അസ്ഥി​ദ്ര​വീ​ക​രണം—‘അസ്ഥികളെ ദ്രവി​പ്പി​ക്കുന്ന’ രോഗം

“അസ്ഥിക​ല​യു​ടെ അളവു വല്ലാതെ കുറഞ്ഞു​പോ​കു​ക​യും അതു നിമിത്തം അസ്ഥികൾ ചെറിയ സമ്മർദ​ങ്ങ​ളു​ണ്ടാ​യാൽപോ​ലും ഒടിഞ്ഞു​പോ​കു​ക​യും ചെയ്യുന്ന അവസ്ഥയാണ്‌ അസ്ഥി​ദ്ര​വീ​ക​രണം. അസ്ഥി​ദ്ര​വീ​ക​ര​ണ​മുള്ള വ്യക്തി വെറുതേ മഞ്ഞി​ലൊ​ന്നു തെന്നി വീണാൽ മതി അയാളു​ടെ കണങ്കയ്യോ ഇടു​പ്പെ​ല്ലോ ഒടിയാൻ. അല്ലെങ്കിൽ സ്‌നേ​ഹ​പൂർവ​മുള്ള ഒരു ആശ്ലേഷം അയാളു​ടെ വാരി​യെല്ല്‌ ഒടി​ച്ചേ​ക്കാം. വാസ്‌ത​വ​ത്തിൽ, ഒരു വ്യക്തി സ്വന്തം ശരീര​ഭാ​രം താങ്ങു​ന്ന​തു​കൊ​ണ്ടു മാത്രം അയാളു​ടെ നട്ടെ​ല്ലൊ​ടി​ഞ്ഞു പോകാൻത​ക്ക​വണ്ണം അസ്ഥിക​ല​യു​ടെ അളവ്‌ അത്ര കുറവാ​യി​രു​ന്നേ​ക്കാം.”—ജോൺ എഫ്‌. അലോ​യിയ, എം.ഡി.-യുടെ “അസ്ഥി​ദ്ര​വീ​ക​രണം—രോഗ​പ്ര​തി​രോ​ധ​ത്തി​നും ചികി​ത്സ​യ്‌ക്കു​മുള്ള ഒരു വഴികാ​ട്ടി” (ഇംഗ്ലീഷ്‌).

നിങ്ങൾ അസ്ഥി​ദ്ര​വീ​ക​രണം നിമിത്തം യാതന​യ​നു​ഭ​വി​ക്കു​ക​യാ​ണോ? അസ്ഥികളെ ക്ഷയിപ്പി​ക്കുന്ന ഈ രോഗം ആർത്തവം നിലച്ച സ്‌ത്രീ​ക​ളിൽ സാധാ​ര​ണ​മാ​യി കണ്ടുവ​രു​ന്നു. എങ്കിലും ഇതു യുവതി​ക​ളെ​യും പുരു​ഷ​ന്മാ​രെ​യും ചില​പ്പോൾ ബാധി​ച്ചേ​ക്കാം. യു.എസ്‌. ദേശീയ ആരോ​ഗ്യ​പ​രി​പാ​ലന ഇൻസ്റ്റി​റ്റ്യൂ​ട്ടു​കൾ പറയു​ന്ന​ത​നു​സ​രിച്ച്‌ “ഐക്യ​നാ​ടു​ക​ളിൽ മാത്രം 1.5 കോടി​മു​തൽ 2 കോടി​വരെ ആളുകൾ” അസ്ഥി​ദ്ര​വീ​ക​ര​ണ​മു​ള്ള​വ​രാണ്‌. ഐക്യ​നാ​ടു​ക​ളിൽ ഓരോ വർഷവും, 45-ഉം അതിനു മേലേ​യും പ്രായ​മു​ള്ള​വ​രു​ടെ ഇടയിൽ ഉണ്ടാകുന്ന അസ്ഥി​പൊ​ട്ട​ലു​ക​ളിൽ 13 ലക്ഷം കേസു​ക​ളു​ടെ​യും കാരണം അസ്ഥി​ദ്ര​വീ​ക​ര​ണ​മാ​ണെന്നു പറയ​പ്പെ​ടു​ന്നു. ഇതിനു​വേണ്ടി പ്രതി​വർഷം 380 കോടി ഡോളർ ചെലവി​ടേ​ണ്ടി​വ​രു​ന്നു.

