Ġesù Jsalvana—Kif?

“Ġesù jsalvana!” “Ġesù hu s-​Salvatur tagħna!” F’ħafna pajjiżi madwar id-​dinja, messaġġi bħal dawn jidhru fuq il-​ħitan taʼ xi bini u f’postijiet pubbliċi oħrajn. Miljuni jemmnu sinċerament li Ġesù hu s-​Salvatur tagħhom. Kieku kellek issaqsihom, “Ġesù kif isalvana?” x’aktarx li se jwiġbuk, “Ġesù miet għalina” jew, “Ġesù miet għal dnubietna.” Iva, permezz tal-​mewt taʼ Ġesù nistgħu niġu salvati. Imma kif jistaʼ jkun li l-​mewt taʼ bniedem wieħed tħallas għad-​dnubiet taʼ ħafna? Kieku kellhom jistaqsuk, “Il-​mewt taʼ Ġesù kif tistaʼ ssalvana?” kif kont twieġeb?

IT-​TWEĠIBA li tagħti l-​Bibbja għal din il-​mistoqsija hija sempliċi ferm imma ċara u mimlija sinifikat. Iżda biex nifhmu l-​importanza tagħha l-​ewwel irridu naraw il-​ħajja u l-​mewt taʼ Ġesù bħala soluzzjoni għal problema diffiċli ferm. Huwa biss billi nagħmlu hekk li se nkunu nistgħu nifhmu l-​valur enormi tal-​mewt taʼ Ġesù.

Billi Ġesù ta ħajtu, Alla kien qed jittratta s-​sitwazzjoni li qamet meta dineb Adam. Xi traġedja kien dan id-​dnub! L-​ewwel bniedem u martu, Eva, kienu perfetti. Darhom kienet il-​ġnien sabiħ taʼ Għeden. Alla tahom ix-​xogħol siewi li jieħdu ħsieb darhom. Kellhom ukoll jieħdu ħsieb b’imħabba l-​ħlejjaq ħajjin l-​oħrajn fuq l-​art. U hekk kif il-​bnedmin jibdew jimmoltiplikaw u jimlew l-​art b’miljuni tat-​tip tagħhom, kellhom jespandu l-​ġenna taʼ l-​art mad-​dinja kollha. (Ġenesi 1:28) X’xogħol meraviljuż u eċċitanti ngħataw! Iktar minn hekk, kellhom il-​kumpanija u l-​imħabba taʼ xulxin. (Ġenesi 2:18) Ma kien jonqoshom xejn. Quddiemhom kellhom ħajja hienja għall-​eternità.

Huwa diffiċli timmaġina kif setgħu jidinbu Adam u Eva. Imma l-​ewwel tnejn min-​nies irribellaw kontra l-​istess wieħed li ħalaqhom—Alla Jehovah. Permezz taʼ serpent, Satana x-​Xitan, il-​ħliqa spirtu, qarraq b’Eva biex din ma tobdix lil Jehovah, u Adam għamel bħalha.—Ġenesi 3:​1-6.

Ma kien hemm ebda dubju dwar x’kien se jagħmel il-​Ħallieq b’Adam u Eva. Hu kien diġà spjegalhom x’kienu l-​konsegwenzi tad-​diżubbidjenza, meta qal: “Mis-​siġar kollha tal-​ġnien tistaʼ tiekol, imma mis-​siġra taʼ tagħrif it-​tajjeb u l-​ħażin, la tikolx minnha, għax dak in-​nhar li tiekol minnha żgur li tmut.” (Ġenesi 2:​16, 17) Issa kien hemm mistoqsija taʼ importanza ferm akbar li kienet teħtieġ tweġiba.

L-​Umanità Tiffaċċja Problema Diffiċli

Id-​dnub oriġinali ħolqilha problema serja ferm lill-​umanità. Meta beda jgħix, Adam kien bniedem perfett. Għalhekk, uliedu setgħu gawdew ħajja perfetta għal dejjem. Madankollu, Adam dineb qabel ma kellu t-​tfal. Ir-​razza umana kollha kemm hi kienet għadha f’ġenbejh meta rċieva s-​sentenza: “Bl-​għaraq taʼ ġbinek tiekol ħobżok, sakemm terġaʼ lura lejn l-​art, għax minnha int meħud. Għax trab int, u fit-​trab terġaʼ tmur.” (Ġenesi 3:19) Għalhekk, meta Adam dineb u beda jmut bħalma kien qallu Alla, l-​umanità kollha kienet sentenzjata għall-​mewt flimkien miegħu.

