ജീവിത-സേവന യോഗ​ത്തി​നുള്ള പഠനസ​ഹാ​യി—പരാമർശ​ങ്ങൾ

© 2024 Watch Tower Bible and Tract Society of Pennsylvania

മാർച്ച്‌ 3-9

ദൈവ​വ​ച​ന​ത്തി​ലെ നിധികൾ | സുഭാ​ഷി​തങ്ങൾ 3

യഹോ​വ​യിൽ ആശ്രയി​ക്കു​ന്നെന്നു തെളി​യി​ക്കു​ക

ijwbv ലേഖനം 14 ¶4-5

സുഭാ​ഷി​തങ്ങൾ 3:5, 6—‘സ്വന്തം ബുദ്ധിയെ ആശ്രയി​ക്ക​രുത്‌’

“പൂർണ​ഹൃ​ദ​യ​ത്തോ​ടെ യഹോ​വ​യിൽ ആശ്രയി​ക്കുക.” ദൈവ​ത്തിന്‌ ഇഷ്ടമുള്ള രീതി​യിൽ കാര്യങ്ങൾ ചെയ്യു​മ്പോൾ നമ്മൾ ദൈവ​ത്തിൽ ആശ്രയി​ക്കു​ന്നെന്നു കാണി​ക്കു​ക​യാണ്‌. അതെ, പൂർണ​ഹൃ​ദ​യ​ത്തോ​ടെ​യാണ്‌ നമ്മൾ ദൈവ​ത്തിൽ ആശ്രയി​ക്കേ​ണ്ടത്‌. ബൈബി​ളിൽ സാധാ​ര​ണ​യാ​യി “ഹൃദയം” എന്ന പദം ഒരു വ്യക്തി​യു​ടെ ആന്തരി​ക​വ്യ​ക്തി​ത്വ​ത്തെ സൂചി​പ്പി​ക്കാ​നാണ്‌ ഉപയോ​ഗി​ച്ചി​രി​ക്കു​ന്നത്‌. അതിൽ ആ വ്യക്തി​യു​ടെ വികാ​രങ്ങൾ, ചിന്തകൾ, മനോ​ഭാ​വം, ലക്ഷ്യങ്ങൾ എന്നിവ​യെ​ല്ലാം ഉൾപ്പെ​ടു​ന്നു. പൂർണ​ഹൃ​ദ​യ​ത്തോ​ടെ ദൈവ​ത്തിൽ ആശ്രയി​ക്കുക എന്നാൽ വെറു​മൊ​രു വികാരം മാത്രമല്ല. പകരം നമുക്ക്‌ ഏറ്റവും നല്ലത്‌ എന്താ​ണെന്ന്‌ അറിയാ​വു​ന്നതു നമ്മുടെ സ്രഷ്ടാ​വി​നാ​ണെന്ന ഉറച്ച ബോധ്യ​മു​ള്ള​തു​കൊണ്ട്‌ നമ്മൾ എടുക്കുന്ന ഒരു തീരു​മാ​ന​മാണ്‌ അത്‌.—റോമർ 12:1.

“സ്വന്തം വിവേ​ക​ത്തിൽ ആശ്രയം വെക്കരുത്‌.” നമ്മുടെ ചിന്താ​പ്രാ​പ്‌തി​കൾക്കു പരിമി​തി​ക​ളു​ള്ള​തു​കൊണ്ട്‌ നമുക്ക്‌ അതിനെ ആശ്രയി​ക്കാ​നാ​കില്ല. അതു​കൊണ്ട്‌ നമ്മൾ ദൈവ​ത്തിൽ ആശ്രയി​ക്കണം. നമ്മൾ നമ്മുടെ ചിന്തകൾക്കും വികാ​ര​ങ്ങൾക്കും അനുസ​രി​ച്ചാണ്‌ തീരു​മാ​ന​മെ​ടു​ക്കു​ന്ന​തെ​ങ്കിൽ ആദ്യം അതു വിജയി​ക്കു​മെന്നു തോന്നു​മെ​ങ്കി​ലും ചെന്നെ​ത്തു​ന്നതു പരാജ​യ​ത്തി​ലാ​യി​രി​ക്കും. (സുഭാ​ഷി​തങ്ങൾ 14:12; യിരെമ്യ 17:9) ദൈവ​ത്തി​ന്റെ ജ്ഞാനം നമ്മു​ടേ​തി​നെ​ക്കാൾ വളരെ ഉയർന്ന​താണ്‌. (യശയ്യ 55:8, 9) ദൈവ​ത്തി​ന്റെ ചിന്തകൾക്കു ചേർച്ച​യിൽ പ്രവർത്തി​ക്കു​ക​യാ​ണെ​ങ്കിൽ നമുക്കു ജീവി​ത​ത്തിൽ വിജയി​ക്കാ​നാ​കും.—സങ്കീർത്തനം 1:1-3; സുഭാ​ഷി​തങ്ങൾ 2:6-9; 16:20.

ijwbv ലേഖനം 14 ¶6-7

സുഭാ​ഷി​തങ്ങൾ 3:5, 6—‘സ്വന്തം ബുദ്ധിയെ ആശ്രയി​ക്ക​രുത്‌’

“എന്തു ചെയ്യു​മ്പോ​ഴും ദൈവത്തെ ഓർത്തു​കൊ​ള്ളുക.” ജീവി​ത​ത്തി​ലെ പ്രധാ​ന​പ്പെട്ട കാര്യ​ങ്ങ​ളി​ലും നമ്മളെ​ടു​ക്കുന്ന പ്രധാ​ന​പ്പെട്ട തീരു​മാ​ന​ങ്ങ​ളി​ലും ദൈവ​ത്തി​ന്റെ ഇഷ്ടം എന്താ​ണെന്നു മനസ്സി​ലാ​ക്കി നമ്മൾ പ്രവർത്തി​ക്കണം. സഹായ​ത്തി​നാ​യി ദൈവ​ത്തോ​ടു പ്രാർഥി​ച്ചു​കൊ​ണ്ടും തന്റെ വചനമായ ബൈബി​ളി​ലൂ​ടെ ദൈവം പറയു​ന്നത്‌ അനുസ​രി​ച്ചു​കൊ​ണ്ടും നമുക്ക്‌ അതു ചെയ്യാം.—സങ്കീർത്തനം 25:4; 2 തിമൊ​ഥെ​യൊസ്‌ 3:16, 17.

“ദൈവം നിന്റെ വഴികൾ നേരെ​യാ​ക്കും.” ദൈവ​ത്തി​ന്റെ നീതി​യുള്ള നിലവാ​ര​ങ്ങൾക്ക​നു​സ​രിച്ച്‌ ജീവി​ക്കാൻ നമ്മളെ സഹായി​ച്ചു​കൊണ്ട്‌ ദൈവം നമ്മുടെ വഴികൾ നേരെ​യാ​ക്കും. (സുഭാ​ഷി​തങ്ങൾ 11:5) അങ്ങനെ അനാവ​ശ്യ​മായ കുഴപ്പ​ങ്ങ​ളിൽ ചെന്നു​ചാ​ടു​ന്നത്‌ ഒഴിവാ​ക്കി​ക്കൊണ്ട്‌ കൂടുതൽ സന്തോ​ഷ​ത്തോ​ടെ ജീവി​ക്കാൻ നമുക്കു കഴിയും.—സങ്കീർത്തനം 19:7, 8; യശയ്യ 48:17, 18.

be 76 ¶4

പുരോ​ഗ​മ​നോ​ന്മു​ഖ​രാ​യി​രി​ക്കുക—അഭിവൃ​ദ്ധി കൈവ​രി​ക്കു​ക

ജീവി​ത​ത്തിൽ വിവിധ സാഹച​ര്യ​ങ്ങളെ നേരി​ട്ടി​ട്ടുള്ള ഒരു വ്യക്തിക്ക്‌ ഇങ്ങനെ ന്യായ​വാ​ദം ചെയ്യാ​നുള്ള പ്രലോ​ഭനം തോന്നി​യേ​ക്കാം: ‘ഞാൻ ഈ സാഹച​ര്യ​ത്തെ മുമ്പ്‌ നേരി​ട്ടി​ട്ടു​ള്ള​താണ്‌. എന്തു ചെയ്യണ​മെന്ന്‌ എനിക്ക​റി​യാം.’ എന്നാൽ അങ്ങനെ ചിന്തി​ക്കു​ന്നതു ജ്ഞാനമാ​യി​രി​ക്കു​മോ? സദൃശ​വാ​ക്യ​ങ്ങൾ 3:7 ഇങ്ങനെ മുന്നറി​യി​പ്പു നൽകുന്നു: ‘നിനക്കു തന്നേ നീ ജ്ഞാനി​യാ​യി തോന്ന​രുത്‌.’ ജീവിത സാഹച​ര്യ​ങ്ങളെ കൈകാ​ര്യം ചെയ്യു​മ്പോൾ കണക്കി​ലെ​ടു​ക്കേണ്ട ഘടകങ്ങൾ സംബന്ധിച്ച നമ്മുടെ വീക്ഷണത്തെ അനുഭ​വ​പ​രി​ചയം തീർച്ച​യാ​യും വിശാ​ല​മാ​ക്കണം. എന്നാൽ നാം ആത്മീയ പുരോ​ഗതി വരുത്തു​ന്ന​വ​രാ​ണെ​ങ്കിൽ, യഹോ​വ​യു​ടെ അനു​ഗ്രഹം ഉണ്ടെങ്കി​ലേ നമുക്കു വിജയി​ക്കാൻ കഴിയൂ എന്ന സംഗതി നമ്മുടെ മനസ്സി​ലും ഹൃദയ​ത്തി​ലും ആഴത്തിൽ പതിയാ​നും നമ്മുടെ അനുഭ​വ​പ​രി​ചയം ഇടയാ​ക്കണം. അതു​കൊണ്ട്‌, സ്വന്തമാ​യിട്ട്‌ എല്ലാം ചെയ്യാ​നാ​കും എന്ന ഉറച്ച ആത്മവി​ശ്വാ​സ​ത്തോ​ടെ സാഹച​ര്യ​ങ്ങളെ നേരി​ടു​ന്നതല്ല അഭിവൃ​ദ്ധി​യു​ടെ തെളിവ്‌, മറിച്ച്‌ മാർഗ​നിർദേ​ശ​ത്തി​നാ​യി യഹോ​വ​യി​ലേക്കു തത്‌ക്ഷണം തിരി​യു​ന്ന​താണ്‌. അവന്റെ അനുവാ​ദം കൂടാതെ യാതൊ​ന്നും സംഭവി​ക്കി​ല്ലെന്ന്‌ ഉറപ്പു​ള്ള​വ​രാ​യി​രി​ക്കു​ന്ന​തി​ലൂ​ടെ​യും നമ്മുടെ സ്വർഗീയ പിതാ​വു​മാ​യി ആശ്രയ​ത്വ​വും സ്‌നേ​ഹ​വും തുളു​മ്പുന്ന ഒരു ബന്ധം നിലനി​റു​ത്തു​ന്ന​തി​ലൂ​ടെ​യും നമുക്കു നമ്മുടെ അഭിവൃ​ദ്ധി പ്രകട​മാ​ക്കാൻ കഴിയും.

ആത്മീയരത്നങ്ങൾ

w06 9/15 17 ¶7

സദൃശ​വാ​ക്യ​ങ്ങ​ളിൽനി​ന്നുള്ള വിശേ​ഷാ​ശ​യ​ങ്ങൾ

3:3. ദയ, വിശ്വ​സ്‌തത എന്നിവയെ നാം അങ്ങേയറ്റം വിലമ​തി​ക്കു​ക​യും അവ മറ്റുള്ളവർ കാണാൻ ഇടയാ​ക്കു​ക​യും വേണം, കഴുത്തിൽ അണിയുന്ന വില​യേ​റിയ ഒരു ആഭരണ​ത്തി​ന്റെ കാര്യ​ത്തി​ലെ​ന്ന​പോ​ലെ. അവയെ നമ്മുടെ ഹൃദയ​ത്തിൽ എഴുതു​ക​യും അങ്ങനെ ജീവി​ത​ത്തി​ലെ ഒരു അഭിഭാ​ജ്യ​ഘ​ട​ക​മാ​ക്കു​ക​യും ചെയ്യണം.

മാർച്ച്‌ 10-16

ദൈവ​വ​ച​ന​ത്തി​ലെ നിധികൾ | സുഭാ​ഷി​തങ്ങൾ 4

‘ഹൃദയം കാത്തു​സൂ​ക്ഷി​ക്കുക’

w19.01 15 ¶4

നിങ്ങൾക്ക്‌ എങ്ങനെ ഹൃദയം കാത്തു​സൂ​ക്ഷി​ക്കാം?

⁴ സുഭാ​ഷി​തങ്ങൾ 4:23-ൽ “ഹൃദയം” എന്ന പദം ഒരാളു​ടെ ‘ഉള്ളിന്റെ ഉള്ളിനെ’ കുറി​ക്കാൻ ഉപയോ​ഗി​ച്ചി​രി​ക്കു​ന്നു. (സങ്കീർത്തനം 51:6 വായി​ക്കുക.) മറ്റു വാക്കു​ക​ളിൽ പറഞ്ഞാൽ, “ഹൃദയം” എന്നതു മറ്റു മനുഷ്യർക്കു കാണാൻ കഴിയാത്ത നമ്മുടെ ചിന്തകൾ, വികാ​രങ്ങൾ, ആഗ്രഹങ്ങൾ, നമ്മളെ പ്രവർത്തി​ക്കാൻ പ്രേരി​പ്പി​ക്കുന്ന കാര്യങ്ങൾ എന്നിവയെ കുറി​ക്കു​ന്നു. നമ്മൾ പുറമേ എങ്ങനെ കാണ​പ്പെ​ടു​ന്നു എന്നതല്ല, ഉള്ളിന്റെ ഉള്ളിൽ ആരാണ്‌ എന്നതാണു ‘ഹൃദയം.’

w19.01 17 ¶10-11

നിങ്ങൾക്ക്‌ എങ്ങനെ ഹൃദയം കാത്തു​സൂ​ക്ഷി​ക്കാം?

¹⁰ ഹൃദയത്തെ കാത്തു​സൂ​ക്ഷി​ക്കു​ന്ന​തിൽ നമ്മൾ വിജയി​ക്ക​ണ​മെ​ങ്കിൽ അപകടങ്ങൾ തിരി​ച്ച​റി​യണം, നമ്മളെ​ത്തന്നെ സംരക്ഷി​ക്കാൻ സത്വരം പ്രവർത്തി​ക്കു​ക​യും വേണം. സുഭാ​ഷി​തങ്ങൾ 4:23-ൽ “കാത്തു​സൂ​ക്ഷി​ക്കുക” എന്നു പരിഭാ​ഷ​പ്പെ​ടു​ത്തി​യി​രി​ക്കുന്ന പദം ഒരു കാവൽക്കാ​രൻ ചെയ്‌തി​രുന്ന കാര്യത്തെ നമ്മുടെ ഓർമ​യി​ലേക്കു കൊണ്ടു​വ​രു​ന്നു. ശലോ​മോൻ രാജാ​വി​ന്റെ കാലത്ത്‌ നഗരമ​തി​ലു​ക​ളു​ടെ മുകളിൽ കാവൽക്കാർ നിലയു​റ​പ്പി​ച്ചി​രു​ന്നു. എന്തെങ്കി​ലും അപകടം അടുത്തു​വ​രു​ന്നതു കാണു​മ്പോൾ അവർ അപായ​സൂ​ചന നൽകും. ഇത്‌ ഒന്നു ഭാവന​യിൽ കാണു​ന്നത്‌, നമ്മുടെ ചിന്തയെ സാത്താൻ ദുഷി​പ്പി​ക്കാ​തി​രി​ക്കു​ന്ന​തിന്‌ എന്തു ചെയ്യണ​മെന്നു മനസ്സി​ലാ​ക്കാൻ നമ്മളെ സഹായി​ക്കും.