കാലി​ഫോർണി​യ വൈദ്യ വിദ്യാ​ഭ്യാ​സ ഗവേഷണ സ്ഥാപന​ത്തി​ന്റെ ഒരു പ്രസി​ദ്ധീ​ക​ര​ണ​മായ ആരോഗ്യ നുറു​ങ്ങു​കൾ (ഇംഗ്ലീഷ്‌) ഇങ്ങനെ വിശദീ​ക​രി​ക്കു​ന്നു: “അസ്ഥി​ദ്ര​വീ​ക​ര​ണ​ത്തി​ന്റെ ലക്ഷണങ്ങൾ വെളി​ച്ച​ത്തു​വ​രാൻ തുടങ്ങു​ന്നത്‌ വാർധ​ക്യ​ദ​ശ​യി​ലാ​ണെ​ങ്കി​ലും അസ്ഥികളെ ക്ഷയിപ്പി​ക്കുന്ന പ്രക്രിയ വാസ്‌ത​വ​ത്തിൽ ആരംഭി​ക്കു​ന്നത്‌ ആദ്യത്തെ ഒടിവു​ണ്ടാ​കു​ന്ന​തിന്‌ 30 മുതൽ 40 വരെ വർഷം മുമ്പാണ്‌. 35 വയസ്സി​നു​ശേഷം പുരു​ഷ​ന്മാർക്കും സ്‌ത്രീ​കൾക്കും അസ്ഥിയു​ടെ തൂക്കം കുറയാൻ തുടങ്ങു​ന്നു. അസ്ഥികൾക്കു തൂക്കവും കട്ടിയും കുറയു​ന്ന​ത​നു​സ​രിച്ച്‌ അത്‌ ഒടിയാൻ കൂടുതൽ സാധ്യ​ത​യുണ്ട്‌. അസ്ഥി പുനർനിർമി​ക്കാൻ ശരീര​ത്തി​നു മുമ്പു​ണ്ടാ​യി​രുന്ന കഴിവു കുറഞ്ഞു​പോ​യ​തി​നാൽ പൂർവ​സ്ഥി​തി പ്രാപി​ക്കാൻ വളരെ സമയ​മെ​ടു​ക്കു​ക​യും ചെയ്യും. അസ്ഥി​ദ്ര​വീ​ക​ര​ണ​ത്തി​ന്റെ കൃത്യ​മായ കാരണം ഇതുവരെ അറിവാ​യി​ട്ടി​ല്ലെ​ങ്കി​ലും, ഭക്ഷണ​ക്ര​മ​ത്തി​ലെ കാൽസ്യ​ത്തി​ന്റെ​യും ജീവകം ഡി-യുടെ​യും കുറവ്‌, സ്‌ത്രീ​ക​ളിൽ ഈസ്‌ട്ര​ജന്റെ കുറവ്‌, വ്യായാ​മ​ത്തി​ന്റെ അപര്യാ​പ്‌തത എന്നിവ​യെ​ല്ലാം ഇതിനു കാരണ​മാ​കാം.”

