‘തൃപ്‌ത​നാ​യി​രി​ക്കാ​നുള്ള വിദ്യ’ നിങ്ങൾ പഠിച്ചി​ട്ടു​ണ്ടോ?

1. തൃപ്‌ത​രാ​യി​രി​ക്കുക എന്നാൽ എന്താണ്‌, എന്തല്ല?

നിങ്ങൾ തൃപ്‌ത​നാ​ണോ? തൃപ്‌ത​നായ ഒരാൾ തനിക്ക്‌ ഇപ്പോ​ഴുള്ള അനു​ഗ്ര​ഹ​ങ്ങ​ളെ​ക്കു​റിച്ച്‌ ചിന്തിച്ച്‌ അതിൽ സന്തോ​ഷ​വും സമാധാ​ന​വും കണ്ടെത്തും. അദ്ദേഹം തനിക്കി​ല്ലാത്ത കാര്യ​ങ്ങ​ളെ​ക്കു​റിച്ച്‌ ഓർത്ത്‌ നിരാ​ശ​പ്പെ​ടു​ക​യോ ദേഷ്യ​പ്പെ​ടു​ക​യോ ഇല്ല. എന്നാൽ തൃപ്‌തി​യു​ണ്ടാ​യി​രി​ക്കുക എന്നതിന്റെ അർഥം ഒന്നും ചെയ്യാതെ അലസമാ​യി ജീവി​ക്കുക എന്നല്ല. ഉദാഹ​ര​ണ​ത്തിന്‌, ദൈവ​സേ​വ​ന​ത്തിൽ കൂടുതൽ ചെയ്യാൻ ഒരു ക്രിസ്‌ത്യാ​നി പരി​ശ്ര​മി​ക്കു​ക​തന്നെ വേണം. (റോമ. 12:1; 1 തിമൊ. 3:1) പക്ഷേ ഒരാൾ തൃപ്‌ത​നാ​ണെ​ങ്കിൽ പ്രതീ​ക്ഷി​ക്കുന്ന വേഗത്തിൽ ഒരു നിയമനം കിട്ടി​യി​ല്ലെ​ങ്കി​ലും അദ്ദേഹ​ത്തി​ന്റെ സന്തോഷം നഷ്ടപ്പെ​ടില്ല.

2. ഉള്ളതിൽ തൃപ്‌ത​ര​ല്ലെ​ങ്കിൽ നമുക്ക്‌ എന്ത്‌ അപകടം സംഭവി​ച്ചേ​ക്കാം?

² ഉള്ള കാര്യ​ങ്ങ​ളിൽ തൃപ്‌ത​ര​ല്ലെ​ങ്കിൽ നമ്മൾ തെറ്റായ തീരു​മാ​ന​ങ്ങ​ളെ​ടു​ക്കാൻ തുടങ്ങി​യേ​ക്കാം. ഉദാഹ​ര​ണ​ത്തിന്‌ തങ്ങൾക്കുള്ള ഭൗതി​ക​വ​സ്‌തു​ക്ക​ളിൽ തൃപ്‌ത​ന​ല്ലാത്ത ഒരാൾ ആവശ്യ​മി​ല്ലാത്ത സാധനങ്ങൾ വാങ്ങി​ക്കൂ​ട്ടാ​നാ​യി അധികം സമയം ജോലി ചെയ്യാൻ തീരു​മാ​നി​ച്ചേ​ക്കാം. സങ്കടക​ര​മായ കാര്യം, ചില ക്രിസ്‌ത്യാ​നി​കൾ പണമോ തങ്ങൾ ആഗ്രഹിച്ച സാധന​ങ്ങ​ളോ ഒക്കെ മോഷ്ടി​ക്കു​ക​പോ​ലും ചെയ്‌തി​രി​ക്കു​ന്നു. അവർ ചില​പ്പോൾ ഇങ്ങനെ ന്യായീ​ക​രി​ച്ചി​ട്ടു​ണ്ടാ​കാം: ‘എനിക്കി​പ്പോൾ ഇത്‌ ആവശ്യ​മുണ്ട്‌,’ ‘ഇത്‌ ശരിക്കും എനിക്ക്‌ അർഹത​പ്പെ​ട്ട​താണ്‌,’ ‘ഞാൻ പിന്നീട്‌ ഈ പണം തിരി​ച്ചു​കൊ​ടു​ക്കും.’ എന്തൊക്കെ പറഞ്ഞാ​ലും, ഏതു തരത്തി​ലുള്ള മോഷ​ണ​വും യഹോ​വ​യ്‌ക്കു വെറു​പ്പാണ്‌. അതു ദൈവ​ത്തി​നു നിന്ദ വരുത്തു​ന്നു. (സുഭാ. 30:9) ഇനി മറ്റു ചിലരു​ടെ കാര്യ​ത്തിൽ അവർക്കു ദൈവ​സേ​വ​ന​ത്തിൽ ചില നിയമ​നങ്ങൾ കിട്ടാ​തെ​വ​രു​മ്പോൾ, നിരാശ തോന്നി​യിട്ട്‌ യഹോ​വയെ സേവി​ക്കു​ന്ന​തു​തന്നെ നിറു​ത്തി​ക്ക​ള​ഞ്ഞി​രി​ക്കു​ന്നു. (ഗലാ. 6:9) യഹോ​വ​യു​ടെ ഒരു സമർപ്പി​ത​ദാ​സൻ അങ്ങനെ ചെയ്യു​ന്ന​തി​നെ​ക്കു​റിച്ച്‌ ചിന്തി​ച്ചു​പോ​കു​ന്നത്‌ എന്തു​കൊ​ണ്ടാ​യി​രി​ക്കും? ഉള്ള കാര്യ​ങ്ങ​ളിൽ തൃപ്‌ത​നാ​യി​രി​ക്കാൻ അദ്ദേഹം പതി​യെ​പ്പ​തി​യെ മറന്നതാ​യി​രി​ക്കാം പ്രശ്‌നം.

3. ഫിലി​പ്പി​യർ 4:11, 12 നമുക്ക്‌ എന്ത്‌ ഉറപ്പു തരുന്നു?

