«Амьдрал, үйл хэрэг цуглаанаар үзэх материал»-ын хавсралт
10 САРЫН 1–7
БУРХНЫ ҮГЭН ДЭХ ЭРДЭНЭС | ЁОХАН 9, 10
«Есүс хоньддоо санаа тавьдаг»
nwtsty үзүүлэн таниулах материал
Хонины хашаа
Хонины хашааг хоньдыг хулгайч юм уу араатнаас хамгаалахын тулд барьдаг байжээ. Хоньчид шөнөдөө хонин сүргээ аюулгүй байлгах үүднээс хашдаг байв. Библи бичигдэж байх үеийн хонины хашаа нь дээвэргүй байсан бөгөөд янз бүрийн хэлбэр, хэмжээтэй байсан. Тэр үед голдуу чулуугаар хашаагаа барьдаг байсан бөгөөд ганц хаалгатай байв (То 32:16; 1Са 24:3; Зеф 2:6). Ёохан хонины хашаанд «үүдээр нь орох» тухай бичжээ. Үүдийг нь «манаач» хамгаалдаг байв (Ёох 10:1, 3). Тухайн нутгийн хэд хэдэн хоньчин нэг хонины хашаанд өөр өөрсдийн сүргээ хотлуулдаг байсан бөгөөд манаачтай байв. Өглөө болмогц манаач хоньчдод үүдийг нээж өгдөг. Хоньчид тус тусын сүргээ дуудахад хоньд нь эзнийхээ дууг таниад дөхөж очно (Ёох 10:3–5). Есүс шавь нараа хэрхэн асран хамгаалдаг тухайгаа хэлж тайлбарлахдаа дээрхийг жишээ болгон дурджээ (Ёох 10:7–14).
cf 124-125 ¶17
«Жишээ таталгүй ярьдаггүй байжээ»
17 Жорж А. Смит нүдээр үзсэн зүйлээ «Библид бичигдсэн газрын түүхэн геологи» (The Historical Geography of the Holy Land) номдоо ийнхүү бичжээ. «Заримдаа бид үдийн завсарлагаанаар Иудейн тэр худгуудын нэг дээр амардаг байсан. Гурав, дөрвөн хоньчин сүргээ услахаар тэнд ирдэг байсан. Сүргүүд нь хоорондоо холилдчихоод байхад хоньчид яаж өөрийнхөө сүргийг ялгах юм бол гэж бид их сонирхож байлаа. Хоньдоо сайтар усалж, зөнгөөр нь хэсэг байлгасны дараа хоньчид хөндийгөөр өгсөн тарж явчихав. Тэгээд өөр өөрсдийн гэсэн өвөрмөц дуугаар хонин сүргээ дуудахад хоньд нь хоньчин руугаа очих нь тэр. Тэд ирсэн шигээ эмх замбараатай явж одсон». Есүсийн сургаалыг танин мэдэж, дуулгавартай мөрдөж, удирдлагыг нь дагасан цагт «сайн хоньчны» хамгаалалтад орох боломжтойг ойлгуулахад үүн шиг тохиромжтой жишээ өөр байхгүй л болов уу.
nwtsty Ёох 10:16-гийн тайлбар
хариулах: Эсвэл «удирдах». Энэ зүйлд гарсан аго гэдэг грек үг хам сэдвээс шалтгаалан «авч (оруулах)», «удирдах» гэсэн утга илэрхийлдэг. МЭ 200-гаад оны грек гар бичмэлд үүнтэй холбоотой синаго гэдэг грек үгийг бичсэн бөгөөд үүнийг ер нь «цуглуулах» гэж орчуулдаг. Сайн Хоньчны хувьд Есүс энэ хашаан дахь хоньд (Лу 12:32-т «өчүүхэн сүрэг» гэсэн байдаг) болон өөр хоньдыг цуглуулж, хөтөлж, хамгаалж, хооллоно. Эдгээр хонь нэг хоньчинтой нэг сүрэг болно. Энэ жишээ нь Есүсийн дагалдагчдын эв нэгдлийг онцолдог.