¹¹ പുരാ​ത​ന​കാ​ലത്ത്‌, കാവൽക്കാ​രും കവാടം​സൂ​ക്ഷി​പ്പു​കാ​രും ഒറ്റക്കെ​ട്ടാ​യി​ട്ടാ​ണു പ്രവർത്തി​ച്ചി​രു​ന്നത്‌. (2 ശമു. 18:24-26) ശത്രു അടുത്ത്‌ വരുന്നതു കാണു​മ്പോൾ മതിലി​നു മുകളി​ലുള്ള കാവൽക്കാർ മുന്നറി​യി​പ്പു കൊടു​ക്കും, കവാടം​സൂ​ക്ഷി​പ്പു​കാർ കവാടങ്ങൾ അടച്ച്‌ സുരക്ഷി​ത​മാ​ക്കും, അങ്ങനെ രണ്ടു കൂട്ടരും ചേർന്ന്‌ നഗരത്തെ സംരക്ഷി​ച്ചി​രു​ന്നു. (നെഹ. 7:1-3) നമ്മുടെ ബൈബിൾപ​രി​ശീ​ലിത മനസ്സാ​ക്ഷിക്ക്‌ ഒരു കാവൽക്കാ​ര​നെ​പ്പോ​ലെ പ്രവർത്തി​ക്കാൻ കഴിയും. സാത്താൻ നമ്മുടെ ഹൃദയം കീഴട​ക്കാൻ, അതായത്‌ നമ്മുടെ ചിന്തക​ളെ​യും വികാ​ര​ങ്ങ​ളെ​യും ആഗ്രഹ​ങ്ങ​ളെ​യും പ്രവർത്ത​ന​ത്തി​നു പ്രേരി​പ്പി​ക്കുന്ന കാര്യ​ങ്ങ​ളെ​യും സ്വാധീ​നി​ക്കാൻ ശ്രമി​ക്കു​മ്പോൾ, മനസ്സാക്ഷി നമുക്കു മുന്നറി​യി​പ്പു തരും. നമ്മുടെ മനസ്സാക്ഷി അപായ​സൂ​ചന തരു​മ്പോ​ഴെ​ല്ലാം കവാടം​സൂ​ക്ഷി​പ്പു​കാ​രെ​പ്പോ​ലെ നമ്മൾ അതിനു ശ്രദ്ധ കൊടു​ക്കണം, ‘കവാടങ്ങൾ അടയ്‌ക്കണം.’

w19.01 18 ¶14

നിങ്ങൾക്ക്‌ എങ്ങനെ ഹൃദയം കാത്തു​സൂ​ക്ഷി​ക്കാം?

¹⁴ ഹൃദയം കാത്തു​സൂ​ക്ഷി​ക്കു​ന്ന​തിന്‌, തെറ്റായ കാര്യങ്ങൾ നമ്മുടെ ഹൃദയ​ത്തിൽ പ്രവേ​ശി​ക്കാ​തെ സൂക്ഷി​ച്ചാൽ മാത്രം പോരാ, പ്രയോ​ജ​ന​ക​ര​മായ കാര്യ​ങ്ങൾക്കാ​യി ഹൃദയ​ക​വാ​ടങ്ങൾ തുറക്കു​ക​യും വേണം. മതിലു​ക​ളുള്ള ഒരു നഗര​ത്തെ​ക്കു​റിച്ച്‌ നമുക്ക്‌ ഒന്നുകൂ​ടി ചിന്തി​ക്കാം. ശത്രുക്കൾ ആക്രമി​ക്കാൻ വരു​മ്പോൾ അവരെ തടയു​ന്ന​തി​നാ​യി കവാടം​സൂ​ക്ഷി​പ്പു​കാ​രൻ നഗരവാ​തി​ലു​കൾ അടയ്‌ക്കും. എന്നാൽ ഭക്ഷണവും അവശ്യ​വ​സ്‌തു​ക്ക​ളും നഗരത്തിന്‌ അകത്തേക്കു കൊണ്ടു​വ​രാൻ വാതി​ലു​കൾ തുറന്നു​കൊ​ടു​ക്കും. വാതി​ലു​കൾ ഒരിക്ക​ലും തുറക്കു​ന്നി​ല്ലെ​ങ്കിൽ നഗരത്തിന്‌ ഉള്ളിലു​ള്ളവർ പട്ടിണി​യി​ലാ​കും. അതു​പോ​ലെ, ദൈവ​ത്തി​ന്റെ ചിന്തകൾ ഹൃദയ​ത്തിൽ പ്രവേ​ശി​ക്കു​ന്ന​തി​നാ​യി നമ്മളും ഹൃദയ​വാ​തി​ലു​കൾ ക്രമമാ​യി തുറക്കേണ്ട ആവശ്യ​മുണ്ട്‌.

w12-E 5/1 32 ¶2

‘നിന്റെ ഹൃദയം കാത്തു​സൂ​ക്ഷി​ക്കുക!’

നമ്മുടെ ആലങ്കാ​രി​ക​ഹൃ​ദയം കാത്തു​സൂ​ക്ഷി​ക്കേ​ണ്ടത്‌ എന്തു​കൊ​ണ്ടാണ്‌? ദൈവം ശലോ​മോ​നെ ഇങ്ങനെ എഴുതാൻ പ്രേരി​പ്പി​ച്ചു: “മറ്റ്‌ എന്തി​നെ​ക്കാ​ളും പ്രധാനം നിന്റെ ഹൃദയം കാത്തു​സൂ​ക്ഷി​ക്കു​ന്ന​താണ്‌; അതിൽനി​ന്നാ​ണു ജീവന്റെ ഉറവുകൾ ആരംഭി​ക്കു​ന്നത്‌.” (സുഭാ​ഷി​തങ്ങൾ 4:23) ഇപ്പോ​ഴ​ത്തെ​യും ഭാവി​യി​ലെ​യും നമ്മുടെ ജീവിതം എങ്ങനെ​യാ​യി​രി​ക്കു​മെ​ന്നതു നമ്മുടെ ആലങ്കാ​രി​ക​ഹൃ​ദ​യ​ത്തി​ന്റെ അവസ്ഥയെ ആശ്രയി​ച്ചി​രി​ക്കു​ന്നു. എന്തു​കൊണ്ട്‌? കാരണം നമ്മുടെ ഹൃദയ​ത്തി​ലു​ള്ളതു ദൈവ​ത്തിന്‌ കാണാം. (1 ശമുവേൽ 16:7) ഉള്ളിന്റെ ഉള്ളിൽ നമ്മൾ എങ്ങനെ​യുള്ള ഒരാളാണ്‌, അതായത്‌ നമ്മളിലെ ‘ആന്തരി​ക​മ​നു​ഷ്യൻ’ എങ്ങനെ​യാണ്‌ എന്നു നോക്കി​യാണ്‌ യഹോവ നമ്മളെ വിലയി​രു​ത്തു​ന്നത്‌.—1 പത്രോസ്‌ 3:4.

ആത്മീയരത്നങ്ങൾ

w21.08 8 ¶4

യഹോ​വ​യ്‌ക്കാ​യി കാത്തി​രി​ക്കാൻ നിങ്ങൾ തയ്യാറാ​ണോ?

⁴ സുഭാ​ഷി​തങ്ങൾ 4:18 പറയുന്നു: “നീതി​മാ​ന്മാ​രു​ടെ പാത പ്രഭാ​ത​ത്തിൽ തെളി​യുന്ന വെളി​ച്ചം​പോ​ലെ​യാണ്‌; നട്ടുച്ച​വരെ അതു കൂടു​തൽക്കൂ​ടു​തൽ തെളി​ഞ്ഞു​വ​രു​ന്നു.” ഈ വാക്കുകൾ യഹോവ തന്റെ ഉദ്ദേശ്യം നമുക്കു വെളി​പ്പെ​ടു​ത്തി​ത്ത​രുന്ന രീതി​യെ​യാ​ണു സൂചി​പ്പി​ക്കു​ന്നത്‌. പടിപ​ടി​യാ​യി​ട്ടാണ്‌ യഹോവ അതു ചെയ്യു​ന്നത്‌. ഒരു ക്രിസ്‌ത്യാ​നി തന്റെ ജീവി​ത​ത്തിൽ മാറ്റങ്ങ​ളൊ​ക്കെ വരുത്തി യഹോ​വ​യോ​ടു കൂടു​തൽക്കൂ​ടു​തൽ അടുക്കു​ന്നത്‌ എങ്ങനെ​യാ​ണെന്നു മനസ്സി​ലാ​ക്കാ​നും ഈ വാക്യം സഹായി​ക്കും. അത്‌ ഒറ്റയടി​ക്കു സംഭവി​ക്കുന്ന ഒരു കാര്യമല്ല. അതിനു സമയ​മെ​ടു​ക്കും. ദൈവം തന്റെ വചനത്തി​ലൂ​ടെ​യും സംഘട​ന​യി​ലൂ​ടെ​യും നമുക്ക്‌ ഉപദേ​ശങ്ങൾ തരുന്നുണ്ട്‌. അവ ആത്മാർഥ​മാ​യി പഠിക്കു​ക​യും അതിനു ചേർച്ച​യിൽ പ്രവർത്തി​ക്കു​ക​യും ചെയ്യു​മ്പോ​ഴാ​ണു പതി​യെ​പ്പ​തി​യെ നമ്മുടെ ജീവി​ത​ത്തിൽ ക്രിസ്‌തീ​യ​ഗു​ണങ്ങൾ വളരു​ന്ന​തും ദൈവ​ത്തെ​ക്കു​റി​ച്ചുള്ള അറിവ്‌ വർധി​ക്കു​ന്ന​തും. യേശു അത്‌ ഒരു ദൃഷ്ടാന്തം ഉപയോ​ഗിച്ച്‌ പറഞ്ഞത്‌ എങ്ങനെ​യാ​ണെന്നു നമുക്കു നോക്കാം.

മാർച്ച്‌ 17-23

ദൈവ​വ​ച​ന​ത്തി​ലെ നിധികൾ | സുഭാ​ഷി​തങ്ങൾ 5

ലൈം​ഗിക അധാർമി​ക​ത​യിൽനിന്ന്‌ അകന്നു​നിൽക്കു​ക

w00 7/15 29 ¶1

ഒരു അധാർമിക ലോക​ത്തിൽ നിങ്ങൾക്കു നിർമ​ല​രാ​യി തുടരാ​നാ​കും

ഈ സദൃശ​വാ​ക്യ​ത്തിൽ വഴിപി​ഴച്ച വ്യക്തിയെ “പരസ്‌ത്രീ”—വേശ്യ—എന്നു വിളി​ച്ചി​രി​ക്കു​ന്നു. തന്റെ ഇരയെ വശീക​രി​ക്കാൻ അവൾ ഉപയോ​ഗി​ക്കുന്ന വാക്കുകൾ തേൻകട്ട പോലെ മധുര​മു​ള്ള​തും ഒലി​വെ​ണ്ണ​യെ​ക്കാൾ മൃദു​വു​മാണ്‌. അധാർമി​ക​ത​യിൽ ഏർപ്പെ​ടാ​നുള്ള പ്രലോ​ഭ​നങ്ങൾ മിക്കവ​യും ഈ വിധത്തി​ലു​ള്ള​വ​യല്ലേ? ദൃഷ്ടാ​ന്ത​ത്തിന്‌, 27 വയസ്സുള്ള സുന്ദരി​യായ എമിയു​ടെ കാര്യ​മെ​ടു​ക്കുക. ഒരു സെക്ര​ട്ട​റി​യാ​യി ജോലി ചെയ്യുന്ന അവൾ ഇങ്ങനെ പറയുന്നു: “ഒരു സഹപ്ര​വർത്തകൻ എന്നോട്‌ വളരെ പരിഗണന കാട്ടുന്നു, അവസരം കിട്ടു​മ്പോ​ഴൊ​ക്കെ എന്നെ അഭിന​ന്ദി​ക്കു​ന്നു. ശ്രദ്ധി​ക്ക​പ്പെ​ടു​ന്നു എന്ന തോന്നൽ വളരെ പുളക​പ്ര​ദ​മാണ്‌. എന്നാൽ അയാൾ എന്നോടു താത്‌പ​ര്യം കാട്ടു​ന്നത്‌ ദുരു​ദ്ദേ​ശ്യ​ത്തോ​ടെ​യാ​ണെന്നു വ്യക്തമാണ്‌. ഞാൻ അയാളു​ടെ വലയിൽ വീഴാൻ പോകു​ന്നില്ല.” പ്രലോ​ഭ​ക​രു​ടെ യഥാർഥ സ്വഭാവം നാം തിരി​ച്ച​റി​യാത്ത പക്ഷം അവരുടെ ഭംഗി​വാ​ക്കു​കൾ മിക്ക​പ്പോ​ഴും വളരെ ആകർഷ​ക​മാ​യി തോന്നും. ആയതി​നാൽ നാം നമ്മുടെ ചിന്താ​പ്രാ​പ്‌തി ഉപയോ​ഗി​ക്കേ​ണ്ട​തുണ്ട്‌.

w00 7/15 29 ¶2

ഒരു അധാർമിക ലോക​ത്തിൽ നിങ്ങൾക്കു നിർമ​ല​രാ​യി തുടരാ​നാ​കും

അധാർമി​ക​ത​യു​ടെ ഭവിഷ്യ​ത്തു​കൾ കാഞ്ഞി​രം​പോ​ലെ കയ്‌പു​ള്ള​തും ഇരുവാ​യ്‌ത്ത​ല​വാൾപോ​ലെ മൂർച്ച​യു​ള്ള​തു​മാണ്‌—അതു വേദനാ​ജ​ന​ക​വും മാരക​വു​മാണ്‌. മനസ്സാ​ക്ഷി​ക്കുത്ത്‌, ആഗ്രഹി​ക്കാത്ത ഗർഭധാ​രണം, ലൈം​ഗി​ക​മാ​യി പകരുന്ന രോഗങ്ങൾ എന്നിവ​യൊ​ക്കെ​യാണ്‌ അത്തരം നടത്തയു​ടെ കയ്‌പേ​റിയ ഫലങ്ങൾ. അവിശ്വ​സ്‌തത കാണി​ക്കുന്ന വ്യക്തി തന്റെ വിവാഹ ഇണയിൽ ഉളവാ​ക്കുന്ന കടുത്ത വൈകാ​രിക വേദനയെ കുറിച്ചു ചിന്തി​ക്കുക. ഒരു പ്രാവ​ശ്യ​ത്തെ വൈവാ​ഹിക അവിശ്വ​സ്‌ത​ത​യ്‌ക്ക്‌ ഒരു കാലത്തും മായാത്ത വിധത്തി​ലുള്ള മുറി​പ്പാ​ടു​കൾ സൃഷ്ടി​ക്കാൻ കഴിയും. അതേ, അധാർമി​കത വ്രണ​പ്പെ​ടു​ത്തുന്ന ഒന്നാണ്‌.

w00 7/15 29 ¶5

ഒരു അധാർമിക ലോക​ത്തിൽ നിങ്ങൾക്കു നിർമ​ല​രാ​യി തുടരാ​നാ​കും

അധാർമിക വ്യക്തി​ക​ളു​ടെ സ്വാധീ​ന​ത്തിൽനിന്ന്‌ നാം ആവുന്നത്ര അകന്നു നിൽക്കേ​ണ്ട​തുണ്ട്‌. അധഃപ​തി​പ്പി​ക്കുന്ന സംഗീതം ശ്രവി​ച്ചു​കൊ​ണ്ടോ ദുഷി​പ്പി​ക്കുന്ന വിനോ​ദ​പ​രി​പാ​ടി​കൾ വീക്ഷി​ച്ചു​കൊ​ണ്ടോ അശ്ലീല സാഹി​ത്യ​ങ്ങൾ വായി​ച്ചു​കൊ​ണ്ടോ നാം അവരുടെ വഴികൾക്കു ശ്രദ്ധ​കൊ​ടു​ക്കു​ന്നത്‌ എന്തിന്‌? (സദൃശ​വാ​ക്യ​ങ്ങൾ 6:27; 1 കൊരി​ന്ത്യർ 15:33; എഫെസ്യർ 5:3-5) കൊഞ്ചി​ക്കു​ഴ​ഞ്ഞു​കൊ​ണ്ടോ വസ്‌ത്ര​ധാ​ര​ണ​ത്തി​ലും ചമയത്തി​ലും മാന്യ​മ​ല്ലാത്ത രീതികൾ പിൻപ​റ്റി​ക്കൊ​ണ്ടോ അവരുടെ ശ്രദ്ധ പിടി​ച്ചു​പ​റ്റാൻ ശ്രമി​ക്കു​ന്നത്‌ എത്രയോ ഭോഷ​ത്ത​മാണ്‌!—1 തിമൊ​ഥെ​യൊസ്‌ 4:8; 1 പത്രൊസ്‌ 3:3, 4.