³ എല്ലാവർക്കും വളർത്തി​യെ​ടു​ക്കാ​നാ​കുന്ന ഒന്നാണ്‌ സംതൃ​പ്‌തി. അപ്പോ​സ്‌ത​ല​നായ പൗലോസ്‌ പറഞ്ഞത്‌ “ഏതു സാഹച​ര്യ​ത്തി​ലും തൃപ്‌ത​നാ​യി​രി​ക്കാൻ . . . ഞാൻ പഠിച്ചി​രി​ക്കു​ന്നു” എന്നാണ്‌. (ഫിലി​പ്പി​യർ 4:11, 12 വായി​ക്കുക.) ജയിലിൽ ആയിരി​ക്കു​മ്പോ​ഴാണ്‌ പൗലോസ്‌ ഈ വാക്കുകൾ എഴുതു​ന്നത്‌. അപ്പോ​ഴും പൗലോ​സിന്‌ സന്തോഷം നഷ്ടപ്പെ​ട്ടി​ട്ടി​ല്ലാ​യി​രു​ന്നു. കാരണം ‘തൃപ്‌ത​നാ​യി​രി​ക്കാ​നുള്ള വിദ്യ’ അദ്ദേഹം പഠിച്ചി​രു​ന്നു. സംതൃ​പ്‌ത​രാ​യി​രി​ക്കാൻ നിങ്ങൾക്കു ബുദ്ധി​മുട്ട്‌ തോന്നു​ന്നു​ണ്ടോ? എങ്കിൽ പൗലോ​സി​ന്റെ വാക്കു​ക​ളും അനുഭ​വ​വും ഉറപ്പു​ത​രു​ന്നത്‌ ഏതു സാഹച​ര്യ​ത്തി​ലും നമുക്കു തൃപ്‌ത​രാ​യി​രി​ക്കാൻ കഴിയും എന്നാണ്‌. നമ്മുടെ സാഹച​ര്യ​ങ്ങ​ളിൽ നമുക്കു തനിയെ തൃപ്‌തി തോന്നി​ക്കോ​ളും എന്നു വിചാ​രി​ക്ക​രുത്‌. നമ്മൾ അതു പഠി​ച്ചെ​ടു​ക്കേ​ണ്ട​തുണ്ട്‌. എങ്ങനെ? അതിനു നമ്മളെ സഹായി​ക്കുന്ന ചില ഗുണങ്ങ​ളെ​ക്കു​റിച്ച്‌ നമുക്കു നോക്കാം.

നന്ദിയു​ള്ള​വ​രാ​യി​രി​ക്കുക

4. നന്ദിയു​ള്ള​വ​രാ​യി​രി​ക്കു​ന്നത്‌ തൃപ്‌ത​രാ​യി​രി​ക്കാൻ സഹായി​ക്കു​ന്നത്‌ എങ്ങനെ​യാണ്‌? (1 തെസ്സ​ലോ​നി​ക്യർ 5:18)

⁴ നന്ദിയു​ള്ള​വർക്കു തൃപ്‌ത​രാ​യി​രി​ക്കാൻ എളുപ്പ​മാ​യി​രി​ക്കും. (1 തെസ്സ​ലോ​നി​ക്യർ 5:18 വായി​ക്കുക.) ഉദാഹ​ര​ണ​ത്തിന്‌ ജീവി​ത​ത്തിൽ ശരിക്കും ആവശ്യ​മായ കാര്യങ്ങൾ ഉള്ളതിൽ നമുക്കു നന്ദിയു​ണ്ടെ​ങ്കിൽ, ഇല്ലാത്ത സാധന​ങ്ങ​ളെ​ക്കു​റിച്ച്‌ ഓർത്ത്‌ അമിത​മാ​യി ഉത്‌ക​ണ്‌ഠ​പ്പെ​ടാ​നുള്ള സാധ്യത കുറവാണ്‌. ഇനി, യഹോ​വ​യു​ടെ സേവന​ത്തിൽ ഇപ്പോ​ഴുള്ള നിയമ​ന​ങ്ങ​ളോട്‌ നമുക്ക്‌ വിലമ​തി​പ്പു​ണ്ടെ​ങ്കിൽ അതു നന്നായി ചെയ്യു​ന്ന​തി​നെ​ക്കു​റി​ച്ചാ​യി​രി​ക്കും നമ്മൾ ചിന്തി​ക്കു​ന്നത്‌. അല്ലാതെ നമ്മൾ ആഗ്രഹി​ക്കുന്ന വേറെ നിയമ​നങ്ങൾ കിട്ടു​ന്ന​തി​നെ​ക്കു​റിച്ച്‌ എപ്പോ​ഴും ചിന്തി​ച്ചു​കൊ​ണ്ടി​രി​ക്കില്ല. നമുക്കു നന്ദിയു​ണ്ടാ​യി​രി​ക്കേ​ണ്ട​തി​ന്റെ പ്രാധാ​ന്യം യഹോ​വ​യ്‌ക്ക്‌ അറിയാ​വു​ന്ന​തു​കൊ​ണ്ടാണ്‌ പ്രാർഥ​ന​യിൽ നന്ദിവാ​ക്കു​കൾ ഉൾപ്പെ​ടു​ത്താൻ ദൈവം പറഞ്ഞി​രി​ക്കു​ന്നത്‌. നന്ദിയുള്ള ഒരു ഹൃദയ​മു​ണ്ടെ​ങ്കിൽ “മനുഷ്യ​ബു​ദ്ധിക്ക്‌ അതീത​മായ ദൈവ​സ​മാ​ധാ​നം” നമുക്കു​ണ്ടാ​യി​രി​ക്കും.—ഫിലി. 4:6, 7.

5. എന്തൊക്കെ കാര്യ​ങ്ങ​ളിൽ ഇസ്രാ​യേ​ല്യർക്കു നന്ദി തോ​ന്നേ​ണ്ട​താ​യി​രു​ന്നു? (ചിത്ര​വും കാണുക.)