Эрдэнэс хайх нь
nwtsty Ёох 9:38-ын тайлбар
хүндэтгэн мэхийв: Эсвэл, «бөхийх, хүндэтгэх ёс гүйцэтгэв». Проскинео гэдэг грек үг бурханд мөргөхийг заах тохиолдолд «мөргөх, шүтэх» гэж орчуулагддаг (Мт 4:10; Лу 4:8). Гэхдээ энэ тохиолдолд төрөлхийн сохор байгаад хараа орсон хүн Есүсийг Бурхны төлөөлөгч гэж үзээд түүнд хүндэтгэн мэхийсэн. Тэрээр Есүсийг цорын ганц Бурхан юм уу аль нэгэн бурхан гэж үзээгүй, харин «хүний Хүү», Бурхнаас эрх мэдэл авсан Мессиа гэж хүндэтгэн үзсэн (Ёох 9:35). Тэрээр Есүст мэхийхдээ Еврей Сударт дурдсан хүмүүсийн адилаар мэхийн ёсолсон нь лавтай. Тэр хүмүүс зөнчтэй, хаантай, Бурхны бусад төлөөлөгчтэй уулзахдаа мэхийн ёсолдог байжээ (1Са 25:23, 24; 2Са 14:4–7; Х.дээ 1:16; Х.дэ 4:36, 37). Олон тохиолдолд, Есүст мэхийсэн хүмүүс Мессиагийн хэн болохыг мэдсэндээ, Есүс дээр Бурхны таалал оршдогт талархаж мэхийсэн.
nwtsty Ёох 10:22-ын тайлбар
Сүмийг Шинэтгэн ариусгасны баяр: Энэ баярын еврей нэр нь «нээлт, зориулалт» гэсэн утгатай Ханукка (чанукка) юм. МЭӨ 165 онд Иерусалимын сүмийг Бурханд дахин зориулснаас хойш тэмдэглэж ирсэн уг баяр нь нар буцах үе (бүс 19-ийг үзнэ үү) ойртох хислев сарын 25-нд эхлээд 8 өдөр үргэлжилдэг. Сирийн хаан IV Антиокус Эпифанес иудейчүүдийн Бурхан Еховаг доромжлон Сүмийг нь бузарласан. Жишээ нь, тахилын том ширээн дээр өөр бурхдад шатаалт тахил өргөдөг тахилын ширээ босгосон. МЭӨ 168 оны хислев сарын 25-нд Еховагийн сүмийг бүрмөсөн бузарлахын тулд тахилын ширээн дээр гахай нядалж махных нь шүүсийг сүмээр нэг цацсан. Тэгээд сүмийн хаалгануудыг шатааж, тахилчдын өрөөнүүдийг нурааж, тахилын алтан ширээ, оршихуйн талхны ширээ, дэнлүүний алтан суурийг авч явсан. Дараа нь Еховагийн сүмийг харийн бурхан болох Олимпын Зевст зориулсан. Иудас Маккабеус хоёр жилийн дараа хот болон сүмийг дахин эзэлсэн. Сүмийг ариусгасны дараа Антиокус нь Зевсийн тахилын ширээн дээр бузар тахил өргөснөөс яг 3 жилийн дараа буюу МЭӨ 165 оны хислев сарын 25-нд сүмийг Бурханд дахин зориулсан. Түүнээс хойш Еховад дахин өдөр бүр шатаалт тахил өргөж эхэлсэн. Ехова Иудас Маккабеусыг ялалт байгуулахад тусалж, сүмийг сэргээлгэсэн гэж Библид байдаггүй. Гэхдээ Персийн хаан Кир гэх мэтийн харийн хүнээр дамжуулан жинхэнэ шүтлэгтэй холбоотой санаа зорилгоо биелүүлж байсан (Ис 45:1). Тэгэхлээр, Ехова өөрт нь үйлчилдэг хүмүүсийн нэгээр дамжуулан санаа зорилгоо биелүүлсэн бололтой гэж үзэх нь зүйд нийцнэ. Библийг үзвэл, Мессиа болон үйлчлэл, золиостой нь холбоотой зөгнөлүүд биелэхэд сүм оршин тогтнож, үйл ажиллагаа нь хэвийн явагдах ёстой байжээ. Мөн түүнчлэн, Мессиаг илүү агуу тахил өргөх буюу амиа хүн төрөлхтний төлөө золиослох тэр цаг хүртэл левичүүд тахил өргөсөөр байх ёстой байв (Да 9:27; Ёох 2:17; Ев 9:11–14). Сүмийг Шинэтгэн ариусгасны баяр тэмдэглэхийг Христийн дагалдагчдад тушаагаагүй (Кол 2:16, 17). Гэхдээ Есүс юм уу шавь нар нь уг баяр тэмдэглэхийг буруушаасан тухай Библид байдаггүй.