ആത്മീയരത്നങ്ങൾ

w00 7/15 29 ¶7

ഒരു അധാർമിക ലോക​ത്തിൽ നിങ്ങൾക്കു നിർമ​ല​രാ​യി തുടരാ​നാ​കും

അധാർമി​ക​ത​യ്‌ക്കു വഴങ്ങു​ന്ന​തിന്‌ ഒടു​ക്കേ​ണ്ടി​വ​രുന്ന കടുത്ത വില ശലോ​മോൻ ഇവിടെ ഊന്നി​പ്പ​റ​യു​ന്നു. വ്യഭി​ചാ​രം മാന്യ​ത​യും ആത്മാഭി​മാ​ന​വും നഷ്ടപ്പെ​ടാൻ ഇടയാ​ക്കു​ന്നു. നമ്മു​ടെ​ത​ന്നെ​യോ മറ്റൊ​രാ​ളു​ടെ​യോ അധാർമിക അഭിനി​വേ​ശത്തെ തൃപ്‌തി​പ്പെ​ടു​ത്താ​നാ​യി ജീവി​ക്കു​ന്നത്‌ തീർച്ച​യാ​യും അപമാ​ന​ക​ര​മല്ലേ? ഒരുവന്റെ വിവാ​ഹിത പങ്കാളി അല്ലാത്ത ഒരാളു​മാ​യി ലൈം​ഗിക വേഴ്‌ച​യിൽ ഏർപ്പെ​ടു​ന്നത്‌ ആത്മാഭി​മാ​ന​ത്തി​ന്റെ അഭാവ​ത്തെ​യല്ലേ സൂചി​പ്പി​ക്കു​ന്നത്‌?

മാർച്ച്‌ 24-30

ദൈവ​വ​ച​ന​ത്തി​ലെ നിധികൾ | സുഭാ​ഷി​തങ്ങൾ 6

ഉറുമ്പു​ക​ളിൽനിന്ന്‌ നമുക്ക്‌ എന്തു പഠിക്കാം?

it-1-E 115 ¶1-2

ഉറുമ്പ്‌

‘സഹജജ്ഞാ​നം.’ ഉറുമ്പു​കൾക്കുള്ള ജ്ഞാനം ജനിത​ക​മാണ്‌. അത്‌ സ്രഷ്ടാവ്‌ കൊടു​ത്ത​താണ്‌. ബൈബിൾ പറയു​ന്ന​തു​പോ​ലെ ഉറുമ്പു​കൾ “വേനൽക്കാ​ലത്ത്‌ തീറ്റ ഒരുക്കു​ന്നു, കൊയ്‌ത്തു​കാ​ലത്ത്‌ ആഹാരം ശേഖരി​ച്ചു​വെ​ക്കു​ന്നു.” (സുഭ 6:8) പലസ്‌തീ​നിൽ സാധാ​ര​ണ​യാ​യി കണ്ടുവ​രുന്ന ഒരു തരം ഉറുമ്പ്‌, ചൂടുള്ള മാസങ്ങ​ളിൽ വലിയ അളവിൽ ധാന്യം ശേഖരി​ച്ചു​വെ​ക്കും. എന്നിട്ട്‌ തണുപ്പു​കാ​ലം​പോ​ലെ ഭക്ഷണം കിട്ടാൻ ബുദ്ധി​മു​ട്ടുള്ള സമയത്ത്‌ അത്‌ ഉപയോ​ഗി​ക്കും. ധാന്യങ്ങൾ മഴയെ​ത്തെ​ങ്ങാ​നും നനഞ്ഞു​പോ​യാൽ ആ ഉറുമ്പു​കൾ അത്‌ എടുത്തു​കൊ​ണ്ടു​പോ​യി വെയി​ല​ത്തു​വെച്ച്‌ ഉണക്കും. ഇനി ധാന്യങ്ങൾ സൂക്ഷി​ച്ചു​വെ​ക്കു​മ്പോൾ മുളച്ചു​പോ​കാ​തി​രി​ക്കാൻ അതിന്റെ മുള വരുന്ന ഭാഗം അവർ നശിപ്പി​ച്ചു​ക​ള​യു​ക​പോ​ലും ചെയ്യും.

അനുക​രി​ക്കാ​നാ​കുന്ന ഗുണങ്ങൾ. ഉറുമ്പു​ക​ളെ​ക്കു​റിച്ച്‌ ചെറു​താ​യൊ​ന്നു പഠിച്ചാൽ, “മടിയാ, ഉറുമ്പി​ന്റെ അടു​ത്തേക്കു ചെല്ലുക; അതു ചെയ്യു​ന്ന​തെ​ല്ലാം നോക്കി ജ്ഞാനം നേടുക” എന്ന വാക്കു​ക​ളു​ടെ അർഥം നമുക്കു മനസ്സി​ലാ​കും. (സുഭ 6:6) അവർ ഭാവി​ക്കാ​യി ഒരുങ്ങുക മാത്രമല്ല, മടുപ്പി​ല്ലാ​തെ ഉറച്ച മനസ്സോ​ടെ അധ്വാ​നി​ക്കു​ക​യും ചെയ്യുന്നു. തങ്ങളുടെ ഭാര​ത്തെ​ക്കാൾ ഇരട്ടി​യോ അതില​ധി​ക​മോ തൂക്കമുള്ള വസ്‌തു​ക്കൾ എടുക്കാ​നോ വലിച്ചു​കൊ​ണ്ടു​പോ​കാ​നോ ഉറുമ്പു​കൾക്കാ​കും. ഒരു ജോലി പൂർത്തി​യാ​ക്കാൻ അവർ ആവുന്ന​തെ​ല്ലാം ചെയ്യും. വീഴു​ന്ന​തോ തെന്നു​ന്ന​തോ ഇറക്കത്തിൽ ഉരുണ്ടു​പോ​കു​ന്ന​തോ ഒന്നും അവരെ തളർത്തി​ക്ക​ള​യില്ല. അതു​പോ​ലെ വളരെ സഹകരിച്ച്‌ പ്രവർത്തി​ക്കുന്ന ജീവി​ക​ളാണ്‌ ഉറുമ്പു​കൾ. അവ കൂട്‌ വളരെ വൃത്തി​യാ​യി സൂക്ഷി​ക്കും, പരസ്‌പരം കരുത​ലോ​ടെ ഇടപെ​ടും. കൂടെ ജോലി ചെയ്യുന്ന ഉറുമ്പു​കൾക്കു പരിക്കു പറ്റുക​യോ ക്ഷീണം തോന്നു​ക​യോ ചെയ്‌താൽ മറ്റ്‌ ഉറുമ്പു​കൾ ചില​പ്പോ​ഴൊ​ക്കെ അവയെ കൂട്ടിൽ കൊണ്ടാ​ക്കു​ക​പോ​ലും ചെയ്യും.

w00 9/15 26 ¶4-5

നിങ്ങളു​ടെ പേര്‌ കാത്തു​സൂ​ക്ഷി​ക്കു​ക

നമ്മളും ഉറുമ്പി​നെ​പ്പോ​ലെ കഠിനാ​ധ്വാ​നി​കൾ ആയിരി​ക്കേ​ണ്ട​തല്ലേ? മേൽനോ​ട്ട​മു​ണ്ടെ​ങ്കി​ലും ഇല്ലെങ്കി​ലും, കഠിന​മാ​യി അധ്വാ​നി​ക്കു​ന്ന​തും വേലയിൽ പുരോ​ഗതി പ്രാപി​ക്കാൻ ശ്രമി​ക്കു​ന്ന​തും നമുക്ക്‌ പ്രയോ​ജ​ന​ക​ര​മാണ്‌. അതേ, സ്‌കൂ​ളി​ലും ജോലി​സ്ഥ​ല​ത്തും ആത്മീയ പ്രവർത്ത​ന​ങ്ങ​ളി​ലും കഴിവി​ന്റെ പരമാ​വധി നാം ചെയ്യേ​ണ്ട​താണ്‌. കഠിനാ​ധ്വാ​ന​ത്തി​ന്റെ ഫലം ഉറുമ്പിന്‌ ലഭിക്കു​ന്ന​തു​പോ​ലെ, ‘നാം പ്രയത്‌നി​ക്കുന്ന സകല പ്രയത്‌ന​ത്തി​ലും സുഖം അനുഭ​വി​ക്ക​ണ​മെന്ന്‌’ ദൈവം ആഗ്രഹി​ക്കു​ന്നു. (സഭാ​പ്ര​സം​ഗി 3:13, 22; 5:18) കഠിനാ​ധ്വാ​ന​ത്തി​ന്റെ ഫലമോ, ശുദ്ധ മനസ്സാ​ക്ഷി​യും ആത്മസം​തൃ​പ്‌തി​യും ആണ്‌.—സഭാ​പ്ര​സം​ഗി 5:12.

രണ്ട്‌ ചോദ്യ​ങ്ങൾ ഉപയോ​ഗി​ച്ചു​കൊണ്ട്‌ ശലോ​മോൻ മടിയനെ അവന്റെ ആലസ്യ​ത്തിൽനിന്ന്‌ തട്ടിയു​ണർത്താൻ ശ്രമി​ക്കു​ന്നു: “മടിയാ, നീ എത്ര​നേരം കിടന്നു​റ​ങ്ങും? എപ്പോൾ ഉറക്കത്തിൽനി​ന്നെ​ഴു​ന്നേ​ല്‌ക്കും?” അവനെ പരിഹ​സി​ച്ചു​കൊണ്ട്‌ രാജാവ്‌ പറയുന്നു: “കുറേ​ക്കൂ​ടെ ഉറക്കം; കുറേ​ക്കൂ​ടെ നിദ്ര; കുറേ​ക്കൂ​ടെ കൈ​കെ​ട്ടി​ക്കി​ടക്ക. അങ്ങനെ നിന്റെ ദാരി​ദ്ര്യം വഴി​പോ​ക്ക​നെ​പ്പോ​ലെ​യും നിന്റെ ബുദ്ധി​മു​ട്ടു ആയുധ​പാ​ണി​യെ​പ്പോ​ലെ​യും വരും.” (സദൃശ​വാ​ക്യ​ങ്ങൾ 6:9-11) മടിയൻ കിടന്നു​റ​ങ്ങു​മ്പോൾ, പട്ടിണി ഒരു കവർച്ച​ക്കാ​ര​നെ​പ്പോ​ലെ അവനെ പിടി​കൂ​ടു​ക​യും ദാരി​ദ്ര്യം ഒരു ആയുധ​ധാ​രി​യെ​പ്പോ​ലെ അവനെ ആക്രമി​ക്കു​ക​യും ചെയ്യും. മടിയന്റെ വയലിൽ കളയും ചൊറി​യ​ണ​വും പെട്ടെന്നു നിറയും. (സദൃശ​വാ​ക്യ​ങ്ങൾ 24:30, 31) അയാളു​ടെ വ്യാപാര സംരം​ഭങ്ങൾ പെട്ടെ​ന്നു​തന്നെ പരാജ​യ​മ​ട​യും. ഒരു തൊഴി​ലു​ടമ അലസനെ എത്രകാ​ല​ത്തേക്കു സഹിക്കും? മടിയ​നായ ഒരു വിദ്യാർഥിക്ക്‌ സ്‌കൂ​ളിൽ നല്ല മാർക്കു കിട്ടു​മെന്നു പ്രതീ​ക്ഷി​ക്കാ​നാ​കു​മോ?

ആത്മീയരത്നങ്ങൾ

w00 9/15 27 ¶4

നിങ്ങളു​ടെ പേര്‌ കാത്തു​സൂ​ക്ഷി​ക്കു​ക

സദൃശ​വാ​ക്യ​ങ്ങൾ പരാമർശി​ക്കുന്ന ഏഴു കാര്യ​ങ്ങ​ളിൽ അടിസ്ഥാ​ന​പ​ര​മാ​യി തെറ്റായ എല്ലാത്തരം പ്രവൃ​ത്തി​ക​ളും ഉൾപ്പെ​ടു​ന്നു. “ഗർവ്വമുള്ള കണ്ണും” “ദുരു​പാ​യം നിരൂ​പി​ക്കുന്ന ഹൃദയ​വും” പാപക​ര​മായ ചിന്തക​ളാണ്‌. “വ്യാജ​മുള്ള നാവും” “ഭോഷ്‌കു പറയുന്ന കള്ളസാ​ക്ഷി​യും” പാപക​ര​മായ വാക്കു​ക​ളാണ്‌. “കുററ​മി​ല്ലാത്ത രക്തം ചൊരി​യുന്ന കയ്യും” “ദോഷ​ത്തി​ന്നു ബദ്ധപ്പെട്ടു ഓടുന്ന കാലും” ദുഷ്‌ചെ​യ്‌തി​ക​ളാണ്‌. സമാധാ​ന​ത്തിൽ കഴിഞ്ഞു​കൂ​ടു​ന്ന​വരെ തമ്മിൽ തല്ലിക്കു​ക​യും അതു കണ്ട്‌ രസിക്കു​ക​യും ചെയ്യുന്ന ഏതൊ​രു​വ​നെ​യും യഹോവ പ്രത്യേ​കി​ച്ചും വെറു​ക്കു​ന്നു. ആറിൽനിന്ന്‌ ഏഴി​ലേ​ക്കുള്ള വർധന സൂചി​പ്പി​ക്കു​ന്നത്‌ ആ പട്ടിക പൂർണ​മാ​കു​ന്നില്ല എന്നാണ്‌. കാരണം, മനുഷ്യർ തങ്ങളുടെ ദുഷ്‌ചെ​യ്‌തി​കൾ പെരു​ക്കി​ക്കൊ​ണ്ടി​രി​ക്കു​ക​യാ​ണ​ല്ലോ.