B’mod xieraq, l-​appostlu Pawlu iktar tard kiteb: “Kien permezz taʼ bniedem wieħed [Adam] li fid-​dinja daħal id-​dnub, u permezz tad-​dnub il-​mewt, u hekk il-​mewt laħqet il-​bnedmin kollha, għax kollha dinbu.” (Rumani 5:12) Iva, minħabba d-​dnub oriġinali, it-​tfal, li suppost kellhom jitwieldu perfetti b’ħajja bla tmiem quddiemhom, twieldu bil-​prospett li jimirdu, jixjieħu, u jmutu.

“Dan m’huwiex ġust,” jistaʼ jkun hemm min jgħid. “Aħna m’għażilniex li ma nobdux lil Alla, bħalma għamel Adam. Għala għandna nitilfu l-​prospett li ngħixu għal dejjem u nkunu henjin?” Li kieku xi qorti tal-​liġi kellha tixħet lil iben fil-​ħabs minħabba li missieru jkun seraq karozza, aħna nafu li l-​iben ikollu d-​dritt jilmenta: “Dan m’huwiex ġust! Jien m’għamilt xejn ħażin.”—Dewteronomju 24:16.

Billi waqqaʼ lill-​ewwel raġel u mara fid-​dnub, Satana setaʼ kkonkluda li kien se jdaħħal lil Alla f’dilemma. Ix-​Xitan attakka kmieni ferm fl-​istorja tar-​razza umana—meta kienu għadhom ma twildux tfal. Malli dineb Adam, qamet din il-​mistoqsija importanti, X’se jagħmel Jehovah bit-​tfal li se jkollhom Adam u Eva?

Alla Jehovah għamel dak li kien ġust u sewwa. “Ma jistax ikun li Alla jagħmel id-​deni, li Xaddaj jagħmel dak li hu ħażin [“jaġixxi b’mod inġust,” NW],” iddikjara r-​raġel twajjeb Eliħu. (Ġob 34:10) U dwar Jehovah, il-​profeta Mosè kiteb: “Għax hu l-​Blata tagħna; perfett għemilu; u lkoll ġusti t-​triqat tiegħu. Alla taʼ kelmtu u ma jqarraqx; kollu ħaqq u kollu sewwa.” (Dewteronomju 32:4) Is-​soluzzjoni provduta minn dak Alla veru għall-​problema maħluqa mid-​dnub taʼ Adam ma ttellifniex l-​opportunità li ngħixu għal dejjem fuq art magħmula ġenna.

Alla Jipprovdi Soluzzjoni Perfetta

Ikkunsidra s-​soluzzjoni li pprovda Alla fis-​sentenza li ppronunzja fuq Satana x-​Xitan. Jehovah qal lil Satana: “Jien inqajjem mibegħda bejnek u bejn il-​mara [l-organizzazzjoni t’Alla fis-​sema], bejn nislek [id-dinja kontrollata minn Satana] u nisilha [Ġesù Kristu], u hu jisħaqlek rasek u int [Satana] tisħaqlu għarqubu [il-mewt taʼ Ġesù].” (Ġenesi 3:15) F’din l-​ewwel profezija tal-​Bibbja, Jehovah irrefera għall-​iskop tiegħu li jibgħat lill-​Iben spirtu tiegħu mis-​sema biex jiġi fuq l-​art ħalli jgħix bħala l-​bniedem perfett Ġesù u mbagħad imut—jinsaħaq fl-​għarqub—f’dan l-​istat bla dnub.