⁵ ഇസ്രാ​യേ​ല്യർക്ക്‌ എന്താണ്‌ സംഭവി​ച്ച​തെന്നു നോക്കുക. ഈജി​പ്‌തിൽ തങ്ങൾക്കു കിട്ടി​യി​രുന്ന നല്ല ഭക്ഷണ​മൊ​ന്നും ഇപ്പോൾ ഇല്ലെന്ന്‌ പലപ്പോ​ഴും അവർ യഹോ​വ​യോട്‌ പരാതി പറഞ്ഞു. (സംഖ്യ 11:4-6) വിജന​ഭൂ​മി​യി​ലെ ജീവിതം അത്ര എളുപ്പ​മ​ല്ലാ​യി​രു​ന്നു എന്നതു ശരിയാണ്‌. എന്നാൽ ആ സാഹച​ര്യ​ത്തി​ലും തൃപ്‌ത​രാ​യി​രി​ക്കാൻ അവർക്ക്‌ എങ്ങനെ കഴിയു​മാ​യി​രു​ന്നു? യഹോവ അവർക്ക്‌ അപ്പോൾത്തന്നെ ചെയ്‌തു​കൊ​ടുത്ത കാര്യ​ങ്ങ​ളെ​ക്കു​റിച്ച്‌ അവർ നന്ദി​യോ​ടെ ചിന്തി​ക്ക​ണ​മാ​യി​രു​ന്നു. യഹോവ ഇസ്രാ​യേ​ല്യർക്ക്‌ എന്തൊ​ക്കെ​യാണ്‌ ചെയ്‌തു​കൊ​ടു​ത്തത്‌? അവരെ അടിമ​ക​ളാ​ക്കി അവരോ​ടു ക്രൂര​മാ​യി ഇടപെ​ട്ടി​രുന്ന ഈജി​പ്‌തു​കാ​രു​ടെ മേൽ യഹോവ പത്തു ബാധകൾ വരുത്തി. പിന്നെ ദൈവം അവരെ അവി​ടെ​നിന്ന്‌ വിടു​വി​ച്ചു. പോരുന്ന സമയത്ത്‌ ഈജി​പ്‌തു​കാ​രു​ടെ വെള്ളി​യും സ്വർണ​വും വസ്‌ത്ര​ങ്ങ​ളും ‘കൊള്ള​യ​ടി​ക്കാൻ’ യഹോവ അവരെ സഹായി​ച്ചു. (പുറ. 12:35, 36) തുടർന്ന്‌ ഫറവോ​നും ചെങ്കട​ലി​നും ഇടയിൽ ഇസ്രാ​യേ​ല്യർ പെട്ടു​പോ​യ​പ്പോൾ ചെങ്കടൽ വിഭജി​ച്ചു​കൊണ്ട്‌ യഹോവ അത്ഭുത​ക​ര​മാ​യി അവരെ രക്ഷിച്ചു. പിന്നെ വിജന​ഭൂ​മി​യി​ലൂ​ടെ യാത്ര ചെയ്‌ത​പ്പോൾ അവർക്ക്‌ ദിവസ​വും കഴിക്കാൻ മന്ന കൊടു​ത്തു. യഹോവ ഇത്ര​യൊ​ക്കെ ചെയ്‌തു​കൊ​ടു​ത്തി​ട്ടും ഇസ്രാ​യേ​ല്യർ തൃപ്‌ത​രാ​യി​രു​ന്നില്ല. എന്തായി​രു​ന്നു കാരണം? അവർക്ക്‌ ആവശ്യ​ത്തിന്‌ ഭക്ഷണം ഇല്ലായി​രു​ന്ന​തു​കൊ​ണ്ടല്ല, പകരം ഉള്ള കാര്യ​ങ്ങ​ളോട്‌ അവർക്കു നന്ദിയി​ല്ലാ​യി​രു​ന്നു.

6. നന്ദിയു​ള്ള​വ​രാ​യി​രി​ക്കാൻ നമ്മളെ എന്തു സഹായി​ക്കും?

⁶ എങ്കിൽ നമുക്ക്‌ എങ്ങനെ നന്ദി വളർത്തി​യെ​ടു​ക്കാ​നാ​കും? ഒന്നാമ​താ​യി, നമുക്കുള്ള നല്ല കാര്യ​ങ്ങ​ളെ​ക്കു​റിച്ച്‌ ചിന്തി​ക്കാൻ ഓരോ ദിവസ​വും സമയം എടുക്കുക. രണ്ടോ മൂന്നോ കാര്യങ്ങൾ നിങ്ങൾക്ക്‌ എഴുതി​വെ​ക്കാ​നാ​യേ​ക്കും. (വിലാ. 3:22, 23) രണ്ടാമ​താ​യി, ആരെങ്കി​ലും ഒരു നല്ല കാര്യം ചെയ്‌തു​ത​രു​മ്പോൾ അവരോ​ടു നന്ദി പറയുക. ഓരോ ദിവസ​വും യഹോ​വ​യോട്‌ നന്ദി പറയാൻ സമയ​മെ​ടു​ക്കേ​ണ്ടത്‌ വളരെ പ്രധാ​ന​മാണ്‌. (സങ്കീ. 75:1) മൂന്നാ​മ​താ​യി, നന്ദി കാണി​ക്കുന്ന സ്വഭാ​വ​മു​ള്ള​വരെ അടുത്ത കൂട്ടു​കാ​രാ​ക്കുക. നമ്മുടെ കൂട്ടു​കാർ നന്ദിയു​ള്ള​വ​രാ​ണെ​ങ്കിൽ നമ്മളും അങ്ങനെ ആയിത്തീ​രും. ഇനി അവർ നന്ദിയി​ല്ലാ​ത്ത​വ​രാ​ണെ​ങ്കിൽ നമ്മളും നന്ദിയി​ല്ലാ​ത്ത​വ​രാ​യി​ത്തീ​രും. (ആവ. 1:26-28; 2 തിമൊ. 3:1, 2, 5) നന്ദി കാണി​ക്കാ​നുള്ള അവസര​ങ്ങ​ളെ​ക്കു​റി​ച്ചാണ്‌ നമ്മൾ എപ്പോ​ഴും ചിന്തി​ക്കു​ന്ന​തെ​ങ്കിൽ ഇല്ലാത്ത കാര്യ​ങ്ങ​ളെ​ക്കു​റിച്ച്‌ ഓർത്ത്‌ സങ്കട​പ്പെ​ടാ​നുള്ള സാധ്യത കുറവാ​യി​രി​ക്കും.

7. ഉള്ളതിൽ തൃപ്‌ത​യാ​യി​രി​ക്കാൻ ആജിയെ എന്താണ്‌ സഹായി​ച്ചത്‌?