മാർച്ച്‌ 31–ഏപ്രിൽ 6

ദൈവ​വ​ച​ന​ത്തി​ലെ നിധികൾ | സുഭാ​ഷി​തങ്ങൾ 7

പ്രലോ​ഭ​ന​ക​ര​മായ സാഹച​ര്യ​ങ്ങൾ ഒഴിവാ​ക്കു​ക

w00 11/15 29 ¶5

‘എന്റെ കല്‌പ​ന​കളെ പ്രമാ​ണി​ച്ചു ജീവി​ക്കുക’

ശലോ​മോൻ പുറ​ത്തേക്കു നോക്കു​ന്നത്‌ കിളി​വാ​തി​ലി​ന്റെ അഴികൾക്കി​ട​യി​ലൂ​ടെ​യാണ്‌—ധാരാളം കൊത്തു​പ​ണി​കൾ ഉള്ള ഒന്നായി​രു​ന്നി​രി​ക്കണം ആ അഴികൾ. ഇപ്പോൾ സന്ധ്യാ​വെ​ളി​ച്ചം മങ്ങാനും തെരു​വി​ന്റെ മുക്കി​ലും മൂലയി​ലും ഇരുട്ടു പരക്കാ​നും തുടങ്ങു​ന്നു. എളുപ്പം പ്രലോ​ഭ​ന​ത്തിൽ വീണേ​ക്കാ​വുന്ന ഒരു ചെറു​പ്പ​ക്കാ​രനെ അവൻ കാണുന്നു. വിവേ​ക​മോ സുബോ​ധ​മോ ഇല്ലാത്ത അവൻ ബുദ്ധി​ഹീ​ന​നാണ്‌. സാധ്യ​ത​യ​നു​സ​രിച്ച്‌, താൻ എത്തിയി​രി​ക്കുന്ന സ്ഥലത്തെ​യും തനിക്ക്‌ അവിടെ എന്തു സംഭവി​ച്ചേ​ക്കാം എന്നതി​നെ​യും കുറിച്ച്‌ അവന്‌ അറിയാം. ആ ചെറു​പ്പ​ക്കാ​രൻ “അവളുടെ വീട്ടിന്റെ കോണി​ന്ന​രി​കെ” എത്തുന്നു. അവൾ ആരാണ്‌? എന്താണ്‌ അവളുടെ തൊഴിൽ?

w00 11/15 30 ¶4-6

‘എന്റെ കല്‌പ​ന​കളെ പ്രമാ​ണി​ച്ചു ജീവി​ക്കുക’

ഈ സ്‌ത്രീ​യു​ടെ അധരങ്ങ​ളിൽ മൃദു​വാ​ക്കു നിറഞ്ഞി​രി​ക്കു​ന്നു. ധൈര്യം നടിച്ചു​കൊണ്ട്‌ അവൾ അവനോട്‌ ആത്മവി​ശ്വാ​സ​ത്തോ​ടെ സംസാ​രി​ക്കു​ന്നു. അവൾ പറയുന്ന ഓരോ വാക്കും ആ ചെറു​പ്പ​ക്കാ​രനെ വശീക​രി​ക്കാൻ ശ്രദ്ധാ​പൂർവം മെന​ഞ്ഞെ​ടു​ത്ത​വ​യാണ്‌. ആ ദിവസം​തന്നെ സമാധാ​ന​യാ​ഗങ്ങൾ നടത്തി നേർച്ച​കളെ കഴിച്ചി​രി​ക്കു​ന്നു എന്നു പ്രസ്‌താ​വി​ച്ചു​കൊണ്ട്‌ താൻ നീതി​നി​ഷ്‌ഠ​യും ആത്മീയ​ത​യു​ള്ള​വ​ളും ആണെന്ന്‌ അവൾ സൂചി​പ്പി​ക്കു​ക​യാണ്‌. യെരൂ​ശ​ലേ​മി​ലെ ആലയത്തിൽ അർപ്പി​ച്ചി​രുന്ന സമാധാ​ന​യാ​ഗ​ങ്ങ​ളിൽ മാംസ​വും മാവു​പൊ​ടി​യും എണ്ണയും വീഞ്ഞും ഉൾപ്പെ​ട്ടി​രു​ന്നു. (ലേവ്യ​പു​സ്‌തകം 19:5, 6; 22:21; സംഖ്യാ​പു​സ്‌തകം 15:8-10) സമാധാ​ന​യാ​ഗം അർപ്പി​ക്കുന്ന വ്യക്തി​ക്കും അയാളു​ടെ കുടും​ബ​ത്തി​നും യാഗവ​സ്‌തു​ക്കൾ ഭക്ഷിക്കാ​മാ​യി​രു​ന്ന​തി​നാൽ, വീട്ടിൽ തിന്നാ​നും കുടി​ക്കാ​നും ധാരാളം ഉണ്ടെന്ന്‌ അവൾ സൂചി​പ്പി​ക്കു​ക​യാ​യി​രു​ന്നു. അവൾ ഇവിടെ ഉദ്ദേശി​ക്കുന്ന കാര്യം വ്യക്തമാണ്‌: ചെറു​പ്പ​ക്കാ​രന്‌ അവളുടെ വീട്ടിൽ എല്ലാവിധ സുഖങ്ങ​ളും ആസ്വദി​ക്കാൻ കഴിയും. അവനെ​ത്തന്നെ തേടി​യാണ്‌ അവൾ വീട്ടിൽനി​ന്നു പുറത്തു വന്നിരി​ക്കു​ന്നത്‌. ആ കഥ വിശ്വ​സി​ക്കുന്ന ഒരുവനെ സംബന്ധി​ച്ചി​ട​ത്തോ​ളം, അത്‌ എത്ര ഹൃദയ​സ്‌പർശി​യാണ്‌! ഒരു ബൈബിൾ പണ്ഡിതൻ ഇങ്ങനെ പറയുന്നു: “ആരെ​യെ​ങ്കി​ലും കിട്ടാ​നാണ്‌ അവൾ വെളി​യിൽ വന്നത്‌ എന്നതു ശരിതന്നെ, എന്നാൽ ഈ ആളെത്തന്നെ തേടി​യാ​ണോ അവൾ വന്നിരി​ക്കു​ന്നത്‌? ഒരു വിഡ്‌ഢി മാത്രമേ അതു വിശ്വ​സി​ക്കു​ക​യു​ള്ളൂ—ഈ ചെറു​പ്പ​ക്കാ​രൻ അത്തര​മൊ​രു വിഡ്‌ഢി ആണെന്നു തോന്നു​ന്നു.”

തന്റെ വസ്‌ത്ര​ത്താ​ലും മധുര​വാ​ക്കു​ക​ളാ​ലും ആലിംഗന സ്‌പർശ​ത്താ​ലും ചുംബ​ന​ത്താ​ലും ആ ചെറു​പ്പ​ക്കാ​രനെ തന്നി​ലേക്ക്‌ ആകർഷി​ച്ച​ശേഷം അവൾ സുഗന്ധത്തെ കുറിച്ച്‌ പറയുന്നു: “ഞാൻ എന്റെ കട്ടിലി​ന്മേൽ പരവതാ​നി​ക​ളും മിസ്ര​യീ​മ്യ​നൂൽകൊ​ണ്ടുള്ള വരിയൻപ​ട​ങ്ങ​ളും വിരി​ച്ചി​രി​ക്കു​ന്നു. മൂറും അകിലും ലവംഗ​വും​കൊ​ണ്ടു ഞാൻ എന്റെ മെത്ത സുഗന്ധ​മാ​ക്കി​യി​രി​ക്കു​ന്നു.” (സദൃശ​വാ​ക്യ​ങ്ങൾ 7:16, 17) അവൾ ഈജി​പ്‌തിൽനി​ന്നുള്ള വർണഭം​ഗി​യാർന്ന വിരി​കൾകൊണ്ട്‌ തന്റെ കിടക്ക മനോ​ഹ​ര​മാ​യി അണിയി​ച്ചൊ​രു​ക്കു​ക​യും മൂറും അകിലും ലവംഗ​വും കൊണ്ട്‌ അതിനെ സുഗന്ധ​പൂ​രി​ത​മാ​ക്കു​ക​യും ചെയ്‌തി​രി​ക്കു​ന്നു.

അവൾ തുടർന്നു പറയുന്നു, “വരിക; വെളു​ക്കും​വരെ നമുക്കു പ്രേമ​ത്തിൽ രമിക്കാം; കാമവി​ലാ​സ​ങ്ങ​ളാൽ നമുക്കു സുഖി​ക്കാം.” ആ ക്ഷണം ഇരുവർക്കു​മുള്ള നല്ലൊരു ഭോജ​ന​ത്തെ​ക്കാൾ കവിഞ്ഞ ഒന്നാണ്‌. ലൈം​ഗി​ക​സു​ഖം നൽകാം എന്നാണ്‌ അവളുടെ വാഗ്‌ദാ​നം. ആ ചെറു​പ്പ​ക്കാ​രനെ സംബന്ധി​ച്ചി​ട​ത്തോ​ളം പ്രസ്‌തുത വാഗ്‌ദാ​നം സാഹസി​ക​വും ഉത്തേജ​ക​വു​മാണ്‌! അവനെ കൂടു​ത​ലാ​യി വശീക​രി​ക്കാ​നെ​ന്നോ​ണം അവൾ ഇങ്ങനെ കൂട്ടി​ച്ചേർക്കു​ന്നു: “പുരുഷൻ വീട്ടിൽ ഇല്ല; ദൂരയാ​ത്ര പോയി​രി​ക്കു​ന്നു; പണമടി​ശ്ശീല കൂടെ കൊണ്ടു​പോ​യി​ട്ടു​ണ്ടു; പൌർണ്ണ​മാ​സി​ക്കേ വീട്ടിൽ വന്നെത്തു​ക​യു​ള്ളു.” (സദൃശ​വാ​ക്യ​ങ്ങൾ 7:18-20) അവർ തികച്ചും സുരക്ഷി​ത​രാ​യി​രി​ക്കു​മെന്ന്‌ അവൾ ഉറപ്പു നൽകുന്നു. കാരണം, അവളുടെ ഭർത്താവ്‌ ഏതോ ബിസി​നസ്‌ ആവശ്യ​ത്തി​നാ​യി ദൂരയാ​ത്ര പോയി​രി​ക്കു​ക​യാണ്‌, ഉടനെ​യെ​ങ്ങും മടങ്ങി​യെ​ത്തു​ക​യില്ല. ഒരു ചെറു​പ്പ​ക്കാ​രനെ വഞ്ചിക്കാൻ അവൾ എത്ര മിടു​ക്കി​യാണ്‌! “ഇങ്ങനെ ഏറി​യോ​രു ഇമ്പവാ​ക്കു​ക​ളാൽ അവൾ അവനെ വശീക​രി​ച്ചു അധരമാ​ധു​ര്യം​കൊ​ണ്ടു അവനെ നിർബ്ബ​ന്ധി​ക്കു​ന്നു.” (സദൃശ​വാ​ക്യ​ങ്ങൾ 7:21) യോ​സേ​ഫി​ന്റെതു പോലുള്ള മാനസിക കരുത്ത്‌ ഉണ്ടെങ്കി​ലേ ഒരുവന്‌ ഇത്തരം പ്രലോ​ഭ​നത്തെ ചെറു​ത്തു​നിൽക്കാ​നാ​കൂ. (ഉല്‌പത്തി 39:9, 12) ഈ ചെറു​പ്പ​ക്കാ​രൻ ആ പ്രലോ​ഭ​നത്തെ ചെറു​ത്തു​നിൽക്കു​ന്നു​ണ്ടോ?

w00 11/15 31 ¶2

‘എന്റെ കല്‌പ​ന​കളെ പ്രമാ​ണി​ച്ചു ജീവി​ക്കുക’

അവളുടെ ക്ഷണം ആ ചെറു​പ്പ​ക്കാ​രനു നിരസി​ക്കാൻ കഴിയു​ന്നില്ല. എല്ലാ സുബോ​ധ​വും ഉപേക്ഷിച്ച്‌ ‘അറുക്കു​ന്നേ​ട​ത്തേക്കു പോകുന്ന കാള​യെ​പ്പോ​ലെ’ അവൻ അവളുടെ പിന്നാലെ പോകു​ന്നു. ചങ്ങലയാൽ ബന്ധിത​നായ ഒരു മനുഷ്യ​നു തന്റെ ശിക്ഷയിൽനിന്ന്‌ രക്ഷപ്പെ​ടാൻ കഴിയാ​ത്തതു പോലെ, ആ ചെറു​പ്പ​ക്കാ​രൻ പാപത്തി​ലേക്ക്‌ ആകർഷി​ക്ക​പ്പെ​ടു​ന്നു. “കരളിൽ അസ്‌ത്രം തറെക്കു​വോ​ളം” അതായത്‌ മരണക​ര​മായ മുറിവ്‌ ഏൽക്കു​ന്ന​തു​വരെ, അവൻ അപകടം കാണു​ന്നില്ല. ലൈം​ഗി​ക​മാ​യി പകരുന്ന മാരക രോഗങ്ങൾ പിടി​പെട്ട്‌ അവൻ അക്ഷരീ​യ​മാ​യി മരി​ച്ചേ​ക്കാം. പ്രസ്‌തുത മുറി​വി​ന്റെ ഫലമായി, അവന്‌ ആത്മീയ മരണവും—“ജീവഹാ​നി”—സംഭവി​ച്ചേ​ക്കാം. അവന്റെ മുഴു സ്വത്വ​വും, മുഴു ജീവി​ത​വും, അങ്ങനെ പ്രതി​കൂ​ല​മാ​യി ബാധി​ക്ക​പ്പെ​ടു​ന്നു. അവൻ ദൈവ​ത്തി​നെ​തി​രെ ഗുരു​ത​ര​മായ പാപം ചെയ്‌തി​രി​ക്കു​ന്നു. അങ്ങനെ അവൻ, കെണി​യിൽ അകപ്പെ​ടുന്ന ഒരു പക്ഷി​യെ​പ്പോ​ലെ മരണത്തി​ന്റെ പിടി​യി​ലേക്കു ധൃതി​പ്പെ​ടു​ന്നു.

ആത്മീയരത്നങ്ങൾ

w00 11/15 29 ¶1

‘എന്റെ കല്‌പ​ന​കളെ പ്രമാ​ണി​ച്ചു ജീവി​ക്കുക’

“നിന്റെ വിരലി​ന്മേൽ അവയെ [എന്റെ കൽപ്പന​കളെ] കെട്ടുക; ഹൃദയ​ത്തി​ന്റെ പലകയിൽ [അവയെ] എഴുതുക” എന്നു ശലോ​മോൻ തുടർന്നു പറയുന്നു. (സദൃശ​വാ​ക്യ​ങ്ങൾ 7:3) കൈവി​ര​ലു​കൾ നമുക്ക്‌ എളുപ്പം കാണാൻ കഴിയുന്ന സ്ഥാനത്താണ്‌. നാം ഉദ്ദേശി​ക്കുന്ന കാര്യങ്ങൾ ചെയ്യു​ന്ന​തിൽ അവ ഒരു സുപ്ര​ധാന പങ്കുവ​ഹി​ക്കു​ന്നു. അതു​പോ​ലെ, തിരു​വെ​ഴു​ത്തു പരിശീ​ല​ന​ത്തിൽനി​ന്നും ബൈബിൾ ഗ്രാഹ്യ​ത്തിൽനി​ന്നും ലഭിക്കുന്ന പാഠങ്ങൾ ഒരു നിരന്തര മുന്നറി​യി​പ്പാ​യും നാം ചെയ്യുന്ന സകലത്തി​ലും ഒരു വഴികാ​ട്ടി​യാ​യും ഉതകണം. നാം അവയെ നമ്മുടെ ഹൃദയ​പ്പ​ല​ക​യിൽ എഴുതു​ക​യും വ്യക്തി​ത്വ​ത്തി​ന്റെ ഭാഗമാ​ക്കു​ക​യും വേണം.