10 САРЫН 8–14
БУРХНЫ ҮГЭН ДЭХ ЭРДЭНЭС | ЁОХАН 11, 12
«Өрөвч Есүсийг дуурай»
nwtsty Ёох 11:24, 25-ын тайлбар
ах минь амилна гэдгийг би мэднэ: Есүс ирээдүйн эцсийн өдөр болох амилалтын тухай хэлж байна гэж Марта боджээ. Тэрээр амилалтад итгэсэн нь онцгой явдал юм. Тэр үед садукайчууд Библид тодорхой гардаг амилалтын тухай сургаалыг үгүйсгэдэг байжээ (Да 12:13; Мр 12:18). Нөгөөтээгүүр, фарисайчууд үхэшгүй мөнхийн сүнсэнд итгэдэг байсан. Гэхдээ, Есүс амилах найдварын тухай хэлснийг, бүр нас барагсдыг амилуулж байсныг Марта мэддэг байв. Гэвч Лазар шиг нас бараад удсан хүнийг амилуулж байгаагүй юм.
Би амилуулдаг, амьдруулдаг нэгэн: Есүс өөрөө нас барж, амилснаараа нас барагсдад амилах замыг нээж өгсөн. Есүсийг амилсны дараа Ехова түүнд нас барсан хүнийг амилуулах, мөнх амьдруулах чадвар өгсөн. Ил 1:18-д Есүс өөрийгөө «амьд байгаа» бөгөөд «үхэл болон Булшны түлхүүрүүдтэй» гэж хэлдэг. Тиймээс Есүс бол амьд болон үхэгсдийн найдвар юм. Тэрээр булшийг онгойлгож үхэгсдэд амь өгөхөө амласан. Амилсан хүмүүс тэнгэрт Есүстэй хамт захирах юм уу тэнгэрийн засаглал дор дэлхий дээр амьдарна (Ёох 5:28, 29; 2 Пе 3:13).
nwtsty Ёох 11:33–35-ын тайлбар
уйлахыг ... уйлав: Ёох 11:33-т хэрэглэсэн «Уйлах» гэдэг грек үгээр ер нь чанга дуугаар уйлахыг заадаг. Иерусалим устгагдах тухай зөгнөхдөө Есүс уйлсан тухай өгүүлэхэд энэ грек үгийг хэрэглэсэн (Лу 19:41). Гэхдээ Ёох 11:35-д «Уйлав» гэж орчуулсан дакрёо гэдэг грек үг нь Лу 7:38; Үй 20:19, 31; Ев 5:7; Ил 7:17; 21:4 гэх зэргийн зүйлд гардаг «нулимс» гэсэн нэр үгнээс үүссэн үйл үгийн хэлбэр юм. Энэ нь чанга дуугаар уйлах гэхээсээ илүү, нулимс унагахыг онцолсон үг юм. Энэ үйл үг Грек Судрын зөвхөн энэ зүйлд гардаг бөгөөд Мариа болон иудейчүүдийн уйлсныг дүрсэлсэн үгнээс ялгаатай. Есүс Лазарыг амилуулах гэж байсан хэдий ч хайртай найзуудынхаа гашуудаж байгааг хараад их гунигласан. Найзууддаа их хайртай, тэднийгээ их өрөвдсөндөө ичиж зоволгүй уйлжээ. Хайртай дотнын хүнээ үхэлд алдсан хүмүүсийн сэтгэлийг Есүс мэдэрч ойлгодгийг энэ явдал тодорхой харуулж байна.
