അനേകർ കടത്തി​ലാ​യി​രി​ക്കു​ന്ന​തി​ന്റെ കാരണം

മധുവി​ധു ആഘോ​ഷി​ച്ചി​ട​ത്തേക്കു മടങ്ങി​ക്കൊണ്ട്‌ മൈക്കി​ളും റീനയും തങ്ങളുടെ ഒന്നാം വിവാഹ വാർഷി​കം കൊണ്ടാ​ടി. എന്നാൽ അവരുടെ വിവാ​ഹ​ത്തി​ന്റെ രണ്ടാം വർഷത്തി​ന്റെ ആരംഭ​ത്തിൽ അവർ ഒരു അസുഖ​ക​ര​മായ യാഥാർഥ്യ​ത്തെ മുഖാ​മു​ഖം കണ്ടു. എത്രമാ​ത്രം ചെലവു ചുരു​ക്കി​യി​ട്ടും അവർക്കു തങ്ങളുടെ ബില്ലു​ക​ളെ​ല്ലാം അടച്ചു​തീർക്കാൻ കഴിഞ്ഞില്ല.

മറ്റൊരു ദമ്പതി​ക​ളു​ടെ കാര്യം പരിഗ​ണി​ക്കുക. റോണ്ടയെ വിവാഹം കഴിച്ച​പ്പോൾ റോബർട്ടിന്‌ ഒരു ചെറിയ വിദ്യാർഥി വായ്‌പയേ അടച്ചു​തീർക്കാൻ ഉണ്ടായി​രു​ന്നു​ള്ളൂ, അവൾക്കാ​ണെ​ങ്കിൽ തന്റെ കാറിന്റെ പണം ഗഡുക്ക​ളാ​യി അടയ്‌ക്കേ​ണ്ടതേ ഉണ്ടായി​രു​ന്നു​ള്ളൂ. റോബർട്ട്‌ പറയുന്നു: “ഞങ്ങൾ മുഴു​സ​മയം ജോലി​ചെ​യ്‌ത്‌ ഇരുവ​രും​കൂ​ടി മാസം​തോ​റും 2,950 ഡോളർ സമ്പാദി​ച്ചു. പക്ഷേ, ഞങ്ങൾക്ക്‌ എങ്ങും എത്താനാ​യില്ല.” “ഞങ്ങൾ കാര്യ​മാ​യി എന്തെങ്കി​ലും വാങ്ങു​ക​യോ അസാധാ​ര​ണ​മാ​യി എന്തെങ്കി​ലും ചെയ്യു​ക​യോ ചെയ്‌തില്ല. ഞങ്ങളുടെ പണം എവിടെ പോകു​ക​യാ​യി​രു​ന്നു​വെന്ന്‌ എനിക്കു മനസ്സി​ലാ​ക്കാ​നേ കഴിഞ്ഞില്ല,” റോണ്ട പറയുന്നു.

റോബർട്ടും റോണ്ട​യും അലസരാ​യി​രു​ന്നില്ല. അതു​പോ​ലെ​തന്നെ മൈക്കി​ളും റീനയും. എന്തായി​രു​ന്നു അവരുടെ പ്രശ്‌നം? ക്രെഡിറ്റ്‌ കാർഡ്‌ കടങ്ങൾ. വിവാ​ഹ​ത്തി​ന്റെ ആദ്യ വർഷം മൈക്കി​ളും റീനയും തങ്ങളുടെ ക്രെഡിറ്റ്‌ കാർഡിൽ 14,000 ഡോളർ കടം വരുത്തി. വിവാ​ഹി​ത​രാ​യി രണ്ടു വർഷം കഴിഞ്ഞ​പ്പോ​ഴേ​ക്കും റോബർട്ടി​ന്റെ​യും റോണ്ട​യു​ടെ​യും ക്രെഡിറ്റ്‌ കാർഡി​ലെ കടം മൊത്തം 6,000 ഡോള​റാ​യി.

