Prosperità Vera fid-​Dinja l-​Ġdida t’Alla

DAVID,a raġel miżżewweġ u missier Kristjan, mar joqgħod l-​Istati Uniti, u kien fiduċjuż li kien qed jagħmel l-​aħjar ħaġa għalih u għal familtu. Għalkemm ma xtaqx iħalli lil martu u lil uliedu warajh, hu ħassu ċert li setaʼ jkollhom ħajja aħjar li kieku biss kellu iżjed flus. Għalhekk, hu aċċetta stedina mingħand xi qraba fi New York u ma damx ma sab impjieg hemmhekk.

Però, hekk kif beda jgħaddi ż-​żmien, il-​ħarsa ottimista taʼ David bdiet tiċċajpar. Rari kien ikollu ħin għal attivitajiet spiritwali. Kien hemm żmien meta kien kważi tilef il-​fidi f’Alla. Kien biss wara li waqaʼ f’tentazzjoni morali li fl-​aħħar irrealizza bir-​realtà tas-​sitwazzjoni li kien fiha. Peress li kien moħħu fil-​prosperità materjali, hu bil-​mod il-​mod kien qed jitbiegħed minn dak kollu li verament kien importanti għalih. Kellu jagħmel xi bidliet.

Bħal David, ħafna jemigraw minn pajjiżi foqra kull sena, bit-​tama li jtejbu s-​sitwazzjoni ekonomika tagħhom. Madankollu, ħafna drabi, huma jsofru telfa kbira spiritwali. Ħafna staqsew, ‘Jistaʼ Kristjan jiġri wara għana materjali u fl-​istess ħin ikun għani m’Alla?’ Kittieba u mexxejja reliġjużi famużi jgħidu li dan huwa possibbli. Imma bħalma tgħallmu David u oħrajn, jistaʼ jkun diffiċli li tikseb waħda mingħajr ma titlef l-​oħra.​—Luqa 18:24.

Il-​Flus M’Humiex Ħżiena

Il-​flus, bla dubju, huma invenzjoni tal-​bniedem. Bħal kull invenzjoni oħra, m’humiex ħżiena fihom infushom. M’humiex ħlief metodu kif tpartat ħaġa m’oħra. Barra minn hekk, meta jiġu użati b’mod xieraq, il-​flus jistgħu jservu għal skop tajjeb. Per eżempju, il-​Bibbja turi li ‘l-​flus fihom il-​kenn,’ speċjalment għall-​problemi li għandhom x’jaqsmu mal-​faqar. (Koħèlet 7:12) Għal xi wħud jidher li “l-​flus jagħmlu tajjeb għal kollox.”​—Koħèlet 10:19.

L-Iskrittura tikkundanna l-​għażż u tinkuraġġixxi x-​xogħol iebes. Aħna rridu nipprovdu għall-​familja immedjata tagħna, u jekk ikollna xi ħaġa żejda, ikollna ‘xi ħaġa x’nagħtu lil min hu fil-​bżonn.’ (Efesin 4:28; 1 Timotju 5:8) Iktar minn hekk, minflok ma tħeġġiġna biex inċaħħdu lilna nfusna, il-​Bibbja tinkuraġġina biex nieħdu pjaċir b’dak li jkollna. Jintqalilna biex ‘nieħdu sehemna’ u nifirħu bil-​frott taʼ xogħolna. (Koħèlet 5:​17-19, [5:​18-20, NW]) Fil-​fatt, hemm diversi eżempji fil-​Bibbja taʼ rġiel u nisa leali li kienu għonja.

Irġiel Leali li Kienu Għonja

Abraham, qaddej leali t’Alla, kiseb imrieħel kbar, ħafna fidda u deheb, u mijiet taʼ qaddejja għal daru. (Ġenesi 12:5; 13:​2, 6, 7) Ir-​raġel ġust Ġob ukoll kellu għana ġmielu​—fi mrieħel, qaddejja, deheb, u fidda. (Ġob 1:3; 42:​11, 12) Dawn l-​irġiel kienu għonja anki skond il-​livelli taʼ llum, imma kienu għonja wkoll m’Alla.

L-appostlu Pawlu jsejjaħ lil Abraham “il-​missier taʼ dawk kollha li jkollhom il-​fidi.” Abraham la kien xħiħ u lanqas miġbud iżżejjed lejn dak li kellu. (Rumani 4:11; Ġenesi 13:9; 18:​1-18) Bl-​istess mod, Alla nnifsu ddeskriva lil Ġob bħala “perfett u tajjeb.” (Ġob 1:8) Hu kien dejjem lest li jgħin lill-​foqra u lill-​maħqurin. (Ġob 29:​12-16) Kemm Abraham kif ukoll Ġob fdaw f’Alla iktar milli fl-​għana li kellhom.​—Ġenesi 14:​22-24; Ġob 1:​21, 22; Rumani 4:​9-12.

