Ахлагчид аа, та нар «ядарч эцсэн хүмүүсийг» сэргээдэг үү?

Гучаад настай ганц бие Гэрч эмэгтэй Анжелаa ахлагчдыг ирэхийг хүлээн жаахан сандарч сууна. Ахлагчид Анжелад юу хэлэх бол? Хэдэн удаа цуглаан тасалсан нь үнэн. Өдөржин өндөр настанд туслах ажил хийгээд ядардаг. Үүний хажуугаар, бие муутай ээждээ ихэд санаа зовдог аж.

Та «ядарч эцсэн» Анжелаг яаж сэргээх вэ? (Иер. 31:25). Хоньчны эргэлт хийхээсээ өмнө яаж бэлдвэл урмыг нь сэргээх вэ?

АХ ДҮҮСИЙНХЭЭ НӨХЦӨЛ БАЙДЛЫГ БОДООРОЙ

Ажлаа хийгээд юм уу христиан үүргээ биелүүлээд ядрах үе бидний хэн хэнд нь бий. Жишээ нь, зөнч Даниел ойлгохын аргагүй үзэгдэл үзээд «эцжээ» (Дан. 8:27). Тэгэхэд нь Габриел гэдэг тэнгэр элч тусалсан байна. Бурхны энэ элч Даниелд үзэгдлийн утгыг ойлгуулан, залбирлыг нь Ехова сонссоныг нь, «ихэд хүндлэгддэг хүн» (ШЕ) болохыг нь хэлсэн (Дан. 9:21–23). Хожим нь өөр нэг тэнгэр элч мөн адил үг хэлж, ядарч эцсэн Даниелд урам хайрладаг (Дан. 10:19).

Үүнтэй адилаар, ядарсан юм уу, урам нь хугарсан итгэл нэгтэнтэйгээ уулзахаасаа өмнө нөхцөл байдлыг нь цаг гарган бодож үзээрэй. Ямар бэрхшээлтэй тулгараад «ядарч эцэж» байгаа юм бол? Тэр хүн ямар сайхан зан чанар илэрхийлдэг вэ? Ахлагчаар үйлчлээд 20 гаруй жил болж байгаа Ричард: «Би ах дүүсийнхээ сайн талыг нь харахыг зорьдог. Уулзахаасаа өмнө нөхцөл байдлыг нь сайтар боддог. Ингэж байж л тухайн хүнийг урамшуулах аргаа олно» гэж хэлжээ. Өөр ахлагчтай эргэлт хийхээр бол уулзах хүнийхээ тухай ярилцах нь сайн.

АХ ДҮҮСЭЭ ТАЙВШРУУЛААРАЙ

Хүн ер нь хувийн юмаа бусдад яриад байдаггүй. Гэрч өөр дээр нь ирсэн ахлагчдад сэтгэлээ уудлан ярьж чадахгүй байна гэж бодъё. Яавал тэр хүн илэн далангүй ярих вэ? Чин сэтгэлээсээ инээмсэглэж, сайн талыг нь магтах хэрэгтэй. Ахлагчаар 40 гаруй жил үйлчилж буй Майкл: «Итгэл нэгтнийдээ очиж тэдэнтэйгээ дотно танилцах ахлагч хүнд таатай сайхан байдаг. Өнөөдөр тантай уулзахыг би тэсэн ядан хүлээж байлаа» гэсэн үгээр яриагаа эхэлдэг ажээ.

Уулзалтынхаа эхэнд чин сэтгэлээсээ залбирах нь сайн. Элч Паул ах дүүсийнхээ итгэл, хайр, тэвчээрийг онцлон залбирсан байдаг (1 Тес. 1:2, 3). Залбирахдаа итгэл нэгтнийхээ сайн талыг дурдвал өөрийнхөө болон итгэл нэгтнийхээ зүрхийг бэлдэж чин сэтгэлийн яриа өрнүүлж чадна. Итгэл нэгтнээ ч тайвшруулна. Туршлагатай ахлагч Рей: «Заримдаа хүн ямар сайн юм хийснээ мартчихдаг. Түүнийг нь хэлэхлээр сэтгэл нь сэргэдэг» гэж хэлжээ.