⁷ ഇന്തൊ​നീ​ഷ്യ​യിൽ താമസി​ക്കുന്ന ആജിയു​ടെ അനുഭവം നോക്കാം. സഹോ​ദരി പറയുന്നു: “കോവിഡ്‌-19 മഹാമാ​രി​യു​ടെ സമയത്ത്‌ ഞാൻ എന്റെ സാഹച​ര്യ​ങ്ങളെ മറ്റു സഹോ​ദ​ര​ങ്ങ​ളു​ടെ സാഹച​ര്യ​ങ്ങ​ളു​മാ​യി താരത​മ്യം ചെയ്യാൻ തുടങ്ങി. അങ്ങനെ എന്റെ സന്തോഷം നഷ്ടപ്പെട്ടു.” (ഗലാ. 6:4) ചിന്തയിൽ മാറ്റം വരുത്താൻ സഹോ​ദ​രി​യെ എന്താണ്‌ സഹായി​ച്ചത്‌? ആജി പറയുന്നു: “ഓരോ ദിവസ​വും യഹോവ എനിക്കു തരുന്ന അനു​ഗ്ര​ഹ​ങ്ങ​ളെ​ക്കു​റി​ച്ചും സംഘട​ന​യു​ടെ ഭാഗമാ​യി​രി​ക്കു​ന്ന​തു​കൊണ്ട്‌ എനിക്കു കിട്ടുന്ന നല്ല കാര്യ​ങ്ങ​ളെ​ക്കു​റി​ച്ചും ഞാൻ ചിന്തിച്ചു. എന്നിട്ട്‌ യഹോ​വ​യോ​ടു നന്ദി പറഞ്ഞു. അത്‌ ഉള്ള കാര്യ​ങ്ങ​ളിൽ തൃപ്‌ത​യാ​യി​രി​ക്കാൻ എന്നെ സഹായി​ച്ചു.” നിങ്ങൾക്കും നിങ്ങളു​ടെ സാഹച​ര്യ​ത്തിൽ സംതൃ​പ്‌തി കണ്ടെത്താൻ കഴിയു​ന്നി​ല്ലെ​ങ്കിൽ ആജി സഹോ​ദരി ചെയ്‌ത കാര്യങ്ങൾ ചെയ്‌തു​കൊണ്ട്‌ നന്ദിയുള്ള ഒരു ഹൃദയം വളർത്തി​യെ​ടു​ക്കാൻ ശ്രമി​ച്ചു​കൂ​ടേ?

താഴ്‌മ​യു​ള്ള​വ​രാ​യി​രി​ക്കുക

8. ബാരൂ​ക്കിന്‌ എന്തു സംഭവി​ച്ചു?

⁸ യിരെമ്യ പ്രവാ​ച​കന്റെ സെക്ര​ട്ട​റി​യാ​യി​രുന്ന ബാരൂ​ക്കിന്‌ ഒരു സമയത്ത്‌ തനിക്കുള്ള കാര്യ​ങ്ങ​ളിൽ സംതൃ​പ്‌തി നഷ്ടപ്പെട്ടു. അദ്ദേഹ​ത്തി​ന്റേത്‌ ബുദ്ധി​മു​ട്ടുള്ള ഒരു നിയമ​ന​മാ​യി​രു​ന്നു. നന്ദിയി​ല്ലാത്ത ഒരു ജനത​യോട്‌ ശക്തമായ ഒരു സന്ദേശം അറിയി​ക്കാൻ യിരെ​മ്യ​യെ സഹായി​ക്കുക എന്നതാ​യി​രു​ന്നു അത്‌. എന്നാൽ ഒരു സമയത്ത്‌ ബാരൂ​ക്കി​ന്റെ ശ്രദ്ധ മാറി​പ്പോ​യി. താൻ എന്തു ചെയ്യാ​നാണ്‌ യഹോവ പ്രതീ​ക്ഷി​ക്കു​ന്ന​തെന്നു ചിന്തി​ക്കു​ന്ന​തി​നു പകരം തന്നെക്കു​റി​ച്ചും താൻ ചെയ്യാൻ ആഗ്രഹി​ക്കുന്ന കാര്യ​ങ്ങ​ളെ​ക്കു​റി​ച്ചും ബാരൂക്ക്‌ ആവശ്യ​ത്തി​ല​ധി​കം ചിന്തി​ക്കാൻ തുടങ്ങി. അപ്പോൾ യഹോവ യിരെ​മ്യ​യി​ലൂ​ടെ ബാരൂ​ക്കി​നോട്‌ ഇങ്ങനെ പറഞ്ഞു: “നീ വലിയ​വ​ലിയ കാര്യങ്ങൾ തേടി അവയ്‌ക്കു പുറകേ പോകു​ന്നു. ഇനി അങ്ങനെ ചെയ്യരുത്‌.” (യിരെ. 45:3-5) മറ്റു വാക്കു​ക​ളിൽ യഹോവ ഇങ്ങനെ പറയു​ക​യാ​യി​രു​ന്നു: “നിനക്ക്‌ ഇപ്പോൾ ഉള്ളതിൽ നീ തൃപ്‌ത​നാ​യി​രി​ക്കുക.” ബാരൂക്ക്‌ ആ തിരുത്തൽ സ്വീക​രി​ച്ചു. അങ്ങനെ തുടർന്നും യഹോ​വ​യു​ടെ ഒരു സുഹൃ​ത്താ​യി​രി​ക്കാൻ ബാരൂ​ക്കി​നാ​യി.

9. സേവന​പ​ദ​വി​ക​ളെ​ക്കു​റിച്ച്‌ ശരിയായ വീക്ഷണം ഉണ്ടായി​രി​ക്കാൻ 1 കൊരി​ന്ത്യർ 4:6, 7 നമ്മളെ എങ്ങനെ​യാണ്‌ സഹായി​ക്കു​ന്നത്‌? (ചിത്ര​ങ്ങ​ളും കാണുക.)

⁹ ചില​പ്പോൾ ഒരു ക്രിസ്‌ത്യാ​നി താൻ ഒരു പ്രത്യേക സേവന​പ​ദവി അർഹി​ക്കു​ന്നു​ണ്ടെന്ന്‌ ചിന്തി​ച്ചേ​ക്കാം. അങ്ങനെ ചിന്തി​ക്കാ​നുള്ള കാരണം അദ്ദേഹം ഒരുപാട്‌ കഴിവു​ള്ള​യാ​ളോ കഠിനാ​ധ്വാ​നി​യോ അനുഭ​വ​പ​രി​ച​യ​മുള്ള ഒരാളോ ഒക്കെ ആയതു​കൊ​ണ്ടാ​യി​രി​ക്കാം. എന്നാൽ താൻ ആഗ്രഹിച്ച ആ നിയമനം മറ്റുള്ള​വർക്കാണ്‌ കിട്ടു​ന്ന​തെ​ങ്കിൽ അദ്ദേഹ​ത്തിന്‌ എങ്ങനെ അസ്വസ്ഥ​നാ​കാ​തി​രി​ക്കാം? 1 കൊരി​ന്ത്യർ 4:6, 7-ലെ (വായി​ക്കുക.) പൗലോ​സി​ന്റെ വാക്കു​ക​ളെ​ക്കു​റിച്ച്‌ അദ്ദേഹ​ത്തി​നു ചിന്തി​ക്കാ​നാ​കും. നമുക്കുള്ള ഓരോ കഴിവും, നമുക്കു ലഭിക്കുന്ന ഓരോ സേവന​പ​ദ​വി​യും യഹോ​വ​യിൽനി​ന്നു​ള്ള​താണ്‌. അതൊ​ന്നും നമ്മൾ നേടി​യെ​ടു​ക്കു​ന്ന​തോ നമ്മൾ അർഹി​ക്കു​ന്ന​തോ അല്ല, മറിച്ച്‌ യഹോ​വ​യു​ടെ അനർഹ​ദ​യ​യു​ടെ തെളി​വു​ക​ളാണ്‌.—റോമ. 12:3, 6; എഫെ. 2:8, 9.