നിങ്ങളു​ടെ ശരീരത്തെ മനസ്സി​ലാ​ക്കൽ—ആയുഷ്‌കാല ആരോ​ഗ്യ​ത്തിന്‌ ഓരോ സ്‌ത്രീ​യു​ടെ​യും വഴികാ​ട്ടി (ഇംഗ്ലീഷ്‌) എന്ന പുസ്‌തകം ആർത്തവ​വി​രാ​മ​വു​മാ​യി ബന്ധപ്പെട്ടു കാണുന്ന രോഗ​ല​ക്ഷ​ണ​ങ്ങ​ളിൽ സർവസാ​ധാ​ര​ണ​മായ ഒന്നാണ്‌ അസ്ഥിയു​ടെ ബലക്ഷയം എന്ന്‌ അഭി​പ്രാ​യ​പ്പെ​ടു​ന്നു. അതിങ്ങനെ പറയുന്നു: “അസ്ഥി​ദ്ര​വീ​ക​രണം, അതായത്‌ അക്ഷരാർഥ​ത്തിൽ സുഷി​രങ്ങൾ വീണ അസ്ഥികൾ, ആർത്തവം നിലച്ച സ്‌ത്രീ​ക​ളു​ടെ ഇടയിലെ മുഖ്യ​വും സാധാ​ര​ണ​വു​മായ ഒരു ആരോ​ഗ്യ​പ്ര​ശ്‌ന​മാണ്‌.”

അസ്ഥി​ദ്ര​വീ​ക​ര​ണത്തെ പ്രതി​രോ​ധി​ക്കാ​നും ചികി​ത്സി​ക്കാ​നും സാധി​ക്കു​മെ​ന്നാ​ണു ഗവേഷ​ണങ്ങൾ സൂചി​പ്പി​ക്കു​ന്നത്‌. ഒരു പ്രതി​രോധ നടപടി, വേണ്ടത്ര കാൽസ്യ​വും അത്‌ ആഗിരണം ചെയ്യു​ന്ന​തിന്‌ അനിവാ​ര്യ​മായ ജീവകം ഡി-യും ശരീര​ത്തി​നു ലഭിക്കുന്ന കാര്യ​ത്തിൽ ശ്രദ്ധി​ക്കു​ക​യാണ്‌. മറ്റൊരു പ്രതി​രോധ നടപടി ഓട്ടമോ നടപ്പോ​പോ​ലെ കരുത്തു പകരുന്ന ക്രമമായ വ്യായാ​മ​മാണ്‌.

ഡോ. കാരൾ ഇ. ഗുഡ്‌മാൻ വൃദ്ധചി​കി​ത്സ​യിൽ (ഇംഗ്ലീഷ്‌) ഇങ്ങനെ പറഞ്ഞു: “ശരീര​നില നേരേ​യാ​ക്കാ​നും ശക്തി പ്രദാനം ചെയ്യുന്ന വ്യായാ​മ​ങ്ങ​ളി​ലേർപ്പെ​ടാ​നും നിർദേ​ശി​ക്കണം—മരുന്നു കൊടു​ക്കു​ന്ന​തിൽ നാം എത്രമാ​ത്രം ശ്രദ്ധ ചെലു​ത്തു​ന്നു​വോ അത്രതന്നെ പ്രാധാ​ന്യം ഈ നിർദേ​ശങ്ങൾ പാലി​ക്കു​ന്ന​തി​നും കൊടു​ക്കണം. അസ്ഥി​ദ്ര​വീ​ക​രണം ബാധിച്ച പ്രായ​മായ ഒരു വ്യക്തിക്കു നൽകുന്ന മാതൃകാ വ്യായാമ പരിപാ​ടി​യു​ടെ നിർദേ​ശങ്ങൾ മനസ്സി​ലാ​ക്കാൻ എളുപ്പ​മു​ള്ള​തും ലളിത​വും സുരക്ഷി​ത​വു​മാ​യി​രി​ക്കണം.”