СҮНСЛЭГ БЭЛГЭЭ ХУВААЛЦААРАЙ

Паулын адилаар «сүнслэг ... бэлэг» хуваалцаарай. Жишээ нь Библиэс ганцхан зүйл ярилцсан ч болно (Ром 1:11). Итгэл нэгтэн маань «утаан доторх хөхүүр шиг болсон» гэж хэлсэн дуулалчийн адилаар, сэтгэлээр унаад өөрийгөө хэнд ч хэрэггүй амьтан гэж боддог байж болох юм (Дуу. 119:83, 176). «Утаан доторх хөхүүр» гэж бичсэнийг товч тайлбарлаад, Бурхны тушаалуудыг «мартдаггүйг» нь хэлж болно.

Хурлаасаа холдож хөндийрсөн эсвэл идэвхтэй үйлчлэхээ больсон Гэрч эмэгтэйг урамшуулахад, мөнгөн зоосоо алдсан эмэгтэйн жишээ тус болж болох юм (Лук 15:8–10). Олон мөнгөн зоосыг хэлхэж хийсэн үнэтэй зүүлтийн нэг хэлхээс нь тэр алдагдсан зоос байсан бололтой. Гэрч эмэгтэйг христиан хурлын үнэ хүндтэй гишүүн болохыг энэ жишээгээр ойлгуулаарай. Дараа нь, Ехова түүнийг хонин сүргийнхээ нэг гэж үзэн хайрлаж халамжилдгийг хэлж болно.

Ер нь, итгэл нэгтнүүд маань Библи уншаад ойлгож мэдэрснээ бусадтай хуваалцах дуртай. Тийм учраас өөрөө л яриад байж болохгүй. Нөхцөл байдалд нь тохирсон Библийн зүйл уншаад гол үг юм уу хэллэгийг онцлон асуулт асууж, тайлбарлуулж болно. Жишээ нь, 2 Коринт 4:16-г уншсаны дараа ахлагч «Ехова таныг яаж „шинэчлэх“ буюу хүч тэнхээтэй болгож байсан бэ?» гэж асууж болно. Ингэж ярилцвал «хамтдаа зоригжино» (Ром 1:12).

Библид гардаг ямар хүн итгэл нэгтнийхтэй тань адилхан нөхцөл байдалд орж байсныг ярилцвал бас урмыг нь сэргээнэ. Жишээ нь, Ханна юм уу Епафродит шиг, сэтгэлээр унасан байж болох юм. Тэд нэг хэсэг, сэтгэлээр унаж байсан ч Бурхны нүдэнд үнэ цэнэтэй хэвээрээ байсан (1 Сам. 1:9–11, 20; Флп. 2:25–30). Библид гардаг, сайн жишээ үзүүлсэн хүмүүсийн тухай ярилцаж болно шүү дээ.

ҮРГЭЛЖ САНАА ТАВИАРАЙ

Ганц удаа уулзаад л орхиж болохгүй (Үйлс 15:36). Жишээ нь, уулзалтынхаа төгсгөлд хамт дэлгэрүүлэхээр тохирч болно. Туршлагатай ахлагч Бернард хоньчны эргэлт хийж урамшуулсан хүнтэйгээ нэг их удалгүй дахин уулзаж, «Уулзаж ярилцсан маань тус болов уу?» гэж асуудаг аж. Чин сэтгэлээсээ ийн санаа тавивал цаашдаа яах хэрэгтэйгээ мэдэж авна.

Ах дүүст маань бидний чин сэтгэл, хайр халамж одоо хэзээ хэзээнээс илүү хэрэгтэй байна. (1 Тес. 5:11). Тийм учраас хоньчны эргэлт хийхээс өмнө цаг гаргаж, итгэл нэгтнийхээ нөхцөл байдлыг бодож үзээд залбираарай. Библиэс тохирох зүйл сонгоорой. Ингэвэл «ядарч эцсэн хүмүүсийг» урмын үгээр сэргээнэ!