10. നമുക്ക്‌ എങ്ങനെ താഴ്‌മ വളർത്തി​യെ​ടു​ക്കാം?

¹⁰ യേശു​വി​ന്റെ മാതൃ​ക​യെ​ക്കു​റിച്ച്‌ ആഴത്തിൽ ചിന്തി​ച്ചു​കൊണ്ട്‌ നമുക്കു താഴ്‌മ വളർത്തി​യെ​ടു​ക്കാ​നാ​കും. യേശു അപ്പോ​സ്‌ത​ല​ന്മാ​രു​ടെ കാലു കഴുകിയ ആ രാത്രി​യിൽ എന്താണ്‌ സംഭവി​ച്ച​തെന്ന്‌ നോക്കുക. അതെക്കു​റിച്ച്‌ അപ്പോ​സ്‌ത​ല​നായ യോഹ​ന്നാൻ ഇങ്ങനെ എഴുതി: “(1) പിതാവ്‌ എല്ലാം തന്റെ കൈയിൽ തന്നിരി​ക്കു​ന്നെ​ന്നും (2) ദൈവ​ത്തി​ന്റെ അടുത്തു​നിന്ന്‌ വന്ന താൻ (3) ദൈവ​ത്തി​ന്റെ അടു​ത്തേ​ക്കു​തന്നെ പോകു​ന്നെ​ന്നും അറിയാ​മാ​യി​രുന്ന യേശു . . . ശിഷ്യ​ന്മാ​രു​ടെ കാലു കഴുകി.” (യോഹ. 13:3-5) യേശു​വി​നു വേണ​മെ​ങ്കിൽ അപ്പോ​സ്‌ത​ല​ന്മാ​രാണ്‌ തന്റെ കാലു കഴു​കേ​ണ്ട​തെന്നു ചിന്തി​ക്കാ​മാ​യി​രു​ന്നു. എന്നാൽ ഭൂമി​യി​ലെ തന്റെ ജീവി​ത​ത്തിൽ ഒരിക്ക​ലും കുറെ​ക്കൂ​ടെ മെച്ചപ്പെട്ട, സുഖസൗ​ക​ര്യ​ങ്ങൾ നിറഞ്ഞ ഒരു ജീവിതം താൻ അർഹി​ക്കു​ന്നു​ണ്ടെന്ന്‌ യേശു ചിന്തി​ച്ചില്ല. (ലൂക്കോ. 9:58) യേശു​വി​നു താഴ്‌മ​യു​ണ്ടാ​യി​രു​ന്നു; തനിക്കു​ള്ള​തിൽ യേശു തൃപ്‌ത​നാ​യി​രു​ന്നു. നമുക്ക്‌ എത്ര നല്ലൊരു മാതൃക!—യോഹ. 13:15.

11. തൃപ്‌ത​നാ​യി​രി​ക്കാൻ ഡെന്നി​സി​നെ എന്താണ്‌ സഹായി​ച്ചത്‌?

¹¹ നെതർലൻഡ്‌സിൽനി​ന്നുള്ള ഡെന്നിസ്‌ യേശു​വി​ന്റെ താഴ്‌മ അനുക​രി​ക്കാൻ ശ്രമിച്ചു. അത്‌ അത്ര എളുപ്പ​മാ​യി​രു​ന്നില്ല. സഹോ​ദരൻ പറയുന്നു: “ഞാൻ ആഗ്രഹി​ക്കുന്ന ഒരു നിയമനം മറ്റൊ​രാൾക്കു ലഭിക്കു​മ്പോൾ എനിക്കു ചില​പ്പോൾ അസ്വസ്ഥ​ത​യോ അതൃപ്‌തി​യോ തോന്നാ​റുണ്ട്‌. ആ സമയത്ത്‌ താഴ്‌മ എന്ന വിഷയ​ത്തെ​ക്കു​റിച്ച്‌ ഞാൻ പഠിക്കും. JW ലൈ​ബ്രറി ആപ്ലി​ക്കേ​ഷ​നിൽ താഴ്‌മ​യെ​ക്കു​റിച്ച്‌ പറയുന്ന ചില വാക്യങ്ങൾ ഞാൻ ടാഗ്‌ ചെയ്‌തു​വെച്ചു. അങ്ങനെ​യാ​കു​മ്പോൾ അത്‌ എനിക്കു പെട്ടെന്ന്‌ കണ്ടെത്താ​നും വീണ്ടും വായി​ക്കാ​നും കഴിയു​മ​ല്ലോ. അതു​പോ​ലെ താഴ്‌മ​യെ​ക്കു​റി​ച്ചുള്ള പ്രസം​ഗ​ങ്ങ​ളും ഞാൻ ഡൗൺലോഡ്‌ ചെയ്‌തു​വെ​ച്ചി​ട്ടുണ്ട്‌. അതും ഞാൻ ഇടയ്‌ക്കി​ട​യ്‌ക്ക്‌ കേൾക്കും.a നമ്മൾ ദൈവ​സേ​വ​ന​ത്തിൽ ഓരോ കാര്യ​വും ചെയ്യു​ന്നത്‌ യഹോ​വയെ മഹത്ത്വ​പ്പെ​ടു​ത്താ​നാണ്‌, അല്ലാതെ നമ്മളെ മഹത്ത്വ​പ്പെ​ടു​ത്താ​ന​ല്ലെന്ന്‌ ഞാൻ പഠിച്ചു. ശരിക്കും പറഞ്ഞാൽ ദൈവം തന്റെ ഉദ്ദേശ്യ​നി​വൃ​ത്തി​ക്കാ​യി പ്രവർത്തി​ക്കു​മ്പോൾ അതിൽ ചെറി​യൊ​രു പങ്കുണ്ടാ​യി​രി​ക്കാൻ നമ്മളെ അനുവ​ദി​ക്കു​ക​യാണ്‌.” അതു​കൊണ്ട്‌ ഉള്ളതിൽ തൃപ്‌ത​രാ​യി​രി​ക്കാൻ നമുക്ക്‌ ബുദ്ധി​മുട്ട്‌ തോന്നു​ന്നു​ണ്ടെ​ങ്കിൽ താഴ്‌മ വളർത്താൻ ശ്രമി​ക്കുക. അത്‌ യഹോ​വ​യു​മാ​യുള്ള സൗഹൃദം ശക്തമാ​ക്കു​ക​യും തൃപ്‌ത​രാ​യി​ക്കാൻ സഹായി​ക്കു​ക​യും ചെയ്യും.—യാക്കോ. 4:6, 8.