അസ്ഥി​ദ്ര​വീ​ക​ര​ണം ചികി​ത്സി​ച്ചു മാറ്റാൻ സാധ്യ​മ​ല്ലെ​ങ്കി​ലും സഹായ​ക​മായ പുതി​യ​തരം മരുന്നു​കൾ ഇപ്പോൾ ലഭ്യമാ​യി​വ​രു​ന്നു. കൂടു​ത​ലാ​യി, ശരിയായ പോഷ​കാ​ഹാ​രം കൊണ്ടും വേണ്ടവി​ധ​ത്തി​ലുള്ള വ്യായാ​മം​കൊ​ണ്ടും ചിലരിൽ ഹോർമോൺ പ്രതി​സ്ഥാ​പന ചികി​ത്സ​കൊ​ണ്ടും രോഗ​പ്ര​തി​രോ​ധം സാധ്യ​മാണ്‌. ഏറ്റവും നല്ല ഫലങ്ങൾ ലഭിക്കു​ന്ന​തിന്‌, അസ്ഥിയു​ടെ തൂക്കം നഷ്ടപ്പെ​ടാൻ ആരംഭി​ക്കു​ന്ന​തി​നു മുമ്പു​തന്നെ ഈ നടപടി​കൾ കൈ​ക്കൊ​ള്ളു​ക​യും ജീവി​ത​കാ​ലം മുഴുവൻ തുടരു​ക​യും വേണം.

[17-ാം പേജിലെ ചതുരം]

സാധാരണ ആഹാര​ങ്ങ​ളി​ലുള്ള കാൽസ്യം

ഭക്ഷണത്തിലെ കാൽസ്യം (മില്ലി​ഗ്രാം)

കൊഴുപ്പു നീക്കം ചെയ്‌ത പാൽ, 1 കപ്പ്‌ 300

ചെഡർ പാൽക്കട്ടി, 1 ഇഞ്ച്‌ സമചതു​രക്കട്ട 130

തൈര്‌, 1 കപ്പ്‌ 300

മാട്ടിറച്ചി, കോഴി​യി​റച്ചി, മത്സ്യം, 170 ഗ്രാം 30-80

ടിന്നിലടച്ച സാൽമൺ മത്സ്യം, 85 ഗ്രാം 170

റൊട്ടി, ധാന്യങ്ങൾ, ചോറ്‌, 1 കപ്പ്‌ 20-50

ടോഫൂ (സോയാ​ബീൻ ചേർത്ത തൈര്‌), 100 ഗ്രാം 150

ബദാം പരിപ്പ്‌, 1/2 കപ്പ്‌ 160

വാൽനട്ട്‌, 1/2 കപ്പ്‌ 50

ബ്രോക്കൊലി, 1 തണ്ട്‌ 150

ചീര, 1 കപ്പ്‌ 200

മധുരമുള്ളങ്കി ഇലകൾ, 1 കപ്പ്‌ 250

മറ്റു മിക്ക പച്ചക്കറി​ക​ളും, 1 കപ്പ്‌ 40-80

ഉണങ്ങിയ ശീമബ​ദാം പഴം, 1 കപ്പ്‌ 100

കുരുകളഞ്ഞ ഈന്തപ്പഴം, 1 കപ്പ്‌ 100

റൂബർബ്‌, 1 കപ്പ്‌ 200

മറ്റു മിക്ക പഴങ്ങളും, 1 കപ്പ്‌ 20-70

ഫെലീഷിയ സ്റ്റ്യു​വെർട്ട്‌, ഗാരി സ്റ്റ്യു​വെർട്ട്‌, ഫെലിഷ്യ ഗെസ്റ്റ്‌, റോബർട്ട്‌ ഹാച്ചെർ എന്നിവ​രു​ടെ നിങ്ങളു​ടെ ശരീരത്തെ മനസ്സി​ലാ​ക്കൽ (ഇംഗ്ലീഷ്‌) എന്ന പുസ്‌ത​ക​ത്തി​ന്റെ 596-ാം പേജിൽനിന്ന്‌.