കുടും​ബ​സ്ഥ​നും മദ്ധ്യവ​യ​സ്‌ക​നു​മായ അന്തോ​ണി​യും ജീവി​ത​ത്തി​ലെ സാമ്പത്തിക പ്രതി​സ​ന്ധി​യെ അഭിമു​ഖീ​ക​രി​ച്ചു. എന്നാൽ അദ്ദേഹ​ത്തി​ന്റെ പ്രശ്‌നം ക്രെഡിറ്റ്‌ കാർഡു​ക​ളു​മാ​യി ബന്ധപ്പെ​ട്ട​താ​യി​രു​ന്നില്ല. അദ്ദേഹം ജോലി​ചെ​യ്‌തു​കൊ​ണ്ടി​രുന്ന കമ്പനി 1993-ൽ ചെറു​താ​കു​ക​യും പ്രതി​വർഷം 48,000 ഡോളർ ലഭിക്കു​മാ​യി​രുന്ന മാനേജർ ജോലി അന്തോ​ണി​ക്കു നഷ്ടപ്പെ​ടു​ക​യും ചെയ്‌തു. അതിനു​ശേഷം തന്റെ നാലംഗ കുടും​ബ​ത്തി​നു​വേണ്ടി കരുതു​ന്നത്‌ അദ്ദേഹ​ത്തിന്‌ ഒരു വലിയ വെല്ലു​വി​ളി​യാ​യി​ത്തീർന്നു. സമാന​മാ​യി, ന്യൂ​യോർക്ക്‌ നഗരത്തിൽ വസിക്കുന്ന, ഭർത്താ​വി​ല്ലാത്ത മാതാ​വായ ജാനെ​റ്റിന്‌ ഏകദേശം 11,000 ഡോളർ വാർഷിക വരുമാ​നം​കൊ​ണ്ടു കഷ്ടിച്ചേ ചെലവു​കൾ വഹിക്കാൻ കഴിഞ്ഞു​ള്ളൂ.

ഉചിത​മാ​യി കൈകാ​ര്യം ചെയ്‌തു​കൊ​ണ്ടു മിക്ക പണപ്ര​ശ്‌ന​ങ്ങ​ളും ലഘൂക​രി​ക്കാ​മെ​ന്നതു സത്യമാ​ണെ​ങ്കി​ലും, “തങ്ങളുടെ വ്യർത്ഥ​ബു​ദ്ധി അനുസ​രി​ച്ചു നടക്കുന്ന”തിനാൽ അനേക​രും പ്രതി​കൂല സാഹച​ര്യ​ത്തി​ലാ​യി​രി​ക്കുന്ന ഒരു കാലത്താണ്‌ നാം ജീവി​ക്കു​ന്നത്‌ എന്നതാണു യാഥാർഥ്യം. (എഫെസ്യർ 4:17) ഗ്രേസ്‌ ഡബ്ലിയു. വിൻസ്റ്റിൻ ദ ലൈഫ്‌ടൈം ബുക്ക്‌ ഓഫ്‌ മണി മാനേ​ജ്‌മെൻറ്‌ എന്ന തന്റെ പുസ്‌ത​ക​ത്തിൽ ഇങ്ങനെ അഭി​പ്രാ​യ​പ്പെ​ടു​ന്നു: “പ്രവച​നാ​തീ​ത​മായ സമ്പദ്‌വ്യ​വസ്ഥ, ചെലവാ​ക്കു​ന്ന​തും മിച്ചം​വെ​ക്കു​ന്ന​തും സംബന്ധിച്ച പുതിയ മനോ​ഭാ​വങ്ങൾ, മാറ്റം​ഭ​വി​ക്കുന്ന ജീവി​ത​രീ​തി​കൾ എന്നിവ​യാൽ സാമ്പത്തിക തന്ത്രത്തി​ന്റെ ഒട്ടുമിക്ക വ്യവസ്ഥ​ക​ളും മാറി​യി​രി​ക്കു​ന്നു, കീഴ്‌മേൽ മറിഞ്ഞി​രി​ക്കു​ന്നു.” നാം ജീവി​ക്കുന്ന കുഴഞ്ഞു​മ​റിഞ്ഞ ഈ ലോക​ത്തിൽ, വ്യക്തി​പ​ര​വും കുടും​ബ​പ​ര​വു​മായ പണം ഫലപ്ര​ദ​മാ​യി കൈകാ​ര്യം ചെയ്യു​ന്നതു കൂടുതൽ ദുഷ്‌ക​ര​മാ​ണെന്ന്‌ അധിക​മ​ധി​കം ആളുക​ളും കണ്ടെത്തു​ന്നു.

സന്തോ​ഷ​ക​ര​മെ​ന്നു പറയട്ടെ, മൈക്കി​ളും റീനയും, റോബർട്ടും റോണ്ട​യും, അന്തോണി, ജാനെറ്റ്‌ എന്നിവ​രും തങ്ങളുടെ പണം കൈകാ​ര്യം ചെയ്യു​ന്ന​തിൽ വിജയി​ച്ചി​രി​ക്കു​ന്നു. അവരെ സഹായി​ച്ചത്‌ എന്താ​ണെന്നു പരി​ശോ​ധി​ക്കു​ന്ന​തി​നു മുമ്പ്‌, അനേകർക്കും കടം കുന്നു​കൂ​ടാൻ ഇടയാ​ക്കി​യി​രി​ക്കുന്ന, പണമി​ട​പാ​ടി​ന്റെ അനായാസ രൂപത്തെ—അതേ, ക്രെഡിറ്റ്‌ കാർഡു​കളെ—നമു​ക്കൊന്ന്‌ അടുത്തു നിരീ​ക്ഷി​ക്കാം.