Eżempju ieħor huwa s-​Sultan Salamun. Bħala l-​werriet tat-​tron t’Alla f’Ġerusalemm, Salamun mhux biss ġie mbierek b’għerf divin imma wkoll b’abbundanza taʼ ġid u glorja. (1 Slaten 3:​4-14) Għall-​biċċa l-​kbira taʼ ħajtu hu kien leali. Imma fl-​aħħar snin taʼ ħajtu, ‘qalb [Salamun] ma baqgħetx kollha kemm hi mal-​Mulej.’ (1 Slaten 11:​1-8) Fil-​fatt, l-​esperjenza tiegħu taʼ niket turi biċ-​ċar xi ftit min-​nases komuni tal-​prosperità materjali. Ikkunsidra xi ftit minnhom.

In-​Nases tal-​Prosperità

L-​iktar periklu serju huwa meta tibda tħobb il-​flus u dak li tistaʼ tixtri bihom. F’ċerti wħud, l-​għana jipproduċi xenqa qawwija li qatt ma tiġi sodisfata. Fil-​bidu tar-​renju tiegħu, Salamun innota din it-​tendenza f’oħrajn. Hu kiteb: “Min iħobb il-​flus ma jixbax bil-​flus, u min iħobb l-​għana ma jixbax bil-​qligħ. Dan ukoll hu frugħa.” (Koħèlet 5:9 [5:​10, NW]) Iktar tard, kemm Ġesù kif ukoll Pawlu wissew lill-​Kristjani dwar din l-​imħabba qarrieqa.​—Marku 4:​18, 19; 2 Timotju 3:2.

Meta l-​flus isiru l-​interess primarju tagħna, iktar milli mezz biex jgħinuna nwettqu xi ħaġa, aħna nsiru inklinati għal kull tip taʼ tentazzjoni morali, inkluż il-​gideb, is-​serq, u t-​tradiment. Ġuda l-​Iskarjota, wieħed mill-​appostli taʼ Kristu, ittradixxa lil sidu għal sempliċi 30 biċċa tal-​fidda. (Marku 14:11; Ġwanni 12:6) Minħabba li marru fl-​estrem, xi wħud saħansitra bidlu lil Alla mal-​flus billi qiemu lilhom minflok lil Alla. (1 Timotju 6:10) Għalhekk, il-​Kristjani għandhom dejjem jipprovaw ikunu onesti dwar il-​motiv veru tagħhom biex jagħmlu iktar flus.​—Ebrej 13:5.

Il-ġiri wara l-​għana jpoġġi wkoll perikli li huma iktar sottili. L-​ewwel, l-​abbundanza t’għana tistaʼ tinkuraġġina biex inkunu indipendenti. Ġesù inkluda dan meta rrefera għall-​“qawwa qarrieqa tar-​rikkezzi.” (Mattew 13:22) Il-​kittieb Bibliku Ġakbu, b’mod simili, wissa lill-​Kristjani biex ma jinsewx lil Alla anki meta jkunu qed jippjanaw biex jinnegozjaw. (Ġakbu 4:​13-16) Peress li l-​flus milli jidher jagħtuna ċerta indipendenza, għal dawk li jkollhom, hemm dejjem il-​periklu li jibdew jafdaw fi flushom iktar milli f’Alla.​—Proverbji 30:​7-9; Atti 8:​18-24.

It-tieni, David, li ssemma fil-​bidu, sab li l-​ġiri wara l-​għana ħafna drabi tant jikkonsma mill-​ħin u l-​enerġija taʼ dak li jkun li bil-​mod il-​mod ma jkomplix jiġri wara affarijiet spiritwali. (Luqa 12:​13-21) Għall-​għonja, hemm ukoll it-​tentazzjoni kontinwa li jużaw dak li għandhom primarjament għal attivitajiet li jagħtuhom pjaċir jew għall-​ġiri wara miri persunali.

Setaʼ l-​falliment spiritwali taʼ Salamun, sa ċertu punt, irriżulta minħabba li ħalla l-​mod lussuż kif jgħix idgħajjef is-​sensi tiegħu? (Luqa 21:34) Hu kien jaf li Alla pprojbixxa direttament li jkun hemm għaqda taʼ żwieġ maʼ nies minn ġnus oħra. Minkejja dan, maż-​żmien hu kellu ħarem taʼ madwar elf mara. (Dewteronomju 7:3) Minħabba li kien ħerqan biex jogħġob lin-​nisa barranin tiegħu, hu pprova jħallat twemmin differenti għall-​benefiċċju tagħhom. Kif intqal qabel, qalb Salamun bil-​mod il-​mod bdiet titbiegħed minn Ġeħova.