гашуудан шаналж: Энэ хоёр грек үгийг зэрэг хэрэглэсэн нь энэ тохиолдолд Есүсийн сэтгэл их хүчтэй хөдөлснийг харуулж байна. «Гашуудан» гэж орчуулсан грек үг эмбримаомаи нь сэтгэл хүчтэй хөдөлснийг илэрхийлдэг ч хам сэдвийг нь үзвэл гүнээ гашуудсаныг хэлдэг. «Шаналж» гэж орчуулсан грек үг тарассо-г үгчилбэл сэтгэл үймрэх гэсэн утгатай. Нэг эрдэмтний тайлбарласнаар, энэ үгийг энэ тохиолдолд «сэтгэлийн зовлон; асар их зовнил, уй гашууд автах» гэсэн утгаар хэрэглэсэн байна. Юудас өөрөөс нь урвана гэдгийг бодох үедээ Есүс ямар байсныг Ёох 13:21-д тэмдэглэхэд бас энэ үгийг хэрэглэсэн (Ёох 11:35-ын тайлбарыг үзнэ үү).
Эрдэнэс хайх нь
nwtsty Ёох 11:49-ийн тайлбар
тэргүүн тахилч: Израйл тусгаар улс байхад тэргүүн тахилчаар томилогдсон хүн насан туршдаа тэр албыг хашдаг байв (То 35:25). Гэхдээ Израйлыг Ром захирч байх үед Ромын захирагчид тэргүүн тахилчийг томилж, халах эрхтэй байсан («Тэргүүн тахилч» гэсэн Үгийн тайлбарыг үзнэ үү). Ромчуудын томилсон Каяаф гарамгай дипломатч байсан учраас урьд урьдын тэргүүн тахилчдаа бодвол албан тушаалдаа удаан тогтсон. Тэрээр МЭ 18 оны орчим томилогдож МЭ 36 он хүртэл тэргүүн тахилч байжээ. Ёохан түүнийг тэр жилийн буюу МЭ 33 оны тэргүүн тахилч гэж хэлсэн нь Каяафыг тэргүүн тахилч байх хугацаанд Есүсийн нас барсан чухал жил багтдагийг онцлох гэснийх бололтой. (Каяафын гэр байсан байж болох газрыг үзье гэвэл бүс 16-г үзнэ үү.)
nwtsty Ёох 12:42-ын тайлбар
захирагч: Энд «захирагч» гэж орчуулсан грек үгээр Зөвлөл буюу Иудейн дээд шүүхийн гишүүдийг хэлсэн бололтой. Ёох 3:1-д Никодемыг бас энэ үгээр заасан байдаг. Тэрээр Иудейн дээд шүүхийн гишүүн байжээ.
синагогоос хөөгдөх: Эсвэл «хасагдах; синагогт орох эрхгүй болох». Апосинагогос гэдэг грек тэмдэг нэр зөвхөн Ёох 9:22; 12:42; 16:2-т гардаг. Хүмүүс хөөгдсөн хүнээс зайлсхийж түүнийг нийгмээс тусгаарлаж, доромжилдог байв. Бусдаасаа ийнхүү тусгаарлагдсан хүний гэр бүл санхүүгийн их хүнд байдалд ордог байсан. Синагогт сургалт боловсролын үйл ажиллагаа голдуу явуулдаг ч заримдаа орон нутгийн шүүх ажиллагаа явуулдаг байжээ. Энэ нь ташуурдах, хөөх ял оноох эрхтэй байсан.