ഏപ്രിൽ 7-13

ദൈവ​വ​ച​ന​ത്തി​ലെ നിധികൾ | സുഭാ​ഷി​തങ്ങൾ 8

ജ്ഞാനത്തി​ന്റെ ആൾരൂ​പ​ത്തി​നു ശ്രദ്ധ​കൊ​ടു​ക്കു​ക

cf 130 ¶7

“ഞാൻ പിതാ​വി​നെ സ്‌നേ​ഹി​ക്കു​ന്നു”

⁷ “യഹോവ പണ്ടുപണ്ടേ തന്റെ വഴിയു​ടെ ആരംഭ​മാ​യി, തന്റെ പ്രവൃ​ത്തി​ക​ളു​ടെ ആദ്യമാ​യി എന്നെ ഉളവാക്കി” എന്ന്‌ 22-ാം വാക്യ​ത്തിൽ ജ്ഞാനം പറയുന്നു. കേവലം ജ്ഞാന​ത്തെ​ക്കു​റി​ച്ചല്ല ഇവിടെ പറയു​ന്നത്‌; ജ്ഞാന​ത്തെ​ക്കു​റി​ച്ചാ​ണെ​ങ്കിൽ “ഉളവാക്കി” എന്നു പറയാ​നാ​വി​ല്ല​ല്ലോ. കാരണം, ജ്ഞാനി​യായ നമ്മുടെ ദൈവ​ത്തിന്‌ ആരംഭ​മി​ല്ലാ​ത്ത​തു​കൊണ്ട്‌ ജ്ഞാനത്തി​നും ആരംഭ​മില്ല. (സങ്കീർത്തനം 90:2) പക്ഷേ, ദൈവ​പു​ത്രൻ, ‘സകല സൃഷ്ടി​കൾക്കും ആദ്യജാ​ത​നാ​ണെന്ന്‌’ ബൈബിൾ പറയുന്നു. അതെ, യേശു​വിന്‌ ആരംഭ​മുണ്ട്‌. അവനെ ദൈവം സൃഷ്ടി​ച്ച​താണ്‌, മറ്റെല്ലാം സൃഷ്ടി​ക്കു​ന്ന​തി​നു​മുമ്പ്‌. (കൊ​ലോ​സ്യർ 1:15) ആകാശ​വും ഭൂമി​യും ഉണ്ടാകു​ന്ന​തി​നു​മു​മ്പേ പുത്രൻ ഉണ്ടായി​രു​ന്നു എന്ന്‌ സദൃശ​വാ​ക്യ​ങ്ങൾ പറയുന്നു. വചനം അഥവാ ദൈവ​ത്തി​ന്റെ വക്താവ്‌ എന്നനി​ല​യിൽ വർത്തിച്ച അവൻ യഹോ​വ​യു​ടെ ജ്ഞാനം അതേപടി പ്രതി​ഫ​ലി​പ്പി​ച്ചു.—യോഹ​ന്നാൻ 1:1.

cf 131 ¶8-9

“ഞാൻ പിതാ​വി​നെ സ്‌നേ​ഹി​ക്കു​ന്നു”

⁸ ഭൂമി​യിൽ വരുന്ന​തി​നു​മു​മ്പുള്ള കാലമ​ത്ര​യും യേശു എന്തു ചെയ്യു​ക​യാ​യി​രു​ന്നു? ഒരു വിദഗ്‌ധ ജോലി​ക്കാ​ര​നാ​യി അവൻ ദൈവ​ത്തോ​ടു​കൂ​ടെ ഉണ്ടായി​രു​ന്നു എന്ന്‌ 30-ാം വാക്യം സൂചി​പ്പി​ക്കു​ന്നു. എന്താണ്‌ അതിന്റെ അർഥം? കൊ​ലോ​സ്യർ 1:16 നൽകുന്ന വിശദീ​ക​രണം ഇതാണ്‌: “സ്വർഗ​ത്തി​ലും ഭൂമി​യി​ലു​മുള്ള മറ്റെല്ലാം അവൻ മുഖാ​ന്ത​ര​മ​ത്രേ സൃഷ്ടി​ക്ക​പ്പെ​ട്ടത്‌; . . . എല്ലാം, അവനി​ലൂ​ടെ​യും അവനാ​യി​ട്ടും സൃഷ്ടി​ക്ക​പ്പെട്ടു.” അതെ, യഹോവ പുത്രൻ മുഖാ​ന്ത​ര​മാണ്‌ എല്ലാം സൃഷ്ടി​ച്ചത്‌. സ്വർഗ​ത്തി​ലെ ദൂതന്മാർ, ബൃഹത്തായ ഈ പ്രപഞ്ചം, സസ്യല​താ​ദി​ക​ളും ജന്തുജാ​ല​ങ്ങ​ളും നിറഞ്ഞ നമ്മുടെ ഭൂമി, ഭൗമിക സൃഷ്ടിക്കു മകുടം​ചാർത്തുന്ന മനുഷ്യൻ, അങ്ങനെ എല്ലാം! സഹകര​ണ​ത്തോ​ടെ ഒരുമി​ച്ചു പ്രവർത്തി​ക്കുന്ന ഒരു ആർക്കി​ടെ​ക്‌റ്റും അദ്ദേഹ​ത്തി​ന്റെ മനസ്സി​ലുള്ള ഡിസൈൻ യാഥാർഥ്യ​മാ​ക്കുന്ന ഒരു കോൺട്രാ​ക്‌ട​റും ഇപ്പോൾ നിങ്ങളു​ടെ മനസ്സി​ലേക്കു വന്നേക്കാം. പിതാ​വി​നും പുത്ര​നും ഇടയി​ലുള്ള സഹകരണം ഏതാണ്ട്‌ അങ്ങനെ​യാ​യി​രു​ന്നു എന്നു പറയാം. സൃഷ്ടി​യി​ലെ ഒരു വിസ്‌മയം കണ്ട്‌ അത്ഭുതം​കൂ​റു​മ്പോൾ മഹാശിൽപ്പി​യായ നമ്മുടെ ദൈവത്തെ മഹത്ത്വ​പ്പെ​ടു​ത്തു​ക​യാണ്‌ നാം. (സങ്കീർത്തനം 19:1) സ്രഷ്ടാ​വായ യഹോ​വ​യും അവന്റെ വിദഗ്‌ധ ജോലി​ക്കാ​ര​നായ യേശു​വും ഒരുമി​ച്ചു പ്രവർത്തിച്ച ആ നല്ല നാളു​ക​ളും അപ്പോൾ നമ്മുടെ മനസ്സി​ലേക്കു വന്നേക്കാം.

⁹ അപൂർണ​രായ രണ്ടു മനുഷ്യർ ഒരുമി​ച്ചു ജോലി​ചെ​യ്യു​മ്പോൾ ചില​പ്പോ​ഴൊ​ക്കെ പൊരു​ത്ത​പ്പെ​ട്ടു​പോ​കാൻ ബുദ്ധി​മു​ട്ടു​തോ​ന്നും. എന്നാൽ യഹോ​വ​യു​ടെ​യും യേശു​വി​ന്റെ​യും കാര്യ​ത്തിൽ അങ്ങനെ​യ​ല്ലാ​യി​രു​ന്നു. പുത്രൻ യുഗങ്ങ​ളോ​ളം പിതാ​വി​നോ​ടൊ​പ്പം പ്രവർത്തി​ച്ചു. എന്നിട്ടും അവൻ “ദിന​മ്പ്രതി [യഹോ​വ​യു​ടെ] പ്രമോ​ദ​മാ​യി​രു​ന്നു” എന്ന്‌ തിരു​വെ​ഴു​ത്തു​കൾ പറയുന്നു. (സദൃശ​വാ​ക്യ​ങ്ങൾ 8:30) അതെ, യഹോ​വ​യു​മാ​യുള്ള സഖിത്വം യേശു നന്നായി ആസ്വദി​ച്ചു. യഹോ​വ​യും അത്‌ ആസ്വദി​ച്ചു. യേശു പിതാ​വി​നെ​പ്പോ​ലെ ആയിത്തീർന്ന​തിൽ, അവന്റെ ഗുണങ്ങൾ അതേപടി അനുക​രി​ച്ച​തിൽ അത്ഭുത​പ്പെ​ടാ​നില്ല. അത്‌ അവരുടെ ബന്ധം കൂടുതൽ ദൃഢമാ​ക്കി! ഇത്ര​ത്തോ​ളം നീണ്ടു​നിന്ന, ഇത്ര​യേറെ ശക്തമായ മറ്റൊരു ബന്ധം വേറെ​യില്ല!

w09 4/15 31 ¶14

യേശു—വലിയ ദാവീ​ദും വലിയ ശലോ​മോ​നും

¹⁴ ശലോ​മോ​നെ​ക്കാൾ ജ്ഞാനി​യാ​യി​രുന്ന ഒരേ​യൊ​രു മനുഷ്യ​നേ ഉണ്ടായി​രു​ന്നു​ള്ളൂ; അത്‌ യേശു​ക്രി​സ്‌തു ആയിരു​ന്നു. “ശലോ​മോ​നി​ലും വലിയവൻ” എന്ന്‌ അവൻ തന്നെക്കു​റി​ച്ചു​തന്നെ പറയു​ക​യു​ണ്ടാ​യി. (മത്താ. 12:42) “നിത്യ​ജീ​വന്റെ വചനങ്ങ”ളാണ്‌ യേശു സംസാ​രി​ച്ചത്‌. (യോഹ. 6:68) തന്റെ ഗിരി​പ്ര​ഭാ​ഷ​ണ​ത്തിൽ യേശു പല തത്ത്വങ്ങ​ളും പഠിപ്പി​ച്ചു; ശലോ​മോൻ പറഞ്ഞ സദൃശ​വാ​ക്യ​ങ്ങ​ളു​ടെ കൂടുതൽ വിശദാം​ശങ്ങൾ അടങ്ങു​ന്ന​തും അവയെ​ക്കു​റിച്ച്‌ ആഴമായ ഗ്രാഹ്യം പ്രദാനം ചെയ്യു​ന്ന​വ​യു​മാ​യി​രു​ന്നു അവ. യഹോ​വ​യു​ടെ ആരാധ​കരെ ‘ഭാഗ്യ​വാ​ന്മാ​രാ​ക്കുന്ന’ അതായത്‌, അവർക്കു സന്തോഷം കൈവ​രു​ത്തുന്ന നിരവധി കാര്യ​ങ്ങ​ളെ​ക്കു​റിച്ച്‌ ശലോ​മോൻ പറഞ്ഞു. (സദൃ. 3:13; 8:32, 33; 14:21; 16:20) യഹോ​വ​യു​ടെ ആരാധ​ന​യോ​ടും അവന്റെ വാഗ്‌ദാന നിവൃ​ത്തി​യോ​ടും ബന്ധപ്പെട്ട കാര്യ​ങ്ങ​ളിൽനി​ന്നു മാത്രമേ യഥാർഥ സന്തുഷ്ടി കരഗത​മാ​കൂ എന്ന്‌ യേശു വ്യക്തമാ​ക്കി. അവൻ പറഞ്ഞു: “ആത്മാവിൽ ദരി​ദ്ര​രാ​യവർ ഭാഗ്യ​വാ​ന്മാർ” അതായത്‌, സന്തുഷ്ടർ; “സ്വർഗ്ഗ​രാ​ജ്യം അവർക്കു​ള്ളത്‌.” (മത്താ. 5:3) യേശു പഠിപ്പിച്ച തത്ത്വങ്ങൾ പിൻപ​റ്റു​ന്ന​വർക്ക്‌ ‘ജീവന്റെ ഉറവായ’ യഹോ​വ​യി​ലേക്ക്‌ അടുത്തു​ചെ​ല്ലാ​നാ​കും. (സങ്കീ. 36:9; സദൃ. 22:11; മത്താ. 5:8) “ദൈവ​ജ്ഞാന”മാണ്‌ ക്രിസ്‌തു. (1 കൊരി. 1:24, 30) മിശി​ഹൈക രാജാ​വെന്ന നിലയിൽ യേശു​ക്രി​സ്‌തു​വിന്‌ ‘ജ്ഞാനത്തി​ന്റെ ആത്മാവ്‌’ ഉണ്ട്‌.—യെശ. 11:2.

ആത്മീയരത്നങ്ങൾ

g 7/14 16

‘ജ്ഞാനം വിളി​ച്ചു​പ​റ​യു​ന്നു’ നിങ്ങൾക്ക്‌ കേൾക്കാ​നാ​കു​ന്നു​ണ്ടോ?

▪ “ചരി​ത്ര​ത്തി​ലു​ട​നീ​ളം ഏറ്റവും വ്യാപ​ക​മാ​യി വിതരണം ചെയ്‌തി​രി​ക്കുന്ന ഒരു പുസ്‌ത​ക​മാണ്‌” ബൈബിൾ എന്ന്‌ ഒരു സർവവി​ജ്ഞാ​ന​കോ​ശം പറയുന്നു. “അത്‌ മറ്റേ​തൊ​രു പുസ്‌ത​ക​ത്തെ​ക്കാ​ളും അധികം തവണയും അനേകം ഭാഷക​ളി​ലേ​ക്കും പരിഭാഷ ചെയ്‌തി​രി​ക്കു​ന്നു.” മുഴു​വ​നാ​യോ ഭാഗി​ക​മാ​യോ ബൈബിൾ ഇപ്പോൾ 2,600-ഓളം ഭാഷക​ളി​ലു​ള്ള​തി​നാൽ മനുഷ്യ​കു​ടും​ബ​ത്തിൽ 90 ശതമാ​ന​ത്തി​ല​ധി​കം ആളുകൾക്കും അതു ലഭ്യമാണ്‌.

▪ അക്ഷരീ​യ​മാ​യും ജ്ഞാനം ‘ഘോഷി​ക്കു​ന്നു.’ മത്തായി 24:14-ൽ നാം ഇങ്ങനെ വായി​ക്കു​ന്നു: “രാജ്യ​ത്തി​ന്റെ ഈ സുവി​ശേഷം സകല ജനതകൾക്കും ഒരു സാക്ഷ്യ​ത്തി​നാ​യി ഭൂലോ​ക​ത്തി​ലെ​ങ്ങും പ്രസം​ഗി​ക്ക​പ്പെ​ടും; അപ്പോൾ (ഈ ലോക​ത്തി​ന്റെ) അന്ത്യം വരും.”