[17-ാം പേജിലെ ചതുരം]

അസ്ഥിദ്രവീകരണത്തിൽ നിന്നുള്ള സംരക്ഷ​ണ​ത്തിന്‌

1. കാൽസ്യം

2. ജീവകം ഡി

3. സൂര്യ​പ്ര​കാ​ശം

4. നല്ല ശരീര​നി​ല

5. മുതു​കി​നു വേണ്ട പരിപാ​ലനം നൽകാൻ നടപടി​ക​ളെ​ടു​ക്കൽ

6. വ്യായാ​മം

7. പുകവ​ലി​ക്കാ​തി​രി​ക്കൽ

[17-ാം പേജിലെ ചതുരം]

അസ്ഥിദ്രവീകരണത്തിന്‌ ഇടയാ​ക്കുന്ന ചില ഘടകങ്ങൾ

പാരമ്പര്യ ഘടകങ്ങൾ

സ്‌ത്രീയായിരിക്കുന്നത്‌

കറുത്ത വർഗത്തിൽപ്പെ​ടാ​ത്തത്‌

വടക്കൻ യൂറോ​പ്യൻ വംശപ​ര​മ്പ​ര​യിൽപ്പെ​ടു​ന്നത്‌

വെളുത്ത നിറം

മെലിഞ്ഞിരിക്കുന്നത്‌

പൊക്കക്കുറവ്‌ (അഞ്ചടി രണ്ടിഞ്ചോ അതിൽ താഴെ​യോ)

ജീവിതരീതിയുടെ ഘടകങ്ങൾ

ആഴ്‌ചയിൽ മൂന്നു മണിക്കൂ​റെ​ങ്കി​ലും പുറത്തു​പോ​യി സൂര്യ​പ്ര​കാ​ശ​മേൽക്കാ​തി​രി​ക്കു​ന്നത്‌

കാൽസ്യത്തിന്റെ കുറവ്‌

കഫീനും ഫോസ്‌ഫേ​റ്റും അധികം കഴിക്കു​ന്നത്‌

ചികിത്സകൾ

അലുമിനിയം അടങ്ങിയ അൻറാ​സി​ഡു​കൾ

തൈറോയിഡ്‌ അല്ലെങ്കിൽ ലീവോ​തൈ​റാ​ക്‌സിൻ

സ്റ്റീറോയിഡ്‌ (കോർട്ടി​സോൺ)

ഡിലാൻറിൻ (ദീർഘ​നാൾ നീണ്ടു​നിൽക്കുന്ന ചികിത്സ)

ഫ്യൂറോസിമൈഡ്‌ (ഡൈയൂ​റെ​റ്റിക്‌)

വൈദ്യസംബന്ധമായ പ്രശ്‌ന​ങ്ങൾ

നേരത്തേ അല്ലെങ്കിൽ അകാല​ത്തി​ലുള്ള ആർത്തവ​വി​രാ​മം

അമെനോറിയ (ആർത്തവ​മി​ല്ലായ്‌മ)

മാനസികവും ശാരീ​രി​ക​വു​മായ കാരണ​ങ്ങ​ളാ​ലുള്ള വിശപ്പി​ല്ലാ​യ്‌മ

ഹൈപ്പർതൈറോയിഡിസം (തൈ​റോ​യി​ഡി​ന്റെ ആധിക്യം)

വൃക്ക രോഗ​ങ്ങ​ളോ അതിലെ കല്ലുക​ളോ

പ്രമേഹം

ലാക്‌റ്റേസിന്റെ കുറവ്‌ (പാൽ ഇഷ്ടമി​ല്ലായ്‌മ)

ഉദര രോഗങ്ങൾ (വൻകു​ടൽവീ​ക്കം, ചെറു​കു​ടൽവീ​ക്കം)

മദ്യാസക്തി

പരിപൂർണ വിശ്രമം അല്ലെങ്കിൽ മൂന്നാ​ഴ്‌ച​യി​ലേറെ ശരീര​മ​ന​ക്കാ​തി​രി​ക്കൽ

വാതരോഗസംബന്ധമായ സന്ധിവീ​ക്കം