10 САРЫН 15–21
БУРХНЫ ҮГЭН ДЭХ ЭРДЭНЭС | ЁОХАН 13, 14
«Би та нарт жишээ үзүүлсэн»
nwtsty Ёох 13:5-ын тайлбар
шавь нарынхаа хөлийг угааж: Эртний Израйлчууд ихэнхдээ шаахай өмсдөг байв. Энэ нь улнаас шагайны дээгүүр чагтлан ороох оосортой энгийн эд байжээ. Үүнийг өмсөөд явбал хөл шороо тоос, шавар шавхайд дарагдах нь тодорхой. Тийм учраас айлд орохдоо шаахайгаа тайлдаг бөгөөд зочломтгой гэрийн эзэн зочдынхоо хөлийг өөрөө угаах юм уу зарцаараа угаалгах эсвэл угаах ус бэлдэж өгдөг заншилтай байжээ. Библид энэ тухай олон гардаг (Эх 18:4, 5; 24:32; 1Са 25:41; Лу 7:37, 38, 44). Есүс шавь нарынхаа хөлийг угаан даруу байж бие биедээ үйлчлэх хэрэгтэйг биечлэн үзүүлсэн.
nwtsty Ёох 13:12–14-ийн тайлбар
ёстой: Эсвэл «үүрэгтэй». Энд хэрэглэсэн грек үг нь мөнгө санхүүтэй холбоотой үг бөгөөд «хэн нэгэнд өртэй; хэн нэгэнд өр төлөх үүрэгтэй» гэсэн үндсэн утгатай (Мт 18:28, 30, 34; Лу 16:5, 7). Энэ үгийг энэ зүйл болон бусад хам сэдэвт илүү өргөн утгаар буюу ямар нэг зүйлийг хийх үүрэгтэй байх, үүрэг хүлээх гэсэн утгаар хэрэглэсэн (1Ёо 3:16; 4:11; 3Ёо 8).
w99 3/1 31 ¶1
Хамгийн агуу хүн даруухнаар үйлчилсэн нь
Шавь нарынхаа хөлийг угааж өгсөнөөрөө Есүс даруу байхын чухлыг ойлгуулсан. Үнэндээ, Христийн дагалдагчид өөрийгөө их чухалд тооцож, үргэлж бусдаар үйлчлүүлэх юм уу алдар хүндтэй байр суурь эзлэхийг эрмэлзэх ёсгүй. Харин ч Есүсийн үлдээсэн жишээг дуурайх ёстой. Есүс «үйлчлүүлэхийн тулд бус, харин үйлчлэхийн тулд бас олны төлөө амиа золихоор ирсэн» (Мт 20:28). Тийм ээ. Есүсийн дагалдагчид бие биедээ үйлчлэхийн тулд хамгийн дорд мэт санагдах ажлыг ч хийхэд бэлэн байх ёстой.
Эрдэнэс хайх нь
nwtsty Ёох 14:6-гийн тайлбар
Би бол зам, үнэн, амь: Гагцхүү Есүсээр дамжуулан залбирч байж Бурханд ойртох боломжтой болохоор Есүс бол зам юм. Тэрээр бас хүн төрөлхтнийг Бурхантай эвлэрүүлдэг «зам» юм (Ёох 16:23; Ро 5:8). Цаг ямагт үнэнийг ярьж үнэнд нийцүүлж амьдарсан учраас Есүс бол үнэн. Тэрээр олон зөгнөлийг биелүүлэн Бурхны санаа зорилго биелэхэд гол үүрэг гүйцэтгэдгээ харуулсан (Ёох 1:14; Ил 19:10). Тэрхүү зөгнөлүүд «Есүсээр дамжиж “За” болсон» буюу биелсэн. (2 Ко 1:20). Есүсийн золиосоор дамжуулан хүн төрөлхтөн «жинхэнэ амь» буюу «мөнх амьтай» болох боломжтой болсон учраас Есүс бол амь (1 Ти 6:12, 19; Эф 1:7; 1Ёо 1:7). Бас Диваажинд амилж мөнх амьдрах олон сая хүний төлөө «амь» болно (Ёох 5:28, 29).