B’mod ċar, dawn l-​eżempji juru kemm huwa minnu l-​parir taʼ Ġesù: “Ma tistgħux tkunu lsiera t’Alla u tal-​flus.” (Mattew 6:24) Allura, Kristjan kif jistaʼ jkampa b’suċċess maʼ l-​isfidi ekonomiċi li ħafna jiffaċċjaw illum? Iktar importanti minn hekk, liema tama hemm għal ħajja aħjar fil-​futur?

Prosperità Vera Quddiemna

Kuntrarju għall-​patrijarki Abraham u Ġob u l-​ġens taʼ Iżrael, is-​segwaċi taʼ Ġesù għandhom l-​inkarigu li ‘jagħmlu dixxipli min-​nies tal-​ġnus kollha.’ (Mattew 28:​19, 20) Sabiex inwettqu dan l-​inkarigu hemm bżonn tal-​ħin u l-​isforzi tagħna minflok ma nużawhom għal miri sekulari. Għalhekk, iċ-​ċavetta għas-​suċċess qiegħda f’li nagħmlu dak li qalilna nagħmlu Ġesù: “Mela, ibqgħu fittxu l-​ewwel is-​saltna [t’Alla] u s-​sewwa tiegħu, u dawn l-​affarijiet l-​oħrajn kollha se jiżdidulkom.”​—Mattew 6:33.

Wara li kważi tilef il-​familja u l-​ispiritwalità tiegħu, David fl-​aħħar kien kapaċi jirkupra mill-​iżbalji tiegħu u issa qed jgħix ħajtu kif inhu xieraq. Kif wiegħed Ġesù, meta David reġaʼ ta prijorità lill-​istudju tal-​Bibbja, it-​talb, u l-​ministeru, imbagħad l-​affarijiet l-​oħra bdew jaqgħu f’posthom. Bil-​mod il-​mod reġaʼ kiseb ir-​relazzjoni tiegħu maʼ martu u wliedu. Reġaʼ kiseb il-​ferħ u l-​kuntentizza. Hu xorta waħda għadu jaħdem iebes. Din m’hijiex xi storja taʼ xi ħadd fqir li sar sinjur. Madankollu, hu tgħallem lezzjonijiet għaqlin mill-​esperjenza taʼ wġigħ li kellu.

David, issa jaħsibha differenti dwar il-​pass li ħa biex imur l-​Istati Uniti, u huwa determinat li qatt iktar ma jħalli l-​flus jiddominaw id-​deċiżjonijiet tiegħu. Issa hu jaf li l-​iktar affarijiet prezzjużi fil-​ħajja​—familja li tħobb, ħbieb veri, u relazzjoni m’Alla​—ma jistgħux jinkisbu bil-​flus. (Proverbji 17:17; 24:27; Isaija 55:​1, 2) Tabilħaqq, l-​integrità morali hija ħafna iktar prezzjuża mill-​ġid materjali. (Proverbji 19:1; 22:1) Flimkien mal-​familja tiegħu, David huwa determinat li jpoġġi l-​prijoritajiet xierqa fl-​ewwel post.​—Filippin 1:10.

L-isforzi tal-​bniedem biex jibni soċjetà għanja u fl-​istess ħin b’morali tajbin fallew kemm-il darba. Barra minn hekk, Alla wiegħed li s-​Saltna tiegħu se tipprovdi abbundanza t’affarijiet materjali u spiritwali li aħna għandna bżonn sabiex nissodisfaw ruħna. (Salm 72:16; Isaija 65:​21-23) Ġesù għallem li biex verament inkunu ferħanin irridu l-​ewwel inkunu konxji tal-​bżonn spiritwali tagħna. (Mattew 5:3) Mela sew jekk aħna fqar u sew jekk aħna għonja materjalment, il-​fatt li nagħtu prijorità lill-​affarijiet spiritwali issa se jkun l-​aqwa mod kif kull wieħed u waħda minna jistaʼ jipprepara għad-​dinja l-​ġdida t’Alla fil-​futur. (1 Timotju 6:​17-19) Din id-​dinja se tkun soċjetà għanja kemm materjalment kif ukoll spiritwalment.

[Nota taʼ taħt]

[Stampi f’paġna 5]

Ġob fada f’Alla, mhux fl-​għana li kellu

[Stampi f’paġna 7]

L-​iktar affarijiet prezzjużi fil-​ħajja ma jistgħux jinkisbu bil-​flus