നിങ്ങളു​ടെ പ്രത്യാ​ശ​യെ​ക്കു​റിച്ച്‌ ആഴത്തിൽ ചിന്തി​ക്കു​ക

12. ഭാവി​യെ​ക്കു​റി​ച്ചുള്ള എന്ത്‌ പ്രത്യാ​ശ​യാണ്‌ തൃപ്‌ത​രാ​യി​രി​ക്കാൻ നമ്മളെ സഹായി​ക്കു​ന്നത്‌? (യശയ്യ 65:21-25)

¹² നമ്മുടെ മനോ​ഹ​ര​മായ ഭാവി​പ്ര​ത്യാ​ശ​യെ​ക്കു​റിച്ച്‌ ചിന്തി​ക്കു​ന്നതു തൃപ്‌ത​രാ​യി​ക്കാൻ സഹായി​ക്കും. യശയ്യ പ്രവച​ന​ത്തി​ലെ യഹോ​വ​യു​ടെ വാക്കുകൾ ഇന്നുള്ള നമ്മുടെ ജീവിതം പ്രശ്‌നങ്ങൾ നിറഞ്ഞ​താ​ണെന്ന്‌ യഹോവ മനസ്സി​ലാ​ക്കു​ന്നു​ണ്ടെ​ന്നും അതെല്ലാം മാറ്റു​മെന്ന്‌ യഹോവ ഉറപ്പു തന്നിട്ടു​ണ്ടെ​ന്നും കാണി​ക്കു​ന്നു. (യശയ്യ 65:21-25 വായി​ക്കുക.) ഭാവി​യിൽ നമുക്കു മനോ​ഹ​ര​മായ വീടു​ക​ളു​ണ്ടാ​യി​രി​ക്കും. സംതൃ​പ്‌തി തരുന്ന ജോലി​കൾ ചെയ്യാ​നാ​കും. നല്ല രുചി​യുള്ള, പോഷ​ക​സ​മൃ​ദ്ധ​മായ ഭക്ഷണം കഴിക്കാ​നാ​കും. നമുക്കോ നമ്മുടെ മക്കൾക്കോ എന്തെങ്കി​ലും ആപത്തു വരുമോ എന്നു നമ്മൾ പിന്നീട്‌ ഒരിക്ക​ലും പേടി​ക്കില്ല. (യശ. 32:17, 18; യഹ. 34:25) അതെ, മനോ​ഹ​ര​വും സുരക്ഷി​ത​വും ആയ ഒരു ഭാവി​യാണ്‌ നമ്മുടെ മുന്നി​ലു​ള്ളത്‌.

13. ഏതെല്ലാം സാഹച​ര്യ​ങ്ങ​ളിൽ നമ്മൾ പ്രത്യാ​ശ​യെ​ക്കു​റിച്ച്‌ ചിന്തി​ക്കേ​ണ്ടത്‌ പ്രധാ​ന​മാണ്‌?

¹³ മുമ്പെ​ന്ന​ത്തെ​ക്കാ​ളും അധികം നമ്മൾ നമ്മുടെ പ്രത്യാ​ശ​യെ​ക്കു​റിച്ച്‌ ചിന്തി​ക്കേ​ണ്ടത്‌ പ്രധാ​ന​മാണ്‌. കാരണം ‘അവസാ​ന​കാ​ല​ത്താണ്‌’ നമ്മൾ ജീവി​ക്കു​ന്നത്‌; “ബുദ്ധി​മു​ട്ടു നിറഞ്ഞ” സാഹച​ര്യ​ങ്ങൾ നമു​ക്കെ​ല്ലാം നേരി​ടേ​ണ്ടി​വ​രു​ന്നു. (2 തിമൊ. 3:1) ഓരോ ദിവസ​വും പിടി​ച്ചു​നിൽക്കാൻ വേണ്ട ശക്തിയും സഹായ​വും ഉപദേ​ശ​ങ്ങ​ളും യഹോവ തരുന്നുണ്ട്‌. (സങ്കീ. 145:14) അതിനു പുറമേ പിടി​ച്ചു​നിൽക്കാൻ നമ്മളെ സഹായി​ക്കു​ന്ന​താണ്‌ നമ്മുടെ ക്രിസ്‌തീ​യ​പ്ര​ത്യാ​ശ. ചില​പ്പോൾ നിങ്ങൾ കുടും​ബത്തെ പോറ്റാൻ കഷ്ടപ്പെ​ടു​ന്നു​ണ്ടാ​കും. എല്ലാക്കാ​ല​വും അത്‌ അങ്ങനെ​യാ​യി​രി​ക്കു​മോ? ഒരിക്ക​ലു​മല്ല. പറുദീ​സ​യിൽ നിങ്ങൾക്ക്‌ ആവശ്യ​മു​ള്ള​തും അതി​നെ​ക്കാൾ വളരെ കൂടു​ത​ലും തരു​മെന്ന്‌ ദൈവം ഉറപ്പു തന്നിട്ടുണ്ട്‌. (സങ്കീ. 9:18; 72:12-14) ഇനി ചില​പ്പോൾ, ശരീരം മൊത്തം വേദന​യോ​ടെ​യാ​യി​രി​ക്കും നിങ്ങൾ ഓരോ ദിവസ​വും രാവിലെ ഉണർന്നെ​ണീ​ക്കു​ന്നത്‌. അല്ലെങ്കിൽ വിഷാ​ദ​മോ മറ്റ്‌ ഗുരു​ത​ര​മായ ആരോ​ഗ്യ​പ്ര​ശ്‌ന​ങ്ങ​ളോ നിങ്ങളെ അലട്ടു​ന്നു​ണ്ടാ​കും. നിങ്ങളു​ടെ അവസ്ഥ എന്നും ഇതുതന്നെ ആയിരി​ക്കു​മോ? അല്ല. കാരണം ദൈവ​ത്തി​ന്റെ പുതി​യ​ലോ​ക​ത്തിൽ രോഗ​വും മരണവും ഉണ്ടായി​രി​ക്കില്ല. (വെളി. 21:3, 4) ഈ പ്രത്യാശ നമ്മുടെ ഇപ്പോ​ഴത്തെ സാഹച​ര്യ​ത്തിൽ ദേഷ്യ​മോ നിരാ​ശ​യോ തോന്നാ​തി​രി​ക്കാൻ നമ്മളെ സഹായി​ക്കും. നമ്മുടെ ജീവി​ത​ത്തിൽ എന്തെങ്കി​ലും അനീതി​യോ പ്രിയ​പ്പെ​ട്ട​വ​രു​ടെ മരണമോ മറ്റു ദുരന്ത​ങ്ങ​ളോ ഒക്കെ ഉണ്ടാകു​മ്പോ​ഴും സന്തോ​ഷ​വും സമാധാ​ന​വും നിലനി​റു​ത്താൻ നമുക്കു കഴിയും. കാരണം നമ്മൾ അനുഭ​വി​ക്കുന്ന ഈ ‘കഷ്ടപ്പാ​ടു​കൾ ക്ഷണിക​മാ​ണെ​ന്നും’ പെട്ടെ​ന്നു​തന്നെ ദൈവ​ത്തി​ന്റെ പുതി​യ​ലോ​ക​ത്തിൽ അതെല്ലാം എന്നേക്കു​മാ​യി ഇല്ലാതാ​കു​മെ​ന്നും നമുക്ക്‌ ഉറപ്പുണ്ട്‌.—2 കൊരി. 4:17, 18.