ഏപ്രിൽ 14-20

ദൈവ​വ​ച​ന​ത്തി​ലെ നിധികൾ | സുഭാ​ഷി​തങ്ങൾ 9

ജ്ഞാനി​യാ​യി​രി​ക്കുക, പരിഹാ​സി​യാ​ക​രുത്‌

w22.02 9 ¶4

“ജ്ഞാനി​ക​ളു​ടെ വാക്കുകൾ . . . കേൾക്കുക”

⁴ പലപ്പോ​ഴും നേരി​ട്ടുള്ള ഉപദേശം സ്വീക​രി​ക്കാൻ നമുക്കു കൂടുതൽ ബുദ്ധി​മു​ട്ടു തോന്നി​യേ​ക്കാം. ചില​പ്പോൾ നമുക്കു നീരസം​പോ​ലും തോന്നാം. നമ്മൾ അപൂർണ​രാ​ണെ​ന്നൊ​ക്കെ സമ്മതി​ക്കു​മെ​ങ്കി​ലും ആരെങ്കി​ലും ഒരു തെറ്റു ചൂണ്ടി​ക്കാ​ണിച്ച്‌ ഉപദേശം തരു​മ്പോൾ അതു സ്വീക​രി​ക്കാൻ അത്ര എളുപ്പമല്ല. (സഭാ​പ്ര​സം​ഗകൻ 7:9 വായി​ക്കുക.) ന്യായീ​ക​രി​ക്കാ​നാ​യി​രി​ക്കാം ഉടനെ നമ്മുടെ ശ്രമം. അതു തന്ന ആളിന്റെ ഉദ്ദേശ്യ​ശു​ദ്ധി​യെ നമ്മൾ സംശയി​ച്ചേ​ക്കാം. അല്ലെങ്കിൽ തന്ന രീതി ശരിയ​ല്ലെന്നു പറഞ്ഞേ​ക്കാം. ‘അയാൾ ആരാ എന്നെ ഉപദേ​ശി​ക്കാൻ? അയാൾ പലതും ശരിയാ​യി​ട്ട​ല്ല​ല്ലോ ചെയ്യുന്നേ’ എന്നൊക്കെ പറഞ്ഞ്‌, ഉപദേശം തന്ന വ്യക്തി​യു​ടെ കുറ്റം കണ്ടുപി​ടി​ക്കാ​നും ഇടയുണ്ട്‌. കിട്ടിയ ഉപദേശം ഇഷ്ടപ്പെ​ട്ടി​ല്ലെ​ങ്കിൽ അത്‌ അവഗണി​ച്ചു​ക​ള​യാ​നോ നമ്മൾ ആഗ്രഹി​ക്കുന്ന ഉപദേശം തേടി​പ്പോ​കാ​നോ സാധ്യ​ത​യുണ്ട്‌.

w22.02 12 ¶12-14

“ജ്ഞാനി​ക​ളു​ടെ വാക്കുകൾ . . . കേൾക്കുക”

¹² ഉപദേശം സ്വീക​രി​ക്കാൻ നമ്മളെ എന്തു സഹായി​ക്കും? നമ്മളെ​ല്ലാം എത്ര അപൂർണ​രാ​ണെ​ന്നും നമു​ക്കൊ​ക്കെ അബദ്ധങ്ങൾ പറ്റാൻ സാധ്യ​ത​യു​ണ്ടെ​ന്നും ഓർത്തു​കൊണ്ട്‌ നമ്മൾ താഴ്‌മ​യു​ള്ള​വ​രാ​യി​രി​ക്കേ​ണ്ട​തുണ്ട്‌. നമ്മൾ ഇയ്യോ​ബി​ന്റെ കാര്യം കണ്ടല്ലോ. അദ്ദേഹ​ത്തി​ന്റെ ചിന്തയി​ലും ഇടയ്‌ക്കൊ​ക്കെ ചില കുഴപ്പ​ങ്ങ​ളു​ണ്ടാ​യി. പക്ഷേ പിന്നീട്‌ അദ്ദേഹം തന്റെ ചിന്തയ്‌ക്കു മാറ്റം വരുത്തി, യഹോവ അദ്ദേഹത്തെ അനു​ഗ്ര​ഹി​ക്കു​ക​യും ചെയ്‌തു. കാരണം ഇയ്യോബ്‌ താഴ്‌മ​യു​ള്ള​വ​നാ​യി​രു​ന്നു. അദ്ദേഹം എലീഹു​വി​ന്റെ ഉപദേശം സ്വീക​രി​ക്കാൻ തയ്യാറാ​യത്‌ അതിന്റെ തെളി​വാണ്‌, അതും എലീഹു​വിന്‌ ഇയ്യോ​ബി​നെ​ക്കാൾ വളരെ പ്രായം കുറവാ​യി​രു​ന്നി​ട്ടും. (ഇയ്യോ. 32:6, 7) ഒരു ഉപദേശം കിട്ടു​മ്പോൾ, തനിക്ക്‌ ഇപ്പോൾ ഈ ഉപദേ​ശ​ത്തി​ന്റെ ആവശ്യ​മി​ല്ലെ​ന്നോ അതു തരുന്ന വ്യക്തിക്കു തന്റെ അത്ര പ്രായ​മോ അനുഭ​വ​പ​രി​ച​യ​മോ ഇല്ലെന്നോ ഒക്കെ ചില​പ്പോൾ നമുക്കു തോന്നി​യേ​ക്കാം. അങ്ങനെ തോന്നു​മ്പോൾപ്പോ​ലും ആ ഉപദേശം സ്വീക​രി​ക്കാൻ താഴ്‌മ സഹായി​ക്കും. കാനഡ​യിൽനി​ന്നുള്ള ഒരു മൂപ്പൻ പറയുന്നു: “നമ്മുടെ കുറവു​കൾ നമ്മളെ​ക്കാൾ നന്നായി മറ്റുള്ള​വർക്കാ​ണ​ല്ലോ കാണാ​നാ​കു​ന്നത്‌. അവർ അതു പറഞ്ഞു​ത​ന്നി​ല്ലെ​ങ്കിൽ നമ്മൾ എങ്ങനെ മാറ്റം വരുത്തും?” ആളുകളെ സന്തോ​ഷ​വാർത്ത അറിയി​ക്കു​ക​യും പഠിപ്പി​ക്കു​ക​യും അതു​പോ​ലെ ദൈവാ​ത്മാ​വി​ന്റെ ഗുണം വളർത്തി​യെ​ടു​ക്കു​ക​യും ഒക്കെ ചെയ്യുന്ന കാര്യ​ത്തിൽ പുരോ​ഗ​മി​ക്കേണ്ട ആവശ്യ​മി​ല്ലാത്ത ആരാണു​ള്ളത്‌?—സങ്കീർത്തനം 141:5 വായി​ക്കുക.

¹³ ഉപദേ​ശത്തെ ദൈവ​സ്‌നേ​ഹ​ത്തി​ന്റെ തെളി​വാ​യി കാണുക. നമുക്ക്‌ ഏറ്റവും നല്ലതു വരാനാണ്‌ യഹോവ ആഗ്രഹി​ക്കു​ന്നത്‌. (സുഭാ. 4:20-22) ബൈബി​ളി​ലൂ​ടെ​യും പ്രസി​ദ്ധീ​ക​ര​ണ​ങ്ങ​ളി​ലൂ​ടെ​യും അനുഭ​വ​പ​രി​ച​യ​മുള്ള സഹോ​ദ​ര​ങ്ങ​ളി​ലൂ​ടെ​യും നമുക്ക്‌ ഉപദേ​ശങ്ങൾ തരു​മ്പോൾ യഹോവ നമ്മളെ സ്‌നേ​ഹി​ക്കു​ന്നെന്നു കാണി​ക്കു​ക​യാണ്‌. ‘നമുക്കു നല്ലതു വരാനാണ്‌’ ദൈവം അങ്ങനെ ചെയ്യു​ന്ന​തെന്ന്‌ എബ്രായർ 12:9, 10 പറയുന്നു.

¹⁴ പറയുന്ന കാര്യ​ത്തിൽ ശ്രദ്ധി​ക്കുക, പറഞ്ഞ വിധത്തി​ലല്ല. ആരെങ്കി​ലും നമുക്ക്‌ ഒരു ഉപദേശം തരു​മ്പോൾ അതു തന്ന രീതി ശരിയാ​യില്ല എന്നു ചില​പ്പോൾ നമുക്കു തോന്നി​യേ​ക്കാം. ഒരു ഉപദേശം കൊടു​ക്കു​മ്പോൾ ആ വ്യക്തിക്ക്‌ അതു സ്വീക​രി​ക്കാൻ ബുദ്ധി​മു​ട്ടി​ല്ലാത്ത രീതി​യിൽ അതു കൊടു​ക്ക​ണ​മെ​ന്നതു ശരിയാണ്‌. (ഗലാ. 6:1) എന്നാൽ നമുക്ക്‌ ഒരു ഉപദേശം കിട്ടു​മ്പോൾ പറയുന്ന കാര്യ​ത്തി​ലാ​ണു നമ്മൾ ശ്രദ്ധി​ക്കേ​ണ്ടത്‌, അതു പറഞ്ഞ രീതി അത്ര ശരിയാ​യി​ല്ലെന്നു തോന്നി​യാൽപ്പോ​ലും. നമുക്കു നമ്മളോ​ടു​തന്നെ ഇങ്ങനെ ചോദി​ക്കാൻ കഴിയും: ‘ഉപദേശം തന്ന വിധം എനിക്ക്‌ അത്ര ഇഷ്ടപ്പെ​ട്ടി​ല്ലെ​ങ്കി​ലും ആ പറഞ്ഞതിൽ അല്‌പം കാര്യ​മി​ല്ലേ? ഉപദേശം തന്ന വ്യക്തി​യു​ടെ കുറവു​ക​ളെ​ക്കു​റിച്ച്‌ ചിന്തി​ക്കു​ന്ന​തി​നു പകരം ആ ഉപദേ​ശ​ത്തിൽനിന്ന്‌ എനിക്ക്‌ എന്തു പഠിക്കാം എന്നു ചിന്തി​ച്ചു​കൂ​ടേ?’ നമുക്കു കിട്ടുന്ന ഓരോ ഉപദേ​ശ​ത്തിൽനി​ന്നും എങ്ങനെ പ്രയോ​ജനം നേടാ​മെന്നു ചിന്തി​ക്കു​ന്നതു ജ്ഞാനമാ​യി​രി​ക്കും.—സുഭാ. 15:31.

w01 5/15 30 ¶1-2

‘ജ്ഞാനം മുഖാ​ന്തരം നമ്മുടെ നാളുകൾ വർധി​ക്കും’

ശാസന ലഭിക്കു​മ്പോൾ ജ്ഞാനി​യായ ഒരുവന്റെ പ്രതി​ക​രണം ഒരു പരിഹാ​സി​യു​ടേ​തി​നു നേർവി​പ​രീ​ത​മാ​യി​രി​ക്കും. ശലോ​മോൻ ഇങ്ങനെ പറയുന്നു: “ജ്ഞാനിയെ ശാസിക്ക; അവൻ നിന്നെ സ്‌നേ​ഹി​ക്കും. ജ്ഞാനിയെ പ്രബോ​ധി​പ്പിക്ക, അവന്റെ ജ്ഞാനം വർദ്ധി​ക്കും.” (സദൃശ​വാ​ക്യ​ങ്ങൾ 9:8ബി, 9എ) “യാതൊ​രു ശിക്ഷണ​വും തത്‌കാ​ലം സന്തോ​ഷ​ക​രമല്ല, മറിച്ചു ദുഃഖ​ക​ര​മാണ്‌ എന്നു തോന്നും; എന്നുവ​രി​കി​ലും അതിനാൽ പരിശീ​ലി​പ്പി​ക്ക​പ്പെ​ട്ട​വർക്ക്‌ അതു പിന്നീടു നീതി എന്ന സമാധാ​ന​ഫലം കൈവ​രു​ത്തും” എന്ന കാര്യം ജ്ഞാനി​യായ ഒരു വ്യക്തി​ക്ക​റി​യാം. (എബ്രായർ 12:11, NW) ഒരു ബുദ്ധി​യു​പ​ദേശം ലഭിക്കു​മ്പോൾ അതു വേദനാ​ജ​ന​ക​മാ​യി തോന്നി​യേ​ക്കാ​മെ​ങ്കി​ലും, അതു സ്വീക​രി​ക്കു​ന്നതു നമ്മെ കൂടുതൽ ജ്ഞാനി​യാ​ക്കു​മെ​ങ്കിൽ പിന്നെ എന്തിന്‌ നാമതി​നെ എതിർക്കു​ക​യോ നിരാ​ക​രി​ക്കു​ക​യോ ചെയ്യണം?

“നീതി​മാ​നെ ഉപദേ​ശിക്ക അവൻ വിദ്യാ​ഭി​വൃ​ദ്ധി പ്രാപി​ക്കും,” ജ്ഞാനി​യായ രാജാവ്‌ തുടർന്നു പറയുന്നു. (സദൃശ​വാ​ക്യ​ങ്ങൾ 9:9ബി) പഠിക്കേണ്ട ആവശ്യ​മി​ല്ലാത്ത വിധം ആരും വളരെ​യേറെ ജ്ഞാനമു​ള്ള​വ​രോ പ്രായം കടന്നു​പോ​യ​വ​രോ അല്ല. തങ്ങളുടെ ജീവി​ത​സാ​യാ​ഹ്ന​ത്തിൽ ആയിരി​ക്കു​ന്ന​വർപോ​ലും സത്യം സ്വീക​രി​ക്കു​ക​യും യഹോ​വ​യ്‌ക്കു തങ്ങളുടെ ജീവിതം സമർപ്പി​ക്കു​ക​യും ചെയ്യു​ന്നതു കാണു​ന്നത്‌ എത്ര പുളക​പ്ര​ദ​മാണ്‌! പഠിക്കാ​നും അങ്ങനെ നമ്മുടെ മനസ്സിനെ കർമനി​ര​ത​മാ​ക്കി നിറു​ത്താ​നും നമുക്കു സ്ഥിരപ​രി​ശ്രമം ചെയ്യാം.

w01 5/15 30 ¶5

‘ജ്ഞാനം മുഖാ​ന്തരം നമ്മുടെ നാളുകൾ വർധി​ക്കും’

ജ്ഞാനം സമ്പാദി​ക്കാൻ ശ്രമി​ക്കു​ന്നത്‌ നമ്മുടെ വ്യക്തി​പ​ര​മായ ഉത്തരവാ​ദി​ത്വ​മാണ്‌. ഈ വസ്‌തു​ത​യ്‌ക്ക്‌ ഊന്നൽ നൽകി​ക്കൊണ്ട്‌ ശലോ​മോൻ ഇങ്ങനെ പറയുന്നു: “നീ ജ്ഞാനി​യാ​കു​ന്നു​വെ​ങ്കിൽ നിനക്കു​വേണ്ടി തന്നേ ജ്ഞാനി​യാ​യി​രി​ക്കും; പരിഹ​സി​ക്കു​ന്നു എങ്കിലോ, നീ തന്നേ സഹി​ക്കേ​ണ്ടി​വ​രും.” (സദൃശ​വാ​ക്യ​ങ്ങൾ 9:12) ഒരുവൻ ജ്ഞാനി​യാ​കു​ന്നെ​ങ്കിൽ അതു​കൊ​ണ്ടുള്ള പ്രയോ​ജനം അവനു തന്നെയാണ്‌. അതു​പോ​ലെ പരിഹാ​സി​ക്കു​ണ്ടാ​കുന്ന കഷ്ടപ്പാ​ടു​കൾക്ക്‌ അവൻ തന്നെയാണ്‌ ഉത്തരവാ​ദി. വാസ്‌ത​വ​ത്തിൽ, നാം വിതയ്‌ക്കു​ന്നതു തന്നേ കൊയ്യും. അതു​കൊണ്ട്‌ നമുക്കു ‘ജ്ഞാനത്തി​നു ശ്രദ്ധ’ കൊടു​ക്കാം.—സദൃശ​വാ​ക്യ​ങ്ങൾ 2:1, NW.