nwtsty Ёох 14:12-ын тайлбар
эдгээрээс ч агуу ажил: Есүс шавь нараа өөрөөс нь илүү агуу гайхамшиг үйлдэнэ гэсэн утгаар хэлээгүй. Харин дэлгэрүүлэх, заах ажлыг өөрөөс нь илүү өргөн хүрээтэй хийнэ гэдгийг хүлээн зөвшөөрч даруу байсан хэрэг юм. Есүсийн дагалдагчид илүү өргөн цар хүрээг хамарч, илүү олон хүнд, илүү удаан хугацаагаар дэлгэрүүлэх юм. Энэ үгнээс Есүс өөрийнхөө хийж байгаа ажлыг дагалдагчид нь үргэлжлүүлэн хийгээсэй гэж хүссэнийг мэдэж болно.
10 САРЫН 22–28
БУРХНЫ ҮГЭН ДЭХ ЭРДЭНЭС | ЁОХАН 15–17
«Та нар ертөнцийнхөнтэй адилгүй»
nwtsty Ёох 15:19-ийн тайлбар
ертөнц: Энэ хам сэдэвт космос гэдэг грек үгээр Бурхны үйлчлэгчдээс бусад хүмүүсийг буюу Бурхнаас хөндийрсөн ёс бус нийгмийг хэлдэг. Дагалдагчдаа ертөнцийнх биш гэсэн Есүсийн энэ үгийг Сайн мэдээ бичигчдээс зөвхөн Ёохан бичжээ. Үнэнч элчүүдтэйгээ Есүс сүүлчийн удаа залбирахдаа үүнтэй адилхан санааг хоёр удаа хэлсэн байдаг (Ёох 17:14, 16).
nwtsty Ёох 15:21-ийн тайлбар
миний шавь гэдгээс болж: Үгч., «миний нэрээс болж». Библид гардаг «нэр» гэдэг үгээр тухайн нэрийн эзэн хүнийг, түүний нэр хүндийг, тухайн хүнийг илэрхийлдэг бүхнийг хэлдэг. Есүсийн нэр нь Эцгээсээ авсан түүний эрх мэдэл, байр суурийг бэлгэддэг (Мт 28:18; Флп 2:9, 10; Ев 1:3, 4). Ертөнцийн хүмүүс дагалдагчдыг нь ямар учраас эсэргүүцэхийг Есүс тайлбарласан. Учир нь тэд [Есүсийг] илгээсэн Нэгнийг мэддэггүй. Бурхныг мэддэг бол Есүсийн нэр юу бэлгэддэгийг ойлгож, түүнийг хүлээн зөвшөөрөх байсан (Үй 4:12). Үүнд Бурхны томилсон Захирагч, хаадын Хаан гэсэн Есүсийн байр суурь багтдаг бөгөөд бүх хүн амьтай болъё гэвэл түүнд мэхийн захирагдах ёстой (Ёох 17:3; Ил 19:11–16). (Ду 2:7–12-той харьцуулна уу).
it-1 516
Зориг
Ехова Бурхантай дайсагнадаг ертөнцийнхний зан байдал, үйл хэрэгт бузартахгүй байхад, мөн ертөнцийнхэнд үзэн ядагдсан ч Бурханд үнэнч байхад Христийн дагалдагчдад зориг хэрэгтэй. Есүс шавь нартаа «Энэ ертөнцөд та нар зовно. Гэхдээ зоригтой байцгаа! Би ертөнцийг ялсан» гэж хэлсэн (Ёох 16:33). Бурхны Хүү ертөнцийн дарамт шахалтад хэзээ ч бууж өгөөгүй, харин ертөнцийнхнийг аль ч талаар дуурайлгүй ертөнцийг ялсан. Ялагч Есүсийн үлдээсэн гайхалтай жишээ болон гэм зэмгүй яваад эцэстээ яасныг судалбал ертөнцөөс тусгаар байж, бузартахгүй байсныг нь дуурайх зоригтой болно (Ёох 17:16).