14. നമുക്ക്‌ എങ്ങനെ നമ്മുടെ പ്രത്യാശ ശക്തമാ​ക്കാം?

¹⁴ തൃപ്‌ത​രാ​യി​രി​ക്കാൻ പ്രത്യാശ വളരെ പ്രധാ​ന​മാ​ണെന്നു നമ്മൾ മനസ്സി​ലാ​ക്കി. അങ്ങനെ​യെ​ങ്കിൽ നമുക്ക്‌ അത്‌ എങ്ങനെ ശക്തമാ​ക്കാം? ദൂരെ​യുള്ള സാധനങ്ങൾ വ്യക്തമാ​യി കാണാൻ ഒരാൾക്കു ചില​പ്പോൾ കണ്ണട വെക്കേ​ണ്ടി​വ​ന്നേ​ക്കാം. അതു​പോ​ലെ ഭാവി​പ്ര​ത്യാ​ശ ശക്തമാ​ക്കാൻ നമ്മളും ചില കാര്യങ്ങൾ ചെയ്യേ​ണ്ട​തു​ണ്ടാ​യി​രി​ക്കും. അതിൽ ഒന്നാണ്‌, നമ്മൾ ആ പറുദീ​സ​യിൽ ആയിരി​ക്കു​ന്ന​താ​യി ഭാവന​യിൽ കാണു​ന്നത്‌. ഉദാഹ​ര​ണ​ത്തിന്‌ സാമ്പത്തിക ബുദ്ധി​മുട്ട്‌ നമ്മളെ വരിഞ്ഞു​മു​റു​ക്കു​ന്നു​ണ്ടെ​ങ്കിൽ പണത്തിന്റെ ആവശ്യ​മി​ല്ലാത്ത, ആരും ദരി​ദ്ര​ര​ല്ലാത്ത ഒരു ലോകത്ത്‌ നിങ്ങൾ ജീവി​ക്കു​ന്ന​തി​നെ​ക്കു​റിച്ച്‌ ചിന്തി​ക്കുക. ഇനി ദൈവ​സേ​വ​ന​ത്തിൽ ഇതുവരെ ലഭിച്ചി​ട്ടി​ല്ലാത്ത ഒരു നിയമ​ന​ത്തെ​ക്കു​റിച്ച്‌ ഓർത്ത്‌ നമ്മൾ വിഷമി​ക്കു​ന്നു​ണ്ടെ​ങ്കിൽ എന്ത്‌ ചെയ്യാം? പൂർണ​ത​യിൽ ആയിര​ക്ക​ണ​ക്കിന്‌ വർഷങ്ങൾ യഹോ​വയെ സേവി​ക്കുന്ന പറുദീ​സ​യി​ലെ ജീവി​ത​വു​മാ​യി താരത​മ്യം ചെയ്യു​മ്പോൾ ഈ സേവന​പ​ദ​വി​കൾ എത്ര നിസ്സാ​ര​മാ​ണെന്ന്‌ നമുക്ക്‌ ഓർക്കാം. (1 തിമൊ. 6:19) ഇന്നത്തെ പ്രശ്‌ന​ങ്ങ​ളെ​ക്കു​റിച്ച്‌ ഉത്‌ക​ണ്‌ഠ​പ്പെ​ടു​ന്നത്‌ നിറുത്തി ഭാവി​പ്ര​ത്യാ​ശ​യെ​ക്കു​റിച്ച്‌ ചിന്തി​ക്കാൻ ആദ്യ​മൊ​ക്കെ ബുദ്ധി​മു​ട്ടാ​യി​രി​ക്കും. എന്നാൽ പറുദീ​സ​യെ​ക്കു​റിച്ച്‌ നമ്മൾ എത്രയ​ധി​കം ചിന്തി​ക്കു​ന്നോ അത്രയ​ധി​കം ആ പ്രത്യാശ നമ്മുടെ മനസ്സിൽ നിറയും. പിന്നെ നമ്മുടെ ശ്രദ്ധ നമ്മുടെ പ്രശ്‌ന​ങ്ങ​ളിൽ ആയിരി​ക്കില്ല.

15. ക്രിസ്റ്റ​യു​ടെ വാക്കു​ക​ളിൽനിന്ന്‌ നിങ്ങൾ എന്തു പഠിച്ചു?