ആത്മീയരത്നങ്ങൾ

w06 9/15 17 ¶5

സദൃശ​വാ​ക്യ​ങ്ങ​ളിൽനി​ന്നുള്ള വിശേ​ഷാ​ശ​യ​ങ്ങൾ

9:17— “മോഷ്ടിച്ച വെള്ളം” എന്തിനെ അർഥമാ​ക്കു​ന്നു, അവ “മധുര”മായി​രി​ക്കു​ന്നത്‌ എന്തു​കൊണ്ട്‌? ബൈബിൾ വിവാ​ഹി​തർക്കി​ട​യി​ലെ ലൈം​ഗിക ആസ്വാ​ദ​നത്തെ ഒരു കിണറ്റിൽനി​ന്നു കോരി​യെ​ടുത്ത നവോ​ന്മേ​ഷ​ദാ​യ​ക​മായ വെള്ളം കുടി​ക്കു​ന്ന​തി​നോട്‌ ഉപമി​ച്ചി​രി​ക്കുന്ന സ്ഥിതിക്ക്‌, മോഷ്ടിച്ച വെള്ളം അർഥമാ​ക്കു​ന്നത്‌ രഹസ്യ​ത്തി​ലുള്ള അധാർമിക ലൈം​ഗി​ക​ബ​ന്ധ​ത്തെ​യാണ്‌. (സദൃശ​വാ​ക്യ​ങ്ങൾ 5:15-17) പിടി​കൊ​ടു​ക്കാ​തെ രഹസ്യ​ത്തിൽ ചെയ്യുന്നു എന്നതു​കൊ​ണ്ടാണ്‌ ആ വെള്ളത്തിന്‌ മധുര​മു​ള്ള​താ​യി തോന്നു​ന്നത്‌.

ഏപ്രിൽ 21-27

ദൈവ​വ​ച​ന​ത്തി​ലെ നിധികൾ | സുഭാ​ഷി​തങ്ങൾ 10

നിങ്ങളെ യഥാർഥ​ത്തിൽ സമ്പന്നനാ​ക്കു​ന്നത്‌ എന്താണ്‌?

w01 7/15 25 ¶1-3

‘നീതി​മാന്‌ അനു​ഗ്ര​ഹങ്ങൾ ലഭിക്കും’

നീതി​മാൻ മറ്റൊരു വിധത്തി​ലും അനു​ഗ്ര​ഹി​ക്ക​പ്പെ​ടു​ന്നു. “മടിയുള്ള കൈ​കൊ​ണ്ടു പ്രവർത്തി​ക്കു​ന്നവൻ ദരി​ദ്ര​നാ​യ്‌തീ​രു​ന്നു; ഉത്സാഹി​യു​ടെ കയ്യോ സമ്പത്തു​ണ്ടാ​ക്കു​ന്നു. വേനൽക്കാ​ലത്തു ശേഖരി​ച്ചു​വെ​ക്കു​ന്നവൻ ബുദ്ധി​മാൻ; കൊയ്‌ത്തു​കാ​ലത്തു ഉറങ്ങു​ന്ന​വ​നോ നാണം​കെ​ട്ടവൻ.”—സദൃശ​വാ​ക്യ​ങ്ങൾ 10:4, 5.

കൊയ്‌ത്തു​കാ​ലത്തെ ജോലി​ക്കാ​രെ സംബന്ധി​ച്ചി​ട​ത്തോ​ളം രാജാ​വി​ന്റെ വാക്കുകൾ വിശേ​ഷി​ച്ചും അർഥവ​ത്താണ്‌. ഉറങ്ങു​ന്ന​തി​നുള്ള സമയമല്ല കൊയ്‌ത്തു​കാ​ലം. മണിക്കൂ​റു​ക​ളോ​ളം ഉത്സാഹ​പൂർവം പണി​യെ​ടു​ക്കേണ്ട സമയമാണ്‌ അത്‌. അതേ, അടിയ​ന്തിര ബോധ​ത്തോ​ടെ പ്രവർത്തി​ക്കേണ്ട സമയമാ​ണത്‌.

ധാന്യ​ത്തി​ന്റെ​യല്ല മറിച്ച്‌ ആളുക​ളു​ടെ കൊയ്‌ത്തി​നെ കുറിച്ച്‌ യേശു തന്റെ ശിഷ്യ​ന്മാ​രോ​ടു പറഞ്ഞു: “കൊയ്‌ത്തു വളരെ ഉണ്ടു സത്യം, വേലക്കാ​രോ ചുരുക്കം; ആകയാൽ കൊയ്‌ത്തി​ന്റെ യജമാ​ന​നോ​ടു [യഹോ​വ​യാം ദൈവ​ത്തോട്‌] കൊയ്‌ത്തി​ലേക്കു വേലക്കാ​രെ അയക്കേ​ണ്ട​തി​ന്നു യാചി​പ്പിൻ.” (മത്തായി 9:35-38) 2000-ാമാണ്ടിൽ 1 കോടി 40 ലക്ഷത്തി​ല​ധി​കം—യഹോ​വ​യു​ടെ സാക്ഷി​ക​ളു​ടെ എണ്ണത്തിന്റെ ഇരട്ടി​യി​ല​ധി​കം—ആളുകൾ യേശു​വി​ന്റെ മരണത്തി​ന്റെ സ്‌മാ​ര​ക​ത്തി​നാ​യി കൂടി​വന്നു. അപ്പോൾ, ‘നിലങ്ങൾ കൊയ്‌ത്തി​ന്നു വെളു​ത്തി​രി​ക്കു​ന്നു’ എന്ന വസ്‌തു​തയെ ആർക്കാണു നിഷേ​ധി​ക്കാൻ കഴിയുക? (യോഹ​ന്നാൻ 4:35) യജമാ​ന​നോട്‌ കൂടുതൽ വേലക്കാർക്കാ​യി അപേക്ഷി​ക്കു​മ്പോൾത്തന്നെ സത്യാ​രാ​ധകർ തങ്ങളുടെ പ്രാർഥ​ന​കൾക്കു ചേർച്ച​യിൽ ശിഷ്യ​രാ​ക്കൽ വേലയിൽ തീക്ഷ്‌ണ​ത​യോ​ടെ കഠിനാ​ധ്വാ​നം ചെയ്യുന്നു. (മത്തായി 28:19, 20) അവരുടെ ശ്രമങ്ങളെ യഹോവ എത്ര സമൃദ്ധ​മാ​യാണ്‌ അനു​ഗ്ര​ഹി​ച്ചി​രി​ക്കു​ന്നത്‌! സേവന​വർഷം 2000-ത്തിൽ പുതു​താ​യി 2,80,000-ത്തിലധി​കം പേർ സ്‌നാ​പ​ന​മേറ്റു. ഇവരും ദൈവ​വ​ചനം പഠിപ്പി​ക്കു​ന്നവർ ആയിരി​ക്കാൻ കഠിന​ശ്രമം ചെയ്യുന്നു. ശിഷ്യ​രാ​ക്കൽ വേലയിൽ പൂർണ​മാ​യി പങ്കുപ​റ്റി​ക്കൊണ്ട്‌ ഈ കൊയ്‌ത്തു​കാ​ലത്ത്‌ നമുക്ക്‌ സന്തോ​ഷ​വും സംതൃ​പ്‌തി​യും ആസ്വദി​ക്കാം.

w01 9/15 24 ¶3 - 25 ¶1

‘ചൊവ്വുള്ള പാതയിൽ’ നടക്കു​വിൻ

ശലോ​മോൻ നീതി​യു​ടെ പ്രാധാ​ന്യ​ത്തി​ലേക്കു ശ്രദ്ധ ക്ഷണിക്കു​ന്നു. അവൻ പറയുന്നു: “ധനവാന്റെ സമ്പത്തു, അവന്നു ഉറപ്പു​ള്ളോ​രു പട്ടണം; എളിയ​വ​രു​ടെ നാശമോ അവരുടെ ദാരി​ദ്ര്യം തന്നേ. നീതി​മാ​ന്റെ സമ്പാദ്യം ജീവ​ഹേ​തു​വും ദുഷ്ടന്റെ ആദായം പാപകാ​ര​ണ​വും ആകുന്നു.”—സദൃശ​വാ​ക്യ​ങ്ങൾ 10:15, 16.

പട്ടണമ​തിൽ ഒരു പട്ടണത്തി​ലെ നിവാ​സി​കൾക്ക്‌ ഒരളവു​വരെ സംരക്ഷണം പ്രദാനം ചെയ്യു​ന്ന​തു​പോ​ലെ, സമ്പത്ത്‌ ജീവി​ത​ത്തി​ലെ ചില അനിശ്ചി​താ​വ​സ്ഥ​കൾക്കെ​തി​രെ സംരക്ഷ​ണ​മാ​യി ഉതകി​യേ​ക്കാം. അപ്രതീ​ക്ഷിത സംഭവ​ങ്ങ​ളു​ണ്ടാ​കു​മ്പോൾ ദാരി​ദ്ര്യം വിപത്‌ക​ര​മാ​യേ​ക്കാം. (സഭാ​പ്ര​സം​ഗി 7:12) എന്നാൽ സമ്പത്തും ദാരി​ദ്ര്യ​വു​മാ​യി ഒരു​പോ​ലെ ബന്ധപ്പെ​ട്ടി​രി​ക്കുന്ന ഒരു അപകടത്തെ കുറി​ച്ചാ​യി​രി​ക്കാം ജ്ഞാനി​യായ രാജാവ്‌ ഇവിടെ സൂചി​പ്പി​ക്കു​ന്നത്‌. സമ്പന്നനായ ഒരു മനുഷ്യൻ പൂർണ​മാ​യി തന്റെ സമ്പത്തിൽ ആശ്രയി​ക്കാൻ ചായ്‌വു കാട്ടി​ക്കൊണ്ട്‌, തന്റെ വിലപി​ടി​പ്പുള്ള വസ്‌തു​ക്കൾ “ഉയർന്ന മതിൽ” പോലെ സംരക്ഷണം നൽകു​മെന്ന്‌ കരുതി​യേ​ക്കാം. (സദൃശ​വാ​ക്യ​ങ്ങൾ 18:11) ഇനി, ദാരി​ദ്ര്യം തന്റെ ഭാവിയെ ആശയറ്റ​താ​ക്കു​ന്നു എന്ന്‌ ഒരു ദരിദ്ര മനുഷ്യൻ തെറ്റി​ദ്ധ​രി​ച്ചേ​ക്കാം. അങ്ങനെ ഇരുകൂ​ട്ട​രും ദൈവ​മു​മ്പാ​കെ ഒരു നല്ല പേര്‌ സമ്പാദി​ക്കു​ന്ന​തിൽ പരാജ​യ​പ്പെ​ടു​ന്നു.

നേരെ മറിച്ച്‌, ഒരു നീതി​മാന്‌ ഭൗതി​ക​മാ​യി വളരെ​യ​ധി​കം ഉണ്ടെങ്കി​ലും ഇല്ലെങ്കി​ലും അയാളു​ടെ നീതി​പ്ര​വൃ​ത്തി​കൾ അയാളെ ജീവനി​ലേക്കു നയിക്കു​ന്നു. എങ്ങനെ? അയാൾ തനിക്ക്‌ ഉള്ളതു​കൊണ്ട്‌ തൃപ്‌തി​യ​ട​യു​ന്നു. തന്റെ സാമ്പത്തി​ക​സ്ഥി​തി ദൈവ​മു​മ്പാ​കെ തനിക്കുള്ള നല്ല നിലയ്‌ക്ക്‌ ഒരു വിലങ്ങു​ത​ടി​യാ​കാൻ അയാൾ അനുവ​ദി​ക്കു​ക​യില്ല. സമ്പന്നനാ​ണെ​ങ്കി​ലും ദരി​ദ്ര​നാ​ണെ​ങ്കി​ലും ഒരു നീതി​മാ​ന്റെ ജീവി​ത​ഗതി അയാൾക്ക്‌ ഇപ്പോൾ സന്തോ​ഷ​വും ഭാവി​യിൽ നിത്യ​ജീ​വന്റെ പ്രത്യാ​ശ​യും കൈവ​രു​ത്തു​ന്നു. (ഇയ്യോബ്‌ 42:10-13) ദുഷ്ടനെ സംബന്ധി​ച്ചി​ട​ത്തോ​ളം അയാൾ സമ്പത്ത്‌ വാരി​ക്കൂ​ട്ടി​യാ​ലും അയാൾക്ക്‌ യാതൊ​രു പ്രയോ​ജ​ന​വും ലഭിക്കു​ക​യില്ല. തന്റെ സമ്പത്തിന്റെ സംരക്ഷ​ണാ​ത്മക മൂല്യത്തെ വിലമ​തി​ച്ചു​കൊണ്ട്‌ ദൈവ​ഹി​ത​ത്തി​നു ചേർച്ച​യിൽ ജീവി​ക്കു​ന്ന​തി​നു പകരം അയാൾ പാപപൂർണ​മായ ജീവിതം നയിക്കാൻ തന്റെ സമ്പത്ത്‌ ഉപയോ​ഗി​ക്കു​ന്നു.

it-1-E 340

അനു​ഗ്ര​ഹം

യഹോവ മനുഷ്യ​രെ അനു​ഗ്ര​ഹി​ക്കു​ന്നു. “യഹോ​വ​യു​ടെ അനു​ഗ്ര​ഹ​മാണ്‌ ഒരാളെ സമ്പന്നനാ​ക്കു​ന്നത്‌; ദൈവം അതോ​ടൊ​പ്പം വേദന നൽകു​ന്നില്ല.” (സുഭ 10:22) താൻ അംഗീ​ക​രി​ക്കു​ന്ന​വ​രെ​യാണ്‌ യഹോവ അനു​ഗ്ര​ഹി​ക്കു​ന്നത്‌. യഹോവ അവരെ സംരക്ഷി​ക്കു​ക​യും വഴിന​യി​ക്കു​ക​യും വിജയി​ക്കാൻ സഹായി​ക്കു​ക​യും അവരുടെ ആവശ്യങ്ങൾ നിറ​വേറ്റി കൊടു​ക്കു​ക​യും ചെയ്യുന്നു. ഇതെല്ലാം അവർക്ക്‌ വളരെ​യ​ധി​കം പ്രയോ​ജനം ചെയ്യും.