Эрдэнэс хайх нь
nwtsty Ёох 17:21–23-ын тайлбар
эвтэй: Үгч., «нэг». Есүс өөрөө Эцэгтэйгээ «нэг» байх буюу нэгэн сэтгэлээр бие биеэ дэмждэгтэй адил дагалдагчид нь «нэг» байх буюу зорилго нэгтэй эв нэгдэлтэй, хамтарч ажиллаасай гэж залбирсан (Ёох 17:22). Христийн дагалдагчид ийнхүү эв нэгдэлтэй байж бие биетэйгээ, бас Бурхантайгаа хамтран ажиллах тухай Паул 1 Ко 3:6–9-д тэмдэглэжээ (1 Ко 3:8-ыг үзнэ үү).
жинхэнэ ёсоор эв нэгдэлтэй: Энэ зүйлд Есүс жинхэнэ ёсоор эв нэгдэлтэй байхыг Эцгээрээ хайрлуулахтай холбож тайлбарласан. Энэ нь Кол 3:14-т байдаг «Хайр бол эв нэгдлийн төгс холбоос» гэсэн үгтэй нийцдэг. Жинхэнэ ёсоор эв нэгдэлтэй байна гэдэг нь хувь хүний онцлог, авьяас чадвар, дадал зуршил, мөс чанар гэх зэргийн ялгаа огт байхгүй болно гэсэн үг биш. Харин Есүсийн дагалдагчид үйл хэрэг, итгэл үнэмшил, сургаалаараа нэг болно гэсэн үг (Ро 15:5, 6; 1 Ко 1:10; Эф 4:3; Флп 1:27).
nwtsty Ёох 17:24-ийн тайлбар
ертөнцийн суурийг тавихаас: Энэ зүйлд «суурь» гэж орчуулсан грек үгийг Ев 11:11-д «хөл хүнд болох» эсвэл «хүүхэдтэй болох» гэж орчуулсан. «Ертөнцийн суурийг тавих» гэдгээр Адам Ева хоёрын хүүхэдтэй болохыг хэлсэн бололтой. Есүс «ертөнцийн суурийг тавих» гэдгийг Абелтай холбож тайлбарласан. Бурхны аврагдах зохистой гэж үзсэн анхны хүн нь Абел юм. Бас «ертөнцийн суурийг тавигдсанаас хойш нэр нь амийн номонд» бичигдсэн анхны хүн байсан бололтой (Лу 11:50, 51; Ил 17:8). Мөн Есүсийн энэ үгнээс, Бурхан өөрийг нь Адам Ева хоёрыг хүүхэдтэй болохоос өмнө ч хайрладаг байсныг мэдэж болно.
10 САРЫН 29—11 САРЫН 4
БУРХНЫ ҮГЭН ДЭХ ЭРДЭНЭС | ЁОХАН 18, 19
«Есүс үнэний тухай гэрчилсэн»
nwtsty Ёох 18:37-гийн тайлбар
гэрчлэхийн: Грек Сударт «гэрчлэх» гэж орчуулагддаг мартирео болон «гэрч» гэж орчуулагддаг мартириа, мартис гэсэн грек үг өргөн утгатай. Эдгээр үг нь өөрөө мэдсэн, харсан үнэнийг гэрчлэн хэлнэ гэсэн үндсэн утгатай ч «тунхаглах, батлах, сайнаар ярих» гэсэн санааг бас багтаадаг. Есүс итгэж үнэмшдэг зүйлээ батлан хэлж, тунхаглахаас гадна Эцгийнхээ зөгнөл болон амлалт үнэн гэдгийг амьдралаараа баталсан (2 Ко 1:20). Хаант төр болон захирагч Мессиатай холбоотой Бурхны санаа зорилгын талаар нарийн зөгнөсөн байсан. Амиа тахил болгон өргөх хүртлээ дэлхий дэх амьдралынхаа туршид Есүс өөртэйгөө холбоотой бүх зөгнөлийг биелүүлсэн. Үүнд Хуулийн гэрээн дэх сүүдэр буюу үлгэр загвар багтдаг (Кол 2:16, 17; Ев 10:1). Ийнхүү Есүс үг болон үйл хэргээрээ «үнэний тухай гэрчилсэн».