Alla għala kien jeħtieġ il-​mewt taʼ bniedem perfett? Sewwa, x’kien il-​kastig t’Alla Jehovah għal Adam jekk jidneb? Mhux il-​mewt? (Ġenesi 2:​16, 17) “Il-​ħlas tad-​dnub hu l-​mewt,” kiteb l-​appostlu Pawlu. (Rumani 6:23) Adam ħallas għad-​dnub tiegħu b’mewtu stess. Hu ngħata l-​ħajja, għażel li jidneb, u miet bħala kastig talli dineb. (Ġenesi 3:19) Xi ngħidu għall-​kundanna li ġiet fuq ir-​razza umana kollha kemm hi minħabba dan id-​dnub? Kienet meħtieġa mewt biex tpatti għad-​dnubiet tagħhom. Imma l-​mewt taʼ min setgħet tpatti b’mod ġust għan-​nuqqasijiet tal-​bnedmin kollha?

Il-Liġi li Alla ta lill-​ġens taʼ Iżrael tal-​qedem kienet titlob “ħajja b’ħajja [jew, ruħ b’ruħ].” (Eżodu 21:23) Skond dan il-​prinċipju legali, il-​mewt li kienet se tpatti għan-​nuqqasijiet taʼ l-​umanità ried ikollha valur indaqs għal dak li kien tilef Adam. Kienet biss il-​mewt taʼ bniedem perfett ieħor li setgħet tħallas għad-​dnub. Ġesù kien bniedem bħal dan. Tabilħaqq, Ġesù kien “prezz tal-​fidwa għal kulħadd” biex bih isalvaw il-​bnedmin kollha li setgħu jinfdew u li huma ġejjin minn Adam.—1 Timotju 2:6; Rumani 5:​16, 17, Saydon.

Il-​Mewt taʼ Ġesù Għandha Valur Kbir

Il-​mewt taʼ Adam ma kellha ebda valur. Hu kien jistħoqqlu li jmut għal dnubu. Madankollu, il-​mewt taʼ Ġesù kellha valur kbir għax meta miet ma kellu ebda dnub. Alla Jehovah setaʼ jaċċetta l-​valur tal-​ħajja perfetta taʼ Ġesù bħala fidwa għad-​dixxendenti ubbidjenti tal-​midneb Adam. U l-​valur tas-​sagrifiċċju taʼ Ġesù ma jiswiex biss biex iħallas għad-​dnubiet li għamilna fl-​imgħoddi. Kieku kien jiswa għalhekk biss, ma kien ikollna ebda futur. Peress li aħna mnisslin fid-​dnub, żgur li se nerġgħu niżbaljaw. (Salm 51:7 [51:​5, NW]) Kemm għandna għalfejn inkunu grati li l-​mewt taʼ Ġesù tagħtina l-​opportunità li niksbu l-​perfezzjoni li Jehovah kellu f’moħħu fil-​bidu għan-​nisel taʼ Adam u Eva!

Adam jistaʼ jiġi mxebbah maʼ missier li miet u ħalliena f’dejn finanzjarju tant kbir (id-dnub) li assolutament m’huwiex possibbli għalina li neħilsu minnu. Mill-​banda l-​oħra, Ġesù hu bħal missier tajjeb li miet u ħallielna wirt għani li mhux biss jeħlisna mid-​dejn enormi li għabbiena bih Adam imma wkoll jipprovdilna biżżejjed biex ngħixu għall-​eternità. Il-​mewt taʼ Ġesù mhux biss tikkanċella d-​dnubiet li għamilna fl-​imgħoddi iżda hija wkoll provvediment meraviljuż għall-​futur tagħna.

Ġesù jsalvana għaliex hu miet għalina. U xi provvediment imprezzabbli hi l-​mewt tiegħu! Meta narawha bħala parti mis-​soluzzjoni t’Alla għall-​problema komplessa tad-​dnub taʼ Adam, il-​fidi tagħna f’Jehovah u fil-​mod kif hu jagħmel l-​affarijiet tissaħħaħ. Iva, permezz tal-​mewt taʼ Ġesù, “kull min jemmen fih” se jiġi salvat mid-​dnub, mill-​mard, mix-​xjuħija, u mill-​mewt infisha. (Ġwann 3:16) Troddlu ħajr int lil Alla talli għamel dan l-​arranġament taʼ mħabba għas-​salvazzjoni tagħna?

[Stampa f’paġna 5]

Adam ġab id-​dnub u l-​mewt fuq l-​umanità

[Stampa f’paġna 6]

Jehovah ipprovda soluzzjoni perfetta