ആത്മീയരത്നങ്ങൾ

w06 5/15 30 ¶18

നിർമ​ല​ത​യോ​ടെ ജീവി​ക്കു​ന്ന​തി​ന്റെ അനു​ഗ്ര​ഹ​ങ്ങൾ

¹⁸ ‘യഹോ​വ​യു​ടെ അനു​ഗ്രഹം’—അതാണ്‌ അവന്റെ ജനത്തിന്റെ ആത്മീയ സമൃദ്ധി​ക്കു കാരണ​മാ​യി​രി​ക്കു​ന്നത്‌. “അതി​നോട്‌ കഷ്ടപ്പാട്‌ കൂട്ടി​ച്ചേർക്കു​ക​യില്ല” എന്ന്‌ അവൻ ഉറപ്പു നൽകി​യി​രി​ക്കു​ന്നു. (സദൃശ​വാ​ക്യ​ങ്ങൾ 10:22, NIBV) അങ്ങനെ​യെ​ങ്കിൽ എന്തു​കൊ​ണ്ടാണ്‌ യഹോ​വ​യു​ടെ പല വിശ്വസ്‌ത ദാസന്മാർക്കും വളരെ​യേറെ വേദന​യ്‌ക്കും കഷ്ടപ്പാ​ടി​നും ഇടയാ​ക്കുന്ന പരീക്ഷ​ക​ളും പരി​ശോ​ധ​ന​ക​ളും സഹി​ക്കേ​ണ്ടി​വ​രു​ന്നത്‌? അതിനു പ്രധാ​ന​മാ​യും മൂന്നു കാരണ​ങ്ങ​ളാ​ണു​ള്ളത്‌. (1) പാപം ചെയ്യാ​നുള്ള നമ്മു​ടെ​തന്നെ പ്രവണത. (ഉല്‌പത്തി 6:5; 8:21; യാക്കോബ്‌ 1:14, 15) (2) സാത്താ​നും അവന്റെ ഭൂതങ്ങ​ളും. (എഫെസ്യർ 6:11, 12) (3) ദുഷ്ട​ലോ​കം. (യോഹ​ന്നാൻ 15:19) വേദനാ​ജ​ന​ക​മായ കാര്യങ്ങൾ സംഭവി​ക്കാൻ യഹോവ അനുവ​ദി​ക്കു​ന്നെ​ങ്കി​ലും അതിന്റെ കാരണ​ക്കാ​രൻ അവനല്ല. വാസ്‌ത​വ​ത്തിൽ “എല്ലാ നല്ല ദാനവും തികഞ്ഞ വരം ഒക്കെയും ഉയരത്തിൽനി​ന്നു വെളി​ച്ച​ങ്ങ​ളു​ടെ പിതാ​വി​ങ്കൽനി​ന്നു ഇറങ്ങി​വ​രു​ന്നു” എന്നു ബൈബിൾ പറയുന്നു. (യാക്കോബ്‌ 1:17) യഹോവ തന്റെ അനു​ഗ്ര​ഹ​ങ്ങ​ളോ​ടൊ​പ്പം കഷ്ടപ്പാട്‌ കൂട്ടി​ച്ചേർക്കു​ക​യില്ല.

ഏപ്രിൽ 28–മേയ്‌ 4

ദൈവ​വ​ച​ന​ത്തി​ലെ നിധികൾ | സുഭാ​ഷി​തങ്ങൾ 11

അതു പറയരുത്‌!

w02 5/15 26 ¶4

നേരു​ള്ള​വരെ നിർമലത വഴിന​ട​ത്തും

നേരു​ള്ള​വ​രു​ടെ നിർമ​ല​ത​യും ദുഷ്‌പ്ര​വൃ​ത്തി​ക്കാ​രു​ടെ ദുഷ്ടത​യും മറ്റുള്ള​വ​രെ​യും ബാധി​ക്കു​ന്നു. ഇസ്രാ​യേ​ലി​ന്റെ രാജാവു പറയുന്നു: “വഷളൻ വായ്‌കൊ​ണ്ടു കൂട്ടു​കാ​രനെ നശിപ്പി​ക്കു​ന്നു; നീതി​മാ​ന്മാ​രോ പരിജ്ഞാ​ന​ത്താൽ വിടു​വി​ക്ക​പ്പെ​ടു​ന്നു.” (സദൃശ​വാ​ക്യ​ങ്ങൾ 11:9) ഏഷണി, ദോഷ​ക​ര​മായ കുശു​കു​ശുപ്പ്‌, അശ്ലീല​സം​സാ​രം, വ്യർഥ​സം​സാ​രം എന്നിവ​യെ​ല്ലാം മറ്റുള്ള​വർക്കു ദ്രോഹം ചെയ്യുന്നു എന്നതിനെ ആരാണു നിഷേ​ധി​ക്കുക? ഇതിൽനി​ന്നു വ്യത്യ​സ്‌ത​മാ​യി നീതി​മാ​നായ ഒരു വ്യക്തി നന്നായി ചിന്തിച്ച്‌ മറ്റുള്ള​വ​രോ​ടു പരിഗണന കാട്ടുന്ന വിധത്തി​ലാ​യി​രി​ക്കും സംസാ​രി​ക്കുക. അശുദ്ധ​മായ യാതൊ​ന്നും അയാളു​ടെ വായിൽനി​ന്നു വരിക​യില്ല. അയാൾ പരിജ്ഞാ​ന​ത്താൽ വിടു​വി​ക്ക​പ്പെ​ടു​ന്നു, കാരണം അയാളു​ടെ നിർമ​ല​ഗതി തനിക്കു നേരെ ആരോ​പ​ണങ്ങൾ ഉന്നയി​ക്കു​ന്നവർ ഭോഷ്‌കു പറയു​ക​യാ​ണെന്നു കാണി​ക്കു​ന്ന​തി​നു വേണ്ട തെളി​വു​കൾ നൽകുന്നു.

w02 5/15 27 ¶2-3

നേരു​ള്ള​വരെ നിർമലത വഴിന​ട​ത്തും

നേരുള്ള ഒരു ഗതി പിൻപ​റ്റുന്ന പട്ടണവാ​സി​കൾ സമാധാ​ന​വും നന്മയും വർധി​പ്പി​ക്കു​ക​യും സമൂഹ​ത്തി​ലെ മറ്റുള്ള​വരെ കെട്ടു​പണി ചെയ്യു​ക​യും ചെയ്യും. അങ്ങനെ പട്ടണം അഭ്യു​ദയം പ്രാപി​ക്കു​ന്നു അഥവാ അഭിവൃ​ദ്ധി കൈവ​രി​ക്കു​ന്നു. ഏഷണി പറഞ്ഞു പരത്തു​ക​യോ അസത്യ​മാ​യ​തും മുറി​പ്പെ​ടു​ത്തു​ന്ന​തു​മായ കാര്യങ്ങൾ പറയു​ക​യോ ചെയ്യു​ന്നവർ പ്രക്ഷുബ്ധത, അസന്തുഷ്ടി, അനൈ​ക്യം, അസ്വസ്ഥത എന്നിവ​യ്‌ക്ക്‌ ഇടയാ​ക്കു​ന്നു. ഈ വ്യക്തികൾ അധികാര സ്ഥാനത്ത്‌ ഉള്ളവരാ​ണെ​ങ്കിൽ ഇതു വിശേ​ഷി​ച്ചും സത്യമാണ്‌. അത്തര​മൊ​രു പട്ടണത്തിൽ ക്രമരാ​ഹി​ത്യ​വും അഴിമ​തി​യും നടമാ​ടു​ക​യും അവിടെ ധാർമി​ക​വും ചില​പ്പോൾ സാമ്പത്തി​ക​വു​മായ അധഃപ​തനം ഉണ്ടാകു​ക​യും ചെയ്‌തേ​ക്കാം.

സദൃശ​വാ​ക്യ​ങ്ങൾ 11:11-ലെ തത്ത്വം യഹോ​വ​യു​ടെ ജനത്തി​നും ബാധക​മാണ്‌. കാരണം അവർ പട്ടണസ​മാന സഭകളിൽ അന്യോ​ന്യം സഹവസി​ക്കു​ന്നു. ആത്മീയ​രായ വ്യക്തി​ക​ളുള്ള—നിർമ​ല​ത​യാൽ വഴിന​യി​ക്ക​പ്പെ​ടുന്ന നേരു​ള്ളവർ—ഒരു സഭ സന്തുഷ്ട​രും പ്രവർത്ത​ന​നി​ര​ത​രും സഹായ​മ​ന​സ്‌ക​രു​മായ ആളുക​ളു​ടെ കൂട്ടമാ​യി​രി​ക്കും, അവർ ദൈവ​ത്തി​നു മഹത്ത്വം കൈവ​രു​ത്തും. യഹോവ സഭയെ അനു​ഗ്ര​ഹി​ക്കും, അത്‌ ആത്മീയ​മാ​യി അഭിവൃ​ദ്ധി പ്രാപി​ക്കും. അസന്തു​ഷ്ട​രും അസംതൃ​പ്‌ത​രും കാര്യങ്ങൾ ചെയ്യ​പ്പെ​ടുന്ന വിധത്തെ വിമർശി​ക്കു​ക​യും കുറ്റം കണ്ടുപി​ടി​ക്കാൻ ശ്രമി​ക്കു​ക​യും ചെയ്യു​ന്ന​വ​രായ ഏതാനും വ്യക്തികൾ ഉണ്ടെങ്കിൽ അവർ ‘വിഷമുള്ള വേര്‌’ പോ​ലെ​യാണ്‌. ഇത്തരക്കാർ അവരുടെ വിഷം മറ്റുള്ള​വ​രി​ലും കുത്തി​വെ​ച്ചേ​ക്കാം. (എബ്രായർ 12:15, NW) ഇങ്ങനെ​യു​ള്ളവർ പലപ്പോ​ഴും കൂടുതൽ അധികാ​ര​വും പ്രാമു​ഖ്യ​ത​യും ആഗ്രഹി​ക്കു​ന്നു. സഭ അല്ലെങ്കിൽ മൂപ്പന്മാർ അനീതി​യും വംശീയ മുൻവി​ധി​യും പ്രകട​മാ​ക്കു​ന്നു​വെ​ന്നും മറ്റും അവർ പറഞ്ഞു പരത്തുന്നു. അവരുടെ വായ്‌ സഭയിൽ പിളർപ്പ്‌ ഉണ്ടാകു​ന്ന​തിന്‌ ഇടയാ​ക്കി​യേ​ക്കാം. അത്തരം സംസാ​ര​ത്തി​നു നേരെ ചെവി​യ​ട​ച്ചു​ക​ള​ഞ്ഞു​കൊണ്ട്‌ സഭയുടെ സമാധാ​ന​വും ഐക്യ​വും ഉന്നമി​പ്പി​ക്കുന്ന ആത്മീയ​രായ വ്യക്തികൾ ആയിരി​ക്കാൻ നാം ശ്രമി​ക്കേ​ണ്ട​തല്ലേ?

w02 5/15 27 ¶5

നേരു​ള്ള​വരെ നിർമലത വഴിന​ട​ത്തും

വിവേ​ക​മി​ല്ലാത്ത അല്ലെങ്കിൽ ‘ബുദ്ധി​ഹീ​ന​നായ’ ഒരു വ്യക്തി എത്ര വലിയ ദ്രോ​ഹ​മാ​ണു വരുത്തി​വെ​ക്കുക! തന്റെ വാക്കു​കളെ നിയ​ന്ത്രി​ക്കാത്ത അയാൾ ശകാര​വർഷം നടത്തു​ക​യും ഏഷണി പറയു​ക​യും വരെ ചെയ്യും. ഇങ്ങനെ​യുള്ള അനാ​രോ​ഗ്യ​ക​ര​മായ സ്വാധീ​നം അവസാ​നി​പ്പി​ക്കാൻ നിയമിത മൂപ്പന്മാർ സത്വരം നടപടി കൈ​ക്കൊ​ള്ളേ​ണ്ട​താണ്‌. ‘ബുദ്ധി​ഹീ​ന​നിൽനി​ന്നു’ വ്യത്യ​സ്‌ത​മാ​യി വിവേ​ക​മുള്ള ഒരു വ്യക്തിക്ക്‌ എപ്പോൾ മിണ്ടാ​തി​രി​ക്ക​ണ​മെന്ന്‌ അറിയാം. അയാൾ മറ്റൊരു വ്യക്തി​യു​ടെ രഹസ്യം പാട്ടാ​ക്കു​ക​യില്ല. നിയ​ന്ത്ര​ണ​മി​ല്ലാത്ത നാവിന്‌ വളരെ ദോഷം ചെയ്യാൻ കഴിയു​മെന്നു മനസ്സി​ലാ​ക്കുന്ന വിവേ​ക​മതി ‘വിശ്വ​സ്‌ത​മാ​നസൻ’ ആണ്‌. അയാൾ സഹവി​ശ്വാ​സി​ക​ളോ​ടു വിശ്വ​സ്‌ത​നാണ്‌, അവരെ അപകട​പ്പെ​ടു​ത്താ​വുന്ന രഹസ്യ​വി​വ​രങ്ങൾ അയാൾ പുറത്തു പറയു​ക​യില്ല. അത്തരം നിർമ​ല​താ​പാ​ലകർ സഭയ്‌ക്ക്‌ എത്ര വലിയ അനു​ഗ്ര​ഹ​മാണ്‌!

ആത്മീയരത്നങ്ങൾ

g20.1 11, ചതുരം

ടെൻഷനെ എങ്ങനെ നേരി​ടാം?

‘ദയകൊണ്ട്‌ ടെൻഷനെ തോൽപ്പി​ക്കാം’

“ദയ കാട്ടു​ന്നവൻ തനിക്കു​തന്നെ ഗുണം ചെയ്യുന്നു; എന്നാൽ ക്രൂരത കാട്ടു​ന്നവൻ സ്വയം കഷ്ടങ്ങൾ വരുത്തി​വെ​ക്കു​ന്നു.”—സുഭാ​ഷി​തങ്ങൾ 11:17.

ടെൻഷൻ മറിക​ട​ക്കാൻ (ഇംഗ്ലീഷ്‌) എന്ന ഡോ. ടിം ക്യാന്റ​ഫ​റി​ന്റെ പുസ്‌ത​ക​ത്തിൽ ‘ദയകൊണ്ട്‌ ടെൻഷനെ തോൽപ്പി​ക്കാം’ എന്നൊരു പാഠമുണ്ട്‌. മറ്റുള്ള​വ​രോ​ടു ദയയോ​ടെ ഇടപെ​ടു​മ്പോൾ നമ്മുടെ ആരോ​ഗ്യ​വും സന്തോ​ഷ​വും വർധി​ക്കു​മെന്ന്‌ അതിൽ അദ്ദേഹം അഭി​പ്രാ​യ​പ്പെ​ടു​ന്നു. മറുവ​ശത്ത്‌ ക്രൂര​മാ​യി പെരു​മാ​റുന്ന ഒരു വ്യക്തിക്ക്‌ ഒട്ടും സന്തോ​ഷ​മു​ണ്ടാ​കില്ല. കാരണം, അദ്ദേഹം മറ്റുള്ള​വ​രിൽനിന്ന്‌ തന്നെത്തന്നെ ഒറ്റപ്പെ​ടു​ത്തു​ക​യാണ്‌.

നമ്മളോ​ടു​ത​ന്നെ ദയയോ​ടെ ഇടപെ​ട്ടു​കൊണ്ട്‌ നമുക്ക്‌ ടെൻഷൻ കുറയ്‌ക്കാൻ കഴി​ഞ്ഞേ​ക്കും. ഉദാഹ​ര​ണ​ത്തിന്‌, നമ്മൾ നമ്മളിൽത്തന്നെ യാഥാർഥ്യ​ബോ​ധ​മി​ല്ലാ​ത്ത​തോ അതിരു​ക​വി​ഞ്ഞ​തോ ആയ പ്രതീ​ക്ഷകൾ വെക്കരുത്‌. എന്നാൽ നമ്മൾ നമ്മളെ​ത്തന്നെ വിലകു​റച്ച്‌ കാണാ​നും പാടില്ല. കാരണം “നിന്റെ അയൽക്കാ​രനെ നീ നിന്നെ​പ്പോ​ലെ​തന്നെ സ്‌നേ​ഹി​ക്കണം” എന്നാണ്‌ യേശു​ക്രി​സ്‌തു പറഞ്ഞത്‌.—മർക്കോസ്‌ 12:31.