക​പ്പെ​ടുന്ന ഒരു ലാഭര​ഹിത സംഘടന, ദേശീയ പാർക്കു​ക​ളും വനങ്ങളും സംരക്ഷി​ച്ചു​കൊണ്ട്‌ അവധി​ക്കാ​ലം ചെലവ​ഴി​ക്കാൻ തക്കവണ്ണം സന്നദ്ധ​സേ​വ​കരെ ക്രമീ​ക​രി​ക്കു​ന്നു. താൻ കഠിന​മാ​യി വേല ചെയ്‌തെ​ങ്കി​ലും അതു വളരെ ആസ്വാ​ദ്യ​മാ​യി​രു​ന്ന​തി​നാൽ ഒരു വർഷത്തി​നു​ശേഷം ഈ അനുഭവം ആവർത്തി​ക്കാൻ തീരു​മാ​നി​ച്ചി​രി​ക്കു​ന്ന​താ​യി ഒരു സന്നദ്ധ​സേ​വകൻ പറഞ്ഞു.

യഹോ​വ​യു​ടെ സാക്ഷികൾ പൊതു​വേ, ക്രിസ്‌തീയ കൺ​വെൻ​ഷ​നു​ക​ളിൽ സംബന്ധി​ക്കാ​നോ തങ്ങളുടെ പരസ്യ​ശു​ശ്രൂഷ വ്യാപി​പ്പി​ക്കാ​നോ സഞ്ചരി​ക്കു​ന്ന​തി​നാ​ണു തങ്ങളുടെ അവധി​ക്കാ​ലം ഉപയോ​ഗി​ക്കു​ന്നത്‌. അതതു രാജ്യ​ത്തുള്ള യഹോ​വ​യു​ടെ സാക്ഷി​ക​ളു​ടെ ഹെഡ്‌ക്വാർട്ടേ​ഴ്‌സി​ലോ ബ്രാഞ്ച്‌ ഓഫീ​സു​ക​ളി​ലോ വേല ചെയ്യു​ന്ന​തി​നു ചിലർ തങ്ങളുടെ അവധി​ക്കാ​ലം ഉപയോ​ഗി​ക്കു​ന്നു, ആ അനുഭവം അവർ ആസ്വദി​ക്കു​ക​യും ചെയ്യുന്നു. ഇവരിൽ പലരും പിന്നീട്‌ ആ പദവിയെ വിലമ​തി​ച്ചു​കൊ​ണ്ടുള്ള കത്തുകൾ എഴുതു​ന്നു.

അതേ, അവധി​ക്കാ​ലം ഏറ്റവും ഉല്ലാസ​പ്ര​ദ​മായ ഒന്നാ​യേ​ക്കാം, വർഷത്തി​ലെ ഏറ്റവും നല്ല ആഴ്‌ചകൾ പോലു​മാ​യി​രി​ക്കാം. കുട്ടികൾ അവധി​ക്കാ​ല​ത്തി​നാ​യി ദിവസ​ങ്ങ​ളെ​ണ്ണി​ക്ക​ഴി​യു​ന്ന​തിൽ അതിശ​യി​ക്കാ​നില്ല! എങ്കിലും, നിങ്ങൾ ജാഗ്രത പുലർത്തേ​ണ്ട​തായ കാര്യ​ങ്ങ​ളുണ്ട്‌. പിൻവ​രുന്ന ലേഖനം അതു വിശദീ​ക​രി​ക്കും.