Үнэний: Есүс ердийн үнэнийг биш Бурхны санаа зорилготой холбоотой үнэний тухай хэлсэн. Бурхны санаа зорилгын нэг чухал хэсэг нь «Давидын удмын» Есүс Тэргүүн тахилч ба Бурхны Хаант төрийн захирагч болох явдал юм (Мт 1:1). Есүс хүний ертөнцөд ирж, дэлхий дээр амьдарч, үйлчилсэн гол шалтгаан нь Бурхны Хаант төрийн тухай үнэнийг гэрчлэх явдал гэж тайлбарласан. Тэнгэрийн элчүүд Есүсийг Давидын төрсөн хот болох Иудейн Бетлехемд төрөхөөс өмнөхөн болон төрөх үед нь үүнтэй төстэй мэдээ тунхагласан (Лу 1:32, 33; 2:10–14).
nwtsty Ёох 18:38-ын тайлбар
Үнэн гэж юу вэ?: Пилат Есүсийн хэлсэн «үнэний» тухай биш ердийн үнэний тухай асуусан бололтой (Ёох 18:37). Хэрвээ чин сэтгэлээсээ ийнхүү асуусан бол Есүс хариулж өгөх байсан байх. Харин Пилат хариу сонсох гэсэндээ биш, бараг л «Үнэн гэж юу юм бэ? Тийм юм байхгүй!» гэж үл итгэсэн өнгөөр хэлсэн бололтой. Үнэндээ Пилат хариулахыг нь хүлээлгүй гадагш гаран иудейчүүд рүү очсон.
Эрдэнэс хайх нь
nwtsty Ёох 19:30-ийн тайлбар
амьсгал хураав: Эсвэл, «сүнсээ даатгав». «Сүнс» гэж орчуулсан грек үг пневма нь «амьсгаа» эсвэл «амийн хүч» гэсэн утга илэрхийлдэг. Зарим эрдэмтэд «даатгах, хураах» гэдэг грек үгийг хэрэглэсний учрыг «бүх юм гүйцсэн» болохоор Есүс амьдрах гэж хичээхээ өөрөө хүсээд больсон гэж тайлбарладаг. Нээрээ ч Есүс дуртайяа «Өөрийн амийг үхэл уруу асгажээ» (Ис 53:12; Ёох 10:11).
nwtsty Ёох 19:31-ийн тайлбар
Тэр Амралтын өдөр нь онцгой өдөр байсан: Нисан сарын 15 буюу Дээгүүр өнгөрөх баярын дараагийн өдөр 7 хоногийн хэд дэх өдөр байхаас үл хамааран амралтын өдөр байсан (Ле 23:5–7). Энэ тусгай Амралтын өдөр нь тогтсон Амралтын өдөртэй (иудейчүүдийн тооллоор долоо дахь өдөр буюу баасан гаргийн нар жаргахаас бямба гараг нар жаргах хүртэл үргэлжилдэг өдөр) давхацвал «онцгой» Амралтын өдөр гэж нэрлэдэг байв. Есүсийг нас барсан 5 дахь өдрийн маргааш нь ийм амралтын өдөр тохиосон. МЭ 29–35 оны хооронд зөвхөн МЭ 33 онд л Нисан сарын 14 баасан гарагт байж таарсан. Тэгэхээр энэ нь Есүс МЭ 33 оны Нисан сарын 14-нд нас барсныг баталдаг.