¹⁵ മുമ്പു കണ്ട ഡെന്നി​സി​ന്റെ ഭാര്യ ക്രിസ്റ്റയെ പ്രത്യാശ എങ്ങനെ​യാണ്‌ സഹായി​ച്ച​തെന്ന്‌ നമുക്കു നോക്കാം. സഹോ​ദരി പറയുന്നു: “പേശി​ക​ളു​ടെ ബലം കുറഞ്ഞു​കു​റഞ്ഞ്‌ വരുന്ന ഒരു രോഗ​മാണ്‌ എനിക്ക്‌. നടക്കാൻ പറ്റാത്ത​തു​കൊണ്ട്‌ എപ്പോ​ഴും ഒരു വീൽചെ​യ​റി​ന്റെ സഹായം വേണം. ഞാൻ മിക്ക​പ്പോ​ഴും കിടപ്പു​ത​ന്നെ​യാണ്‌. വേദന ഇല്ലാത്ത ഒരു ദിവസം​പോ​ലു​മില്ല. എന്റെ ആരോ​ഗ്യം മെച്ച​പ്പെ​ടി​ല്ലെന്ന്‌ ഈ അടുത്തി​ടെ ഡോക്ടർ എന്നോടു പറഞ്ഞു. അപ്പോൾ ഞാൻ ഓർത്തു, അദ്ദേഹം ഭാവിയെ കാണു​ന്നത്‌ വേറൊ​രു രീതി​യി​ലാ​ണ​ല്ലോ എന്ന്‌. എന്നാൽ ഞാൻ എപ്പോ​ഴും എന്റെ പ്രത്യാ​ശ​യിൽ ശ്രദ്ധി​ക്കു​ന്ന​തു​കൊണ്ട്‌ എനിക്കു സമാധാ​ന​മുണ്ട്‌. ഇന്ന്‌ എനിക്കു വേദന​ക​ളൊ​ക്കെ സഹി​ക്കേ​ണ്ടി​വ​ന്നാ​ലും പുതിയ ലോക​ത്തിൽ ഞാൻ ജീവിതം പൂർണ​മാ​യും ആസ്വദി​ക്കും.”

“ദൈവത്തെ ഭയപ്പെ​ടു​ന്ന​വർക്ക്‌ ഒന്നിനും കുറവില്ല”

16. യഹോ​വയെ ഭയപ്പെ​ടു​ന്ന​വർക്ക്‌ “ഒന്നിനും കുറവില്ല” എന്ന്‌ എഴുതാൻ ദാവീ​ദിന്‌ കഴിഞ്ഞത്‌ എന്തു​കൊ​ണ്ടാണ്‌?

¹⁶ ഉള്ളതിൽ തൃപ്‌ത​രാ​യി​രു​ന്നാ​ലും നമുക്കു പ്രശ്‌നങ്ങൾ നേരി​ടേ​ണ്ടി​വ​രു​മെന്ന്‌ ഓർക്കാം. ദാവീ​ദി​നെ​ക്കു​റിച്ച്‌ ചിന്തി​ക്കുക. കുറഞ്ഞത്‌ മൂന്നു മക്കളു​ടെ​യെ​ങ്കി​ലും മരണം അദ്ദേഹ​ത്തി​നു കാണേ​ണ്ടി​വന്നു. ചിലർ ദാവീ​ദിന്‌ എതിരെ വ്യാജാ​രോ​പ​ണങ്ങൾ ഉന്നയിച്ചു. കൂട്ടു​കാർപോ​ലും അദ്ദേഹത്തെ ചതിച്ചു. വർഷങ്ങ​ളോ​ളം ഒരു കുറ്റവാ​ളി​യെ​പ്പോ​ലെ ഒളിച്ച്‌ കഴി​യേ​ണ്ടി​വന്നു. ഇത്രയ​ധി​കം പ്രശ്‌നങ്ങൾ ഒക്കെ സഹിച്ചു​നി​ന്ന​പ്പോ​ഴും ദാവീദ്‌ തൃപ്‌ത​നാ​യി​രു​ന്നു. അദ്ദേഹം യഹോ​വ​യെ​ക്കു​റിച്ച്‌ ഇങ്ങനെ പറഞ്ഞു: “ദൈവത്തെ ഭയപ്പെ​ടു​ന്ന​വർക്ക്‌ ഒന്നിനും കുറവില്ല.” (സങ്കീ. 34:9, 10) എന്തു​കൊ​ണ്ടാണ്‌ ദാവീ​ദിന്‌ അങ്ങനെ പറയാ​നാ​യത്‌? പ്രശ്‌ന​ങ്ങ​ളൊ​ന്നു​മി​ല്ലാത്ത ഒരു ജീവിതം പ്രതീ​ക്ഷി​ക്കാൻ കഴിയി​ല്ലെ​ങ്കി​ലും തനിക്ക്‌ ശരിക്കും ആവശ്യ​മുള്ള കാര്യങ്ങൾ യഹോവ ചെയ്‌തു​ത​രു​മെന്ന്‌ ദാവീ​ദിന്‌ ഉറപ്പാ​യി​രു​ന്നു. (സങ്കീ. 145:16) നമുക്കും ദാവീ​ദി​നെ​പ്പോ​ലെ പ്രശ്‌നങ്ങൾ സഹിച്ചു​നിൽക്കാൻ യഹോവ സഹായി​ക്കു​മെന്ന്‌ ഉറപ്പു​ണ്ടാ​യി​രി​ക്കാ​നാ​കും. നമുക്കും തൃപ്‌ത​രാ​യി​ക്കാൻ കഴിയും.

17. തൃപ്‌ത​രാ​യി​രി​ക്കാ​നുള്ള വിദ്യ പഠി​ച്ചെ​ടു​ക്കാൻ നിങ്ങൾ തീരു​മാ​നി​ച്ചി​രി​ക്കു​ന്നത്‌ എന്തു​കൊണ്ട്‌?

¹⁷ നമ്മൾ സംതൃ​പ്‌ത​രാ​യി​രി​ക്കാൻ യഹോവ ആഗ്രഹി​ക്കു​ന്നു. (സങ്കീ. 131:1, 2) അതു​കൊണ്ട്‌ തൃപ്‌ത​രാ​യി​രി​ക്കാ​നുള്ള വിദ്യ പഠി​ച്ചെ​ടു​ക്കാൻ നമുക്ക്‌ ആകുന്ന​തെ​ല്ലാം ചെയ്യാം. നന്ദിയു​ള്ള​വ​രാ​യി​രി​ക്കാ​നും താഴ്‌മ വളർത്തി​യെ​ടു​ക്കാ​നും നമ്മുടെ പ്രത്യാശ ശക്തമാ​ക്കാ​നും കഠിന​ശ്രമം ചെയ്യു​ന്നെ​ങ്കിൽ നമുക്കും ഇങ്ങനെ പറയാൻ പറ്റും: ‘അതെ, ഞാൻ സംതൃ​പ്‌ത​നാണ്‌.’—സങ്കീ. 16:5, 6.